1. Waut vonne goode Enstalunk haben Jehowa siene Deena noch emma jehaut?

 LEEFST du Jehowa von Hoaten? Gaunz secha! Un du best uk nich de eensja. Doa wieren ieeschtemma aul väl Menschen, dee Jehowa sea leewden (Psa. 104:33-34). Väle von dee wieren uk reed, waut opptojäwen em Deenst fa Jehowa. Dauts krakjt, waut de Nazara en daut ieeschtemmasche Israel deeden. Wäa wieren dee soo rajcht un waut kjenn wie von dee äa Biespel lieren?

2. (a) Wäa wieren de Nazara? (4. Mose 6:1-2). (b) Wuarom wälden eenje Israeliten sikj daut, een Nazara to sennen?

² Daut Wuat “Nazara” kjemt von een hebräischet Wuat häa, waut “utjewält”, “oppoat jesat” ooda “hanjejäft fa eene besondre Oabeit” meent. Dit Wuat es krakjt paussent fa de Nazara von daut ieeschtemmasche Israel, waut reed wieren, jewesset opptojäwen, daut see Jehowa opp eene besondre Wajch deenen kunnen. En daut Jesaz Moses säd daut, daut een Maun ooda eene Fru Jehowa een besondret Vespräakjen moaken kunn, daut dee fa eene jewesse Tiet soo läwen wudd aus een Nazara a (läs 4. Mose 6:1-2). Bie dit Vespräakjen wia met en, daut deejanja sikj wudd aun jewesse Räajlen hoolen, waut de aundre Israeliten oba nich nokomen musten. Wuarom wudd een Israelit dan wellen een Nazara woaren? Secha deed dee daut ut eene groote Leew fa Jehowa un ut Dankboakjeit fa aul de goode Sachen, waut Gott am jeef (5. Mo. 6:5; 16:17).

3. Waut haben Gott siene Deena vondoag dän Dach met de Nazara äwareen?

³ Aus Gott siene Deena sikj nich mea brukten aun daut Jesaz Moses hoolen, oba aun “Christus sien Jesaz”, kunnen  see nich mea Nazara woaren (Gal. 6:2; Reem. 10:4). Oba Jehowa siene Deena vondoag dän Dach haben noch emma dän grooten Wunsch, am met äa gaunzet Hoat, Seel, Vestaunt un Krauft to deenen krakjt soo aus de Nazara (Mar. 12:30). Dits krakjt, waut wie Jehowa vespräakjen, wan wie ons am hanjäwen. Om daut notokomen, waut wie am vesproaken haben, mott wie reed sennen, Jehowa sienen Wellen to doonen un jewesset opptojäwen. Well wie nu mol seenen, waut de Nazara doonen musten, om äa Vespräakjen to hoolen. Doaderch woa wie lieren, woo wie ons Vespräakjen uk hoolen kjennen (Mat. 16:24). b See wie mol een poa Sachen.

SIE REED, WAUT OPPTOJÄWEN

4. Waut jeewen de Nazara no 4. Mose 6:3-4 no opp?

⁴ Läs 4. Mose 6:3-4. De Nazara kunnen nuscht drinkjen, waut met Alkohol to doonen haud, un uk nich soowaut äten aus Wiendruwen un Rasienen. De aundre Menschen kunnen wellich foaken soone Sachen aus daut äten, wiels doa nuscht met orrajcht wia. De Bibel sajcht mau rajcht, daut “Wien . . . daut Hoat froo moakt”, un daut es een Jeschenkj von Gott (Psa. 104:14-15). Oba de Nazara wieren reed dit opptojäwen, wuamet see sikj daut wudden haben kunt scheen gonen loten. c

5. Waut jeewen Madián un Marcela opp, un wuarom?

⁵ Wie jäwen uk eenjet opp, krakjt soo aus de Nazara, om mea fa Jehowa to doonen. See wie mol daut Biespel von Madián un Marcela. d Dit Ehepoa haud een jemieteljet Läwen. Madián haud eene goode Oabeit, wuaderch see kunnen en eene schmocke Woninj wonen. Oba dee wullen mea em Deenst fa Jehowa doonen. Doawäajen neemen see sikj väa, eenjet en äa Läwen to endren. Dee sajen: “Wie fungen aun, dolla no daut Jelt opptopaussen. Wie trocken no eene kjlandre Woninj un vekoften onse Koa.” Madián un Marcela wudden nich haben must aul dit oppjäwen, oba dee wullen daut, wiels see doaderch wudden mea em Deenst doonen kjennen. Dee sent tofräd un schaftich äwa äare Entscheidungen.

6. Wuarom jäwen eenje vondoag dän Dach waut opp? (See uk daut Bilt.)

⁶ Jehowa siene Deena vondoag dän Dach jleichen daut uk, eenjet opptojäwen, daut see mea Tiet haben em Deenst fa Jehowa (1. Kor. 9:3-6). Eenje woaren sikj biejlikj eenich, eene Oabeit auftosajen, waut äant scheen jeit,  ooda haben nich äa ieejnet Hus un nich mol een Hustia. Aundre sent sikj eenich jeworden, sikj nich fuaz to befrieen ooda Famielje to haben. Aundre wada sent sikj eenich jeworden, doa to deenen, wua daut aun mea Help fält, mau rajcht wan daut uk fa äant bediet, wiet auf von äare Frind un Famielje to wonen. Jehowa velangt daut nich von ons, daut wie sellen soowaut oppjäwen, wäajen met dee Sachen es nuscht waut orrajcht. Väle von ons sent reed jewast soowaut opptojäwen, wäajen wie Jehowa ons bastet jäwen wullen. Du kaust die secha sennen, daut Jehowa daut sea väl räakjent, waut du fa sienen Deenst oppjefst; aus daut waut grootet ooda kjlienet es (Heb. 6:10).

SIE REED, AUNDASCH TO SENNEN AUS DE AUNDRE

7. Waut kunn eenen Nazara daut schwoa moaken, sikj aun sien Vespräakjen to hoolen? (4. Mose 6:5). (See uk daut Bilt.)

⁷ Läs 4. Mose 6:5. De Nazara vespruaken, daut see sikj nich wudden de Hoa aufschnieden. Doaderch beweesen see, daut see Jehowa gaunz unjadon wieren. Doano, woo lang een Israelit een Nazara wia, worden dän siene Hoa veleicht lank un daut foll aundre leicht opp. Wan de aundre Israeliten de Nazara unjastetten deeden un dee Moot toospruaken, dan wia daut fa dee nich schwoa, aundasch to sennen. Oba daut jeef Tieden, wua de Israeliten de Nazara nich respakjten un dee uk nich unjastetten deeden. En dän Profeet Amos siene Tiet biejlikj, jeewen eenje aufjefolne Israeliten de Nazara “Wien to drinkjen” toom dee daut schwoa moaken, sikj aun äa Vespräakjen to hoolen, daut see sikj wudden von Wien wajchhoolen (Amos 2:12). De Nazara musten eenjemol sea äwanäment sennen, om sikj aun äa Vespräakjen to hoolen un aundasch to sennen aus de aundre.

8. Wuarom jeft die daut Moot, waut Benjamin beläwd?

⁸ Met Jehowa siene Help kjenn wie uk äwanäment un aundasch sennen aus de aundre, wan wie uk bleed sent. See wie mol daut Biespel von Benjamin, een tieen-joascha Brooda von Norweegen. Wäajen en de Ukraine Kjrich es, haud siene School een Toopkomen toom de Menschen von dit Launt unjastetten. De Kjinja sullen aula een Leet sinjen un sikj doatoo soone Kjleeda auntrakjen, waut de Kalieren hauden von de ukrainesche Flag. Bie dit Toopkomen wort een Launt hecha jetalt aus daut aundre. Doawäajen wull Benjamin doa nich metmoaken un bleef een Enj auf. Oba eene School-Lierarin sach am un breld: “Du saust fuaz hiahan komen un metmoaken. Wie luaren aula no die!” Benjamin jinkj no  de School-Lierarin un säd äwanäment to dee: “Ekj stal mie opp kjeene Sied un ekj moak nich bie soone Sachen met, waut met de Politikj to doonen haben. Väle von Jehowa siene Zeijen sent soogoa em Jefenkjnis, wäajen dee nich nom Kjrich gonen.” De School-Lierarin wia daut goot un säd, daut Benjamin doa nich brukt metmoaken. Oba dan fungen de aundre Schoolkjinja aun to froagen, wuarom hee doa nich metmuak. Benjamin wia soo sea nerwees, daut hee meist road; un doch wia hee äwanäment un säd to de Kjinja dautselwje, waut hee to de Lierarin jesajcht haud. Lota vetald Benjamin siene Elren daut, daut hee daut späaren kunn, woo Jehowa am holp, fa sienen Gloowen entostonen.

9. Woo kjenn wie Jehowa sien Hoat froo moaken?

⁹ Wäajen wie ons daut wälen, Jehowa sienen Wellen to doonen, kjennen aundre daut seenen, daut wie aundasch sent aus dee. Om daut enne School ooda bie de Oabeit to sajen, daut wie eent von Jehowa siene Zeijen sent, mott wie äwanäment sennen. Un wäajen daut emma schlemma woat, woo de Menschen von dise Welt denkjen un waut dee doonen, woat ons daut veleicht uk emma schwanda sennen, ons no de biblische Gruntsauzen to rechten un aundre de goode Norecht mettodeelen (2. Tim. 1:8; 3:13). Oba well wie emma em Denkj hoolen, daut wie Jehowa sien “Hoat froo[moaken]”, wan wie äwanäment un aundasch sent aus de Menschen, waut am nich deenen (Spr. 27:11; Mal. 3:18).

SAT DÄN DEENST FA JEHOWA AUN DE IEESCHTE STÄD

10. Wuarom kunn de Nazara daut schwoa jewast sennen, daut notokomen, waut 4. Mose 6:6-7 sajcht?

¹⁰ Läs 4. Mose 6:6-7. De Nazara sullen nich dicht bie eenen Dooden komen. Daut hieet sikj veleicht nich no waut schwoaret. Oba enne Bibeltiet haud daut fa eenen Nazara noch waut opp sikj, besonda wan doa wäa von sien Frintschoft storf. To dee Tiet hauden dee soone Jewanheiten, wan doa wäa storf, daut eena dicht bie dän Dooden kjeem (Joh. 19:39-40; Apj. 9:36-40). Een Nazara kunn wäajen sien Vespräakjen bie soone Jewanheiten nich metmoaken. Wan daut uk om wäm von dee äare Famielje jinkj un dee selfst sea truarich wieren, beweesen dee oba äaren stoakjen Gloowen doaderch, daut dee sikj aun äa Vespräakjen hilden. Jehowa haft dise true Deena secha jeholpen, met soon schwoaret foadich to woaren.

11. Waut deit een Christ, wan daut om Entscheidungen äwa de Famielje jeit? (See uk daut Bilt.)

 ¹¹ Daut, waut wie Jehowa bie onse Hangow vespruaken, näm wie sea iernst. Wie denkjen doaraun, wan wie waut entscheiden, waut met de Famielje to doonen haft un wan wie met dee omgonen. Wie kjemren ons doarom, daut dee daut Needje haben. Oba wie stalen emma daut, waut Jehowa von ons velangt, ver daut, waut eenje von onse Famielje sikj wudden wenschen (Mat. 10:35-37; 1. Tim. 5:8). Doawäajen moak wie veleicht eenjemol Entscheidungen, wuaräwa eenje von ons Frintschoft veleicht nich schaftich sent, oba waut Jehowa tofräd moaken.

12. Waut deed Alexandru un waut deed hee nich, aus hee en eene schwoare Loag wia?

¹² Well wie ons mol de Erfoarunk von Alexandru un siene Fru Dorina beseenen. Aus dee ieescht fa een Joa de Bibel studieet hauden, hieed Dorina opp met studieren un see wull, daut Alexandru uk opphieren sull. Oba hee bleef ruich un säd ar leeftolich, daut hee wudd wiedamoaken. Dorina jleicht daut nuscht un see proowd, am to bemotten opptohieren. Alexandru sajcht, hee proowd to vestonen, wuarom see soo aus dit docht, oba daut wia nich eefach. Bieaun, wan Dorina sikj soo romgrunzen deed un am hunjsch trigjsäd, jrebbeld hee äwa opphieren. Oba Alexandru stald Jehowa wieda aun de ieeschte Städ un hieed kjeenmol opp, siene Fru met Leew un Respakjt to behaundlen. Wäajen sien goodet Biespel, wort see sikj dan doch eenich, wada de Bibel to studieren un lota leet see sikj uk deepen. (See daut Video opp jw.org Alexandru un Dorina Vacar: “Leew es jeduldich, Leew es frintlich” bie de Video-Gruppen “De Woarheit veendat de Menschen”.)

13. Woo kjenn wie wiesen, daut wie Jehowa un onse Famielje leewen?

¹³ Jehowa es dee, waut de Famielje jemoakt haft un hee well, daut wie sellen een scheenet Famieljenläwen haben (Efs. 3:14-15). Wan wie wellen opp iernst schaftich sennen, mott wie daut doonen, waut Jehowa von ons velangt. Du kaust die gaunz secha sennen, daut Jehowa daut sea schazt, wan du die aunstrenjst, am to deenen un uk fa diene Famielje sorchst un dee met Leew un Respakjt behaundelst (Reem. 12:10).

ONS UNJARENAUNDA MOOT MOAKEN, DE NAZARA NOTODOONEN

14. Wäm wudd wie gaunz besonda Moot toospräakjen kjennen?

¹⁴ Aule, waut vondoag dän Dach Jehowa deenen wellen, motten reed seenen, ut Leew fa am waut opptojäwen. Foaken es daut nich  leicht. Woo kjenn wie ons unjarenaunda halpen, soone Enstalunk to haben? Wan wie ons unjarenaunda Moot toospräakjen (Hiob 16:5). Jeft daut en diene Vesaumlunk irjentwäm, dee doa prooft, sien Läwen eefacha to moaken, wäajen dee mea fa Jehowa doonen well? Weetst du von eenje junge Menschen, waut enne School äwanäment fa äaren Gloowen enstonen motten, wan daut uk nich leicht es, aundasch to sennen aus de aundre? Kjanst du uk eenje Bibelstudiums ooda Breeda, waut daut schwoa es, tru to bliewen, wäajen dee Jäajenstaunt enne Famielje haben? Well wie jieda Jeläajenheit utnutzen, om soone Breeda Moot to moaken un dee daut to sajen, woo väl wie daut räakjnen, daut see soo äwanäment sent un daut see soo väl oppjäwen fa Jehowa (Filem. 4-5, 7).

15. Woo haben eenje de Voltietdeena utjeholpen?

¹⁵ Veleicht wudd wie eenjemol kjennen soone Breeda halpen, waut em Voltietdeenst sent (Spr. 19:17; Heb. 13:16). Dit wia krakjt daut, waut eene elre, true Sesta jankad to doonen, waut en Sri Lanka wont. See kjrieech een bät mea Jelt von äare Ooltpenschen un see wull twee junge Pionia-Sestren halpen, en äaren Deenst to bliewen, waut daut em tieteljen schwoa hauden. See wort sikj eenich, dee jieda Moonat een bät Jelt to jäwen, daut dee kunnen de Onkosten fa daut Fon betolen. Waut vonne goode Enstalunk dise Sesta nich wees!

16. Waut kjenn wie von de Nazara lieren?

¹⁶ Von de Nazara äa goodet Biespel kjenn wie väl lieren. Un daut Vespräakjen, waut de Nazara muaken, lieet ons uk eenjet äwa onsen himlischen Voda Jehowa. Hee weet daut, daut wie dän Wunsch haben, am to jefaulen, un daut wie wellich reed sent, waut opptojäwen, om soo to läwen, aus wie am vesproaken haben, aus wie ons am hanjeewen. Hee jeft ons de groote Iea, daut wie de Jeläajenheit kjrieen, am to wiesen, daut wie am leewen (Spr. 23:15-16; Mar. 10:28-30; 1. Joh. 4:19). Aun de Nazara es to seenen, daut Jehowa daut enwoat, wan wie waut oppjäwen fa am, un daut hee daut väl räakjent. Well wie ons wieda eenich sennen, Jehowa to deenen un reed sennen, am ons bastet to jäwen.