NKHANI YOPHUNZILA N.° 7
NYIMBO N.° 51 Telipeleka kwa Mulungu!
Kansi tingaphunzile chinji kufumila kuli Anazili?
“Yove ni ntuŵa kwa Yehova masiku onse Aunazili wake.”—NUM. 6:8.
CHOLINGA CHANKHANI
Vatingaphunzile kufumila pa chisanzo cha Anazili pankhani ya kutang’a ntima nonkhala okonzeka kulitana vinthu viyakine pochita chifunilo cha Yehova.
1. Kansi ŵanthu olambila Yehova m’masiku akuvuli enzechita chinji?
KANSI mwewo muwona kuti ushamwali wanu na Yehova ni chinthu chofunika ngako? Mosakaikila, mwewo muwona tetyo! Ndipo ni mwewo lini mweka. Kufumila kale-kale, ŵanthu ankhala owona kuti kunkhala paushamwali na Mulungu ni chinthu chofunika ngako monga ni mwamuchitila mwewo. (Sal. 104:33, 34) Ŵanthu anyinji elolela kusiya vinthu viyakine na cholinga chakuti akolambila Yehova. Ndipo vamene ivi niye venzechita Anazili munthawe ya Isiraeli wakale. Kansi Anazili enze ŵanthu otyani, ndipo n’chinji chatingaphunzilepo kufumila pa chisanzo chawo?
2. (a) Kansi Anazili enze ŵanthu otyani? (Numeri 6:1, 2) (b) Kansi ndaŵa yanji Aisiraeli ayakine enzesankha kuchita lumbilo ya Unazili?
2 Mawu akuti “Mnazili” ni mawu ofumila ku Chiheberi amene otanthauza “Wosankhiwa,” “Wopatulika,” kapena “Wolipeleka.” Anazili enze Aisiraeli akale amene enzepeleka nsembe ziyakine potumikila Yehova mwanjila iyakine ya padela. Chilamulo cha Mose, chenzelola kuti mwanalume olo mwanakazi achite lumbilo iyakine yapadela kwa Yehova posankha kuti ankhale Mnazili kwa nthawe itali. a (Ŵelengani Numeri 6:1, 2.) Mwisiraeli akachita lumbilo yamene iyi, enzefunika kusunga malamulo ayakine amene Aisiraeli ayakine enzefunikalini kuŵakonkheja. Koma kansi ndaŵa yanji Mwisiraeli enzesankha kuchita lumbilo yamene iyi? N’vowonekelatu kuti yove enzechita vamene ivi chifukwa chokonda Yehova komasoti pofuna kuwonesha kutembeja mofumila pansi pa ntima chifukwa cha madaliso anyinji ŵenzefwana.—Deut. 6:5; 16:17.
3. Kansi ŵanthu a Mulungu masiku ŵano owonesha tyani mzimu wolipeleka monga ni mwenzechitila Anazili?
3 Chilamulo cha Mose pechiloŵewa mmalo na “chilamulo cha Khilisitu” ŵanthu a Mulungu enzefunikalinisoti kunkhala Anazili. (Agal. 6:2; Alo. 10:4) Koma molingana na mwenzechitila Anazili. masiku ŵano ŵanthu a Yehova opitilija kuwonesha mzimu wofuna kutumikila Mulungu na moyo wawo wonse, mphamvu zawo zonse, komasoti maganizo ŵawo onse. (Mko. 12:30) Sewo tikalipeleka kwa Yehova, tuchita lumbilo kuli yove mofumila pansi pa ntima kuti tikomutumikila. Kuti tikochita vinthu mokatijana na vetilumbila kwa Mulungu, sewo tufunika kuchita chifunilo cha Yehova nololela kulitana vinthu viyakine kuti timutumikile. Munkhani ino, tikambilane venzechita Anazili pokwanilisha lonjezo yawo, komasoti tiwone mwamene chisanzo chawo mwachingatiyavyile nase pokwanilisha lumbilo yasu ya kulipeleka kwa Yehova. b (Mat. 16:24) Tiyeni tikambilane visanzo viyakine.
MUKOCHITA VINTHU MOLIPELEKA
4. Mokatijana na Numeri 6:3, 4, kansi Anazili enze okonzeka kulitana chinji?
4 Ŵelengani Numeri 6:3, 4. Anazili enzefunikalini kumwa vakumwa vokolwesha komasoti kulya mphesa olo ziyumu. Aisiraeli ayakine enze na ufulu wakumwa vakumwa vokolwesha komasoti kulya vakulya vofumila kumpesa chifukwa chakuti Mulungu enzeleshalini kuchita vamene ivo. Baibolo yunena kuti “vinyu ukondwelesha ntima wa munthu”, yove yunenasoti kuti vinyu ni mphaso yofumila kwa Mulungu. (Sal. 104:14, 15) Koma olo n’tetyo, Anazili enze okonzeka kulitana vinthu vamene ivo. c
Kansi mwewo nimwe okonzeka kulitana vinthu viyakine monga ni mwenzechitila Anazili? (Onani ndime 4–6.)
5. Kansi Madián na Marcela esankha kusiya chinji, ndipo ndaŵa yanji?
5 Molingana na Anazili, nase tulitana vinthu viyakine na cholinga chakuti tikochita vinyinji potumikila Yehova. Ganizilani chisanzo cha Madián na Marcela. d Banja yamene iyi yenze na moyo uweme ngako. Madián enze pantchito iweme, ndipo ove enzenkhala mung’anda iweme ngako. Koma banja yamene iyi yenzefuna kuchita vinyinji potumikila Yehova. Kuti akwanilishe cholinga chawo, ove esankha kuti achinje vinthu viyakine pamoyo wawo. Ove enena kuti: “Tiyamba kunkhala moyo wosafuna vinthu vinyinji, ndipo tefuluka mung’anda yasu noyamba kunkhala mung’anda iyakine itontho komasoti tegulisa motoka yasu.” Madián na Marcela, aliyechite kuujiwa kuti alipeleke mwanjila yamene iyi—ove esankha kuchita vamene ivi chifukwa enzefuna kuchita vinyinji potumikila Yehova. Palipano, ove ni osangalala ndipo ali na moyo wokhutila chifukwa cha vinthu vechisankha kuchita.
6. Ndaŵa yanji sewo tulolela kusiya vinthu viyakine? (Onanisoti chithunzi.)
6 Atumiki a Yehova masiku ŵano, osangalala kusiya vinthu viyakine na cholinga chakuti akonkhala na nthawe ikulu potumikila Mulungu. (1 Ako. 9:3-6) Yehova otikakamijalini kuti tikonkhala moyo wosafuna vinthu vinyinji; ndipo vinthu vakusiya abale ayakine ni vinthu lini viipa. Mwachisanzo, ayakine ololela kusiya ntchito, ng’anda, olo vifuwo venzekonda. Ŵanthu anyinji osankha kunkhala mbeta kwanthawe itali olo kunkhala aliye ŵana kwa nthawe itali pavuli pakuti aloŵa m’banja. Ayakine osankha kuyatumikila kufunikila thandizo olo kuti kuchita vamene ivo kungachitishe kuti ankhale kutali na achibale olo azishamwali ŵawo. Anyinji asewo telola kusiya vinthu vamene ivi na cholinga chakuti tichite vinyinji potumikila Yehova. Ziŵani kuti Yehova otembeja pachilichonse chamulolela kusiya, chikulu olo chitontho pofuna kumutumikila.—Ahe. 6:10.
NKHALANI OKONZEKA KUNKHALA OSIYANA NA ŴANTHU AYAKINE
7. Ndaŵa yanji chenzenkhala chinthu chovuta kuli Mnazili kuti akwanilishe lumbilo yake? (Numeri 6:5) (Onanisoti chithunzi.)
7 Ŵelengani Numeri 6:5. Anazili enzefunikalini kugela sisi yawo. Sisi yamene iyo yenze chizindikilo chowonesha kugonjela kwawo mofumila pansi pa ntima kwa Yehova. Mwisiraeli akatumikila monga Mnazili kwa nthawe itali, sisi yake yenzetalimpha ngako ndipo ŵanthu ayakine enzemuziŵa mosavuta. Kunkhala wosiyana na ŵanthu ayakine kwenzenkhala kosavuta kuli Mnazili keno ŵanthu ayakine omulemekeza nomulimbikisa kuti apitilije kukwanilisha lumbilo yake. Koma chomvwisha chisoni n’chakuti nthawe ziyakine Aisiraeli enzeŵalemekezalini Anazili komasoti kuŵachilikiza pokwanilisha utumiki wawo. Munthawe ya mneneli Amosi, Aisiraeli ampatuko “enzepasa vinyo Anazili,” pofuna kuŵayesa kuti afwaye lamulo ya Mulungu yoŵalesha kumwa vinyu. (Amo. 2:12) Anazili enzefunikila kunkhala otang’a ntima ngako kuti akwanilishe lumbilo yawo nonkhala osiyana na ayakine.
Mnazili wokhulupilika pokwanilisha lonjezo yake enze wokonzeka kunkhala wosiyana na ŵanthu ayakine (Onani ndime 7.)
8. Kansi vinthu vechitikila Benjamin vakutangishani tyani mwewo?
8 Moyavyiwa na Yehova, nase tingakwanishe kunkhala otang’a ntima komasoti kunkhala osiyana na ŵanthu ayakine olo kuti mwachibadwa nise ansoni kapena awowa. Ganizilani chisanzo cha Benjamin, wamene ali na vyaka 10 ndipo onkhala ku Nolwerg. Chifukwa cha nkhondo yaku Ukraine, sikulu ichita chiwoneselo pofuna kuyavya ŵanthu aku Ukraine. Ŵana asikulu enzefunika kuimba nyimbo komasoti kuvwala vovwala volingana na mbendela yaku Ukraine. Pofuna kupewa chiwoneselo chandale chamene icho, Benjamin epanama patali na penzechitikila chochitika chamene icho. Koma aticha ayakine anakazi emuwona ndipo emuita moŵilikija kuti: “Wela kuno mokulumija, sewo tonse tuyembekezela wewo!” Benjamin eluta pafupi na aticha ŵala ndipo elaŵila motang’a ntima kuti: “Newo nutolamolini mbali, ndipo nuloŵelela lini mu vochitika vandale. Kulaŵila chendi, Amboni za Yehova anyinji ali kudjeli chifukwa chokana kuniyata nkhondo.” Aticha amene awo echimvwa vechifotokoza yove ndipo emuuja kuti osati achite nawo chiwoneselo chamene icho. Koma ayake am’kalasi eyamba kumupasa makonsho chifukwa chakuti yove aliye chite nawo chiwoneselo. Benjamin echita wowa ngako mwakuti enze esala patontho kulila; koma olo n’tetyo, yove ewelejela mawu ŵechiuja aticha ŵake anakazi kuli ayake onse am’kalasi. Pavuli pake, Benjamin euja makolo ŵake kuti Yehova niye emuyavya kuti akwanishe kuteteza chikhulupililo chake.
9. Kansi tingakondweleshe tyani ntima wa Yehova?
9 Ŵanthu okwanisha kuziŵa kuti sewo nise osiyana na ayakine chifukwa chakuti tumvwila Yehova. Sewo tufunika kutang’a ntima kuti tikwanishe kuuja ŵanthu ayakine kuntchito olo kusikulu kuti nise Amboni za Yehova. Vinthu muli chino chalo pavuipila-ipila, n’vovuta ngako kukonkheja mfundo za m’Baibolo komasoti kuuja ŵanthu ayakine za uthenga uweme. (2 Tim. 1:8; 3:13) Tikokumbukila nthawe zonse kuti “ntima wa [Yehova] ukondwela” keno sewo tutang’a ntima nochita vinthu mosiyana na ŵanthu amene otumikilalini Mulungu.—Miy. 27:11; Mal. 3:18.
PITILIJANI KUIKA YEHOVA PAMALO OYAMBA PA MOYO WANU
10. Ndaŵa yanji chenze chinthu chovuta kuli Anazili kuti akonkheje malamulo ali pa Numeri 6:6, 7?
10 Ŵelengani Numeri 6:6, 7. Anazili enzefunika lini kuvwendela chitanda cha munthu wakufwa. Payakine sewo tingaganize kuti kuchita vamene ivi kwenzelini kulitana kukulu. Koma kuchita vamene ivi kwenze kovuta ngako kuli Mnazili keno munthu wamwalila ni wachibale wake. Pa nthawe yamene iyo munthu akamwalila, ŵanthu enze na chiyoloŵezi chonkhala pafupi na chitanda cha munthu wamene uyo. (Yoh. 19:39, 40; Mach. 9:36-40) Koma Mnazili enzefunikalini kukonkheja chiyoloŵezi chamene icho. Olo pa nthawe yachisoni komasoti yovuta monga ni yamene iyo, Mnazili enzepitilija kuchita vinthu vokatijana na lumbilo yake. Vamene ivi venzewonesha kuti yove ali na chikhulupililo chotang’a ngako. Mosakaikila, Yehova enzepeleka mphamvu kuli Anazili kuti akwanishe kulimbana na mavuto amene awo.
11. Kansi sewo tufuna kuchita chinji keno tupanga vosankha pankhani zokhuza ŵanthu am’banja mwasu? (Onanisoti chithunzi.)
11 Sewo tuwona kuti kulipeleka kwasu kwa Yehova n’chinthu chofunika ngako. Vamene ivi vukhuza mwatuchitila vinthu ponena za nkhani za m’banja mwasu. Sewo tuchita khama posamalila vosoŵa va ŵanthu am’banja mwasu, koma tulolalini kuti vofuna va ŵanthu am’banja mwasu vikonkhala pamalo oyamba mmalo mwa vofuna va Yehova. (Mat. 10:35-37; 1 Tim. 5:8) Nthawe ziyakine sewo tufunikila kupanga vosankha vamene vukondwelesha Yehova olo kuti makolo ŵasu okondwelalini navo.
Kansi mwewo nimwe okonzeka kuika vakufuna Yehova pamalo oyamba pa moyo wanu olo panthawe yamukumana na mavuto akulu? (Onani ndime 11.) e
12. Penzekumana na mavuto m’banja mwake, kansi Alexandru echita chinji ndipo n’chinji chaliye chite?
12 Ganizilani chisanzo cha Alexandru na mwanakazi wake Dorina. Ove eyamba kuphunzila Baibolo, koma pavuli pa chaka chimozi Dorina esankha kuleka kuphunzila ndipo yove enzefuna kuti Alexandru naye aleke kuphunzila Baibolo. Modekha komasoti mowama ntima, yove euja mwanakazi wake kuti alekelini kuphunzila. Dorina aliye sangalale navo ndipo eyeja-yeja kuti mwanalume wake aleke kuphunzila. Alexandru enena kuti enzeyeja-yeja kuti aziŵe chenzechitisha mwanakazi wake kuti akochita vamene ivo, koma venzelini vipepu kuli yove. Nthawe ziyakine Dorina akayamba kumuzuzula mwanalume wake Alexandru nomulaŵilila mawu aipa, yove enzeganiza zoleka kuphunzila Baibolo. Koma olo n’tetyo, Alexandru epitilija kuika Yehova pa malo oyamba, ndipo panthawe imo na imo yamene iyo, yove epitilija kuwonesha chikondi na ulemu kuli mwanazi wake. Chifukwa cha chisanzo chiweme cha Alexandru, mwanakazi wake eyambasoti kuphunzila Baibolo ndipo ebatizika. Onani vidiyo yapa jw.org yamutu wakuti Alexandru ndi Dorina Vacar: “Chikondi N’choleza Mtima Ndiponso N’chokoma Mtima” mu nkhani zakuti “Mfundo za M’Baibulo Zimasintha Anthu.”
13. Kansi tingawoneshe tyani kuti tukonda Yehova komasoti ŵanthu am’banja mwasu?
13 Yehova niye wamene eyambisha banja. Yove ofuna kuti banja yasu ikonkhala mosangalala. (Aife. 3:14, 15) Keno sewo tufuna chendi kunkhala mosangalala, tufunikila kuchita vinthu mokatijana na chifunilo cha Yehova. Osati mukokaikila kuti Yehova osangalala na kulitana kwamuchita pomutumikila pa nthawe yamusamalila ŵanthu am’banja mwanu na kuchita nawo vinthu mwachikondi na mwaulemu.—Alo. 12:10.
TANG’ISHANI AYAKINE KUTI AKOKONKHEJA ANAZILI
14. Kansi ni ŵanthu otyani ngako-ngako ŵatufunikila kutang’isha na mawu ŵasu?
14 Onse amene osankha kutumikila Yehova masiku ŵano, ofunika kunkhala okonzeka kuchita vinthu viyakine chifukwa chokonda Mulungu. Kuchita vamene ivi n’kupepulini nthawe ziyakine. Kansi tingayavye tyani ayakine kulolela kusiya vinthu viyakine chifukwa cha Yehova? Tingaŵatang’ishe kupitila mu vinthu vatulaŵila. (Yobu 16:5) Kansi abale ayakine mumpingo mwanu oyeja-yeja kunkhala moyo wosafuna vinthu vinyinji kuti achite vinyinji potumikila Yehova? Kansi mwewo muziŵako mulumbwana aliyense wamene owonesha kutang’a ntima pochita vinthu mosiyana na ayake kusikulu olo kuti kuchita vamene ivo n’kovuta ngako? Kansi muziŵako m’bale olo wophunzila Baibolo muyakine wamene ochita vonse vangakwanishe kuti apitilije kunkhala wokhulupilika olo kuti oshushiwa na ŵanthu am’banja mwake? Nkhalani osimikija ntima kuchita vonse vamungakwanishe kuti mutang’ishe ŵanthu monga ni amene aŵa nolaŵila mawu owonesha kuti muchita nawo chidwi ngako chifukwa cha kutang’a ntima kwakuwonesha pa vonse vakuchitila Yehova.—Filim. 4, 5, 7.
15. Kansi ayakine oyavya tyani ŵanthu amene ali muutumiki wa nthawe zonse?
15 Nthawe ziyakine, sewo tingapeleke thandizo poyavya abale amene ali pautumiki wa nthawe zonse. (Miy. 19:17; Ahe. 13:16) Vamene ivi niye venzefuna kuchita mulongo muyakine wachikulile wamene onkhala ku Sri Lanka. Yove elondela ndalama za penshoni mu akaunti yake ndipo enzefuna kuyavya alongo aŵili apainiya amene enzekumana na vuto ya zachuma kuti apitilije utumiki wawo. Tetyo, yove esankha kuti mwezi uliwonse akoyavya alongo amene awo kulipila mabilu amafoni. Mulongo wamene uyu ewonesha nkhalidwe iweme ngako!
16. Kansi sewo tingaphunzile chinji kuli Anazili?
16 Mosakaikila, sewo taphunzila vinyinji kufumila pa chisanzo cha Anazili! Koma lumbilo yenzechita munthu kuti ankhale Mnazili yutiphunzisasoti chinthu chiyakine chokhuza Atata ŵasu Yehova. Mulungu oziŵa kuti sewo tufuna kuchita vinthu vomukondwelesha komasoti kuti nise okonzeka kulitana vinthu viyakine kuti tikwanilishe vetimulonjeza. Yove watilemekeza potipasa mwayi wowonesha kuti tumukonda. (Miy. 23:15, 16; Mko. 10:28-30; 1 Yoh. 4:19) Lumbilo yenzechita Anazili, yuwonesha kuti Yehova owona kulipeleka kwatuchita ndipo otikonda chifukwa cha vonse vatuchita chifukwa cha yove. Tiyeni tichite vonse vatingakwanishe popitilija kutumikila Yehova komasoti kunkhala okonzeka nthawe zonse kuchita vinyinji pomutumikila.
KANSI MUNGAYANKHE KUTI TYANI?
-
Kansi Anazili enze otang’a ntima komasoti okonzeka kulitana vinthu viyakine mwanjila yotyani?
-
Kansi tingaŵatang’ishe tyani ayakine kuti akokonkheja Anazili nololela kulitana vinthu viyakine chifukwa cha Yehova?
-
Kansi lumbilo yenzechita Anazili yutiphunzisa chinji vokhuza Atata ŵasu Yehova?
NYIMBO N.° 124 Tinkhale okhulupilika nthawe zonse
a Olo kuti ŵanthu ayakine enzechita kusankhiwa na Yehova kuti ankhale Anazili, anyinji mwa Aisiraeli amene enzetumikila monga Anazili esankha utumiki wamene uyu mwakufuna kwawo.—Onani bokosi yakuti “ Anazili osankhiwa na Yehova.”
b Nthawe ziyakine, mabuku ŵasu olinganija Anazili na ŵanthu amene ali muutumiki wa nthawe zonse. Koma munkhani ino tikambilane ngako mwamene sewo tonse amene nise olipeleka kwa Yehova mwatingakonkhejele chisanzo cha Anazili.
c Kanyinji-kanyinji, vuwoneka kuti Anazili enzenkhalalini na udindo uliwonse wamene wenzefunika kuukwanilisha monga utumiki wa Unazili wamene wenzefunika kuuchita pokwanilisha lumbilo yawo.
d Onani nkhani yapa jw.org yakuti “Tinasankha Kukhala Moyo Wosalira Zambiri” pankhani zakuti “Zochitika pa Moyo wa a Mboni za Yehova.”
e MAWU OFOTOKOZA CHITHUNZI: Mnazili ali palulu pa ng’anda ndipo ololeshesha malilo a wachibale wake wokondewa. Chifukwa cha lumbilo yake kwa Yehova yove ofunikalini kupezekapo pa malilo.
