1. Ginani egi vakhozeyi va Jehovha va gi ningago ngudzu lisima gukhugeya gale?

 INA U ngu ninga lisima wupari wago ni Jehovha? Khu lisine ina. Nigu khandruwe wenga. Gukhugeya gale, vathu nya vangi va ngu ninga lisima wupari wawe ni Jehovha. (Ndzi. 104:33, 34) Nya vangi va di dzi hiya silo nyo khaguri gasi gu thumeya Jehovha. Khiso va giredego Vanaziri va Israyeli wa gale. Va diri va mani, nigu ginani hi nga gi hevbulago khu giyeyedzo gyawe?

2. a) Va diri va mani Vanaziri? (Mitengo 6:1, 2) b) Khu ginani vambe Vaisrayeli va nga ba va hatha gu khala Vanaziri?

² Lito “Munaziri” khu Gihebheru la gu tshamuseya “Muthu a Hathidwego.” Lito leli la gu tshamuseya Vaisrayeli nya sighingi va nga dzi hiya silo nya singi gasi gu thumeya Jehovha khu ndziya nyo hathege. Nayo wa Mosi wu di gu dzumeleya mwama mwendro nyamayi gu gira gifungo nyo hathege ga Jehovha khu gu hatha gu vbanya nga Munaziri khu tepo nyo khaguri. a (Leri Mitengo 6:1, 2.) Gifungo gyogyo mwendro gitumbiso, gi di gu pata gu landrisa sileletelo nya gu vambe Vaisrayeli kha va nga ba va si landrisa. Khu ginani Muisrayeli nyo khaguri a nga ba a hatha gu khala Munaziri? Muisrayeli yoyo, a di gu kutswa khu lihaladzo a nga ba ari nalo khu Jehovha ni makategwa a nga hadzi gu ma mana. — Dhet. 6:5; 16:17.

3. Vathu va Nungungulu muhuno va gu fana kharini ni Vanaziri?

³ Tepo “nayo wa Kristo” wu nga tshikedza “Nayo wa Mosi” vathu va Nungungulu kha va nga ba va yede gu khala Vanaziri. (Gal. 6:2; Rom. 10:4) Ganiolu, gu fana ni Vanaziri, vathu va Jehovha  muhuno va gu simama gu mu thumeya khu monyo wawe watshavbo, mapimo ni tshivba yawe yatshavbo. (Marko 12:30) Ethu ha gu gira gifungo gyogyo tepo hi hendzeledzago womi wathu ga Jehovha. Gu vbanya khu gifungo gyogyo, sa gu pata gu gira gugola ga Jehovha hi bwe hi dzi hiya silo nyo khaguri gasi gu mu thumeya. Tepo hi na wonago edzi Vanaziri va nga vbanya khidzo khu gifungo gyawe, hi nga hevbula silo nya lisima maningano ni edzi hi nga vbanyago khidzo khu gifungo gyathu. b (Mat. 16:24) Hongoleni hi wona siyeyedzo nyo khaguri.

DZI EMISEYI GU DZI HIYA SILO NYO KHAGURI

4. Guya khu Mitengo 6:3, 4, silo muni Vanaziri va nga dzi hiya?

⁴ Leri Mitengo 6:3, 4. Vanaziri va di yede gu potsa gu seya wadwa ni gu hodza simbe silo, nya nga dziuvha. Vathu va nga ba va va randrede va di gu hodza mihandro yoyo kholu kha sa nga ba si vivbide gu gira isoso. Bhibhiliya ya gu tshamuseya ‘vhinyu yi tsakisago myonyo nya vathu’ nga ginigwa gitago khiyo ga Nungungulu. (Ndzi. 104:14, 15) Ambari olu silo sesi si nga ba si gira womi nya muthu wu tsakisa, Vanaziri va di dzi emisede gu si potsa. c

5. Silo muni Madián ni Marcela va nga hatha gu dzi hiya, nigu khu ginani?

⁵ Gu fana ni Vanaziri, anethu hi ngu dzi hiya silo gasi gu khozeya Jehovha tepo yatshavbo. Wona giyeyedzo gya Madián ni Marcela. d Patwa wowu nya Makristo wu diri ni womi nyo khadzisege. Madián a diri ni thumo nya wadi wu nga ba wu va dzumeleya gu lugari nyumba nya yadi. Ambari ulolo, avo va di vbweta gu gira nya singi thumoni ga Jehovha. Gasi gu vboheya misuwo yawe va di hunga gu vbindrugedza silo nyo khaguri. Vari khavo: “Hi di pheya gu thumisa gwadi dzitsapawu dzathu. Hi di fuluga hi ya lugari nyumba nya yidugwana hi bwe hi rengisa movha yathu.” Madián ni Marcela kha sa hunga gu va dzi hiya silo sesi, ganiolu va di hatha gu gira isoso gasi gu andrisa thumo nyo tshumayele. Va ngu dzipwa na va gu eneledwe ni gu tsaka khu makungo va ma hungidego.

6. Khu ginani Makristo muhuno ma dzi hiyago silo nyo khaguri? (Wona fotu.)

⁶ Vathu va Jehovha muhuno va ngu tsaka khu gu dzi hiya silo nyo khaguri gasi gu mu  thumeya. (1 Kor. 9:3-6) Jehovha kha hi gurumedzi gu gira isoso; ambari esi hi nga dzi hiya kha sa vivba. Khu giyeyedzo, vambe va ngu hatha gu mba manega ni dzindranga mwendro thumo va wu vbwetago. Vambe va ngu hatha gu mba tshadha mwendro gu mba velega sanana hwane nya gu ba va tshadhide. Vambe va ngu hatha guya thuma omu gu vbwetegago ngudzu giphaso ambari na si thula gu khala hwidzo ni dzipari dzawe ni valongo. Nya vangi gwathu va ngu dzi hiya silo nya singi kholu va gu vbweta gu gireya nya singi Jehovha. Tiyisega gu khuwe Jehovha a ngu tsaka ngudzu khu gu dzigaradza u gu girago gasi gu mu thumeya, gani gudugwana mwendro gukhongolo.— Hebh. 6:10.

YEYEDZA GU KHUWE U HAMBANIDE NI VAMBE

7. Khu ginani si nga ba si garadzeya Munaziri gu tadzisa gitumbiso gyaye? (Mitengo 6:5) (Wona fotu.)

⁷ Leri Mitengo 6:5. Vanaziri kha va nga ba va yede gu piya ndzudzu. Eyi yi diri mweyo nya dzindziya nya gu yeyedze gu khavo va ngu engisa Jehovha. Muisrayeli a gu khala Munaziri khu tepo nyo laphe, ndzudzu waye wu di hadzi gu dandra ngudzu si bwe si vbevbuga gu wonwa khu vambe. Nari khatshi vambe va di gu ningide githawo ni gu tiyisa ava va nga ba va hatha gu khala Vanaziri, si di hadzi gu mba va garadzeya gu tadzisa gifungo gyawe. Ambari ulolo, nya mba tsakisa khu gu Vanaziri va dziteponi dza Israyeli, dzimbe dzitepo kha va nga ba va ningwa githawo ni gu seketedwa. Dziteponi dza muprofeti Amosi, Vaisrayeli nya vawugeyi va di ninga ‘vhinyu Vanaziri gasi gu seya’ gasi gu va gira va si tadzisi gifungo gyawe. (Amosi 2:12) Dzimbe dzitepo, si di gu vbwetega gu Vanaziri va tiya-hwambo gasi va si kodza gu tadzisa gitumbiso gyawe ni gu mba dzumeleya gu kutsedzedwa khu vambe.

8. Matshango ya Benjamim ma gu gu tiyisa kharini?

⁸ Khu gu phaswa khu Jehovha, hi nga tiya-hwambo hi si giri esi vambe va girago ambari na hiri ni hwanga nya mavelego. Wona giyeyedzo gya Benjamim, Fakazi ya Jehovha ya Noruega a gu na ni 10 myaga. Khu kotani nya olu yi nga manega nyimbi Ucrânia, xikwatuno gwaye gu di manega gigiro gasi gu phasedzeya vathu va Ucrânia. Sanana si di kovhidharwi gu embeleya dzindzimo na si ambade sombo si gu na ni dzikori nya bhandhera ya Ucrânia. Benjamim a di hunga gu potsa gigiro gyogyo khu gu ema hwindzo. Ambari ulolo, moyo nya muhevbudzi waye a di mu rana khu lito nyo khugege khuye: “Delu enu u ta patana ni ethu. Hi gu virede!” Khu gutiya-hwambo Benjamim a di hidzimeleya muhevbudzi waye a mu embeya gu khuye: “Eni kha nyi pategi omu nya politika, ambari olu Dzifakazi nya dzingi dza Jehovha dzi nga khothedwa khu gu bomba gu  hongola nyimbituno.” Muhevbudzi waye pwisiside nigu lombide divalelo Benjamim a bwe a mu diga a hongola. Ganiolu, sihevbuli khwathu si diya mu wudzisa gu khiso khu ginani a nga mba hongola aya patana naso. Benjamim a di garadzega ngudzu nyo bwe a pheya gu liya, ambari ulolo khu gutiya-hwambo a di pheledza gu embeya sihevbuli khwathu esi a embedego muhevbudzi waye. Khu gu landreya, Benjamim a diya embeya vavelegi vaye edzi Jehovha a mu phasidego khidzo gu emeya gukhodwa gwaye.

9. Hi nga tsakisa monyo wa Jehovha khu ndziya muni?

⁹ Kha nga olu hi hungidego gu gira gugola ga Jehovha, vambe va ngu si kodza gu wona gu khavo hi hambanide navo. Hi yede gutiya-hwambo gasi gu dzi tivegisa gu khethu hi Dzifakazi dza Jehovha thumotuno mwendro xikwatuno. Tepo khiyo sigiro ni mavbanyelo nya litigo leli si engedzeyago gu vivba, adzina saye si na hi garadzeya gu vbanya khu matshina nya milayo nya Bhibhiliya ni gu embeya vambe mahungu nya yadi nya Mufumo. (2 Thim. 1:8; 3:13) Tepo yatshavbo, dundruga gu khuwe hi ngu “tsakisa monyo [wa Jehovha]” tepo hi tiyago hwambo hi yeyedza gu khethu hi hambanide ni vale va gu mba mu thumeya. — Mav. 27:11; Mal. 3:18.

THANGISA JEHOVHA WOMINI WAGO

10. Khu ginani giolovedzo gi gomogo ga Mitengo 6:6, 7 gi nga ba giri gilingo ga Vanaziri?

¹⁰ Leri Mitengo 6:6, 7. Vanaziri kha va nga ba va yede gu hidzimeleya muthu nyo gufe. Adzina hi nga pimisa gu khethu kha sa nga ba si va garadzeya gu gira isoso. Dziteponi nya Bhibhiliya, si di gu garadzeya Munaziri gu engisa gileletelo gegi ngudzu-ngudzu abari gu a di fedwa khu muthu a mu golago. Ga tepo yile, gu diri ni giolovedzo nya gu vathu va khala vbafuvbi ni muthu a fudego. (Joh. 19:39, 40; Mith. 9:36-40) Ambari ulolo, Munaziri kha nga ba a yede gu landrisa giolovedzo gegi. Ganiolu, tepo va nga ba va sodwa khu valongo vawe ga dzitepo dzile nyo garadze, avo va yeyedzide gukhodwa nyo tiye khu gu simama gu tadzisa gitumbiso gyawe. Khu lisine, Jehovha ningide tshivba vakhozeyi vaye nyo tumbege gasi va si kodza gu timiseya satshavbo sigaradzo sawe.

11. Ginani egi Mukristo a yedego gu dzi emiseya gu gira tepo a hungago makungo ma patago valongo vaye? (Wona fotu.)

¹¹ Kha nga Makristo, hi ngu ninga lisima gifungo gyathu nya gu dzi hendzeledze ga Jehovha. Isoso sa gu kuha esi hi hungago ni esi hi girago maningano ni mahungu ma patago valongo vathu. Hi ngu dzi garadzeya gu  sayisa valongo vathu, ganiolu kha hi thangisi gugola ga valongo vathu gu vbindra gugola ga Jehovha. (Mat. 10:35-37; 1 Thim. 5:8) Dzimbe dzitepo, valongo vathu kha va na nga tsaka khu makungo hi hungago gasi gu tsakisa Jehovha.

12. Gasi gu lulamisa gigaradzo gi nga ba gi romo ndrangani gwaye, ginani egi Alexandru a nga gira ni egi a nga mba gira?

¹² Wona giyeyedzo gya Alexandru ni mwangadzi waye Dorina. Hwane nya gu ba patwa wowu wu hevbude Bhibhiliya khu gipimo nya mwaga, Dorina a di hunga gu ema nigu a di gurumedza mwama waye gu ema nuye. Ganiolu, khu ndziya nyo rule Alexandru a di embeya mwangadzi waye gu khuye a na simama gu hevbula. Isoso kha sa tsakisa Dorina, khu kharato a di mu gurumedza gu ema gu hevbula. Alexandru zamide gu tugula gu khuye khu ginani mwangadzi waye a nga ba a gira silo khu ndziya yeyi, ganiolu kha sa mu vbevbugeya. Dzimbe dzitepo Dorina a nga ba a mu vala ni gu mu hlamula khu ndziya nya mba yadi, uye a di gu dogoreya gu ema gu hevbula Bhibhiliya. Ambari ulolo, Alexandru a di thangisa Jehovha womini waye nigu khu tepo yayimweyo a di yeyedza lihaladzo ni githawo mwangadzi waye. Khu guhegisa giyeyedzo gyaye nya gyadi gi kutside mwangadzi waye gu pheledza gu hevbula Bhibhiliya a bwe a bhabhatiswa. Wona vhidhyu umo nya jw.org yi gu khiyo: Alexandru and Dorina Văcar: “Lihaladzo li na ni gutimisela ni wuwadi” avbo nya gipandre, “Lisine li ngu vbindrugedza womi nya vathu.”

13. Hi nga yeyedza kharini lihaladzo Jehovha gumogo ni dzindranga dzathu?

¹³ Jehovha khuye a nga vanga dzindranga nigu o vbweta gu khuye dzindranga dzathu dzi tsaka. (Efes. 3:14, 15) Ha gu vbweta gu tsaka khu lisine, hi yede gu gira esi Jehovha a vbwetago gu khuye hi gira. Tiyisega gu khuwe Jehovha a ngu ninga ngudzu lisima gudzigaradza u gu girago gasi gu mu thumeya, tepo u khathaleyago ndranga yago ni gu yi yeyedza githawo ni lihaladzo. — Rom. 12:10.

TIYISANANI KHU GYANU GU FANA NI VANAZIRI

14. Khu vamani ngudzu-ngudzu hi yedego gu va tiyisa khu malito yathu?

¹⁴ Vatshavbo va hathago gu khozeya Jehovha muhuno, va yede gu dzi emiseya gu dzi hiya silo nyo khaguri khu gu kutswa khu lihaladzo. Dzimbe dzitepo kha si vbevbugi gu gira isoso. Hi nga phasana kharini gasi gu yeyedza likhalelo leli? Khu gu tiyisa vambe khu malito yathu. (Joba 16:5) Ina womo muthu nyo khaguri libandlani gwago a zamago gu vbevbugisa womi waye gasi gu gireya nya singi Jehovha? Ina u nguti vaphya nyo khaguri va dzi garadzeyago  gu yeyedza gu khavo va hambanide ni vambe xikwatunu, ambari sa gu ba si va garadzeya gu gira isoso? Mwendro u nguti sihevbuli nya Bhibhiliya ni vandriyathu nyo khaguri si va garadzeyago gu simama na va tumbegide khu kotani nya olu va wugedwago khu valongo vawe? Hongoleni hi londrola yatshavbo mathomo gasi gu ganeya ni vandriyathu vovo nyo golege, hi va yeyedza edzi hi tsakago khidzo khesi va gireyago Jehovha ni gu simama na va tumbegide. — File. 4, 5, 7.

15. Vambe va gu phasedzeya kharini vandriyathu va gomogo thumoni nya tepo yatshavbo?

¹⁵ Dzimbe dzitepo, hi nga phasa vandriyathu va gomogo umo nya thumo nya tepo yatshavbo. (Mav. 19:17; Hebh. 13:16) Ogu gu diri gudogoreya ga ndriyathu moyo nya nyamayi a dandridego khu tanga a vbanyago Sri Lanka. Tepo khiyo mufumo wu nga engedzeya dzitsapawu dzi nigwago vale va dandridego khu tanga, uye a di gu vbweta gu phasa vaphya vavili nya vapiyonera gu simama thumoni gwawe ambari olu a nga ba a tshangana ni sigaradzo nya gu hamuge dzitsapawu. Khu kharato, a di hunga gu va phasedzeya khu ngima ni ngima khu gu va livbeya kredhito. Ndriyathu yoyo a na ni likhalelo nyo mbure.

16. Ginani hi gi hevbulago khu giyeyedzo gya Vanaziri?

¹⁶ Hi nga hevbula silo nya singi khu giyeyedzo gya Vanaziri! Ambari ulolo gifungo gyawe gi ngu hi hevbudza silo nya singi khu Jehovha. Uye a ngu dziti gu khuye hi ngu dzina ngudzu gu mu tsakisa nigu hi dzi emisede gu dzi hiya silo nyo khaguri gasi gu tadzisa gifungo gyathu. Uye a ngu hi ninga lithomo gasi hi yeyedza lihaladzo hi gu nalo khuye. (Mav. 23:15, 16; Marko 10:28-30; 1 Joh. 4:19) Gifungo gya Vanaziri, gya gu hi hevbudza gu khigyo Jehovha a ngu wona gudzigaradza hi gu girago nya gu dzi hiye silo nyo khaguri gasi gu mu thumeya. Khu kharato, hongoleni hi simama gu gira satshavbo hi si kodzago gasi gu thumeya Jehovha.