1. Ni mutwarize ki murungi ogu abaheereza ba Yehova boorekire kuruga ira?

 NOOTWARA omukago gwawe na Yehova nk’ogw’omuhendo? Buzima nikwo kiri! Kandi tori wenka. Kuruga ira, abantu baingi batwire nibeehurira nk’oku orikwehurira. (Zab. 104:​33, 34) Baingi babaasize kugira ebi baayefeerereza kubaasa kuramya Yehova. Eki nikyo Abaisraeli aba ira abarikumanywa nk’Abanaziiri baakozire. Bakaba bari baahi, kandi nitubaasa kubeegyeraho ki?

2. (a) Abanaziiri bakaba bari baahi? (Okubara 6:​1, 2) (b) Ahabw’enki Abaisraeli abamwe baayehaireyo kuba Abanaziiri?

² Ekigambo “Omunaziiri” nikiruga omu kigambo ky’Oruheburaayo ekirikumanyisa “Otoorainwe,” “Otaanisiibwe aha bandi,” nari “Oyehaireyo.” Ekigambo eki, nikishoboorora gye Abaisraeli abeeziriki abaabaire bagira ebi baayefeerereza kuheereza Yehova omu muringo gw’omutaano. Ebiragiro bya Musa bikaba nibiikiriza omushaija nari omukazi kukora endagaano y’omutaano na Yehova arikuraganisa kuba Omunaziiri kumara obwire. a (Shoma Okubara 6:​1, 2.) Endagaano egyo nari okuragaanisa okwo, kukaba nikutwariramu okukuratira obuhabuzi obwabaire nibutaana aha bw’Abaisraeli abandi. Mbwenu shi, ahabw’enki Omuisraeli yaabaire acwamu kuba Omunaziiri? Obundi n’ahabwa rukundo ei yaabaire ainiire Yehova, n’okwenda kumusiima ahabw’emigisha ei yaabaire aba amuhaire.—Bir. 6:5; 16:17.

3. Abaheereza ba Yehova obunaku obu bari nk’Abanaziiri mu muringo ki?

 ³ Entebeekanisa y’Obunaziiri ekahendera obu “ekiragiro kya Kristo” kyaza omu mwanya gw’Ebiragiro bya Musa. (Gal. 6:2; Rom. 10:4) Kwonka nk’Abanaziiri, abaheereza ba Yehova obunaku obu nibagumizamu kworeka ngu baine ekyetengo ky’okumuheereza n’omutima gwabo gwona, n’amagara gaabo goona, n’obwengye bwabo bwona, n’amaani gaabo goona. (Mak. 12:30) Twayehayo ahari Yehova, nituraganisa twekundiire kumuheereza. Kubaasa kuhikiiriza eki turaganiise, twine kukora ebi Yehova arikukunda kandi tukagira ebi twayefeerereza. Twaba nitushwijuma oku Abanaziiri baabaire nibatwaza, nituza kwega amashomo makuru oku turikubaasa kutwaza. b (Mat. 16:24) Ka tureebe gamwe aha mashomo ago.

BA ORIKWEFEEREREZA

4. Kurugiirira aha Okubara 6:​3, 4, okwefeerereza kw’Abanaziiri kukagyezibwa kuta?

⁴ Shoma Okubara 6:​3, 4. Abanaziiri bakaba baine kwetantara ebirikusinza byona, otwariiremu ebikozirwe omu mizaabibu n’okugirya. Abantu abu baabaire batwire nabo bakaba nibarya eby’okurya nk’ebyo, ahabw’okuba bakaba bataine kiragiro kirikubazibira. Baibuli neegira ngu ‘viinyo neegwisa gye omutima’ kandi n’ekiconco kuruga ahari Ruhanga. (Zab. 104:​14, 15) Kwonka, Abanaziiri bakaba bacwamu beekundiire kwefeerereza ebintu nk’ebyo. c

5. Madián na Marcela bakeefeerereza ki, kandi ahabw’enki?

⁵ Okushushana n’Abanaziiri, nitwefeerereza kubaasa kuramya Yehova omu bwijwire. Teekateeka aha ky’okureeberaho kya Madián n’omukazi we Marcela. d Bakaba bari omu mbeera nungi. Madián akaba aine omurimo murungi ogwabaire nigubabaasisa kutuura omu nju nungi. Kwonka, bakaba nibenda kwongyera aha buheereza bwabo. Kubaasa kuhika aha kigyendererwa ekyo, bakacwamu kukora empinduka zitari zimwe. Nibagira bati: “Tukatuubya aha nshohoza yaitu, twaza omu nju enkye kandi twaguza n’emotoka yaitu.” Madián na Marcela bakaba bataine kwefeerereza batyo, kwonka bakacwamu kukikora ahabw’okuba kikaba nikiza kubahwera kwongyera aha buheereza bwabo. Baine  okumarwa kandi bashemereirwe, ahabw’okucwamu batyo.

6. Ahabw’enki Abakristaayo obunaku obu nibeefeerereza? (Reeba n’ekishushani.)

⁶ Obunaku obu, Abakristaayo nibashemererwa ku barikwefeerereza kuhayo obwire bwingi kukora emirimo y’ekibiina. (1 Kor. 9:​3-6) Yehova tarikutugyema kwefeerereza, kandi ebi turikwefeerereza tibiri bibi. Nk’eky’okureeberaho, bamwe nibeefeerereza omurimo ogu barikukunda, enju yaabo, nari amatungo agu barikukunda. Baingi bacwiremu kutarahukiiriza kutaaha omu bushwere nari kuzaara abaana. Abamwe bacwiremu kuheereza ahu ababuurizi barikwendwa munonga, n’obu ekyo kirikubareetera kutuura hare n’ab’eka yaabo. Baingi omuriitwe nitucwamu kwefeerereza tutyo ahabw’okugira ngu nitwenda kuha Yehova ekirikukirayo oburungi. Gira obwesigye ngu Yehova naakusiima ahabwa byona ebi orikwefeerereza kumuheereza, yaaba bikye nari bingi.—Heb. 6:10.

BA OYETEEKATEEKIRE KUBA OW’OMUTAANO

7. Niki ekyabaire nikibaasa kureetera Omunaziiri kugumirwa kuhamira aha kuraganisa kwe? (Okubara 6:5) (Reeba n’ekishushani.)

⁷ Shoma Okubara 6:5. Abanaziiri bakaba batashemereire kutega eishokye ryabo. Eki nikyo kyabaire kyoreka ngu beehaireyo ahari Yehova. Omwisraeli ku yaabaire amara obwire buraingwa ari Omunaziiri, eishokye rye rikaba rikura n’abandi barireeba. Ku baabaire bashagika Omunaziiri, kandi bakamuhiga kuhamira aha kuragaanisa kwe, kikaba kimworobera kuguma ari ow’omutaano. Kwonka, eky’obusaasi omu byafaayo by’Abaisraeli haine obu Abanaziiri baabaire batarikusiimwa nari kushagikwa. Omu bwire bwa nabi Amosi, Abaisraeli abagomi bakaguma nibaha Abanaziiri viinyo, obundi barikwenda kubareetera kutahamira aha ndahiro yaabo ey’okutanywa viinyo. (Amo 2:12) Obumwe, kikaba nikyetengyesa obumanzi Omunaziiri kubaasa kuhamira aha kuraganisa kwe, n’okuba ow’omutaano.

8. Benjamin nitumwegyeraho ki?

⁸ Ahabw’obuhwezi bwa Yehova naitwe nitubaasa kworeka obumanzi tube ab’omutaano, n’obu twakuba twine enshoni. Teekateeka aha ky’okureeberaho kya Benjamin, Omujurizi wa Yehova oine emyaka ikumi owa Norway. Ahabw’orutaro oruri omuri Ukraine eishomero rye rikatebeekanisa omukoro gw’okubashagika. Abaana bakashabwa kweshongora ebyeshongoro bajwaire ebijwaro ebirimu erangi z’eihanga rya Ukraine. Benjamin akacwamu kuteejumba omu mukoro ogwo arikuguma hangahari n’ahu omukoro ogwo gwabaire guri. Kwonka, omwe aha bashomesa  be akamureeba reero yaagambira ahaiguru ati: “Oine kwija, twena tukutegyereize!” Benjamin akooreka obumanzi yaaza ahu omwegyesa we yaabaire ari, yaamugira ati: “Tindikugwera rubaju omu by’obutegyeki kandi tindikwejumba omu kweshariinga kw’eby’obutegyeki. Nangwa, Abajurizi ba Yehova baingi bari omu kihome ahabw’okwanga kuza omu ntaro.” Omushomesa we akaikiriza ebi Benjamin yaamushoboororoire kandi yaamureka. Kwonka, bamwe aha bu Benjamin arikushoma nabo bakatandika kumubuuza ahabw’enki atarabegaitsireho. Benjamin akatiina munonga yaatandika kurira, kwonka akooreka obumanzi yaagarukiramu abu arikushoma nabo ebi yaagambiire omushomesa we. Bwanyima, Benjamin akagambira abazaire be ngu Yehova niwe yaamuhwera kujurira ebi arikwikiriza.

9. Ni mu muringo ki oku turikubaasa kureetera Yehova kushemererwa?

⁹ Turi ab’omutaano aha bantu abatwetooroire ahabw’okugira ngu nitucwamu kukora ebi Ruhanga arikukunda. Nikyetengyesa obumanzi kwemanyisa nk’Abajurizi ba Yehova aha murimo nari aha ishomero. Kandi abantu baayongyera kusiisikara omu miteekateekyere n’omu mitwarize, nitubaasa kugumirwa kukuratira emisingye ya Baibuli n’okugambira abandi amakuru marungi. (2 Tim. 1:8; 3:13) Butoosha, ijuka ngu ‘nitushemeza’ Yehova twayoreka obumanzi tukaba ab’omutaano aha batarikumuheereza.—Enf. 27:11; Mal. 3:18.

GUMIZAMU NOOYEBEMBEZA OKUHEEREZA YEHOVA

10. Okugyendera aha kiragiro ekiri omu Okubara 6:​6, 7 kikagyeza kita Abanaziiri?

¹⁰ Shoma Okubara 6:​6, 7. Abanaziiri bakaba bataine kuhika haihi n’emitumbi. Noobaasa kuteekateeka ngu okwo n’okwefeerereza kukye. Kwonka, omu bwire bwa Baibuli, ekyo kikaba kiri ekiragiro kigumire aha Banaziiri na munonga omunyabuzaare wa haihi ku yaabaire afa. Emigyenzo y’orufu omu bwire obwo ekaba neetwariramu okuba haihi n’omutumbi. (Yoh. 19:​39, 40; Byak. 9:​36-40) Kwonka ahabw’okuraganisa oku Omunaziiri yaabaire akora akaba atabaasa kwejumba omu migyenzo nk’egyo. N’omu bwire bw’okuganya n’ab’eka yaabo, Abanaziiri bakaba booreka okwikiriza kuhami barikuhamira aha kuraganisa kwabo. Buzima, Yehova akaba aha abaheereza be abo abeehaireyo amaani g’okwemera embeera egyo eyaabaire egumire.

11. Omukristaayo ashemereire kuba amaririre kukora ki aha bikwatiraine n’enshonga z’eka? (Reeba n’ekishushani.)

 ¹¹ Naitwe Abakristaayo nitutwara okwehayo kwaitu ahari Yehova nka kukuru. Eki nikikwata aha bi turikucwamu ebikwatiraine n’eka yaitu n’ebi turikukora. Nituhikiiriza obujunaanizibwa obu twine omuka oburi omu Byahandiikirwe, kwonka titurikwebembeza ebyetengo by’ab’eka yaitu kukira ebi Yehova arikutwenza. (Mat. 10:​35-37; 1 Tim. 5:8) Obumwe, ebi turikucwamu kushemeza Yehova nibibaasa kushiisha obusingye obu twine n’abanyabuzaare.

12. Obu Alexandru yaabaire naaraba omu mbeera egumire omu ka ye, niki eki yaakozire kandi niki eki atarakozire?

¹² Teekateeka aha ky’okureeberaho kya Alexandru n’omukazi we, Dorina. Bwanyima y’okwega Baibuli kumara omwaka gumwe, Dorina akacwamu kurekyera aho, kandi akaba naayenda ngu Alexandru akore nikyo kimwe. Kwonka, Alexandru akamugarukamu omu muringo gw’obwengye kandi aikaikaine ngu we naija kugumizamu. Ekyo tikirashemeize Dorina, kandi akateeraho kumugyemesereza kurekyera aho kwega. Alexandru naagira ngu akateeraho kwetegyereza enyehurira z’omukazi we, kwonka akaba naagumirwa. Obumwe, Dorina ku yaabaire amuhakanisa nari yaamugambira kubi akaba ayenda kurekyera aho kwega Baibuli. Kwonka, Alexandru akagumisiriza yaata Yehova omu mwanya gw’okubanza, kandi yaagumizamu arikworeka ngu naakunda omukazi we kandi naamuha ekitiinisa. Empereruka, eky’okureeberaho kye kikahiga omukazi we kugaruka kwega Baibuli n’okubatizibwa.—Reeba vidiyo Alexandru na Dorina Văcar: “Okukunda Kugumisiriza, Kugira Embabazi” omu bicweka ebikurataine “Amazima Nigahindura Abantu” aha jw.org.

13. Nitubaasa kworeka tuta ngu nitukunda Yehova n’eka yaitu?

¹³ Yehova niwe yaatandikireho entebeekanisa y’eka, kandi naayenda ngu twena tugire eka erimu okushemererwa. (Efe. 3:​14, 15) Twaba nitwenda kugira okushemererwa okwabuzima, twine kukora ebintu nk’oku Yehova arikwenda. Gira obwesigye ngu Yehova naakusiima ahabw’okwefeerereza kumuheereza, orikureeberera ab’eka yaawe kandi okabatwariza omu muringo gwa rukundo kandi ogw’ekitiinisa.—Rom. 12:10.

HIGA ABANDI KUTOOREZA ABANAZIIRI

14. Twine kumariirira kugumya baahi omu bigambo byaitu?

¹⁴ Boona abarikucwamu kuheereza Yehova hati baine kuba beeteekateekire kwefeerereza barikuhigwa rukundo. Obumwe,  okukora ekyo tikyorobi. Nitubaasa kuhwerahwerana tuta kukora ekyo? Turikukoresa ebigambo ebirikugumya. (Yob. 16:5) Haine abari omu kibiina kyanyu abarikuteeraho kworobya embeera zaabo kwongyera kwejumba omu mirimo y’Obukama? Haine abato abu orikumanya aboorekire obumanzi barikuba ab’omutaano aha bu barikushoma nabo, n’obu ekyo kitoorobi kukora? Hariho abeegi ba Baibuli nari ab’eishe-emwe abarikugumirwa kuguma bari abeesigwa ahabw’okuhakanisibwa ab’eka yaabo? Ka tukorese buri kagisha kuhuumuriza ab’eishe-emwe abo abakundwa, turikubasiima ahabw’omutima gw’okwefeerereza n’obumanzi obu barikworeka.—Film. 4, 5, 7.

15. Bamwe bashagikire bata abari omu buheereza obw’obutwire?

¹⁵ Obumwe, nitubaasa kuhwera Abakristaayo bagyenzi baitu abari omu buheereza obw’obutwire omu miringo erikureebwa butunu. (Enf. 19:17; Heb. 13:16) Eki nikyo kyabaire kiri ekyetengo kya munyaanyazi-itwe okaikwire owa Sri Lanka. Bwanyima y’okuhuumura aha murimo, bakamwongyera aha sente z’akasiimo ezi yaabaire naatunga buri kwezi, kandi akaba naayenda kuhwera banyaanyazi-itwe babiri ba baapayoniya abaabaire baine oburemeezi omu by’entaatsya, kugumizamu omu buheereza bwabo. N’ahabw’ekyo, akacwamu kugira sente ezi yaabaha buri kwezi kubahwera aha nshohoza y’okubuurira barikukoresa esimu. Munyaanyazi-itwe ogwo ka naayefeerereza kihango!

16. Nitubaasa kwegyera ki aha ntebeekanisa y’Obunaziiri?

¹⁶ Buzima twine bingi ebi turikubaasa kwegyera aha baabaire beehayo kuba Abanaziiri. Kandi, entebeekanisa egi haine eki erikworeka n’ahari Tataitwe ow’omu iguru Yehova. Aine obwesigye ngu twine ekyetengo ky’okumushemeza, kandi tweteekateekire kwefeerereza kuhikiiriza okuraganisa kwaitu okw’okwehayo. Naatuha ekitiinisa arikwikiriza buri omwe ahariitwe kworeka rukundo ei tumwiniire. (Enf. 23:​15, 16; Mak. 10:​28-30; 1 Yoh. 4:19) Entebeekanisa y’Obunaziiri neeyoreka ngu Yehova naafayo, kandi naareeba okwefeerereza kwaitu kumuheereza nk’okw’omuhendo. Ka tumariire kugumizamu nituheereza Yehova, turikwefeerereza twekundiire kumuha ekirikukira oburungi.