1. ¿Piri noká japi Jeobá nijéwami ju chabé jonsa?

 ¿AMI we natéami niraa iné Jeobá amígowala niya? ¡Ayénaʼá! Alí ke mujé bi ju. Chabé jonsa millones pagótami echi riká cho nílili (Sal. 104:33, 34). Wiká riwé nokayá jaré namuti aminabi nóchilimia Jeobá, japi riká echi nazareos japi pireili echomí Israel. Nalí, ¿jépuká nili, alí piri ta biné echi jitra?

2. a) ¿Jépuká nili echi nazareos? (Números 6:1, 2). b) ¿Piri iʼwírili jaré israelitas jiti nazareos nínalima?

² Echi raʼíchali nazareo hebreo niraa aniwáami ju japi “rojanárami ju” o “iyárami ju bilé”. Jepuná ko we aʼlá ruyé japi echi israelitas iʼwérili nokali nóchilia Jeobá. Echi Moisés Nulalila riweli japi bilé rijoi o bilé mukí katúwika anema Jeobá japi echi nóchilimia japi riká nazareo (leeri Números 6:1, 2). a Japalí bilé katúwika isié nazareo nimia, echi ko nijéwisa riweili jaré nulalíwami japi jarecho israelitas ko ke nijewie. Alí, ¿piri iʼwírili bilé jiti nazareo nínalima? A keʼré japi echi ko echi riká nínalie jiti we galeli Jeobá alí jiti matétara iyánalie echi namuti aʼláala jitra japi echi nijili (Deut. 6:5; 16:17).

3. ¿Chúsiá ti chopi iyiri ju japi riká echi nazareos?

 ³ Echi Onorúami siérvowala ma ke omérili nazareos niya japalí jonsa echi Moisés Nulalila nakulíwarami nili echi yúa japi Jesucristo nulali (Gál. 6:2; Rom. 10:4, TNM). Nalí be, japi riká echi nazareos, tamujé ayénachó iʼwérili nokinali nóchilia Jeobá ne sulachí jonsa, suwaba japi ti iwí jonsa, japi ta nata alí suwaba tamujé jiwérala jitra (Mar. 12:30). Alí jepuná namuti ju japi ta ané Jeobá japalí ti katúwika raʼicha echi yúa jiti ta echi bi nijéwipo. Jiti oméripo nokayá japi riká ti anili, ati nokisáré japi Jeobá nakí alí riwésaré nokayá jaré namuti. Ma inepo japi riká nokali echi nazareos alí chúriká echi tamó iʼwiri nokayá japi ta katúwika aneli Jeobá (Mat. 16:24). b

KANILA RIWEPO JARÉ NAMUTI

4. Japi riká aní Números 6:3, 4, ¿piri namuti riwesa riweili echi nazareos?

⁴ (Leeri Números 6:3, 4). Echi nazareos ko ke bajisa riweili alcohol, ke cho okesa riweili bilé namuti japi machina echoná uva rakéami jonsa, japi riká echi uvas alí pasas. Suwaba jepuná namuti echi pagótami koʼali jiti ke chati nili koʼyá echi. Echoná Biblia aní japi echi vino ju bilé chiliwéliami japi Onorúami nijili alí “japi kaníliti echi pagótami sulala” (Sal. 104:14, 15). Tákoré echi riká nili, echi nazareos ko we kanílika riweli echi namuti. c

5. ¿Piri namuti nokali Madián alí Marcela, alí chúsiá?

⁵ Japi riká echi nazareos, tamujé ayénachó riwé jaré namuti aminabi we nóchilimia Jeobá. Ma inepo japi nokali Madián alí Marcela. d Jepuná niwíkami Colombia piréami, wiká namuti níwami nili. Madián ko wiká winomí méami nili, jiti la pireili biléana kalí japi we semati nili. Nalí echi ko aminabi we nóchinilie Jeobá, alí jiti echi riká nokimea echi ko riweli jaré namuti. Echi ko jéaní: “Ma ti ke me wiká winomí suwabie, ati simíaki biléana kalí japi taa ju alí ti ralineki  tamujé níwala carro”. Ke iʼwérili nili japi Madián alí Marcela echi riká nokimea, nalí echi ko echi riká nokali jiti aminabi we nawisánalie. Alí echi ko we kanila muchuwi echi namuti jitra japi nokali.

6. ¿Chúsiá jipi rawé japi ta cristianos ju riwé jaré namuti? (Ayénachó iné echi dibujo).

⁶ Japi ta cristianos ju, ati kanili riwea jaré namuti jiti ta aminabi ikírinali nóchilia Jeobá (1 Cor. 9:3-6). Jeobá ko ke tamó iʼwérili ané japi ta echi riká nokiboa, alí echi namuti japi ta riwé ke chati ju. Japi riká, jaré hermanos ko riwé echi kalí japi olá o echi nóchali. Jarecho ko kecho bijí niwí alí japi ma niwili ko kecho bijí olá echi kuuchi. Alí jarecho simía biléana japoná newaléliwa japi iʼwíripo nawesia, tákoré echi riká isiá isima japi we miká simea echi téemala yúa o echi amigos. Wiká ati echi riká noká jiti ta aminabi nóchinali Jeobá. Jeobá ko we natéami niraa iné echi namuti japi ta noká echi jitra (Heb. 6:10).

KE MAJABO SINÚRIKA NIYA

7. ¿Chúsiá jaré nazareos we jilí nirali nokayá japi katúwili Jeobá yúa? (Números 6:5; ayénachó iné echi dibujo).

⁷ (Leeri Números 6:5). Japi nazareos nili ke omérili sikayá echi kupá. Echi riká echi ko néwariwélitili japi riwiwi Jeobá jiti walúala nuláami ju. Bilé israelita ma wilí nazareo nísaká, echi kupala ko we ochérima alí jarecho ko sapú machimea japi nazareo ju. Jarecho a riwíwisaká alí iʼwírisaká jiti aminabi nazareo nima, echi jitra ko ke jilí nima riweili sinúrika niya. Nalí isini kaachi echi israelitas ke natéami niraa ineli alí riwíwili echi nazareos. Japi riká, japalí biteili echi profeta Amós, echi israelitas apóstatas iyayé vino jiti bajima, echi riká nokáliré jiti riwema nazareo niya (Amós 2:12). Isini kaachi, we jilí nili sinúrika niya alí newaleli japi ke majáami nima.

8. ¿Piri mi baʼórili japi riká isili Benjamin?

⁸ Jeobá iʼwírala jitra, tamujé ayénachó oméripo ke majáami niya tákoré ti riwélami ke. Ma inepo japi ikili Benjamin, bilé Testigo Noruega bitéami japi 10 bamíbami ju. Echoná escuela japoná echi simí, napawili néwariwélitimia japi iʼwiri Ucrania piréami japoná nirú guerra. Echi kuuchi ko wikarasa riweili bilé canción napáchika japi riká ju echi bandera Ucrania nirúami. Jiti ke echi riká cho isima, Benjamin ko nátili japi ke mulíwima. Nalí bilé maestra riwali japi miká wilili alí jéaneli: “¡Kiná simí tamujé yúa!  ¡Sapú, mi ti buwé!”. Benjamin ke majaka mulíwili echi maestra alí jéaneli: “Nijé ko neutral ju. Ke ni iʼwiri echi namuti japi política ju. Jiti la, wiká testigo Jeobá cárcel muchuwi jiti ke simía nakosia echoná guerra”. Echi maestra a kipuli japi echi ruyeli alí kilí riweli. Nalí echi compañeros chotásili naria chúsiá ke wikará echi yúa. Benjamin we riwélali jiti la nalánili. Tákoré echi riká nílili, Benjamin ke majali alí checho echi riká aneli echi kuuchi japi riká ma aneli echi maestra. Miná ko, Benjamin ruyeli echi wénwala japi Jeobá echi iʼwírili jiti nimima japi bichiwi.

9. ¿Chúriká ti kanílitipo Jeobá?

⁹ Japalí ta nijewi Jeobá echi pagótami japi tamó iné machimea japi ta sinúrika ju. Ati newalé ke majáami niya jiti aniboa japi ta testigo Jeobá ju echoná nóchali o escuélachi. Alí jiti echi pagótami aminabi we cha nokísima, a keʼré japi aminabi jilí nima nijewia japi aní echi Biblia alí nawesia echi Onorúami Gobiérnowala jitra jarecho pagótami (2 Tim. 1:8; 3:13). Nalí be, ati newalásaré japi ta kanílitipo Jeobá, ati ke majásaká sinúrika niya echi pagótami yúa japi ke nijéwami ju (Prov. 27:11; Mal. 3:18).

WABÉ NATÉAMI NIRAA INEPO JEOBÁ NALÍ NIJEWIA

10. ¿Chúsiá we jilí nili echi nazareos jitra nijewia echi nulalíwami japi aní Números 6:6, 7?

¹⁰ (Leeri Números 6:6, 7). Echi nazareos ke mulíwisa riweili bilé mukúami. Ami nátiré japi echi namuti ke jilí nili nijewia. Nalí be, bilé echi téemala nísaká japi mukuli, echi nazareo jitra we jilí nili. ¿Chúsiá? Jiti echalí echi pagótami sinibí muliwie echi mukúami (Juan 19:39, 40; Hech. 9:36-40). Jiti la, echi nazareos ke omérili echi riká cho nokayá. Tákoré echi nazareos jitra we jilí nili ke mochía echi téemala yúa, japalí echi riká nokali, echi ko néwariwélitili japi we bichíyami nili. Nalí echi ko ke awénili mochili, jiti Jeobá ko sinibí iyali echi jiwérali japi newaleli.

11. ¿Piri wabé natéami nísaré tamujé jitra? (Ayénachó iné echi dibujo).

¹¹ Japi ta cristianos ju, ati nokinali japi ta ma katúwika aneli Jeobá. Ata néwariwéliti japi ta echi riká nokinali echi namuti jitra japi ta noká alí japi riká ti noká  tamujé téemala yúa. Iʼwérili ti noká iʼwiria tamujé téemala japi yena ti omeri, nalí ke ti siné wabé natéami niraa iné echi namuti yúa japi Jeobá nakí (Mat. 10:35-37; 1 Tim. 5:8). Isini kaachi ati nokibóiré namuti japi ke kanílitima tamujé téemala, nalí echi riká ti noká jiti nijéwipo Jeobá.

12. Japalí ikili namuti jilírami echi téemala yúa, ¿piri isili Alexandru, alí piri ke isili?

¹² Ma inepo japi ikili Alexandru alí echi upila, Dorina. Japalí ma bilé bamíali bineli echi Biblia, Dorina ko riweli binea alí nakiyé japi Alexandru ayénachó riwema. Nalí echi ko we kilí niraa aneli japi ke riwema. Dorina ke galeli japi riká anili echi kunala, jiti la we iʼwérili isili jiti riwema binea echi Biblia. Alexandru we jilí nirali inamia chúsiá echi upila echi riká isié. Isini kaachi, japalí Dorina we cha riká raʼichie echi yúa alí cha riká isié, Alexandru riwénali binea. Nalí echi ko ke echi riká isili alí aminabi we simárika isili echi upila yúa alí riwíwili. Japi riká isili echi kunala, iʼwírili Dorina jiti checho ku binénalima echi Biblia alí nijéwinalima. (Iné echi video riwéami Alexandru alí Dorina Văcar: Japi “wabé galeko [...] kilí ologá iyénami ju”, japi chukú echoná sección “Binesa echi Biblia jipi ko we kaníliami ju”, echoná jw.org).

13. ¿Chúriká ti néwariwélitipo japi ta we galé Jeobá alí tamujé téemala?

¹³ Jeobá niwali echi téemala alí echi ko nakí japi kanílika pirélima (Efes. 3:14, 15, TNM). Ata ne bichíwali kaníliami nínalaká, ata nokisáré japi riká Jeobá aní. Echi ko we natéami niraa iné echi namuti japi ta noká echi nijewia, ayénachó japi ta we simárika noká tibúa tamujé téemala, galea alí riwiwia (Rom. 12:10).

ANAKUPI IʼWÉRILI IYABO NIMIA JAPI RIKÁ ECHI NAZAREOS

14. ¿Jépuká ti iʼwérili iyásaré?

¹⁴ Sinéami japi ta nijéwinali Jeobá, ata riwésaré jaré namuti jiti ta we galé echi. Isini kaachi a jilí ju. ¿Chúriká iʼwérili nijibo anakupi niraa jiti riwepo jaré namuti aminabi nóchilimia Jeobá? Tamujé raʼicháala jitra (Job 16:5). ¿Achi nirú bilé echoná congregación japi riwénali jaré namuti jiti aminabi ikírima nóchilia Jeobá? ¿Ami machí bilé remalí japi simí echoná escuela japi ke majaa sinúrika niya jarecho yúa tákoré jilí ju? ¿Ami machí bilé hermano o bilé Biblia binéami japi ikí namuti we jilírami echi téemala  yúa jiti nijéwami ju Jeobá? Iʼwérili iyabo echi alí anepo japi ta we natéami niraa iné echi namuti japi noká Jeobá jitra alí jiti néwariwéliti japi ke majáami ju (Filem. 4, 5, 7).

15. ¿Piri noká jaré hermanos iʼwírimia japi nocha tiempo completo niraa?

¹⁵ Isini kaachi ati omeri iʼwiria echi hermanos japi nocha tiempo completo niraa (Prov. 19:17; Heb. 13:16). Echi riká isili bilé hermana ma wiláami japi bité echomí Sri Lanka. Japi riká wiká pe iyalie winomí, echi ko nátili iʼwírimia okuá hermanas japi precursoras nili japi newaleli winomí. Jiti la echi ko sinibí michá rojánili jaré winomí jiti iʼwírima natetia echi teléfono. ¡We simárika isili na hermana we nijéwami!

16. ¿Piri ta biné echi nazareos jitra?

¹⁶ ¡Wiká namuti ju japi ta bineli echi nazareos jitra! Nalí ayénachó ti biné tamujé Onolá Jeobá jitra. Echi ko machí japi ta ne sulachí jonsa echi kanílitinali alí japi ta iʼwérili nokinali nokayá japi ta ma katúwika aneli. Ayénachó, echi ko riwé japi ta echi néwariwélitipo japi chu yena ti galé (Prov. 23:15, 16; Mar. 10:28-30; 1 Juan 4:19). Echi nazareos jitra ata bineli japi Jeobá ko we natéami niraa iné echi namuti japi ta noká echi nóchilia. Jiti la, ke riwepo ne sulachí jonsa nóchilia Jeobá japi yena ti omeri.