7. ČLANKO PROUČIBASE
ĐILI 51 Dinđam lafi e Devlese!
So sikljovaja ando nazireja?
Celo vreme đi tano nazirej, ov tano sveto anglo Jehova (BR. 6:8)
SO KA SIKLJOVA?
Ka dikha sar o primer ando nazireja pomožini amen te ova hrabra hem te ova spremna te ćera žrtve e Jehovase.
1. Kova šukar stav hine len e Jehovase sluge?
DA LI mangeja e Jehova? Naravno. But manuša ko purano vreme isto manglje e Jehova (Ps. 104:33, 34). But olendar ćerđe bare žrtve te šaj te služinen lese. Odova ćerđe hem o nazireja ko purano vreme. Ama, ko hine on hem so šaj te sikljova ando olengo primer? Akana ka dikha.
2. (a) Ko hine o nazireja? (Brojevi 6:1, 2) (b) Sose disave Izraelcija odlučinđe te oven nazireja?
2 O lafi „nazirej“ ki hebrejsko ćhib značini „izdvojimo“, „posvetimo“ hem „predajimo“. O nazireja hine revna Izraelcija kola ćerđe disave žrtve te šaj te služinen e Jehovase ko posebno način. Premalo Mojsijeso zakon jekh murš ili jekh đuvli šaj hine te del jekh posebno zavet so ka služini sar nazirej jekh određeno vreme. a (Čitin Brojevi 6:1, 2.) Sebepi akava zavet, on ićerđe pe ko disave buća ko kola avera Izraelcija na valjanđe. Sose jekh Izraelco odlučinđa te ovel nazirej? Verovatno ko odova podstakninđa le o mangipe premalo Jehova hem i zahvalnost aso sa odova so o Jehova ćerđa lese (Pon. zak. 6:5; 16:17).
3. Sar tano e Devleso narodo avdije slično sar o nazireja?
3 Ked e „Hristeso zakon“ alo, o Izraelcija više našti hine te oven nazireja sose više na važinđa e Mojsijeso zakon (Gal. 6:2; Rimlj. 10:4). Ama, sar o nazireja hem e Jehovaso narodo avdije hem ponodri mothovi bari želja te služini lese celone vileja, celona dušaja, gođaja hem snagaja (Mar. 12:30). Amen spremno daja lese zavet so ka ćera odova ked odlučinaja te predajina amaro životi olese. Te šaj te živina premalo odova zavet, valjani te ćera e Jehovasi volja hem te ćera žrtve te šaj te služina lese. Đi ka razmotrina sar o nazireja živinđe premalo zavet kova dinđe, ka sikljova but važna buća sar šaj amen te živina premalo amaro zavet (Mat. 16:24). b Akana ka dikha disave primerija.
OV SAMOPOŽRTVOVANO
4. Premalo Brojevi 6:3, 4 kola žrtve ćerđe o nazireja?
4 Čitin Brojevi 6:3, 4. O nazireja na isminđe te pijen alkohol hem te han disave buća, sar na primer drakha hem šuke drakha. Sa avera Izraelcija šaj hine te pijen alkohol hem te han odola buća, sose odova na hine ništa pogrešno. Isto ađahar, i Biblija phenela so o vino tano poklon ando Devel hem so „ćerela e manuše te ovel bahtalo“ (Ps. 104:14, 15). Ama, o nazireja hine spremna te odrekninen pe ando odola buća. c
Da li hijan spremno te ćere žrtve sar o nazireja? (Dikh kotar 4-6. odlomko)
5. Kola žrtve odlučinđe te ćeren o Madijan hem i Marsela hem sose?
5 Sar o nazireja, hem amen avdije ćeraja žrtve te šaj pana pobuter te služina e Jehovase. Te dikha o primer ando Madijan hem i Marsela. d On duj živinđe but šukar. O Madijan hine le šukar buti hem odolese hine len but šužo stan. Ama, on manglje te ćeren pana pobuter ki služba e Jehovase. Te šaj te ispuninen odova cilj, on odlučinđe te ćeren disave promene. On phenena: „Amen počminđam te smanjina amare troškija. Selinđam amen ko jekh potikno stan hem bikinđam amare vorda.” O Madijan hem i Marsela na valjanđe te ćeren akala žrtve, ama on kokri odlučinđe te ćeren len sose manglje te proširinen pi služba. On hine zadovoljna hem bahtale sebepi o odluke kola anđe.
6. Sose o hrišćanija avdije ćerena žrtve? (Dikh i slika.)
6 O hrišćanija avdije spremno ćerena žrtve te šaj poviše te služinen e Jehovase (1. Kor. 9:3-6). O Jehova na očekujini amendar te ćera asavke žrtve, niti tane o buća kolendar odrekninaja amen pogrešna. Na primer, disave odrekninena pe andi buti koja but mangena, ando odova te ovel len po ćher ili čak te ovel len kućna ljubimcija. But đene odlučinđe jekh vreme te na khuven ko brak ili te na oven len ćhave. A avera odlučinena te služinen kaj tani pobari potreba, iako odova značini so ka oven dur andi pi porodica hem ando pe amala. But amendar spremno ćerena asavke žrtve odolese so mangena te den e Jehovase po najšukar. Ov uverimo so o Jehova cenini sa o žrtve kola ćeraja te šaj te služina, bilo on te oven bare ili tikne (Jevr. 6:10).
OV SPREMNO TE OVE AVERĆHANE AVERENDAR
7. Sose šaj hine pharo e nazirejenđe te ićeren pe ko po zavet? (Brojevi 6:5; dikh i slika.)
7 Čitin Brojevi 6:5. O nazireja dinđe zavet so na ka ćhinen pe bala. Ađahar šaj hine te mothoven soj tane potpuno podložna e Jehovase. Ako jekh Izraelco nekobor berš hine nazirej, tegani olese bala hine but bare hem avera šaj hine te dikhen odova. Ako bi avera poštujinena le hem ohrabrinena le hem ponodri te ićeri pe ko po zavet, tegani olese bi ovela polokho te ovel averćhane averendar. Nažalost, disave na poštujinđe len hem na pomožinđe lenđe. Ko vreme ked živinđa o prorok Amos, o Izraelcija kola ulje otpadnikija okolenđe kola hine nazireja dinđe „te pijen vino“. Verovatno ćerđe odova sose manglje te ćhinaven len te ićeren pe ko odova zavet (Am. 2:12). Disavo puti, e nazirejenđe valjanđa bari hrabrost te ićeren pe ko po zavet hem te oven averćhane averendar.
Jekh nazirej kova ićerđa pe ko po zavet hine spremno te ovel averćhane averendar (Dikh o 7. odlomko)
8. Sar ohrabrinđa tut e Benjamineso iskustvo?
8 O Jehova šaj te del amen snaga te razlikujina amen averendar, čak iako hijam lađutne. Razmislin ando Benjamin kova isi le deš berš hem živini ki Norveška. Sebepi o maribe ki Ukrajina, ki olesi škola ićerđa pe jekh događaj koleja mothovđe so podržinena e manušen andi Ukrajina. E ćhavorenđe hine phendo te uraven pe ko boje andi ukrajinsko zastava hem te đilaben jekh đili. Te ne bi učestvujini, o Benjamin terdilo dur ando than kaj ićerđa pe odova događaj. Ama, jekh učiteljica dikhlja le hem phenđa lese: „Ava akari amencar. Sare ađićeraja tut!“ Ov hrabro đelo ki odija učiteljica hem phenđa: „Me hijum neutralno hem na učestvujinava ko nisavo političko događaj. Ama, but e Jehovase svedokija tane ko zatvor odolese so odbinđe te đan ko maribe.“ I učiteljica haljilji le hem phenđa so na valjani te učestvujini. Ama, olese amala počminđe te pućen le sose na đala olencar. O Benjamin odobor uznemirinđa pe so harićkase hine ka rovel. Ama, ov hrabro ponovinđa lenđe odova so phenđa e učiteljicaće. Palo odova, vaćerđa pe roditeljenđe so osetinđa sar o Jehova pomožini le hrabro te branini pi vera.
9. Sar šaj te ćera e Jehovaso vilo radosno?
9 Odolese so hijam poslušna e Jehovase, amen razlikujinaja amen ando manuša ko sveto. Valjani amenđe bari hrabrost te vaćera ki buti hem ki škola so hijam e Jehovase svedokija. Sar akava sveto ovela sa pološno, verovatno ka ovel amenđe popharo te primenina e biblijake načelija hem te propovedina (2. Tim. 1:8; 3:13). Ama, na valjani te bistra so ćeraja e Jehovaso vilo radosno ked razlikujinaja amen ando okola kola na služinena lese (Posl. 27:11; Mal. 3:18).
NEK OVEL TUĆE O JEHOVA KO PRVO THAN KO ŽIVOTI
10. Sose šaj hine pharo o nazireja te ićeren pe ki zapovest ando Brojevi 6:6, 7?
10 Čitin Brojevi 6:6, 7. Jekh nazirej našti hine te ovel paše uzo nekaste so mulo. Akava šaj na izgledini so hine bari žrtva. Ama, ko purano vreme aso jekh nazirej posebno hine pharo te ićeri pe ko akava ked merela hine neko andi olesi familija. Tegani hine običaj ked neko merela o manuša te oven paše uzo leste (Jov. 19:39, 40; Dela 9:36-40). Ama, sebepi po zavet o nazirej našti hine te ićeri pe ko akava običaj. Iako hine lese but pharo, ov mothovđa zorali vera hem ićerđa pe ko po zavet. O Jehova sigurno dinđa snaga akale verna manušenđe te oven poslušna ko asavke situacije.
11. So jekh hrišćanin valjani te ovel odlučno te ćerel ked tani ko pućibe olesi porodica? (Dikh i slika.)
11 Sar hrišćanija, amen but ozbiljno dikhaja ko amaro zavet kova dinđam e Jehovase ked predajinđam amen. Odova zavet utičini ko amare odluke hem postupkija ked tani ko pućibe amari porodica. Amen daja sa amendar te brinina amen ando amare porodicake potrebe, ama ko prvo than uvek ćhivaja e Jehovasi volja, a na amare porodicake želje (Mat. 10:35-37; 1. Tim. 5:8). Podijekh puti, odolese so mangaja te ugodina e Jehovase, amare porodicaće šaj na ka sviđinen pe o odluke kola anaja.
Da li hijan spremno te ćhive e Jehovasi volja ko prvo than, čak hem ko najphare situacije? (Dikh o 11. odlomko) e
12. So ćerđa o Aleksandru ki jekh phari situacija, a so na ćerđa?
12 Te razmotrina o iskustvo ando Aleksandru hem olesi romni i Dorina. Palo odova so jekh berš proučinđe i Biblija, i Dorina odlučinđa te ćhinavi hem manglja hem ov te ćerel odova. Ama, ov smireno hem taktično phenđa laće so mangela te nastavini. Olaće na sviđinđa pe baš odova hem manglja silaja te ćhinavi le te proučini i Biblija. O Aleksandru phenela so trudinđa pe te haljol olaki reakcija, ama na hine lese lokho. Ponekad, i Dorina kritikujinđa le hem ponašinđa pe grubo oleja, odolese ov manglja te odustajini ando proučibe. Ama, o Aleksandru ćhivđa e Jehova ko prvo than, a ko isto vreme mothovđa baro mangipe hem poštovanje premali pi romni. Ko krajo, oleso šukar primer podstakninđa e Dorina palem te proučini hem kasnije krstinđa pe. (Dikh ko jw.org o video Aleksandru i Dorina Vakar: Ljubav je strpljiva i dobra ki serija „O ćaćipe menini e manušengo životi“.)
13. Sar šaj te mothova mangipe e Jehovase hem amare porodicaće?
13 O Jehova ćerđa i porodica hem ov mangela te ovel amen bahtali porodica (Ef. 3:14, 15). Ako mangaja te ova bahtale, valjani te ova poslušna e Jehovase. Niked ma sumnjin so o Jehova cenini te žrtve kola ćereja đi brinineja tut andi ti porodica hem mothoveja lenđe mangipe hem poštovanje (Rimlj. 12:10).
PODSTAKNINEN JEKH JEKHE TE OVEN SAR O NAZIREJA
14. Kas posebno valjani te ohrabrina amare lafencar?
14 Sare kola služinena e Jehovase odolese so mangena le, spremna tane te ćeren disave žrtve. Ama, podijekh puti odova nane lokho. Sar šaj te ohrabrina averen te ćeren disave žrtve? Amare lafencar (Jov 16:5). Da li isi neko ki ti skupština ko mangela te pojednostavini po životi odolese so mangela te ćerel diso pobuter ki služba e Jehovase? Da li đaneja disave ternen kola tane spremna te razlikujinen pe averendar ki škola, iako odova nane lokho? Da li neko ko proučini i Biblija ili nesavo phral ili phen trudinena pe te aćhon verna e Jehovase, iako isi len protivljenje ki porodica? Hajde sare te da sa amendar te koristina svako prilika te ohrabrina amare phralen hem phenjen hem te phena lenđe so ceninaja olengi hrabrost hem samopožrtvovano duh (Filim. 4, 5, 7).
15. Sar disave pomožinena okolenđe kola tane ki punovremeno služba?
15 Podijekh puti, šaj ka ova ki mogućnost te pomožina okolenđe soj tane ki punovremeno služba ko disavo praktično način (Posl. 19:17; Jevr. 13:16). Odova ćerđa jekh pophuri verno phen koja živini ki Šri Lanka. Olaki penzija barilji hem oj manglja odole parencar te pomožini duje terne pionirkenđe te nastavinen pi služba, iako hine len finansijska problemija. Odolese, odlučinđa svako masek te pomožini len te platinen pe telefonska računija. Oj mothovđa ćaće but šukar stav.
16. So šaj te sikljova ando nazireja?
16 Šaj but te sikljova ando primer kova mukhlje o nazireja. Isto ađahar, olengo primer sikavi amen hem diso ando Jehova. Ov đanela so amen mangaja te radujina le hem te ćera žrtve te šaj te ićera amen ko amaro zavet. O Jehova mothovđa amenđe čast ađahar so dinđa amen prilika amen te birina sar ka mothova lese amaro mangipe (Posl. 23:15, 16; Mar. 10:28-30; 1. Jov. 4:19). Ando nazireja sikljovaja so o Jehova dikhela hem cenini o žrtve kola ćeraja te šaj te služina lese. Odolese, hajde te ova odlučna hem ponodri te služina e Jehovase celone vileja hem te da lese amaro najšukar.
SAR BI ODGOVORINEJA?
-
Sar o nazireja mothovđe soj tane samopožrtvovana hem hrabra?
-
Sar šaj te podstaknina jekh jekhe te ova sar o nazireja hem te ćera žrtve ki služba e Jehovase?
-
So ando nazirejengo primer sikljovaja kotar Jehova?
ĐILI 124 Te ova verna
a Iako o Jehova birinđa samo nekobor manušen te oven nazireja, disave Izraelcija verovatno kokri birinđe disavo vreme te služinen sar nazireja. (Dikh o okvir „ O nazireja kolen o Jehova birinđa“.)
b Podijekh puti, ko amare publikacije o nazireja tane uporedime okolencar kola tane ki punovremeno služba. Ama, ko akava članko ka vaćera odolestar sar sa e Jehovase sluge šaj te oven sar o nazireja.
c Izgleda so o nazireja osim po zavet na dobinđe nisavo aver zadatko.
d Ko amaro sajt dikh o članko „Par koji je odlučio da pojednostavi život“ ki serija Iskustvija.
e SO DIKHAJA KI SLIKA: Jekh nazirej ando krov dikhela sar legarena te parunen nekas andi olesi porodica. Te šaj te ićeri pe ko po zavet, ov na učestvujini ko odova.
