OSHITOPOLWA SHOKUKONAKONWA 7
EIMBILO 51 Otwi iyapulila Kalunga!
Iiyilongomwa mbyoka tatu vulu okwiilonga kAanasiri
“Ethimbo alihe manga e li muunasiri, okwa yapulilwa Omuwa.” — NUM. 6:8.
SHOKA TATU KA ILONGA
Otatu ka ilonga nkene oshiholelwa shAanasiri tashi vulu oku tu kwathela tu longele Jehova nehalo ewanawa nonuulaadhi.
1. Iikala iiwanawa yini aalongeli yaJehova ya ulika mondjokonona?
MBELA owa lenga ngaa ekwatathano lyoye naJehova? Kapu na omalimbililo, owe li lenga; na hangoye awike we li lenga. Okuza pethimbo lyonale, aantu oyendji oya kala ya lenga ekwatathano lyawo naKalunga. (Eps. 104:33, 34) Oyendji oya li ya ningi omaiyambo ya longele Jehova. Shoka osha li sha ningilwa Aanasiri yomuIsraeli shonale. Oolye ya li Aanasiri, noshike tatu vulu okwiilonga koshiholelwa shawo?
2. (a) Aanasiri oya li oolye? (Numeri 6:1, 2) (b) Omolwashike Aaisraeli yamwe ya li ya tokola okuninga Aanasiri?
2 Oshitya “Omunasiri” osha za koshitya shOshihebeli shoka tashi ti “Omuhogololwa,” “Omuntu a ikalekelwa,” nenge “a yapulwa.” Oshitya shoka otashi yelitha nawa Aaisraeli aalaadhi, mboka ya li ya ningi omaiyambo ya longele Jehova momukalo gwa ikalekelwa. Ompango yaMoses oya li ya pitika omulumentu, nenge omukiintu a ningile Jehova egano lya ikalekelwa mokuhogolola a kale Omunasiri uule wethimbo lyontumba. a (Lesha Numeri 6:1, 2.) Egano nenge euvaneko ndyoka olya li lya kwatela mo okuvulika komalombwelo ngoka Aaisraeli ooyakwawo kaaya li ye na okuvulika kugo. Omolwashike Omuisraeli a li e na okuninga egano lyokukala Omunasiri? Omuisraeli ngoka otashi vulika a li ha inyengithwa kohole yomuule yokuhola Jehova nosho wo kolupandu omolwokulalekwa nuuyamba kuye. — Deut. 6:5; 16:17.
3. Ongiini oshigwana shaKalunga kunena sha faathana nAanasiri?
3 Elongekidho ndyoka lyokukala Omunasiri olya hulu po sho Ompango yaMoses ya pingenwa po ‘kompango yaKristus.’ (Gal. 6:2; Rom. 10:4) Ihe nando ongawo, oshigwana shaJehova kunena otashi tsikile okuulika kutya osha halelela okulongela Jehova nomutima aguhe, nomwenyo aguhe, nomadhiladhilo agehe nonoonkondo dhasho adhihe, ngaashi Aanasiri. (Mark. 12:30) Shono ohatu shi ulike mokuninga egano nehalo ewanawa, uuna tatu iyapulile Jehova. Okukala metsokumwe negano ndyoka okwa kwatela mo okulonga ehalo lyaJehova nokuninga omaiyambo. Sho tatu konakona nkene Aanasiri ya kala metsokumwe negano lyawo, otatu ka ilonga iiyilongomwa ya simana yankene tatu vulu okukala metsokumwe negano lyetu. b (Mat. 16:24) Natu taleni kiiholelwa yimwe yomuyo.
KALA U NA EHALO LYOKUNINGA OMAIYAMBO
4. Sha ikolelela kuNumeri 6:3, 4, eiyambo lini Aanasiri ya li ya ningi?
4 Lesha Numeri 6:3, 4. Aanasiri oya li ye na okuyanda iikunwa yoalkoholi nosho wo okulya omandjembele. Aantu mboka haya kala nayo oya li haya nu iikunwa yoalkoholi nokulya omandjembele, oshoka kasha li sha puka okuninga ngawo. Ombiimbeli oya ti kutya ‘omaviinu otaga nyanyudha omuntu’ noge li omagano ga za kuKalunga. (Eps. 104:14, 15) Ihe nando ongawo, Aanasiri oya li ye na ehalo lyokweetha po okutyapula iinima mbyoka. c
Mbela owu na ehalo lyokuninga omaiyambo, ngaashi Aanasiri ya li ya ningi? (Tala okatendo 4-6)
5. Omaiyambo geni Madián naMarcela ya li ya tokola okuninga, nomolwashike?
5 Ngaashi Aanasiri, natse ohatu ningi omaiyambo tu longele Jehova pakuudha. Natu ka taleni koshiholelwa shaMadián naMarcela. d Aaihokani mbaka Aakriste oya li ye na onkalamwenyo yuuzeko. Madián okwa li e na iilonga hayi futu nawa, shoka she ya ningitha ya kale haya zi megumbo ewanawa. Ihe nonando ongawo, oya li ya hala okuninga oshindji miilonga yawo yokulongela Jehova. Opo ya adhe elalakano ndyoka, oya li ya tokola okuninga omalunduluko gontumba. Oya ti: “Otwa tameke okukala hatu longitha iimaliwa iishona. Otwa tembukile kegumbo limwe eshona notwa landitha po ohauto yetu.” Madián naMarcela kaya li ya tegelelwa ya ninge omaiyambo ngoka, ihe oya tokola oku ga ninga, oshoka otashi ke ya kwathela ya tamunune mo uukalele wawo. Oya li ye uvite ya gwanenwa noya nyanyukwa omolwetokolo ndyoka ya ninga.
6. Omolwashike Aakriste haya ningi omaiyambo? (Tala wo ethano.)
6 Aakriste kunena ohaya kala ya nyanyukwa, uuna ya ningi omaiyambo, opo ya kale ye na ethimbo olindji lyokulongela Jehova. (1 Kor. 9:3-6) Jehova ina tegelela tu ningi omaiyambo ngoka, niinima mbyoka hatu yamba po inayi puka muyo yene. Pashiholelwa, aantu yamwe oya tokola kaaya longe iilonga yontumba mbyoka ye hole, kaaya kale ye na egumbo, nenge nokuli kaaya kale nokambwa, nenge nokambishi. Yamwe oya tokola kaaya ye mondjokana mbala, nenge kaaya thikile taya mono aanona konima sho ya hokana. Yamwe oya hogolola oku ka longa hoka ku na ompumbwe onene, nokuli nonando shoka otashi ya ningitha ya kale kokule naamboka ye hole. Oyendji yomutse otwa hala okuninga omaiyambo ngoka, oshoka otwa hala okupa Jehova shoka sha dhenga mbanda. Kala wu na uushili kutya Jehova okwa lenga eyambo kehe ndyoka wa hogolola okuninga, opo wu mu longele, kutya nduno enene nenge eshona. — Heb. 6:10.
KALA WU NA EHALO OKUKALA WA YOOLOKA KO KUYALWE
7. Eshongo lini tashi vulika Omunasiri a li ha kala a taalela, uuna ta gwanitha po egano lye? (Numeri 6:5) (Tala wo ethano.)
7 Lesha Numeri 6:5. Aanasiri oya li ya gana kaaya kulule ko omafufu gawo. Ngono ogwa li omukalo gwokuulika kutya oya igandjela thiluthilu Jehova. Ngele Omuisraeli okwa kala Omunasiri ethimbo ele, omafufu ge ohaga koko, naantu yalwe ohaye shi ndhindhilike. Ngele aantu yopomudhingoloko oya ambidhidha etokolo lye lyUunasiri, osha li hashi kala oshipu kuye okukala a yooloka ko kuyalwe. Ihe shiyemateka, opwa li pu na ethimbo limwe muIsraeli Aanasiri kaaya li ya simanekwa noihaya yambidhidhwa. Pethimbo lyomuhunganeki Amos, Aaisraeli yamwe mboka ya li aashunimonima oya li ya “nwetha aanasiri omaviinu,” tashi vulika nelalakano lyoku ya ningitha kaaya vulike kegano lyawo. (Amos 2:12) Omathimbo gamwe, osha li tashi pula uulaadhi lela, opo Omunasiri a kale omudhiginini kegano lye, nokukala a yooloka ko kuyalwe.
Omunasiri ngoka a dhiginine egano lye, okwa li e na ehalo okukala a yooloka ko kuyalwe (Tala okatendo 7)
8. Oshimoniwa shomugundjuka Benjamin oshe ku tsa omukumo ngiini?
8 Kekwatho lyaJehova, natse otatu vulu okukala twa yooloka ko kuyalwe, nokuli nonando otu na oohoni, nenge aambanda. Natu taleni koshiholelwa shaBenjamin, Onzapo yomimvo omulongo yomoNorway. Molwaashoka moUkraine omu na iita, osikola yawo oya li ya unganeke oshiningwanima shoka tashi ambidhidha aantu yomoshilongo moka. Aanona oya li ya pulwa ya imbe eimbilo ya zala omizalo dhopashigwana dhaUkraine. Benjamin okwa li a tokola kaa kale poshiningwanima shoka, mokukala kokule kashona naampoka tashi ningilwa. Ihe nando ongawo, omulongi gwawo okwe mu mono nokwe mu igidha ta ti: “Owu na okuya huka wu tu wayimine ngashingeyi. Otwe ku tegelela.” Benjamin okwa yi komulongi gwawo e na omukumo e ta ti: “Ihandi kutha ombinga mopolotika, onkee itandi vulu okukutha ombinga momakanka. Oonzapo dhaJehova odhindji odhi li nokuli mondholongo, molwaashoka dha tinda okuya kiita.” Omulongi okwe shi zimine nokwa lombwele Benjamin kutya oshi li nawa. Nando ongawo, aanasikola ooyakwawo oya tameke okupula kutya omolwashike itee ya wayimine. Benjamin okwa li a tila noonkondo nota hala okulila, ihe okwa li a lombwele aanasikola ooyakwawo e na omukumo shoka a lombwele omulongi gwawo. Konima yaashono, Benjamin okwa li a lombwele aavali ye kutya Jehova okwe mu kwathele a popile eitaalo lye.
9. Omomukalo guni tatu vulu okunyanyudha omutima gwaJehova?
9 Molwaashoka otwa tokola okuvulika kuJehova, otwa yooloka ko kuyalwe. Otwa pumbwa okukala tu na omukumo gwokuulika kutya tse Oonzapo dhaJehova kiilonga, nenge kosikola. Sho iikala neihumbato lyaantu muuyuni mbuka tali ende tali nayipala noonkondo, otashi vulika shi kale oshidhigu lela okukala tatu vulika komakotampango gOmbiimbeli nokulombwela yalwe onkundana ombwanawa. (2 Tim. 1:8; 3:13) Ihe dhimbulukwa aluhe kutya ohashi ‘nyanyudha omwenyo gwaJehova,’ uuna twa yooloka ko kwaamboka ihaaye mu longele. — Omayel. 27:11; Mal. 3:18.
KALA WA PITITHA KOMEHO JEHOVA MONKALAMWENYO YOYE
10. Ongiini tashi vulika oshitegelelwa shoka sha tumbulwa Numeri 6:6, 7, sha li oshidhigu kAanasiri okulandula?
10 Lesha Numeri 6:6, 7. Aanasiri kaya li haya vulu okuya popepi nomudhimba. Otashi vulika itoo dhiladhila kutya shoka oshi li eiyambo enene. Ihe pethimbo lyOmbiimbeli, Aanasiri oshitegelelwa shoka oya li ye wete shi li lela eshongo, uuna omukwanezimo oye a sa. Oonkuluhedhi dhomafumviko odha li dha kwatela mo okukala popepi nomudhimba. (Joh. 19:39, 40; Iil. 9:36-40) Ngele omuntu okwa gana okukala Omunasiri ka li ha vulu okulandula oonkuluhedhi ndhoka. Okwa li e na okuulika kutya oku na eitaalo lya kola mokuvulika kegano lye, nokuli nuuna maandjawo omo mwa siwa. Jehova okwa li ha nkondopaleke aalongeli ye mboka ye mu igandjela, opo ya vule okuungaunga nomashongo ngoka.
11. Omukriste oku na okutokola okuninga shike, uuna ta ungaunga niinima ya kwatela mo aakwanezimo? (Tala wo ethano.)
11 Tu li Aakriste, otwa tala ko egano lyetu lyokwiiyapulila Jehova li li oshinima sha kwata miiti. Shono ohashi gumu omatokolo getu noonkatu dhetu, uuna tashi ya piinima ya pamba aakwanezimo. Ohatu longo nuudhiginini tu sile oshimpwiyu oompumbwe dhoyaandjetu, ihe katu na nando okupititha omahalo gawo komeho yaashoka Jehova a hala tu ninge. (Mat. 10:35-37; 1 Tim. 5:8) Omathimbo gamwe, opo tu nyanyudhe Jehova, otashi vulika tu ninge omatokolo ngoka inaaga hokiwa kaapambele yetu.
Mbela owu na ngaa ehalo okupititha Jehova komeho, nuuna wu li moonkalo oondhigu? (Tala okatendo 11) e
12. Sho Alexandru a li ta ungaunga nonkalo ondhigu yomegumbo, oshike a li a ningi po, noshike a li inaa ninga?
12 Natu taleni oshimoniwa shaAlexandru nomukadhi Dorina. Konima sho aaihokani mbaka ya konakona Ombiimbeli uule womumvo, Dorina okwa li a tokola e ku ethe po, nokwa li a hala Alexandru naye osho a ninge. Ihe Alexandru okwa li a lombwele omukulukadhi gwe a ngungumana nomomukalo omwaanawa kutya ye ota tsikile okukonakona. Dorina ka li e shi hokwa nokwa kambadhala oku mu kondjitha a ethe po okukonakona. Alexandru okwa ti kutya okwa li a kambadhala okuuva ko kutya omolwashike omukulukadhi gwe e uvite ngawo, ihe kasha li oshipu kuye. Omathimbo gamwe, uuna Dorina a li te mu ningi nayi note mu yamukula nayi, okwa li ha kala a hala okweetha po okukonakona. Ihe nando ongawo, Alexandru okwa tsikile okupititha Jehova komeho, okwa kala e hole omukulukadhi gwe nokwe mu simaneka. Lwanima, omolwoshiholelwa shaAlexandru oshiwanawa, omukulukadhi gwe okwa tameke ishewe okukonakona Ombiimbeli, nokonima okwa ninginithwa. Tala okavidio kepandja lyetu, jw.org, Alexandru naDorina Văcar: “Ohole ohayi idhidhimikile ayihe noyi na olukeno,” ke li kohi yoshipalanyolo “Oshili yOmbiimbeli ohayi lundulula onkalamwenyo yaantu.”
13. Ongiini tatu vulu okuulika ohole yokuhola Jehova nosho wo yokuhola yaandjetu?
13 Jehova oye a tota po elongekidho lyuukwanegumbo, nokwa hala wu kale wa nyanyukwa. (Ef. 3:14, 15) Ngele otwa hala okukala twa nyanyukwa shili, otu na okuninga iinima momukalo moka Jehova a hala tu yi ninge. Ino kala nomalimbililo kutya Jehova ina lenga oonkambadhala ndhoka ho ningi wu mu longele, sho to sile oshimpwiyu yaandjeni noto ungaunga nayo nohole nonesimaneko. — Rom. 12:10.
LADHIPIKATHANENI MU KALE NGAASHI AANASIRI
14. Oolye unene tuu tu na okukambadhala okutsa omukumo noohapu dhetu?
14 Ayehe mboka ya tokola okulongela Jehova kunena oya pumbwa okuninga omaiyambo taya inyengithwa kohole. Omathimbo gamwe, okuninga ngawo ihaku kala okupu. Ongiini tatu vulu okukwathelathana tu ninge omaiyambo ngoka? Okupitila mokutsaathana omukumo moohapu. (Job 16:5) Mbela megongalo lyeni omu na yamwe mboka taya kambadhala okukaleka onkalamwenyo yawo paunathangwa, opo ya longe oshindji miilonga yaJehova? Mbela owu shi aagundjuka mboka haya popile eitaalo lyawo noya yooloka ko kuyalwe kosikola, nokuli nando oshidhigu oku shi ninga? Mbela opu na aakonakonimbiimbeli nosho wo ooitaali ooyakwetu mboka tashi vulika taya kondjo nokukala aadhiginini, molwaashoka taya patanekwa kuyaandjawo? Natu konge ompito tu popye nayo nokushilipaleka aalongelikalunga ooyakwetu mboka, moku ya lombwela kutya otwe ya pandula omolwombepo yawo yeiyambo nuulaadhi wawo. — Filem. 4, 5, 7.
15. Yamwe oya li ya kwathele ngiini mboka ye li miilonga yethimbo lya udha?
15 Omathimbo gamwe, otashi vulika tu gandje ekwatho kAakriste ooyakwetu mboka ye li miilonga yethimbo lya udha. (Omayel. 19:17; Heb. 13:16) Omumwameme omukokele omudhiginini ngoka a kala moSri Lanka osho a li a halelela okuninga. Openzela ye oya li ya gwedhelwa e ta kala a hala okukwathela aamwameme aagundjuka aakokolindjila yaali, ya tsikile niilonga yawo yokuuvitha, nonando omahupilo otaga kanda omapunya. Onkee okwa tokola a kale he ya pe omayambidhidho gomwaalu gwontumba, ya fute ongodhi yawo. Omumwameme ngoka ka li tuu e na ombepo ombwanawa yokugandja!
16. Oshike tatu vulu okwiilonga kAanasiri yomethimbo lyonale?
16 Otatu vulu lela okwiilonga oshindji koshiholelwa oshiwanawa shoka sha tulwa po kAanasiri yonale. Ihe nando ongaaka, elongekidho ndika otali tu longo sha kombinga yaTate yetu gwomegulu, Jehova. Oku shi kutya otwa hala oku mu nyanyudha notwa hala okuninga omaiyambo gokutsa kumwe negano lyetu lyoku mu iyambela, ndyoka twa ninga. Okwe tu simaneka, sho e tu pitika tu ulike kutya otu mu hole. (Omayel. 23:15, 16; Mark. 10:28-30; 1 Joh. 4:19) Elongekidho lyokukala Omunasiri otali ulike kutya Jehova oku wete nokwa lenga omaiyambo ngoka hatu ningi, opo tu mu longele. Ano natu kale twa tokola toko okutsikila okulongela Jehova, notu na ehalo oku mu pa shoka sha dhenga mbanda.
OTO YAMUKULA NGIINI?
-
Omomikalo dhini Aanasiri ya li ya ulike ombepo yeiyambo noyuulaadhi?
-
Ongiini kunena tatu vulu okuladhipikathana tu ulike kutya otu na ombepo ya fa yAanasiri?
-
Elongekidho lyokukala Omunasiri otali tu longo shike kombinga yeinekelo lyaJehova maalongeli ye?
EIMBILO 124 Kala aluhe omudhiginini
a Nonando Aanasiri yamwe oya li ya hogololwa kuJehova, oyendji otashi vulika ya li Aaisraeli mboka ya igandja okulonga iilonga mbyoka uule wethimbo. — Tala oshimpungu “ Aanasiri mboka ya langekwa po kuJehova.”
b Omathimbo gamwe iileshomwa yetu ohayi yelekanitha Aanasiri naamboka ye li miilonga yethimbo lya udha. Nonando ongawo, moshitopolwa shika, otatu ka kundathana nkene aapiya yaJehova ayehe mboka ye mu igandjela taya vulu okuulika kutya oye na ombepo ya fa yAanasiri.
c Osha fa shi li ngeyi kutya Omunasiri ka li ha kala e na iinakugwanithwa ya gwedhwa po, ngaashi kutya oku na okulonga shike, opo a gwanitha po egano lye.
d Tala oshitopolwa “We Decided to Simplify Our Lives” kepandja lyetu, jw.org, shi li kohi yoshipalanyolo “Experiences of Jehovah’s Witnesses.”
e SHOKA TASHI ULIKWA METHANO: Omunasiri ta tala e li kombanda yondunda aantu taya ningi efumviko lyomukwanezimo gwe. Opo a vule okugwanitha po egano lye, ka li e na okukala pefumviko.
