1. Ino ty toe-tsaigne soa nanagna ty mpanompo i Jehovah taloha?

 SAROBILY ama’o vao ty fifandrambesa’o amy i Jehovah? Azo antoke zay! Faie tsy irehe avao ty mahatsapa hoe izay, fa maro ka ty ndaty tamy ty andro ty Baiboly nahatsapa hoe izay. (Sal. 104:33, 34) Maro ty manao sorogne amy ty fanompoagne i Jehovah. Izay ohatse ty raha natao ty ndaty atao tihoe Nazirita tamo o Israelitao eo. Faie ia iareo sady ino ty raha azontika ianaragne boake amy iareo?

2. a) Ndaty manao akore ty atao tihoe Nazirita? (Nomery 6:1, 2) b) Nagnino ty ila’e amo o Israelitao ro nifily ty ho Nazirita?

² Ty rehake tihoe “Nazirita”, le boake amy ty rehake Hebreo tihoe “Nifiliegne,” “Tafasarake,” ndra “Voatokagne.” Irehafagne ty hafanam-po ty Israelita raike nanao sorogne manokagne hoahy i Jehovah o rehake iohoe. Nengà ty Lalà i Mosesy hanao vava manokagne amy i Jehovah ty lahilahy naho ty ampela tamy izay, le nifily ty ho Nazirita agnate ty fotoagne voafaritse. a (Vakio ty Nomery 6:1, 2.) Naho fa nanao vava ty ho Nazirita ty Israelita raike, le nisy tari-dalagne tsy maintsy norihe’e. Nagnino ro nisy Israelita nifily ty ho Nazirita? Nanao izay iareo satria tena tea iareo ty Jehovah sady te hankasitrake ty fitahiagne maro nimea’e ka iareo.​—Deot. 6:5; 16:17.

3. Ino ty itoviza ty vahoan’Agnahare amy izao naho o Naziritao?

³ Naho fa nisoloagne ty “lalà i Kristy” ty Lalà i Mosesy, le tsy nisy Nazirita sasa ty amo o vahoan’Agnahareo eo. (Gal. 6:2; Rom. 10:4) Faie manahake o Naziritao avao, le mbe atoro o vahoa i Jehovah-o tie magniry hanompo i Jehovah amy ty fo  naho ty saigne vaho ty hery iareo iaby iareo. (Mar. 12:30) Manao vava hanompo i Jehovah tika naho fa manokagne ty fiaignantikagne ho aze. Miaigne mifagnarake amy ze vava nataontikagne zay tika, naho fa manao ty zoton’arofo i Jehovah sady manao sorogne mba hanompoagne aze. Handineke ty fomba nagnatanteraha o Naziritao ty vava natao iareo naho ty lesogne ianarantika boake amy iareo tika. b​—Mat. 16:24.

MIKEZAHA HAHAFOE TEGNA

4. Arake ty Nomery 6:3, 4; ino ty raha nitsapa ty fahafoezan-tegna o Naziritao?

⁴ Vakio ty Nomery 6:3, 4. Tsy nahazo ninon-toake naho raha boake amy ty voaloboke legne ndra maike o Naziritao. Nanagne zo hankamamy o raha rehoe ty ndaty nagnodidigne iareo sady toe tsy raty ka o raha reo. Rehafe ty Baiboly fa ‘mampifale ty fo o ndatio o divaio’ sady fagnomezagne boake aman’Agnahare. (Sal. 104:14, 15) Mila vognogne hampandefetse ty zo’e hankamamy ty raha tea’e areke ze Nazirita. c

5. Ino ty sorogne natao i Madián naho i Marcela, le nagnino iareo ro nanao izay?

⁵ Manahake o Naziritao, le mamoe raha maro ka tika mba hanompoagne i Jehovah. Dineho ty ohatse miomba i Madián naho i Marcela. d Tena nisoa ty fiaigna iareo mirovaly. Nanagne asa soa nahafaha iareo nitoboke amy ty tragno soa ty Madián. Faie te hampitombo ty fanompoa’e iareo. Mba hagnatratraragne izay, le nitapa-kevetse ty hanao fagnovàgne iareo. Hoe iareo: “Nagnegne ty fandania’ay zahay sady nifindra tamy ty tragno kedekede, le navili’ay ka i tobile’aỳ.” Tsy voatere nanao o fagnovàgne rehoe ty Madián naho i Marcela. Faie nifily ty hanao ireo iareo amy izay ho afake hampitombo ty fanompoa iareo i Jehovah. Nahafale iareo ze fanapahan-keve iareo zay.

6. Nagnino ty Kristiana amy izao ro manao sorogne? (Henteo i sarey.)

⁶ Mahafale ty Kristiana amy izao ka ty manao sorogne, mba hahafaha iareo hampitombo ty fanompoa iareo i Jehovah. (1 Kor. 9:3-6) Tsy také i Jehovah hanao o sorogne reo tika sady tsy tihoe raty i raha fa ataontikagne rey. Misy zao ohatse ty niala tamy ty asa’e, ty tragno’e, ndra nienga ty biby tezae’e. Maro  ka ty mifily ty tsy hanambaly ndra hanagn’anake. Ty ila’e ka mifindra amy ty toeragne ilaegne mpitory maro ndra tie tsy maintsy miala lavitse ty longo’e tea’e aza reke. Maro amantika ro manao o sorogne rehoe satria tikagne te hagnomey ze fara’e soa hoahy i Jehovah. Ko haligno fa sarobily amy i Jehovah ty sorogne ataontikagne mba hanompoagne aze ndra bey zay ndra kede.​—Heb. 6:10.

MIVOGNONA MBA HIAMBAKE AMY TY HAFA

7. Ino ty raha sarotse natrehe o Naziritao mba hitanagne i vava natao iareoy? (Nomery 6:5) (Henteo i sarey.)

⁷ Vakio ty Nomery 6:5. Tsy toko’e ho tapahegne ty volo o Naziritao. Izay ty mampiseho fa vognogne hanao ty zoton’arofo i Jehovah iareo. Arakarake ty halava ty fotoagne maha Nazirita ty Israelita raike, ty hahavy i volo’ey ho lava. Avy le ho hay o ndatio areke iareo. Naho manohagne ty safidy iareo ho Nazirita ty ndaty hafa sady magnaja izay, le ho mora amy iareo ty hiambake amy ty maro. Faie mampalahelo fa nisy fotoagne tsy nihajaegne o Naziritao tamy ty tantara o Israelitao. Tamy ty andro i Amosa mpaminany, le nimea o Israelita nivali-pinoagne reo divay o Naziritao, mba hahavy iareo tsy hitagne i vava natao iareo mba hifaly divaỳ. (Amosa 2:12) Tamy ze fotoagne zay, le tsy maintsy nila herim-po o Naziritao, amy izay iareo hahavita hitagne i vava natao’ey, le ty hiambake amy ty hafa.

8. Nagnino ro mampahery azo ty tantara i Benjamin?

⁸ Noho ty fagnampea i Jehovah, le afake ty hanagne herim-po sady hiambake amy ty hafa tikagne, ndra tie saro-kegnatse aza. Dineho moa ty ohatse miomba ty ajaja raike 10 taogne atao tihoe Benjamin a Norvezy agne toy. Nanao fandaharagne ty lakilasy misy iareo mba hanoroagne tie manohagne i aly a Ukraine agney. Nasaegne mba hanao hira naho akanjo misy loko famantaragne i Ukraine iareo. Nipay hevetse mba tsy hagnatrehagne i fandaharagney ty Benjamin, le nihalavitse i toeragne nanoagne azey. Faie nitrea i mpampianatsey reke, le nitokave’e tie: “Mbetoa malaky rehe, fa mandigne azo zahay!” Nagnatogne aze ty Benjamin sady tsy natahotse, le nirehake tama’e tie: “Tsy miomba ty atia naho ty aroa raho sady tsy mandrambe anjara amy ty politike. Izay ty mahavy ty Vavolombelo i Jehovah maro gadraegne satria iareo tsy magneke handeha hialy.” Nagneke i fagnazava’ey i mpampianatsey sady niala-tsiny amy i raha nisehoy. Faie mbe nagnontane aze ty anto’e nahavy aze tsy nandrambe anjara amy igne i mpiara-mianatse ama’e rey. Nivalike ty loha i Benjamin, le nitagny reke. Faie nanagne herim-po reke, le nagneregne nagnazava tamy  iareo ty raha nirehafe’e tamy i mpampianatsey. Tafara izay, le nirehake tamy i rae aman-drene’e rey ty Benjamin tie nagnampe aze hiaro ty finoa’e ty Jehovah.

9. Akore ty fomba hampifaleantika ty arofo i Jehovah?

⁹ Satria tika mifily ty hankatò i Jehovah, le izay ty hahavy ty ndaty magnodidigne hahavoamareke tie miambake amy iareo tika. Mila managne herim-po tikagne mba hampisehoagne tie Vavolombelo i Jehovah naho fa an-dakilasy agne ndra am-piasagne agne. Faie satria miharaty ty toe-tsay ty ndaty amy ty tontolo toy naho ty findesam-bata’e, le va’e tsy ho mora amantika ty hiaigne mifagnarake amy ty fitsipy ty Baiboly naho ty hitory i talily soay amy ty hafa. (2 Tim. 1:8; 3:13) Faie tadidio avao, fa ‘mampifale ty arofo i Jehovah’ tikagne naho fa vognogne hiambake amy ty ndaty tsy manompo Aze.​—Ohab. 27:11; Mal. 3:18.

ANÒ VOALOHAN-DRAHA AMY TY FIAIGNA’O TY JEHOVAH

10. Nagnino ro va’e hitsapa ty finoa o Naziritao ty fagnorihagne ty raha rehafe ty Nomery 6:6, 7?

¹⁰ Vakio ty Nomery 6:6, 7. Tsy toko’e hagnarine fate o Naziritao. Va’e hieretseretse rehe tie tsy olagne lahibey zay. Tamy ty andro ty Baiboly, le olagne lahibey hoahy o Naziritao zay naho fa longo’e maifitse aze ty nimate. Tsy maintsy nagnarine i fatey ty ndaty tamy izay naho fa nanao ty fombafomba iareo. (Jaona 19:39, 40; Asa. 9:36-40) Voafetra avao areke ty raha niazo o Naziritao natao mba hagnorihagne ty fombafomba mifandrambe amy ty ndaty mate. Ndra tie nalahelo aza ty longo’e naho fa nisy nimate, le nila nanagne finoagne matanjake avao iareo mba hitanagne i vava natao iareoy. Azo antoke fa nagnatanjake o mpanompo’e nahafoe tegna reo ty Jehovah mba ho afake hiatreke ty olagne nisy tamy izay.

11. Toko’e ho tapa-kevetse hanao inogne ty Kristiana naho fa handrambe fanapahan-kevetse miomba o keleiagneo? (Henteo i sarey.)

¹¹ Tena lahibey amantika Kristiana ty fanokanan-tegnantikagne hoahy i Jehovah. Hisy voka’e amy ty fanapahan-keventika naho ty raha ataontika hoahy ty keleiantikagne zay. Maregne fa miasa mafe tikagne mba hagnomeagne ty raha ilae ty keleiantika, faie tsy ze raha hahafale iareo ro lahibey amantikagne fa ty ahy i Jehovah. (Mat. 10:35-37; 1 Tim. 5:8) Kindraike areke, le va’e handrambe fanapahan-kevetse tsy tea o keleiantikagneo tika mba hampifaleagne i Jehovah.

12. Ino ty raha natao i Alexandru naho ty raha tsy natao’e naho fa niatreke raha sarotse reke?

 ¹² Dineho moa ty tantara i Alexandru naho i Dorina vali’e. Naho fa nianatse Baiboly tagnate ty tao’e raike iareo mirovaly, le nijanogne tsy nianatse ty Dorina, sady tea’e hijanogne ka ty Alexandru. Faie nisoa fagnahy ty Alexandru nirehake tama’e tie mbe hanohy avao reke. Tsy nifale ty Dorina, le nipay fomba mba hampijanognagne aze. Tsy nimora tama’e ty niatreke izay hoe ty Alexandru ndra tie nikezake hahatakatse ty raha nitsapa i vali’e aza reke. Nisy fotoagne reke nikivy le nite hijanogne tsy hianatse Baiboly naho fa nagnakiagne naho nanao rehake raty tama’e ty Dorina vali’e. Faie mbe natao i Alexandru voalohan-draha avao ty Jehovah sady nampiseho hatea naho fagnajagne i vali’e avao reke. Tamy ty fara’e, le nandrisike aze hiheregne hianatse indraike ty modely nimea i Alexandru, le tafara izay reke natao badisa.​—Henteo amy jw.org/tdx ao ty video tihoe Alexandru Naho i Dorina Vacar: “O Hatea zao Mahalin-draha, Soa Fagnahy” amy ty fizaràgne tihoe “Magnova Ndaty ty Hamarenagne.”

13. Akore ty hampisehoantikagne hatea i Jehovah naho ty keleiantika?

¹³ I Jehovah ty namorogne o keleiagneo sady tea’e ho sambatse iareo. (Efes. 3:14, 15) Faie naho te ho sambatse tikagne, le mila manao raha mifagnarake amy ty fomba fiheve i Jehovah. Azo antoke fa mankasitrake ty fahafoezan-tegna’o mba hanompoagne aze ty Jehovah naho ohatse rehe mikarakara soa ty keleia’o sady tea naho magnaja iareo.​—Rom. 12:10.

TOHAGNO ZE MANAGNE TOE-TSAIGNE MANAHAKE O NAZIRITAO

14. Ia ty tena mila ampaherezentika?

¹⁴ Toko’e ty hatea ty anto’e manoseke ze ndaty mifily ty hanao sorogne mba hanompoagne i Jehovah amy izao. Faie tsy mora ty manao izay. Akore ty hagnampeantikagne ze managne toe-tsaigne hoe izay? Manao izay tikagne naho mampahery iareo amy ty raha rehafentika. (Joba 16:5) Misy ndaty nagnatsotra ty fiaigna’e mba hampitomboa’e ty fanompoa’e i Jehovah vao ty amy ty fiangonagne misy azo? Mahafantatse tanora vognogne hiambake amy ty mpiara-mianatse ama’e vao rehe ndra tie tsy mora amy iareo aza ty manao izay? Akore ka zao ty amy ty mpianatse Baiboly ndra ty mpiara-manompo mikezake ty tsy hivalike avao ndra tie manohetse aza ty keleia’e? Anò ze azo’o atao mba hampaherezagne iareo, le rehafo amy iareo tie mahafale antika ty herim-po iareo naho ty raha atao iareo hoahy i Jehovah.​—Filem. 4, 5, 7.

15. Akore ty fomba nanohagna ty ila’e o mpanompo marain-tsy harivao?

 ¹⁵ Kindraike, le va’e ho afake hagnampe o Kristiana manompo marain-tsy harivao tika. (Ohab. 19:17; Heb. 13:16) Izay zao ty nifagniria ty rahavave raike bey taogne a Sri Lanka agne. Nitombo ty vola reterete niazo’e, le te hagnampe ty rahavave tanora roe mpisava lalagne mba hanohy avao ty fanompoa iareo reke ndra tie eo aza ty olagne ara-bola nanjò iareo. Nanapa-kevetse ty handoa ty credit iareo isam-bolagne reke. Tena soa ty toe-tsay o rahavave iohoe!

16. Ino ty raha azontika ianaragne boake amy ty Nazirita taloha?

¹⁶ Maro ty raha azontikagne ianaragne boake amy ty ohatse soa nimea o Nazirita talohao! Faie mampianatse raha antika miomba i Jehovah, i Raentikagne an-dagnitse agney o fandaharagne iohoe. Matoky reke fa magniry mafe ty hampifale aze tikagne sady vognogne ty hiaigne mifagnarake amy ty fanokanan-tegnantika. Mea’e tombotsoa mba haneho ama’e ty hateantikagne aze tikagne. (Ohab. 23:15, 16; Mar. 10:28-30; 1 Jaona 4:19) Aseho ty fandaharagne miomba o Naziritao fa voamare i Jehovah naho sarobily ama’e ty sorogne ataontikagne mba hanompoagne aze. Lonike areke tika mba ho tapa-kevetse ty hanompo i Jehovah avao sady hagnomey ze fara’e soa ho Aze.