1. Husi uluk kedas Jeová nia povu hatudu hahalok saida?

 ITA hafolin Ita-nia relasaun ho Jeová ka lae? Klaru katak Ita hafolin! Laʼós Ita mesak deʼit, husi uluk kedas ema barak mós sente buat neʼebé hanesan ho Ita. (Sal 104:​33, 34) Ema barak halo sakrifísiu oioin atu adora Jeová. Neʼe mak buat neʼebé ema Nazireu iha Izraél antigu halo. Sira mak sé, no saida mak ita bele aprende husi sira?

2. (a) Sé mak ema Nazireu? (Números 6:​1, 2) (b) Tanbasá ema Izraél balu hili atu sai ema Nazireu?

² Liafuan “Nazireu” foti husi liafuan Ebraiku neʼebé signifika “ema neʼebé dedika ona”, ka “ema neʼebé haketak ona”. Ema Nazireu mak ema Izraél neʼebé hatudu laran-manas no halo sakrifísiu oioin atu serbí Jeová iha dalan espesiál. Moisés nia Ukun-Fuan fó lisensa ba mane no feto Izraél atu halo juramentu espesiál ba Jeová hodi hili moris nuʼudar ema Nazireu ba tempu balu. a (Lee Números 6:​1, 2.) Bainhira ema Izraél ida halo juramentu neʼe, nia tenke halo tuir matadalan neʼebé ema Izraél seluk la halo tuir. Entaun, tanbasá mak ema Izraél ida hili atu halo juramentu neʼe? Karik tanba nia hadomi tebes Jeová no hafolin bensaun hotu neʼebé nia simu husi Jeová.—Deut 6:5; 16:17.

3. Oinsá mak Maromak nia povu ohin loron hanesan ho ema Nazireu?

³ Arranju kona-ba ema Nazireu remata bainhira Moisés  nia Ukun-Fuan troka fali ho “Kristu nia ukun-fuan”. (Gal 6:2; Rom 10:4) Maibé hanesan ema Nazireu, Jeová nia povu ohin loron kontinua hatudu katak sira hakarak tebes atu serbí Maromak ho sira-nia laran tomak, moris tomak, neon tomak, no kbiit tomak. (Mc 12:30) Ho hakarak rasik, ita halo juramentu atu serbí Jeová bainhira ita dedika ita-nia an ba nia. Ita moris tuir juramentu neʼe hodi halo tuir Jeová nia hakarak no mós halo sakrifísiu oioin. Nuʼudar ita aprende oinsá ema Nazireu moris tuir sira-nia juramentu, ita mós bele aprende lisaun importante kona-ba oinsá mak ita bele moris tuir ita-nia juramentu. b (Mt 16:24) Mai ita haree ezemplu balu.

HALO SAKRIFÍSIU

4. Tuir Números 6:​3, 4, ema Nazireu presiza halo sakrifísiu saida?

⁴ Lee Números 6:​3, 4. Ema Nazireu labele hemu tua no han uvas-fuan, maski neʼe foin kuʼu ka maran ona. Tuir loloos, iha tempu neʼebá ema seluk bele han no hemu buat sira-neʼe, no neʼe la sala. Bíblia hatete katak “tua-uvas neʼebé halo ema nia laran haksolok” mak prezente husi Maromak. (Sal 104:​14, 15) Maski nuneʼe, ema Nazireu prontu atu halo sakrifísiu hodi la han ka hemu buat sira-neʼe. c

5. Madián no Marcela hili atu halo sakrifísiu saida, no tanbasá?

⁵ Hanesan ema Nazireu, ita mós halo sakrifísiu oioin atu serbí Jeová liután. Haree toʼok ezemplu kona-ba Madián no Marcela. d Feen-laʼen neʼe iha moris neʼebé diʼak. Madián iha serbisu diʼak, tan neʼe sira bele hela iha apartamentu neʼebé furak. Maski nuneʼe, sira hakarak halo buat barak liután atu adora Jeová. Atu kumpre sira-nia planu, sira deside atu halo mudansa balu. Sira hatete: “Ami komesa hamenus ami-nia gastu. Ami muda ba apartamentu neʼebé kiʼik liu no faʼan ami-nia karreta.” Loloos sira la presiza halo ida-neʼe, maibé sira hili atu halo nuneʼe hodi sira bele serbí Maromak liután. Sira satisfás no kontente ho sira-nia desizaun.

6. Tanbasá mak ema Kristaun ohin loron halo sakrifísiu oioin? (Haree mós dezeñu.)

 ⁶ Ema Kristaun ohin loron kontente atu halo sakrifísiu oioin hodi bele iha tempu liután atu serbí Maromak. (1 Kor 9:​3-6) Jeová la husu ita atu halo sakrifísiu sira-neʼe, no loloos la sala atu iha nafatin buat sira-neʼe. Porezemplu, ema barak deside atu la iha uma rasik, ka prontu atu la simu serbisu neʼebé sira hakarak atu halo. Ema balu deside atu klosan nafatin, ka se kaben ona sira deside atu la iha oan. Ema balu tan deside atu serbí iha fatin neʼebé presiza liután haklaken-naʼin maski sira tenke hela dook husi família ka belun. Ita barak prontu atu halo sakrifísiu sira-neʼe tanba hakarak fó buat neʼebé diʼak liu ba Jeová. Fiar bá katak Jeová hafolin sakrifísiu neʼebé Ita halo ona atu serbí nia, maski neʼe mak kiʼik ka boot.—Ebr 6:10.

PRONTU HALAʼO MORIS NEʼEBÉ LA HANESAN HO EMA SELUK

7. Susar saida mak karik ema Nazireu hasoru atu bele kaer metin sira-nia juramentu? (Números 6:5) (Haree mós dezeñu.)

⁷ Lee Números 6:5. Ema Nazireu jura atu la tesi sira-nia fuuk. Neʼe mak dalan ida atu hatudu katak sira fó sira-nia moris tomak ba Jeová. Se ema Izraél ida sai ema Nazireu ba tempu kleur, ninia fuuk mós sei sai naruk no fasil ba ema atu nota ida-neʼe. Se ema seluk apoia nia atu kaer metin ba ninia juramentu nuʼudar ema Nazireu, neʼe sei halo fasil ba nia. Maibé triste mak dala ruma ema Izraél balu la hafolin ka apoia ema Nazireu. Durante profeta Amós nia tempu, ema Izraél neʼebé la laran-metin “kontinua fó tua-uvas ba ema Nazireu atu hemu”, karik ho objetivu atu halo sira kontra sira-nia juramentu. (Amós 2:12) Dala ruma ema Nazireu presiza hatudu aten-brani atu kaer metin ba sira-nia juramentu no halaʼo moris neʼebé la hanesan ho ema seluk.

8. Oinsá Benjamin nia esperiénsia anima Ita?

⁸ Ho Jeová nia ajuda, ita mós bele iha aten-brani atu halaʼo moris neʼebé la hanesan ho ema seluk maski ita mak moedór. Haree toʼok ezemplu kona-ba Benjamin neʼebé tinan sanulu no hela iha rai-Noruega. Ninia eskola halo eventu ida atu apoia ema Ukránia neʼebé hasoru susar tanba funu. Eskola haruka labarik sira atu kanta knananuk ida no hatais roupa ho kór neʼebé hanesan ho bandeira Ukránia nian. Atu la hola parte iha eventu neʼebé apoia hahalok nasionalizmu  neʼe, nia hili atu hamriik dook. Maibé ninia mestra haree nia no bolu nia: “Mai iha neʼe, hamutuk ho ami. Ami hotu hein ó!” Benjamin hakbesik ba ninia mestra ho aten-brani no hatete: “Haʼu neutrál, no haʼu sei la hola parte iha buat polítiku nian. Loloos, Testemuña ba Jeová barak tama komarka tanba hili atu la apoia funu.” Mestra neʼe simu ninia esplikasaun no hatete katak nia la presiza hola parte. Maibé, ninia kolega sira komesa husu nia tanbasá nia la hola parte. Benjamin sente taʼuk no besik atu tanis. Maibé nia repete fali ninia liafuan ba ninia kolega sira kona-ba saida mak nia hatete ona ba mestra. Tuirmai, Benjamin fó-hatene ninia inan-aman katak nia sente Jeová ajuda nia atu defende ninia fiar.

9. Oinsá mak ita bele halo Jeová nia laran haksolok?

⁹ Tanba ita hili atu halo tuir Jeová, ema seluk nota katak ita la hanesan ho sira. Ita presiza aten-brani atu fó sai iha serbisu-fatin ka iha eskola katak ita mak Testemuña ba Jeová. Ema barak nia hahalok sai aat ba beibeik, tan neʼe karik susar ba ita atu moris tuir Bíblia nia prinsípiu sira no haklaken liafuan diʼak ba ema seluk. (2 Tim 1:8; 3:13) Hanoin-hetan nafatin katak ita “halo [Jeová] nia laran haksolok” bainhira ita aten-brani atu halaʼo moris neʼebé la hanesan ho ema neʼebé la serbí nia.—Prov 27:11; Mal 3:18.

TAU ULUK JEOVÁ IHA ITA-NIA MORIS

10. Oinsá mak mandamentu neʼebé temi iha Números 6:​6, 7 koko ema Nazireu nia fiar?

¹⁰ Lee Números 6:​6, 7. Ema Nazireu labele hakbesik ba mate-isin. Iha Bíblia nia tempu, susar ba ema Nazireu atu kumpre mandamentu neʼe se ninia família rasik mak mate. Tuir kostume iha tempu neʼebá, baibain família tenke besik ba mate-isin kuandu prepara atu hakoi. (João 19:​39, 40; Após 9:​36-40) Ema Nazireu nia juramentu hanetik nia atu halo tuir kostume sira-neʼe. Maski família rasik mak mate, ema Nazireu nafatin hatudu fiar metin hodi halo tuir sira-nia juramentu. Jeová hametin duni ema Nazireu sira-neʼe atu tahan susar neʼebé sira hasoru.

11. Ema Kristaun tenke hanoin-hetan saida bainhira halo desizaun neʼebé liga ho asuntu família? (Haree mós dezeñu.)

¹¹ Nuʼudar ema Kristaun, ita-nia dedikasaun ba Jeová mak buat neʼebé sériu.  Neʼe kona ita-nia desizaun no hahalok sira neʼebé liga ho asuntu família nian. Ita hakaʼas an atu tau matan ba ita-nia família nia presiza, maibé ita lakohi tau uluk família nia hakarak duké Jeová nian. (Mt 10:​35-37; 1 Tim 5:8) Dala ruma atu bele halo Jeová kontente, karik ita presiza halo desizaun neʼebé halo família la kontente.

12. Bainhira Alexandru hasoru susar iha família, saida mak nia halo, no saida mak nia la halo?

¹² Haree toʼok esperiénsia husi Alexandru no ninia feen Dorina. Depois sira estuda tiha Bíblia ba tinan ida, Dorina deside atu para estuda, no nia hakarak Alexandru mós para. Maibé ho kalma no respeitu Alexandru dehan katak nia hakarak kontinua estuda. Dorina la kontente no obriga nia atu para estuda. Alexandru hatete katak nia koko atu komprende Dorina nia sentimentu, maibé neʼe la fasil. Iha tempu neʼebé Dorina kritika no hatán nia ho hirus, nia sente atu para deʼit estuda. Maibé nia kontinua tau uluk Jeová, no iha tempu neʼebé hanesan nia hatudu domin boot no respeitu ba ninia feen. Ikusmai ninia ezemplu diʼak motiva Dorina atu estuda fali Bíblia no hetan batizmu.—Haree iha jw.org vídeo Alexandru no Dorina Văcar: “Domin mak pasiénsia no laran-diʼak” iha série “Lia-loos troka ema nia moris”.

13. Oinsá mak ita bele hatudu domin ba Jeová no ita-nia família?

¹³ Jeová mak kria arranju família nian, no nia hakarak atu ita-nia moris família kontente. (Éf 3:​14, 15) Se ita hakarak hetan kontente neʼebé loos, ita presiza halo tuir Jeová nia matadalan. Fiar bá katak Jeová hafolin sakrifísiu neʼebé Ita halo atu adora nia nuʼudar Ita tau matan ba família no hatudu domin no respeitu ba sira.—Rom 12:10.

ANIMA MALU ATU HALO SAKRIFÍSIU

14. Sé mak presiza liu ita-nia anima?

¹⁴ Ohin loron ema hotu neʼebé hili atu adora Jeová presiza prontu atu halo sakrifísiu tanba domin. Dala ruma neʼe la fasil. Oinsá mak ita bele ajuda malu atu halo sakrifísiu? Liuhusi liafuan neʼebé anima malu. (Job 16:5) Iha ka lae ema ruma iha kongregasaun neʼebé koko atu halaʼo moris simples hodi bele serbí Jeová liután? Ita hatene ka lae joven balu neʼebé aten-brani iha eskola hodi halaʼo moris neʼebé la hanesan ho ninia kolega sira maski susar? Oinsá ho estudante Bíblia  no maluk fiar-naʼin sira neʼebé karik sente susar atu hamriik metin tanba família kontra? Mai ita buka oportunidade hotu atu hametin sira hodi fó sai katak ita hafolin sira-nia sakrifísiu no aten-brani.—Flm 4, 5, 7.

15. Oinsá ema balu ajuda sira neʼebé serbí tempu-tomak?

¹⁵ Karik ita bele ajuda maluk fiar-naʼin neʼebé serbí tempu-tomak. (Prov 19:17; Ebr 13:16) Irmán ferik ida neʼebé hela iha rai-Sri Lanka hakarak tebes atu halo nuneʼe. Bainhira governu aumenta ninia pensaun, nia hakarak atu ajuda irmán pioneiru naʼin-rua neʼebé hasoru susar ekonomia atu bele kontinua pioneiru. Tan neʼe, nia deside atu fó osan ho montante espesífiku kada fulan atu ajuda selu sira-nia pulsa telefone. Irmán neʼe hatudu hahalok neʼebé furak!

16. Saida mak ita bele aprende husi ema Nazireu?

¹⁶ Ita bele aprende buat barak husi ema Nazireu nia ezemplu diʼak! No mós, ema Nazireu nia juramentu hanorin ita buat seluk tan kona-ba Aman Jeová. Jeová hatene katak ita hakarak halo nia kontente no prontu halo sakrifísiu hodi bele moris tuir ita-nia dedikasaun. Nia respeitu ita hodi fó ita oportunidade atu hili hodi hatudu domin ba nia. (Prov 23:​15, 16; Mc 10:​28-30; 1 João 4:19) Ema Nazireu nia juramentu hatudu katak Jeová haree no hafolin sakrifísiu neʼebé ita halo atu serbí nia. Mai ita deside metin atu kontinua serbí Jeová no prontu atu fó buat neʼebé diʼak liu ba nia.