1. So ilesa slujisarde le manușa le Iehovasche încă andal puraimata?

 DICHES cuci chio amalimos le Iehovasa? Si ciaces că da! Tha ci san o corcoro. Încă andal puraimata, but manușa simțosarde sa cadea. (Ps. 104:33, 34) Von sicade cadaia cana mechle bare buchia caște daștin te anen închinarea le Iehovasche. Iech lașio exemplo sas le nazirei anda o Israelo purano. Con sas-le von hai so daisaras te sichioas lendar?

2. a) Con sas le nazirei? (Numerea 6:1, 2) b) Sostar alosarenas chichiva israeliți te cheren o solaharimos sar nazirei?

² I duma „nazireo” avel anda iech duma ebraico cai însemnol „alosardo”, „șiuto de iech rig” sau „dino le Iehovasche”. Cadal dumes sicaven i șucar atitudinea cai sas le israelițen cai mechle but buchia caște slujin le Iehovasche ande iech modo specialo. I Legea mozaico mechelas ieche murșes sau iecha jiuvlia te cherel iech solaharimos specialo caring o Iehova hai te alosarel te trail sar nazireo iech timpo. a (Citisar Numerea 6:1, 2.) Cana iech israelito cherelas iech solaharimos sar nazireo, vo sau voi trebulas te încărel chichiva norme cai le coaver israeliți ci trebunas te încăren-len. Atunci sostar alosarelas iech israelito te cherel iech solaharimos sar cado? Anda codoia că vo camelas te sicavel peschi bari iubirea caring o Iehova hai vi leschi recunoștința anda le bare miștimata cai primisardea-len lestar. (Deut. 6:5; 16:17)

3. Sar ameal o solaharimos cai cheren-les le manușa le Devlesche aghies codolesa cai cărde-les le nazirei andal puraimata?

³ Cana „i legea le Cristososchi” parudea i Legea mozaico, le  manușa le Iehovasche ci mai daisarde te aven nazirei. (Gal. 6:2; Rom. 10:4) Tha, cadea sar le nazirei andal puraimata, le slujitori le Iehovasche de aghies camen te slujin lesche sea le ilesa, sea le sufletosa, sea la goghiasa hai sea penghe zuralimasa. (Mar. 12:30) Amen alosardeam te cheras cadaia prin iech solaharimos, cana deam amari viața le Iehovasche. Caște încăras cado solaharimos, trebul te cheras i voința le Iehovaschi hai te mechas palal sea le buchia cai daștin te așaven amen caște slujisaras lesche. Mai dur, va avela te dichas sar încărenas le nazirei pengo solaharimos hai sar daștil te ajutil amen lengo exemplo te încăras o solaharimos cai cărdeam-les cana deam amari viața le Iehovasche. b (Mat. 16:24)

MECH PALAL SEA LE BUCHIA CAI DAȘTIN TE AȘAVEN-TU TE SLUJIS ANDA SEA O ILO LE IEHOVASCHE

4. Cadea sar sicavel-pe andel Numerea 6:3, 4, so buchia trebulas te mechel iech nazireo?

⁴ Citisar Numerea 6:3, 4. Le nazirei ci trebunas te pien niciech felo pimos hai nici te na han dracha, stafide hai nici aver buchia cai cherenas-pe anda i răz. Le coaver israeliți daștinas te han oricana camenas anda cadal buchia anda codoia că ci sas chanci nasul. I Biblia sicavel că i mol, „cai cherel voime o ilo le manușesco”, si iech daro le Devlestar. (Ps. 104:14, 15) Cu sea cadala, le nazirei alosarde von corcore te na mai bucurin-pe catar cadal buchia. c

5. So buchia alosarde te mechen palal o Madián hai i Marcela hai sostar?

⁵ Cadea sar le nazirei, vi amen mechas buchia palal caște cheras mai but anda o Iehova. Te dichas o exemplo le phralesco Madián hai lesca rromniaco Marcela. d Cadai familia îngărelas-la mișto. Le phrales Madián sas-les iech buchi mișto pochindi hai beșenas ande iech șucar chăr. Tha von camle te cheren mai but andi buchi le Iehovaschi, cadea că alosarde te cheren chichiva paruimata. Von phenen: „Astardeam te na mai has cadea de but love. Pala codoia, muchisaileam ande iech chăr mai țâno hai bichindeam amari mașina”. Chonic ci șiutea-len te mechen cadal buchia. Von corcore alosarde cadaia caște daștin te cheren mai but anda o Iehova. Lengo ilo silo pherdo bucuria că alosarde te cheren cadaia.

6. Sostar alosaren le manușa le Iehovasche de aghies te mechen palal buchia caște cheren mai but anda o Del? (Dich vi i imaginea.)

 ⁶ Aghies, but manușa le Iehovasche sile voime te mechen palal buchia cai daștin te așiaven-len caște cheren mai but andi buchi le Devleschi. (1 Cor. 9:3-6). Sar exemplo, chichiva jene mechen buchia cai ciaion-len but, sar avelas iech than buchiaco sau iech chăr șucar. But alosarde ca, iech timpo, te așen corcore sau te na aven-len șiave. Aver alosarde te muchin-pe ande iech than cai si mai bari nevoia phralendar, chiar cana cadaia însemnol te beșen dur catar penghe amala hai familia. O Iehova ci manghel amendar te cheras sea cadala hai nici le buchia cai mechas-le palal ci sile nasul. Tha, but mașcar amende mechas sea cadal buchia anda codoia că camas te das le Iehovas sea so si amen mai lașio. Daisaras te pachias ciaces că o Iehova dichel cuci orisavi buchi – țâni sau bari – cai alosaras te cheras-la caște slujisaras lesche! (Evr. 6:10)

SICAV TROMAI HAI AV DIFERIME LE COAVERE MANUȘENDAR

7. Sostar daisardea te avel pharo anda iech nazireo te încărel pesco solaharimos? (Numerea 6:5) (Dich vi i imaginea.)

⁷ Citisar Numerea 6:5. Le nazirei solaharde te na șinen penghe bala. Prin cadaia von sicavenas că așunen cu sea le Iehovastar. Dacă o nazireo cărdea de but timpo cado solaharimos, codola de pașa leste jianenas că silo nazireo anda codoia că lesche lungo bala daștinas te aven dichle savorendar. Cana le coaver hachiarenas so alosardea vo te cherel, sas lesche mai ușoro te încărel pesco solaharimos. Tha, sas vi momentea andi istoria le Israeloschi cana le nazirei ci sas-le dichle mișto hai ci sas lenghe sicadi pachiv. Andel ghiesa le profetosche Amos, le israeliți apostați dine codolen cai sas-le nazirei „te pien mol”. (Amos 2:12) Daștil-pe că von camenas ca le nazieri te uștaren pengo solaharimos hai te pien mol. Poiechdata, iech nazireo trebulas te avel tromano caște încărel pesco solaharimos hai te sicavel că silo diferime le coaverendar.

8. So zuriardea-tu andai experiența le phraleschi Benjamin?

⁸ Le ajutorosa le Iehovasco, vi amen daisaras te sicavas pherde tromai că sam diferime le coaverendar, chiar cana sam mai lajiavune. Te dichas o exemplo le Benjaminosco, iech Martoro andai Norvegia cai siles 10 bărșa. Ande leschi școala, cărdea-pe iech evenimento prin savo le elevi hai le profesori sicavenas că sile pașa le manușa andai Ucraina cai nachenas prin iech războio. Le șiave trebunas te ghilaban iech ghili hai te aven hureade ande le culori cai reprezentin i Ucraina. O Benjamin alosardea te așel de iech rig anda codoia că ci  camlea te hamisarel-pe ande codo evenimento, ande savo le manușa sicavenas că beșen de iech rig ieche themeschi. Tha leschi profesoara dichlea-les hai dea cingar pala leste: „Trebul te aves vi tu amența! Savore ajucăras tut!”. O Benjamin gălea pherdo tromai late hai phendea: „Me ci hamisarav man andel buchia politico. But Martori le Iehovasche sile phandade anda codoia că ci camle te jian te maren-pe ando războio”. I profesoara hachiardea so alosardea vo te pachial hai mechlea-les te na lel partea ca codo evenimento. Tha lesche colegi astarde te pușen-les sostar ci avilea vi vo lența. O Benjamin simțosardea iech baro pharimos pe pesco ilo hai mai sas-les iech țâra te astarel te rovel. Tha phendea pherdo tromai, pale, angla sea pesche colegi, so phendea vi caring i profesoara. Pala codoia, o Benjamin phendea pesche dadesche hai pesca deiache sar o Iehova dea-les tromai hai ajutisardea-les te sicavel pesco pachiamos angla le coaver.

9. Sar daisaras te bucurisaras o ilo le Iehovasco?

⁹ Cana alosaras te așunas le Iehovastar, le coaver va dichena că sam diferime lendar. Ca i școala sau ca i buchi, trebul amenghe tromai caște phenas că sam Martori le Iehovasche. Anda codoia că le manușa gândin hai phiraven-pe sea mai nasul, daștil-pe că va avela amenghe sea mai pharo te traisaras amari viața pala so phenel i Biblia hai te phenas le coaverenghe i vestea lași. (2 Tim. 1:8; 3:13) Tha, te na bâstras că de fiesavi data cana sicavas pherde tromai că sam diferime le coaverendar de pașa amende, o ilo le Iehovasco bariol bucuriatar. (Prov. 27:11; Mal. 3:18)

ȘIU LE IEHOVAS PO IECHTO THAN ANDE CHI VIAȚA

10. Sostar daisardeas te avel pharo andal nazirei te așunen catar so phenelas-pe andel Numerea 6:6, 7?

¹⁰ Citisar Numerea 6:6, 7. Le nazirei ci trebunas te pașion catar niciech mulo. Daștilas te fal-pe că na-i cadea de phari cadai buchi. Tha, anda iech nazireo, te na pașiol ieche mulestar sas iech baro pharimos cana iech manuș cuci anda leste merelas. Andel ghiesa purane, iech iudeo trebulas te așel pașa o mulo cana sas-lo prahome. (Ioan 19:39, 40; Fap. 9:36-40) Tha, o solaharimos cai cherelas-les iech nazireo ci mechelas-les te cherel cadaia. Chiar cana lengo ilo sas-lo phagărdo duchatar cana varecon drago lenghe merelas, le nazirei sicavenas iech zuralo pachiamos cana încărenas pengo solaharimos. Jianas ciaces că o Iehova ajutisardea cadale slujitoren loiali caște nachen părdal cadal pharimata.

11. So si hotărâme iech creștino te cherel cana leschi familia ajucărel aver vareso lestar, cai ci si mișto andel iacha le Iehovasche? (Dich vi i imaginea.)

 ¹¹ Aghies, anda amende si zurales importanto o solaharimos cai cheras-les cana das amari viața le Iehovasche. Amen încăras amaro solaharimos chiar cana amari familia daștil te holiarel-pe. Si ciaces, amen las sama mișto pe amari familia, cadea sar phenel vi i Biblia, tha ci camas te uștaras le legi le Iehovasche cana von ajucăren amendar iech buchi. (Mat. 10:35-37; 1 Tim. 5:8) Cadea că, trebul te hachiaras că, poiechdata, va avela te hasaras i pacea andi familia anda codoia că cheras so si mișto andel iacha le Iehovasche.

12. Cana nachlea prin iech situația phari andi familia, so cărdea hai so ci cărdea o Alexandru?

¹² Te dichas o exemplo le phralesco Alexandru hai lesca rromniaco Dorina. Pala so sichile andai Biblia iech bărș, i Dorina alosardea te așiavel o studio hai camlea ca vi laco rrom te cherel sa cadea. Tha o Alexandru phendea lache șucar că camel te sichiol vi mai dur. Cadaia holiardea la Dorina hai camlea te cherel-les te mechel o studio. Vo phenel că ci sas lesche ușoro, chiar cana delas peschi zor te hachiarel sostar leschi rromni cherelas cadal buchia. Poiechdata, cana i Dorina prasalas-les hai delas duma nasul lesa, prin leschi goghi nachlea te mechel o studio. Cu sea cadala, vo șiutea vi mai dur le Iehovas po iechto than ande peschi viața hai sicadea but iubirea hai pachiv pesca rromniache. Anda codoia că dichlea lesco șucar phiraimos, i Dorina astardea pale te sichiol andai Biblia hai, ji la urmă, cărdilea iech Martora. (Dich o materialo video pa jw.org O Alexandru hai i Dorina Văcar: I iubirea jianel te ajucărel hai si lași, andai seria „Ciacimos cai paruvel i viața”.)

13. Sar daisaras te sicavas iubirea vi caring o Iehova, tha vi caring le jene anda amari familia?

¹³ O Iehova dea amen i familia hai camel te avas fericime ande late. (Ef. 3:14, 15) Tha, dacă camas te avas ciaces fericime, trebul te cheras so camel o Iehova ande amari viața. O Iehova dichel cuci i phari buchi cai cheras-la caște slujisaras lesche ando timpo so las sama pe le jene anda amari familia hai phiravas amen lența pherde iubirea hai pachiv. (Rom. 12:10)

ZURIAREN TUMEN IECH AVERES TE AVEN SAR LE NAZIREI

14. Cas trebul te zuriaras vi mai but prin amare dumes?

¹⁴ Aghies, andai iubirea, le manușa le Iehovasche sile gata te mechen palal sea le buchia cai daștin te așiaven-len te slujin anda sea o ilo le Iehovasche. Tha, poiechdata, ci si ușoro te cheras cadaia. Sar daisaras te ajutisaras amen iech averes te avas cadea sar le nazirei? Daisaras  te zuriaras amen prin amare dumes. (Iov 16:5) Slujis ande iech than phralența cai den penghi zor te avel-len iech viața mai simplo caște cheren mai but anda o Iehova? Prinjianes tărnen cai silen o tromai te sicaven că sile diferime catar penghe colegi, chiar cana ci si lenghe ușoro? Si vi ande chi congregația manușa cai sichion andai Biblia sau phrala cai lenghi familia așen lenghe contra? De fiesavi data cana daștis, zuriar-len prin che dumes! Phen lenghe chichi de cuci diches lengo tromai hai sea so cheren anda o Iehova. (Filim. 4, 5, 7)

15. Sar ajutin chichiva jene codolen cai cheren buchi anda o Del cu timp integral?

¹⁵ Poiechdata, daisaras te rodas te dichas sar daisaras te ajutisaras codolen cai cheren buchi anda o Iehova cu timp integral. (Prov. 19:17; Evr. 13:16) Iecha pheiache phuri andai Sri Lanka bariarde lachi pensia hai camlea te ajutil duie tărne pheian cai sas-le pioniere hai nachenas prin pharimata le lovența. Cadea că, i phei camlea te pochinel ande fiesavo șion iech partea anda lenghi factura co telefono. So șucar buchi alosardea te cherel anda sea o ilo cadai phei!

16. So daisaras te sichioas catar le nazirei andal puraimata?

¹⁶ Cadea că, daisaras te sichioas but buchia anda o lașio exemplo cai mechle-les le nazirei andal puraimata. Mai but, hachiaras iech buchi importanto anda amaro Dad andal ceruri, Iehova. Vo jianel că camas anda sea o ilo te cheras so si mișto ande lesche iacha hai te încăras o solaharimos cai cărdeam-les cana deam amari viața lesche. Vo del amen pachiv fiesavesche cana mechel amen te sicavas corcore amari iubirea caring leste. (Prov. 23:15, 16; Mar. 10:28-30; 1 Ioan 4:19) O nazireato sicavel că o Iehova dichel hai si cuci anda leste le buchia cai cheras-len hai le buchia cai mechas-len palal caște daisaras te slujisaras lesche mai but. Cadea că, te avas hotărâme te cheras mai dur cadai buchi hai te das le Iehovas so si amen mai lașio.