1. Рагидзамантӕй фӕстӕмӕ Йегови лӕггадгӕнгутӕ цӕттӕ цӕмӕ адтӕнцӕ?

 ЙЕГОВИ хӕццӕ дин ци лимӕндзийнадӕ ес, уомӕн аргъ кӕнис? Мах ибӕл нӕ гурусхӕ кӕнӕн, е уотӕ ке ӕй! Ӕма еунӕг нӕ дӕ. Рагидзамантӕй фӕстӕмӕ дӕр адтӕй, Йегови ӕгас зӕрдӕй ка уарзта, уӕхӕн адӕн (Пс. 104:33, 34). Беретӕ си цӕттӕ адтӕнцӕ Йегови туххӕй сӕхе цӕмӕйдӕрти фӕццох кӕнунмӕ. Федарӕй ес зӕгъӕн, рагон Израили назорейтӕ уотӕ ке кодтонцӕ. Цума назорейтӕ ка адтӕнцӕ ӕма сӕ цӕветтонӕй цӕбӕл ахур кӕнӕн?

2. а) Назорейтӕ ка адтӕнцӕ? (Нимӕдзтӕ 6:1, 2). б) Еуӕй-еу израилӕгтӕ сӕрмагонд дзурд цӕмӕн раттиуонцӕ?

² Дзурд «назорей» ци дзиуиттаг дзурдӕй тӕлмацгонд ӕрцудӕй, е нисан кӕнуй «хецӕнгонд» кенӕ «нивондгон». Назорейтӕ адтӕнцӕ, Йегови туххӕй сӕхе цӕмӕйдӕрти ка фӕццох кодта, уӕхӕн еузӕрдон израилӕгтӕ. Моисеййи закъонмӕ гӕсгӕ нӕлгоймаги кенӕ силгоймаги бон адтӕй сӕрмагонд дзурд раттун, цӕмӕй цӕйбӕрцӕдӕр рӕстӕг назореййи a цард кӕна. (Бакӕсӕ Нимӕдзтӕ 6:1, 2.) Еци сӕрмагонд дзурдмӕ гӕсгӕ адӕймаг гъӕуама кодтайдӕ, Йеговӕ иннӕ израилӕгтӕй ци нӕ агурдта, уой. Мадта израилӕгтӕй кадӕртӕ уӕхӕн сӕрмагонд дзурд цӕмӕн раттиуонцӕ? Уомӕ сӕ, ӕвӕдзи, разӕнгард кодта, Йегови хъӕбӕр берӕ ке уарзтонцӕ ӕма си е ’гас хуарздзийнӕдти туххӕй дӕр боз ке адтӕнцӕ, е (Дук. з. 6:5; 16:17).

3. Мах рӕстӕги Йегови лӕггадгӕнгутӕ назорейти хузӕн цӕмӕй ӕнцӕ?

 ³ Моисеййи закъони бӕсти «Киристей закъон» ку фӕззиндтӕй, уӕд назорейти рӕстӕгутӕ дӕр фӕцӕнцӕ (Гал. 6:2; Ром. 10:4). Фал рагидзаманти назорейти хузӕн, абони дӕр Йегови лӕггадгӕнгути фӕндуй, цӕмӕй ин «ӕгас зӕрдӕй, ӕгас уодӕй, ӕгас зундӕй ӕма ӕгас хъаурӕй» лӕггадӕ кӕнонцӕ (Мар. 12:30). Нӕхе Йеговӕн ку иснивонд кӕнӕн, уӕд ин дзурд раттӕн, раст гъе уотӕ ин ке лӕггадӕ кӕндзиан. Уӕхӕн дзурд ке раттӕн, уомӕй бавдесӕн, цӕттӕ ке ан ӕ фӕндон ӕнхӕст кӕнунмӕ ӕма нӕхе цӕмӕйдӕрти фӕццох кӕнунмӕ. Гъӕйдӕ ӕркӕсӕн, назорейтӕ сӕ сӕрмагонд дзурд куд ӕнхӕст кодтонцӕ, уомӕ ӕма сӕ нӕ бон куд ӕй фӕнзун (Матф. 16:24) b.

ЦӔТТӔ УО ДӔХЕ ЦӔМӔЙДӔРТИ ФӔЦЦОХ КӔНУНМӔ

4. Нимӕдзти 6:3, 4 финст дзурдтӕмӕ гӕсгӕ назорейтӕ сӕхе барвӕндонӕй цӕмӕй фӕццох кӕниуонцӕ?

⁴ Бакӕсӕ Нимӕдзтӕ 6:3, 4. Назорейтӕн н’ адтӕй карз ниуӕзтӕ ниуазӕн ӕма сӕнӕфсерӕ, удта сӕнӕфсерӕй ци кодтонцӕ, уони хуӕрӕн, зӕгъӕн, кисмус. Иннӕ израилӕгтӕн уони хуӕрӕн ӕма ниуазӕн адтӕй, уомӕн ӕма си лӕгъузӕй неци адтӕй. Сӕнӕ ӕй Йегови лӕвӕрттӕй сӕ еу. Библий финст ӕй, сӕнӕ адӕймаги зӕрдӕ ке игъӕлдзӕг кӕнуй (Пс. 104:14, 15). Фал кӕд еци хуӕруйнӕгтӕ ӕма ниуазуйнӕгтӕ цийнӕ хастонцӕ, уӕддӕр си назорейтӕ сӕхе барвӕндонӕй цох кодтонцӕ c.

5. Мадиан ӕма Марселӕ сӕхе цӕмӕй фӕццох кодтонцӕ ӕма цӕмӕн?

⁵ Мах дӕр назорейти хузӕн нӕхе цӕмӕйдӕрти цох кӕнӕн, цӕмӕй нӕ бон уа Йеговӕн фулдӕр лӕггадӕ кӕнун. Ӕркӕсӕн Мадиан ӕма Марсели d хабармӕ. Аци бийнонтӕ неци гъӕуагӕ адтӕнцӕ. Мадианӕн хуарз куст адтӕй ӕма цардӕнцӕ рӕсугъд къвартири. Фал сӕ фӕндадтӕй Йеговӕн фулдӕр лӕггадӕ кӕнун. Уомӕ гӕсгӕ унаффӕ рахастонцӕ, сӕ цард ке фӕххумӕтӕгдӕр кӕндзӕнцӕ. Етӕ радзурдтонцӕ: «Раздӕри хузӕн уотӕ берӕ ӕхца нӕбал харз кодтан, минкъийдӕр къвартирӕмӕ рахизтан ӕма нӕ машинӕ рауӕйӕ кодтан». Цума Мадиан ӕма Марселӕн уӕхӕн ӕййивддзийнӕдтӕ тухӕй еске кӕнун кодта? Нӕъ. Фал уотӕ бакодтонцӕ, цӕмӕй сӕ бон адтайдӕ Йеговӕн фулдӕр лӕггадӕ кӕнун, ӕма уой фӕрци ӕцӕг амондгун иссӕнцӕ.

6. Киристӕнттӕ сӕхе цӕмӕйдӕрти цӕмӕн фӕццох кӕнунцӕ? (Кӕсӕ ма хузӕмӕ.)

 ⁶ Абони киристӕнттӕ цӕттӕ фӕуунцӕ сӕхе цӕмӕйдӕрти фӕццох кӕнунмӕ, цӕмӕй син фулдӕр рӕстӕг уа Йеговӕн лӕггадӕ кӕнунмӕ (1 Кор. 9:3–6). Йеговӕ ни уой нӕ агоруй. Удта уотӕ зӕгъӕн дӕр нӕййес, ӕма нӕхе цӕмӕй фӕццох кӕнӕн, еци гъуддӕгтӕ лӕгъуз ӕнцӕ. Зӕгъӕн, кедӕрти фӕндадтайдӕ, цӕмӕй син уа, сӕ зӕрдӕмӕ ка цӕуй, уӕхӕн куст ӕма хӕдзарӕ кенӕ ба сӕмӕ уа куй, тикис кенӕ ӕндӕр ести цӕрӕгой. Беретӕ унаффӕ рахастонцӕ, бийнонтӕ ке нӕма искӕндзӕнцӕ, иннетӕ ба – сувӕллӕнттӕ син ке нӕма уодзӕй. Кадӕртӕ ба унаффӕ рахастонцӕ, игъосунгӕнгутӕ кӕми нӕ фагӕ кӕнуй, уӕхӕн рауӕнмӕ ке рандӕ уодзӕнцӕ, кӕд сӕ хеуӕнттӕй идард уодзӕнцӕ, уӕддӕр. Мах цӕттӕ ан нӕхе цӕмӕйдӕрти цох кӕнунмӕ, уомӕн ӕма нӕмӕ хуӕздӕрӕй ци ес, уой нӕ фӕндуй Йеговӕн дӕттун. Ма гурусхӕ кӕнӕ: Йеговӕ хъӕбӕр устур аргъ кӕнуй, дӕхе цӕмӕйдӕрти ке фӕццох кӕнис, фӕнди устур ести уа, фӕнди ба – минкъий, цӕмӕй ин дӕ бон уа фулдӕр лӕггадӕ кӕнун (Дзиуит. 6:10).

ЦӔТТӔ УО, ИННЕТӔЙ КЕ ХЕЦӔН КӔНДЗӔНӔ, УОМӔ

7. Назореййӕн зин цӕмӕн адтайдӕ, ци дзурд равардта, уой ӕнхӕст кӕнун? (Нимӕдзтӕ 6:5). (Кӕсӕ ма хузӕмӕ.)

⁷ Бакӕсӕ Нимӕдзтӕ 6:5. Назорейтӕ сӕрмагонд дзурд раттиуонцӕ, сӕ дзиккотӕ ке не ’лвиндзӕнцӕ. Уотемӕй ӕвдистонцӕ, Йеговӕмӕ алли гъуддаги дӕр ке исгъосдзӕнцӕ. Израилаг берӕ рӕстӕг назорей ку уидӕ, уӕд ӕ дзиккотӕ дзӕбӕх радаргъ уиуонцӕ ӕма уой алкедӕр уидта. Иннетӕ назорейтӕн ку аргъ кодтонцӕ, уӕд син ӕнцондӕр адтӕй сӕ сӕрмагонд дзурд ӕнхӕст кӕнун. Фал, гъигагӕн, Израили историй адтӕй уӕхӕн рӕстӕгутӕ, ӕма назорейти нецӕмӕ дардтонцӕ. Зӕгъӕн, пахампар Амоси рӕстӕг, Йегови ка ниууагъта, еци израилӕгтӕ назорейтӕн сӕнӕ ниуазун кодтонцӕ. Ӕвӕдзи сӕ фӕндадтӕй, цӕмӕй сӕ сӕрмагонд дзурди сӕрти рахизтайуонцӕ (Амос 2:12). Хатгай назорейти фӕгъгъӕуидӕ ӕцӕг нифсхаст ун, цӕмӕй, ци дзурд равардтонцӕ, уой ӕнхӕст кодтайуонцӕ ӕма иннетӕй хецӕн кодтайуонцӕ.

8. Минкъий Беньямини хабар дин дӕ нифс куд бафедар кодта?

⁸ Йеговӕ махӕн дӕр банхус кӕндзӕй, цӕмӕй ма тӕрсӕн, иннетӕй ке хецӕн кӕнӕн, уомӕй, кӕд ӕфсӕрмигӕнагӕ ан, уӕддӕр. Ӕркӕсӕн Норвегийӕй еу 10-анздзуд Ӕвдесӕн Беньямини хабармӕ. Скъолай сӕмӕ адтӕй, Украини фарс ке ’нцӕ, уой фӕдбӕл цидӕр хабар. Сувӕллӕнтти гъудӕй зарун, сӕ уӕле ба искӕнун Украини турусай хузӕн хъӕппӕлтӕ. Цӕмӕй еци гъуддаги хайадӕ ма райстайдӕ, уой туххӕй Беньямин унаффӕ рахаста, уордӕмӕ хӕстӕг дӕр ке нӕ бацӕудзӕй. Фал ӕй ахургӕнӕг фӕууидта ӕма имӕ рагъӕр кодта: «Ардӕмӕ рауай ӕма нӕ хӕццӕ зарӕ. Не  ’гасдӕр дӕумӕ ӕнгъӕлмӕ кӕсӕн». Беньямин имӕ нифсгунӕй бацудӕй ӕма загъта: «Ӕз неке фарс дӕн ӕма политики хӕццӕ баст гъуддӕгти нӕ архайун. Йегови Ӕвдесӕнтӕй беретӕ ахӕстдӕнтти бадунцӕ, тохунмӕ ке нӕ цӕунцӕ, уой туххӕй». Гъема ин ахургӕнӕг загъта: «Хуарз, барӕ дӕ ес». Фал ӕй е ’мкъласонтӕ дӕр фӕрсун райдӕдтонцӕ, нӕ хӕццӕ, дан, цӕмӕннӕ зарис. Беньямин гъе уотӕ истухстӕй, ӕма минкъийтӕбӕл нӕ никкудтӕй. Фал уӕддӕр, ӕ ахургӕнӕгӕн ци загъта, уой нифсгунӕй е ’мкъласонтӕн дӕр дзурдта. Уой фӕсте Беньямин ӕ ниййергутӕн радзурдта, ке ’й лӕдӕрдтӕй, Йеговӕ ӕ фарсмӕ ке адтӕй, ӕма уой фӕрци ӕ бон ке иссӕй, цӕбӕл ӕууӕндуй, уой сӕрбӕл дзорун.

9. Нӕ бон куд ӕй Йегови зӕрдӕ рохс кӕнун?

⁹ Мах нӕхецӕн унаффӕ рахастан, Йегови фӕндон ке ӕнхӕст кӕндзиан, ӕма уой туххӕй иннетӕй хецӕн кӕнӕн. Гъӕуй нӕ нифсхаст ун, цӕмӕй кусти ӕма скъолай дзорӕн, Йегови Ӕвдесӕнтӕ ке ан. Аци дуйней адӕни зундахаст, удта сӕхе куд дарунцӕ, е фуддӕрӕй-фуддӕр кӕнуй. Уомӕ гӕсгӕ нин, ка ’й зонуй, бонӕй-бонмӕ зиндӕр уодзӕй Йегови раст уагӕвӕрдтӕмӕ гӕсгӕ цӕрун ӕма хуарз хабар игъосун кӕнун (2 Тим. 1:8; 3:13). Фал дӕ гъудий дарӕ: Хуцауӕн ка нӕ лӕггадӕ кӕнуй, еци адӕнӕй ке хецӕн кӕнис ӕма уомӕй ке нӕ тӕрсис, уомӕй Йегови зӕрдӕ рохс кӕнис (Ӕмб. 27:11; Мал. 3:18).

ЙЕГОВӔ ДӔ ЦАРДИ ФИЦЦАГ БУНАТИ УӔД

10. Нимӕдзти 6:6, 7 финст дзурдтӕ ӕнхӕст кӕнун назорейтӕн зин кӕд адтӕй?

¹⁰ Бакӕсӕ Нимӕдзтӕ 6:6, 7. Назореййӕн мардмӕ хӕстӕг цӕуӕн н’ адтӕй. Фиццаг бакастӕй е уотӕ зин нӕй. Фал уӕди рӕстӕги е назорейтӕй беретӕн устур фӕлварӕн исуидӕ, уӕлдайдӕр ба сӕ хеуӕнттӕй еске ку рамӕлидӕ, уӕд. Еци рӕстӕг зиани ӕгъдӕуттӕмӕ гӕсгӕ адӕймаг гъӕуама зиани рази адтайдӕ (Иоан. 19:39, 40; Гъуд. 9:36–40). Фал назореййӕн ӕ сӕрмагонд дзурдмӕ гӕсгӕ еци ӕгъдау ӕнхӕст кӕнӕн н’ адтӕй. Ӕ зӕрдӕ ӕ хеуонбӕл хъӕбӕр ку ресидӕ, уӕддӕр, Хуцауӕн ци дзурд равардта, уой идарддӕр дӕр ӕнхӕст кӕнидӕ. Уотемӕй бавдесидӕ, федар ӕууӕндундзийнадӕ имӕ ке ес. Дзубанди дӕр ибӕл нӕййес, Йеговӕ еци еузӕрдон лӕггадгӕнгутӕн хъауритӕ ке лӕвардта, цӕмӕй уӕхӕн уӕззау рӕстӕг исфӕразтайуонцӕ.

11. Бийнонти хӕццӕ баст фарстати киристон цӕттӕ цӕмӕ гъӕуама уа? (Кӕсӕ ма хузӕмӕ.)

¹¹ Йеговӕн ци нивонддзурд равардтан, уомӕ уӕлӕнгай цӕстӕй нӕ кӕсӕн. Ӕма е гъӕуама бӕрӕг уа, бийнонти медӕг куд фӕййархайӕн ӕма цӕхуӕн унаффитӕ фӕххӕссӕн,  уомӕй. Нӕ бийнонти рази нӕбӕл ци ихӕстӕ ес, уонӕмӕ цийфӕнди цӕстӕй нӕ фӕккӕсӕн. Фал мах нӕ бауадзӕн, цӕмӕй нин сӕ фӕндон Йегови фӕндонӕй сӕйрагдӕр исуа (Матф. 10:35–37; 1 Тим. 5:8). Еуӕй-еухатт ба цӕмӕй Йегови зӕрдӕ рохс кӕнӕн, уой туххӕй фӕгъгъӕуй, нӕ хеуӕнтти зӕрдӕмӕ ка нӕ фӕццӕудзӕй, уӕхӕн унаффитӕ рахӕссун.

12. Кӕд Александруйӕн ӕ бийнойнаг ӕ нихмӕ цудӕй, уӕддӕр ӕхе куд дардта?

¹² Нур ба ӕркӕсӕн Александру ӕма ӕ бийнойнаг Дорини хабармӕ. Етӕ Библи анзи бӕрцӕ ахур кодтонцӕ. Уой фӕсте Доринӕ ӕ ахур ниууагъта ӕма ’й фӕндадтӕй, цӕмӕй Александру дӕр уотӕ бакодтайдӕ. Фал ин Александру фӕлмӕнӕй ӕма уӕзданӕй балӕдӕрун кодта, Библи идарддӕр дӕр ке ахур кӕндзӕй. Е Дорини зӕрдӕмӕ нӕ фӕццудӕй ӕма уой туххӕй ӕ нихмӕ цӕун райдӕдта. Александру зӕгъуй, ӕгас хъауритӕй ке архайдта, цӕмӕй Доринӕ ӕхе уотӕ цӕмӕн даруй, уой балӕдӕрдтайдӕ, фал е ӕнцон н’ адтӕй. Рӕстӕгӕй-рӕстӕгмӕ ’й Дорини ӕфхуӕрӕн дзурдти туххӕй ӕ къохтӕ ӕруадзунмӕ берӕ нӕбал гъудӕй. Фал Александру идарддӕр дӕр Йегови ӕ царди фиццаг бунати ӕвардта, удта ӕ бийнойнаги ке уарзуй ӕма ’й ке нимайуй, уой идарддӕр дӕр ӕвдиста. Фӕстагмӕ ӕ цӕветтон Дорини баразӕнгард кодта нӕуӕгӕй Библи ахур кӕнунмӕ, ӕма рӕстӕг ку рацудӕй, уӕд е дӕр донаргъуд райста. (Сайти jw.org рубрики «Истина меняет жизнь» кӕсӕ видеороликмӕ «Александру и Дорина Вэкар. „Любовь долготерпелива и добра“».)

13. Куд ӕй нӕ бон ӕвдесун Йегови дӕр ке уарзӕн ӕма нӕ бийнонти дӕр?

¹³ Бийнонти цардӕн бундор Йеговӕ ӕрӕвардта ӕма ’й фӕндуй, цӕмӕй нин бийнонти цард цийнӕ хӕсса (Еф. 3:14, 15). Цӕмӕй ӕцӕг амондгун уӕн, уой туххӕй гъӕуама, Йеговӕ куд зӕгъуй, уотӕ архайӕн. Уӕ хеуӕнттӕбӕл тухсетӕ ӕма сӕ ке уарзетӕ, удта сӕ ке нимайетӕ, е уӕ гъуддӕгтӕй бӕрӕг уӕд (Ром. 12:10). Макӕд ибӕл гурусхӕ кӕнӕ, Йеговӕ устур аргъ ке кӕнуй, ӕгас хъауритӕй ке архайис, цӕмӕй ин ӕ зӕрдӕ рохс кӕнай.

КӔРӔДЗЕМӔН ӔНХУС КӔНӔН, ЦӔМӔЙ НАЗОРЕЙТИ ХУЗӔН УӔН

14. Уӕлдай хъӕбӕрдӕр ке нифс бафедар кӕнун фӕгъгъӕуй?

¹⁴ Йеговӕн лӕггадӕ кӕнун ка райдайуй, етӕ цӕттӕ фӕуунцӕ сӕхе цӕмӕйдӕрти фӕццох кӕнунмӕ, уомӕн ӕма ’й бауарзунцӕ. Фал е алкӕд ӕнцон нӕ фӕууй. Еци гъуддаги нӕ бон куд ӕй кӕрӕдземӕн ӕнхус кӕнун? Нӕ бон ӕй кӕрӕдзей дзурдӕй федар кӕнун (Иов 16:5). Уе ’мбурди ес, Йеговӕн фулдӕр лӕггадӕ кӕнун ке фӕндуй ӕма уомӕ гӕсгӕ ӕ цард фӕххумӕтӕгдӕр кӕнунбӕл ка архайуй, уӕхӕн  хуӕртӕ ӕма ӕнсувӕртӕ? Кенӕ ба скъолай иннетӕй ка хецӕн кӕнуй ӕма уомӕй ка нӕ тӕрсуй, уӕхӕн ӕригӕнттӕ ӕма сувӕллӕнттӕ? Рӕстдзийнади туххӕй ӕ бийнонтӕ ӕ нихмӕ кӕмӕн цӕунцӕ, уӕхӕн адӕймаги зонис? Уотӕ нифсгунӕй ка архайуй ӕма Йегови туххӕй ӕхе цӕмӕйдӕрти фӕццох кӕнунмӕ цӕттӕ ка ӕй, е растауйнаг ӕй. Гъӕйдӕ мадта алли фадуатӕй дӕр пайда кӕнӕн, цӕмӕй син сӕ нифс федар кӕнӕн (Филим. 4, 5, 7).

15. Еуӕй-еуетӕ ӕнхӕстрӕстӕг лӕггадгӕнгутӕн куд банхус кӕнунцӕ?

¹⁵ Еуӕй-еухатт нин фадуат фӕззиннуй, цӕмӕй ӕнхӕстрӕстӕг ка лӕггадӕ кӕнуй, уонӕн гъуддагӕй банхус кӕнӕн (Ӕмб. 19:17; Дзиуит. 13:16). Раст гъе уотӕ бакодта, Шри-Ланки ка цӕруй, уӕхӕн хуӕрӕ. Ӕ пенсибӕл ин бафтудтонцӕ ӕма ’й бафӕндадтӕй, ӕхцайӕй ка батухстӕй, уӕхӕн дууӕ ӕригон пионер хуӕремӕн банхус кӕнун, цӕмӕй сӕ лӕггадӕ ма ниууагътайуонцӕ. Уомӕ гӕсгӕ син алли мӕйӕ дӕр ӕхца раттидӕ, цӕмӕй сӕ бон адтайдӕ сӕ телефонбӕл федун. Заманай фӕнзуйнаг хуӕрӕ!

16. Назорейти хабарӕй нӕ бон ци ӕй базонун?

¹⁶ Назорейтӕ сӕхе барвӕндонӕй цӕмӕйдӕрти фӕццох кӕнунмӕ цӕттӕ ке адтӕнцӕ, уомӕй нин фӕнзуйнаг ӕнцӕ. Фал ма сӕ хабарӕй нӕ бон ӕй нӕ уӕларвон Фиди хуӕздӕр базонун. Йеговӕ ибӕл нӕ гурусхӕ кӕнуй, хъӕбӕр нӕ ке фӕндуй, цӕмӕй ин ӕ зӕрдӕ рохс кӕнӕн ӕма цӕттӕ ке ан нӕхе цӕмӕйдӕрти фӕццох кӕнунмӕ, цӕмӕй нӕ нивонддзурдмӕ гӕсгӕ цӕрӕн. Йеговӕ нин уӕхӕн барӕ равардта, цӕмӕй нӕхуӕдтӕ ӕвзарӕн, ке ’й уарзӕн, уой ин куд ӕвдесдзиан, уой. Ӕма е махӕн устур кадӕ ’й! (Ӕмб. 23:15, 16; Мар. 10:28–30; 1 Иоан. 4:19). Йеговӕ хъӕбӕр аргъ кӕнуй, ӕ номи туххӕй ци кӕнӕн, уомӕн. Гъӕйдӕ мадта нӕ федар фӕндӕ уӕд Йеговӕн идарддӕр дӕр лӕггадӕ кӕнун ӕма ин, хуӕздӕрӕй нӕмӕ ци ес, уой дӕттун!