NKHANI YAKUPFUNZA 7
NYIMBO 51 Tidabzipereka kwa Mulungu!
Bzomwe Tingapfunze na Anazireu
“Iye an’dzakhala wakucena kwa Yahova mu ntsiku zentse zomwe an’dzakhala Nazireu.” — NUMERO 6:8.
CAKULINGA CA NKHANIYI
Momwe ciratizo ca Anazireu cingatithandizire kukhala wakukhwimika na kukhala wakukonzeka kubvuma kuluza bzinthu bzinango kuti ticite bzizinji pa kutumikira Yahova.
1. Kuyambira kale-kale, n’ciyani comwe atumiki azinji wa Yahova ambabvuma kucita?
KODI imwepo mumbawona kuti uxamwali bwanu na Yahova ni cinthu cakufunika? Tikudziwa kuti mtawiro wanu ngwakuti, inde! Tenepo, dziwani kuti muli lini mwekha. Kuyambira kale-kale, atumiki azinji wa Yahova adabzibvambo tenepoyo. Iwo adawona uxamwali bwawo na Yahova kuti cikhali cinthu cakufunika kwene-kwene kwa iwo. (Salimo 104:33, 34) Azinji adabvuma kuluza bzinthu bzinango kuti acite bzizinji pa kutumikira Yahova. Bzimwebzi ndibzo bzomwe wale omwe akhatumikira ninga Anazireu mu nthawe ya Ajirayeri adacita. Kodi Anazireu akhali yani? Ndipo tingapfunze ciyani na bzomwe iwo adacita?
2. (a) Kodi Anazireu akhali yani? (Numero 6:1, 2) (b) N’thangwe ranyi Ajirayeri winango akhasankhula kukhala Anazireu?
2 Fala lakuti “Nazireu” limbacokera ku Cihebereu ndipo limbathandauza “Wakusankhulidwa,” “Wakupambulika” ayai “Wakubzipereka.” Fala limweri limbalewa bza Ajirayeri wa nyongo omwe akhabvuma kuluza bzinthu bzinango kuti atumikire Yahova mu njira yakupambulika. Malamulo ya Mozeji yakhabvumiza kuti mwamuna ayai mkazi asankhule nthawe yomwe akufuna kumala akutumikira ninga M’nazireu. a (Werengani Numero 6:1, 2.) Munthu akasankhula kukhala M’nazireu, pakhana malamulo yomwe iye akhafunika kuyateweza. Thangwe ranyi munthu akhasankhula kukhala M’nazireu? Bzomwe bzikhamucitisa ni lufoyi lomwe iye akhanalo kuna Yahova na kutenda bzinthu bzabwino bzomwe Yahovayo akhamucitira. — Deuteronomiyo 6:5; 16:17.
3. Kodi wanthu wa Mulungu ntsiku zino adandendemerana tani na Anazireu?
3 Makonzedwe ya Unazireu yadamala pomwe Malamulo ya Mozeji yadapitidwa mbuto na “lamulo la Kristu.” (Agalatiya 6:2; Aroma 10:4) Tsono, ninga momwe Anazireu akhacitira, wanthu wa Mulungu ntsiku zino ambafuna kucita bzizinji pa kutumikira Yahova na mtima wawo wentse, moyo wawo wentse, nzeru zawo zentse na mphanvu zawo zentse. (Marko 12:30) Timbacita cakusankhula cimweci tikabzipereka kwa Yahova. Timbakwanirisa cakusankhula cimweci tikabvuma kuluza bzinthu bzinango kuti ticite bzizinji pa kutumikira Yahova. Pomwe tikucezerana momwe Anazireu adakwanirisira lumbiro lawo, tingapfunze bzinthu bzakufunika bza momwe ifepano tingakwanirisirembo piciro lathu. b (Mateu 16:24) Bwerani tiwone bzinthu bzinango bzomwe Anazireu akhabvuma kuluza.
BVUMANI KULUZA BZINTHU BZINANGO
4. Mwakubverana na Numero 6:3, 4, kodi n’ciyani comwe Anazireu akhafunika kubvuma kuluza?
4 Werengani Numero 6:3, 4. Anazireu akhafunika lini kumwa cakumwa ciri-centse cakuledzeresa na kudya bzisapo ninga uva ayai bzakundendemerana na uva. Wanthu omwe akhali lini Anazireu akhawona kuti kucita bzimwebzi n’kwakusaya kuphonyeka, ndipo iko kukhalidi lini kuphonyeka. Bibliya limbalewa kuti “vinyu yomwe imbakondwesa mtima wa munthu” ni cisimbo cakucokera kwa Mulungu. (Salimo 104:14, 15) Napo bziri tenepo, Anazireu akhafunika kutcenkha bzinthu bzimwebzi. c
Kodi imwepo ndimwe wakukonzeka kubvuma kuluza bzinthu bzinango, ninga momwe Anazireu adacitira? (Onani ndime 4-6)
5. Kodi n’ciyani comwe Madián na Marcela adasankhula kucita, ndipo n’thangwe ranyi?
5 Ninga Anazireu, ifepanombo tin’funika kubvuma kuluza bzinthu bzinango kuti tikwanise kucita bzizinji pa kutumikira Yahova. Onani bzomwe Madián na mkazace Marcela adacita. d Banja limweri likhana moyo wabwino kwene-kwene. Madián akhaphata basa labwino ndipo iwo akhana nyumba yabwino kwene-kwene. Tsono iwo akhafuna kucita bzizinji pa kutumikira Yahova. Kuti iwo akwanirise cakulinga cawoco, akhafunika kucinja bzinthu bzinango pa moyo wawo. Iwo adalewa kuti: “Tidasiya kumbagula bzinthu bzizinji. Tidayenda kukakhala kanyumba kang’ono ndipo tidagulisa karo yathu.” Madián na Marcela akhafunikira lini kucita bzinthu bzimwebzi. Tsono iwo adacita kusankhula kucita bzimwebzi na cakulinga cakuti acite bzizinji mu utumiki. Iwo ali wakukondwa kwene-kwene thangwe ra kucita cakusankhula cimweci.
6. N’thangwe ranyi Akristau ambabvuma kuluza bzinthu bzinango? (Onani cithunzi-thunzi.)
6 Akristau ntsiku zino ambabvuma kuluza bzinthu bzinango kuti akwanise kukhala na nthawe izinji yakucita mabasa yauzimu. (1 Akolinto 9:3-6) Yahova ambatingingimiza lini kucita bzimwebzi, ndipo iye ambalewambo lini kuti bzinthu bzomwe tasiya mpsakuipa. Mwa ciratizo, winango ambabvuma kuleka kuphata basa lomwe akhafuna ayai kukhala na nyumba yomwe akhafuna. Ndipo wanthu winango ambasankhula kusaya kulowola ayai kulowodwa ayai kuleka kukhala na wana. Ndipo winango ambasankhula kuyenda kukatumikira komwe kukufunika apalizi wa Umambo azinji napo kuti kucita bzimwebzo kungawacitise kukhala kutali na adzinza wawo. Azinji wa ifepano timbabvuma kucita bzimwebzi thangwe tikufuna kucita bzizinji pa kutumikira Yahova. Khalani na citsimikizo cakuti Yahova ambawona cinthu ciri-centse comwe mumbamucitira pakumutumikira napo cicikhala cikulu ayai cing’ono. — Ahebereu 6:10.
BVUMANI KUKHALA WAKUSIYANA NA WANTHU WINANGO
7. N’thangwe ranyi nthawe zinango bzikhakhala bzakunesa kuti M’nazireu akwanirise lumbiro lace? (Numero 6:5) (Onani cithunzi-thunzi.)
7 Werengani Numero 6:5. Anazireu adalumbira kuti angadagwata lini tsisi lawo. Bzimwebzi bzidalatiziratu padeca kuti iwo akhali wakukonzeka kubvera Yahova. Mjirayeri akasankhula kukhala M’nazireu nthawe ikulu acisaya kugwata tsisi lace, wanthu akhakwanisa kumudziwa kuti ni M’nazireu. Winango akamulemekeza na kumulimbikisa kuti akwanirise cakusankhula caceco, bzimwebzi bzikhacitisa kuti bzikhale bzakupusa kuti iye akhale wakusiyana na anzace. Bzakupasa ntsisi mpsakuti pana nthawe inango yomwe Anazireu akhalemekezedwa lini. Pa nthawe ya mpolofeta Amose, Ajirayeri wakupanduka “akhapitiriza kumbapasa vinyu Anazireu kuti amwe,” na cakulinga cakuti awatazise kukwanirisa lumbiro lawo lakuti aleke kumwa. (Amose 2:12) Nthawe zinango, M’nazireu akhafunika kukhala wakukhwimika kuti akwanise kukwanirisa lumbiro lace na kukhalambo wakusiyana na wanthu winango.
M’nazireu omwe akhakwanirisa lumbiro lace, iye akhali wakukonzeka kulatiza kuti akhali wakusiyana na winango (Onani ndime 7)
8. Kodi n’ciyani comwe Benjamin adacita, ndipo bzimwebzi bzakulimbikisani tani?
8 Na thandizo la Yahova, ifepanombo tingakhale wakukhwimika ticilatiza kuti ndife wakusiyana na wanthu winango napo kuti ndife wa manyazi. Onani bzomwe bzidacitikira mulumbwana wa magole 10 wa ku Noruega wakucemeredwa Benjamin. Ku xikola kwace kudacitidwa msinda wakupambulika wakuthandizira dziko la Ucrânia thangwe ra nkhondo yomwe ikucitika kumweko. Wana wentse wa pa xikolayo adauzidwa kuti akaimbe nyimbo na kubvala bzakubvala bzomwe bzina kore za bandera la ku Ucrânia. Benjamin adalamba kukhala pa msinda umweyu ndipo adakhala kutali na komwe msindayo udacitikira. Mpfunzisi wace m’bodzi adamuwona ndipo adakuwa kuti: “Iwepo un’funika kudzakhala nafe pabodzi tsapanopapa. Tentsenefe tikudikhirira iwepo!” Tsono Benjamin adatawira mpfunzisi waceyo mwakukhwimika, aciti: “Inepano nimbapitira lini nkhani za ndale. Mboni za Yahova zizinji zimbaikhidwa m’kawoko thangwe ra kulamba kuyenda ku nkhondo.” Mpfunzisi waceyo adabvuma bzomwe Benjamin adalewa ndipo adamusiya tenepo. Tsono anzace wa mu sala adayamba kumubvunza kuti n’thangwe ranyi iye alibe kukhala nawo pabodzi pa msindayo. Bzimwebzi bzidacitisa kuti Benjamin ayambe kufuna kulira. Koma napo bziri tenepo, iye adawafotokozera anzacewo mafala mabodzi-bodzi yomwe adafotokozera mpfunzisi wace. Patsogolo pace, Benjamin adauza abereki wace kuti Yahova adamuthandiza kukhotcerera cikhulupiro cace.
9. Kodi n’ciyani comwe tingacite kuti tikondwese mtima wa Yahova?
9 Tikasankhula kucita kufuna kwa Yahova timbalatiza kuti ndife wakusiyana na wanthu winango. Tin’funika kukhala wakukhwimika kuti tibzidziwikise kuti ndife Mboni ya Yahova ku basa ayai ku xikola. Pakuti bzinthu bziniyenda bziciipiratu m’dzikoli, kutsogoloku bzin’dzakhala bzakunesa kuti titeweze malango ya Yahova na kupalizirambo mafala yabwino kwa anzathu. (2 Timotio 1:8; 3:13) Tsono, nthawe zentse mbakumbukirani kuti ‘timbakondwesa mtima wa Yahova’ tikakhala wakukhwimika ticilatiza kuti ndife wakusiyana na wale omwe ambamutumikira lini. — Mimwani 27:11; Malakiya 3:18.
IKHANI YAHOVA PA MBUTO YAKUYAMBA PA MOYO WANU
10. N’thangwe ranyi kuteweza malango ya pa Numero 6:6, 7 cikhali cinthu cakunesa kwa Anazireu?
10 Werengani Numero 6:6, 7. Anazireu akhafunika lini kukhala pafupi na munthu wakufa. Imwepo mungawone ninga kuti kucita bzimwebzi kukhali lini kwakunesa. Tsono mu nthawe za m’Bibliya, bzimwebzi bzikhali bzakunesa kwene-kwene kwa M’nazireu maka-maka bzikakhala kuti munthu omwe wafayo ni wadzinza wace. Pa nthawe imweyo, pa msinda wa nkhawa bzikhafunikira kuti wanthu akhale pafupi na munthu omwe wafayo. (Juwau 19:39, 40; Mabasa 9:36-40) M’nazireu akhafunika lini kufendera pafupi na munthu wakufa kuti acite miyambo imweyi thangwe ra lumbiro lomwe iye adacita. Napo pa nthawe yomwe wanthu wa m’banja lawo akhagumana na mabvuto yakusunamisa, Anazireu akhalatiza kuti akhana cikhulupiro cakulimba mwa kupitiriza kuteweza lumbiro lawo. Kulewa cadidi, Yahova adapitiriza kupasa mphanvu atumiki wace wakubziperekawa kuti akunde mabvuto yomwe akhagumana nayo.
11. N’ciyani comwe Mkristau an’funika kukhala wakukonzeka kucita akakhala akufuna kucita cakusankhula pakulewa bza banja lace? (Onani cithunzi-thunzi.)
11 Ifepano ninga Akristau timbawona kuti kubzipereka kwathu kwa Yahova ni cinthu cakufunika kwene-kwene. Bzimwebzi bzimbaticitisa kuti ticinje bzinthu bzinango pa bzakusankhula na bzicito bzomwe timbacita na adzinza wathu. Ifepano timbaphata basa na nyongo kuti tidyese banja lathu, tsono timbalekerera lini kuti bzimwebzi bzikhale patsogolo kuposa kucita bzomwe Yahova ambafuna. (Mateu 10:35-37; 1 Timotio 5:8) Nthawe zinango timbafunikira kucita bzakusankhula bzomwe wanthu wa m’banja mwathu angakomedwe lini nabzo na cakulinga cakuti tikondwese Yahova.
Kodi imwepo ndimwe wakukonzeka kuikha Yahova pa mbuto yakuyamba napo pa nthawe zakunesa pa moyo wanu? (Onani ndime 11) e
12. Kodi n’ciyani comwe Alexandru adacita pomwe mkazace akhayezera kumusiyisa kupfunza Bibliya, ndipo n’ciyani comwe alibe kucita?
12 Onani bzomwe bzidacitikira Alexandru na mkazace, Dorina. Pomwe banjali lidamala gole libodzi likupfunza Bibliya, Dorina adasiya kupfunzako, ndipo iye akhafuna kuti bayace, Alexandru, asiyembo kupfunzako. Tsono Alexandru adamuuza mkazaceyo mwakuderekha na mwakugwa mpfuwa kuti iye angadapitiriza kupfunza Bibliya. Dorina alibe kukomedwa na bzimwebzi ndipo adacita ciri-centse kuti amusiyise kupfunza Bibliya. Alexandru adalewa kuti adayezera kumubvesesa mkazaceyo, tsono kucita bzimwebzi kulibe kukhala kwakupusa. Nthawe zinango, Dorina akambamutsutsa na kumutawira mwa ukali, ndipo bzimwebzi bzikhamucitisa kufuna kusiya kupfunza Bibliya. Napo bziri tenepo, Alexandru alibe kusiya kupfunza Bibliya ndipo adapitiriza kuikha Yahova pa mbuto yakuyamba acipitirizambo kulatiza ulemu na lufoyi kwa mkazaceyo. Bzimwebzi bzidacitisa kuti Dorina ayambe pomwe kupfunza Bibliya ndipo patsogolo pace adadzabatizidwa. — Onani mu jw.org vidiyo yakuti Alexandru na Dorina Văcar: “Lufoyi Limbapirira Ndipo Ndakudeka Mtima” pa mbali yakuti “Cadidi Cimbacinja Moyo.”
13. Kodi tingalatize tani lufoyi kwa Yahova na kwa wanthu wa m’banja mwathu?
13 Yahova ndiye omwe adayambisa banja, ndipo ambafuna kuti tikhale na banja lakukondwa. (Aefezo 3:14, 15) Penu tikufuna kukhala wakukondwa, tin’funika kucita bzinthu mwakubverana na momwe Yahova ambafunira. Lekani kupenukira kuti Yahova ambawona lufoyi lomwe mumbamulatiza pa kumutumikira ndipo pa nthawe ibodzi-bodziyo mucimbasamalirambo wanthu wa m’banja mwanu mwa lufoyi na mwa ulemu. — Aroma 12:10.
MBALIMBIKISANI ANZANU KUTI AKHALE NINGA ANAZIREU
14. Kodi ni wanthu aponi maka-maka omwe tin’funika kuwalimbikisa?
14 Wanthu wentse omwe ambasankhula kutumikira Yahova ntsiku zino an’funika kukhala wakukonzeka kubvuma kuluza bzinthu bzinango kuti alatize kuti ambamufuna. Nthawe zinango, kucita bzimwebzi kulibe kupusa. Kodi tingathandize tani anzathu kucita bzimwebzi? Tingacite bzimwebzi mwa kumbawalimbikisa na mafala yathu. (Djobi 16:5) Kodi m’gwere mwanu alipo munthu omwe akuyezera kucinja bzinthu pa moyo wace kuti acite bzizinji pa kutumikira Yahova? Kodi yalipo maswaka yomwe imwepo mumbayadziwa yomwe mwakukhwimika yambalatiza kuti njakusiyana na anzawo ku xikola, napo kuti kucita bzimwebzi n’kwakunesa? Kodi alipo anyakupfunza wa Bibliya na Akristau winango omwe akugumana na mabvuto ninga kutsutsidwa na wanthu wa m’banja mwawo thangwe ra kupitiriza kukhala wakukhulupirika kwa Yahova? Phatisani basa mpata uli-wentse omwe mungakhale nawo kuti mumbalimbikise wanthu amwewa na kuwauza kuti mumbatenda kukhwimika kwawo na bzomwe iwo ambacitira Yahova. — Filimoni 4, 5, 7.
15. Kodi abale winango ambathandiza tani wale omwe akucita utumiki bwa nthawe zentse?
15 Nthawe zinango tingathandize wale omwe akucita utumiki bwa nthawe zentse mwa kuwapasa bzomwe iwo akufunikira. (Mimwani 19:17; Ahebereu 13:16) Bzimwebzi ndibzo bzomwe mpfumakazi inango yacikulire yomwe imbakhala ku Sri Lanka idacita. Iyo idathimiziridwa kobiri za reforma zomwe ikhatambira, ndipo ikhafuna kuthandiza mpfumakazi ziwiri zacitswaka zomwe zikhacita upainiya kuti zipitirize kucita bzizinji mu utumiki napo kuti zikhagumana na bvuto la kusaya kobiri. Tenepo, mpfumakaziyi ikhambawapagaliri crédito mwezi uli-wentse. Kulewa cadidi, mpfumakaziyi idalatiza lufoyi likulu kwene-kwene!
16. Kodi n’ciyani comwe tingapfunze na Anazireu wakale-kale?
16 Ifepano tingapfunze bzizinji na ciratizo cabwino ca Anazireu omwe adabzipereka kuti acite bzizinji pa basa la Yahova! Tsono makonzedwe yamweya yambatipfunzisa cinthu cinango pakulewa bza Pai wathu wakudzulu, Yahova. Iye ambadziwa kuti ifepano timbafuna kumukondwesa, ndipo tiri wakukonzeka kubvuma kuluza bzinthu bzinango kuti tikwanirise lumbiro lathu lakubzipereka kwa iye. Iye ambatilemekeza mwa kutipasa mwayi wakuti tilatize kuti timbamufuna. (Mimwani 23:15, 16; Marko 10:28-30; 1 Juwau 4:19) Makonzedwe ya Unazireu yambalatiza kuti Yahova ambawona ndipo ambatenda nyongo yomwe timbacita ya kumutumikira. Tenepo, mbatitsimikizeni kupitiriza kutumikira Yahova, ndipo mbatikhaleni wakukonzeka kucita bzizinji pa kumutumikira.
KODI MUNGATAWIRE TANI?
-
Kodi ni bzinthu bziponi bzomwe Anazireu akhabvuma kuluza, ndipo akhalatiza tani kuti akhali wakukhwimika?
-
Kodi n’ciyani comwe tingacite kuti tilimbikise anzathu ntsiku zino kuti akhale ninga Anazireu?
-
Kodi makonzedwe ya Unazireu yambalatiza kuti ni citsimikizo ciponi comwe Yahova anaco kwa atumiki wace?
NYIMBO 124 Kukhala Wakukhulupirika Nthawe Zense
a Napo kuti wanthu winango adacita kusankhulidwa na Yahova kuti akhale Anazireu, bzikuwoneka kuti Anazireu azinji akhali Ajirayeri ndipo adacita kusankhula okha kukhala Anazireu. — Onani kwadru yakuti “ Anazireu Omwe Adacita Kusankhulidwa na Yahova.”
b Nthawe zinango, mabukhu yathu yambandendemezera Anazireu na wale omwe ambacita utumiki bwa nthawe zentse. Tsono nkhani ino inifotokoza momwe atumiki wentse omwe adabzipereka kwa Yahova angacitire bzinthu ninga Anazireu.
c Bzikuwoneka kuti M’nazireu akhapasidwa lini mabasa manango kuti acite na cakulinga cakuti akwanirise lumbiro lomwe adacita.
d Onani mu jw.org nkhani yakuti “Tinasankha Kukhala Moyo Wosalira Zambiri” pa mbali yakuti “Zochitika pa Moyo wa a Mboni za Yehova” (Chichewa).
e BZOMWE BZIKUCITIKA PA CITHUNZI-THUNZI: M’nazireu akuwona kupendesedwa kwa m’bodzi wa adzinza wace na patali. Kuti apitirize kukwanirisa lumbiro lomwe adacita kwa Yahova, iye akucita lini mbali pa nkhawapo.
