1.‏ پرانے زمانے توں لے کے ہُن تک خدا دے بندیاں نے اوہدی خدمت کرن لئی کیہو جیہا جذبہ وکھایا اے؟‏

 کیہہ تُسی یہوواہ نال اپنی دوستی دی قدر کردے او؟ یقیناً تُسی اِنج کردے ہووو گے۔ پرانے زمانے توں ای خدا دے بوہت سارے بندے اوہدے نال اپنی دوستی نُوں اِک اعزاز سمجھدے نیں۔ (‏زبور 104:‏33، 34‏)‏ خدا دے بوہت سارے بندیاں نے اوہدی عبادت کرن لئی بوہت ساریاں قربانیاں دِتیاں۔ ایہہ گل اوہناں اِسرائیلیاں بارے وی سچ اے جنہاں نُوں نذیر کہیا جاندا سی۔ نذیر کون سن تے اَسی اوہناں توں کیہہ سکھ سکنے آں؟‏

2.‏ (‏الف)‏نذیر کون سن؟ (‏گنتی 6:‏1، 2‏)‏ (‏ب)‏کجھ اِسرائیلیاں نے نذیر بنن دا فیصلہ کیوں کیتا؟‏

² جیہڑے عبرانی لفظ دا ترجمہ ”‏نذیر“‏ کیتا گیا اے، اوہدا مطلب اے ”‏چُنیا ہویا“‏ تے ”‏کسے خاص خدمت لئی الگ کیتا ہویا۔“‏ ایہہ لفظ اوہناں اِسرائیلیاں لئی استمال ہوندا سی جیہڑے خاص طریقے نال یہوواہ دی خدمت کرن لئی قربانیاں دیندے سن۔ شریعت چ ایس گل دی اجازت سی کہ کوئی مرد یاں عورت کجھ وقت لئی یہوواہ دے حضور نذیر بنن دا فیصلہ کر سکدا سی۔‏ a ‏(‏گنتی 6:‏1، 2 نُوں پڑھو۔)‏ ایس وعدے چ ایہہ شامل سی کہ اوہ کجھ ایہو جہے کم نئیں کرے گا جیہڑے باقی اِسرائیلی کر سکدے سن۔ فیر وی کوئی مرد یاں عورت نذیر بنن دا فیصلہ کیوں کردا سی؟ کیونکہ اوہدے دل چ یہوواہ لئی گُوڑھی محبت ہوندی سی تے اوہ اوہدے وَلّوں مِلن والیاں برکتاں لئی اوہدا بڑا شکرگزار ہوندا سی۔—‏اِستثنا 6:‏5؛‏ 16:‏17‏۔‏

3.‏ خدا دے بندے نذیراں ورگا جذبہ کیویں وکھا رہے نیں؟‏

³ جدوں مسیح دی شریعت نے موسیٰ دی شریعت دی جگہ لے لئی تے نذیر بنن دا سلسلہ ختم ہو گیا۔ (‏گلتیوں 6:‏2؛‏ رومیوں 10:‏4‏)‏ پر نذیراں وانگوں اَج وی یہوواہ دے بندے ایہہ ثابت کر رہے نیں کہ اوہناں دی شدید خواہش اے کہ اوہ اپنے پورے دل، جان، عقل تے طاقت نال یہوواہ دی خدمت  کرن۔ (‏مرقس 12:‏30‏)‏ جدوں اَسی اپنی زندگی یہوواہ دے ناں کرنے آں تے اَسی اوہدے نال ایہہ وعدہ کرنے آں کہ اَسی پوری زندگی اوہدی خدمت کراں گے۔ ایس وعدے نُوں نبھان چ ایہہ شامل اے کہ اَسی یہوواہ دی مرضی تے چلیے تے اوہدی خدمت کرن لئی قربانیاں دَئیے۔ جدوں اَسی ایس مضمون چ ویکھاں گے کہ نذیراں نے یہوواہ نال کیتے اپنے وعدے نُوں کیویں نبھایا تے اَسی سکھاں گے کہ اَسی یہوواہ نال کیتے اپنے وعدے نُوں کیویں نبھا سکنے آں۔‏ b (‏متی 16:‏24‏)‏ آؤ ایہدیاں کجھ مثالاں تے غور کرنے آں۔‏

قربانیاں دین لئی تیار رہوو

4.‏ گنتی 6:‏3، 4 دے مطابق نذیر کیہڑیاں قربانیاں دیندے سن؟‏

⁴ گنتی 6:‏3، 4 نُوں پڑھو۔‏ نذیراں نُوں مے تے شراب پین تے انگور تے کشمش کھان دی اجازت نئیں سی۔ اوہناں دے آلے دَوالے دے لوک تقریباً روز ای ایہناں چیزاں دا مزہ لیندے سن۔ ایہناں چیزاں نُوں کھان پین چ کوئی حرج وی نئیں سی۔ بائبل چ دَسیا گیا اے:‏ مے جیہڑی انسان دے دل نُوں خوش کردی اے، اوہ خدا وَلّوں نعمت اے۔ (‏زبور 104:‏14، 15‏)‏ پر نذیر کھان پین دِیاں ایہناں شیواں دا مزہ نہ لین نال یہوواہ لئی قربانی دے رہے ہوندے سن۔‏ c

5.‏ بھرا میڈین تے اوہدی بیوی مارسیلا نے کیہڑیاں قربانیاں دِتیاں تے کیوں؟‏

⁵ نذیراں وانگوں اَج اَسی وی دل‌وجان نال یہوواہ دی خدمت کرن لئی بوہت ساریاں قربانیاں دینے آں۔ ذرا بھرا میڈین تے اوہدی بیوی مارسیلا دی مثال تے غور کرو۔ اوہ دونویں بڑی آرام‌دہ زندگی گزار رہے سن۔ بھرا میڈین کول بڑی چنگی نوکری سی تے ایس لئی اوہ بڑے خوب‌صورت گھر چ رہندے سن۔ پر اوہ دونویں یہوواہ دی ہور زیادہ خدمت کرنا چاہندے سن۔ ایس لئی اوہناں نے کجھ تبدیلیاں کیتیاں۔ اوہ کہندے نیں:‏ ”‏اَسی اپنے خرچے گھٹا دِتے، اَسی اِک چھوٹے گھر چ رہن لگ پئے تے اَسی اپنی گڈی وی ویچ دِتی۔“‏ بھرا میڈین تے بھین مارسیلا لئی ایہہ قربانیاں دینا ضروری نئیں سی پر اوہناں نے اِنج ایس لئی کیتا تاکہ اوہ ہور ودھ چڑھ کے یہوواہ دی خدمت کر سکن۔ اوہ دونویں اپنے ایس فیصلے توں بڑے خوش تے مطمئن نیں۔‏

6.‏ اَج مسیحی قربانیاں کیوں دیندے نیں؟ (‏تصویر نُوں وی ویکھو۔)‏

⁶ اَج وی یہوواہ دے لوک خوشی نال قربانیاں دیندے نیں تاکہ اوہ اپنا زیادہ توں زیادہ وقت اوہدی خدمت کرن لئی استمال کر سکن۔ (‏1-‏کُرنتھیوں 9:‏3-‏6‏)‏ یہوواہ ساڈے کولوں قربانیاں دی توقع نئیں کردا تے نہ ای اوہ چیزاں غلط ہوندیاں نیں جیہڑیاں اَسی قربان کر رہے ہُنے آں۔ مثال لئی، کجھ لوک اپنی پسند دی نوکری، ایتھوں تک کہ اپنا گھر  وی چھڈ دیندے نیں۔ بوہت سارے بھین بھراواں نے فیصلہ کیتا اے کہ اوہ کجھ وقت لئی شادی نئیں کرن گے یاں فیر بچے پیدا نئیں کرن گے۔ کجھ نے ایہو جہے علاقیاں چ جا کے خدمت کرن دا فیصلہ کیتا اے جتھے زیادہ مبشراں دی لوڑ اے، فیر بھانویں ایہدے لئی اوہناں نُوں اپنے گھر والیاں یاں دوستاں توں دُور ای کیوں نہ رہنا پووے۔ اوہ بھین بھرا ایہہ قربانیاں ایس لئی دیندے نیں تاکہ اوہ بہترین طریقے نال یہوواہ دی خدمت کر سکن۔ ایس گل دا یقین رکھو کہ تُسی یہوواہ دی خدمت کرن لئی بھانویں کوئی وڈی قربانی دیندے او یاں چھوٹی، یہوواہ ایہدی بوہت قدر کردا اے۔—‏عبرانیوں 6:‏10‏۔‏

دُوجیاں توں وکھرا نظر آن توں نہ ڈرو

7.‏ اِک نذیر نُوں یہوواہ نال کیتے اپنے وعدے نُوں نبھان لئی کیہڑی مشکل دا سامنا کرنا پیندا ہوئے گا؟ (‏گنتی 6:‏5‏)‏ (‏تصویر نُوں وی ویکھو۔)‏

⁷ گنتی 6:‏5 نُوں پڑھو۔‏ نذیراں دے وعدے چ ایہہ وی شامل سی کہ اوہ اپنے وال نئیں کٹان گے۔ اِنج اوہ ثابت کردے سن کہ اوہ پوری طرحاں یہوواہ دے فرمانبردار نیں۔ جے کسے اِسرائیلی نُوں نذیر بنے کافی عرصہ ہو جاندا سی تے اوہدے وال اینے لمے ہو جاندے سن کہ دُوجیاں نُوں اسانی نال پتہ چل جاندا سی کہ اوہ نذیر اے۔ جے اوہدے آلے دَوالے دے لوک اوہدے ایس فیصلے دا احترام کردے سن تے اپنے وعدے تے قائم رہن چ اوہدا ساتھ دیندے سن تے اوہدے لئی دُوجیاں توں فرق نظر آنا مشکل نئیں ہوندا سی۔ پر افسوس دی گل اے کہ کئی ایہو جہے دَور آئے جنہاں چ نذیراں دی عزت نئیں کیتی جاندی سی تے لوک اوہناں دی حمایت نئیں کردے سن۔ عاموس نبی دے زمانے چ یہوواہ توں باغی ہو جان والے کجھ اِسرائیلی، نذیراں نُوں مے پیاندے رہے تاکہ اوہ اپنے ایس وعدے نُوں توڑ دین کہ اوہ مے توں دُور رہن گے۔ (‏عاموس 2:‏12‏)‏ کدی کدار نذیراں نُوں اپنے وعدے تے قائم رہن تے دُوجیاں توں وَکھرا نظر آن لئی بڑی دلیری دی لوڑ ہوندی سی۔‏

8.‏ بینجمن دے تجربے توں تواڈا حوصلہ کیویں ودھیا اے؟‏

⁸ یہوواہ دی مدد نال اَسی وی دلیری نال دُوجیاں توں فرق نظر آ سکنے آں، فیر بھانویں اَسی شرمیلے ہوئیے یاں بڑی چھیتی ڈر جائیے۔ ذرا اِک دس سال دے یہوواہ دے گواہ دے تجربے تے غور کرو جیہڑا ناروے چ رہندا اے۔ اوہدا ناں بینجمن اے۔ یوکرین چ ہون والی جنگ دی وجہ توں اوہدے سکول نے اوتھے رہن والے لوکاں دی حمایت چ اِک پروگرام کیتا۔ بچیاں نُوں کہیا گیا کہ اوہ یوکرین دے جھنڈے دے رنگ والے کپڑے پا کے گانا گان۔ بینجمن نے سوچیا کہ اوہ اوس پروگرام چ حصہ نئیں لَوے گا۔ ایس لئی اوہ اوس جگہ توں دُور جا کے کھلو گیا جتھے ایہہ پروگرام ہو رہیا سی۔ پر بینجمن دی اِک ٹیچر نے اوہنوں ویکھ لیا تے اُچی آواز چ اوہنوں کہیا:‏ ”‏بینجمن فوراً ایتھے آ تے ایس پروگرام چ حصہ لے۔ اَسی تیرا اِنتظار کر رہے آں۔“‏ بینجمن بڑی دلیری نال اپنی ٹیچر کول گیا تے اوہنوں کہیا:‏ ”‏مَیں کسے دی طرف‌داری نئیں کردا ایس لئی مَیں ایس سیاسی پروگرام چ حصہ نئیں لواں گا۔ تے یہوواہ دے بوہت سارے گواہ جنگ چ حصہ نہ لین دی وجہ توں جیل چ نیں۔“‏ بینجمن دی ٹیچر نے اوہدی گل سنی تے اوہنوں کہیا کہ جے اوہ ایس پروگرام چ حصہ نئیں  لینا چاہندا تے کوئی گل نئیں۔ پر اوہدی کلاس دے بچے اوہنوں پچھن لگ پئے کہ اوہنے ایس پروگرام چ حصہ کیوں نئیں لیا۔ بینجمن ایناں زیادہ گھبرا گیا کہ اوہ رون ای والا سی۔ پر فیر وی اوہنے بڑی دلیری نال پوری کلاس نُوں اوہی گل دَسی جیہڑی اوہنے اپنی ٹیچر نُوں دَسی سی۔ بعد چوں اوہنے اپنے امی‌ابو نُوں دَسیا کہ اوہنوں اِنج محسوس ہویا جیویں یہوواہ اوہدی مدد کر رہیا اے تاکہ اوہ دُوجیاں نُوں اپنے ایمان بارے دَس سکے۔‏

9.‏ اَسی یہوواہ دا دل کیویں خوش کر سکنے آں؟‏

⁹ اَسی یہوواہ دی مرضی تے چلن دا فیصلہ کیتا اے ایس لئی اَسی دُوجے لوکاں توں وَکھرے نظر آنے آں۔ سانوں اپنے سکول یاں کم دی جگہ تے ایہہ دَسن لئی دلیری دی لوڑ ہوندی اے کہ اَسی یہوواہ دے گواہ آں۔ تے جیویں جیویں ایس دُنیا دے لوکاں دی سوچ تے چال‌چلن بھیڑا ہوندا جا رہیا اے، اونویں اونویں شاید سانوں بائبل دے اصولاں مطابق زندگی گزارنا تے دُوجیاں نُوں خوش‌خبری دا پیغام سنانا زیادہ مشکل لگے۔ (‏2-‏تیمُتھیُس 1:‏8؛‏ 3:‏13‏)‏ پر ہمیشاں یاد رکھو کہ جدوں اَسی دُنیا دے لوکاں توں فرق نظر آن توں نئیں گھبراندے تے اَسی یہوواہ دے دل نُوں خوش کرنے آں۔—‏اَمثال 27:‏11؛‏ ملاکی 3:‏18‏۔‏

یہوواہ نُوں اپنی زندگی چ سب توں زیادہ اہمیت دَوو

10.‏ گنتی 6:‏6، 7 چ لکھے حکم نُوں مننا نذیراں لئی مشکل کیوں سی؟‏

¹⁰ گنتی 6:‏6، 7 نُوں پڑھو۔‏ نذیر کسے لاش دے نیڑے نئیں جا سکدے سن۔ شاید سانوں لگے کہ ایہہ کوئی وڈی قربانی نئیں اے۔ پر جے کسے نذیر دا قریبی رشتے‌دار فوت ہو جاندا سی تے ذرا سوچو کہ اوہدے لئی ایس حکم نُوں مننا کِنّاں مشکل ہوندا ہوئے گا۔ اوس زمانے چ وی کفن دفن دی رویت دے مطابق اِک لاش دے نیڑے جانا ای پیندا سی۔ (‏یوحنا 19:‏39، 40؛‏ اعمال 9:‏36-‏40‏)‏ پر اِک نذیر خدا نال کیتے اپنے وعدے نُوں نبھان لئی اِنج نئیں کر سکدا سی۔ جے اوہدا کوئی بوہت قریبی رشتے‌دار وی فوت ہو جاندا سی تے اوہ اپنے وعدے تے قائم رہن نال ثابت کردا سی کہ اوہدا ایمان بڑا مضبوط اے۔ یقیناً یہوواہ اپنے ایہناں بندیاں نُوں ہمت دیندا سی تاکہ اوہ ایہو جہیاں مشکلاں دا سامنا کر سکن۔‏

11.‏ اِک مسیحی نُوں اپنے گھر دے معاملیاں بارے فیصلے کردے ویلے کیہہ کرنا چاہی دا اے؟ (‏تصویر نُوں وی ویکھو۔)‏

¹¹ مسیحیاں دے طور تے اَسی یہوواہ نال کیتے اپنے وعدے نُوں بوہت اہم خیال کرنے آں۔ ساڈے ایس وعدے دا اثر ایس گل تے ہوندا اے کہ اَسی اپنے گھر دے معاملیاں بارے کیہو جہے فیصلے کرنے آں۔ اَسی اپنے گھر والیاں دِیاں لوڑاں پوریاں کرن لئی بڑی محنت کرنے آں پر اَسی کدی وی اوہناں دِیاں خواہشاں نُوں یہوواہ دی مرضی توں زیادہ اہمیت نئیں دیندے۔ (‏متی 10:‏35-‏37؛‏ 1-‏تیمُتھیُس 5:‏8‏)‏ کدی کدار یہوواہ نُوں خوش کرن لئی سانوں ایہو جہے فیصلے کرنے پیندے نیں جدی وجہ توں شاید ساڈے رشتے‌دار ساڈے توں ناراض ہو جان۔‏

12.‏ بھرا الیگزینڈرو نے اپنے گھر چ اِک مشکل صورتحال دا سامنا کردے ویلے کیہہ کیتا تے کیہہ نئیں کیتا؟‏

¹² ذرا غور کرو کہ بھرا الیگزینڈرو تے اوہدی بیوی ڈورینا نال کیہہ ہویا۔ اوہناں دونواں نے اِک سال تک بائبل کورس کیتا۔ فیر ڈورینا نے بائبل کورس کرنا چھڈ دِتا تے اوہ چاہندی سی کہ الیگزینڈرو وی بائبل کورس کرنا چھڈ دَوے۔ بھرا الیگزینڈرو نے بڑے پیار تے سمجھ‌داری نال اپنی بیوی نُوں دَسیا کہ اوہ بائبل کورس کردا رہوے گا۔ ڈورینا نُوں اوہدی ایہہ گل پسند نئیں آئی۔ ایس لئی اوہ اوہدے تے بائبل کورس نُوں چھڈن لئی دباؤ پان لگ پئی۔ بھرا الیگزینڈرو نے کہیا کہ اوہ ایہہ گل سمجھدا سی کہ اوہدی بیوی دا رویہ ایہو جیہا کیوں اے پر اوہدے لئی ایہہ برداشت کرنا اسان نئیں سی۔ کدی کدار جدوں ڈورینا اوہنوں گلاں سُناندی سی تے اوہدے نال بڑے بھیڑے طریقے نال گل کردی سی تے بھرا بائبل کورس نُوں چھڈن بارے سوچن لگ پیندا سی۔ پر بھرا الیگزینڈرو یہوواہ نُوں اپنی زندگی چ سب توں زیادہ اہمیت دیندا رہیا تے ایہدے نال نال اپنی بیوی لئی عزت تے محبت وی وکھاندا رہیا۔ بھرا الیگزینڈرو دی اچھی مثال دا ایہہ نتیجہ نکلیا کہ ڈورینا نے دُبارہ توں بائبل کورس کرنا شروع کر دِتا تے بپتسمہ لے لیا۔ ویب‌سائٹ jw.org تے سلسلہ وار ویڈیوز ‏”‏خدا دے کلام دی سچائی زندگی بدل دی اے“‏ چ ایہہ ویڈیو ویکھو:‏ ‏”‏الیگزینڈرو تے ڈورینا وکار:‏ محبت صبر کردی اے تے مہربان اے‏“‏

13.‏ اَسی یہوواہ تے اپنے گھر والیاں لئی محبت کیویں وکھا سکنے آں؟‏

¹³ یہوواہ نے خاندان دا بندوبست بنایا اے تے اوہ چاہندا اے کہ خاندان خوش رہن۔ (‏اِفِسیوں 3:‏14، 15)‏ جے اَسی واقعی خوش رہنا چاہنے آں تے سانوں اوہ کرنا چاہی دا اے جو یہوواہ چاہندا اے۔ ایس گل دا یقین رکھو کہ جدوں تُسی اپنے گھر والیاں دِیاں ضرورتاں نُوں پورا کرن تے اوہناں لئی محبت تے عزت وکھان دے نال نال یہوواہ دی عبادت لئی قربانیاں دیندے او تے اوہ اوہناں دی بڑی قدر کردا اے۔—‏رومیوں 12:‏10‏۔‏

نذیراں دی مثال تے عمل کرن چ اِک دُوجے دی مدد کرو

14.‏ سانوں خاص طور تے کنہاں دا حوصلہ ودھانا چاہی دا اے؟‏

¹⁴ جیہڑے لوک یہوواہ دی عبادت کردے نیں، اوہناں نُوں اوہدے نال محبت کرن دی وجہ توں قربانیاں دین لئی تیار ہونا چاہی دا اے۔ پر کدی کدار اِنج کرنا مشکل ہو سکدا اے۔ اَسی قربانی دا جذبہ ظاہر کرن چ اِک دُوجے دی مدد کیویں کر سکنے آں؟ اَسی اپنیاں گلاں توں اِک دُوجے دا حوصلہ ودھا سکنے آں۔ (‏ایوب 16:‏5‏)‏ کیہہ تواڈی کلیسیا چ ایہو جہے بھین بھرا ہے نیں جیہڑے ہور ودھ چڑھ کے یہوواہ دی خدمت کرن لئی اپنی زندگی نُوں سادہ بنان دی کوشش کر رہے نیں؟ کیہہ تُسی ایہو جہے بچیاں نُوں جان‌دے او جیہڑے اوس ویلے وی اپنے سکول چ دُوجیاں توں وَکھرے نظر آن توں نئیں گھبراندے جدوں اوہناں لئی اِنج کرنا مشکل ہوندا اے؟ کیہہ تواڈی کلیسیا چ کجھ ایہو جہے بھین بھرا یاں بائبل کورس کرن والے لوک ہے نیں جنہاں نُوں اپنے گھر والیاں دی مخالفت دی وجہ توں یہوواہ دا وفادار رہن لئی بڑی کوشش کرنی پیندی اے؟ آؤ اَسی ہر موقعے توں فائدہ  چُکیے تے اپنے بھین بھراواں دا حوصلہ ودھائیے تے اوہناں نُوں دَسیئے کہ اَسی اوہناں دے قربانی دے جذبے تے دلیری دی بڑی قدر کرنے آں۔—‏فِلیمون 4، 5،‏ 7‏۔‏

15.‏ کجھ بھین بھراواں نے اپنے اوہناں ہم‌ایماناں دی مدد کیویں کیتی اے جیہڑے کُل وقتی طور تے یہوواہ دی خدمت کر رہے نیں؟‏

¹⁵ کدی کدار اَسی اپنے اوہناں ہم‌ایماناں دی مدد کر سکنے آں جیہڑے کُل وقتی طور تے یہوواہ دی خدمت کر رہے نیں۔ (‏اَمثال 19:‏17؛‏ عبرانیوں 13:‏16‏)‏ سری‌لنکا چ رہن والی اِک وڈیری بھین وی اِنج کرن دی دلی خواہش رکھدی سی۔ جدوں اوہدی پینشن ودھ گئی تے اوہنے سوچیا کہ اوہ دو نوجوان پہل‌کار بھیناں دی مدد کرے گی تاکہ اوہ بھیناں پیسے دھیلے دی تنگی دے باوجود وی اپنی خدمت نُوں جاری رکھ سکن۔ ایس لئی اوس وڈیری بھین نے سوچیا کہ اوہ ہر مہینے اوہناں نُوں کجھ پیسے دَوے گی تاکہ اوہ اپنے فون دا بل بھر سکن۔اوس بھین دا جذبہ کِنّاں زبردست اے۔‏

16.‏ اَسی نذیراں توں کیہہ سکھ سکنے آں؟‏

¹⁶ اَسی نذیراں دی مثال توں بوہت کجھ سکھ سکنے آں۔ پر اَسی اوہناں بارے جیہڑیاں گلاں تے غور کیتا اے، اوہناں توں سانوں اپنے اسمانی باپ یہوواہ بارے وی کجھ پتہ چلدا اے۔ مثال لئی یہوواہ نُوں بھروسا اے کہ اَسی اوہنوں خوش کرنا چاہنے آں نالے اَسی اپنی زندگی اوہدے ناں کرن دا جیہڑا وعدہ کیتا اے، اوہنوں نبھان لئی اَسی کوئی وی قربانی دین لئی تیار آں۔ یہوواہ نے سانوں ایہہ موقع دِتا اے کہ اَسی اوہدے لئی محبت وکھان دا فیصلہ کر سکنے آں۔ اِنج کرن نال اوہنے سانوں بڑی عزت دِتی اے۔ (‏اَمثال 23:‏15، 16؛‏ مرقس 10:‏28-‏30؛‏ 1-‏یوحنا 4:‏19‏)‏ نذیراں دی مثال تے غور کر کے ایہہ وی پتہ چلدا اے کہ اَسی یہوواہ دی عبادت کرن لئی جیہڑیاں قربانیاں دینے آں، یہوواہ اوہناں نُوں ویکھدا اے تے اوہناں دی بڑی قدر کردا اے۔ آؤ ایہہ عزم کرئیے کہ اَسی دل‌وجان نال یہوواہ دی خدمت کردے رہواں گے۔‏