NKHANI YOPFUNZIRA 7
NYIMBO NA. 51 Tadzipereka kwa Mulungu
Ko tingapfunzire chani kwa Anaziri?
‘Iye ni wochena kwa Yahova ntsiku zose za unaziri wake.’—NUM. 6:8.
CHOLINGA
Kuwona momwe chitsanzo cha Anaziri chingatithandizire kukhala olimba ntima na kukhala okonzeka kupereka ntsembe kwa Yahova.
1. Ko atumiki wa Yahova wakumbuyo adachita chani?
KO IMWEPO muchalemekeza ushamwali wanu na Yahova? Mosakayika kuti muchalemekeza. Ndipo imwepo ndimwelini mwekha. Kuyambira kalekale wanthu azinji ambadzibvambo ninge momwe imwepo munkubvera. (Sal. 104:33, 34) Azinji ambachita khama kuti ambatumikire Yahova ndipo ni vimweviretu vomwe Anaziri wa nthawe ya Aizirayeli ambachita. Ko iwo wenze mbani, ndipo isepano tingapfunzire chani pa chitsanzo chawo?
2. (a) Ko Anaziri wenze mbani? (Numeri 6:1, 2) (b) Ndawa chani Aizirayeli anango ambasalula kukhala Anaziri?
2 Mawu yakuti ‘Mnaziri’ yadachoka ku chiyankhulo cha Chiheberi yomwe yatanthauza ‘Wosaluliwa,’ ‘Wopatuliwa,’ panango kuti ‘Wodzipereka.’ Anaziri wenze Aizirayeli wakhama omwe ambapereka ntsembe zapadera kuti atumikire Yahova. Chilamulo cha Mose chimbabvuma kuti mwamuna panango nkazi achite lumbiro yapadera kwa Yahova, kusalula kuti atumikire ninge Mnaziri kwa kanthawe. a (Werengani Numeri 6:1, 2.) Pomwe Muizirayeli ambasalula kukhala Mnaziri, iye ambadekana kutewedza malangizo yanango yomwe Aizirayeli anango ambadekanalini kuyatewedza. Koma ndawa chani Aizirayeli ambachita lumbiro mweyi? Mosakayika ambachita vimwevi ndawa ya chikondi chawo kwa Yahova komasoti na kutembeja kuchokera pasi pa ntima ndawa ya madaliso yomwe ambatambira.—Deut. 6:5; 16:17.
3. Ko wanthu wa Mulungu ntsiku zino achawonesa tani mzimu ninge wa Anaziri?
3 Pomwe ‘chilamulo cha Khrisitu’ chidangena m’malo mwa chilamulo cha Mose, wanthu wa Mulungu ambadekanalinipomwe kukhala Anaziri. (Agal. 6:2; Aro. 10:4) Koma ninge Anaziri, ntsiku zino atumiki wa Yahova ankupitiriza kufunisisa kutumikira na ntima wawo wose, moyo wawo wose, maganizo yawo yose na mphanvu zawo zose. (Maliko 12:30) Pomwe isepano tidadzipereka kwa Yahova, tidamupolomisa na ntima wathu wose kuti timbachite vinthu mobverana na lumbiro mweyi. Isepano tichadekana kuchita vomwe Yahova achafuna na kuchita khama kuti timutumikire. Tiwone momwe Anaziri ambakwanirisira lumbiro yawo na kuwona momwe chitsanzo chawo chingatithandizire kuti tikwanirisembo lumbiro yathu ya kudzipereka kwa Yahova. b (Mat. 16:24) Naboni tiwone vitsanzo vinango.
MUMBACHITE KHAMA
4. Mobverana na Numeri 6:3, 4, ko Anaziri wenze okonzeka kuchita chani?
4 Werengani Numeri 6:3, 4. Anaziri ambadekanalini kumwa mowa na kudya vinthu ninge mphesa na mphesa zouma. Aizirayeli anango ambamwa mowa na kudya vakudya vochokera ku mphesa ndawa yakuti penze palibe chophonyeka chiliyose ndawa yochita vimwevi. Baibolo ilewa kuti ‘vinyo ukondweresa ntima’ wa munthu ndipo ni mphaso yochokera kwa Mulungu. (Sal. 104:14, 15) Olo venze teno Anaziri wenze wokonzeka kusachita vimwevi. c
Ko imwepo ndimwe okonzeka kuchita khama pa kutumikira Yahova ninge momwe Anaziri adachitira? (Onani ndime 4-6)
5. Ko Madián na Marcela adasalula kuchita chani ndipo ndawa chani?
5 Ninge Anaziri, isepanombo tichita khama kuti tichite vizinji pakutumikira Yahova. Onani chitsanzo cha Madián na Marcela. d Banja mweyi yenze na moyo wabwino maninge. Madián wenze pa basa yabwino ndipo iwo ambakhala mu nyumba yokhuza maninge. Koma iwo ambafuna kuchita vizinji pa kutumikira Yahova. Kuti akwanirise cholinga mwechi ambadekana kuchinja vinthu vinango. Iwo adati: “Tidayamba kuchepesa kobiri zomwe timbadzonga, tidachinja nkukakhala mukanyumba kang’ono ndipo tidagulisapomwe karo.” Madián na Marcela ambadekanalini kuchinja vinthu teneyu. Koma iwo adasalula kuchita vimwevi ndawa ambafuna kuchita vizinji pa kutumikira Yahova. Iwo ni okondwa ndipo ankukhala moyo wokondwa maninge ndawa ya vomwe adasalula.
6. Ndawa chani isepano tichachita khama pakutumikira Yahova? (Onani pomwe foto.)
6 Atumiki wa Yahova ntsiku zino akhala okondwa akambachinja vinthu pa moyo wawo kuti akhale na nthawe ikulu kuti ambamutumikire. (1 Akor. 9:3-6) Yahova atikakamizalini kuti timbachinje vinthu tene, ndipo vinthu vinango vomwe abale achinja kuti atumikire Yahova ni vosaphonyeka. Mwakulinganiza, iwo asiya basa yomwe aikonda, kusiya nyumba yawo, olo mpakana kusiya vinyama vomwe iwo avikonda maninge. Azinji asalula kusalowola panango kukhala wosalowodwa kwa kanthawe, panango kudikhira kuti aleke kukhala na wana mwakankulumize pomwe andolowolana. Anango asalula kukatumikira komwe kunkudekana thandizo podiya kuti vimwevi vichitisa kuti akhale kutali na azibale wawo na azishamwali. Azinji mwa isepano tichachita vimwevi ndawa yofuna kumupasa Yahova vose vomwe tinavo. Tsimikizirani kuti Yahova alemekeza maninge vose vomwe munkuchita, vikulu panango ving’ono vomwe imwepo mwasalula kuchita pa kumutumikira.—Aheb. 6:10.
KHALANI OKONZEKA KUKHALA OSIYANA NA ANANGO
7. Ko ni chani chidakachitisa Anaziri kukangira kukwanirisa lumbiro yawo? (Numeri 6:5) (Onani pomwe foto.)
7 Werengani Numeri 6:5. Anaziri ambadekanalini kugwata tsitsi yawo. Imweyi yenze njira yowonesa kuti ankugonjera Yahova. Muizirayeli akakhala Mnaziri kwa nthawe ikulu, tsitsi yake imbakhala itali maninge ndipo venze vosashupa kuti wanthu amuzindikire. Wanthu anango akamulemekeza Mnaziri na kumulimbikisa kuti apitirize na lumbiro yake venze vosashupa kuti akhale wosiyana na wanthu anango. Koma chobvesa ntsitsi ni chakuti nthawe zinango Anaziri ambalemekezewalini ndipo ambatambiralini thandizo kuchokera kwa Aizirayeli anango. Nthawe ya mneneri Amose, Aizirayeli wampatuko ‘ambapasa vinyu Anaziri kuti amwe,’ mosakayika iwo ambachita vimwevi kuti Anaziri aleke kubvera lamulo ya kuti ayi kumwa vinyu. (Amosi 2:12) Anaziri ambadekana kukhala olimba ntima maninge kuti akwanirise lumbiro yawo na kukhala osiyana na wanthu anango.
Mnaziri yemwe wenze wokhulupirika pa lumbiro yake, wenze wokonzeka kukhala wosiyana na wanthu anango (Onani ndime 7)
8. Ko chitsanzo cha Benjamin chakulimbikisani tani?
8 Na thandizo ya Yahova isepanombo tingakwanise kukhala olimba ntima na kukhala osiyana na wanthu anango podiya kuti ndise wamanyazi. Onani chitsanzo cha mulumbwana munango dzina yake Benjamin wa magole 10 yemwe akhala ku Noruega. Ndawa ya nkhondo ya ku Ukránia, ku shikola kwake adachita viwonesero vofuna kuthandizira wanthu wa ku Ukránia. Aluno ambadekana kuyimba nyimbo na kuvala vovala volingana na Bandera ya ku Ukránia. Kuti apewe kukhalapo pa chiwonesero mwechi chokondera dziko yawo, Benjamin adakhala patali na chiwonesero mwechi. Koma ticha munango adamuwona ndipo adamuchemera kuti: “Bwerani kuno, manje so. Tonse tinkukudikhira!” Benjamin adafendera komwe kwenze ticha ule ndipo adayankhula molimba ntima kuti: “Inepano ningeneleralini ndale, ndipo nililini mbali iliyose ya ndale. Kunena shuwa wa Mboni za Yahova azinji ali mu djeri ndawa ya kulamba kuyenda ku nkhondo.” Ticha ule adabvuma ndipo adamuuza kuti viribe basa kuleka kuchita mbali. Koma anzake wa Benjamin adayamba kumubvunza kuti ndawa chani iye ankuchitambolini mbali. Benjamin adakhala na mantha ndipo adandokhala pang’ono kulira. Olo venze teno iye adabwerezera pomwe kuuza anzake ose wa mu turma vomwe wenze adauuza ticha ule. Patsogolo pake Benjamin adauuza azibereki wake kuti iye adawona Yahova ankumuthandiza kulimbisa chikhulupiriro chake.
9. Ko tingakondwerese tani ntima wa Yahova?
9 Wanthu akwanisa kuwona kuti tisiyana nawo vochita ndawa yakuti isepano tibvera Yahova. Isepano tichadekana kukhala olimba ntima kuti tiuze wanthu anango ku basa panango ku shikola kuti ndise wa Mboni za Yahova. Pomwe vinthu vinkuyipirayipira mu dziko iyi, nthawe zinango vikhala voshupa kuti timbachite vinthu mobverana na mpfundo za m’Baibolo na kuuza anango va ntotholo wabwino. (2 Tim. 1:8; 3:13) Nthawe zose mbakumbukirani kuti ‘ntima wa [Yahova] uchakondwa’ tikakhala olimba ntima kuti tikhale osiyana na wanthu omwe amutumikiralini.—Miy. 27:11; Mal. 3:18.
IKHANI YAHOVA PA MALO YOYAMBA PA MOYO WANU
10. Ndawa chani venze voshupa kwa Anaziri kuti atewedze lamulo yomwe iri pa Numeri 6:6, 7?
10 Werengani Numeri 6:6, 7. Anaziri ambadekanalini kufenderera munthu wakufa. Panango tingaganize kuti vimwevi venzelini voshupa. Koma vimwevi venze voshupa kwa Mnaziri yemwe m’bale wake chaiye wamwalira. Pa nthawe mwaire munthu akamwalira venze va chizolowezi kuti wanthu ambakhale pafupi na maliro. (Yoh. 19:39, 40; Mac. 9:36-40) Koma Anaziri ambadekanalini kutewedza chizolowezi mwechi. Podiya pa nthawe zoshupa mwezi Anaziri ambapitiriza kukwanirisa lumbiro yawo. Vimwevi vinkuwonesa kuti iwo enze na chikhulupiriro cholimba maninge. Yahova ambapereka mphanvu kwa Anaziri kuti akwanise kulimbana na mabvuto mwaya.
11. Ko isepano tichadekana kuchita chani tikambasalula vochita m’banja yathu? (Onani pomwe foto.)
11 Isepano tiwona kuti kudzipereka kwathu kwa Yahova ni chinthu chodekana maninge. Vimwevi vikhudzapomwe pa vomwe tichasalula pa nkhani za m’banja. Tichachita khama kuti timbasamalire vofuna va banja yathu koma tiyikhalini vofuna va banja yathu pa malo yoyamba m’malo mwa vofuna va Yahova. (Mat. 10:35-37; 1 Tim. 5:8) Nthawe zinango tingasalule vinthu vinango vomwe wanthu wa m’banja yathu angakondwelini navo koma vomwe vichakondweresa Yahova.
Ko imwepo ndimwe okonzeka kuyikha vofuna va Yahova pa malo yoyamba podiya pa nthawe yomwe vinthu ni voshupa maninge? (Onani ndime 11) e
12. Pa kulimbana na bvuto inango m’banja, ko Alexandru adachita chani ndipo alibe kuchita chani?
12 Onani chitsanzo cha Alexandru na nkazi wake, Dorina. Iwo adayamba kupfunzira Baibolo, ndipo pambuyo pa gole ibodzi Dorina adasiya kupfunzira. Ndipo iye ambafuna kuti Alexandru asiyembo. Koma modekha na mwaulemu iye adamuuza kuti asiyelini kupfunzira. Dorina alibe kukondwa navo ndipo adayesesa kumuchitisa kuti iye asiye kupfunzira. Alexandru adalewa kuti iye ambayesesa kumubvesa kuti ndawa chani akuchita vimwevi. Koma venze voshupa maninge kwa iye. Nthawe zinango Dorina akambayankhula mwaukali kwa Alexandru panango kumuyankhulira vinthu va mwano iye ambafika mpaka pofuna kusiya kupfunzira Baibolo. Olo venze teno Alexandru adapitiriza kuyikha Yahova pa malo yoyamba ndipo pa nthawe ibodzibodzi mweyo iye adapitiriza kuwonesa chikondi na ulemu kwa nkazi wake. Ndawa ya chitsanzo chabwino cha Alexandru, nkazi wake adayamba pomwe kupfunzira Baibolo ndipo patsogolo pake adabatizika.—Onani pa saiti ya jw.org vidiyo yakuti: Alexandru na Dorina Văcar: “Chikondi nchodekana ndipo nchabwino ntima” pa nkhani yakuti “Baibolo ichachinja moyo wa wanthu.”
13. Ko tingawonese tani chikondi chathu kwa Yahova na kwa wanthu wa m’banja yathu?
13 Yahova ndiye yemwe adayambisa banja. Iye afuna kuti mabanja yambakhale yokondwa. (Aef. 3:14, 15) Peno tinkufuna kukhala okondwa chaivo, tinkudekana kuchita vinthu mobverana na vomwe Yahova ankufuna. Ayi kukayikira kuti Yahova achakhala wokondwa ndawa ya vose vomwe muchachita kuti mumutumikire ninge momwe muchachitira pa kusamalira banja yanu mwachikondi komasoti mwaulemu.—Aro. 12:10.
THANDIZANI ANANGO KUTEWEDZERA ANAZIRI
14. Ko ni mbani makamaka omwe tichadekana kuwalimbikisa na mawu yathu?
14 Munthu aliyese yemwe wasalula kutumikira Yahova manjeuno, achadekana kukhala wokonzeka kuchita khama ndawa ya chikondi chomwe anacho kwa Yahova. Nthawe zinango kuchita vimwevi kungakhale koshupa. Ko isepano tingathandize tani anango kuti ambachite khama pakutumikira Yahova? Tingambawalimbikise na mawu yathu. (Yobu 16:5) Ko pa na abale anango mumpingu wanu omwe ankukhala moyo wosafuna vizinji ndawa yofuna kuchita vizinji pa kutumikira Yahova? Ko munkudziwa alumbwana omwe ankukhala olimba ntima kuti akhale osiyana na anzawo ku shikola podiya kuchita vimwevi ni koshupa? Ko mungakumbukire m’bale munango panango pfunziro ya Baibolo yomwe inkupitiriza kukhala yokhulupirika podiya inkutsutsiwa na wanthu wa m’banja yake? Khalani otsimikiza kuchita vose vomwe mungakwanise kuti mulimbikise wanthu mwawa na kuwauza momwe imwepo muchakhalira wokondwa ndawa ya kulimba ntima kwawo na vose vomwe ankumuchitira Yahova.—Filim. 4, 5, 7.
15. Ko wanthu anango achathandiza tani abale omwe ankuchita utumiki wa nthawe zose?
15 Nthawe zinango isepano tingathandize abale omwe ankuchita utumiki wa nthawe zose. (Miy. 19:17; Aheb. 13:16) Ni vimweviretu vomwe mulongo wachikulire yemwe akhala ku Sri Lanka adachita. Iye adatambira kobiri zoyingizira pa nthawe yomwe ambapuma ku basa ndipo iye ambafuna kuthandiza alongo awiri omwe ni apainiya omwe enze alibe kobiri zokwana kuti apitirize na utumiki wawo. Mwezi uliwose iye adasalula kuti ambawagulire crédito m’mafoni yawo. Ni vinthu vabwino maninge vomwe mulongo moyu adachita!
16. Ko tapfunzira chani kwa Anaziri?
16 Shuwadi, isepano tapfunzira vinthu vizinji pa chitsanzo cha Anaziri. Koma lumbiro ya Anaziri inkutipfunzisa chinthu chinango polewa va Ababa wathu Yahova. Iye adziwa kuti isepano tifuna kumukondweresa nakuti ndise okonzeka kuchita vose vomwe tingakwanise kuti tikwanirise lumbiro yathu ya kudzipereka. Iye atilemekeza pakutipasa mwayi wosalula kuti timbamuwonese chikondi. (Miy. 23:15, 16; Maliko 10:28-30; 1 Yoh. 4:19) Lumbiro ya Anaziri ichawonesa kuti Yahova achawona khama yomwe tichachita ndipo atikonda ndawa ya vose vomwe tichamuchitira. Naboni tichite vose vomwe tingakwanise kuti tipitirize kumutumikira Yahova ndipo nthawe zose timbakhale okonzeka kumupasa vose vomwe tingakwanise.
KO MUNGADAWIRE TANI?
-
Ko ni njira ziponi zomwe Anaziri ambawonesera kuti ni olimba ntima na okonzeka kukhala obvera?
-
Ko tingalimbikise tani anango kukhala olimba ntima ninge Anaziri nakuti ambachite khama pa kutumikira Yahova?
-
Ko lumbiro ya Anaziri inkutipfunzisa chani va Ababa wathu Yahova?
NYIMBO NA. 124 Tizikhulupirika Nthawi Zonse
a Podiya kuti Anaziri anango enze adasaluliwa na Yahova. Azinji mwa Anaziri mwawa adasalula kutumikira ninge Anaziri mwa kufuna kwawo.—Onani bokosi yakuti “ Anaziri osaluliwa na Yahova.”
b Nthawe zinango mabukhu yathu yalinganiza Anaziri na wale omwe ankuchita utumiki wa nthawe zose. Koma mupfunziro ino tiwone momwe tose isepano omwe tidadzipereka kwa Yahova tingatewedzerere Anaziri.
c Vinkuwoneka kuti Mnaziri wenze alibe chochitika chinango ninge udindo, chobverana na udindo wake.
d Onani pa saiti ya jw.org pa nkhani yakuti: “Tinasankha Kukhala Moyo Wosalira Zambiri” pa ndandanda ya nkhani zakuti: “Zochitika pa Moyo wa a Mboni za Yehova.”
e MAWU YOFOTOKOZERA FOTO: Mnaziri ankuwona maliro ya m’bale wake ali pa varanda padzulu pa nyumba. Koma ndawa ya lumbiro yake kwa Yahova iye angayendelini kumaliro.
