1. ¿Te xä me̱fi ndunthi yä jäꞌi po näꞌä rä amista pe̱ꞌtsi ko rä Zi Dada Jeoba?

 XI NUꞌI, ¿gi balora näꞌä rä hogä ntsitsꞌi gi pe̱ꞌtsi ko rä Zi Dada Jeoba? Zäi ge hää. Dende mäyaꞌmu̱ xä mꞌu̱i ndunthi yä jäꞌi nuꞌu̱ xä balora rä amista rä Zi Dada Jeoba (Sal. 104:​33, 34). Ndunthi xä mꞌu̱i dispuesto dä ja yä sacrificio po näꞌä rä amista pe̱ꞌtsi ko rä Zi Dada Jeoba. Geꞌä bi me̱fi rꞌa yä jäꞌi de mäyaꞌmu̱ nuꞌu̱ bi desidi bi me̱päbi rä Zi Dada Jeoba de gä nazareo. Pe, ¿toꞌo nuꞌu̱ mi tꞌembäbi yä nazareo ꞌne te dä za gä pädihu̱ de geꞌu̱?

2. a) ¿Toꞌo nuꞌu̱ mi tꞌembäbi yä nazareo? (Números 6:​1, 2). b) ¿Te mi japäbi yä israelita dä hñätsꞌi nꞌa rä bida de gä nazareo?

² Rä noya nazareo bi ehe de rä idioma hebreo ꞌne di signifika «xä thahni», «xä tꞌeke» o «xä tꞌumbäbi Äjuä». Ha nuꞌu̱ yä Ley bi tꞌumbäbi Moisés mäyaꞌmu̱, mi mää ge nꞌa rä ñꞌo̱ho̱ o nꞌa rä ꞌme̱hñä, mi tsa dä ja nꞌa rä promesa habu̱ ma xä xipäbi rä Zi Dada Jeoba ge mi ne dä mꞌu̱i de gä nazareo durante nꞌa rä tiempo (hñeti Números 6:​1, 2). a Pe mi ja rꞌa yä rekisito nuꞌu̱ mi debe dä kumpli toꞌo mi desidi dä me̱päbi rä Zi Dada Jeoba de gä nazareo. Pe ¿por hanja rꞌa yä israelita mi desidi dä me̱päbi rä Zi Dada de gä nazareo? Zäi ge po näꞌä rä mhäte mi senti po rä Zi Dada Jeoba, ꞌne mi geꞌä nꞌa rä forma de dä ꞌñuti hängu mi jamädibi po gatꞌho nuꞌu̱ yä jäpi xki hñäni de Geꞌä (Deut. 6:5; 16:17).

3. ¿Por hanja dä za gä eñhu̱ ge nuꞌu̱ pe̱päbibye̱ rä Zi Dada Jeoba, tsitsꞌi ꞌnehe nꞌa rä bida ngu nuꞌu̱ yä nazareo de mäyaꞌmu̱?

³ Pe mi zo̱ho̱ «rä ley rä Kristo», bi hñäki näꞌä rä Ley Moisés. Hänge rä Zi Dada Jeoba, ya hingi to̱ꞌmi gä jahu̱ nuꞌu̱ yä sacrificio  mi ja yä nazareo mäyaꞌmu̱ (Gál. 6:2; Rom. 10:4). Pe ja ngu nuꞌu̱ yä nazareo de mäyaꞌmu̱, nuju̱ ꞌnehe di balorahu̱ näꞌä rä amista di pe̱ꞌtsihu̱ ko rä Zi Dada Jeoba, hänge di ne gä pe̱päbihu̱ ko ngatꞌho mä korasohu̱, mä tehu̱, mä mfenihu̱ ꞌne mä tsꞌe̱dihu̱ (Mar. 12:​30, TNM). Geꞌä dä prometebihu̱ rä Zi Dada Jeoba näꞌä rä pa dä xatuäbihu̱ ꞌne dä xipäbihu̱ ge ndi ntregabihu̱ mä bidahu̱ pa gä pe̱päbihu̱. Pa gä kumplihu̱ näꞌä rä promesa, mähyoni gä pe̱päbihu̱ rä bolunta rä Zi Dada Jeoba ꞌne gä mꞌu̱ihu̱ dispuesto gä jahu̱ yä sacrificio. Ma gä handihu̱ hanja nuꞌu̱ yä nazareo de mäyaꞌmu̱ mi kumpli näꞌä mi prometebi Jeoba. ꞌNehe ma gä pädihu̱ hanja näꞌä rä hogä ejemplo bi zoogi, dä za dä maxkägihu̱ pa gä kumplihu̱ ko näꞌä xtä prometebihu̱ rä Zi Dada Jeoba (Mat. 16:24). b

NGU TE MÄ SACRIFICIO DÄ ZA GÄ JAHU̱

4. Ja ngu di handihu̱ ha Números 6:​3, 4, ¿te mä sacrificio mi ja yä nazareo?

⁴ (Hñeti Números 6:​3, 4). Ha rä hnini Israel, yä jäꞌi mi nzäi dä zi yä obxi o rä binu. Äjuä hingi handi ngu nꞌa rä pekado toꞌo dä zi nꞌa tu̱i rä binu. Asta rä Mäkä Tꞌofo enä ge rä binu näꞌä nꞌa rä regalo näꞌä bi ehe de Äjuä ꞌne «japi dä johya rä koraso nꞌa rä jäꞌi» (Sal. 104:​14, 15). Pe nuꞌu̱ yä Ley bi tꞌumbäbi Moisés mi mää ge mu̱ nꞌa rä israelita mi huahni dä zitsꞌi nꞌa rä bida de gä nazareo, himi debe dä zi ninꞌa rä bebida nixi nꞌa rä ñhuni näꞌä dri tu yä obxi. Mäske zäi ge xmä ñhei toꞌo dä kumpli nunä rekisito, rꞌa yä israelita de yä boluntase̱ mi renunsia nuya yä ñhuni xä ku̱hi, kontal dä me̱päbi rä Zi Dada Jeoba de gä nazareo. c

5. ¿Te mä sacrificio xä ja Madián ꞌne Marcela ꞌne por hanja?

⁵ Ja ngu yä nazareo, nuju̱ ꞌnehe di jahu̱ yä sacrificio pa di pe̱päbihu̱ rä Zi Dada Jeoba. Geꞌä xä me̱fi Madián ꞌne Marcela. d Nunä medinthäti bi ꞌmu̱i ha rä dähni Colombia ꞌne pede hanja rä ku Madián mi pe̱ꞌtsi nꞌa rä ꞌme̱fi habu̱ mi tähä ndunthi rä bojä. Nunä medinthäti mi pe̱ꞌtsi nꞌa rä ngu mähotho ꞌne hinte mi ꞌme̱päbi. Pe nuni medinthäti bi hyandi ge mi ja mꞌe̱di dä me̱päbi mä nꞌa tu̱i rä Zi Dada Jeoba. Hänge bi desidi bi paati näꞌä rä bida de gä lujo mi pe̱ꞌtsi. Nuyu̱ yä ku enä: «Dä desidihe ya hingä taihe nuꞌu̱ yä kosa hingä mähyoni, dä honihe mä nꞌa rä ngu mänꞌa rä tꞌu̱ki ꞌne dä pahe näꞌä rä karro ndi pe̱ꞌtsihe». Madián ꞌne Marcela himi ꞌmu̱i  obligado dä ja nuya yä sacrificio. Pe nuyu̱ yä zi ku bi desidi dä zopu̱ näꞌä rä bida de gä lujo, pa mänꞌa dä me̱ꞌtsi rä tiempo pa dä predika. Nubye̱ nuyu̱ yä ku, ꞌmu̱i ko ndunthi rä johya ꞌne hindi arrepenti po näꞌä bi me̱fi.

6. Nuju̱ di pe̱päbihu̱ rä Zi Dada Jeoba, ¿te di ho gä jahu̱ ꞌne por hanja? (Hyandi ꞌnehe rä foto).

⁶ Nuju̱ di pe̱päbihu̱ rä Zi Dada Jeoba, di hohu̱ gä jahu̱ yä sacrificio kontal gä pe̱ꞌtsihu̱ mä ndunthi rä tiempo pa gä predikahu̱ ꞌne gä fatsꞌihu̱ märꞌa yä zi jäꞌi dä bädi de Äjuä (1 Cor. 9:​3-6). Rä Zi Dada Jeoba hingi handi xä ntsꞌo toꞌo dä me̱ꞌtsi yä hogä tꞌo̱tꞌe ꞌne hingi obligagihu̱ gä jahu̱ yä sacrificio. Pe rꞌa yä ku, xä renunsia dä me̱ꞌtsi nꞌa rä nguu, nꞌa rä ꞌme̱fi habu̱ thähä xä ñho, o mäske di ho dä ꞌñehe yä zi mboꞌni, xä desidi hindä me̱ꞌtsi. Märꞌa yä zi ku xä desidi dä nsoltero durante nꞌa rä tiempo, o nuꞌu̱ xä nthäti xä desidi hindä me̱ꞌtsi yä zi bätsi. Märꞌa yä ku xä desidi xä ma habu̱ himbi ꞌmu̱i ndunthi toꞌo dä predika pa dä matsꞌi yä zi jäꞌi dä bädi de Äjuä. Pa geꞌä, xä ja mꞌe̱di dä bo̱ni de yä nguu yabu̱ de yä familia ꞌne yä amigo. Mäske rꞌa nꞌañꞌo nuꞌu̱ yä sacrificio di jahu̱, pe rä Zi Dada Jeoba di balora gatꞌho näꞌä di pe̱fihu̱ kada nꞌa de gekhu̱ pa di pe̱päbihu̱ (Heb. 6:10).

DI JA MꞌE̱DI RÄ BALO

7. ¿Por hanja rꞌabu̱ yä nazareo xa mi japäbi xä ñhei dä kumpli ko näꞌä xki prometebi rä Zi Dada Jeoba? (Números 6:5; hyandi ꞌnehe rä foto).

⁷ (Hñeti Números 6:5). Yä nazareo himi debe dä hye̱ki yä stää. Njabu̱ mi udi ge mi ꞌmu̱i dispuesto dä me̱fi gatꞌho näꞌä mi mändabi rä Zi Dada Jeoba. Mu̱ nꞌa rä israelita xki prometebi rä Zi Dada Jeoba dä me̱päbi de gä nazareo po ndunthi rä tiempo, zäi ge ꞌnehe po ndunthi rä tiempo ma xä nheki nꞌañꞌo de märꞌaa po nuꞌu̱ yä stää. Nꞌa rä nazareo himi japäbi xä ñhei dä kumpli ko rä promesa, mu̱ rä familia ꞌne yä amigo mi apoya. Pe bi zo̱ho̱ nꞌa rä tiempo habu̱ yä israelita himi pe̱ꞌspäbi rä tꞌekꞌei yä nazareo nixi mi balora näꞌä mi pe̱fi. Rꞌabu̱ rꞌa yä nduxte jäꞌi mi umbäbi yä binu nuꞌu̱ yä nazareo, pa njabu̱ nuyu̱ hindä za dä kumpli ko näꞌä xki prometebi Jeoba (Amós 2:12). Hänge yä nazareo xa mi japäbi mꞌe̱di ndunthi rä balo pa dä kumpli ko näꞌä xki prometebi rä Zi Dada Jeoba ꞌne dä nꞌañꞌo de märꞌa yä jäꞌi.

8. ¿Hanja dä za dä nupꞌäꞌi ri mfeni rä esperiensia Benjamin?

⁸ Pa gä pe̱päbihu̱ rä bolunta rä Zi Dada Jeoba, di ja mꞌe̱di gä mbalientehu̱ mäske rꞌabu̱ di tsuhu̱ o di ntsa gä ñähu̱. Geꞌä bi thogi nꞌa rä tsꞌu̱ntꞌu̱ rä thuhu Benjamin. Nuni tsꞌu̱ntꞌu̱ pe̱ꞌtsi 10 nje̱ya ꞌne bi ꞌmu̱i ha rä dähni Noruega. Ha rä skuela, yä xahnäte ꞌne yä yꞌoskuela bi muntsꞌi pa dä ntuhu ꞌne njabu̱ dä ꞌñudi ge di apoya rä dähni Ucrania ko näꞌä rä gerra bi pe̱ꞌtsi. Yä yꞌoskuela bi hñätsꞌi yä uniforme ko nuꞌu̱ yä kolo di ñꞌoui rä bandera de rä dähni Ucrania ꞌne bi tuti nꞌa rä thuhu. Pa himbi partisipa Benjamin bi  mꞌaitho zi yabu̱. Pe nꞌa rä maestra bi hyandi ꞌne bi ꞌñembäbi: «¡Nxo̱ni! ¡Guä ehe pa gi ntuhu ꞌnehe!». Benjamin bi gu̱ rä balo ꞌne ko ndunthi rä tꞌekꞌei bi ꞌñembäbi rä maestra: «Nuga drä testigo rä Jeoba. Hänge di su näꞌä di pe̱fi ꞌne näꞌä di mää pa njabu̱ hingä udi ge di nthintꞌi ha yä gerra o ha yä politika. Koꞌmu̱ yä testigo rä Jeoba hingi ku̱tꞌi ha yä gerra nixi ha yä politika, ndunthi de gehyu̱ xä ꞌme̱hnä fadi». Mi yꞌo̱de njabu̱ rä maestra ya himbi obligabi dä partisipa. Pe rꞌa yä yꞌoskuela bi yꞌambäbi por hanja himbi ntuhu ꞌnehe. Benjamin xa bi ntsu ꞌne asta mi ne dä nzoni. Pe mäske njabu̱, bi gu̱ rä balo ꞌne bi xipäbi näꞌä xki xipäbi rä maestra. Benjamin bi xipi yä dada näꞌä xki thogi ꞌne hanja rä Zi Dada Jeoba xki matsꞌi pa bi gu̱ rä balo ꞌne bi defende näꞌä mi kamfri.

9. ¿Hanja dä za gä johyabihu̱ rä koraso rä Zi Dada Jeoba?

⁹ Ora di pe̱fihu̱ näꞌä di ho rä Zi Dada Jeoba, yä jäꞌi handi ge di nꞌañꞌohu̱. Po geꞌä di ja mꞌe̱di gä pe̱ꞌtsihu̱ rä balo pa gä xipäbihu̱ märꞌaa ge dyä testigohu̱ rä Jeoba. Ngu ri thogi rä tiempo, yä jäꞌi mänꞌa tsitsꞌi nꞌa rä mꞌu̱i xä ntsꞌo, hänge tal vez ma dä jakägihu̱ mänꞌa xä ñhei gä predikahu̱ ꞌne gä pe̱päbihu̱ rä bolunta rä Zi Dada Jeoba (2 Tim. 1:8; 3:13). Pe mähyoni gä benihu̱ ge rä Zi Dada Jeoba di johya rä mfeni ꞌne rä koraso ora handi ge di o̱thu̱ ntsꞌe̱di ꞌne di ju̱hu̱ rä balo pa gä udihu̱ ge di nꞌañꞌohu̱ de nuꞌu̱ yä jäꞌi hingi pe̱päbi (Prov. 27:11; Mal. 3:18).

PROKURA MꞌE̱TꞌO RÄ BOLUNTA RÄ ZI DADA JEOBA

10. ¿Por hanja dä za gä eñhu̱ ge rꞌabu̱ yä nazareo mi japäbi xä ñhei dä kumpli ko nunä rekisito hutsꞌi ha Números 6:​6, 7?

¹⁰ (Hñeti Números 6:​6, 7). Yä nazareo himi tsa dä joni habu̱ mi ꞌme̱ngä nꞌa rä animä. Pe zäi ge gi enä: «¿Toꞌo ma dä ne dä joni habu̱ ꞌme̱ngä nꞌa rä animä?». Pe, ¿dä za gi imäjinä te mi senti nꞌa rä nazareo ora mi tu rä dada, rä nänä, nꞌa rä ku o nꞌa rä nju o mä nꞌa rä jäꞌi näꞌä xa mi mädi ꞌne himi tsa dä joni pa dä mfaxte dä tꞌagi? (Juan 19:​39, 40; Hech. 9:​36-40). Pe ora nꞌa rä nazareo mi desidi dä kumpli ko näꞌä rä promesa xki ja ko rä Zi Dada Jeoba, mi udi ge mi pe̱ꞌspäbi ndunthi rä komfiansa, ꞌne rä Zi Dada Jeoba nunka bi hye̱gise̱ nuyu̱ yä nazareo. Ora mi ñhandui yä dumu̱i ꞌne märꞌa yä xuñha habu̱ mi japäbi xä ñhei dä kumpli näꞌä xki promete, rä Zi Dada Jeoba mi umbäbi rä tsꞌe̱di.

11. ¿Te di ꞌmu̱ihu̱ desidido gä pe̱fihu̱ ora mä familiahu̱ adi gä pe̱fihu̱ nꞌa rä tꞌo̱tꞌe näꞌä di nkontraui ko rä bolunta rä Zi Dada Jeoba? (Hyandi ꞌnehe rä foto).

¹¹ Nuju̱ xtä umbäbihu̱ mä bidahu̱ rä Zi Dada Jeoba pa gä pe̱päbihu̱ ꞌne hingrä ntꞌeni nunä  promesa xtä jahu̱. Hänge di o̱thu̱ ntsꞌe̱di pa njabu̱ näꞌä di pe̱fihu̱ ꞌne nuꞌu̱ mä desision di huahnihu̱, dä ma mähye̱gi ko rä bolunta rä Zi Dada Jeoba. ꞌNehe, mäske di mädihu̱ mä familiahu̱ ꞌne di o̱thu̱ ntsꞌe̱di po gä kumplihu̱ ko nuꞌu̱ yä responsabilida di pe̱ꞌtsihu̱ kongeꞌu̱, pe ora adi gä pe̱fihu̱ nꞌa rä tꞌo̱tꞌe näꞌä di nkontraui ko rä bolunta rä Zi Dada Jeoba, go di huahnihu̱ gä o̱tehu̱ rä Zi Dada Jeoba (Mat. 10:​35-37; 1 Tim. 5:8). Po geꞌä mä familiahu̱ rꞌabu̱ di u̱tsagihu̱. Pe mäske njabu̱, nuju̱ di huahnihu̱ gä kohihu̱ xä ñho ko rä Zi Dada Jeoba.

12. Nuꞌmu̱ Alexandru bi ñhandui nꞌa rä xuñha ha rä familia, ¿te bi me̱fi ꞌne te himbi me̱fi?

¹² Ma gä handihu̱ te bi thogi rä zi ku Alexandru ꞌne rä zi ꞌme̱hñä rä thuhu Dorina. Nunä medinthäti, mähye̱gi bi mu̱di bi nxadi rä Mäkä Tꞌofo. Pe mi thogi nꞌa nje̱ya, Dorina ya himbi ne bi nxadi rä Mäkä Tꞌofo ꞌne mi ne dä obligabi rä däme pa xä hye̱pu̱ ꞌnehe rä Zi Dada Jeoba. Pe Alexandru ko rä mhäte, bi xipäbi Dorina ge —mäske mi mädi ꞌne mi komprendebi te mi senti— näꞌä hää ma xä sigi xä nxadi rä Mäkä Tꞌofo ko yä testigo rä Jeoba. Dorina xa mi nkue̱ ꞌne xa mrä tsꞌomꞌu̱i ko Alexandru. Hänge Alexandru rꞌabu̱ ya himi ja rä ganä dä sigi dä nxadi rä Mäkä Tꞌofo. Pe mäske xa bi japäbi xä ñhei, bi sigi bi me̱fi näꞌä di ho rä Zi Dada Jeoba. Mäske Dorina xa mrä tsꞌomꞌu̱i, näꞌä mi trata ko rä mhäte ꞌne rä tꞌekꞌei. Ko rä tiempo, Dorina bi ne bi nxadi rä Mäkä Tꞌofo mänꞌaki ꞌne bi ne bi nxixtehe. (Hyandi rä bideo Alexandru ꞌne Dorina Văcar: «Rä mhäte udi rä pasensia ꞌne rä ñhojäꞌi», ja ha jw.org).

13. ¿Hanja dä za gä udihu̱ ge di mädihu̱ mä familiahu̱ ꞌne rä Zi Dada Jeoba?

¹³ Rä Zi Dada Jeoba go geꞌä bi hyoki rä familia ꞌne näꞌä ne ge gatꞌho yä familia dä mꞌu̱i ko rä johya (Efes. 3:​14, 15). Hänge mu̱ nuju̱ di nehu̱ gä mꞌu̱ihu̱ ko rä johya, mähyoni gä pe̱fihu̱ näꞌä adi rä Zi Dada Jeoba. Rä Zi Dada Jeoba xa di johya ora handi ge di kumplihu̱ ko nuꞌu̱ yä responsabilida di pe̱ꞌtsihu̱ ha mä familiahu̱, ꞌne di tratahu̱ ko rä mhäte ꞌne rä tꞌekꞌei. Pe ora toꞌo ne dä hñägägihu̱ de gä pe̱päbihu̱ rä bolunta rä Zi Dada Jeoba, Näꞌä xa di balora nuꞌu̱ yä sacrificio di jahu̱ po geꞌä ꞌne xa di johya ora di huahnihu̱ gä mꞌu̱ihu̱ de rä lado (Rom. 12:10).

NUPÄBI YÄ MFENI NUꞌU̱ TSITSꞌI YÄ BIDA DE GÄ NAZAREO

14. ¿Toꞌo dä hogi gä felisitahu̱ ꞌne gä nupäbihu̱ yä mfeni?

¹⁴ Toꞌo xä umbäbi yä te rä Zi Dada Jeoba pa dä me̱päbi, mähyoni dä ja yä sacrificio po näꞌä rä mhäte senti po Geꞌä. Rꞌabu̱ dä za dä jakägihu̱ xä ñhei, hänge xa mähyoni gä nupämfenihu̱ nꞌa ngu mänꞌaa ꞌne gä honihu̱ yä forma de gä felisitahu̱ märꞌaa (Job 16:5). Ha rä congregación,  ¿xkä handi ge rꞌa yä ku xä zopu̱ yä ꞌme̱fi pa njabu̱ dä me̱ꞌtsi mä ndunthi rä tiempo pa dä me̱päbi rä Zi Dada Jeoba? ¿Xkä handi hanja rꞌa yä zi bäsjäꞌi xä gu̱ rä balo pa di defende näꞌä xä bädi de rä Zi Dada Jeoba ha rä skuela? Xi ha rä mhuntsꞌi, ¿ꞌmu̱i toꞌo di ñhandui yä xuñha o yä ntꞌu̱tsate ha yä familia? Gehya yä oportunida di pe̱ꞌtsihu̱ pa gä nupäbihu̱ yä mfeni po nuꞌu̱ yä sacrificio di ja po rä Zi Dada Jeoba (Filem. 4, 5, 7).

15. ¿Te xä me̱fi rꞌa yä zi ku pa dä matsꞌi nuꞌu̱ xä umbäbi mäxo̱ge de yä tiempo rä Zi Dada Jeoba?

¹⁵ Rꞌabu̱ di pe̱ꞌtsihu̱ rä oportunida de gä fatsꞌihu̱ nuꞌu̱ yä ku xä umbäbi mäxo̱ge de yä tiempo rä Zi Dada Jeoba pa dä me̱päbi (Prov. 19:17; Heb. 13:16). Geꞌä bi me̱fi nꞌa rä zi nju näꞌä bi ꞌmu̱i ha rä dähni Sri Lanka. Nunä zi nju häni nꞌa rä mfatsꞌi de rä gobiernu ꞌne bi ꞌmo̱ꞌtsuäbi näꞌä rä njutꞌi tꞌumbäbi. Hänge bi desidi dä ꞌueke nꞌa hängu rä bojä tatꞌä zänä pa dä matsꞌi yoho yä precursora regular dä gutꞌi yä gasto ngeꞌä mi thogi yä ñꞌäbojä. ¿Hänge xa mähotho näꞌä bi me̱fi nunä rä zi nju?

16. ¿Te utkägihu̱ näꞌä rä bida mi tsitsꞌi yä nazareo?

¹⁶ ¡Hängu yä tꞌo̱tꞌe dä pädihu̱ de nuꞌu̱ mi tꞌembäbi yä nazareo mäyaꞌmu̱! Pe ndaꞌä mänꞌa xä ñho; eske dä pädihu̱ nꞌa rä hogä tꞌo̱tꞌe de rä Zi Dada Jeoba. Dä pädihu̱ hanja mäyaꞌmu̱ rä Zi Dada Jeoba bi hye̱gi ge rꞌa yä israelita dä me̱päbi de gä nazareo ngeꞌä mi pe̱ꞌspäbi ndunthi rä komfiansa. Mi pädi xä ñho ge ma xä me̱fi hingä ho̱nse̱ näꞌä mi mhändabi, sino ke po yä boluntase̱ ma xä ja rꞌa yä sacrificio po näꞌä rä mhäte mi pe̱ꞌspäbi (Prov. 23:​15, 16; Mar. 10:​28-30; 1 Juan 4:19). ꞌNehe, näꞌä rä bida mi tsitsꞌi yä nazareo, utkägihu̱ ge rä Zi Dada Jeoba xa di balora nuꞌu̱ yä sacrificio di jahu̱ pa gä yꞌohu̱ mänjuäntho ha rä ꞌñuu ꞌne gä pe̱päbihu̱. Po geꞌä, ma gä o̱thu̱ ntsꞌe̱di po gä sigihu̱ gä pe̱päbihu̱ rä Zi Dada Jeoba ko ngatꞌho näꞌä tsu̱kägihu̱.