1. Subane kpalɛ boni a Gyihova azonvolɛ ɛla ye ali ɔvi tete ne badwu ɛnɛ a?

 Ɛ NEE Gyihova agɔnwolɛvalɛ ne sonle bolɛ maa wɔ ɔ? Yɛdie yɛdi kɛ ɔsonle bolɛ ɔmaa wɔ! Noko tɛ ɛ ngomekye. Ɔvi tete ne, menli dɔɔnwo ɛde nganeɛ kɛ ɛdawɔ ala la. (Edw. 104:​33, 34) Bɛ nuhua dɔɔnwo ɛva ninyɛne ɛbɔ afɔle amaa bɛazonle Gyihova. Zɔhane ala a menli bie mɔɔ ɛnee wɔ tete Yizilayɛ mɔɔ bɛfɛlɛ bɛ Nazalaema la yɛle a. Nazalaema a le nwane mɔ, na duzu a yɛbahola yɛazukoa yɛavi bɛ neazo ne anu a?

2. (a) Nwane mɔ a le Nazalaema ne? (Nɔmbɛse 6:​1, 2) (b) Duzu ati a Yizilayɛma bie mɔ kpale kɛ bɛbabɔ ɛwɔkɛ kɛ bɛbayɛ Nazalaema a?

² Edwɛkɛkpɔkɛ “Nazalaenli” vi Hibulu edwɛkɛ mɔɔ ɔ bo kile “Mɔɔ Bɛnlea Nu Bɛye Ye,” “Mɔɔ Bɛye Ye Bɛzie Ahane” anzɛɛ “Mɔɔ Bɛyila Zolɛ” la anu. Ɛnee Nazalaema le Yizilayɛma mɔɔ bɔ mɔdenle mɔɔ bɛdabɛ mumua ne bɛvale ninyɛne bie mɔ bɛbɔle afɔle amaa bɛazonle Gyihova wɔ adenle titili bie azo la. Mosisi Mɛla ne maanle nrenyia anzɛɛ raalɛ adenle kɛ ɔkola ɔbɔ Gyihova ɛwɔkɛ titili bie kɛ ɔbayɛ Nazalaenli wɔ mekɛ bie anu. a (Kenga Nɔmbɛse 6:​1, 2.) Zɔhane ɛwɔkɛ ne kile kɛ bɛbali adehilelɛ bie mɔ mɔɔ ɔnle kɛ Yizilayɛma mɔɔ ɛha la di zo la azo. Ɛnee akee duzu ati a Yizilayɛnli bie bahulo kɛ ɔbabɔ ɛwɔkɛ kɛ ɔbayɛ Nazalaenli a? Bie a Gyihova anwo ɛlɔlɛ kpole mɔɔ Yizilayɛnli bie lɛ nee kɛzi ɔ nye sɔ nyilalɛ mɔɔ Nyamenle ɛva ɛmaa ye la a ka ye maa ɔyɛ zɔ a.—Dit. 6:5; 16:17.

3. Kɛzi Nyamenle menli mɔɔ wɔ ɛkɛ ɛnɛ la nee Nazalaema ne le ko ɛ?

³ Nazalaema ngyehyɛleɛ ne rale awieleɛ wɔ mekɛ mɔɔ bɛvale “Kelaese mɛla ne” bɛziele Mosisi Mɛla ne agyakɛ anu la. (Gal. 6:2; Wlo. 10:4) Noko, kɛ mɔɔ Nazalaema ne yɛle la, Gyihova  menli mɔɔ wɔ ɛkɛ ɛnɛ la maa ɔda ali kɛ bɛlɛ ɛhulolɛ kpole kɛ bɛbazonle Gyihova, ɔti bɛfa bɛ ahonle, bɛ ɛkɛla, bɛ adwenle nee bɛ anwosesebɛ muala bɛsonle ye. (Maake 12:30) Saa yɛyila yɛ nwo zo yɛmaa Gyihova a, ɛnee yɛvi yɛ ɛhulolɛ nu yɛbɔ zɔhane ɛwɔkɛ ne bie. Amaa yɛahola yɛali zɔhane ɛwɔkɛ ne azo la, ɔwɔ kɛ yɛbɛlɛ yɛ nwo aze yɛmaa Gyihova na yɛfa ninyɛne yɛbɔ afɔle. Mekɛ mɔɔ yɛlɛsuzu mɔɔ Nazalaema ne yɛle amaa bɛahola bɛali bɛ ɛwɔkɛ ne azo anwo la, yɛbanyia ɛzukoalɛdeɛ mɔɔ baboa yɛ yeamaa yɛdayɛ noko yɛahola yɛadwu yɛ ɛdeɛ ne anwo la. b (Mat. 16:24) Maa yɛzuzu neazo bie mɔ anwo.

FA NINYƐNE BƆ AFƆLE

4. Kɛ mɔɔ Nɔmbɛse 6:​3, 4 kile la, ninyɛne boni mɔ a Nazalaema ne vale bɔle afɔle a?

⁴ Kenga Nɔmbɛse 6:​3, 4. Ɛnee ɔnle kɛ Nazalaema no nza biala anzɛɛ bɛdi debie mɔɔ bɛfa vanye ma bɛyɛ, mɔɔ vanye ma welera bɔbɔ boka nwo la. Bie a ɛnee menli mɔɔ bɛ nee bɛ de la di ninyɛne ɛhye mɔ dahuu, na ɛnee bɛkola bɛdi ɔluakɛ ɛnee nvonleɛ biala ɛnle ninyɛne ɛhye mɔ anwo. Baebolo ne ka “nwanye mɔɔ maa sonla ahonle di fɛlɛko” la anwo edwɛkɛ kɛ ɔle ahyɛlɛdeɛ mɔɔ vi Nyamenle ɛkɛ a. (Edw. 104:​14, 15) Noko Nazalaema ne vile bɛ ɛhulolɛ nu duale bɛ nwo ninyɛne ɛhye mɔ. c

5. Afɔle boni mɔ a Madián nee Marcela zile kpɔkɛ kɛ bɛbabɔ a, na duzu ati ɔ?

⁵ Ɔwɔ kɛ yɛdayɛ noko yɛfa ninyɛne yɛbɔ afɔle kɛ Nazalaema ne la amaa yɛahola yɛazonle Gyihova kpalɛ. Suzu Madián nee Marcela neazo ne anwo. d Ɛnee ninyɛne ɛlɛkɔ boɛ amaa agyalɛma ɛhye wɔ bɛ ɛbɛlabɔlɛ nu. Ɛnee Madián die ahatualɛ kpalɛ wɔ gyima nu ɔti ɛnee bɛde sua kɛnlɛma bie anu. Noko ɛnee bɛkulo kɛ bɛyɛ dɔɔnwo wɔ Gyihova ɛzonlenlɛ nu. Amaa bɛadwu zɔhane bodane ne anwo la, bɛzile kpɔkɛ kɛ bɛbayɛ nzenzaleɛ bie mɔ. Bɛhanle kɛ, “Yɛbɔle ɔ bo kɛ yɛtete kɛzi yɛdi yɛ ezukoa la azo. Yɛdule yɛhɔle sua ekyi bie anu yɛɛ yɛdɔnenle yɛ kale ne.” Anrɛɛ ɔnle kɛ Madián nee Marcela fa ninyɛne ɛhye mɔ bɔ afɔle—noko bɛzile kpɔkɛ kɛ bɛbayɛ ye zɔ ɔluakɛ ɔmaanle bɛnyianle nwolɛ adenle bɛyɛle dɔɔnwo wɔ Gyihova ɛzonlenlɛ nu. Bɛ kpɔkɛzilɛ  ne mɔ maanle bɛ kunlu dwole bɛ nwo na bɛ nye liele.

6. Duzu ati a Kilisienema mɔɔ wɔ ɛkɛ ɛnɛ la fa ninyɛne bɔ afɔle a? (Eza nea nvoninli ne.)

⁶ Saa Kilisienema mɔɔ wɔ ɛkɛ ne ɛnɛ la fa ninyɛne bɔ afɔle amaa bɛanyia mekɛ dɔɔnwo bɛazonle Gyihova a, ɔmaa bɛ nye die. (1 Kɔl. 9:​3-6) Gyihova ɛtɛyɛle ye kyengye kɛ yɛva ninyɛne ɛhye mɔ yɛbɔ afɔle; yɛɛ tɛ kɛ nvonleɛ wɔ nwo la ati a yɛfa yɛbɔ afɔle a. Kɛ neazo la, bie mɔ fa gyima mɔɔ bɛ nye die nwo, bɛ sua anzɛɛ bɛ ayɛmoa bie mɔɔ bɛ nee ye de la bɔ afɔle. Menli dɔɔnwo noko ɛzi kpɔkɛ kɛ bɛtɛnyianle bɛtɛkɔle agyalɛ anzɛɛ bɛtɛwole mralɛ. Bie mɔ noko ɛkpa kɛ bɛbahɔboa wɔ ɛleka mɔɔ bɛhyia nolobɔlɛma dɔɔnwo la, ɔnva nwo kɛ ɔbamaa bɛ nee bɛ mbusuafoɔ nee bɛ gɔnwo mɔ avinli ahwe la. Yɛ nuhua dɔɔnwo fi yɛ ɛhulolɛ nu bɔ afɔle ɛhye mɔ ɔluakɛ yɛkulo kɛ yɛyɛ mɔɔ yɛbahola biala la yɛmaa Gyihova. Nyia anwodozo kɛ Gyihova anye sɔ afɔle biala mɔɔ ɛbɔ amaa wɔahola wɔazonle ye la kpalɛ, saa ɔle kpole o anzɛɛ ekyi o.—Hib. 6:10.

NYIA ƐHULOLƐ KƐ ƐBAYƐ NGAKYILE

7. Mekɛ mɔɔ Nazalaenli bie ɛlɛdi ye ɛwɔkɛ ne azo la, ngyegyelɛ boni a bie a ɔyia a? (Nɔmbɛse 6:5) (Eza nea nvoninli ne.)

⁷ Kenga Nɔmbɛse 6:5. Nazalaema bɔle ɛwɔkɛ kɛ bɛnrɛpepɛ bɛ ti enrinli. Ɛnee ɔle adenle mɔɔ bɛdua zo bɛkile kɛ bɛbɛlɛ bɛ nwo aze bɔkɔɔ bɛmaa Gyihova a. Saa Yizilayɛnli bie yɛ Nazalaenli mekɛ tendenle a, ɔ ti enrinli ne bavi kpalɛ ɔti awie biala banwu ye. Saa menli mɔɔ de ɛleka mɔɔ ɔde la die to nu kɛ ɔhɔ zo ɔli ye Nazalaenli ɛwɔkɛ ne azo a, yemɔ anrɛɛ ɔnyɛ se. Noko mɔɔ ɔyɛ alɔbɔlɛ la a le kɛ, wɔ Yizilayɛma tetedwɛkɛ nu, ɛnee ɔdwu mekɛ ne bie a bɛmbu Nazalaema yɛɛ bɛmboa bɛ. Wɔ ngapezonli Emɔso mekɛ zo, Yizilayɛma mɔɔ ɛnee bɛkpɔkye la ‘hɔle zo maanle Nazalaema ne nza kɛ bɛnlo,’ mɔɔ ɔbayɛ kɛ ɛnee bɛlɛdua zo bɛamaa bɛagyakyi ɛwɔkɛ mɔɔ bɛbɔ kɛ bɛbahwe bɛ nwo bɛavi nwanye nwo la. (Emɔso 2:12) Ɔdwu mekɛ ne bie a, ɔwɔ kɛ Nazalaenli nyia akɛnrasesebɛ kpalɛ na yeahola yeali ye ɛwɔkɛ ne azo na yeayɛ ngakyile yeavi awie mɔ anwo.

8. Kɛzi Benjamin anwubielɛ ne maa wɔ anwosesebɛ ɛ?

⁸ Ɔlua Gyihova moalɛ zo, yɛdayɛ noko yɛbahola yɛala akɛnrasesebɛ ali na yɛayɛ ngakyile, saa bɔbɔ yɛse nyiane anzɛɛ yɛngulo ɛdendɛlɛ dɔɔnwo a. Suzu Benjamin, Dasevolɛ bie mɔɔ yeli ɛvolɛ bulu mɔɔ wɔ Norway la neazo ne anwo. Ɔlua konle ne mɔɔ ɛzi Ukraine la ati, ye sukulu ne yɛle gyimalilɛ bie vale hilele kɛ bɛgyi Ukraine anzi. Bɛmaanle ngakula ne mɔ vale kɔla mɔɔ wɔ Ukraine fɛlɛnra ne anu la zieziele bɛ nwo na bɛhanle kɛ bɛdo edwɛne  bie. Amaa Benjamin anva ɔ nwo anwula maanle nwo ɛhulolɛ gyimalilɛ ɛhye anu la, ɔhwenle ɔ nwo ɔvile ɛleka mɔɔ gyimalilɛ ne ɛlɛkɔ zo la na ɔhɔgyinlanle moa. Noko ye kilehilevolɛ bie nwunle ye na ɔdeanle nu ɔhanle kɛ: “Bɛlɛ ɛke kɛkala baboka yɛ nwo. Yɛlɛkendɛ wɔ!” Benjamin vale akɛnrasesebɛ hɔle kilehilevolɛ ne anwo ɛkɛ na ɔhanle kɛ: “Menle afoa biala, yɛɛ menva me nwo menwulowula maanyɛlɛ debie biala anu. Nɔhalɛ nu, Gyihova Alasevolɛ dɔɔnwo gua efiade ɔluakɛ bɛngulo kɛ bɛkɔ konle la ati.” Kilehilevolɛ ne liele Benjamin ngilenu ne dole nu na ɔhanle kɛ ɔhɔ. Noko ɔ gɔnwo mɔ mɔɔ ɔ nee bɛ gyi kelase ko la bizale ye deɛmɔti ɔnrɛraboka bɛ la. Benjamin ahonle dule dedee mɔɔ anrɛɛ ɔsu a, noko ɔvale akɛnrazilɛ ɔhanle edwɛkɛ mɔɔ ɔhanle ɔhilele kilehilevolɛ ne la ala ɔhilele bɛ muala. Yemɔ anzi, Benjamin hanle hilele ye awovolɛ kɛ, yenwu kɛ Gyihova a boale ye maanle ɔhilehilele ye diedi ne anu a.

9. Kɛzi yɛbahola yɛamaa Gyihova ahonle ali fɛlɛko ɛ?

⁹ Kɛmɔ yɛkpa kɛ yɛbayɛ Gyihova ɛhulolɛdeɛ la ati, ɔmaa yɛyɛ ngakyile yɛfi bɛdabɛ mɔɔ bɛbɔ yɛ bɛyia la anwo. Yɛhyia akɛnrasesebɛ amaa yɛahola yɛala yɛ nwo ali kɛ yɛle Gyihova Alasevolɛ wɔ gyima nu anzɛɛ sukulu. Na mekɛ mɔɔ ewiade amra nyɛleɛ nee bɛ subane ɛlɛsɛkye kpole la, ɔbamaa yeayɛ se kɛ yɛbava Baebolo nu ngyinlazo yɛabɔ yɛ ɛbɛla na yɛaha edwɛkpa ne yɛahile awie mɔ. (2 Tim. 1:8; 3:13) Noko kakye ye dahuu kɛ, saa yɛda akɛnrasesebɛ ali na yɛyɛ ngakyile yɛfi menli mɔɔ bɛnzonle Gyihova la anwo a, yɛbamaa Gyihova ‘ahonle ali fɛlɛko.’—Mrɛ. 27:11; Mal. 3:18.

FA GYIHOVA DIMOA WƆ ƐBƐLABƆLƐ NU

10. Kɛzi mɛla mɔɔ wɔ Nɔmbɛse 6:​6, 7 la bahola azɔ Nazalaema anlea ɛ?

¹⁰ Kenga Nɔmbɛse 6:​6, 7. Ɛnee Nazalaema ɛngola ɛmbikye funli. Ɛte edwɛkɛ ɛhye ala a, bie a ɛbaha kɛ ɛhye ɛnle afɔlebɔlɛ kpole biala. Noko wɔ tete ne, saa Nazalaenli bie busuanli mɔɔ bikye ye kpalɛ la wu a, ɔnwu ye kɛ mɛla ɛhye azo ɛlilɛ ɛnla aze. Wɔ mekɛ zɔhane, saa awie wu a, ɛnee ɔle amaamuo kɛ bɛkɔ funli ne anwo. (Dwɔn 19:​39, 40; Gyi. 9:​36-40) Nazalaenli ɛwɔkɛbɔlɛ ne ɛnrɛmaa ɔnrɛhola ɔnrɛli amaamuo ɛhye mɔ azo. Saa Nazalaenli bie busuanli bie wu na bɛlɛdi nyane kpole bɔbɔ a, ɔdi ye ɛwɔkɛ ne azo ɔfa ɔkile kɛ ɔlɛ diedi kpole. Gyihova maa ye azonvolɛ ɛhye mɔ mɔɔ bɛdu bɛ nwo bɛmaa ye la anwosesebɛ ɔmaa bɛkola bɛgyinla tɛnlabelɛ ɛhye mɔ mɔɔ anu yɛ se la anloa.

11. Saa Kilisienenli bie ɛlɛsisi kpɔkɛ wɔ edwɛkɛ mɔɔ fale ye abusua ne anwo la anu a, duzu a ɔwɔ kɛ ɔbɔ kpɔkɛ kɛ ɔbayɛ a? (Eza nea nvoninli ne.)

 ¹¹ Kɛ Kilisienema la, yɛfa yɛ nwo zo mɔɔ yɛyila yɛmaa Gyihova la anyebolo zo. Ɛhye ka kpɔkɛ mɔɔ yɛsisi nee subane mɔɔ yɛda ye ali wɔ yɛ abusua edwɛkɛ nu la. Yɛnva ɛzonlelilɛ mɔɔ yɛlɛ wɔ yɛ abusua ne anu la yɛnli nwɔhoa, noko yɛnva ninyɛne mɔɔ yɛ mbusuafoɔ kulo kɛ yɛyɛ la yɛnlimoa mɔɔ Gyihova kulo kɛ yɛyɛ la anyunlu ɛlɛ. (Mat. 10:​35-37; 1 Tim. 5:8) Ɔdwu mekɛ ne bie a, ɛhye bahile kɛ ɔwɔ kɛ yɛfa anzodwolɛ mɔɔ wɔ yɛ nee yɛ mbusuafoɔ avinli la bie yɛbɔ afɔle amaa yɛahola yɛayɛ mɔɔ sɔ Gyihova anye la.

12. Mekɛ mɔɔ Alexandru gyi abusua nu tɛnlabelɛ bie mɔɔ anu yɛ se anloa la, duzu a ɔyɛle a, yɛɛ duzu a yeanyɛ a?

¹² Suzu Alexandru nee ɔ ye Dorina anwubielɛ ne anwo. Mɔɔ agyalɛma ɛhye vale ɛvolɛ ko zukoale Baebolo ne la, Dorina zile kpɔkɛ kɛ ɔgyakyi, na ɛnee ɔkulo kɛ Alexandru noko gyakyi. Noko Alexandru ziele ɔ nwo dii na ɔvile ɛbulɛ nu ɔhanle ɔhilele ɔ ye kɛ ɔbadoa zo yeazukoa. Dorina anye anlie nwo, ɔti ɔbɔle mɔdenle kɛ ɔtinlitinli ye yemaa yeagyakyi. Alexandru hanle kɛ ɔbɔle mɔdenle kɛ ɔbade deɛmɔti ɔlɛyɛ zɔhane la abo, noko ɛnee ɔnla aze ɔmmaa ye. Ɔdwu mekɛ ne bie na Dorina tendɛ tia ye anzɛɛ ɔka edwɛkɛ mɔɔ yɛ nyane la ɔkile ye a, ɔmaa ɔte nganeɛ kɛ ɔgyakyi Baebolo ne ɛzukoalɛ. Noko Alexandru hɔle zo vale Gyihova limoale ye ɛbɛlabɔlɛ nu, yɛɛ mekɛ ko ne ala ɔlale ɛlɔlɛ nee ɛbulɛ kpole ali ɔhilele ɔ ye. Awieleɛ bɔkɔɔ ne, ye neazo kpalɛ ne hanle ɔ ye maanle ɔbɔle ye Baebolo ɛzukoalɛ ne abo bieko, na ngyikyingyikyi ɔrale nɔhalɛ ne anu.—Nea Alexandru Yɛɛ Dorina Văcar: “Ɛlɔlɛ Lɛ Abotane Yɛɛ Ɔ Ti Akunlu Le Kɛnlɛma” vidio ne mɔɔ wɔ “Nɔhalɛ Ne Kakyi Sonla Ɛbɛlabɔlɛ” abo wɔ jw.org la.

13. Kɛ ɔkɛyɛ na yɛahulo Gyihova nee yɛ abusua ne ɛ?

¹³ Gyihova a yɛle abusua ngyehyɛleɛ ne a, na ɔkulo kɛ yɛ abusua ne anye die. (Ɛfɛ. 3:​14, 15) Saa yɛkulo kɛ yɛ nye die kpalɛ a, ɔhyia kɛ yɛyɛ yɛ ninyɛne kɛ mɔɔ Gyihova kulo la. Nyia anwodozo kɛ, Gyihova anye sɔ afɔle mɔɔ ɛlɛbɔ wɔazonle ye wɔ mekɛ mɔɔ ɛlɛnea wɔ abusua ne na wɔala ɛlɔlɛ nee ɛbulɛ ali wɔahile ye la.—Wlo. 12:10.

BƐZUKOA NAZALAEMA NE

14. Nwane mɔ titili a ɔwɔ kɛ yɛbɔ mɔdenle yɛfa yɛ edwɛkɛ yɛmaa bɛ anwosesebɛ a?

¹⁴ Ɔwɔ kɛ ɛlɔlɛ ka bɛdabɛ mɔɔ bɛkpa kɛ bɛbazonle Gyihova ɛnɛ la amuala ɔmaa bɛnyia ɛhulolɛ kɛ bɛbava ninyɛne bɛabɔ afɔle. Ɔyɛ a ɛhye ɛyɛlɛ ɛnla aze. Kɛ ɔkɛyɛ na yɛaboa yɛ nwo ngoko amaa yɛala subane zɛhae bie ali ɛ?  Ɔwɔ kɛ yɛfa yɛ edwɛkɛ yɛmaa yɛ nwo anwosesebɛ ngoko. (Dwobu 16:5) Asoo mediema bie mɔ wɔ wɔ asafo ne anu mɔɔ bɛlɛbɔ mɔdenle kɛ bɛbatete ninyɛne zo amaa bɛahola bɛayɛ dɔɔnwo wɔ Gyihova ɛzonlenlɛ nu ɔ? Ɛze ngakula bie mɔɔ bɛlɛda akɛnrasesebɛ ali amaa bɛayɛ ngakyile bɛavi bɛdabɛ mɔɔ bɛwɔ bɛ sukulu ɛkɛ la anwo, ɔnva nwo kɛ ɔyɛ se ɔmaa bɛ kɛ bɛbayɛ zɔ la ɔ? Na Baebolo sukoavoma nee mediema diedima mɔɔ bɛ mbusuafoɔ ɛlɛdwazo atia bɛ la ati ɔwɔ kɛ bɛmia bɛ nye amaa bɛahɔ zo bɛali nɔhalɛ la ɛ? Bɛmaa yɛva nwolɛ adenle biala mɔɔ yɛbanyia la yɛha edwɛkɛ mɔɔ ɔbamaa yɛ mediema diedima ɛhye mɔ anwosesebɛ la, na yɛmaa bɛnwu ye kɛ, yɛ nye sɔ afɔle biala mɔɔ bɛlɛbɔ bɛazonle Gyihova nee bɛ akɛnrasesebɛ ne.—Fae. 4, 5, 7.

15. Kɛzi bie mɔ ɛboa bɛdabɛ mɔɔ bɛwɔ dahuu ɛzonlenlɛ gyima ne anu la ɛ?

¹⁵ Ɔyɛ a yɛkola yɛyɛ ninyɛne yɛboa yɛ mediema Kilisienema mɔɔ bɛwɔ dahuu ɛzonlenlɛ gyima ne anu la. (Mrɛ. 19:17; Hib. 13:16) Ɛhye bie a ɛnee adiema raalɛ kpanyinli nɔhavo bie mɔɔ wɔ Sri Lanka la lɛ ɛhulolɛ kpole kɛ ɔbayɛ a. Bɛmaanle ye pɛnhyɛne ezukoa kpole bie, na ɛnee ɔkulo kɛ ɔboa mediema mbɛlɛra adekpakyelɛma nwiɔ bie ɔmaa bɛkɔ zo bɛyɛ bɛ ɛzonlenlɛ gyima ne ɔluakɛ ɛnee asetɛnla nu yɛ se maa bɛ. Ɔti ɔzile kpɔkɛ kɛ siane biala, ɔbamaa bɛ ezukoa fɔɔnwo bie yeamaa bɛadua kakɛ mɔɔ bɛbɔ ye wɔ bɛ telefonu nwo la. Adiema raalɛ zɔhane lale subane kɛnlɛma kpalɛ ali!

16. Duzu a yɛbahola yɛazukoa yɛavi tete Nazalaema ngyehyɛleɛ ne anu a?

¹⁶ Amgba yɛbahola yɛazukoa ninyɛne dɔɔnwo yɛavi neazo kpalɛ mɔɔ tete Nazalaema mɔɔ dule bɛ nwo maanle la yɛle la anu! Noko eza ngyehyɛleɛ ɛhye maa yɛnwu debie bie wɔ yɛ anwuma Selɛ Gyihova anwo. Ɔlɛ anwodozo kɛ yɛkulo kɛ yɛyɛ mɔɔ sɔ ɔ nye la, yɛɛ yɛlɛ ɛhulolɛ kɛ yɛbava ninyɛne yɛabɔ afɔle amaa yɛali yɛnwozoyilalɛ ɛwɔkɛbɔlɛ ne azo. Yemaa yɛnyia nwolɛ adenle kɛ yɛbala ɛlɔlɛ ali yɛahile Ye, na ɛhye le enililɛ kpole. (Mrɛ. 23:​15, 16; Maake 10:​28-30; 1 Dwɔn 4:19) Nazalaema ngyehyɛleɛ ne maa yɛnwu kɛ Gyihova nwu afɔle biala mɔɔ yɛbɔ yɛsonle ye la yɛɛ ɔ nye sɔ ye. Ɔti bɛmaa yɛbɔ kpɔkɛ kɛ yɛbahɔ zo yɛazonle Gyihova, na yɛanyia ɛhulolɛ kɛ yɛbava debie kpalɛ biala mɔɔ yɛlɛ la yɛamaa ye.