1. Bahlanka ba Jehofa ba bontšhitše moya ofe o mobotse ga e sa le go tloga kgale?

 NA O tšeela godimo segwera sa gago le Jehofa? Ke nnete gore go bjalo! Le gona ga o noši. Batho ba bantšhi go tloga kgale ba be ba dutše ba ikwa ka tsela yeo o ikwago ka yona. (Ps. 104:​33, 34) Ba bantšhi ba ile ba itima dilo tše dintšhi gore ba kgone go hlankela Jehofa. Se ke seo Banasari ba Isiraele ya kgale ba se dirilego. E be e le bomang, gona re ka ithuta’ng mohlaleng wa bona?

2. (a) Banasari e be e le bomang? (Numeri 6:​1, 2) (b) Ke ka baka la’ng Baisiraele ba bangwe ba ile ba dira keno ya go ba Banasari?

² Lentšu “Monasari” le tšwa lentšung la Seheberu leo le bolelago gore “Yo a ikarotšego,” “Yo a hlaotšwego,” goba “Yo a ineetšego.” Lentšu le le hlalosa gabotse Baisiraele bao ba bego ba na le mafolofolo, bao ba ilego ba ikgafela go hlankela Jehofa ka tsela e kgethegilego. Molao wa Moshe o be o dumelela monna goba mosadi gore a direle Jehofa keno e kgethegilego ya gore o tla phela e le Monasari ka nako e itšego. a (Bala Numeri 6:​1, 2.) Ge Moisiraele a be a dira keno yeo, o be a swanetše go latela melao yeo Baisiraele ba bangwe go bego go sa hlokagale gore ba e latele. Ge e ba go le bjalo, ke ka baka la’ng Moisiraele a be a ka kgetha go ba Monasari? Moisiraele yoo a ka ba a be a hlohleletšwa ke lerato leo a ratago Jehofa ka lona e bile a bontšha gore o leboga dimpho tše dintšhi tšeo Jehofa a mo filego tšona.—Doit. 6:5; 16:17.

3. Bahlanka ba Modimo lehono ba swana le Banasari bjang?

 ³ Thulaganyo ya go ba Monasari e fedile ge Molao wa Moshe o be o tšeelwa legato ke “molao wa Kriste.” (Bagal. 6:2; Baroma 10:4) Go swana le Banasari, lehono bahlanka ba Jehofa ba bontšha gore ba tloga ba nyaka go mo hlankela ka dipelo tša bona ka moka, moya wa bona ka moka, monagano wa bona ka moka le matla a bona ka moka. (Mar. 12:30) Re dira keno ya gore re nyaka go hlankela Jehofa ge re ineela go yena ka go rata. E le gore re phelele keno yeo re e dirilego, re swanetše go dira dilo tšeo Modimo a di nyakago le go ikgafa. Ge re dutše re ithuta kamoo Banasari ba bego ba phela ka go dumelelana le dikeno tšeo ba di dirilego, re tlo bona dithuto tše bohlokwa tša kamoo re ka phelago ka go dumelelana le dikeno tšeo re di dirilego. b (Mat. 16:24) A re boneng mehlala e mengwe ya seo.

IKGAFE

4. Go ya ka Numeri 6:​3, 4, Monasari o be a ka lekwa bjang?

⁴ Bala Numeri 6:​3, 4. Banasari ba be ba se ba swanela go nwa bjala, go ja diterebe, diterebe tšeo di omišitšwego goba dilo tšeo di dirilwego ka diterebe. Batho bao ba bego ba dula le bona, ba be ba thabela dijo tša mohuta woo le dino ka ge e be e se phošo go dira bjalo. Beibele e re botša gore “beine yeo e dirago gore motho a thabe” ke mpho yeo e tšwago go Modimo. (Ps. 104:​14, 15) Eupša Banasari ba ile kgetha go se je le go nwa dilo tšeo. c

5. Madián le Marcela ba ile ba kgetha go dira’ng, gona ka baka la’ng?

⁵ Go swana le Banasari, le rena go na le dilo tšeo re itimago tšona gore re kgone go hlankela Jehofa ka mo go oketšegilego. Nagana ka mohlala wa Madián le Marcela. d Banyalani ba ba Bakriste ba be ba na le sa bona. Madián o be a na le mošomo o mobotse woo o bego o dira gore ba dule ka ntlong e kgolo. Eupša ba be ba nyaka go dira ka mo go oketšegilego tirelong ya Jehofa. E le gore ba fihlelele pakane yeo ba ile ba swanelwa ke go dira diphetogo. Ba re: “Re thomile ka go fokotša ditshenyagalelo tša rena.” Re ile ra hudugela ntlong e nyenyane ra ba ra rekiša le koloi ya rena.” Madián  le Marcela ba be ba sa gapeletšege gore ba dire seo, eupša ba dirile bjalo ka gobane seo se be se tla ba thuša gore ba oketše tirelo ya bona. Ba ikwa ba kgotsofetše ebile ba thabile ka baka la phetho yeo ba e dirilego.

6. Ke ka baka la’ng lehono Bakriste ba ikgafa? (Bona le seswantšho.)

⁶ Lehono Bakriste ba a thaba ge ba ikgafa gore ba fetše nako e ntšhi ba hlankela Jehofa ka mo go oketšegilego. (1 Bakor. 9:​3-6) Jehofa ga a re gapeletše gore re ikgafe goba go tlogela go ba le dilo tšeo re nago le tšona gobane ga se phošo go ba le tšona. Ka mohlala, ba bangwe ba tlogela mošomo wo ba o ratago, magae goba diruiwa tša bona. Ba bantšhi ba ile ba kgetha go se tsene lenyalong ka nakwana goba go se be le bana. Ba bangwe ba kgethile go hlankela moo go nago le tlhokagalo le ge seo se ba dira gore ba be kgole le ba leloko le bagwera. Ba bantšhi ba rena re ikgafa ka go rata ka gobane re nyaka go nea Jehofa se se kaonekaone. Kgodišega gore Jehofa o leboga boikgafo bjo o bo dirago go sa šetšwe gore ke bjo bogolo goba ke bjo bonyenyane gore o mo hlankele ka mo go oketšegilego.—Baheb. 6:10.

IKEMIŠETŠE GO BA YO A FAPANEGO

7. Monasari o be a ka kopana le mathata afe ge a dutše a phetha keno ya gagwe? (Numeri 6:5) (Bona le seswantšho.)

⁷ Bala Numeri 6:5. Banasari ba be ba sa kote meriri ya bona. Yeo e be e le tsela ya go bontšha gore ba theetša Jehofa kamoo go feletšego. Meriri ya Moisiraele e be e ka bontšha gore ke Monasari go ithekgile ka gore Bonasari bja gagwe bo tšea nako e kaaka’ng. Monasari o be a ka se kopane le mathata ge e ba bao ba dulago kgauswi le yena ba thekga seo a se dirago. Eupša ka maswabi, go be go na le dinako tše dingwe moo Banasari ba bego ba sa hlomphiwe goba ba sa thekgwe. Nakong ya moporofeta Amose, Baisiraele ba bahlanogi ba be ba dulela go “nea Banasari beine gore ba nwe,” mohlomongwe e le ka morero wa go ba dira gore ba tshele keno yeo ba e dirilego ya go se nwe beine. (Amose 2:12) Ka dinako tše dingwe, go be go nyakega sebete gore Monasari a dule a phethagatša keno ya gagwe le go ba yo a fapanego.

8. Ke’ng seo se go matlafatšago ka phihlelo ya moswa yo a bitšwago Benjamin?

⁸ Le rena Jehofa a ka re thuša gore re be le sebete le go ba bao ba fapanego le ge e ba re na le dihlong goba re boifa ka tlhago. Nagana ka mohlala wa Benjamin, yo a nago le mengwaga e lesome wa kua Norway yo e lego Hlatse ya Jehofa. Sekolong seo a bego a tsena go sona, ba ile ba dira moletlo woo o bego o tlo thekga naga ya Ukraine yeo e sentšwego ke ntwa. Bana ba sekolo ba ile ba kgopelwa gore ba opele ba apere diaparo tšeo di nago le mebala  ya naga ya Ukraine. Benjamin o ile a emela kgojana le moo moletlo o bego o le gona gore a se ke a tšea karolo. Eupša morutiši wa gagwe o ile a mmona gomme a mo goeletša, a re: “Etla o be le rena. Re eme ka wena!” Benjamin o ile a ba le sebete gomme a lata morutiši wa gagwe a mmotša gore: “Ga ke tšee karolo dipolotiking. Ge e le gabotse, Dihlatse tša Jehofa tše dintšhi di golegilwe ka gobane di ganne go ya ntweng.” Morutiši yo o ile a kwešiša Benjamin gomme a mo tlogela. Le ga go le bjalo bana bao a tsenago le bona ka klaseng ba ile ba mmotšiša gore ke ka baka la’ng a sa be le bona. Benjamin o be a tšhogile kudu mo a bego a le kgauswi kudu le go lla, eupša o ile a ba le sebete gomme a botša bana bao a tsenago le bona ka klaseng mantšu ao a a boditšego morutiši wa gagwe. Ka morago, Benjamin o ile a botša batswadi ba gagwe gore o be a ekwa eka Jehofa o mo thuša go emela tumelo ya gagwe.

9. Re ka dira’ng gore re thabiše pelo ya Jehofa?

⁹ Ka ge re kgetha go hlankela Jehofa, batho ba bangwe ba lemoga gore re fapana le bona. Ge re le mešomong goba sekolong re hloka sebete sa go ipolela gore re ba bangwe ba Dihlatse tša Jehofa. Ka ge lefase le le dutše le senyega le go feta, go ka ba thata gore re phele ka melao ya motheo ya Beibele le go botša ba bangwe ditaba tše dibotse. (2 Tim. 1:8; 3:13) Eupša dula o gopola gore re thabiša pelo ya Jehofa ge re bontšha sebete gomme re fapana le batho bao ba sa mo hlankelego.—Die. 27:11; Mal. 3:18.

DIRA GORE JEHOFA A TLE PELE BOPHELONG BJA GAGO

10. Ditaelo tšeo go bolelwago ka tšona go Numeri 6:​6, 7, di be di ka dira gore Banasari ba lekege bjang?

¹⁰ Bala Numeri 6:​6, 7. Banasari ba be ba sa batamele setopo. Mathomong re ka bona se e se bothata bjo bogolo. Eupša mehleng ya Beibele, Banasari ba be ba ka hwetša go le thata go dira se ge wa leloko a hlokofetše. E nngwe ya dilo tšeo di bego di dirwa lehung e be e le go batamela setopo sa mohu. (Joh. 19:​39, 40; Dit. 9:​36-40) Monasari o be a ka se kgone go dira seo ka baka la keno yeo a e dirilego. Le ge go be go hlokofetše wa leloko, Banasari ba be ba bontšha gore tumelo ya bona e tiile ka go phelela keno yeo ba e dirilego. Ga go pelaelo gore Jehofa o be a tiiša bahlanka ba gagwe bao ba botegago le go ba thuša gore ba kgone go lebeletšana le mathata ao ba bego ba kopana le ona.

11. Mokriste o swanetše go ikemišetša go dira’ng ge a dirišana le ba lapa la gagwe? (Bona le seswantšho.)

 ¹¹ Ka ge re le Bakriste, re tšeela godimo keno ya rena ya go ineela go Jehofa. Se se ka akaretša diphetho tšeo re di dirago le dilo tše dingwe tšeo re di dirago ka gae. Re phetha maikarabelo a rena a mangwalo ka gae eupša ga re dumelele dinyakwa tša malapa a rena di etla pele go fetiša seo Jehofa a se nyakago. (Mat. 10:​35-37; 1 Tim. 5:8) Ka dinako tše dingwe, re ka dira diphetho tšeo di sa thabišego ba leloko eupša di thabiša Jehofa.

12. Ge Alexandru a be a lebeletšane le bothata bja ka lapeng, o ile a dira’ng gona ga se a ka a dira‘ng?

¹² Nagana ka phihlelo ya Alexandru le mosadi wa gagwe, Dorina. Ka morago ga ngwaga banyalani ba ba ithuta Beibele, Dorina o ile a tlogela go ithuta gomme a nyaka gore Alexandru le yena a tlogele. Eupša o ile a mmotša a išitše maswafo fase e bile a le šedi gore o tlo tšwela pele a ithuta. Dorina ga se a thabela go kwa seo gomme o ile a leka go mo gapeletša go tlogela go ithuta. Alexandru o re o ile a leka go mo kwešiša le ge go be go se bonolo go dira bjalo. Ka dinako tše dingwe ge Dorina a be a bolela le yena gampe, o be a ekwa eka a ka tlogela go ithuta. Le ga go le bjalo, Alexandru o ile a tšwela pele a bea Jehofa pele le go bontšha mosadi wa gagwe lerato le tlhompho. Mafelelong, mohlala wa gagwe o dirile gore mosadi wa gagwe a ithute Beibele gape gomme mafelelong a kolobetšwa.—Bona bidio yeo e lego go jw.org/nso yeo e rego Alexandru le Dorina Vacar: “Lerato ga le Fele Pelo e Bile le Botho” ka tlase ga “Beibele e Fetoša Maphelo.”

13. Re ka bontšha bjang gore re rata Jehofa le ba malapa a gabo rena?

¹³ Jehofa ke yena a dirilego gore go be le lapa, ka gona o nyaka gore re be le malapa a thabilego. (Baef. 3:​14, 15) Ge eba re nyaka go thaba e le ka nnete re swanetše go dira dilo ka tsela ya Jehofa. O se ke wa belaela gore Jehofa o thabela kudu maiteko ao o a dirago go mo hlankela ge o dutše o hlokometše ba lapa la gago le go ba swara ka lerato le tlhompho.—Baroma 12:10.

KGOTHALETŠA BA BANGWE GORE BA BE LE MOYA WA BONASARI

14. Re swanetše go lwela go matlafatša bomang ka mantšu a rena?

¹⁴ Batho ka moka bao ba kgethago go hlankela Jehofa lehono ba swanetše go ikgafa ka baka la ge ba mo rata. Ka dinako tše dingwe ga go bonolo go dira bjalo. Re ka thušana bjang gore ka moka ga rena re be le moya woo? Re ka dira seo ka go bolela mantšu a kgothatšago. (Jobo 16:5) Na ka phuthegong ya geno go na le bao ba lekago go nolofatša maphelo a  bona gore ba kgone go hlankela Jehofa ka mo go oketšegilego? Na o tseba baswa bao ba emelago ditumelo tša bona ka sebete ge ba le sekolong le ge go se bonolo go dira bjalo? Na go na le bao re ithutago le bona Beibele goba bana babo rena le dikgaetšedi bao ba thatafalelwago ke go hlankela Jehofa ba lokologile ka ge ba ganetšwa ke ba leloko? Eka re ka diriša sebaka se sengwe le se sengwe seo re se hwetšago go kgothatša bana babo rena ba le dikgaetšedi le go ba bontšha gore re leboga seo ba se dirago le sebete seo ba se bontšhago.—Fil. 4, 5, 7.

15. Ba bangwe ba ile ba thekga bjang bana babo rena le dikgaetšedi bao ba lego tirelong ya nako e tletšego?

¹⁵ Ka dinako tše dingwe re ka thuša bana babo rena le dikgaetšedi bao ba lego tirelong ya nako e tletšego ka dilo tšeo ba di hlokago. (Die. 19:17; Baheb. 13:16) Kgaetšedi yo a godilego wa go dula Sri Lanka, o ile a dira sona seo. Ka morago ga gore mphiwafela wa gagwe o oketšwe, o be a nyaka go thuša dikgaetšedi tše pedi tša babulamadibogo ka ge ba be ba na le mathata a ditšhelete. O ile a neela ka tšhelete kgwedi le kgwedi gore ba kgone go lefelela ditshenyagalelo tša bona tša megala. Ruri se kgaetšedi yo a se dirago ke se sebotse kudu!

16. Re ka ithuta’ng thulaganyong ya Banasari ba nakong e fetilego?

¹⁶ Re ka ithuta dilo tše dintšhi go mohlala o mobotse wo o beilwego ke Banasari ba nakong e fetilego! Eupša thulaganyo ye e re ruta se sengwe ka Tatago rena wa legodimong Jehofa. O a tseba gore re tloga re nyaka go mo kgahliša e bile re ikemišeditše go gafa maphelo a rena gore re phele ka keno yeo re e dirilego. O re tšeela godimo ka go re dumelela gore re mmontšhe gore re tloga re mo rata. (Die. 23:​15, 16; Mar. 10:​28-30; 1 Joh. 4:19) Thulaganyo ya Banasari e bontšha gore Jehofa o a bona e bile o tšeela godimo dilo ka moka tšeo re di dirago gore re mo hlankele. Eka re ka ikemišetša go tšwela pele re hlankela Jehofa ka matla a rena ka moka.