1. Makalegelo atshi abonga akombeledi a Yehowa ana monesa sendese mualeha?

 WANA zula ufuta waye nu Yehowa nu ndando ba? Idi ya diago egi wana guyitshita! Uvi ushigo hakhaye. Sendese mutangua dikulu, athu ako nji akhalele muzula ufuta wawo nu Yehowa nu ndando gifua luholo aye nji wana guyitshita. (Ngi. 104:33, 34) Athu avula atshitshile ngolo ha gukombelela Yehowa. Yene ndaga Banazileya a gu Isalele atshitshile. Banazileya ene akhalele akhuatshi? Malongo atshi tuajiya guzula mu gifezegeselo giawo?

2. a) Banazileya akhalele akhuatshi? (Lutango 6:1, 2) b) Mukunda natshi enya Isalele ako akhalele mutomba gubua Banazileya?

² Mbimbi “Nazileya” yakatuga mu mbimbi ya Hebelu idi mukotelesa “muthu watombewe” nga ndo “muthu wadihanele ha gutshita mudimo wa ndando.” Mbimbi eyi idi mumonesa enya Isalele anyi adihanele ha gutshita mudimo wa Yehowa mu luholo luabalega ndando. Mukhuala wa Moize wakhalele muhana mala nga akhetu njila ha gudihana gudi Yehowa ha gumukalegela mudimo wa ndando gifua Nazileya mu tangua dimoshi ngenyi. a (Tanga Lutango 6:1, 2.) Gula muenya Isalele wadilaya ha gubua Nazileya, wakhalele naye gunemesa mikhuala iko inyi enya Isalele ako akhalelego munemesa. Mukunda natshi enya Isalele ako akhalele mutomba gubua Banazileya? Yajiya gukhala egi handaga akhalele muzumba Yehowa muavula nu gumuhana mersi mukunda nu ima yavula yabonga yatuhanele muene.​—Mikh. 6:5; 16:17.

3. Mangino, luholo lutshi akombeledi a Nzambi adi gifua Banazileya?

 ³ Akombeledi a Nzambi akhalelego luko mubua Banazileya tangua “Mukhuala wa Klisto wahinganele Mukhuala wa Moize.” (Gal. 6:2; Roma 10:4) Mangino akombeledi a Yehowa ana landula nji gumonesa nzala yakola ya gumukombelela nu mutshima wawo wagasue nu monyo wawo wagasue nu matangi awo agasue nu ngolo jiawo jiagasue gifua Banazileya. (Mako 12:30) Tuana laya Yehowa ha gumukombelela tangua tuana gudihana gudi muene. Hagumonesa egi tudi munemesa ndaga tualayele Yehowa, tudi naye gutshita gutshigina guenji nu gudihana muavula mu mudimo wenji. Gulonguga ndaga jiakalegele Banazileya ha gutagenesa ndaga adilogele, guza gutukuatesa ha gujiya luholo esue nji tuajiya gutagenesa ndaga tualayele Yehowa. b (Mat. 16:24) Tutadilenu ifezegeselo eyi yalandula.

KHALA GUDIHANA MUAVULA MU MUDIMO WA YEHOWA

4. Hagutadila Lutango 6:3, 4, ndaga jitshi Banazileya akhalelego mukalagala?

⁴ Tanga Lutango 6:3, 4. Banazileya akhalelego naye gunua matombe a maluholo agasue, nga gunua gima giagasue gialondewe nu mabundu a vinyo, nga gudia mabundu ene. Enya Isalele ako akhalele munua matombe nu gudia mabundu a vinyo handaga gudi ene, yakhalelego ndaga yabola. Yadiago, Biblia yana zuela egi: “Vinyo yana suanguluisa mutshima wa muthu” idi kado gatuhanele Nzambi. (Ngi. 104:14, 15) Uvi Banazileya akhalelego mudia nu gunua ima eyi yagasue yana suanguluisa athu mukunda nu gunemesa mukhuala wa Nzambi. c

5. Ndaga itshi phangi Madián nu Marcela atshitshile? Mukunda natshi?

⁵ Esue nji tuana kalagala ngolo ha gutshita mudimo wa Yehowa gifua Banazileya. Tutadilenu gifezegeselo gia Madián nu Marcela. d Phangi Madián nu mukaji’enji akhalele nu mbongo jiavula. Madián wakhalele nu mudimo wabonga waahanele njila ha gujinga mu inzo yabonga. Uvi akhalele mutshigina gudihana muavula mu mudimo wa Yehowa. Ha gutagenesa felela diene, azudile desizio dia gusombegesa ndaga jiko mu monyo wawo. Adi muzuela egi: “Tuasendesele guzondesa badepanse etu. Tuayile mujinga mu inzo yazonda, tuadigile nji gamiyo getu.” Gushigo nu muthu waashinjigile ha  gutshita ndaga eji uvi ene hakhawo azudile desizio diene handaga akhalele mutshigina gudihana muavula mu mudimo wa Yehowa. Akhalele nu gusuanguluga guavula luholo azudile desizio diene.

6. Mangino mukunda natshi akombeledi a Yehowa ana gudihana ha gutshita mudimo wenji? (Tala nji gifuanesa.)

⁶ Mangino akombeledi a Yehowa ana tshita ngolo ha gudihana mu mudimo wenji nu gusuanguluga guagasue. (1 Kol. 9:3-6) Yehowa ganago gutushinjiga ha gutshita ndaga eji jiagasue, uvi ishigo mukotelesa egi ima tuabembele yakhala yabola. Ha gufezegesa, athu ako abembele midimo, jinzo nga ima ana tshigina. Ako azudile desizio dia gutuna gudizula mu ulo nga guvuala ana. Ako nji azudile desizio dia guya mulongesa fundo didi nu funu ya alongeshi ikhale adi gualeha nu enya fami yawo ana zumba. Avula mukatshi dietu akalegele ndaga eji handaga tuana tshigina guhana Yehowa milambu yabalega ndando. Jiya egi Yehowa wana zula nu ndando ndaga wana tshita mu mudimo wenji, ikhale wana tshita mudimo wene wavula nga wazonda.​—Heb. 6:10.

KHALA YAGUDISHA NU ATHU AKO

7. Yajiya gukhala egi ndaga jitshi jia lamba jiakhalele mukanga Banazileya njila ha gutagenesa ndaga adilogele? (Lutango 6:5) (Tala nji gifuanesa.)

⁷ Tanga Lutango 6:5. Banazileya akhalelego naye gubunga sanga diawo. Ngenyi akhalele mumonesa egi adi diago mutumagela Yehowa. Gula muenya Isalele watshita ivo yavula mu mudimo wa Ginazileya, sanga dienji diakhalele muleha, yakhalelego nji lamba gudi athu ako ha gumujiya. Gula nga athu ako akhalele guanemesa nu guahana gikhesa ha gutagenesa ndaga adilogele, nga yakhalelego lamba mukunda nu ene ha gukhala yagudisha nu athu ako. Uvi ndaga ya gikenene idi egi, mu sungi imoshi ngenyi enya Isalele akhalelego munemesa nu gukuatesa Banazileya. Ha gufezegesa, mu masugu a profete Amosa enya Isalele anyi abuile ba aposta ‘ahanele Banazileya vinyo ha gunua.’ Yajiya gukhala egi atshitshile ngenyi ha guatuma ha gubolesa ndaga adilogele ya gutuna gunua vinyo. (Am. 2:12) Matangua ako yakhalele mutoga egi Banazileya amonese gikhesa ha gunemesa ndaga adilogele nu ha gukhala ya gudisha nu athu ako.

8. Luholo lutshi lumene lua Benjamin ludi guguhana gikhesa?

⁸ Esue nji Yehowa wajiya gutukuatesa ha gumonesa nu gikhesa giagasue egi tudi yagudisha nu athu ako, ikhale tuana khala enya musonyi. Tutadilenu gifezegeselo gia Benjamin udi nu ivo 10 wana jinga gu Norvège. École yawo yazudile desizio dia gukalagala ndaga imoshi yakhalele mumonesa egi adi gukhanda ya gifutshi gia Ukraine mukunda nu ita yazogele guene. Awambelele ana khalasa ha guyimba lungimbo nu gusudiga milele yakhalele nu mikubu ya drapo  dia gifutshi gia Ukraine. Ha gutuna gudinginyisa mu ndaga jia politike, Benjamin wayile gudisuega gualeha nu fundo akhalele naye gukalagala ndaga jiene. Uvi mulongeshi mumoshi wamumonele nu wamutamegele mu dijui diakola egi: “Iza ha fundo tudi esue. Mukut’etu agasue tudi gugunenga!” Benjamin wasuenele nu gikhesa giagasue fundo diakhalele mulongeshi muene, wamuwambelele egi: “Nganago gudinginyisa mu ndaga jia politike. Uvi Matamue a Yehowa avula adi mu bologo handaga ana tuna gudinginyisa mu ndaga jia ita.” Mulongeshi muene watshiginyile ndaga jiamuwambelele Benjamin hene amubembele. Uvi, ana khalasa diawo akhalele gudihula egi mukunda natshi Benjamin watuna gudibungisa nu esue. Benjamin wavuile woma wavula nu watshiginyile gudila, uvi waawambelele nu gikhesa giagasue ndaga jiawambelele muene mulongeshi. Gungima Benjamin wawambelele mvuaji jienji egi Yehowa wamukuatesele ha guzuelela gutshigina guenji.

9. Mu luholo lutshi tuajiya gusuanguluisa mutshima wa Yehowa?

⁹ Luholo tuana gutumagela Yehowa, athu ako ana mona egi tudi yagudisha nawo. Tudi naye gukhala nu gikhesa ha gumonesa gu mudimo nga gukhalasa egi tudi Matemue a Yehowa. Luholo makalegelo a athu a ha mavu awa adi gudibolesa luko muavula, yajiya gukhala lamba gudi esue ha gutumagela mikhuala ya Biblia nu ha gulongesa athu ako lukuma luabonga. (2 Tim. 1:8; 3:13) Tujimbilago egi tangua diagasue tuana tshita ngolo ha gukhala yagudisha nu athu anago gukombelela Yehowa, tuana ‘suanguluisa mutshima wenji.’​—Ish. 27:11; Mal. 3:18.

KHALA MUSHA YEHOWA HA FUNDO DIA THOMO MU MONYO WAYE

10. Mu luholo lutshi yakhalele lamba gudi Banazileya ha gulandula ndaga jidi mu Lutango 6:6, 7?

¹⁰ Tanga Lutango 6:6, 7. Banazileya akhalelego naye gusuena hehi nu kimbi. Matangua ako wajiya gutangiza egi yakhalelego ndaga yakola. Uvi yakhalele diago ndaga ya lamba gudi Nazileya gula muenya fami yenji wafua. Kutime jia gufunda athu jia mu tangua diene, jiakhalele mutoga egi athu adi naye gusuena hehi nu kimbi. (Yone 19:39, 40; Makal. 9:36-40) Uvi Nazileya gakhalelego naye gulandula kutime jiene. Ikhale tangua enya fami jiawo akhalele nu gikenene giakola mukunda nu ndaga imoshi ya lamba, Banazileya akhalele mumonesa gutshigina guakola ha gunemesa ndaga adilogele. Yehowa wakhalele mukuatesa akombeledi enji awa a gujinginyina ha gukolesela mu malamba ene.

11. Ndaga itshi Muklisto udi naye gutshita tangua didi muene muzula badesizio atadila ndaga jia fami? (Tala nji gifuanesa.)

 ¹¹ Luholo tudi Aklisto, tualayele Yehowa ha gumukalegela. Hene tuana zula nu ndando ndaga tuadilogele. Ndaga jiene jiana tadila nji badesizio etu nu enya fami yetu. Tuana tshita ngolo ha gutagenesa nzala jia enya fami yetu, uvi tuanago gusha nzala jiawo ha fundo dia thomo gubalega ndaga jiana gututoga Yehowa. (Mat. 10:35-37; 1 Tim. 5:8) Matangua ako tuajiya guzula badesizio ashigo musuanguluisa enya fami yetu ha gusuanguluisa Yehowa.

12. Tangua Alexandru wakhalele mutagana nu ndaga ya lamba mu fami yenji, ndaga itshi yakalegele muene? Itshi gatunyile gukalagala?

¹² Tutadilenu gifezegeselo gia Alexandru nu mukaji’enji Dorina. Akhalele mulonguga Biblia, uvi gungima dia givo gimoshi, Dorina wabembele genji, wawambelele nji Alexandru ha gubemba. Uvi Alexandru wamuwambelele nu guhuiminyina guagasue nu gutema egi udi naye gulandula gulonguga. Dorina gasuangulugilego nu wakhalele gumushinjiga ha gubemba gulonguga. Alexandru udi muzuela egi watshitshile ngolo ha gukotelesa mukunda natshi Dorina wakhalele mutuna, uvi yakhalelego ndaga yaleba mukunda nu muene. Tangua Dorina wakhelele gumuwambela ndaga jiabola nu jia khuta, wakhalele gudivua gifua abembe genji gulonguga. Uvi Alexandru walanduile gusha Yehowa ha fundo dia thomo mu monyo wenji, walanduile nji guzumba mukaji’enji muavula nu gumunemesa. Gungima gifezegeselo gienji giabonga, giakuatesele mukaji’enji ha gusendesa luko gulonguga Biblia, hene wabuile Temue wa Yehowa.​—Tala video Alexandru et Dorina Văcar: L’amour est patient et bon ha fundo diasonegewa egi, “La Bible transforme des vies” mu jw.org.

13. Luholo lutshi tuajiya gumonesela Yehowa nu enya fami yetu guzumba?

¹³ Yehowa wafugile fami, hene wana tshigina egi tukhale nu gusuanguluga mu fami. (Ef. 3:14, 15) Gula tudi mutshigina gukhala nu gusuanguluga, tudi naye gukalagala ndaga gifua luholo Yehowa wana tshigina. Idi yadiago egi, Yehowa wana zula nu ndando luholo wana tshita ngolo ha gumukombelela nu gutagenesa nzala jia enya fami yaye nu luholo wana guazumba nu guanemesa.​—Roma 12:10.

KHALA MUHANA ATHU AKO GIKHESA HA GUKHALA GIFUA BANAZILEYA

14. Akhuatshi tuajiya guhana gikhesa mu mbimbi jietu?

¹⁴ Mangino athu agasue ana tomba ha gukombelela Yehowa, ana tshita ngolo ha gudihana mu mudimo wenji handaga ana gumuzumba. Uvi matangua ako yana khalago yaleba. Luholo lutshi tuajiya gukuatesa athu ako ha gutshita ngenyi? Gula tudi guahana gikhesa mu mbimbi jietu. (Yobo 16:5) Gudi nu aphangi ako mu hungu  dienu adi mutshigina gulebesa lujingu luawo ha gudihana muavula mu mudimo wa Yehowa ba? Udi mujiya mavuala anyi ana monesa gikhesa nu ana khala yagudisha nu athu ako gu khalasa ikhale ishigo yaleba mukunda nu ene ha guyitshita ba? Udi mujiya athu ana longuga Biblia nga aphangi’etu Aklisto adi mutshita ngolo ha gusala yagujinginyina gudi Yehowa ikhale enya fami yawo adi guasagesa ba? Tuzulenu desizio dia gutshita ngolo ha guahana gikhesa nu guawambela egi tuana zula nu ndando gikhesa giawo nu ndaga ana tshita mu mudimo wa Yehowa.​—File. 4, 5, 7.

15. Mu luholo lutshi aphangi ako akuatesele aphangi adi mu mudimo wa tangua diagasue?

¹⁵ Matangua ako tuajiya gukuatesa aphangi’etu Aklisto anyi adi mu mudimo wa tangua diagasue nu ima tudi nayo. (Ish. 19:17; Heb. 13:16) Yene ndaga yakalegele phangi wa mukhetu wagukola wana jinga gu Sri Lanka. Wahetele makuta avula agisugishilo gia mudimo wenji (pension), wakhalele mutshigina gukuatesa mavuala a akhetu mbadi a avundji a njila ha gulandula gutshita mudimo wawo ikhale akhalele mutagana nu lamba dia mbongo. Wazudile desizio dia guahana mbongo mbeji yagasue ha guakuatesa hagula ajiya gusumba telefone. Phangi muene wa mukhetu wamonesele diago khadilo diabonga!

16. Malongo atshi tuajiya guzula mu luholo Yehowa wazudile desizio egi athu ako amukalegele gifua Banazileya?

¹⁶ Tuajiya diago guzula malongo abonga mu gifezegeselo giabembele Banazileya! Gulonguga ndaga jiatadila Banazileya gudi nji gutulongesa ndaga jiavula jiatadila Yehowa Tata wetu wa mu dilu. Wana jiya egi tuana tshigina gumusuanguluisa nu tuana tshita ngolo ha gudihana muavula ha gutagenesa ndaga tuamulayele. Wana gutunemesa handaga wana bemba egi tumuzumbe uvi ganago gutushinjiga. (Yesh. 23:15, 16; Mako 10:28-30; 1 Yone 4:19) Luholo Yehowa wazudile desizio egi athu ako amutshitshile mudimo gifua Banazileya, yana monesa egi wana mona mudimo tuana gumukalegela nu wana guwuzula nu ndando. Hene, tuzulenu desizio dia gulandula gukalegela Yehowa nu gumuhana ima yetu ya ndando.