NSOLO WA PFUNDZIRO 7
NYIMBO 51 Taperekeka Kwa Mulungu!
Tisapfundzanji na Anazireu?
“Iye anadzakhala wakucena kuna Yahova mu ntsiku zonsene zinafuna kutumikira iye ninga Nazireu.”—NUM. 6:8.
PINAFUNA IFE KUPFUNDZA
Citsandzo ca Anazireu cinatipfundzisa kufunika kwa kukhala acipapo na kukhala dzololo toera kuwangisira kuti titumikire Yahova.
1. Alambiri a Yahova akale akhacitanji?
KODI imwe musalemedza uxamwali wanu na Yahova? Mwakukhonda penula imwe musacita pyenepi. Pontho anango asacitambo pyenepi. Kutomera mu ndzidzi wakale, anthu azinji akhalemedzambo uxamwali wawo na Yahova. (Mas. 104:33, 34) Azinji akhawangisira toera kulambira Yahova. Ndi pyenepi pikhacita Anazireu mu Izraeli wakale. Mphapo Anazireu mbani, pontho tinapfundzanji na citsandzo cawo?
2. (a) Anazireu akhali ani? (Numero 6:1, 2) (b) Thangwi yanji Aizraeli akhacita dumbiro yakukhala Anazireu?
2 Mu Cihebheri fala yakuti “Nazireu” isabveka “munthu adasankhulwa,” “munthu adaperekwa,” peno “munthu adaikhwa pakhundu.” Anazireu akhali Aizraeli aphinga akuti akhawangisira toera kutumikira Yahova munjira yakupambulika. Mwambo wa Mose ukhatawirisa kuti mamuna peno nkazi acite dumbiro yakupambulika kuna Yahova mbasankhula kukhala Nazireu mu ndzidzi ungasi. a (Lerini Numero 6:1, 2.) Mbwenye Muizraeli angacita dumbiro ineyi, iye akhafunika kubvera pitsogolero pyakuti Aizraeli anango nee akhafunika kupibvera. Mphapo thangwi yanji iye akhacita dumbiro ineyi? Panango ndi thangwi yakufuna kwace Yahova na kupereka kwace takhuta thangwi ya nkhombo Zace.—Dheu. 6:5; 16:17.
3. Atumiki a Mulungu asapangiza tani cifuno cibodzi cene ninga cikhali na Anazireu?
3 Mwambo wa Mose pidapitirwa iwo mbuto na “mwambo wa Kristu” atumiki a Yahova nee akhafunikabve kukhala Anazireu. (Agal. 6:2; Aroma 10:4) Mbwenye ninga Anazireu, atumiki a Yahova lero asapitiriza kupangiza cifuno cakuntumikira na ntima onsene, umaso wawo onsene, ndzeru zonsene na mphambvu zonsene. (Marko 12:30) Tingapereka umaso wathu kuna Yahova, ife tisadumbira kuna iye. Toera tikhale m’maso mwakubverana na dumbiro ineyi, tisafunika kucita cifuno ca Yahova na kuwangisira toera kuntumikira. Mu nsolo uno tinaona kuti Anazireu akhakwanirisa tani dumbiro yawo, pontho citsandzo cawo cinatiphedza tani toera kukwanirisa dumbiro yathu yakuperekeka kuna Yahova. b (Mat. 16:24) Tendeni tione pitsandzo pingasi.
WANGISIRANI TOERA KUTUMIKIRA YAHOVA
4. Mwakubverana na Numero 6:3, 4, ndi pinthu pipi pyakuti Anazireu nee akhafunika kupicita?
4 Lerini Numero 6:3, 4. Anazireu nee akhafunika kumwa pyakumwa pyakuledzeresa, kudya mauva akutokota peno akuuma. Mbwenye Aizraeli anango mbadakwanisa kumwa peno kudya pinthu pyenepi thangwi nee pikhali pyakuipa. Bhibhlya isalonga kuti ‘vinyu isatsandzayisa ntima wa munthu,’ pontho ndi muoni wa Mulungu. (Mas. 104:14, 15) Ngakhale tenepo, Anazireu akhali dzololo toera kukhonda kudya mauva na kumwa vinyu. c
Kodi imwe muli dzololo toera kuwangisira kutumikira Yahova ninga pidacita Anazireu? (Onani ndima 4-6)
5. Ndi pinthu pipi pidacita Madián na Marcela, pontho thangwi yanji?
5 Ninga Anazireu, ife tisawangisirambo toera kucita pizinji m’basa ya Yahova. Onani citsandzo ca Madián na Marcela. d Banja ineyi ikhali na umaso wadidi kakamwe. Madián akhali na basa yadidi, pontho iwo akhali na nyumba yadidi kakamwe. Mbwenye iwo akhafuna kucita pizinji m’basa ya Yahova. Toera kukwanirisa cifuno cawo, iwo acita macinjo. Iwo alonga: “Tatoma kupungula pinthu pikhatibvungira kobiri. Tabuluka panyumba ikhali ife mbatienda kakhala panyumba ing’ono, pontho tagulisa karu yathu.” Madián na Marcela nee akhafunika kucita pyenepi, mbwenye iwo asankhula kucita pyenepi thangwi akhafuna kucita pizinji m’basa ya Yahova. Iwo ali akutsandzaya kakamwe na pisankhulo pidacita iwo.
6. Thangwi yanji tisawangisira kusiya pinthu pinango pyakuti nee ndi pyakuipa? (Onanimbo foto.)
6 Atumiki a Yahova lero asawangisira mwakutsandzaya toera akhale na ndzidzi uzinji wakuntumikira. (1 Akor. 9:3-6) Yahova nee asatikakamiza toera kucita pyenepi, pontho pinthu pinango pinasankhula abale na alongo toera kukhonda kupicita nee ndi pyakuipa. Mwacitsandzo, anango asasiya basa ikhakomerwa na iwo, nyumba, ngakhale pinyama pyawo. Azinji asankhula kukhala ndzidzi uzinji nee kumanga banja, peno pakumala kumanga banja, asamala ndzidzi uzinji nee kubala ana. Anangombo asankhula kutumikira kumbuto yakuti iri na amwazi mphangwa akucepa, maseze pyenepi pyaacitisa kukhala kutali na acibale awo na axamwali. Azinji a ife tisawangisira kucita pyenepi thangwi tisafuna kucita pizinji m’basa ya Yahova. Khalani na cinyindiro cakuti Yahova asakomerwa kakamwe na kuwangisira kunacita imwe, mwakukhonda tsalakana khala ndi pinthu pikulu peno ping’ono pinacita imwe toera kuntumikira.—Aheb. 6:10.
TAWIRANI KUKHALA AKUSIYANA NA ANANGO
7. Thangwi yanji panango pikhali pyakunentsa kuna Anazireu toera kupitiriza kukwanirisa dumbiro yawo? (Numero 6:5) (Onanimbo foto.)
7 Lerini Numero 6:5. Anazireu nee akhafunika kucinga tsisi yawo. Ineyi ikhali njira yakupangiza kubvera kwawo Yahova. Khala Muizraeli akhali Nazireu mu ndzidzi uzinji, tsisi yace mbidakhala ikulu kakamwe, pontho anango mbadakwanisa kun’dzindikira mwakukhonda nentsa. Anthu anango mbadalemedza Nazireu na kumuwangisa toera apitirize kukwanirisa dumbiro yace, mbapidakhala pyakukhonda nentsa kuna iye toera akhale wakusiyana. Mbwenye mwakutsukwalisa, midzidzi inango mu Izraeli Anazireu nee akhalemedzwa, pontho nee akhaphedzerwa na Aizraeli anango. Mu ndzidzi wa mprofeta Amosi, Aizraeli akupanduka ‘akhapasa vinyu Anazireu,’ panango toera kuacitisa kuti akhonde kubvera ntemo wakukhonda kumwa vinyu. (Amosi 2:12) Anazireu akhafunika kukhala acipapo toera apitirize kukhala akusiyana na anango.
Nazireu wakuti akhakwanirisa dumbiro yace akhali dzololo toera kukhala wakusiyana na anango (Onani ndima 7)
8. Citsandzo ca Benjamin cakuwangisani tani?
8 Na ciphedzo ca Yahova, ife tinakwanisambo kukhala acipapo mbatikhala akusiyana na anango maseze tikhale amanyadzo. Onani citsandzo ca Benjamin, wa pyaka 10 anakhala ku Noruega. Thangwi ya nkhondo ya ku Ukraniya, anthu a pa xikola inapfundza iye agumanyikana toera apangize kuphedzera kwawo anthu a ku Ukraniya. Anyakupfundza akhafunika kuimba nyimbo na kubvala nguwo za makore a bandera ya ku Ukraniya. Toera akhonde kucitambo pinthu pyenepi, Benjamin alimira kutali na iwo. Mbwenye mpfundzisi m’bodzi amuona mbancemera: “Bwera kuno cincino. Tonsene tikudikhira iwe!” Benjamin aenda kuna mpfundzisi unoyu mbampanga mwacipapo: “Ine nee ndisacita khundu ya dziko, pontho nee ndisaphedzera uviyaviya wa ndale. Mboni za Yahova zizinji ziri nkaidi thangwi yakukhonda kuenda ku nkhondo.” Mpfundzisi unoyu atawira pidafokotoza Benjamin, pontho ampanga kuti nee akhafunika kukhala nanthu penepo. Mbwenye anyakupfundza andzace ambvundza kuti thangwi yanji iye nee akhacitambo pikhacita iwo. Benjamin agopa mpaka kufuna kulira, ngakhale tenepo iye apanga anyakupfundza andzace onsene pinthu pibodzi pyene pikhadalonga iye kuna mpfundzisi. Buluka penepo Benjamin apanga anyakubalace kuti iye aona kuti Yahova am’phedza toera kutsidzikiza cikhulupiro cace.
9. Tinakomeresa tani ntima wa Yahova?
9 Anthu asaona kuti ndife akusiyana na anango tingabvera Yahova. Ife tisafunika kukhala na cipapo toera kupanga anango kubasa peno kuxikola kuti ndife Mboni za Yahova. Mu ndzidzi unathimizirika pinthu pyakuipa mu dziko ino, pisakhala pyakunentsa kakamwe toera kubvera midida ya Bhibhlya na kulonga mphangwa zadidi kuna anango. (2 Tim. 1:8; 3:13) Ndzidzi onsene kumbukani kuti ‘tisakomeresa ntima wa Yahova’ tingakhala na cipapo cakukhala akusiyana na ale anakhonda kuntumikira.—Mis. 27:11; Mal. 3:18.
IKHANI YAHOVA PA MBUTO YAKUTOMA MU UMASO WANU
10. Thangwi yanji pikhali pyakunentsa kuna Anazireu kubvera ntemo unagumanika pa Numero 6:6, 7?
10 Lerini Numero 6:6, 7. Anazireu nee akhafunika kukhala cifupi na munthu wakufa. Panango tinanyerezera kuti nee pikhali pyakunentsa kucita pyenepi. Mbwenye mbapidakhala pyakunentsa kakamwe kuna Nazireu angaferwa na wacibale wace. Mu ndzidzi unoyu munthu angafa, anthu kazinji kene akakhala dhuzi na munthu wakufa. (Juw. 19:39, 40; Mabasa 9:36-40) Mbwenye Nazireu nee mbadakwanisa kucita pyenepi. Ngakhale mu ndzidzi unoyu wakunentsa, Nazireu akhapitiriza kukwanirisa dumbiro yace. Pyenepi pikhapangiza kuti iye akhali na cikhulupiro cakuwanga. Mwakukhonda penula, Yahova akhapasa mphambvu Anazireu toera akwanise kupirira pinentso pyenepi.
11. Tisafunika kucitanji tingafuna kucita pisankhulo m’banja? (Onanimbo foto.)
11 Kuperekeka kwathu kuna Yahova ndi kwakufunika kakamwe kuna ife. Natenepa, pyenepi pisakhuya pisankhulo pinacita ife m’banja. Ife tisawangisira toera kutsalakana banja yathu, mbwenye tisaikha Yahova pa mbuto yakutoma, tayu banja yathu. (Mat. 10:35-37; 1 Tim. 5:8) Midzidzi inango tisafunika kucita pisankhulo pyakuti acibale athu nee asakomerwa napyo, mbwenye pisakomeresa Yahova.
Kodi imwe muli dzololo toera kuikha cifuno ca Yahova pa mbuto yakutoma maseze pikhale pyakunentsa kakamwe? (Onani ndima 11) e
12. Alexandru acitanji mu ndzidzi ukhathimbana iye na pinentso m’banja?
12 Onani citsandzo ca Alexandru na nkazace, Dorina. Iwo atoma kupfundza Bhibhlya pabodzi, pidapita caka cibodzi Dorina asiya kupfundza Bhibhlya, pontho akhafuna kuti Alexandru asiyembo. Mbwenye mwakukhurudzika na mwacilemedzo iye apanga nkazace kuti nee mbadasiya kupfundza. Dorina nee akomerwa na pyenepi, pontho ayesera kuncitisa kusiyambo kupfundza. Alexandru alonga kuti akhayesera kubvesesa thangwi yanji nkazace akhacita pyenepi, mbwenye pikhali pyakunentsa kuna iye toera kubvesesa. Midzidzi inango pikhalonga Dorina mwakuipa mamunace na kunkalipira, Alexandru akhanyerezera pyakusiya kupfundza Bhibhlya. Ngakhale tenepo, Alexandru apitiriza kuikha Yahova pa mbuto yakutoma, mu ndzidzi ubodzi ene mbapitiriza kupangiza ufuni na cilemedzo kuna nkazace. Thangwi ya citsandzo cadidi cidapangiza Alexandru, nkazace atoma pontho kupfundza Bhibhlya, mukupita kwa ndzidzi mbabatizwa.—Onani mu jw.org vidhyu ya nsolo wakuti Alexandru na Dorina Văcar: “Ufuni Ndi Wakupirira na Wakukoma Ntima,” pa khundu yakuti “A Bíblia muda vidas.”
13. Tinapangiza tani ufuni kuna Yahova na banja yathu?
13 Yahova ndiye adatomesa banja, pontho asafuna kuti banja yathu ikhale yakutsandzaya. (Aef. 3:14, 15) Tingafuna kuti banja yathu ikhale na kutsandzaya kwandimomwene, tisafunika kucita pinthu pinafuna Yahova. Lekani kupenula kuti Yahova asatsandzaya na kuwangisira kunacita imwe toera kuntumikira na kutsalakana banja yanu mwaufuni na mwacilemedzo.—Aroma 12:10.
PHEDZANI ANANGO KUTI ATOWEZERE ANAZIREU
14. Ndi anthu api akuti tisafunika kuawangisa kakamwe na mafalathu?
14 Onsene anafuna kutumikira Yahova lero, asafunika kucita pyenepi thangwi ya ufuni wawo kuna iye. Mbwenye midzidzi inango ndi pyakunentsa kucita pyenepi. Mphapo tinaphedza tani anango toera awangisire kutumikira Yahova? Ife tinakwanisa kuawangisa na mafalathu. (Yobe 16:5) Kodi pali na abale na alongo mu mpingo mwanu akuti ali kuyesera kululupisa umaso wawo toera acite pizinji m’basa ya Yahova? Kodi pali na m’phale peno ntsikana anadziwa imwe anapangiza cipapo kuxikola toera kukhala wakusiyana na anango maseze pyenepi ndi pyakunentsa kuna iye? Pali na m’bale peno nyakupfundza Bhibhlya wakuti ali kuwangisira toera apitirize kukhala wakukhulupirika mwakukhonda tsalakana kutcingwa na acibale? Khalani dzololo toera kucita pyonsene pinakwanisa imwe toera muwangise anthu anewa na kuapanga kuti musakomerwa kakamwe na cipapo cawo na pyonsene pinacita iwo m’basa ya Yahova.—Filim. 4, 5, 7.
15. Anango asaphedza tani abale na alongo ali m’basa ya ndzidzi onsene?
15 Midzidzi inango tinakwanisa kupasa pinthu abale na alongo athu ali m’basa ya ndzidzi onsene. (Mis. 19:17; Aheb. 13:16) Ndi pyenepi pidacita mulongo unango wakukalamba anakhala ku Sri Lanka. Iye athimizirwa dinyero yace ya reforma, pontho akhafuna kuphedza alongo awiri apainiya akuti akhali na nkandzo wakusowa kobiri toera apitirize m’basa yawo. Natenepa iye aperekeka toera kuagulira crédito miyezi yonsene. Mulongo unoyu acita pinthu pyadidi kakamwe.
16. Tisapfundzanji na citsandzo ca Anazireu?
16 Mwakukhonda penula, tapfundza pinthu pizinji na citsandzo ca Anazireu! Mbwenye dumbiro ikhacita Anazireu isatipfundzisambo cinthu cinango thangwi ya Babathu, Yahova. Iye asadziwa kuti tisafuna kunkomeresa, pontho tisawangisira toera kucita pinthu mwakubverana na kuperekeka kwathu kuna iye. Iye asatilemedza mukutipasa mwai wakusankhula kupangiza ufuni wathu kuna iye. (Mis. 23:15, 16; Marko 10:28-30; 1 Juw. 4:19) Dumbiro ikhacita Anazireu isapangiza kuti Yahova asaona kuwangisira kwathu, pontho asakomerwa na pyonsene pinancitira ife. Natenepa, tendeni ticite pyonsene pinakwanisa ife toera tipitirize kutumikira Yahova.
MUNATAWIRA TANI?
-
Ninji pinapangiza kuti Anazireu akhali acipapo, pontho akhawangisira toera kutumikira ninga Anazireu?
-
Tinaphedza tani anango toera atowezere citsandzo ca Anazireu mbawangisira toera kutumikira Yahova?
-
Dumbiro ikhacita Anazireu isatipfundzisanji thangwi ya Babathu Yahova?
NYIMBO 124 Tikhale Akukhulupirika Ndzidzi Onsene
a Maseze Aizraeli anango akhasankhulwa na Yahova toera kutumikira ninga Anazireu, Aizraeli azinji akhatumikira ninga Anazireu asankhula okhene kucita pyenepi.—Onani bokosi ya nsolo wakuti “ Anazireu Adasankhulwa na Yahova.”
b Midzidzi inango mabukhu athu asalandanisa Anazireu na ale anatumikira m’basa ya ndzidzi onsene. Mbwenye mu nsolo uno tinaona kuti ife tonsene adaperekeka kuna Yahova tinatowezera tani citsandzo ca Anazireu.
c Pisaoneka ninga Anazireu nee akhali na mabasa anango toera kucita akuti akhabverana na dumbiro yawo.
d Onani nsolo wakuti “Decidimos simplificar a nossa vida,” pa khundu yakuti “Experiências de Testemunhas de Jeová.”
e MAFALA ANAFOKOTOZA FOTO: Nazireu ali padzulu pa nyumba yace, pontho ali kuona ciliro ca wacibale wace. Mbwenye thangwi ya dumbiro yace kuna Yahova, iye nee anakwanisa kugumanika pa ciliro ceneci.
