KUYUUJI 7
WAAÑI 51 Estamos dedicados a Dios
Tyi tan̈kejaytyaʼmpa jeʼm nazareos iakwiñkejoʼoyi
«Juʼtsan̈am jaʼyba jeʼm inazareato, jeʼ santo para Jehová» (NÚM. 6:8).
AN̈KEJAYOʼOYI
Juutypɨk tayooxpaʼttaʼmpa jeʼm nazareos iakwiñkejoʼoyi iga odoy takɨɨn̈taʼmiñ y tan̈wattaʼmiñ sacrificios iga tan̈kuyooxataʼmpa Jehová.
1. ¿Tyi iwatneyaj jeʼm Jehová iyooxakɨʼɨwiñyaj dende wiñɨgam?
¿PƗƗMI iñtyoyba Jehová? ¡Agui wɨɨ! Y dyaʼ numaaj mimich. Dende wiñɨgam, jaʼyan̈yaj jeempɨktyim iwatneyaj (Sal. 104:33, 34). Jaʼyan̈yaj iwatneyaj sacrificios iga ikuyooxayajpa Jehová, juʼuts akwiñkejoʼoyi jeʼm nazareos jaʼywɨʼɨp ityiyaj en Israel. Pero, ¿iapaʼapyaj, y tyi tan̈kejaytyaʼmpa jeʼm iakwiñkejoʼoyi?
2. a) ¿Iapaʼapyaj idyɨk jeʼm nazareos? (Números 6:1, 2). b) ¿Tyiʼiga weeñi israelitas tsɨʼyyajpa idyɨk juʼuts nazareos?
2 Jeʼm an̈maatyi nazareo miñba de jeʼm an̈matyiimɨ hebreo y nɨmtoʼoba iga algun i «kupin̈neta», «natsɨʼyñeta» o «kɨan̈kotneta» iga iwadyiñ tuum yooxakuy. Yɨʼpyaj an̈matyiyaj iwɨan̈matpa iga yɨʼpyaj israelitajyaj iwatyajpa idyɨk sacrificios iga ikuyooxayajpa Jehová de tuum manera especial. Jeʼm Moisés In̈kiʼmayoʼoyi iaʼmchiʼiba idyɨk iga tuum pɨɨxiñ o tuum yoomoʼ ijɨykamaʼyiñ Jehová iga itypa juʼuts nazareo a por tuum tiempo (maayɨʼ Números 6:1, 2). b Jempɨk iwatpa yɨʼp voto, ikupɨguiñ idyɨk weeñi an̈kiʼmayoʼoyiyaj iga jeʼm tun̈gak israelitajyaj dyaʼ nasuntaap idyɨk iga ikupɨkyajiñ. ¿Y tyiʼiga algun i tsɨʼyba idyɨk juʼuts nazareo? Iga ityoyba Jehová y ichoowaixpa jeʼm kumaykedoʼoyiyaj chiʼiñetawɨʼɨp (Deut. 6:5; 16:17).
3. Juʼutstyim jeʼm nazareos, ¿tyi tan̈wattamtoʼoba?
3 Jesɨgam kuyaj jeʼm Moisés In̈kiʼmayoʼoyi y tsukum jeʼm «Jesucristo iŋquímayooyi» jeʼm Dios iyooxakɨʼɨwiñyaj dyam wɨap idyɨk ichɨʼyyaj juʼuts nazareos (Gál. 6:2; Rom. 10:4). Juʼutstyim jeʼm nazareos, taɨchtyam tan̈kuyooxatamtoʼobatyim Jehová kun ityumpɨy tananmaj, tammɨjtaay, tanjɨɨxi y tampɨɨmi (Mar. 12:30). Y jeempɨgam tan̈watpa jesɨk tanjɨykamaʼyba Jehová iga tan̈kɨan̈kodaʼyba tañityi. Iga wɨaiñ tanakkupak jempɨk tanjɨykamayñeʼ, tan̈wadyiñ jempɨk jeʼ tanɨʼmaʼyba y tan̈wadyiñ sacrificios. Tan̈kɨʼpin̈taʼmpa juutypɨk jeʼm nazareos ikkupakyaj ivoto y juutypɨk tayooxpaʼttaʼmpa jeʼm iakwiñkejoʼoyi (Mat. 16:24). c
TAN̈WATTAʼMIÑ SACRIFICIOS
4. Juʼuts nɨmpa Números 6:3, 4, ¿juʼp sacrificio iwatyajiñ idyɨk jeʼm nazareos?
4 (Maayɨʼ Números 6:3, 4). d Jeʼm nazareos dyaʼ wɨap idyɨk iukyaj alcohol y dyatyim wɨap idyɨk ikɨʼɨsyaj uvas ni jeʼm uvas tɨtsnewɨʼɨp. Weeñi israelitajyaj wɨap idyɨk ikɨʼɨsyaj yɨʼpyaj tɨmyaj y iukyaj vino, y yɨʼpyaj dyaʼ malo. Jeʼm Biblia nɨmpa iga jeʼm vino «imaymaywatpa jeʼm pɨɨxiñ ianmaj» y jeʼ tuum xaaja iga tachiʼiñetaʼm Dios (Sal. 104:14, 15). Pero jeʼm nazareos ijɨɨximɨ ichakyaj ityumpɨy yɨʼp. e
¿Tan̈wattoʼobatyim sacrificios juʼuts iwatyaj jeʼm nazareos? (Aʼmɨ jeʼm párrafojyaj 4 a 6).
5. ¿Tyityam iwatyaj Madián y Marcela, y tyiʼiga?
5 Juʼutstyim jeʼm nazareos, taɨchtyam tan̈wattaʼmpatyim sacrificios iga majnam tan̈wɨkuyooxataʼmiñ Jehová. Tanaʼmiñ jeʼm Madián y Marcela iakwiñkejoʼoyi. Yɨʼp an̈komɨʼɨyi iga ity Colombia wɨityyaj idyɨk. Madián ikooñwɨʼyba idyɨk jaʼyan̈ tumiñ, y iniityyaj idyɨk tuum wɨbɨk tɨk. Pero majnam ikuyooxayajtoʼoba idyɨk Jehová, jeʼyukmɨ ikukakyaj iityi. Jeʼeyaj nɨmyajpa: «Dyam jaʼytyam agastojwattaʼm, nɨk aityityam en tuum apartamento maaj xutyupɨk y ammaʼyaytyaʼm jeʼm carro». Dyaʼ i ipɨʼɨmɨyyaj iga iwatyajiñ yɨʼɨmpɨk; iwatyaj iga majnam putyajtoʼoba idyɨk jeʼm an̈matkuyjom. Tsaam maymayyaj iga ipɨkyaj yɨkxpɨk jɨɨxi.
6. ¿Tyiʼiga tan̈wattaʼmpa sacrificios? (Aʼmɨtyim jeʼm imagen).
6 Iga majnam tan̈wɨkuyooxataʼmiñ Jehová tsaam tan̈kusuʼnɨytyaʼmpa tan̈wattaʼm sacrificios (1 Cor. 9:3-6). Jeʼ dyaʼ tapɨʼɨmɨʼyba iga tan̈wadyiñ yɨʼɨmpɨk y dyaʼ malo tyityam tantsakneyaj. Juʼuts akwiñkejoʼoyi, weeñi tɨwɨtam ichakneyaj ityɨk, tuum wɨbɨk yooxakuy o iga iniityyajpa tuum mascota. Weeñiyaj ipɨkneyaj ijɨɨxi iga dyanam an̈koʼmɨyyajpa o dyanam iniityyajpa imanɨktam okmɨ iga an̈koʼmɨyyajpa. Tun̈gakyaj yooxpadoyyajpa jeʼm an̈matkuyjom tun̈gak an̈eymɨ mex iga ichakyaj ifamilia y jeʼm iamigojyaj. Jaʼyan̈ de taɨchtyam tampɨknetaʼm yɨkxpɨk jɨɨxi iga majnam tan̈kuyooxataʼmpa Jehová. Tanjoodon̈tam iga jeʼ tsaam ichoowaixpa juʼptyin̈kej sacrificio tan̈watpaʼap (Heb. 6:10).
ODOY TAKƗʼƗN̈IÑ MEX IGA DYAʼ TAJEEX JUʼUTS TUN̈GAKYAJ
7. ¿Tyiʼiga a veces tan̈kaʼ idyɨk ikkupak ivoto tuum nazareo? (Números 6:5; aʼmɨtyim jeʼm imagen).
7 (Maayɨʼ Números 6:5). f Jeʼm nazareos odoy in̈tɨʼksyajiñ idyɨk iway. Jeempɨgam ikwiñkejyajpa idyɨk iga iniidyayyaj respeto Jehová. Siiga jaʼyan̈ tiempo tuum israelita itypa juʼuts nazareo, tsaam yoʼnba iway y tun̈gakyaj jobity ikutɨʼɨyɨyyajpa idyɨk iga nazareo. Jesɨk akwiñkejayyajtaap idyɨk respeto y ianmajan̈chiʼiyajtaap, maaj dyaʼ tan̈kaʼ para jeʼeyaj. Pero dyaʼ juchixkej akwiñkejayyajta respeto. Juʼuts akwiñkejoʼoyi, jesɨgam jaʼy ityi jeʼm profeta Amós, jeʼm israelitas apóstatas igukyajpa idyɨk vino iga odoy ikkupakyajiñ ivoto (Amós 2:12). A veces tan̈kaʼ idyɨk ikwiñkejyaj iga dyaʼ jeexyaj juʼuts tun̈gakyaj, jeʼyukmɨ nasuntaap idyɨk iga odoy kɨɨn̈yajiñ.
Jeʼm nazareos odoy kɨɨn̈yajiñ idyɨk ikwiñkejyaj iga dyaʼ jeexyaj juʼuts tun̈gakyaj. (Aʼmɨ jeʼm párrafo 7).
8. ¿Juutypɨk mianmajan̈chiʼiba jeʼm Benjamin iakwiñkejoʼoyi?
8 Kun jeʼm Jehová iyooxpadoʼoyi, taɨchtyam wɨaptyim tanakwiñkejtaʼm iga dyaʼ tajeextyam juʼuts tun̈gakyaj. Tanaʼmiñ jempɨk iñaskaʼ Benjamin, tuum Testigo de Noruega iga iniity 10 iamtyɨy. Iga ity jeʼm guerra en Ucrania, juuty kuyujpa watta tuum ceremonia ikwiñkejpaʼap iga sɨʼ ikuyaʼgɨyyaj Ucrania. Jeʼm tsɨxtyam napuʼktugɨyyajtaiñ idyɨk juʼutsam icolor jeʼm bandera de Ucrania y wanyajiñ. Iga Benjamin odoy tɨgɨykuʼmiñ kun jempɨk wattaap, ijɨɨs iga tsɨʼyba juʼumjom. Pero tuum maestra iix y iñɨʼmay: «¡Miiñɨʼ yɨʼɨm! ¡Jikskɨy, sɨʼ manan̈joʼktaʼm!». Jeʼ dyaʼ kɨɨn̈ y iñɨʼmay imaestra: «Ɨch dyaʼ an̈watpa jempɨk tɨgɨykuʼmpa kun jeʼm política. Y jeʼm Jehová itestigojyaj jaʼyan̈ pajneyajta iga dyaʼ tɨgɨykuʼmyajpa en jeʼm guerra». Jeʼm maestra ikumaton̈ y dyam tyi iñɨʼmay. Pero jempɨk iwaganakuyujyajpa moj ikwaʼkyaj tyiʼiga dyaʼ wan. Benjamin tsaam an̈jeʼk y wejtɨʼp. Pero jeempɨktyim iñɨʼmay juʼuts in̈madayñeʼ idyɨk jeʼm maestra. Maaj okmɨ in̈maday ijaatun̈yaj iga Jehová iyooxpaʼt iga ikupujiñ ife.
9. ¿Juutypɨk tammaymaywatpa Jehová?
9 Jesɨk tan̈kupɨkpa Jehová, tun̈gakyaj iixyajpa iga dyaʼ tajeextyam juʼuts jeʼeyaj. Juuty tayooxaap o jeʼm escuela, odoy takɨʼɨn̈iñ tanan̈mat iga tan̈kuyooxaap Jehová. Yɨʼp jaama jaʼyan̈yaj majtyim imalwatyajpa, y maaj tan̈kaʼap tan̈kupɨk jeʼm jɨɨxian̈chioʼoyiyaj itywɨʼɨp Bibliajom y tanan̈mat jeʼm wɨtampɨk an̈matyiyaj (2 Tim. 1:8; 3:13). Pero tanjɨɨskupakneiñ iga tammaymaywatpa Jehová jesɨk dyaʼ takɨɨn̈ba tanakwiñkej iga dyaʼ tajeex juʼuts jempɨk dyaʼ ikuyooxayajpa (Prov. 27:11; Mal. 3:18).
MAAJ TANTEGUEDAIÑ TAN̈KUYOOXA JEHOVÁ
10. ¿Tyiʼiga tan̈kaʼ idyɨk para jeʼm nazareos ikupɨkyaj jeʼm an̈kiʼmayoʼoyi itywɨʼɨp en Números 6:6, 7?
10 (Maayɨʼ Números 6:6, 7). g Jeʼm nazareos odoy ikunuʼkyajiñ idyɨk tuum kaʼiʼ. Wɨap tanjɨɨs iga yɨʼp dyaʼ jeʼ tuum mɨjpɨk sacrificio. Pero, para tuum nazareo tan̈kaʼ idyɨk siiga jempɨk kaʼaba jeʼ tuum ifamiliar. ¿Tyiʼiga? Iga juutypɨk kumyajtaap idyɨk peʼm tiempo, nasuntaap iga ikunuʼkyajiñ jeʼm kaʼiʼ (Juan 19:39, 40; Hech. 9:36-40). Pero jeʼm nazareos dyaʼ wɨap idyɨk iwatyaj yɨʼɨmpɨk. Jesɨk ikkupakyajpa idyɨk jeʼm ivoto mex iga tan̈kaʼ, ikwiñkejyajpa iga iniityyaj tuum kamampɨk fe. Pero dyaʼ idyɨk ityyaj ikutyum; Jehová juchixkej iyooxpaʼtyaj.
11. ¿Tyi tan̈wadyiñ jesɨk tampɨkpa jɨɨxiyaj iga tɨgɨykuʼmpa kun jeʼm tanfamilia? (Aʼmɨtyim jeʼm imagen).
11 Juʼuts tacristianojtam tan̈kɨan̈kodayñetaʼm tañityi Jehová y tsaam tanteguettaʼm tanakkupaktaʼm. Tanakwiñkejpa kun jeʼm jɨɨxiyaj tampɨkpaʼap y tyityam tɨgɨykuʼmpa kun tanfamilia. Tanteguedaap juʼtspɨyam tawɨap iga tan̈kuixpa tanfamilia, ni keman tantsakpa iga tan̈watpa juʼuts Jehová ixunba mex iga jeʼm tanfamiliar ixunyajpa tun̈gak cosa (Mat. 10:35-37; 1 Tim. 5:8). Iga tan̈kupɨkpa Jehová a veces wɨapsɨ iga jeʼm tanfamiliaryaj dyam tawɨnanɨgayyajpa.
¿Juchixkej tan̈kupɨkpa Jehová mex iga tanan̈an̈kamokpa kutɨʼɨchiyaj? (Aʼmɨ jeʼm párrafo 11). h
12. ¿Tyi iwat Alexandru jesɨk in̈an̈kamok tuum kutɨʼɨchi y tyi dyaʼ iwat?
12 Tanaʼmtaʼmiñ jempɨk iñaskaʼ Alexandru y Dorina. Jesɨk nɨki idyɨk tuum amtyɨy iga sɨʼ ikuyujkayaj jeʼm Biblia, Dorina ichak iga kuyujpa y ixunba idyɨk iga Alexandru ichaguiñtyim. Pero jeʼ iñuumnɨʼmay iga seguido kuyujpa. Dorina dyaʼ ikusuʼnɨy y ipɨʼɨmɨy iga odom maaj kuyujiñ. Alexandru tan̈kaʼa mu ikutɨʼɨyɨy tyiʼiga ipɨk yɨʼp jɨɨxi. Y jesɨk Dorina ikujɨyba y iyaʼachwatpa idyɨk, ijɨɨstɨʼp iga dyam maaj kuyujpa. Pero maaj ityegueda iga ikupɨkpa Jehová y seguido ikwiñkejay toyoʼoyi y respeto jeʼm iyoomoʼ. Iga iyaʼachɨy iyooxpaʼt jeʼm iyoomoʼ iga maaj okmɨ eybɨk mojiñ ikuyujkaʼ jeʼm Biblia y ikuyooxaiñ Jehová. (Aʼmɨ jeʼm video Alexandru y Dorina Văcar: «Jém tóyoypáppɨc iyaachɨ́ypa siiga malwadayt́a̱p», jeʼm jaakaʼ juuty nɨmpa «Jeʼm Dios In̈maatyi ikakpa jeʼm pɨxiñtyam iityi», en jw.org).
13. ¿Juutypɨk tanakwiñkejpa iga tantoyba Jehová y tanfamilia?
13 Jehová iwat jeʼm familia y ixunba iga maymayayajiñ (Efes. 3:14, 15). Siiga tamaymayatoʼoba tan̈wadyiñ jempɨk Jehová ikusuʼnɨʼyba. Jeʼ iaʼmpa y ichoowaixpa jeʼm sacrificios tan̈watpaʼap iga tan̈kuyooxaap y dyaʼ tantsakpa iga tan̈kuixpa tanfamilia y tanakwiñkejayyajpa toyoʼoyi y respeto (Rom. 12:10).
TANAANMAJAN̈CHIʼITYAMTAIÑ IGA TAN̈WATKIʼPSTAʼMIÑ JEʼM NAZAREOS
14. ¿Ityam tananmajan̈chiʼiyajiñ?
14 Tantumpɨytyam jempɨk tan̈kuyooxatamtoʼoba Jehová tan̈wattaʼmiñ sacrificios iga tantoyba. A veces usan̈ tan̈kaʼ. ¿Juutypɨk wɨap tanaanmajan̈chiʼityamta iga tan̈wattaʼmiñ sacrificios por Jehová? Kun tyityam tanɨmpa (Job 16:5). ¿Algun i pɨkneʼ ijɨɨxi jeʼm in̈kumunjom iga majnam ikuyooxatoʼoba Jehová? ¿Iñixpɨkpa tuum traytyipɨxiñ o tuum wooñyoomoʼ iga dyaʼ kɨɨn̈ba ikwiñkej iga dyaʼ jeex juʼuts jempɨk iwaganakuyujyajpa, mex iga tan̈kaʼ? ¿In̈kujɨɨspa tuum tɨɨwɨ o tuum kuyujkɨʼɨwiñ iga jeʼm ifamilia dyaʼ iwɨan̈jaam iga jeʼ ikupɨkpa Jehová? Tananmajan̈chiʼiyajiñ y tannɨʼmayyajiñ iga tantsoowaixpa jeʼm jɨɨxi iniityyajwɨʼɨp y jeʼm sacrificios iga iwatyajpa por Jehová (Filem. 4, 5, 7).
15. ¿Juutypɨk yooxpadoyñeyaj weeñi tɨwɨtam iga tun̈gakyaj seguido kuyooxaoyyajiñ a tiempo completo?
15 A veces wɨap tanyooxpaʼt jeʼm tɨwɨtam iga kuyooxaoyyajpa a tiempo completo (Prov. 19:17; Heb. 13:16). Jeʼam iwat tuum yoomtɨwɨ tsaamipɨgam iga ity Sri Lanka. Iga majtyim jaʼyan̈ chiʼitya ipensión, iyooxpaʼt wɨsteen yoomtɨwɨtam iga tumiñ kuyajneyaj idyɨk iga seguido kuyooxaoyyajiñ juʼuts precursoras. Jeʼyukmɨ tumtum mes iyojpa idyɨk jeʼm teléfono irecibo. ¡Tsaam yooxpadoy yɨʼp yoomtɨwɨ!
16. ¿Tyi tan̈kejaytyaʼmpa jeʼm nazareos iakwiñkejoʼoyi?
16 ¡Jeʼm nazareos iakwiñkejoʼoyi tsaam tayooxpaʼtnetaʼm! Tan̈kejaytyaʼm iga jeʼm tanJaatun̈ sɨn̈yukmɨpɨk Jehová, ijoodon̈ iga tammaymaywattoʼoba kun ityumpɨy tananmaj, tan̈wattoʼoba sacrificios y tanakkupaktoʼoba jempɨk tanjɨykamayñeʼ jesɨk tan̈kɨan̈koday tañityi. Tamaymay iga taaʼmchiʼiba tanakwiñkejay juʼtspɨy tantoyba (Prov. 23:15, 16; Mar. 10:28-30; 1 Juan 4:19). Tan̈kejaytyaʼmpatyim iga Jehová iaʼmpa y ichoowaixpa jeʼm sacrificios tan̈watpaʼap iga tan̈kuyooxaap. Jeʼyukmɨ seguido tan̈kuyooxataʼmiñ kun ityumpɨy tananmaj.
¿TYISƗ IN̈KUTSON̈BA?
-
¿Juutypɨk ikwiñkejyaj jeʼm nazareos iga dyaʼ kɨɨn̈yajpa y iwatyajtoʼoba idyɨk sacrificios?
-
¿Juutypɨk wɨap tanaanmajan̈chiʼityamta iga tan̈watkiʼpstaʼmiñ jeʼm nazareos?
-
¿Tyi tan̈kejaytyaʼmpa de Jehová jeʼm nazareos iakwiñkejoʼoyi?
WAAÑI 124 Siempre fieles y leales
a Mex iga Jehová ikupin̈ba idyɨk weeñi nazareos, jaʼyan̈yaj iyaʼak ipɨkyajpa idyɨk ijɨɨxi iga ikuyooxayajpa yɨʼɨmpɨk (aʼmɨ jeʼm recuadro « Jehová ikupin̈ weeñi nazareos»).
b Números 6:1, 2: Jehová seguido inimuru Moisés. Iñɨʼmay: 2 «Namuruujɨ jeʼm israelitas y nɨʼmayyaajɨ: ‹Siiga tuum pɨɨxiñ o tuum yoomoʼ iwatpa tuum voto especial iga ikuyooxaap Jehová juʼuts nazareo.
c A veces jeʼm totjaayijomyaj kukiʼpsyajtaap jempɨk kuyooxaoyyajpa a tiempo completo kun jeʼm nazareos. Pero yɨʼp kuyujijom tan̈kɨʼpin̈taʼmpa iga ityumpɨy jempɨk ikuyooxayajpa Jehová wɨap iwatkiʼpsyaj jeʼm nazareos.
d Números 6:3, 4: 3 Odoy iuguiñ vino y ityumpɨy jempɨk iniity alcohol. Odoy iuguiñ vinagre de vino ni vinagre iniityyajwɨʼɨp alcohol. Odoy iuguiñ algun tyi watnetawɨʼɨp kun uva y odoy ikɨʼɨxiñ uvas yaguiñpɨk tukneta ni uvas tɨtsnewɨʼɨp. 4 Juʼtsan̈am jaʼyba inazareato, odoy ikɨʼɨxiñ ni tyi watnetawɨʼɨp kun uva ni jeʼm tsuus uva ni jeʼm iñaakaʼ.
e Wɨapsɨ iga jeʼm voto iwatyajpaʼap idyɨk jeʼm nazareos dyaʼ nɨmtoʼoba iga iwatyajpa idyɨk tuum yooxakuy especial.
f Números 6:5: »›Juʼtsan̈am jaʼyba ivoto de nazareato, odoy in̈tɨʼkxiñ iway. Tsɨʼyiñ santo y ichaguiñ iga yoʼñiñ jeʼm iway hasta que kaʼpxiñ jeʼm tiempo iga tsɨʼyñeʼ para Jehová.
g Números 6:6, 7: 6 Odoy ikunuʼguiñ tuum kaʼiʼ iganam tsɨʼyñeʼ para Jehová. 7 Mex siiga kaʼaba ijaatun̈, iaapa, ityɨɨwɨ o iyoomtɨwɨ, jeʼ juchixkej kuaʼyñeiñ, iga jeʼm ikobakyuk iniity jeʼm señal de inazareato para jeʼm iDios.
h JEMPƗK NASPA IXƗʼ EN JEʼM IMAGEN: Iga iwatneʼ jeʼm ivoto, tuum nazareo dyaʼ wɨap ikunuʼk jeʼm ifamiliar kaʼanewɨʼɨp. Jeʼyukmɨ jesɨk nɨkiam ikumta, dende juʼumɨ iaʼmnɨgaʼyba.
