1. ¿Toni kichiuanij itekitikauan Jehová desde ne uejkaujya?

 ¿SEMI tikontasojta Jehová? ¡Tikmatij ke kemaj! Uan amo sayoj tejuatsin porin desde ne uejkauj tel miakej kitasojtanij (Sal. 104:​33, 34). Miakej kichiuanij miak taman para okachi kitekitiliskej Jehová, kemej nazareos keman nemiaj israelitas. ¿Akonimej katkaj uan toni technextilia tein kichiuayaj?

2. 1) ¿Akonimej katkaj nazareos? (Números 6:​1, 2). 2) ¿Keyej sekin israelitas mochiuayaj nazareos?

² Tajtol nazareo itech hebreo kijtosneki “taijital”, “akin kixelojkej” oso “ixyetok para kichiuas se tekit tein motelneki”. Nazareos katkaj israelitas akin semi kitasojtayaj Jehová, uan monekia kichiuaskej seki taman para okachi kitekitiliskej, yejua ika kinnamikia maj kinnotsakan nazareos. Itanauatil Moisés kijtouaya ke se takat oso se siuat uelia motenkauaya iuan Jehová ke mochiuaskia nazareo se tiempo (xikonixtajtolti Números 6:​1, 2). a Keman motenkauayaj, monekia kitakamatiskej seki tanauatilmej tein oksekin israelitas amo monekia kichiuaskej. ¿Uan keyej aksa mochiuaya nazareo? Xa porin semi kitasojtaya Jehová uan kitasojkamatiliaya nochi tein kimakaya (Deut. 6:5; 16:17).

3. ¿Keyej titamatij kemej nazareos?

³ Keman “itanauatil Cristo” kiixpatak iTanauatil Moisés, itekitikauan Dios amo ueliajok mochiuayaj nazareos (Gál. 6:2; Rom. 10:4). Sayoj ke ijkon kemej nazareos, tejuan  no tiknekij tiktekitiliskej Jehová ika nochi toyolo, tonemilis, totanemilil uan ika nochi tochikaualis (Mar. 12:30). Uan yejua nejon tein tikiluiaj keman iuan timotemaktiaj Jehová. Para tikchiuaskej tein timotenkaujkej, moneki tiktekitiliskej Jehová kemej kiyolpaktia uan tikchiuaskej okseki taman para okachi tiktekitiliskej. Maj tikitakan keniuj nazareos kichiuayaj tein motenkauayaj uan keniuj tein kichiujkej techpaleuia maj tikchiuakan tein tejuan timotenkaujkej (Mat. 16:24). b

MAJ TIKCHIUAKAN OKSEKI TAMAN PARA OKACHI TIKTEKITILISKEJ JEHOVÁ

4. Kemej kijtoua Números 6:​3, 4, ¿toni amo monekia kichiuaskej nazareos?

⁴ (Xikonixtajtolti Números 6:​3, 4). Nazareos amo ueliaj tayiaj tein teuintij, nion ueliaj kikuayaj uvas uan pasas. Okseki israelitas ueliaj kikuayaj nochi nejin porin amo tajtakol katka. Uan Biblia kijtoua ke Dios techtayokolia vino tein ‘techyolpaktia’ (Sal. 104:​14, 15). Maski ijkon, nazareos kiixtaliayaj amo kikuiskej nejin. c

5. ¿Toni kiixtalijkej kichiuaskej Madián uan Marcela, uan keyej?

⁵ Ijkon kemej kichiujkej nazareos, tejuan no tikchiuaj seki taman para okachi tiktekitiliskej Jehová. Maj tikitakan tein kinpanok Madián uan Marcela. d Nejin toknitsin uan isiuatsin kualtsin nemiaj ompa Colombia. Madián kitania miak tomin yejua ika nemiaj itech se kali tein semi kualtsin. Sayoj ke kinekiaj okachi kitekitiliskej Jehová, yejua ika kiixtalijkej kipataskej seki taman. Yejuan kijtouaj: “Tinemitoj itech se kali kampa amo ueyi uan tiknamakakej tocarro”. Madián uan Marcela amo akin kinchikaujkauij maj kichiuakan nejon, sayoj ke kichiujkej porin kinekiaj okachi tanojnotsaskej. Uan tel yolpakij porin kichiujkej nejon.

6. ¿Keyej akin tiktekitiliaj Jehová tikauanij seki taman? (No xikonita taixkopin).

⁶ Tiitekitikauan Dios tikauanij seki taman para okachi tiktekitiliskej Jehová (1 Cor. 9:​3-6). Yejuatsin amo techchikaujkauia maj tikchiuakan nejin, maski  ijkon, tikixtalijkej tikauaskej seki taman maski amo tajtakol. Sekin tokniuan amo kipiaj se kali, se kuali tekit oso hasta se tapialtsin. Uan oksekin kiixtalianij ayamo monamiktiskej oso amo niman kinpiaskej konemej satepan ke monamiktiaj. Oksekin kiixtalianij tapaleuitiuij okseko kampa moneki motanojnotsas, uan ijkon kichiuaj maski moneki yaskej uejka uan kinkauaskej ininchankauan uan inintasojikniuan. Timiakej ijkon tikchiuaj porin tiknekij okachi tiktekitiliskej Jehová. Tikmatij ke yejuatsin semi kipatiuita tein tikchiuaj para tiktekitiliskej maski tikchiuaskej miak taman oso amo (Heb. 6:10).

MAJ TIYOLCHIKAUJKEJ PARA TIKNEXTISKEJ KE AMO TIKCHIUAJ KEMEJ OKSEKIN

7. ¿Keyej se nazareo xa ouij kikisaya kichiuas tein motenkaujka? (Números 6:5; no xikonita taixkopin).

⁷ (Xikonixtajtolti Números 6:5). Nazareos motenkauayaj amo mokuaximaskej. Ijkon kinextiayaj ke mokauayaj maj kinixyekana Jehová. Komo se israelita mochiuaya nazareo miak tiempo, moskaltiaya itson uan no taman moitaya. Komo oksekin kipoujkaitaskiaj uan kiyolchikauaskiaj maj ijkon kisentoka, amo kiouijmakaskia kichiuas tein motenkaujka. Sayoj ke kemansa seki israelitas amo kinpoujkaitayaj uan amo kintasojkamatiliayaj tein kichiuayaj nazareos. Keman nemia tanauatijkej Amós, israelitas kikaujkaj Jehová, uan yejuan ‘kinmakayaj nazareos maj tayikan vino’, xa para maj amo kichiuanijok tein motenkaujkaj (Amós 2:12). Kemansa nazareos monekia moyolchikauaskej para kichiuaskej tein motenkaujkaj uan para kinextiskej ke katkaj tamamej.

8. ¿Toni tikonuelitak tein kipanok Benjamin?

⁸ Jehová uelis techpaleuis maj tiyolchikaujkej uan maj tiknextikan ke amo tikchiuaj kemej oksekin maski amo semi titajtouaj. Maj tikitakan tein kipanok Benjamin, se toknitsin de Noruega akin kipia majtakti xiuit. Kemej mochiujtok neteuilis ompa Ucrania, kampa momachtia kichiujkej teisa para kinextiskej ke kinpaleuiaj akin ompa nemij. Pipilkonemej monekia motasaltiskej kemej bandera de Ucrania uan mokuikatiskej. Benjamin kinemilij amo motokis para amo kichiuas nejon uan amo kipaleuis se altepet. Sayoj ke se tamachtijkej kiitak uan kitsajtsilij: “¡Xiuiki, xijsiui nikan timitschixtokej!”. Benjamin moyolchikauak,  motokij uan kiluij tamachtijkej: “Nejua amo nikpaleuia nion akin. Amo nimokalakia itech política. Uan hasta miakej itaixpantijkauan Jehová tsaktokej porin amo youij moteuitij”. Tamachtijkej kikakik uan kiluij ke amo monekia kichiuas tein kinauatiaya. Sayoj ke oksekin akin iniuan momachtiaya, kitajtanijkej keyej amo mokuikatiaya. Benjamin semi momoujtij uan hasta kinekia chokas. Maski ijkon, moyolchikauak uan kiniluij tein ipa kiluijkaya tamachtijkej. Satepan kiniluij itatuan ke Jehová kipaleuijka maj kijtouani tein kineltokaya.

9. ¿Keniuj uelis tikyolpaktiskej Jehová?

⁹ Keman tiktakamatij Jehová, oksekin kiitaj ke titamamej. Moneki maj tiyolchikaujkej para tikijtoskej kampa titekitij oso kampa timomachtiaj ke tiitaixpantijkauan Jehová. Uan kemej satepan okachi kichiuaskej tein amo kuali, okachi ouij yeski tiktakamatiskej tein Biblia tayolmajxitia uan tikinmatiltiskej oksekin kuali tanauatilmej (2 Tim. 1:8; 3:13). Sayoj ke moneki tikelnamikiskej ke tikyolpaktiaj Jehová keman timoyolchikauaj uan keman amo tikchiuaj kemej akin amo kitekitiliaj (Prov. 27:11; Mal. 3:18).

MAJ NOCHIPA TIKCHIUAKAN TEIN KIYOLPAKTIA JEHOVÁ

10. ¿Keyej nazareos ouij kinkisaya kichiuaskej tein kijtoua Números 6:​6, 7?

¹⁰ (Xikonixtajtolti Números 6:​6, 7). Nazareos amo ueliaj motokiayaj kampa yetoya se miket. Xa ueliskia moitas ke nejin amo ouij katka. Sayoj ke para se nazareo okachi ouij kichiuaskia tein motenkaujka komo akin momikiliaya katka se ichankauj. ¿Keyej? Porin ne uejkauj keman kitokayaj aksa, ichankauan uan oksekin monekia motokiskej kampa yetoya miket (Juan 19:​39, 40; Hech. 9:​36-40). Yejua ika nazareos amo ueliaj kichiuayaj kemej oksekin. Keman yejuan kisentokayaj kichiuayaj tein motenkaujkaj maski ininchankauan kinpanouaya teisa tein semi kinyolkokouaya, kinextiayaj ke semi takuaujtamatiaj. Sayoj ke Jehová nochipa kinpaleuiaya maj kixikokan tein kinpanouaya.

11. ¿Toni moneki tikixtaliskej tikchiuaskej keman tochankauan kipiaskej ouijkayomej? (No xikonita taixkopin).

¹¹ Tiitekitikauan Jehová tikitaj ke semi moneki maj tikchiuakan tein timotenkaujkej keman timotemaktijkej. Uan tiknextiaj keman tikixpejpenaj teisa uan  keman tochankauan kipiaj ouijkayomej. Tikinyekpiaj tochankauan kemej Biblia kijtoua ke moneki tikchiuaskej, sayoj ke nochipa tikchiuaj tein Jehová kiyolpaktia uan amo tein tochankauan kinekij (Mat. 10:​35-37; 1 Tim. 5:8). Kemansa xa tikchiuaskej teisa tein kiyolpaktia Jehová, sayoj ke tochankauan amo kiuelitaskej.

12. Keman Alexandru kipiak se kuejmol iuan isiuatsin, ¿toni kichiuak uan toni amo kichiuak?

¹² Maj tikitakan tein kipanok Alexandru uan isiuatsin, Dorina. Keman se xiuitya momachtijtoyaj Biblia, Dorina amo kinekikok momachtis, uan kinekia maj Alexandru amo no momachtianiok. Sayoj ke yejua kuali kinojnotsak uan kimelauilij ke yejua kinekia kisentokas momachtis. Isiuatsin amo kiuelitak nion tepitsin uan kichikaujkauiaya maj amo no momachtiok. Alexandru kijtoua ke maski kinekia kiajsikamatis keyej ijkon momachiliaya isiuatsin, kiouijmakaya ijkon kichiuas. Keman Dorina kijijtouaya uan kiajuaya, amo kinekiaok momachtis Biblia. Maski ijkon kisentokaya kichiuaya tein Jehová kiyolpaktia uan kitasojtaya isiuatsin uan kipoujkaitaya. Satepan, tein kichiuak kipaleuij maj isiuatsin oksepa momachti Biblia uan maj moaui. (Xikonita video Alexandru uan Dorina Văcar: “Akin tetasojta amo yolijsiui uan kualtakat”, tein moajsi kampa kijtoua “ITajtol Dios kipata ininnemilis taltikpakneminij”, itech jw.org).

13. ¿Keniuj uelis tiknextiskej ke tiktasojtaj Jehová uan tikintasojtaj tochankauan?

¹³ Jehová kichiuak maj tikinpiakan tochankauan uan kineki maj tiyolpakikan iniuan (Efes. 3:​14, 15). Komo tiknekij yekmelauj tiyolpakiskej, moneki tikchiuaskej tein Jehová technauatia. Yejuatsin kiita uan kipatiuita tein tikchiuaj para tiktekitiliskej, uan no kiita keman tikinyekpiaj tochankauan, keman tikintasojtaj uan tikinpoujkaitaj (Rom. 12:10).

MAJ TIMOSENYOLCHIKAUAKAN PARA TIKCHIUASKEJ KEMEJ NAZAREOS

14. ¿Akonimej moneki okachi tikinyolchikauaskej?

¹⁴ Tinochin akin tiknekij tiktekitiliskej Jehová moneki tikauaskej seki taman porin tiktasojtaj. Nejin xa ouij yeski. ¿Keniuj uelis timosenyolchikauaskej para okachi tiktekitiliskej Jehová? Uelis tikchiuaskej ika tein tikijtouaj (Job 16:5). ¿Yetok se tokniuj itech monechikol akin amo kineki kipiasok miak taman  para okachi kitekitilis Jehová? ¿Tikonixmati se telpoch akin mochikaujtok amo kichiuas kemej akin iniuan momachtia maski ouij? ¿Tikonelnamiki se tokniuj oso se akin momachtijtok Biblia akin ichankauan kiixnamikij porin amo kikaua Jehová? Nochipa keman tiueliskej maj tikinyolchikauakan uan maj tikiniluikan ke semi tikinpatiuitaj porin yolchikaujkej uan porin kichiuaj miak taman para kitekitiliskej Jehová (Filem. 4, 5, 7).

15. ¿Toni kichiuanij sekin tokniuan para kinpaleuiskej akin kitekitiliaj Jehová miak tonalmej?

¹⁵ Kemansa xa uelis tikinmakaskej teisa tokniuan akin kitekitiliaj Jehová miak tonalmej para maj ika mopaleuikan (Prov. 19:17; Heb. 13:16). Yejua nejon tein kichiuak se tokniuj xiuejya akin nemi Sri Lanka. Kemej peuak okachi kiselia tomin tein kimakaya tekiuaj, kinemilij kinpaleuis ome tokniuan ichpochmej akin amo kipiayaj tomin para maj kisentokakan tapaleuikan kemej precursoras. Yejua ika mejmetstika kixelouaya tepitsin tomin para kinpaleuis maj ika moixpanoltikan. ¡Tel kualtsin tein kichiuak nejin tokniuj!

16. ¿Toni techmachtia tein kichiujkej nazareos?

¹⁶ Tein kichiuayaj nazareos techmachtia miak taman. Sayoj ke no techmachtia seki taman tein kichiua toTajtsin Jehová. Yejuatsin kimati ke semi tiknejnekij tikyolpaktiskej uan tikchiuaj seki taman porin tiknekij tikchiuaskej tein timotenkaujkej, uan no techkaua maj tiknextilikan ke semi tiktasojtaj (Prov. 23:​15, 16; Mar. 10:​28-30; 1 Juan 4:19). Tein kichiujkej nazareos techmachtia ke Jehová kiita tein tikchiuaj para tiktekitiliskej uan semi kipatiuita. Yejua ika maj tiksentokakan tiktekitilikan Jehová uan maj tikchiuakan ika nochi toyolo.