1. ¿Imaynam ñawpaqmantapacha Diosta serviq achka runakuna tarikurqaku Diospa amistadnin kaspa?

 ÑAWPAQ tiempomantapacham achkallay-achka runakuna Diospa amistadnin kaspa kusisqa tarikurqaku. Qampas anchatachá munanki Jehova Dioswan hinalla kuyachikuytaqa (Sal. 104:​33, 34). Diosta serviq achka runakunam imapas munasqankuta saqispa Jehova Diospa munasqanta puntata ruwarqaku. Paykunamanta wakinmi Israel runakunapa tiemponpi Diospaq sapaqchasqa runakuna. ¿Pikunataq paykunaqa karqaku? ¿Imatam paykunamanta yachachwan?

2. (1) ¿Pikunatataq sutichaqku “nazareo” nispa? (Rimarimuytaq Numeros 6:​1, 2 nisqanmantapas). (2) ¿Imaynanpitaq wakinqa kikinkumanta Diospaq sapaqchakurqaku?

² Hebreo rimaypiqa Diospaq sapaqchasqa runakunatam sutichaqku “nazareo” nispa. Nazareo ninanqa “imatapas ruwananpaq sapaqchasqa” ninanmi. Chaynataqa sutichaqku chay runakuna imapas munasqankuta saqispanku Jehova Diospa munasqanta tukuy tiempo ruwasqankuraykum. Moisespa chaskisqan kamachikuypim nirqa pi qaripas utaq pi warmipas kikinmanta Diospaq sapaqchasqa kananpaq tantiakuy atisqanta. Tantiakunmantaqmi karqa hayka unayta chayna kawsakunanpaqpas (leey Numeros 6:​1, 2). a Chayna kananpaq tantiakuruspanqa wakin Israel runakunamantapas huk kamachikuykunataraqmi kasukunan karqa. ¿Imaynanpitaq wakinqa kikinkumanta Diospaq sapaqchakurqaku? Yaqapaschá Jehova Diosninchikta anchata kuyasqankurayku hinaspa tukuy imapi Diosninchik yanapasqanmanta  agradecekusqankurayku (Deut. 6:5; 16:17).

3. ¿Imatam ñuqanchikpas ruwayta munanchik nazareokuna hina?

³ Jesucristo wañukusqanraykum manaña Moisespa chaskisqan kamachikuytaqa kasukunchikñachu, aswanqa ‘Cristopa kamachikuynintañam’. Chaymantapacham Diosta serviqkunaqa manaña atirqakuchu nazareo kaytaqa (Gal. 6:2; Rom. 10:4). Nazareokuna hinam ñuqanchikpas Jehova Diosta tukuy sunqunchikwan, tukuy kallpanchikwan hinaspa tukuy yuyayninchikwan serviyta munanchik (Mar. 12:30). Chaynata servinapaqmi manaraq bautizakuchkaspa Diosta mañakuspa prometekurqanchik. Chay prometekusqanchikta cumplinapaqqa imapas munasqanchikta saqispam Diospa munasqanta puntata ruwananchik. Kay yachachikuypim yachasunchik Diospaq sapaqchakuq runakuna imapas prometekusqankuta imaynata cumplisqankumanta hinaspa paykunata imaynata qatipakunamanta (Mat. 16:24). b

KALLPANCHAKUSUNYÁ DIOSPA MUNAYNINTA RUWANAPAQ

4. Numeros 6:​3, 4 nisqanman hinaqa, ¿imakunatam mana mikurqakuchu nitaq tomarqakuchu Diospaq sapaqchasqa runakunaqa?

⁴ (Leey Numeros 6:​3, 4). Diospaq sapaqchasqa runakunaqa manam imapas sinkachikuq kaqtaqa tomanankuchu karqa, manataqmi mikunankuchu karqa uvastapas nitaq pasastapas. Chaykuna tomayqa utaq mikuyqa manam huchachu karqa, chaymi wakin Israel runakunaqa mikuqku utaq tomaqku. Bibliapim nin ‘vinoqa sunqunchikta kusichinanpaq Diospa quwasqanchik’ kasqanta (Sal. 104:​14, 15). Chaywanpas Diospaq sapaqchakuq runakunaqa kikinkumantam tantiakurqaku chaykunata mana mikunankupaq chaynataq mana tomanankupaq. c

5. ¿Imakunata ruwanankupaqmi Madianwan warmin Marcela tantiakurqaku? ¿Imanasqa?

⁵ Diospaq sapaqchakuq runakuna hinam ñuqanchikpas kikinchikmanta tantiakurqanchik imapas munasqanchikta saqispa Diosta astawan servinapaq. Chaytam ruwarqaku Colombia nacionmanta casarasqa iñiqmasinchik Madianwan Marcela. d Paykunaqa suma-sumaq wasipim yacharqaku Madian achka qullqita ganasqanrayku. Chaywanpas Jehova Diostam astawan  serviyta munarqaku. Paykunam ninku: “Qullqiykuta manaña llumpayta gastanaykupaqmi tantiarurqaniku, taksa wasichamanñam astakururqaniku, carroykutapas rantikururqanikum”, nispa. Iñiqmasinchik Madiantawan Marcelataqa manam pipas hikutarqachu tukuy chaykunata ruwanankupaqqa. Diosmanta astawan willakuyta munaspankum chayta ruwanankupaqqa kikinkumanta tantiarqaku. Kusisqam tarikunku chaykunata ruwanankupaq tantiakusqankumanta.

6. ¿Imanasqataq Jesuspa qatiqninkunaqa imapas munasqanchikta saqinchik? (Qawaytaq dibujotapas).

⁶ Jesuspa qatiqninkunaqa kusikuywanmi imapas munasqanchikta saqinchik Diosta astawan serviyta munasqanchikrayku (1 Cor. 9:​3-6). Jehova Diosqa manam chaykunata saqinapaqqa hikutawanchikchu. Manataqmi saqinchikqa mana allin kasqanraykuchu. Wakin iñiqmasinchikkunam Diosta astawan serviyta munasqankurayku tantiakurunku wasita mana rantinankupaq, allin pagasqa llamkayta saqinankupaq hinaspa allquchayuq utaq misichayuq mana kanankupaq. Wakinkuñataqmi tantiakurunku solterollaraq kanankupaq utaq casarakuruspankupas manaraq churi-wawayuq kanankupaq. Hukkunañataqmi aslla testigokunapa kasqan llaqtachaman astakunku Diosmanta astawan willakunankupaq, chaypaqqa familiankuta hinaspa amistadninkutam saqinku. Wakiqninchikpas tukuy chaykunatam ruwanchik Diosta astawan serviyta munaspanchik. Jehova Diosqa ancha kusisqam tarikun imapas munasqanchikta saqispa paypaq kaqkunata tukuy sunqumanta ruwaptinchik (Heb. 6:10).

WAKINKUNA HINA MANA KANAPAQQA MANA MANCHAKUQMI KANANCHIK

7. ¿Imanasqataq Diospaq sapaqchakuq runakunaqa imapas prometekusqanku cumpliyta sasachakunmanku karqa? (Rimarimuytaq Numeros 6:5 nisqanmantapas, qawaytaq dibujotapas).

⁷ (Leey Numeros 6:5). Diospaq sapaqchasqa runakunaqa chukchankutaqa manam rutuchikunankuchu karqa. Chayna kasqankuwanmi sutilla qawakurqa Diosta kasukuy munasqanku. Israel runa unay tiempo Diospaq sapaqchakuptinqa chukchanpas hatuntach wiñaruq, chaymantaqa pipas chayllachá cuentata qukuq. Ayllunpas utaq amistadninkunapas Diospaq sapaqchakusqanta allinpaq hapispankuqa manachá burlakuqkuchu. Wakin kamachiqkunapa tiemponpim ichaqa Diospaq sapaqchakuqkunataqa mana kaqpaqta hina hapiqku, manataqmi respetaqkupaschu. Chayqa llumpay llakikuypaqmi karqa. Diosmanta willakuq Amospa tiemponpipas Diosta mana kasukuq runakunam Diospaq sapaqchakuq runakunaman ‘vinota tomachirqaku’. Chaynapi Diosman prometekusqankuta mana cumplinankupaq (Amos 2:12). Chaymi Diospaq sapaqchakuq runakunaqa mana manchakuq kananku karqa wakin runakuna hina mana kanankupaqqa.

8. ¿Ima niwaqtaq iñiqmasinchik Benjaminpa ima ruwasqanmanta?

 ⁸ Wakinkuna hina mana kanapaqqa ñuqanchikpas mana manchakuqmi kananchik. Chaypaqqa Jehova Diosmi atiyninwan yanapawasun manchapakuq kaptinchikpas. Rimaykusun Noruega nacionmanta chunka watachayuq iñiqmasinchik Benjaminmanta. Escuelanpim warmachakunata kamachirqa Ucrania nacionpa banderanpa colornin kaqllawan pachakuspa huk takita takinankupaq. Chaytaqa ruwarqaku Ucrania nacion guerrapi kaptin chay nacionman sayapakusqankuraykum. Benjaminqa yacharqam chay ruwayqa mana allin kasqanta, chaymi karullapi sayarqa. Ichaqa profesoranmi rikuruspan qayarqa: “¡Utqayman hamuy kuska takinanchikpaq!”, nispa. Chaymi Benjaminqa profesoranman asuykuspan nirqa: “Ñuqaqa manam ima nacionmanpas sayapakunichu, chaymi kay takitaqa mana takiymanchu. Achka testigokunapas guerraman mana risqankuraykum carcelpi kachkanku”, nispa. Chaymi profesoranqa entienderuspan takinanpaqqa manaña hikutarqachu. Ichaqa estudiaqmasinkunam tapupayarqaku imanasqa mana paykunawan takisqanmanta. Chaymi Benjaminqa yaqaña waqarqapas, chaywanpas mana manchakuspanmi estudiaqmasinkunamanpas willarqa imanasqa mana takisqanmanta. Wasinman kutispanmi tayta-mamanman willakurqa allinta rimarinanpaq Jehova Dios yanapasqanmanta.

9. ¿Imapaq kallpanchakuptinchikmi Jehova Diosqa kusisqa tarikun?

⁹ Diospa kamachikuyninkunata kasukuptinchikmi runamasinchikkunaqa cuentata qukunku wakin runakuna hina mana kasqanchikta. Chaywanpas mana manchakuqmi kananchik llamkaqmasinchikkunaman utaq estudiaqmasinchikkunaman testigo kasqanchikta ninapaq. Punchawkunapa risqanman hinam runakunaqa astawan mana allin ruwaq rikurichkanku. Chaymi qipakunataqa aswan sasa kanqa Diosta kasukuyqa chaynataq Diosmanta willakuyqa (2 Tim. 1:8; 3:13). Ichaqa yuyarinanchikmi mana manchakuq kaptinchikqa chaynataq mana allin ruwaqkunata mana qatipakuptinchikqa Diosninchik anchata kusikusqanta (Prov. 27:11; Mal. 3:18).

PIMANTAPAS PUNTATAQA JEHOVA DIOSTAYÁ KASUKUSUN

10. ¿Ima kaptintaq Diospaq sapaqchasqa runakunaqa sasachakunmanku karqa Numeros 6:​6, 7 nisqanta kasukuyta?

¹⁰ (Leey Numeros 6:​6, 7). Diospaq sapaqchasqa runaqa wañukuq runamanqa manam asuykunanchu karqa. Yaqapaschá piensachwan chay kamachikuyta kasukuyninkuqa mana sasa kasqanta. Ichaqa mayna sasatach kasukurqaku  hukkaqnin familian wañukuptinqa. ¿Imanasqa? Chay tiempopi costumbreqa karqa wañukuq ayllunkupa waqtanpi kaymi (Juan 19:​39, 40; Hech. 9:​36-40). Diospaq sapaqchasqa runam ichaqa mana chay costumbrekunataqa ruwayta atiqchu. Wañukuq ayllunmanta llumpay llakisqa tarikuspanpas Diosta hinalla kasukusqanwanmi sutilla karqa Diospi anchata hapipakusqan. Diospaq sapaqchasqa runakunaqa manamá sapallankuchu karqaku, Jehova Diosmi paykunataqa necesitasqankuman hina yanaparqa.

11. ¿Pitam kasukunanchik familianchik Diospa contranpi imatapas ruwanapaq hikutawaptinchik? (Qawaytaq dibujotapas).

¹¹ Ñuqanchikpas Diospaq sapaqchasqa runakuna hinam prometekurqanchik Diosllapaqña kawsakunapaq, chaytamá cumpliyta munanchik. Chay prometekusqanchiktam yuyarinchik manaraq imapaqpas tantiakuchkaspa chaynataq familianchik imatapas ruwanapaq niwaptinchik. Ñuqanchikqa tukuytam ruwanchik familianchik allinlla kanankupaq. Diospa contranpi imatapas ruwanapaq hikutawaptinchikmi ichaqa munasqankutaqa mana ruwanchikchu (Mat. 10:​35-37; 1 Tim. 5:8). Wakinpiqa ichapas piñakuwanchikman, chaywanpas Jehova Diosta kusichinapaqmi pay kasukuyta munanchik.

12. ¿Imatam iñiqmasinchik Alexandru ruwarqa biblia estudiayta saqinanpaq warmin hikutaptin? ¿Warmin piñakuptinpas imaynam payqa karqa?

¹² Rimarisunchik iñiqmasinchik Alexandrumantawan warmin Dorinamanta. Paykunaqa iskayninkum wataña bibliata estudiachkarqaku. Chaymantam ichaqa Dorinaqa biblia estudiayta saqirurqa, qusantapas nirqam amaña estudiananpaq. Qusanmi ichaqa kuyakuyllawan nirqa hinalla estudiay munasqanta. Chaywanmi Dorinaqa llumpayta piñakururqa, chaymi tukuyta ruwaq biblia estudiayta qusan saqinanpaq. Alexandruqa entiendeytam munarqa warmin imanasqa chayta ruwasqanmanta. Wakinpim warminqa imapas ruwasqanmanta rimaq, nanay siminwanmi qaqchaparuq. Chaymi wakinpiqa piensaq biblia estudiayta saqiruyta. Chayna kaptinpas, Alexandruqa hinallam Jehova Diosta puntata kasukuq, warminwanpas kuyakuqllañam karqa. Qusan chayna kasqanraykum Dorinaqa watakuna pasayta kaqmanta biblia estudiayta qallaykurqa hinaspam bautizakurqa. (Chaypaq qaway kay videonchikta: “Alexandru hinaspa Dorina Vacar: Kuyakuq runaqa pacienciakuqmi hinaspa allin sunquyuqmi” niqta).

13. ¿Imatam ruwasun Jehova Diosta hinaspa familianchikta kuyaspaqa?

¹³ Jehova Diosmi familiataqa rikurichirqa, chaymi munan kusisqa kawsakunankuta (Efes. 3:​14, 15). Kusisqa kawsakuyta munaspaqa Diospa niwasqanchiktam kasukunanchik. Diosqa anchatam kusikun kuyasqanchikrayku imapas munasqanchikta saqispa servisqanchikwan. Kusikuntaqmi familianchik allinlla kananpaq  yanapasqanchikta hinaspa paykunawan kuyakuqllaña kasqanchikta qawamuspanpas (Rom. 12:10).

KALLPANCHANAKUSUN DIOSPAQ SAPAQCHASQA RUNAKUNA HINA KANAPAQ

14. ¿Pikunatataq huñunakusqanchikpi astawan kallpanchaykunanchik?

¹⁴ Llapallanchikmi imapas munasqanchikta saqispa Diospa munayninta puntata ruwananchik. Wakinpim ichaqa chayqa sasa kanman. ¿Imaynatam iñiqmasinchikkunata yanapachwan imapas munasqankuta saqispa Jehova Diosta astawan servinankupaq? Sumaqta rimapayaykusqanchikwanmi (Job 16:5). Ichapas pipas as punchawllaña llamkachkan chaynapi Diosta astawan servinanpaq. Yaqapaschá pi musu-sipaspas tukuy imapi Diosta kasukuchkan estudiaqmasinkuna mana allinta ruwananpaq hikutaptinkupas. Riqsinkipastaqchá pi iñiqmasinchiktapas utaq chayllaraq biblia estudiaqtapas familian contranpi kaptinpas Diosta hinalla servisqanta. ¿Imaynatam paykunata kallpanchachwan? Sapa kutim alabaykunanchik mana manchakuq kasqankumanta chaynataq Jehova Diosta servinankurayku tukuy imata ruwasqankumanta. Ninanchiktaqmi chayrayku anchata kuyasqanchiktapas (Filem. 4, 5, 7).

15. ¿Imatam wakin iñiqmasinchikkunaqa ruwanku tukuy tiemponkuwan Diosta serviqkunata yanapanankupaq?

¹⁵ Atispaqa tukuy tiemponkuwan Diosta serviq iñiqmasinchikkunatam imachanchikwanpas yanapaykuna (Prov. 19:17; Heb. 13:16). Chaytam ruwarqa Sri Lanka nacionmanta yuyaq iñiqmasinchik. Payqa sapa killam pensionninmanta qullqichata chaskikuq. Chaymantam ichaqa maschataña chaskikuyta qallaykurqa, chaymi tantiarurqa iskay precursora iñiqmasinchikkunata yanapananpaq. Paykunataqa manam qullqinku haypaqchu. Chaymi chay precursorakunapa celularninkupa recibonmanta sapa killa pagapuq. ¡Ima sumaqmi chay yuyaq iñiqmasinchikpa ruwasqanqa!

16. ¿Imatam yachachwan Diospaq sapaqchasqa runakunamanta?

¹⁶ Llapallanchikmi qatipakuchwan Diospaq sapaqchasqa runakunataqa. Paykunamanta yachayqa yanapawanchiktaqmi Jehova Diosmanta astawan yachanapaqpas. Payqa yachanmi tukuy sunqunchikwan kusichiy munasqanchikta chaynataq payllapaqña kawsakunapaq prometekusqanchikta cumplinapaq imakuna saqisqanchiktapas. Chaymantapas kusikuywanmi chaskin kuyasqanchikrayku tukuy ima ruwapusqanchikta (Prov. 23:​15, 16; Mar. 10:​28-30; 1 Juan 4:19). Diosninchikqa paypaq sapaqchakuq runakunapa tukuy ima ruwasqankuta qawamuspanmi anchata valoraq, chaynam kunanpas tukuy sunquwan imapas ruwapusqanchikta qawamuspan anchata valoran. Chaynaqa, hinallayá Jehova Diosninchikta servisun tukuy atisqanchikta ruwaspa.