1. ¿Imatá ñaupa tiempomantapacha Jehovaj kamachisnin ruwarqanku?

 ¿JEHOVATA maytachu munakunki? Maytachá munakunki. Jinapis ñaupa tiempomantapacha may chhika runas Jehovata munakullarqankutaj (Sal. 104:33, 34). Ashkhasqa Jehovarayku tukuy imata ruwarqanku, chaykunamanta wakenqa karqanku Israelmanta nazareos. ¿Pikunataj chay nazareos karqanku, chanta imatataj paykunamanta yachakusunman?

2. 1) ¿Pikunataj nazareos karqanku? (Números 6:1, 2). 2) ¿Imaraykutaj wakin israelitas nazareos kayta munaj kanku?

² Nazareo palabraqa hebreopi “ajllasqa”, “jaywasqa”, “tʼaqasqa” niyta munaj palabramanta jamun. Nazareo kanankuta nej israelitasqa, Jehovata sirvinankupaj nej kanku imastachus ruwanankuta, imastachus mana ruwanankutapis, chayrayku chay palabrasqa paykunapaj jinapuni. Moisespa Leyninman jinaqa qharipis warmipis Jehovaman niyta atej kanku nazareo kanankuta uj tiempota (Números 6:1, 2 leey). a Pillapis nazareo kananta nejtenqa, wakin kamachiykunata kasukunan karqa, waj israelitastaj mana chay kamachiykunata kasukunankuchu karqa. ¿Imaraykutaj uj israelita nazareo kayta munaj? Jehovata tukuy sonqo munakusqanraykuchá, ima bendicionestachus qosqanmantataj mayta agradecekusqanraykuchá (Deu. 6:5; 16:17).

3. ¿Imapitaj nazareosman rijchʼakunchej?

³ Moisespa Leyninpa cuentanmanta ‘Cristoj leynin’ rikhurejtin, Diospa kamachisnenqa manaña nazareos kayta aterqankuchu  (Gál. 6:2; Rom. 10:4). Chaywanpis nazareos jinallataj Jehovata sirviyta munanchej tukuy sonqonchejwan, tukuy kausayninchejwan, tukuy yuyayninchejwan, tukuy kallpanchejwantaj (Mar. 12:30). Chaytapunitaj ruwananchejta nerqanchej bautizakunapaj Jehovaman kausayninchejta qopushaspa. Chay nisqanchejman jina kausakunapajtaj, Jehovaj munayninta ruwananchej tiyan, payraykutaj tukuy atisqanchejta ruwananchej tiyan. Kunanqa qhawarisunchej imaynatachus nazareos nisqankuta juntʼasqankuta, chantá imaynatachus paykunaj kausaynin noqanchejtapis yanapawasqanchejta, nisqanchejta juntʼanallanchejpajtaj (Mat. 16:24). b

JEHOVARAYKU TUKUY IMATA RUWANA

4. Números 6:3, 4 nisqanman jina, ¿imastataj nazareos mana ruwanankuchu karqa?

⁴ (Números 6:3, 4 leey). Nazareosqa mana alcoholta tomanankuchu karqa, nitaj uva sachʼaj poqoynintapis mikhunankuchu karqa, ni uvas kʼisatapis. Waj runasqa chay imasta mikhuyta atillaj kanku, mana juchachu kasqanrayku. Chantapis Bibliaqa nin vinoqa Diospa regalon kasqanta, ‘runaj sonqontataj qhallallarichisqanta’ (Sal. 104:14, 15). Jinapis nazareosqa chay imasta mana mikhojchu kanku, nitaj tomajchu kanku, pero tukuy sonqo chayta ruwaj kanku. c

5. ¿Imastataj Madianwan Marcelawan ruwarqanku, chanta imaraykutaj?

⁵ Nazareos jinallataj noqanchejpis tukuy imata ruwanchej Jehovata astawan sirvinapaj. Madianmantawan Marcelamantawan parlarina. d Chay qhariwarmeqa tukuy ima patapi kausakusharqanku, ni imanku faltarqachu. Madianqa ashkhata ganaj, chayrayku may kʼachitu wasipi tiyakorqanku. Chaywanpis paykunaqa Jehovapaj astawan llankʼayta munaspa, kausayninkupi wakin imasta cambianankuta nerqanku. Paykuna ninku: “Manaña ashkha qolqeta gastallajchu kayku, aswan juchʼuy wasiman riporqayku, autoykutapis vendeporqayku”, nispa. Paykunaqa mana chayta ruwanankupunichu karqa, jinapis munarqanku predicanankupaj astawan tiempoyoj kayta. Chayta ruwasqankuraykutaj may kusisqas kashanku, sonqo juntʼasqastaj.

6. ¿Imaraykutaj cristianos Jehovarayku tukuy imata ruwanchej? (Dibujotawan qhawariy).

 ⁶ Cristianosqa Jehovapaj astawan llankʼananchejrayku, tukuy imata ruwayta munanchej (1 Cor. 9:3-6). Jehovataj mana obligawanchejchu chayta ruwanapaj, saqesqanchej imastaj mana sajrapunichu kanku. Por ejemplo wakin hermanosqa Jehovapaj astawan llankʼanankurayku mana uj wasita rantikunkuchu, mana uj sumaj trabajota japʼikunkuchu, chayri mana alqetuyojchu, misisituyojchu, chayri waj uywitasniyojchu kanku. Wakin hermanostaj uj tiempota solteroslla qhepakunku, chayri mana casarakuytawankamachu wawasniyoj kanku. Wakin hermanostaj maypichus predicanapaj yanapa necesitakun chay lugaresman ripunku, familiankumanta, amigosninkumanta karupi kananku kajtinpis. Noqanchejmanta ashkhasqa chay imasta tukuy sonqo ruwanchej, Jehovaman noqanchejmanta aswan sumaj kajta qoyta munasqanchejrayku. Pero kaymanta mana iskayrayanchejchu: Jehovaqa payrayku imastachus ruwasqanchejta may valorniyojpaj qhawan, jatunpis juchʼuypis kachun (Heb. 6:10).

AMA MANCHACHIKUNACHU UJ JINA KAYTA

7. ¿Imaraykutaj uj nazareo nisqanta mana juntʼayta atillajchu? (Números 6:5; dibujotawan qhawariy).

⁷ (Números 6:5 leey). Nazareos kanankuta nisqankurayku, paykunaqa mana chujchankuta kʼutukunankuchu karqa. Chaywan rikucherqanku tukuy ima ruwasqankupi Jehovaj kamachiyninman churakusqankuta. Uj israelita unayta nazareo kananta nejtenqa chujchan jatunta wiñaykoj, chaytataj tukuy reparaj kanku. Wajkuna payta respetajtinku, chay nisqanta juntʼananpajtaj kallpachajtinku, payqa mana pʼenqakojchu uj jina kasqanmanta. Chaywanpis wakin tiempospi israelitasqa mana nazareosta respetajchu kanku, nitaj jatunpajchu qhawaj kanku, chaytaj llakiy karqa. Ajina karqa profeta Amospa tiemponpi. Chay tiempopi Diosta wasanchaj israelitasqa “nazareosman vinota tomachej” kanku, ichapis nisqankuta pʼakichinankupaj (Amós 2:12). Chayrayku wakin kutisqa mana atillajchu kanku uj jina kayta. Chaypajqa mana manchachikoj runas kananku karqa.

8. ¿Imataj Benjaminpa experiencianmanta astawan gustasunki?

⁸ Jehovaj yanapayninwanqa, noqanchejpis mana manchachikusunchu uj jina kayta, manchalis kajtinchejpis. Benjamin sutiyoj hermanitonchejmanta parlarina. Payqa 10 watasniyoj, Noruegapitaj tiyakun. Escuelanpeqa Ucraniapi guerra kashasqanta apoyanankupaj hora civicata ruwarqanku. Chaypeqa wawas uj takiyta takinanku karqa, Ucraniaj banderanpa coloresninwan vistisqas. Benjaminqa chaypi mana participananpaj karitullapi qhepakunanta  nikorqa. Jinapis profesoran rikorqospa karumanta wajyarqa: “Jamuy, usqhayta jamuy, suyashayku”, nispa. Benjaminqa mana manchachikuspa profesoranman qayllaykorqa, nerqataj: “Profesora, noqaqa mana ni pita apoyanichu, politicarayku imata ruwajtinkupis mana chayman chhapukunichu. Chantapis ashkha Jehovaj testigosnin carcelpi kashanku guerraman mana riyta munasqankurayku”, nispa. Profesorantaj payta entienderqa, niñataj ni imata nerqapischu. Chaywanpis compañerosninñataj taporqanku, imaraykuchus paykunawan khuska mana takisqanta. Benjamintaj mayta mancharikuspa waqay ñawilla kasharqa. Jinapis manchikuyninta atipaspa imatachus profesoranman nisqanta, compañerosninmanñataj nerqa. Chaymantataj Benjaminqa tatasninman willarqa imaynatachus Jehová yanapasqanta creeyninmanta sutʼinchananpaj.

9. ¿Imaynatá Jehovaj sonqonta kusichisunman?

⁹ Jehovata kasukojtinchej runasqa reparanku uj jina kasqanchejta. Mana manchachikoj runas kananchej tiyan trabajopi, escuelapipis Jehovaj testigosnin jina rejsichikunapaj. Kay tiempomanta runasqa aswan mana allinman chayashanku, kausayninkupis aswan millay. Chayrayku sapa kuti mana atikullanchu Bibliaj yuyaychaykunasninman jina kausakuy, predicaypis (2 Tim. 1:8; 3:13). Chaywanpis mana manchachikunanchejchu tiyan mana kay mundomanta runas jinachu kayta, chaywanqa Jehovaj sonqonta kusichishanchej. Chaytataj amapuni qonqakunachu (Pro. 27:11; Mal. 3:18).

JEHOVATA KAUSAYNINCHEJPI ÑAUPAJMAN CHURANA

10. ¿Imaraykutaj nazareos mana kasukuyta atillajchu kanku Números 6:6, 7 versiculospi kamachiyta?

¹⁰ (Números 6:6, 7 leey). Nazareosqa mana runa wañusqaman qayllaykunankuchu karqa. Ujta piensarispallaqa, ichapis yuyasunman chayta ruwayqa facillla kasqanta. Chaywanpis uj nazareopajqa mana chayta ruway atikullajchu uj qaylla familian wañupojtin. ¿Imarayku? Chay tiempopi costumbresninkuman jinaqa, pipis wañupojtin cuerpoj ladonpipuni kananku karqa (Juan 19:39, 40; Hech. 9:36-40). Nazareostaj mana chay costumbresta ruwayta atejchu kanku. Chayrayku chay jina llakiypi rikukuspaqa sinchʼi creeyniyoj kasqankuta rikucherqanku. Jinapis mana sapallankuchu kasharqanku, Jehovaqa necesitasqanku kallpata qojpuni.

11. ¿Familianchej munasqantapunichu ruwananchej tiyan? (Dibujotawan qhawariy).

 ¹¹ Cristianosqa Jehová Diosman kausayninchejta qopusqanchejta may jatunpaj qhawanchej. Chaytaj sutʼita reparakun imastachus ajllasqanchejpi, familiapaj ruwanasninchejpipis. Familianchejta mantienenapaj tukuy atisqanchejta ruwanchej. Jinapis Jehovaj munasqantapuni ruwanchej familianchej munasqanta ruwanamantaqa (Mat. 10:35-37; 1 Tim. 5:8). Ichapis wakin kutisqa Jehovata kusichinapaj wakin imasta ruwasunman, chaytaj familianchejta mana kusichinmanchu.

12. ¿Imatataj Alexandru ruwarqa warmin manaña Bibliata estudiananta munajtin?

¹² Alexandrumanta, Dorinamantawan parlarina. Uj watataña Bibliata estudiashajtinku, Dorinaqa manaña estudiayta munarqachu, qosantapis saqechillaytataj munarqa. Alexandruqa mana phiñakuspa, kʼachallamanta nerqa Bibliata siga estudiayta munasqanta. Chaytaj Dorinaman mana gustarqachu, obligaytataj munarqa Bibliata manaña estudiananpaj. Alexandruqa warminta entiendeyta munarqa, pero mana atillarqachu. Wakin kutisqa warmin paymanta mana allinta parlajtin, tukuy imatataj nejtin, Bibliata estudiayta saqepuyta munarqa. Jinapis payqa Jehová Diosta ñaupajllamanpuni churarqa, warminmantaj munakusqanta, respetasqantapis rikuchillarqapuni. Tiempowanqa Alexandruj ruwasqan warmin watejmanta Bibliata estudiayta munananpaj, bautizakunanpaj ima yanaparqa. Jw.org paginapi “Bibliaqa runasta cambianankupaj yanapan” nisqa partepi, Alexandru y Dorina Vacar: “Munakuyniyoj runaqa pacienciayoj, kʼachataj” nisqa videota qhawariy.

13. ¿Imaynatá Jehovaman, familianchejmanpis munakusqanchejta rikuchisunman?

¹³ Familiataqa Jehová rikhuricherqa, munantaj kusisqa kausakunankuta (Efe. 3:14, 15). Cheqamantapuni kusisqa kausakuyta munanchej chayqa, Jehová munasqanman jinapuni ruwananchej tiyan. Jehovaqa payta sirviyta munasqanchejrayku tukuy imata ruwasqanchejta may jatunpaj qhawan. Chaywanpis munan familianchejta cuidanallatapuni, munakuyninchejta, respetasqanchejtapis rikuchinallatapuni (Rom. 12:10).

NAZAREOS JINA KANAPAJ PURAJMANTA KALLPACHANAKUNACHEJ

14. ¿Pikunatá astawan kallpachananchej tiyan?

¹⁴ Tukuy noqanchej Jehovata sirviyta munasqanchejrayku, paytataj munakusqanchejrayku tukuy imata ruwananchej tiyan. Pero wakin kutisqa mana atikullanchu. ¿Imaynatá  purajmanta kallpachanakusunman Jehovarayku tukuy imata ruwanapaj? Parlasqanchejwan (Job 16:5). ¿Congregacionniykipi pillapis kallpachakushanchu pisi imasllawan kausakunanpaj, ajinamanta astawan Jehovata sirvinanpaj? ¿Rejsinkichu pi jovenllatapis, pichus mana atikullajtinpis mana manchachikunchu compañerosninmanta uj jina kayta? ¿Yuyarikunkichu uj hermanomanta chayri Bibliata estudiaj runamanta, pimanchus familian churanakun Jehovata kasukuyta munasqanrayku? Ima ratollapis paykunata kallpacharina, nisunmantaj mana manchachikoj kasqankumanta, Jehovapajpis tukuy atisqankuta ruwashasqankumanta paykunata may jatunpaj qhawasqanchejta (File. 4, 5, 7).

15. Jehovata tiempo juntʼasqata sirvej hermanosta yanaparinankupaj, ¿imatá wakin hermanosninchej ruwanku?

¹⁵ Wakin kutisqa ichapis yanaparisunman tiempo juntʼasqata Jehovapaj llankʼanku chay hermanosta (Pro. 19:17; Heb. 13:16). Chayta ruwarqa Sri Lankapi tiyakoj kuraj hermanita. Paguitonta yapasqankurayku, iskay joven hermanitasta precursoras kanallankupajpuni qolqesitunwan yanapananta nikorqa. Payqa sapa killa qolqesitunta tʼaqaj telefonomanta gastosninkuta pagaysinanpaj. Chay hermanitaj ruwasqanqa may sumajpuni.

16. ¿Imatataj nazareosmanta yachakunchej?

¹⁶ Nazareosmantaqa maytapuni yachakunchej, pero Tatanchej Jehovamantapis mayta yachakullanchejtaj. Payqa yachan sonqomantapachapuni kusichiyta munasqanchejta, yachallantaj kausayninchejta payman qopusqanchejta juntʼanapaj mayta kallpachakusqanchejta. Chantapis payqa saqewanchej mayta munakusqanchejta rikuchinata, chaytaj noqanchejpaj may sumajpuni (Pro. 23:15, 16; Mar. 10:28-30; 1 Juan 4:19). Nazareospa kausayninkupi reparanchej Jehovaqa payta sirvinapaj imastachus ruwasqanchejta qhawamushasqanta, may valorniyojpajtaj qhawasqanta. Chayrayku Jehovata sirvinallapuni, sonqomantapachataj aswan sumaj kajta payman qonallapuni.