1. Iʼotarai mböröta, hadia nifalua nono mbanua Yehowa ba wangai halöwö khönia?

 HADIA öʼameʼegö tödö wahuwusau khö Yehowa? Tatu manö! Iʼotarai mböröta, ato niha zorasoi simane daʼö. (Si. 104:33, 34) Ato ba gotaluara zanehegö faʼauri hegöi okhötara ba wamosumange Yehowa. Duma-dumania niha Naziri ba götö ndraono Gizaraʼeli me föna. Haniha ira, ba hadia wamahaʼö nihalöda moroi ba duma-dumara?

2. (a) Haniha nifotöi niha Naziri? (4 Moze 6:1, 2) (b) Hana wa so ösa ndraono Gizaraʼeli somasi tobali niha Naziri?

² Ngawua wehede ”Niha Naziri” muhalö ia moroi ba li Heberaiʼo, eluahania ”Niha Nilulu Faʼauri” mazui ”Niha Nifasambua”. Tefaudu sibai wehede daʼa ba woʼamaedolagö iraono Gizaraʼeli sanehegö faʼaurira ba wangai halöwö khö Yehowa ba lala si tohude. Barö Goroisa Moze, ira matua mazui ira alawe tola lafazökhi mbuʼusa li si tohude khö Yehowa enaʼö tobali ira niha Naziri irugi ginötö si no latatugöi. a (Baso 4 Moze 6:1, 2.) Ba ginötö ifazökhi mbuʼusa li daʼö si samösa niha, eluahania ifabuʼu wa soroi ba dödönia iʼoʼö gamakhoita si lö moguna lafalua iraono Gizaraʼeli tanö böʼö. Hana wa so  zomasi fawuʼu li tobali niha Naziri? Tatu börö me sindruhu-ndruhu laʼomasiʼö Yehowa ba laʼandrö saohagölö ba waʼafahöna howu-howu nibeʼenia.—5 Mo. 6:5; 16:17.

3. Hadia waʼafagölö nono mbanua Lowalangi ba götö iadaʼa faoma niha Naziri?

³ Amakhoita tobali niha Naziri, muheta daʼö me mufalalini saʼae Goroisa Moze faoma ’oroisa Keriso’. (Gal. 6:2; Rom. 10:4) Hizaʼi simane niha Naziri, ono mbanua Yehowa iadaʼa omasi sibai ira lafosumange ia soroi ba dödö, nosora maʼasambua, era-era ba faʼabölöra maʼafefu. (Mrk. 12:30) Fawuʼu li ita wamalua daʼö ba ginötö talulu waʼaurida khö Yehowa. Ba wamalua buʼusa li andrö, moguna lö tebulö tafalua gohitö dödö Yehowa ba tatehegö waʼaurida. Datatutunö hewisa niha Naziri ba wamalua buʼusa lira ba hewisa lalada woloʼö duma-dumara irege tola tafalua göi mbuʼusa lida. b—Mat. 16:24.

SO NITEHEGÖRA

4. Moloʼö 4 Moze 6:3, 4, hadia zi lö tola löʼö latehegö ira niha Naziri?

⁴ Baso 4 Moze 6:3, 4. Tebai labadu nagu ira niha Naziri mazui fefu zoʼamakhaita ba duo. Tebai göi laʼa ngawalö gö moroi ba danömö nagu, simane bua agu hegöi kismis. Tatu asese laʼa gö simane daʼö ira niha si so ba zi fasuira, ba lö fasala daʼö. Iwaʼö Sura Niʼamoniʼö wa ’agu andrö möi fangomuso dödö niha’. (Si. 104:14, 15) Hizaʼi, lataha dödöra ira niha Naziri lö laʼa gö simane daʼö. c

5. Hadia nitehegö Madián hegöi Marcela, ba hadia mbörö?

⁵ Simane niha Naziri, so göi nitehegöda enaʼö oya zi tola tafalua ba wangai halöwö khö Yehowa. Nehegö duma-duma zi sambua fongambatö sotöi Madián hegöi Marcela. d Sindruhunia, no ohahau dödöra. No iʼokhögö halöwö si sökhi Madián, ba toröi ira ba apartemen si sökhi. Hizaʼi, omasi ira lanönö ginötöra ba wangai halöwö khö Yehowa. Börö daʼö, lahalö gangetula ba wamalua fombulöʼö. Lamane, ”Ibörögö mahide-hide wangogunaʼö kefe. Mafamawa motoma ba findra ndraʼaga ba apartemen side-ide.”  Sindruhunia, tola lö lafalua zimane daʼö. Hizaʼi, omasi ira wamalua daʼö enaʼö oya zi tola lafalua ba wangai halöwö khö Yehowa. Lasöndra waʼomuso dödö ba faʼohahau dödö börö gangetula nihalöra.

6. Hana wa ato niha Keriso samili wa lö ifalua zomasi-masi dödönia? (Faigi göi gambara.)

⁶ Ato niha Keriso zorasoi faʼomuso dödö börö me oya latehegö ginötöra ba wangai halöwö khö Yehowa. (1 Ko. 9:3-6) Duma-dumania, lataha dödöra lö laʼöli nomora samösa, urifö somasi ira mazui lö lafili halöwö somasi ira. So göi zangai angetula lö mangowalu mazui moʼono irugi inötö si no latatugöi. Tanö böʼö, latehegö toröi ira ba nahia saröu moroi ba nösi nomora enaʼö tola mangai halöwö ira ba mbanua sabölö ato moguna sanuriaigö. Sindruhunia, lö fasala fefu nitehegöra andrö, ba lö ifaso ira Yehowa ba wamalua fefu daʼö. Hizaʼi, ato ba gotaluada zomasi mamalua daʼö börö me edöna ita tabeʼe wondrege zi sökhi khö Yehowa. Yafaduhu dödöu wa iʼameʼegö tödö sibai Yehowa fefu zi no ötehegö ba wangai halöwö khönia, ebua ide-ide.—Heb. 6:10.

LÖ ATAʼU ITA FABÖʼÖ

7. Hadia mbörö wa tola manö abua ba niha Naziri wamalua buʼusa lira? (4 Moze 6:5) (Faigi göi gambara.)

⁷ Baso 4 Moze 6:5. Fawuʼu li niha Naziri wa lö lataba mbura. Daʼö dandra wa soroi ba dödöra woloʼö nifakhoi Yehowa. Na no ara tobali niha Naziri zi samösa niha, tatu anau sibai mbunia irege faböʼö ia moroi ba ndraono Gizaraʼeli tanö böʼö. Te lö salania daʼö na latuhini gangetulania andrö niha si so ba zi fasuinia. Hizaʼi sindruhunia, lö fefu ndraono Gizaraʼeli laʼameʼegö tödö ba latuhini gangetula niha Naziri. Duma-dumania, ba götö Gamosi samaʼeleʼö, iraono Gizaraʼeli sondröi sindruhu ’labeʼe nagu ba niha Naziri’, te enaʼö lasawö mbuʼusa lira ira niha Naziri. (Amo. 2:12) Tobali, so ginötönia moguna barani niha Naziri ba wamalua buʼusa lira ba enaʼö faböʼö ira moroi ba niha böʼö.

8. Hadia manö wamarou dödö nitemamö moroi ba duma-duma Benjamin?

⁸ Börö wanolo moroi khö Yehowa, tola göi barani ita faböʼö moroi ba niha böʼö, hewaʼae na yaʼita niha saila-aila. Nehegö duma-duma dalifusöda sawena fulu fakhe sotöi Benjamin si toröi ba Norwegia. Ba zekolania so acara ba wotuhini soi Ukraina si göna fasuwöta. Laʼandrö ba ndraono sekola enaʼö lafake nukha si fagölö laʼa-laʼa ba mandrera Ukraina ba laʼanunöisi zinunö. Börö me lö omasi Benjamin fao ba acara daʼö, tanö furi sibai mozizio ia. Hizaʼi, iʼila ia gurura ba iʼebuaʼö linia weʼao, ”Ae ba daʼa, hasambalö fao ndraʼugö. Mabalo-baloi  ndraʼugö.” Si fao faʼabarani möi Benjamin khö gurunia andrö ba imane, ”Lö faʼawö dambai ndraʼo, Bu. Lö fao ndraʼo ba politik. Ato ndra Samaduhuʼö si lö fao fasuwö hewaʼae lua-luania labeʼe ira ba gurunga.” Buania, itehegö gurunia lö fao Benjamin ba acara andrö. Hizaʼi, ibörögö lasofu-sofu khönia ira awönia sekola hana wa lö fao ia. Moʼugu-ugu sibai dödö Benjamin irege arakhagö ilau meʼe. Hizaʼi, si fao faʼabarani ifuli itutunö wanema linia andrö föna ndra awönia. Me no aefa daʼö, itutunö Benjamin khö zatuania wa irasoi samösa wanolo moroi khö Yehowa ba wangoʼawögö famatinia.

9. Hewisa enaʼö tola taʼomusoiʼö dödö Yehowa?

⁹ Tatu faböʼö ita moroi ba niha si so ba zi fasuida börö me tafili ba woloʼö Yehowa. Moguna barani ita ba wamatunö khö ndra awöda wohalöwö mazui awöda sekola wa yaʼita Samaduhuʼö Yehowa. Ba börö me itugu lö sökhi gamuata niha ba zi fasuida, te itugu abua khöda woloʼö goi-goi si so ba Zura Niʼamoniʼö ba weʼamöi manuriaigö. (2 Ti. 1:8; 3:13) Hizaʼi törö tödöu, na lö ataʼu ita faböʼö moroi ba niha si lö mamosumange Yehowa, eluahania daʼö no ’taʼomusoiʼö dödö Yehowa’.—Amd. 27:11; Mal. 3:18.

BÖI TEBULÖ OFÖNAIʼÖ YEHOWA

10. Hana wa abua ba niha Naziri ba woloʼö amakhoita si so ba 4 Moze 6:6, 7?

¹⁰ Baso 4 Moze 6:6, 7. Niha Naziri tebai ifahatö ia ba mboto niha si no mate. Ba wamaigida lö abua sibai gamakhoita daʼa. Hizaʼi, tola abua ia na ösi nomora zi mate. Ba götö Zura Niʼamoniʼö, sasesenia moguna so niha si dadao ba ngai mboto niha si no mate. (Yoh. 19:39, 40; Hal. 9:36-40) Hizaʼi, tebai laʼoʼö zi toʼölö mufalua andrö ira niha Naziri. Hewaʼae abu sibai dödöra börö waʼamate nösi nomora, lö tebulö lagogohe mbuʼusa lira, börö me aro wamatira khö Yehowa. Tatu iʼabölöʼö niha Naziri si lö faröi andre Yehowa irege tola anau gölöra wanaögö inötö sabua andrö.

11. Hadia zi tebai laʼolifugö ira niha Keriso ba ginötö lahalö gangetula soguna ba nösi nomora? (Faigi göi gambara.)

¹¹ Yaʼita niha Keriso, taʼameʼegö tödö sibai mbuʼusa lida khö Yehowa. Molua-lua daʼö ba gangetula hegöi nifaluada ba nösi nomoda. Taforege wamalua noro dödöda yomo ba nomo, hizaʼi lö tebulö taʼofönaiʼö gohitö dödö Yehowa moroi ba zomasi-masi nösi nomoda. (Mat. 10:35-37; 1 Ti. 5:8) Tobali, börö me omasi ita taʼomusoiʼö dödö Yehowa, itaria  te moguna tahalö gangetula si lö fatema ba dödö nösi nomoda.

12. Hadia nifalua Alexandru me isaisi ia foʼomonia, ba hadia zi lö ifalua?

¹² Nehegö duma-duma Alexandru hegöi foʼomonia Dorina. Me no lafahaʼö ira ba Zura Niʼamoniʼö ba zi döfi, ihalö gangetula Dorina iböhöli wamahaʼö yaʼia, ba omasi ia na ifalua göi daʼö Alexandru. Hizaʼi, ihaogö wehedenia Alexandru ba ifatunö wa lö tebulö itohugö wamahaʼö yaʼia. Lö omasi Dorina, ba ifaso woʼomonia andrö. Iwaʼö Alexandru wa iforege enaʼö aboto ba dödönia nirasoi Dorina, hizaʼi abua daʼö. Itaria, na mofönu-fönu mazui iʼuduni ia Dorina, omasi manö Alexandru woloʼö somasi woʼomonia. Hewaʼae simanö, lö tebulö iʼofönaiʼö Yehowa ba waʼaurinia Alexandru. Ba ginötö si fagölö, iforomaʼö wa iʼomasiʼö ba ifosumange woʼomonia. Börö duma-duma si sökhi niforomaʼö Alexandru, ba gafuriata ifuli omasi Dorina ifahaʼö ia ba Zura Niʼamoniʼö irege tebayagö ia idanö.—Faigi video Alexandru hegöi Dorina Văcar, ”Faʼomasi Andrö ba No Sebolo Tödö, si Sökhi Tödö” ba jw.org.

13. Hewisa wangoromaʼöda wa taʼomasiʼö Yehowa hegöi ösi nomoda?

¹³ Yehowa zamazökhi amakhoita ba wongambatö, ba omasi ia na tarasoi waʼomuso dödö wefao ba nösi nomoda. (Ef. 3:14, 15) Börö daʼö, enaʼö sindruhu-ndruhu tarasoi waʼomuso dödö, moguna taʼoʼö niwaʼö Yehowa. Te abua khöu wamosumange Yehowa hegöi ba wamalua noro dödö yomo ba nomo ba wangomasiʼö, awö ba wamosumange nösi nomomö ba ginötö si fagölö. Hizaʼi, yafaduhu dödöu wa iʼameʼegö tödö Yehowa fefu wamorege nifaluamö.—Rom. 12:10.

TATOLO NIHA BÖʼÖ BA WOLOʼÖ NIHA NAZIRI

14. Haniha manö zi oföna taʼabölöʼö faoma fehededa?

¹⁴ Fefu niha sangai halöwö khö Yehowa moguna so nitehegöra, ba teʼodane-dane fefu daʼö ba waʼomasira khö Yehowa. Itaria, abua daʼö. Hewisa wanoloda niha samalua simane daʼö? Tola taʼabölöʼö ira moroi ba wehededa. (Yob. 16:5) Ba gangowuloa, hadia so ndra talifusöda samorege ba woʼöna-önaiʼö faʼaurinia enaʼö abölö oya zi tola ifalua ba wamosumange Yehowa? Hadia so ndraono si bohou ebua si lö faʼataʼu ba wangoromaʼö wa faböʼö ira khö ndra awö-awöra sekola hewaʼae abua? Hadia so niha nifahaʼö ba Zura Niʼamoniʼö mazui ira talifusöda si sara lala wamati nisaisi nösi nomora ba samorege enaʼö lö faröi? Yalötebulö taʼalui ginötö ba wangaʼaroʼö yaʼira faoma fehededa. Foromaʼö wa taʼameʼegö  tödö wamorege hegöi faʼanau gölöra.—File. 4, 5, 7.

15. Hewisa ndra talifusö ba wotuhini ira talifusöda sohalöwö safönu inötö?

¹⁵ Itaria, te tola tatolo ndra talifusöda sangai halöwö safönu inötö. (Amd. 19:17; Heb. 13:16) Daʼö zomasi ifalua si samösa talifusöda salawa döfi si toröi ba Sri Lanka. Tedou gefe fasiunia, ba omasi ia itolo darua ndra talifusöda ira alawe si bohou ebua enaʼö lö tebulö merintis ira hewaʼae abua khöra wangalui soguna. Börö daʼö, ihalö gangetula ba wameʼe kefe ero waŵa khö ndra talifusöda andrö ba wamuʼa tagihan telefora. Sindruhu-ndruhu no amuata si sökhi nifaluania andrö!

16. Hadia wamahaʼö nihalöda moroi ba waö-waö Zura Niʼamoniʼö sanandrösa ba niha Naziri?

¹⁶ No oya wamahaʼö si sökhi nihalöda moroi ba duma-duma niha Naziri sanehegö faʼaurira. Hizaʼi, tola göi tafahaʼö ita moroi khö Namada si so ba zorugo sotöi Yehowa. Faduhu dödönia wa sindruhu-ndruhu omasi ita wangomusoiʼö tödönia ba oya nitehegöda ba wamalua buʼusa li me talulu waʼaurida khönia. Si fao faʼasökhi dödö ibeʼe göi khöda ginötö ba wangoromaʼö faʼomasida khönia. (Amd. 23:15, 16; Mrk. 10:28-30; 1 Yo. 4:19) Waö-waö nitutunö Zura Niʼamoniʼö sanandrösa ba niha Naziri, daʼö zangoromaʼö wa iʼameʼegö tödö ba inehegö wamorege hegöi nitehegöda ba wangai halöwö khönia. Börö daʼö, dataʼosambuaʼö dödöda ba wangai halöwö khö Yehowa ba tatehegö wameʼe khönia fondrege zi sökhi!