1. Yimba yɛkɔnge yɛ wɔlɔ enkambi wɛ Yehova yɛnyɛ l’ilá k’ɔkɔndɔ wɔwɔ onkfumɔ?

 ƆNGƆSAKE la ntshina djokanelo djeko la Yehova? Ape l’ehamo ɔngɔsake! Edjinge opalekɔ nghɔmɛlɛ. L’etsho wɛ ntondo, anto efula walawokaki etengo wɛ. (Yee. 104:33, 34) Anto efula walasambɛka nkete mɔtshi ngo djɛ ntɛmɔla Yehova. Anto amɔtshi w’Isariyɛlɛ yɛ ntondo wa yetaka ambɔ Anazariyɛ, wananghaki nghɔsɔ. Yayalaka na, ko elakanyelo wɛkɔnge w’okokaso mba má ndjɔmbɔmba kɛwɔ?

2. a) Anazariyɛ oyɛwɔ na? (Ewadji 6:1, 2) b) Lamo ase Isariyɛlɛ amɔtshi yɔsaka nkano djɛ nangha ɛlɔkɔ kɛ ndjala Anazariyɛ?

² Itepela ‘Nazariyɛ’ ndjɛ má itepela yɛ Hebero isakisola ‘Onto Womboyawangoyɛ,’ ‘Onto w’Ombatɔna,’ kana ‘Onto Womboyalambola.’ Anazariyɛ yayalaka nde ase Isariyɛlɛ wayalaki l’osasalo wayapekalisá yɔmɛlɛ kɛwɔ nkete mɔtshi djɛ nkambela Yehova lá lɛdji lotshikitanyi. Ɛlɛmbɛ wɛ Mɔsɛ wapɛyɛki mpame kana omoto lotshungɔ lɔ nangha ɛlɔkɔ ketshikitanyi te Yehova má nsɔna djɛ ndjala Nazariyɛ l’ilá k’etsho ɛmɔtshi. a (Wala Ewadji 6:1, 2.) Ɛlɔkɔ kana elaka kelá ntshandjawala kɛsɔ, kasakisolaki nkilika akambo amɔtshi w’ase Isariyɛlɛ ankina yotayalaki ladjɛ nkilika. Ko lamo ase Isariyɛlɛ yɛnaka wɔlɔ nangha ɛlɔkɔ kɛ ndjala Nazariyɛ? Ase Isariyɛlɛ wasɔ watshindamaki mbala imɔtshi má ngandji k’efula k’okawɔ Yehova la má djedjɛ djɛ m’anse k’oloko tá esako wɛnde.​—Mvu. 6:5; 16:17.

3. Wopo wɔkɔnge enkambi wɛ Ndjambe wɛ lɔɔko kɛnɛ ɔfɛnawɔ l’Anazariyɛ?

³ Nonghanyi kɛ ndjala Nazariyɛ keshilaka winá wɔ yahɛnyɛ  Ɛlɛmbɛ wɛ Mɔsɛ la ‘ɔlɛmbɛ wɔ Kristo.’ (Nga. 6:2; Ɔrɔ. 10:4) Koko etengo Anazariyɛ, enkambi wɛ Ndjambe wakindjɛ nyɛnyɛ lɔɔko kɛnɛ mposɛ k’efula kɛ ndokambela l’oloko wɔwɔ onkfumɔ, anyima wawɔ ankfumɔ, yimba yɛwɔ inkfumɔ, la wolo wɔwɔ onkfumɔ. (Mar. 12:30) Tongonanghake isankfumɔ ɛlɔkɔ kɛ nkambela Yehova lá lɛdji lɔsɔ, winá woyalambolaso isɔmɛlɛ tende. Mbika lá wopo w’okana l’ɛlɔkɔ kɛsɔ nsakisolaka ndjala la ntshunamo tá ɛkɔpa kɛ Yehova, la ndjala la yimba yɛ ndásambɛ. Winá w’oshishimaso wopo wɔ Anazariyɛ yawikaka lá nkilika ɛlɔkɔ kɛwɔ, tokoka mba elakanyelo wɛ djonyi wekoka ntokotshɛ́ djɛ mbika lá nkilika ɛlɔkɔ kɛso. b (Mat. 16:24) Nyontshɔ tokolenda ndjɔmbɔmba imɔtshi.

YALA ENTSHUPA DJƐ NDÁSAMBƐ

4. Lá nkilika Ewadji 6:3, 4, wopo wɔkɔnge yimba yɛ ndápekala y’Anazariyɛ y’ingelaka l’ohemba?

⁴ Wala Ewadji 6:3, 4. Anazariyɛ wayalaki ladjɛ ndápekala waná la mbambo inkfumɔ iposɛ waná. Anto waadjingi wakokaki sasanga winá enkfumɔ l’eleelo wɛsɔ, mande nkete djɛsɔ ntayalaki nyɛtshi. Bible ntepela ante ‘waná wásasangɛ́ oloko w’onto’ oyɛwɔ nde opapɛyɛ w’ime Ndjambe. (Yee. 104:14, 15) Koko, Anazariyɛ walapekalaki l’ɛkɔpa kɛwɔ lotshungɔ lɔ nsasanga la nkete djɛsɔ. c

5. Nkete djɛkɔnge Madián nya Marcela yɔshi nkano yɔmɛlɛ kɛwɔ djɛ ndásambɛ, ko lamo?

⁵ Etengo Anazariyɛ, ole iso tolapekala nkete mɔtshi djɛ ndeka ndápɛyɛ l’olemo wɔ Yehova. Tokolenda ndjɔmbɔmba kɛ Madián nya Marcela. d Antshukami w’Akristo wasɔ wayalaki la lowiko lɔ wɔlɔ efula. Madián ayalaki l’olemo wɔ wɔlɔ efula ko kɛsɔ kapɛyɛka mbamba k’iwɔ ndjitansɛ lá mvulu k’etajɛ kɛ wɔlɔ efula. Koko, iwɔ wakombolaka ndápɛyɛ efula l’olemo wɔ Yehova. Koko djɛ nkotshɛ okoma wɔsɔ, iwɔ wɔsaka nkano djɛ nangha etshikitano ɛmɔtshi. Iwɔ watepela ambɔ: “Totateyɛka nkitshakitshɛ adepansɛ waso, tɔsɛkɔka t’ivuvulu imɔtshi yɛ daambi la tosadjɛka otuka wɔso.” Lako onto w’otshindisá Madián nya Marcela djɛ ndásambɛ nkete djɛsɔ, iwɔ yɔmɛlɛ ndeke lɔsisá nkano, ladjikɛnde wakombolaka ndápɛyɛ efula l’olemo wɔ Yehova. Iwɔ w’okaka wɔlɔ efula la wasasangaka m’ɔtɛ wɔ nkano djɛwɔ.

6. Lamo Akristo oyapekalawɔ nkete mɔtshi lɔɔko kɛnɛ? (Lenda edjinge ntshango.)

 ⁶ Lɔɔko kɛnɛ, Akristo wangoyalake l’osasa má ndápekala nkete mɔtshi l’ɛkɔpa kɛwɔ djɛ ndeka ndápɛyɛ l’elemo wɛ teokrasi. (1 Kɔ. 9:3-6) Yehova apatɔlɔmbɛ dj’iso ndásambɛ nkete djɛsɔ; kana ape ente nkete dj’oyasambɛso djɛsɔ dekɔ nyɛtshi. Ndjɔmbɔmba, amɔtshi wambotshikaka elemo wɛ wɔlɔ, amvulu, kana nkɛndjɛkɛndjɛ. Efula wambotaloyɛ nkano djɛ ntshukana kana djɛ ndjala l’ankfumbo yɛwɔ. Amɔtshi wambɔsa nkano djɛ ntshɔ ntokamba lá todjena tolekɔ́ la djonyi dj’ansakodji, kaanga nkambo djɛsɔ osakisolawɔ mbangɔ otale l’anto wawɔ wa ngandji. Efula l’anteyi kɛso walekɔ entshupa djɛ ndápekala nkete djɛ nghɔsɔ ladjikɛnde tokombola mpɛyɛ Yehova kɛnɛ keleka wɔlɔ leso. Yashikikɛ ente Yehova ndɔsaka la ntshina ikekete inkfumɔ y’oyapekalaso ayale y’ekekete kana yɛ daambi djɛ ndokambela.​—Heb. 6:10.

YALA ENTSHUPA DJƐ NDÁTSHIKITANYƐ L’ANTO ANKINA

7. Okakasano wɔkɔnge w’okokaki ntshinda Nazariyɛ djɛ ntshita ɛlɔkɔ kɛnde? (Ewadji 6:5) (Lenda edjinge ntshango.)

⁷ Wala Ewadji 6:5. Onto w’ombonangha ɛlɔkɔ kɛ ndjala Nazariyɛ atopaki nkfo. Ɔsɔ ayalaki yopo yɛwɔ yɛ nyɛnyɛ ambɔ walekɔ la ntshunamo dj’efula te Yehova. Ntsha ose Isariyɛlɛ amboyala Nazariyɛ ilá, afo wande wakokaki ndjala etale edjinge anto ankina wakokaki ndowewa ipa l’okakasano ambɔ alekɔ Nazariyɛ. Ntsha anto w’odjingi w’okotshɛ djɛ nɛmɛyɛ ɛlɔkɔ kɛnde kɛ Nazariyɛ, atayalaki wolo nde ndátshikitanyɛ l’anto ankina. Koko yɛnyi nde, winá ɛmɔtshi wana w’Isariyɛlɛ watakɔpaki la watasukaki Anazariyɛ. L’etsho w’ɔprɔfɛtɛ Amɔsɛ, ase Isariyɛlɛ wayalaki apɔsta ‘wakindjɛki mpɛyɛ Anazariyɛ waná wa nnɔ,’ nkoka ndjala djɛ ndawila l’ohemba dj’iwɔ ntshita ɛlɔkɔ kɛwɔ kɛ nkina waná. (Amɔ. 2:12) Lá winá wɛ nghɔsɔ, alɔmbamaki djɛ Nazariyɛ ndjala l’oloko wolo, djɛ nɛmɛyɛ ɛlɔkɔ kɛnde la ndátshikitanyɛ l’anto ankina.

8. Wopo wɔkɔnge kɛnɛ kekomelisá olangala Benjamin yombokokembɛ?

⁸ Mpeyi l’okotshɔ wɔ Yehova, tokoka ole iso l’oloko wolo onkfumɔ, ndátshikitanyɛ l’anto ankina kaanga ntsha oyɛso nde ɛnsɔnyi kana ase vu efula. Tokolenda ndjɔmbɔmba kɛ Benjamin, olangala ɔmɔtshi w’Owakɛ, wolekɔ́ l’ɛnɔnyi djomi la ndjakfe. Wananghaki l’ankalasa yɛwɔ sɛrɛmɔnyi kɛmɔtshi djɛ nsuka mbandji kɛ Ukraine. Walɔmbaka ambeki djɛ ntshumba yeembo la ndɔta ntshendja djɛ kulɛrɛ kɛ drapo djɛ Ukraine. Benjamin ɔsaka nkano dj’ipa ndɔsa opiko lá sɛrɛmɔnyi kenanghemaki l’owila w’otondo kɛsɔ, má nyemala imbango l’edjena kɛ yananghaka. Koko wetsha ɔmɔtshi ɔwɛnaka  ko owetaka la djoyi djɛ wolo ante: “Yɛka lanɛ lankeke, lokosanghane laso. Tokokonga isankfumɔ!” L’oloko wolo onkfumɔ Benjamin asɛmɛlaka te wetsha ko oshimelaka ante: “Lemi mpɔsaka opiko lá wayi w’andja la mpɔsaka opiko lá wayi wa pɔlitikɛ. Lá nsɔsɔlɔ, Ewakɛ wɛ Yehova efula walekɔ l’ankando mande wangotonake ntshɔ tá mbandji.” Wetsha awolaka kɛnɛ kɛ Benjamin ndopakisola la oshimelaka dj’ipa nde ndɔsa opiko. Koko, winande wa nkalasa wawangaka ndowopola lamo ndasambe nsanghana lawɔ. Benjamin atshimbaka yimba efula ko atshikalaka ngo ndambo daambi kɛ nde ndela; koko, akalɔka nshimela nkalasa k’otondo, l’oloko wolo w’efula, kɛnɛ kɛ ndashimela wetsha. Makɔ, Benjamin ashimelaka ambotshi wande ante ɛnaka djɛ Yehova okotshɛ́ka djɛ nseela djawo djɛnde.

9. Lá wopo wɔkɔnge w’okokaso nsasangɛ oloko wɔ Yehova?

⁹ Ladjikɛnde tɔsa nkano djɛ nsunama l’ɛkɔpa kɛ Yehova, tongoyátshikitanyɛke l’anto watodjingi. Tolekɔ la djonyi dj’oloko wolo dj’iso ndáwewanyɛ etengo Ewakɛ wɛ Yehova l’olemo kana lá nkalasa. Edjinge winá wɔ nanghedji la djalelo dj’andja wanɛ yotetela ntshɔ ngo tá nyɛtshi, tɔnghɛna mbala imɔtshi ente alekɔ wolo efula ndjokanyɛ lowiko lɔso la tɔkfɔ tɔ Bible, edjinge ntshanghanyɛ losango lɔ wɔlɔ le anto ankina. (2 Ti. 1:8; 3:13) Koko, tovungɔke winá enkfumɔ ente, ‘tosasangɛ oloko wɔ [Yehova]’ winá w’oyatshikitanyɛso l’oloko wolo onkfumɔ l’anto wapokambela.​—Woo. 27:11; Mal. 3:18.

ILA YEHOVA L’EDJENA KƐ NTONDO LÁ LOWIKO LƆKO

10. Wopo wɔkɔnge nkilika ɛlɛmbɛ welekɔ́ lá Ewadji 6:6, 7 yakokaka ndjala ohemba le Anazariyɛ?

¹⁰ Wala Ewadji 6:6, 7. Anazariyɛ watakokaki nsɛmɛla entshupa l’odjo. Má ndjoka nghɔsɔ, akoka ndjala etengo lako nkambo djɛ wolo. Koko l’etsho w’efunamaki Bible, Nazariyɛ akokaki nyɛna ante ɔsɔ alekɔ ɔlɛmbɛ w’ekekete efula winá w’ovɔ ewoto kɛnde kɛmɔtshi. Nkfumbo djelendana l’edjo djɛ yananghaka l’etsho wɛsɔ djalɔmbaki ngo ndjala entshupa l’odjo. (Dj. 19:39, 40; Ele. 9:36-40) Koko ɛlɔkɔ kɛ Nazariyɛ kakokaki ndowilela onkeka djɛ nkilika nkfumbo djɛsɔ. Kaanga winá w’opikamande lá ntondo k’ekakasano welá nkfumbo l’eleko kɛ ndjolo efula, Anazariyɛ wɛnyɛki djawo djɛ wolo má nama ɛlɔkɔ kɛwɔ. Yehova akembɛki nsɔsɔlɔ enkambi wɛnde wemboyalambola wɛsɔ dj’iwɔ mpikama lá ntondo k’ekakasano wɛ yayalaka ladjɛ mpomana.

11. Kɛkɔnge k’Okristo oyɛnde ladjɛ nangha winá w’oyalande l’ekakasano wɛ nkfumbo? (Lenda edjinge ntshango.)

 ¹¹ Etengo oyɛso Akristo, tɔsa la ntshina efula ɛlɔkɔ k’isananghe kɛ ndalambola le Yehova. Ko kɛsɔ kengoyalake l’eposelo l’akano la nanghedji djɛso djelendana l’akambo wa nkfumbo. Iso nanghaka la wolo djɛ nkotshɛ ehomba wɛ nkfumbo kɛso, koko topakoke lotshinda ndjila ehomba wɛsɔ lá ntondo kɛ kɛnɛ kɛ Yehova ɔtɔlɔmbande. (Mat. 10:35-37; 1 Ti. 5:8) Kɛsɔ nkoka nsakisola ente djɛ nsasangɛ Yehova, tokoka winá ɛmɔtshi ndɔsa akano wapasasangɛ boto djɛso.

12. Winá wɔ ndakandolaka okakasano ɔmɔtshi wɔ nkfumbo, kɛkɔnge kɛ Alexandru ndananghe la kɛ ndotanangha?

¹² Tokolenda kɛnɛ kekomelisá Alexandru nya wadjɛnde, Dorina. M’ɔkɔngɔ w’antshukami wasɔ ndjeka Bible l’ilá k’ɔnɔnyi, Dorina ɔsaka nkano djɛ ntshika ndjeka ko akɔpaka djɛ Alexandru ntshika ole nde. Koko Alexandru owokeyɛka ɔkɔkɛ ɔkɔkɛ edjinge la mayɛlɛ ante nde angokindjɛ. Dorina atakɔpa ko asɛsaka ndotshinda la wolo djɛ nde ntshika ndjeka. Alexandru atepela ante ananghaka la wolo djɛ nsipisoyɛ lamo Dorina ndóyawokaka nghɔsɔ, koko atayala wɔdju lende. Mbala imɔtshi winá wɔ Dorina ndonanghaka la ndotsholaka, nde ayawokaki ngo ngete opekɔ wekelo wɔ Bible. Koko, Alexandru akindjɛka ndjila Yehova l’edjena kɛ ntondo, la koko lá winá wɔkɔ ɔmɔ, nde ɛnyɛki ngandji la dilɛmɛlɔ dj’efula te wadjɛnde. L’ekomo ndjɔmbɔmba kɛnde kɛ wɔlɔ ketshindaka wadjɛnde djɛ nkalɔ ndjeka Bible lonkina, ko ekomo ekomo, nde awolaka nsɔsɔlɔ.​—Lenda lá jw.org video “Alexandru nde la Dorina Vacar: Ngandji ekɔ la solo dia lotutsha ndo ɔlɔlɔ” lá ɔnɔnghɔ wɔ wamba “La Bible transforme des vies.”

13. Wopo wɔkɔnge w’okokaso nyɛnyɛ ente tɔngɔkɔpake Yehova la nkfumbo kɛso?

¹³ Yehova ndeke lolekɔ́ Ikɔkɔ yɛ olonghanyelo wɔ nkfumbo, nde nkombolaka iso ndjala la nkfumbo k’osasa. (Ɛfɛ. 3:14, 15) Ntsha tokombola ndjala l’osasa, iso ladjɛ nangha akambo lá wopo w’ɔkɔpa Yehova. Toyalaké l’ehamo kaanga ndambo daambi ente Yehova ndɔsaka la ntshina welo w’ilɛ djɛ ndɔtɛmɔla, winá w’okotshɛ ehomba w’ase nkfumbo kɛko, la awɛnyɛ ngandji ole dilɛmɛlɔ.​—Ɔrɔ. 12:10.

TOKEMBƐNE DJƐ NDJALA LA YIMBA ETENGO Y’ANAZARIYƐ

14. Pekapeka anto wakɔna w’oyɛso ladjɛ nangha la wolo djɛ nkembɛ m’etepela wɛso?

¹⁴ Anto ankfumɔ wɔsa nkano djɛ ntɛmɔla Yehova lɔɔko kɛnɛ, ladjɛ ndjala entshupa djɛ ndápekala nkete mɔtshi má ngandji k’owokawɔ. Winá ɛmɔtshi, nangha nghɔsɔ apalekɔ nkambo djɛ daambi. Wopo wɔkɔnge w’okokaso nkotshana  djɛ ndjala la yimba yɛ nghɔsɔ? Má mpɛyana lokembo m’etepela wɛso. (Djɔ. 16:5) Anto amɔtshi walekɔ́ l’otshumano wɔko wangɔsɛsake ndjila mbiko yɛwɔ onghanghunya dj’iwɔ ndeka ndápɛyɛ l’olemo wɔ Yehova? Ewa elangala ɛmɔtshi wemboyatshikitanyɛ l’anto ankina l’oloko wolo onkfumɔ lá nkalasa, kaanga oyɛwɔ okakasano lewɔ djɛ nangha nghɔsɔ? Iya otepelaso mo lá nkambo djɛ ambeki wa Bible la winaso andjawodji wanana djɛ mpikama lá ntondo k’onanyelo wɔ nkfumbo? Nyontshɔ tokambe la mbamba kenkfumɔ k’owaso djɛ nshikikɛ winaso andjawodji, djɛ ndawɛnyɛ djedjɛ djɛso tá oloko wolo la yimba yɛwɔ yɛ ndápekala.​—Flm. 4, 5, 7.

15. Wopo wɔkɔnge anto amɔtshi yasuke waalekɔ́ l’olemo wɔ winá enkfumɔ?

¹⁵ Winá ɛmɔtshi, tokoka mpɛyɛ winaso Akristo walekɔ l’olemo wɔ winá enkfumɔ okotshɔ w’ɛnama. (Woo. 19:17; Heb. 13:16) Nkaana kɛmɔtshi k’ekokolo kɛ nkɔmano kewika lá Sri Lanka akombolaki nangha nkambo djɛsɔ. Winá wɔ ndawa pansiɔ m’olemo wɔnde, nde awaka djudji djɛ nkfuta ko akombolaka nkotshɛ́ nkaana ipe y’eseka yɛ tat’ekalo dj’iwɔ nkindjɛ l’olemo wɔwɔ w’ipoposanyɛ kaanga yapomanaka l’ekakasano wɛ mfalanga. Ko nde ɔsaka nkano djɛ ndápɛyɛka ndambo kɛ lofalanga ngɔndɔ inkfumɔ djɛ nsombaka inite la nkete nkina djelendana la telefɔnɛ. Ɔsɔngo nkaana kɛsɔ ndɛnyɛ ikanyi yɛ wɔlɔ!

16. Olakanyelo wɔkɔnge w’okokaso mba má nonghanyi kɛ Anazariyɛ yɛ l’etsho wɛ ntondo?

¹⁶ Tokoka nsɔsɔlɔ mba elakanyelo wɛ wɔlɔ ma ndjɔmbɔmba itshikisá Anazariyɛ iyápɛyisá l’ɛkɔpa! Koko, nonghanyi kɛsɔ kɛnyɛ nkambo nkina djelendana la Papa kɛso kɛ l’olongo, Yehova. Nde ndáshikikɛka ante iso nkombolaka nsɔsɔlɔ ndoosasangɛ edjinge tolekɔ entshupa djɛ ndápekala nkete mɔtshi djɛ ndjokanyɛ lowiko lɔso l’ɛlɔkɔ kɛso kɛ ndálambola. Nde ntɔpɛyɛka lomo má ntɔpɛyɛ mbamba kɛ ndɔwɛnyɛ ngandji k’owokaso lá topo tɔkɔpaso. (Woo. 23:15, 16; Mar. 10:28-30; 1 Dj. 4:19) Nonghanyi kɛ ndjala Nazariyɛ kɛnyɛ ente Yehova nyɛnaka la ndɔsaka la ntshina yimba yɛso yɛ ndápekala djɛ ndokambela. Djɛkondeke, nyontshɔ tɔshi nkano djɛ nkindjɛ nkambela Yehova, djɛ ndɔpɛyɛ l’ɛkɔpa kɛnɛ keleka wɔlɔ leso.