1. He swini swiyentxo leswinene leswi vagandzreli va Yehovha va swi kombisiki ku sukela khale?

 XANA u byi nyika lisima wuxaka byaku na Yehovha? Handle ka ku ganaganeka ina! Nakone a u wuswaku. Ku sukela a minkameni ya khale, vhanu vanyingi va titwa ku fana na wene. (Amaps. 104:33, 34) Vanyingi va tikazrate ngopfu akuva va tizrela Yehovha. Hi leswo swi yentxiwiki hi Vanaziri vanyingi a Israyeleni wa khale. Xana a va li va mani Vanaziri nakone hi nga dondzra yini ka xikombisu xavu?

2. a) A ku li va mani Vanaziri? (Atinhlayo 6:1, 2) b) Ha yini Vaisrayele van’wana va hlawule ku va Vanaziri?

² A zritu “Vanaziri” dzri sukela ka xiga xa Xiheberu lexi tlhamuxelaka “lwa hlawuliwiki,” “a titsravukanisiki” kumbe “a tinyiketeliki”. A xiga lexi xi tlhamuxela Vaisrayele va ku hiseka lava tikazratiki akuva va tizrela Yehovha hi ndlela ya ku hlawuleka. A Nawu wa Moxe a wu pfumelela leswaku wanuna wa kukazri kumbe wansati wa kukazri a hamba xidumbiso xa ku hlawuleka ka Yehovha, a hlawula ku hanya swanga Munaziri ku dzringana nkama wa kukazri. a (Dondzra Atinhlayo 6:1, 2.) Xidumbixo lexo, a xi patsra kuva va yentxa mintxhumu ya kukazri leyi Vaisrayele van’wana a va nga fanelanga ku yi yentxa. Kutani ke, ha yini Muisrayele a a ta hlawula kuva Munaziri? A a ta va na a susumeteliwa hi lizrandzru ledzrikulu ledzri a nga na dzrone ha Yehovha ni hi leswi a tlangelaka matovoko yake.—Deut. 6:5; 16:17.

3. Xana vhanu va Xikwembu Nkulukumba namunhla va fana ni Vanaziri hi ndlela yini?

³ A lulamiselo dzra Wunaziri dzri helisiwe loko Nawu wa Moxe wu txintxiwa hi “nawu wa Kriste”. (Gal. 6:2; Rom. 10:4)  Xileswo, ku fana ni Vanaziri, a vhanu va Yehovha va tama va kombisa ku navela ka ku mu tizrela hi mbilu hinkwayu, wutomi hinkwabyu, miyanakanyu hinkwayu ni ntamu hinkwawu. (Mar. 12:30) Hi ku swi zrandzra, hi dumbisa ku yentxa leswo loko hi tinyiketela ka Yehovha. Akuva hi hanya hi ku fambisana ni leswi hi swi dumbisiki, hi fanela ku yentxa ku zrandzra ka Yehovha ni ku tikazratela ku mu tizrela. Loko hi kambisisa ndlela leyi Vanaziri va hetisisiki ha yone xidumbiso xavu, hi nga dondzra swinyingi swa lisima mayelanu ni ndlela leyi hi nga hanyaka ha yone hi ku pfumelelana ni leswi hi swi dumbisiki. b (Mat. 16:24) A hi voneni swikombiso swa kukazri.

TIYIMISELI KU TITSRONA SWA KUKAZRI

4. Hi ku ya hi Atinhlayo 6:3, 4, xana moya wa ku tinyiketela wa Vanaziri wu dzringiwe hi ndlela yini?

⁴ Dondzra Atinhlayo 6:3, 4. Vanaziri a va nga pfumeleliwi ku nwa byala nambi ku da mawuvha. Kambe Vaisrayele van’wana lava a va hanya na vone a va tikholisa hi swone hikusa nakunene a swi bihanga. A Bibele dzri tlhamuxela ‘vuvhinya lebyi tsrhavisaka mbilu ya mhunu’ swanga xihananu xa Xikwembu Nkulukumba. (Amaps. 104:14, 15) Xileswo, hi ku swi zrandzra Vanaziri va tikazratile akuva va titsrona mintxhumu ya ku fana ni leyo. c

5. I yini leswi Madián na Marcela va swi yentxiki nakone ha yini?

⁵ Ku fana ni Vanaziri, na hine ha tikazrata akuva hi gandzrela Yehovha hi ndlela leyi yengetelekiki. Vona xikombiso xa Madián na Marcela. d Vatekani lava a va tikholisa hi wutomi bya le mafuzreni. Madián a a ni ntizro lowu a wu va pfumelela ku tsrhama ka yindlu ya yikulu ya ku xonga. Nambitanu, a va navela ku yentxa leswi yengetelekiki a ntizrweni wa Yehovha. Akuva va tlhasela kungu ledzro, va teke xiboho xa ku hamba ku txintxa ka kukazri. Vone va li: “Hi sungule ku pumba mintxhumu leyi a hi li na yone. Hi zruzrele ka yindlu ya yitrsongo nakone hi xavise movha wezru.” A swi nga sindzrisi kuva Madián na Marcela va tikazrata hi ndlela leyi, kambe va hlawule ku yentxa leswo hikusa a swi ta va pfumelela ku yengesela ntizro wavu wa nsimu. Va titwa na va yanelisekile nakone va nyonxile hi swiboho leswi va swi tekiki.

6. Ha yini Vakriste namunhla va ti kazrata? (Tlhela u vona ni mufoto.)

 ⁶ Vakriste namunhla va kuma ku nyonxa loko va heta nkama wunyingi ka mintizro ya moya. (1 Kor. 9:3-6) Yehovha a nga sindzrisi kuva hi tikazrata hi ndlela leyo; a hi mintxhumu hinkwayu leyi hi kalaka hi nga yi yentxi yi nga biha. Hi xikombiso, van’wana va tiyimisele ku tsrhika miti yavu, swifuyu kumbe mintizro leyi va yi zrandzraka. Vanyingi va hlawula kuva va nga txhati ku dzringana nkama wa ku leha kumbe va nga vi na vana ntsrhaku ka loko va txhatile. Van’wana va vone swi yampswa ku zruzrela lomu ku nga ni xivileleko lexikulu, nambiloko ku yentxa leswo swi va yentxa va kumeka kule ni maxaka ni vanghanu vavu. Ntalu wezru hi tinyiketela hi ku swi zrandzra hikusa hi djula ku yentxela Yehovha hinkwaswu leswi hi nga swi kotaka. Tiyiseka leswaku Yehovha a ku nyika lisima ku tikazrata kun’wana ni kun’wana loku u ku yentxaka akuva u mu tizrela.—Heb. 6:10.

KU TIYIMISELA KU VA LWA HAMBANIKI NI VHANU VAN’WANA

7. Ha yini a swi kazrata kuva Munaziri a hetisisa xidumbiso xake? (Atinhlayo 6:5) (Tlhela u vona ni mufoto.)

⁷ Dondzra Atinhlayo 6:5. Vanaziri va dumbise kuva va nga tsremeti misisi. Leyo a ku li ndlela ya ku kombisa leswaku va tibeka hansi ka Yehovha. Loko Muisrayele a va Munaziri ku dzringana nkama wa ku leha, a misisi yake a yi ta va yikulu swinene lakakuva swi xiyeka hi ku nabyala leswaku i Munaziri. Loko van’wana a vo mu hlonipha ni ku mu kutxha ku hetisisa xidumbiso xake, a swi ta nabyala kuva Munaziri a va lweyi a hambaniki. Kambe lexi vavisaka hi leswaku, ku ve ni nkama ka matimu ya Israyele lani Vanaziri va kalaka va nga hloniphiwanga ni ku seketeliwa. Hi nkama wa muprofeta Amosi, madukwa ma sungule ku ‘nwisa Vanaziri a wuvhinya’, swi nga yentxeka a nkongometo wavu a ku li ku va yentxa va honisa xidumbiso xavu xa ku va va nga nwi byala. (Amo. 2:12) Minkama yin’wana, swi nga yentxeka swi djule xixixi akuva Munaziri a hetisisa xidumbiso xake a tlhela a va lweyi a hambaniki.

8. Xana mfambu wa Benjamin wu ku tiyisa hi ndlela yini?

⁸ Hi ku pfuniwa hi Yehovha, na hine hi nga swi kota ku va lava hambiniki, nambiloko hi li vhanu va tingana hi ntumbuluku. Vona xikombiso xa makwezru Benjamin, lwa nga ni 10 wa malembe, wa le Noruega. Hi kola ka yimpi leyi viki kone a Ucrânia, ku hambiwe ntlhanganu a xikole kwake akuva va seketela tiko dzra Ucrânia. Vatsrongwana hinkwavu va kombeliwe kuva va yimbelela lisimu na va yambale mpanhla ya tikori ta bandera dzra Ucrânia. Akuva a nga vi kone ka ntlhanganu lowo, Benjamin a vone swi yampswa kuva a tumbela.  Nambitasu, mun’we ka vaprisori vake a mu vonile a va a mu vitana hi zritu dzra le henhla a ku: “Buya halenu swoswi, hinkwezru la hi yimela wene!” Benjamin a tsrhindzrekela hi xixixi ka prisori wake a ku: “A ni patsreki ka timhaka ta politika. Hi leswi yentxaka Timboni ta Yehovha tinyingi ti pfaleliwa madjele hi ku va ti yala ku ya yimpini.” Prisori lwiyani a wu twisisile ntlhamuxelo wa Benjamin nakone a mu tsrike a famba. Hi kola ka leswo, vadondzrikulobye va sungule ku mu vutisa leswaku ha yini a nga tipatsranga na vone. Benjamin a a txhava lakakuva a djula ni ku dzrila; xileswo hi xixixi Benjamin a byele vadondzrikulobye hinkwavu leswi a nga swi byela prisori wake. Ntsrhaku, Benjamin a byele vapswele vake leswaku a vone Yehovha na a mu pfuna ku yimelela lipfumelo dzrake.

9. Xana hi nga nyonxisa mbilu ya Yehovha hi ndlela yini?

⁹ Hi ku va hi hlawula ku yingiseta Yehovha, vhanu van’wana va swi xiya leswaku hi hambanile na vone. Akuva hi byela vhanu a xikole ni le ntizrweni leswaku hi Timboni ta Yehovha swi djula xixixi. Nkama lowu a swiyimu ni swiyentxo swa vhanu va misava leyi swi yaka swi pfisa, swi ta ya swi hi kazratela ku hanya hi minsinya ya milawu ya Bibele ni ku byela van’wana madzrungula lamanene. (2 Tim. 1:8; 3:13) Minkama hinkwayu dzrimuka leswaku hi ‘tsrhavisa mbilu [ya Yehovha]’ loko hi xixixi hi va lava hambaniki ni vhanu lava kalaka va nga mu tizreli.—Amapr. 27:11; Mal. 3:18.

ZRANGISA YEHOVHA A WUTON’WINI BYAKU

10. Xana kuva Vanaziri va landzrelela xileleto lexi nga ka Atinhlayo 6:6, 7, a ku li ndzringo kwavu hi ndlela yini?

¹⁰ Dondzra Atinhlayo 6:6, 7. Vanaziri a va nga fanelanga va va kusuhi ni ntsrumbu. Swi nga yentxeka u swi vona ingiki a hi swa ntxhumu. Kambe a minkameni ya Bibele, lexo a ku ta va xikazratu xikulu ka Munaziri loko a feliwa hi xaka dzra le kusuhi. A swihena swa xilahlu swa le minkameni yoleyo, a swi sindzrisa kuva vhanu va va kusihi ni mhunu lweyi a fiki. (Yoh. 19:39, 40; Mint. 9:36-40) Xidumbiso lexi Munaziri a xi yentxiki a xi ta mu sivela ku landzra xihena lexi. Nambiloko vo txhuka va feliwa hi xaka dzravu, Vanaziri a va kombisa lipfumelo ledzri tiyiki hi ku hetisisa xidumbiso xavu. Handle ka ku ganaganeka, Yehovha a nyike ntamu vagandzreli lava va ku dumbeka akuva va tiyiselela swikazratu leswi a va lavisana na swone.

11. Xana mukriste a fanela ku tiyimisela ku yentxa yini loko a teka swiboho leswi khumbaka maxaka? (Tlhela u vona ni mufoto.)

¹¹ Swanga vakriste, hi nyinka lisima xidumbiso lexi hi xi yentxeliki Yehovha nkama hi nga tinyiketela. Leswo swi khumba swiboho  swezru ni leswi hi swi yentxaka ka timhaka leti khumbaka maxaka yezru. Hi tizra hi nkhinkhi akuva hi kota ku yanelisa swivileleko swa ndangu wezru, kambe a hi nge txhuki hi zrangisa ku navela ka maxaka yezru a mahlweni ka leswi Yehovha a swi djulaka kwezru. (Mat. 10:35-37; 1 Tim. 5:8) Minkama yin’wana, swi ta djula hi teka swiboho leswi taka kala swi nga ma nyonxisi maxaka yezru kambe swi taka nyonxisa Yehovha.

12. Leswi a a lavisana ni xiyimo xa ku kazrata a ndangwini wake, i yini leswi Alexandru a swi yentxiki ni leswi a kalaka a nga swi yentxanga?

¹² A hi kambisiseni mfambu wa Alexandru ni nkatake Dorina. Loko ku khalute lembe na va dondzra Bibele, Dorina a hlawule ku yima ku dondzra, nakone a a djula kuva Alexandru na yene a yima ku dondzra. Kambe yene hi ndlela ya ku zrula a mu byele leswaku a a nge ti yima. Dorina a nga swi zrandzranga, xileswo a zame ku mu sindzrisa kuva a yima ku dondzra. Alexandru a tlhamuxela leswaku a zame ku twisisa leswaku ha yini nkatake a a titwa hi ndlela liyani, kambe a swi mu nabyalelanga. Minkama yin’wana, loko Dorina a mu rasela kumbe ku mu hlamula hi ndlela ya xiphatlu, a swi mu yentxa a navela nambi ku yima ku dondzra Bibele. Nambitasu, Alexandru a ye mahlweni a zrangisa Yehovha na hi nkama wu li wun’we a kombisa lizrandzru ni xihloniphu ka nkatake. Hi kola ka xikombiso xake lexinene, Dorina a tlhele a sungula ku dondzra Bibele nakone hi ku famba ka nkama a babatisiwile.—Nghena ka pajina dzra jw.org u vona vhidiyu ledzri liki Alexandru Na Dorina Văcar: ‘A Lizrandzru Dzri Lehi Mbilu Dzri Ni Vumbilu’ ka xiyenge lexi liki “A Ntiyiso Wu Txintxa Wutomi Bya Vhanu”.

13. Xana hi nga kombisa lizrandzru ka Yehovha ni ka ndangu wezru hi ndlela yini?

¹³ Yehovha hi yene muvumbi wa mindangu nakone a djula leswaku hi va ni ndangu lowu nyonxiki. (Efe. 3:14, 15) Loko hi djula ku va ni ku nyonxa ka ntiyiso, hi fanela ku yentxa leswi Yehovha a djulaka leswaku hi swi yentxa. Tiyiseka leswaku Yehovha a ku nyika lisima ku tikazrata loku u ku yentxaka akuva u mu tizrela nkama lowu u hlayisaka ndangu waku ni ku wu kombisa lizrandzru ni xihloniphu.—Rom. 12:10.

KUTXA VAN’WANA AKUVA VA FANA NI VANAZIRI

14. I vamani lava hi fanelaka ku va tiyisa hi mazritu yezru?

¹⁴ Hinkwavu lava hlawulaka ku gandzrela Yehovha namunhla, va fanela ku tiyimisela ku yentxa hinkwaswu leswi va nga swi kotaka na va susumeteliwa hi lizrandzru. Kambe minkama yin’wana, a swi nabyali ku yentxa leswo. Hi nga va pfunisa kuyini van’wana akuva va yentxela  Yehovha hinkwaswu leswi va nga swi kotaka? Hi ku va kutxa hi mazritu yezru. (Yb. 16:5) Xana ku ni vhanu va kukazri a bandleni dzraku lava tikazratelaka ku hanya hi mintxhumu yitsrongo akuva va yentxa leswi yengetelekiki a ntizrweni wa Yehovha? Xana u tiva vampshwa va kukazri lava tikazratelaka ku va lava hambaniki ni vhanu van’wana a xikole nambiloko swi kazrata ku yentxa leswo? Xana u tiva mhunu wa kukazri lweyi a dondzraka Bibele kumbe makwezru lweyi a tamaka a dumbeka nambiloko a kanetiwa hi maxaka? Tiyimiseli ku yentxa hinkwaswu leswi u nga swi kotaka akuva u va tiyisa ni ku va tlangela hi xixixi lexi va xi kombisaka ni hi ntizro lowu va wu yentxelaka Yehovha.—Film. 4, 5, 7.

15. Xana vamakwezru va va pfunisa kuyini lava va nga ka ntizro wa nkama hinkwawu?

¹⁵ Minkama yin’wana, hi nga va pfuna hi ndlela leyi kongomiki vamakwezru lava nga ka ntizro wa nkama hinkwawu. (Amapr. 19:17; Heb. 13:16) Loko a ku li ku navela ka makwezru wa kukazri wa xisati lwa kuliki hi ntanga lwa tsrhamaka Sri Lanka. Yene a yengeseliwe mali leyi va nyikaka swiduhati, xileswo a a djula ku tizrisa mali yake akuva a pfuna vamakwezru vabidzri va xisati lava a va li maphayona akuva va ya mahlweni ni ntizro wavu nambileswi a va ni xikazratu xa timali. Xileswo, a kunguhate ku va seketela hweti ni hweti hi ku va nyika mali akuva va xava leswi va swi vilelaka. Awee, xiyentxo xa ku xonga xa makwezru lweyi!

16. Hi nga dondzra yini ka lulamiselo dzra khale dzra wunaziri?

¹⁶ Hi nga dondzra swinyingi ka xikombiso lexinene va Vanaziri va khale lava tinyiketeliki! Nakone, xidumbiso lexi Vanaziri va xi yentxiki xi hi dondzrisa ntxhumu wa lisima mayelanu ni Papayi wezru Yehovha. Yene awa tiyiseka leswaku hi swi djula hi mbilu hinkwayu ku mu nyonxisa ni leswaku hi tiyimisele ku tikazratela ku hanya hi ku pfumelelana ni xidumbiso xezru. A hi nyika lisima hi ku hi pfulela mukhandlu wa ku hlawula ku mu komba leswaku ha mu zrandzra. (Amapr. 23:15, 16; Mar. 10:28-30; 1 Yoh. 4:19) Lulamiselo dzra Wunaziri dzri hi komba leswaku Yehovha awa ku vona ku tikazrata kwezru nakone awa hi zrandzra hi mhaka ya leswi hi swi yentxaka. A hi tiyimiseleni ku tama hi tizrela Yehovha, hi mu yentxela hinkwaswu leswi hi nga swi kotaka hi mbilu ya ku swi zrandzra.