1. Ni mwatsi wahi oghuwene, ogho baghombe ba Yehova bakakola erilua kera?

 UNANZIRE Yehova y’okutsibu? Ahate eritika-tika, umwanzire kutsibu! Kandi sighuli ighuwene. Eritsuka kera, abandu bangyi ibanzire Yehova yo kutsibu. (Esy. 104:33, 34) Abangyi mubayiherera omo mubiiri wa Yehova. Alinga ekyo, kyo Banaziri ab’omo Israeli ya kera babya bakakola. Abanaziri babya bahi kandi twang’ighaki oko ky’erileberyako kyabo?

2. (a) Abanaziri ini bahi? (Emighanzo 6:1, 2) (b) Busanaki Abaisraeli balebe ibakasombola eribya Banaziri?

² Ekinywa “Omunaziri,” kikalua omo kinywa ky’Ekiebrania ekikamaanisaya “oyukasololawa,” “oyukahighulawa,” kutse “oyukahererawa busana n’erikola omubiiri mulebe w’embaghane.” Ekinywa ekyo, ikikakolesibawa oko Banaziri Baisraeli ab’omuhwa, ababya bakayiherera erikolera Yehova omo nzira nyilebe ey’embaghane. Emighambo eya Musa iyikalighira omulume kutse omukali, erikola eriyilagha ely’embaghane oko Yehova, ng’erisombola eribya Munaziri oko mughulu mulebe. a (Soma Emighanzo 6:1, 2.) Omughulu Omuisraeli abya akayilagha eribya Munaziri, inyakasabawa erikwama obusondoli bulebe obo abandi Baisraeli sibabya bakakwama. Busanaki Omuisraeli inianganasombola eribya Munaziri? Alinga, iniakasombola erikola ekyo akasonda erikangania olwanzo lwiwe lunene oko Yehova, kutse akasonda erikangania erisima liwe oko bihembo bilebe ebyo Yehova alyamuha.​—Ebih. 6:5; 16:17.

3. Munabwire abandu b’oMungu bali bati ng’Abanaziri?

³ Omupango w’Obunaziri mwahwa omughulu ‘omughambo  wa Kristo” imaya omwanya w’Emighambo ya Musa. (Gal. 6:2; Rom. 10:4) Aliwe, ng’Abanaziri ba kera, abandu ba Yehova ba munabwire, bakinakanganaya omuhwa wabo ow’erikolera Yehova n’omutima wabo wosi, n’obuyingo bwabo bosi, n’obulengekania bwabo bosi kandi n’akaghala kabo kosi. (Mar. 12:30) Tukayilagha erikolera Yehova omughulu tukayiherera okw’iye n’eribatisibwa. Erisikya eriyilagha lyetu, litolere itwakola erisonda liwe n’eriherera emyatsi milebe tutoke erikola ebingyi omo mubiiri wiwe. Tulangire eby’erileberyako bilebe, ebikakanganaya ngoko Abanaziri babya bakakola, batoke erisikya eriyilagha lyabo, n’erigha esyosomo silebe esyangatuwatikya erisikya eriyilagha lyetu. b​—Mat. 16:24.

UBYE TAYARI ERIYIHERERA

4. Ngoko kiri omo Emighanzo 6:3, 4, Abanaziri ibakaligha erikolaki batoke erisikya eriyilagha ryabo?

⁴ Soma Emighanzo 6:3, 4. Omunaziri, isyanganywa obwabu kutse ebighuma bibisi by’ebinyu kutse ebyumire. Abandi b’Abaisraeli ibo, ibakanywa obwabu n’erirya oko bighuma ebyo, kundi isibighanisibwe. Nibya n’eBiblia yikakanganaya ngoko ebinyu ni kihembo ekikalua oko Yehova. Omughulu yikabugha yiti: “Nebinyu ibyatsemesya emitima yabandu.” (Esy. 104:14, 15, NTN62) Nomo emyatsi eyo yanganatsemesya omundu, Abanaziri ibo ibakayihighula kuyo. c

5. Madián na Marcela mubaherera emyatsi yahi, kandi busanaki?

⁵ Ng’Abanaziri, netu munabwire tunemuyiherera erikola emyatsi mingyi omo mubiiri wa Yehova. Tulangire eky’erileberyako kya Madián na mukali wiwe ye Marcela. d Ibawite omubiiri owakabaletera esyofranga nyingyi kandi ibawite enyumba nene kandi eyuwene. Aliwe mubayisogha erikola bingyi omo mubiiri wa Yehova. Eritoka erihikira ekyo, mubakola esyombinduka silebe omo ngebe yabo. Bakabugha bati: “Mutwatsuka erikehya oko syofranga esyo tukakolesaya. Mutwahumira omo nyumba nge, twamaghulya n’omutoka wetu.” Madián na Marcela mubatakataswa erikola emyatsi eyo, aliwe mubakola batya kundi ibanzire erikola bingyi omo mubiiri wa Yehova. Mubatsemera eriyisogha lyabo eryo. Kandi lino banemutsemera ebike ebyo bawiteko.

6. Busanaki Abakristo ba munabwire bakaherera emyatsi milebe? (Ulebaye n’epitsa.)

 ⁶ Munabwire, abandu b’oMungu banemuherera emyatsi mingyi batoke erikola bingyi omo mubiiri wa Yehova. (1 Kor. 9:3-6) Yehova syalitukasa erikola eriyiherera eriri ng’eryo; nibya n’emyatsi eyo twangaherera sibugha ambu ni myatsi mibi. Ng’eky’erileberyako, abandu balebe bakayisogha erilekana n’omubiiri ogho banzire kutse enyumba eyo banzire. N’abandi nibya babiriyisogha eritendilunga kutse eritendibuta. N’abandi babiriyisogha eriyakolera eyiri obwagha bw’abatuliri nibya n’omo ekyo kikaleka ibabya hali n’abanzwa babo. Abangyi b’okw’itwe babiriyiherera batya kundi banzire eriha Yehova eky’uwene ekyo bawiteko. Uminye ngoko Yehova akatsemera kutsibu obuli mwatsi ogho tukaherera busana naye, abye mwatsi muke kutse munene.​—Ebr. 6:10.

ISIGHUBAHA ERITENDISOSA ABANDI

7. Busanaki alinga sikyabya kyolo oko Munaziri erisikya eriyilagha liwe? (Emighanzo 6:5) (Ulebaye n’epitsa.)

⁷ Soma Emighanzo 6:5. Omwiyilagha ly’Abanaziri imuli eritenditwa esyonzwiri. Ekyo ikikakanganaya ngoko bakendisikya ebyosi ebyo Yehova akendibasaba. Omuisraeli inyakabya abimala omo Bunaziri, esyonzwiri siwe isikakota neryo inyakayisosa omo bandi. Eritendisosa abandi eryo isiriribya lubanza okw’iye ab’okw’iye bamabya ibakamusikaya n’erimuhiramo omuhwa w’erilola embere n’Obunaziri bwiwe. Eky’obulighe, muhabya omughulu ogho Abaisraeli mubatabya bakasikya Abanaziri. Oko mughulu w’omuminyereri Amosi, Abaisraeli abayisamambula ‘mobapulisya Abanaziri ebinyu,’ alinga bakasonda eribakuna eritendisikya eriyisogha lyabo ery’eritendinywa obwabu. (Amos. 2:12) Ebiro bikalaba, alinga mukyatsuka erisaba obutubaha bunene oko Banaziri erisikya eriyilagha lyabo n’erilola embere eritendisosa abandi.

8. Eky’erileberyako kya Benjamin kyamakusikya mutima kiti?

⁸ Netu, Yehova anganatuwatikya eribya n’obutubaha nibya n’omo tuli bakutu. Tulebaye eky’erileberyako kya Benjamin, omulwana ow’emyaka ikumi, Omwimiri wa Yehova w’omo Norvege. Busana n’amalwa we Ukraine, oko kalasi kabo mubakola erikinga ery’erimira abandu be Ukraine. Abakolo mubasabirwe erimba olwimbo ibanambite esyongyimba esirimo esyorangyi sy’edrapo ye Ukraine. Kundi isyanzire eriyingirya omo rikinga eryo erikapipa ekihugho kye Ukraine, Benjamin mwayisogha erisighala hali oko aho bakendikolera erikinga eryo. Aliwe, omwalimu wiwe mwamulangira, neryo amabirikira ati: “Wase hano. Itwe bosi tunemukulinda!” Omo butubaha Benjamin mwasa ahali  omwalimu n’erimubwira ati: “Ingye siniriyingiraya omo myatsi ye politike. Nibya, Abimiri ba Yehova bangyi bane omo ngomo kundi banemughana erikola oko malwa.” Omwalimu mwaligha ebyo Benjamin amubwira neryo mwamuleka. Aliwe abandi bakolo mubatsuka eribulya Benjamin nga mwatitayingirya omo myatsi eyo mo busanaki. Benjamin mwakwa obuba bunene amasonda n’erilira nibya; aliwe omo butubaha mwabwira akalasi kosi ebyo abwira omwalimu. Abere abihika eka wabo, Benjamin mwabwira ababuti biwe ngoko mwakayilangirira Yehova akamuwatikya eribwira abandi omo butubaha oko bwikirirya bwiwe.

9. Twangatsemesya tuti omutima wa Yehova?

⁹ Kundi tukasombola erikola erisonda lya Yehova, abandi bakalwibalangira ngoko situbasosire. Kikasaba obutubaha eribwira abandi oko kalasi kutse oko mibiiri yetu ngoko tuli Bimiri ba Yehova. Kandi, kundi emibere y’abandu yinemulola embere eritsanda, alinga kikendilola embere eritukalira erikwama esyokanuni sya Yehova n’eritulira abandi engulu mbuya. (2 Tim. 1:8; 3:13) Mughulu wosi twibuke ngoko omughulu tukakanganaya obutubaha omwitendisosa abatekolera Yehova ‘tukatsemesaya omutima [wa Yehova].’​—Misyo 27:11; Mal. 3:18.

UHIRE YEHOVA Y’EMBERE OMO NGEBE YAGHU

10. Busanaki tukabugha tuti alinga sikyabya kyolo oko Munaziri erikwama ekyalayiro ekiri omo Emighanzo 6:6, 7?

¹⁰ Soma Emighanzo 6:6, 7. Omunaziri isyangahika ahali ekinda ky’omundu. Wanganabugha uti oyo syabya mwatsi owakalire. Aliwe oko mughulu wa kera ikyanganakala oko Munaziri erisikya omughambo oyo omughulu ow’okw’iye amahola, kundi oko mughulu oyo emitsye yabo iyikasaba omundu eribya hakuhi n’ekinda eky’oko w’okw’iye. (Yoh. 19:39, 40; Emib. 9:36-40) Aliwe Omunaziri isyangakwama omwatsi oyo. Nibya n’omo mughulu owakalire okw’iye, Omunaziri inyakakanganaya obwikirirya omwisikya eriyilagha liwe. Kwenene, Yehova inyakawatikaya abaghombe biwe bataleghula abo eriyiyinia omo maligho ng’ayo.

11. Omukristo anganasabwa erikolaki omughulu akayisogha oko mwatsi w’ekihanda kiwe? (Ulebaye n’epitsa.)

¹¹ Itwe Bakristo tukasikaya kutsibu eriyilagha lyetu oko Yehova. Ekyo kikatula oko ebyo tukayisogha n’oko ebyo tukakolera ekihanda kyetu. Tukakola kutsibu erisulubirira  ebihanda byetu, aliwe situlihira eryanza ry’ekihanda kyetu embere oko ebyo Yehova akatusaba. (Mat. 10:35-37; 1 Tim. 5:8) Ndambi silebe, kyanganatusaba eriyisogha erikola emyatsi eyo abandu b’omo kihanda kyetu sibenditsemera aliwe eyikenditsemesya Yehova.

12. Akayiyinia omo mibere eyikalire omo kihanda kiwe, Alexandru mwakolaki, aliwe mwatakolaki?

¹² Tulebaye eky’erileberyako kya Alexandru na mukali wiwe ye Dorina. Babere bigha eBiblia oko mwaka mughuma, Dorina mwayisogha erileka, neryo mwanza ati ngambe na Alexandru naye inyaleka. Aliwe, Alexandru mwabwira Dorina y’omo bolo ngoko iye akendilola embere erigha eBiblia. Dorina mwatatsemera omwatsi oyo, neryo mwakola ngoko angatoka erikakirya Alexandru erilola embere erigha eBiblia. Alexandru akabugha ati mwayikasa erisonda eriminya busanaki omukali wiwe akayiwata atya. Ati ekyo sikyabya kyolo okw’iye. Ebiro bikalaba, Dorina mwatsuka eribya mutsibu oko mwira wiwe nibya n’erimusubirya muhanda erihika oko kika Alexandru mwalangira ikyamatolera erileka erigha. Aliwe, Alexandru mwayitsinga erihira Yehova y’embere omo ngebe yiwe, kandi oko ndambi ngumerera eyo, inyanemuyikasa erikangania olwanzo oko mukali wiwe n’erimusikya. Busana n’erilangira emibere ya mwira wiwe eyuwene, Dorina mwasubira erigha eBiblia n’enyuma w’aho mwabatisibwa.​—Ulebaye evideo Alexandru na Dorina Văcar: “Olwanzo siluriluha lukayira ndeke” oko jw.org, omo katsweka “Ekwenene ikabindula esyongebe.”

13. Twangakangania tuti olwanzo oko Yehova n’oko kihanda kyetu?

¹³ Yehova yowatsukisaya ekihanda, kandi anzire itwabya mukyo n’obuholo kandi itunatsemire. (Efe. 3:14, 15) Twamanza eribya n’obutseme, ngambe itwakola ebyo Yehova akatusaba erikola. Isiwibirirawa ngoko Yehova akakutsemera kutsibu omughulu ukayikasa erimukolera kandi ighunemusulubirira ab’omo kihanda kyaghu, n’eryanzabo n’erisikyabo.​—Rom. 12:10.

UBYE UKAHIRA OMO BANDI M’OMUHWA W’ERIBYA NG’ABANAZIRI

14. Ni bahi bo tutolere itwabya tukasikya mutima omo binywa byetu?

¹⁴ Abosi abakakolera Yehova munabwire litolere ibabya tayari eriyiherera busana n’olwanzo lwabo oko Yehova. Endambi silebe kikatukalako erikola tutya. Twangawatikania tuti erikola bingyi omo mubiiri wa Yehova? Omwibya tukabugha ebinywa ebikahira omo bandi m’omuhwa. (Yobu 16:5) Omo ndeko yenyu mune abandu balebe abanzire  eryolobya engebe yabo batoke erikola bingyi omo mubiiri wa Yehova? Unasi abalwana kutse abambesa balebe abanemuyikasa eritendisosa abandi bakolo b’oko kalasi kabo n’omo sikyolobire okw’ibo? Unasi abigha b’eBiblia kutse abandi baghala n’abali betu abanemuyikasa erisighala bataleghula n’omo banemwendereribwa omo bihanda byabo? Tukole ngoko twangatoka erisubya mutima abaghala n’abali betu abali ng’abo. Tubye tukabwirabo ngoko tukatsemera obutubaha bwabo n’eriyikasa lyabo erikolera Yehova.​—Filem. 4, 5, 7.

15. Abandi bakawatikaya bati abali omo mubiiri w’omughulu wosi?

¹⁵ Hanganabya omughulu itwanza eriwatikya abaghala n’abali betu abali omo mubiiri w’omughulu wosi. (Misyo 19:17; Ebr. 13:16) Ekyo kyo mwali wetu oyukekeluhire ow’omo kihugho kye Sri Lanka abya anzire erikola. Esyofranga esy’epasyo esyo abya akapokera musyapanda. Neryo mwali wetu oyo mwayisogha eriwatikya abandi bali betu babiri bapainia ababya ibabiribula esyofranga. Neryo mwayisogha eribya akatumirabo oko buli Mwisi esyofranga esyangabawatikya eribya bakakanirania n’abandi oko telefone. Mwali wetu oyo ni w’erisima!

16. Twamighaki oko Banaziri ba kera?

¹⁶ Twanganigha esyosomo nyingyi oko ky’erileberyako eky’Abanaziri ba kera! Aliwe kandi eriyilagha ly’Abanaziri lyanganatwighisya omwatsi mulebe oko Tata wetu w’elubula, Yehova. Anasi ngoko twanzire erimukolera kandi anasi ngoko tune tayari eriyiherera tutoke erisikya eriyighala lyetu okw’iye. Akatusikaya omwituha akanya ak’eriyisombolera ngoko twangamukangania olwanzo lwetu. (Misyo 23:15, 16; Mar. 10:28-30; 1 Yoh. 4:19) Eky’erileberyako ky’Abanaziri kikakanganaya ngoko Yehova akalangira kandi akatsemera ebyo tukaherera tutoke erimukolera. Kwesi, tulole embere erikolera Yehova omwanza lyetu, tukamuha eky’uwene ekyo tuwiteko.