1. Sortu bun sani futuboi fu Yehovah du sensi owruten?

 YU LOBI Yehovah trutru? A no de fu taki dati yu lobi en. Èn a no yu w’wan e du dati. Sensi owruten bun furu sma ben abi den srefi firi leki yu (Ps. 104:33, 34). Furu sma libi sani na baka fu man dini Yehovah. Na so a ben de nanga den Nasireisma na ini owruten Israel. Suma ben de den sma dati èn san wi kan leri fu den?

2. (a) Suma ben de den Nasireisma? (Numeri 6:1, 2) (b) Fu san ede son Israelsma besroiti fu tron Nasireisma?

² A wortu „Nasireisma” e kmoto fu a Hebrew wortu di wani taki „wan sma di poti aparti” noso „wan sma di gi ensrefi abra”. Den Nasireisma ben de Israelsma di ben e libi son sani na baka fu man dini Yehovah na wan aparti fasi. A Wet fu Moses ben e gi pasi taki wan man noso wan uma pramisi Yehovah fu libi leki wan Nasireisma fu wan pisi ten. a (Leisi Numeri 6:1, 2.) Te wan Israelsma ben meki wan sweri fu libi leki wan Nasireisma, dan a ben musu hori ensrefi na wet di den tra Israelsma no ben abi fu hori. Ma fu san ede wan Israelsma ben o besroiti fu tron wan Nasireisma? Kande na fu di a ben lobi Yehovah trutru èn fu di a ben abi furu warderi gi den bun sani di Yehovah ben du gi en.​—Deut. 6:5; 16:17.

3. Fa a pipel fu Yehovah na ini a ten disi de leki den Nasireisma?

³ Di a „wèt fu Krestes” kon na ini a presi fu a Wet fu Moses, dan a pipel fu Gado no ben man tron Nasireisma moro (Gal. 6:2; Rom. 10:4). Ma neleki den Nasireisma,  Yehovah en pipel na ini a ten disi e tan sori taki den wani dini en nanga den heri ati, den heri libi, den heri ferstan, nanga ala den krakti (Mark. 12:30). Te wi e gi wisrefi abra na Yehovah, dan wi e pramisi en taki wi o dini en. Fu man hori wisrefi na a pramisi dati, dan wi musu du a wani fu Yehovah èn wi musu du ala san wi man fu dini en. Te wi o luku fa den Nasireisma ben e hori densrefi na a sweri di den ben meki, dan wi o si fa wi kan hori wisrefi na a pramisi di wi meki b (Mat 16:24). Meki wi go luku wan tu eksempre.

DE KLARKLARI FU LIBI SANI NA BAKA

4. Soleki fa Numeri 6:3, 4 e sori, dan sortu sani wan Nasireisma ben e libi na baka?

⁴ Leisi Numeri 6:3, 4. Nasireisma no ben mag dringi win èn den no ben mag nyan sani soleki droifi nanga korenti. Tra Israelsma ben e dringi win èn den ben e nyan droifi nanga korenti fu di a no ben fowtu fu gebroiki den sani disi. Fu taki en leti, Bijbel e taki dati Gado „gi libisma win, so taki den ati kan prisiri” (Ps. 104:14, 15). Ma tòg den Nasireisma ben de klarklari fu no gebroiki den sani disi. c

5. Sortu kenki Madián nanga Marcela tyari kon, èn fu san ede?

⁵ Neleki den Nasireisma, wi e libi sani na baka tu fu man du moro gi Yehovah. Luku na eksempre fu Madián nanga Marcela. A Kresten trowpaar disi ben abi wan switi libi. Madián ben abi wan bun wroko èn den ben e tan na ini wan moi apartement. Ma den ben wani du moro na ini a diniwroko fu Yehovah. Dati meki den besroiti fu tyari wan tu kenki kon. Den e taki: „Wi no ben e bai so furu sani moro. Wi froisi go tan na ini wan moro pkin apartement èn wi seri wi oto.” Madián nanga Marcela no ben abi fu tyari den kenki disi kon, ma den du dati fu di den ben wani du moro gi Yehovah. Den de tevrede èn den breiti taki den teki den besroiti disi.

6. Fu san ede Kresten na ini a ten disi e libi sani na baka fu man du moro gi Yehovah? (Luku a prenki.)

⁶ Kresten na ini a ten disi de klarklari fu libi sani na baka so taki den kan du moro na ini a diniwroko (1 Kor. 9:3-6).  Yehovah no e aksi wi fu du den sani disi. Boiti dati, a no fowtu fu abi den sani dati. Fu eksempre, son sma gwe libi wan bun wroko noso wan moi oso. Furu sma besroiti fu no trow ete noso fu no bigin wan osofamiri. Tra sma besroiti fu go dini pe moro preikiman de fanowdu, aladi dati wani taki dati den musu libi farawe fu den mati nanga famiri. Furu fu wi de klarklari fu du den sani disi fu di wi wani du ala san wi man fu dini Yehovah. Yu kan de seiker taki Yehovah e warderi iniwan sani di yu e du fu man dini en, awinsi na pkin sani noso bigi sani.​—Hebr. 6:10.

DE KLARKLARI FU DE TRA FASI LEKI TRA SMA

7. Fu san ede a no ben makelek son leisi gi wan Nasireisma fu hori ensrefi na a pramisi di a ben meki? (Numeri 6:5) (Luku a prenki.)

⁷ Leisi Numeri 6:5. Den Nasireisma ben pramisi taki den no ben o koti den w’wiri. Na so den ben e sori taki den no ben e libi gi densrefi moro, ma fu du a wani fu Yehovah. Efu wan Israelsma ben de wan Nasireisma fu wan langa pisi ten kba, dan en w’wiri ben o kon langa èn sma ben o man si dati. A ben o moro makelek gi wan Nasireisma fu hori ensrefi na a pramisi fu en te den tra Israelsma ben o sori lespeki gi en èn te den ben o gi en dek’ati fu hori ensrefi na a pramisi di a meki. Ma a sari taki son leisi den Israelsma no ben e lespeki den Nasireisma èn den no ben e horbaka gi den. Na a ten di Amos ben de profeiti, den Israelsma di ben drai baka gi Yehovah, „ben e gi den Nasireisma win fu dringi” ibri tron baka. Kande den ben e du dati fu di den ben wani meki den Nasireisma broko a pramisi di den ben meki fu no dringi nowan win (Amos 2:12). Son leisi, den Nasireisma ben abi dek’ati fanowdu fu man tan hori densrefi na a pramisi fu den èn fu de tra fasi leki den tra Israelsma.

8. Fa na ondrofenitori fu Benjamin gi yu dek’ati?

⁸ Yehovah kan yepi wi tu fu no frede fu de tra fasi leki tra sma, awinsi wi e syensyen. Luku na eksempre fu Benjamin di abi 10 yari. A de wan Kotoigi èn a e libi na ini Noorwegen. Fu di feti ben broko na ini Ukraini, meki a skoro fu en ben hori wan programa fu horbaka gi den sma na ini a kondre drape. Den pkin di ben weri krosi na ini a kloru fu a fraga fu Ukraini ben musu singi wan singi. Fu di Benjamin no ben wani teki prati na a programa disi di ben e gi grani na a kondre,  meki a ben e tnapu pkinso moro fara fu pe den pkin ben de. Ma wan jufrow si en èn a bari gi en: „Kon singi nanga wi nownow. Wi e wakti yu! Benjamin teki dek’ati èn a waka go na a jufrow. A taigi en: „Mi no e teki sei èn mi no e teki prati na sani di abi fu du nanga politiek. Furu Yehovah Kotoigi de na straf’oso fu di den no wani go feti gi a kondre fu den.” A jufrow ben lespeki a sani di Benjamin ferteri en èn a taigi en taki a no ben abi fu teki prati na a programa. Ma den pkin fu en klas bigin aksi en fu san ede a no ben e singi nanga den. Benjamin ben e senwe so te taki bijna a bigin krei. Ma a teki dek’ati èn a ferteri a klas den srefi sani di a ben ferteri a jufrow. Bakaten, Benjamin taigi en p’pa nanga m’ma taki a ben e firi taki Yehovah yepi en fu opo taki gi a bribi fu en.

9. Fa wi kan meki Yehovah en ati prisiri?

⁹ Fu di wi besroiti fu gi yesi na Yehovah, meki wi de tra fasi leki den sma na wi lontu. Wi abi deki’ati fanowdu fu man taigi sma na skoro noso na wroko taki wi na Yehovah Kotoigi. Èn fu di sma na grontapu e kon moro ogri dei fu dei, meki a kan moro muilek gi wi fu hori wisrefi na Bijbel gronprakseri èn fu preiki a bun nyunsu gi sma (2 Tim. 1:8; 3:13). Ma hori na prakseri taki wi e „meki [Yehovah] ati prisiri” te wi no e frede fu de tra fasi leki den sma di no e dini en.​—Odo 27:11; Mal. 3:18.

TAN POTI YEHOVAH NA A FOSI PRESI NA INI YU LIBI

10. Fu san ede a ben kan muilek gi den Nasireisma fu gi yesi na a komando di skrifi na Numeri 6:6, 7?

¹⁰ Leisi Numeri 6:6, 7. Den Nasireisma no ben mag go krosbei fu wan dedeskin. Ma ini Bijbel ten, wan Nasireisma ben kan feni en muilek fu du a sani disi te wan famiriman fu en ben dede. Na ini a ten dati, sma ben gwenti de krosbei fu a dedeskin fu wan famiriman noso wan mati (Yoh. 19:39, 40; Tori 9:36-40). A pramisi di wan Nasireisma ben meki ben o tapu en fu hori ensrefi na den sortu gwenti dati. Srefi te wan sari sani ben psa na ini a famiri fu den, tòg den Nasireisma ben e tan hori densrefi na a pramisi fu den. A no de fu taki dati Yehovah yepi den getrow anbegiman disi fu psa den muilek situwâsi dati.

11. San wan Kresten musu hori na prakseri te a musu teki besroiti di abi fu du nanga famiri afersi? (Luku a prenki.)

 ¹¹ Wi leki Kresten e si en leki wan seryusu sani taki wi gi wisrefi abra na Yehovah. A sani disi abi krakti tapu den besroiti di wi e teki èn tapu den sani di wi e du te a abi fu du nanga famiri afersi. Wi e du ala san wi man fu gi wi famiri san den abi fanowdu, ma noiti wi e gi pasi taki den sani di den wani prenspari moro leki san Yehovah e aksi fu wi (Mat. 10:35-37; 1 Tim. 5:8). Son leisi disi wan taki dati wi o teki besroiti fu meki Yehovah en ati prisiri, aladi den famiriman fu wi no o breiti nanga dati.

12. San Alexandru du di a ben musu teki besroiti na ini wan famiri afersi, èn san a no du?

¹² Luku na ondrofenitori fu Alexandru nanga en wefi Dorina. Baka di a trowpaar disi studeri Bijbel wan yari langa, dan Dorina besroiti fu stop nanga a studie èn a ben wani taki Alexandru du dati tu. Ma sondro fu kisi atibron Alexandru taigi en na wan lespeki fasi taki a ben o go doro nanga a studie. Dorina no ben lobi a sani dati èn a pruberi fu dwengi en masra fu stop a studie. Alexandru e taki dati a pruberi hori pasensi nanga Dorina, ma a no ben makelek. Son leisi, te Dorina ben e krutu Alexandru, dan a ben e taigi en hati sani baka. Te dati ben psa, dan Alexandru ben e firi fu stop a studie. Tòg a tan poti Yehovah na a fosi presi na ini en libi èn na a srefi ten a ben e sori furu lobi nanga lespeki gi en wefi. A moi eksempre fu en meki taki Dorina bigin studeri baka èn te fu kba a teki dopu.​—Luku a felem Alexandru nanga Dorina Văcar: Lobi abi pasensi èn a abi switifasi na a pisi di nen „Den tru leri fu Bijbel e kenki sma libi”, tapu jw.org.

13. Fa wi kan sori lobi gi Yehovah èn gi wi famiri?

¹³ Na Yehovah seti na osofamiri èn a wani taki wi abi wan koloku osofamiri (Ef. 3:14, 15). Efu wi wani de koloku trutru, dan wi musu du sani soleki fa Yehovah wani. Yu kan de seiker taki Yehovah e warderi a muiti di yu e du fu anbegi en aladi yu e sorgu gi yu osofamiri èn yu e sori lobi nanga lespeki gi den.​—Rom. 12:10.

GI MAKANDRA DEK’ATI FU DE LEKI DEN NASIREISMA

14. Suma spesrutu wi musu pruberi fu gi dek’ati nanga den sani di wi e taki?

¹⁴ Ala sma di e besroiti fu anbegi Yehovah musu de klarklari fu du ala san den man fu dini Yehovah èn den musu du  dati fu di den lobi en. Ma son leisi dati no makelek. Fa wi kan yepi makandra fu du ala san wi man fu dini Yehovah? Wi musu taki sani fu gi makandra dek’ati (Yob 16:5). Sma de na ini yu gemeente di e pruberi fu libi wan moro simpel libi so taki den kan du moro gi Yehovah? Yu sabi yonguwan di no e frede fu de tra fasi leki den pkin na skoro, awinsi a no makelek gi den? Fa a de nanga Bijbel studenti noso brada nanga sisa di feni en muilek fu tan gi yesi na Yehovah fu di den famiri e gens den? Meki wi du ala san wi man fu gi den sma disi dek’ati èn meki wi prèise den gi den sani di den e du gi Yehovah aladi a no makelek gi den.​—Fileim. 4, 5, 7.

15. Fa son sma yepi den wan di e du furuten diniwroko?

¹⁵ A kan taki son leisi wi man du bun gi den Kresten brada nanga sisa fu wi di e du furuten diniwroko (Odo 19:17; Hebr. 13:16). Na dati wan getrow owru sisa di e libi na ini Sri Lanka ben e angri fu du. Fu di a ben kisi moro moni fu lanti, meki a ben wani yepi tu yongu pionier sisa fu tan du a diniwroko fu den aladi den ben pôti. Dati meki a sisa disi besroiti fu yepi den fu pai den telefon kostu fu den ibri mun. A no de fu taki dati a sisa disi abi wan bun ati!

16. San wi kan leri fu den Nasireisma fu owruten?

¹⁶ Wi kan leri furu fu a bun eksempre fu den Nasireisma fu owruten. Ma te wi e studeri a tori fu den Nasireisma, dan wi e leri wan sani tu fu wi hemel Papa, Yehovah. A abi a fertrow taki wi e angri fu meki a prisiri èn taki wi de klarklari fu du ala san wi man fu dini en soleki fa wi ben pramisi en di wi gi wisrefi abra na en. Yehovah e gi wi grani fu di a e gi wi na okasi fu sori taki wi lobi en (Odo 23:15, 16; Mark. 10:28-30; 1 Yoh. 4:19). A seti fu den Nasireisma e sori taki Yehovah e si a muiti di wi e meki fu dini en èn a lobi wi fu di wi e du dati. Meki wi du ala san wi man fu tan dini Yehovah èn meki wi du dati nanga wi heri ati.