1. Joŋre maa hõn de woore ga jar goŋ Jeofa maa ɓaan naa wo nen ɓe go là?

 NDO mbo de da Jeofa yawlà? Sen go tinoo tu! Day á bay ndo boŋ wa. Hãã le ɓaa, jar ngaɓa debaŋ hay wo ɗiggi doo ndo no lay. (Siŋ. 104:​33, 34) Jar debaŋ wo go de hã see ɓaara maa goŋ Jeofa. Sen diŋ fẽn maaga jar Nasiriyad hay wo le joŋge ɓaa Israyel mo lay no. Nasiriyad sen hay diŋ wose wo là, day naa da’ mayse see saɓlaŋ ɓaara là?

2. (a) Jar Nasiriyad hay wo diŋ wose wo là? (Keege jar Israyel wo 6:​1, 2) (b) Wer mayse ga jar Israyel maa po maŋ wo ga saara kol jar nasiriyad là?

² “Nasiriyad” a le see wããre maa jag hebre ga da wããge ga “Jobo maaga go boŋ,” “Jobo maaga go de caa nen boŋ,” noga “Jobo maaga go de hã see ɓe.” Wããre sen hay ngaɓge diŋ jar Israyel maaga hay hã wo see ɓaara go ti joŋre maa ni Jeofan ɓil sog boŋ wo mono. Jag liŋgi maa ni Moyisn hay de hã faage ga jee tware noga wãy mbe de kããge maa maŋge ga se hã see se go ne Jeofa de kolge go Nasiriyad de ngar ngeel po ta’a. a (Jaŋ Keege jar Israyel wo 6:​1, 2.) De maaga jee Israyel po hã see ɓe we go Nasiriyad no, ni se de sãy joŋ fẽẽre po maaga jar Israyel lan bay wo de joŋ rage wa. Day, wer mayse ga jee Israyel kol Nasiriyad so là? Jee Israyel maaga joŋ sen mokay diŋ jobo maaga dage Baa de srog glog ɓe, lan werga á de sãy joŋ suse’ ne Jeofa ti kado Ɓe maa de woore wo no.—Dog. 6:5; 16:17.

3. Ti ɓaŋ maa hõn ga jar maa ni Baan wo wara doo jar Nasiriyad wo no lay là?

³ De maaga “jag liŋgi maa ni Yeson” coo jag liŋgi maa ni Moyisn go mono, jar maa ni Baan bay wo kol Nasiriyad wa so.  (Gal. 6:2; Rom. 10:4) Amaa, doo jar Nasiriyad wo ne lay, jar maa ni Jeofan wo wara de naa nen ɗiggi maa joŋ joŋre ne hẽn go de jiili ɓaara ɓuy, de mnaysee ɓaara ɓuy, de ɗiggi ɓaara ɓuy, lan de ẽgre ɓaara ɓuy. (Mark 12:30) Naa wãã ne Jeofa ga naa go maa joŋ joŋre ne hẽn de maaga naa hã see naa go ne hẽn nen tosge mono. Maa ga seele naa mo hay de tabge de hãge see naan mono, da ga naa mo hay joŋ dage Jeofa, lan naa hã see naa go ti joŋre ne hẽn ɓil sog boŋ. Naa yaŋ frug nen wããre maaga Nasiriyad hay wo bag jag hãge see ɓaaran go na bagge la no, naa had mopo see ɓaara ni de woore maa bag jag hãge see maa ni naan go lay. b (Mat. 16:24) Naa ko wee saɓlaŋ po wo la mbag ɗa.

HÃGE SEE ƁO GO DE SEE ƁO TI JOŊRE MAA NI BAA NO

4. Doo maaga Keege jar Israyel wo 6:​3, 4 wãã ne mono, jar Nasiriyad da’ wo liwgi mayse là?

⁴ Jaŋ Keege jar Israyel wo 6:​3, 4. Jar Nasiriyad mo hay joŋ wo nen ɗaw see ɓaara see yii wo de fẽẽre maa de joŋge de tlalum. Á de joŋ wo nen jo mo joge maa de joŋge de tlalum ga, day á re le’ge tlalum maa depãy ga lay, maa de heeg ga lay. Jar maa see ɓaaran hay wo kee rege sen wo, werga mopo hay bay de ɓlagge ti rege sen wo wa. Bible ngaɓ ga “yii maga fruy ɓil “ diŋ kado maaga Baa hã ne. (Siŋ. 104:​14, 15) Amaa, koh de maaga fẽẽre sen joŋ mbaara ga jee táabay mo hay de fruygi nen naw ɓe debaŋ laybla mono, jar Nasiriyad men wo fẽẽre sen wo go de jiili ɓaara ɓuy. c

5. Hãge see ti joŋre maa hõn ga Madiyaŋ wo de Marsela maŋ wo ga saara joŋ ne là?

⁵ Doo jar Nasiriyad wo no lay, naa hã wee see naa go maa goŋ Jeofa ɓil sog boŋ. Sen doo saɓlaŋ Madiyaŋ wo de wãy ɓe Marsela d. Blo se wo de wãy ɓe hay wo de fruygi nen ngeel maa de woore. Madiyaŋ hay joŋ joŋre po ga hã solay ne hẽn debaŋ nen maaga saara baa tiŋ maa kluu de woore. Amaa, saara de sãy joŋ joŋre ne Jeofa de peel ni. Maa bag jag ɗiggi ɓaara sen go, á maŋ wo ga saara mo coo fẽẽre po wo. Á wãã wo ga: “wùr men yeeɗ fẽẽre po wo go see ɓaara, wùr ya’ ɓil tiŋ maa klee, lan wùr yee moda wùrn go pa”. Á hay bay diŋ doole ga Madiyan wo de Marsela mo joŋ wo doo sen ne wa—saara maŋ ga saara joŋ sen werga saara de sãy joŋ joŋre ne Jeofa de peel ni. Á wo  patala de fruygi lan de da’ see ɓaara wer ɗiggi ɓaara se ga á maŋ wo mono.

6. Wer mayse ga kretiyẽ hã wo see ɓaara go ti joŋre ne Baa wara là?(Ko foton lay.)

⁶ Krétiyẽ maa waran fruy wo debaŋ ti hãge see ɓaara maaga á hã wo ti joŋre maa ni Baa mono. (1 Kor. 9:​3-6) Jeofa bay joŋ doole naa maa hã see naa ne hẽn wa, day fẽẽre maaga naa men ra go maa hã see naa ti joŋre ne hẽn bay wo de ɓlagge wa lay. Ko ba ɗa, jar maa po men wo joŋre maaga hay de cõõre jag ɓaara go, noga tiŋ ɓaara maa de woore go. Jar maa po wo ngaɓa ya’ wo naw dage kããra ɓaara, noga maŋ wo ga saara mo biŋ weere blam maaga saara da kããra mo wa. Maa po maŋ wo ɓaaran lay ga saara mo see ti ngeel maaga à de sãy kayge ti ni, koh mo hay ba hãã see jar maa liŋ ni ɓaara wo. Jar yoo naa ngaɓa hã wo see ɓaara go ti joŋre ne hẽn diŋ werga á wo de sãy hã fẽn maaga daŋgo nen ɓaara ne Jeofa. Hay go de bawge jag jiili ɓo ga Jeofa ko hãge see maaga ndo hãn go ti joŋre ne hẽn, kluu, noga mẽ’ ɓuy, doo mopo maaga daŋgo nono.—Heb. 6:10.

HAY GO DE HÃ SEE ƁO MAA JOŊGE SARA

7. Wer mayse ga á gaali ne jee Nasiriyad maaga á mo bag jag ɗiggi hãge see ɓen go là? (Keege jar Israyel wo 6:5) (Ko foton lay.)

⁷ Jaŋ Keege jar Israyel wo 6:5. Jar Nasiriyad du’ wo saŋ mo cẽẽti ti ɓaara ga. Sen diŋ ɗeŋ maaga á hay wo ngaɓge ne Jeofa ga saara de hoo sug ti ɓe. Hayga jee Israyel po joŋ nasiriyad we nen kiŋgi pur no, riŋ ɓe kol de pããrege. De sen kay jar lan ko go deparday tu ga á diŋ nasiriyad. Hayga jar maa see ɓen yaŋ wo kayge ɓe maa bag jag hãge see ɓen go no, se soɗ ne de gayri ga. Amaa ren so diŋ ga, le Israyel de ngar ngeel maa po ta’, à hay bay kee nasiriyad wo wa noga bay hoo sug ti ɓaara wa lay. Ti wur maa ni profed Amos mono, aposta maa Israyel “joŋ [wo] nen hã yii ne jar maga wo de joŋ nasiriyad mono.” Maapo ga sen diŋ maa srog glog ɓaara go ɗiigi ne hãge see ɓaara maaga á wãã wo ga saara jo yii gan ti. (Amos 2:12) De ngar ngeel po ta’, jar Nasiriyad hay wo de sãy coɓge ti maa bag jag hãge see ɓaaran go, lan maaga saara mo hay sara de jar lan wo no.

8. Re maaga da’ Benjamin jor glog ɓo na jorge là?

⁸ De kayge maa ni Jeofan, naa joŋ mbe yaŋ de coɓge maaga naa joŋ sar de jar lan, koh naa mo biŋ ba le depãy. Naa ko wee saɓlaŋ Benjamin, sedeewa Jeofa po kiŋgi 10 wo Norveje mo ɗa. Jar maa ti lakol ɓaara joŋ wo tayge po maa kay sir Ukrene blam durgi maaga hay joŋ wo ni mono. À hay wii weere maa kleere wo ga á mo ‘waa wo siŋ de hõõbe ti de maŋ drapo maa Ukrene no. Benjamin hay go de  maŋge peel bol ga se mo goŋ drapon wa de ooge le go hãã de yoŋre. Amaa, wãy maa had ragen ko ne, raw ngar jag ne hẽn ti kloŋ ga: “Ndo a le da’ wùr la deparday tu. Wùr ɓuy de gor moge!” Benjamin coɓ see ɓe, ya’ le see wãy no, day wii ga: “Ndi bay maŋge ti ɓaŋ poltik po wa, day ndi bay kal see ɓi wo yoo ɓay ti siŋ poltik ni wa. Day ti wur sen sedeewa Jeofa po hay wo ti daŋgay debaŋ wer maaga saara la dayge woge ti durgi ga mono.” Wãyn yãã mbe ɗiggi ɓe se no, lan wii ne hẽn ga á hay bay mbe nen ‘waa siŋ sen wa. Blam mokay, kããre ɓen le’ wo wii jag ɓe ga wer mayse ga á laa kalge yoo saara ga là. Ɓil Benjamin kal sõõge nen maaga se hay day raage. Amaa á fer wãã tee wããre maaga se hay wãã ne wãy maa had ragen ne kããre ɓen wo de coɓge pa. Go blam mokay, Benjamin wãã ne pããre ɓe wo ga se ko ga Jeofa kay se maa wããge go ti hãge ɓil se.

9. De ɗeŋ maa hõn ga naa fruy ɓil Jeofa là?

⁹ Werga naa maŋ ga naa hoo sug diŋ ti dage Jeofa so mono, naa joŋ sar de jar lan wo. Naa de sãy coɓge ti maa wããge go ne jar ti lakol noga ti ngeel joŋre naa ga naa diŋ sedeewa Jeofa. Werga joŋre jar maa ti tamsirn see de baywoore de peel de peel ni so mono, maapo ga se joŋ see naa de gayri debaŋ maa seege doo maaga jag liŋgi maa ni Jeofan da nono, lan maa sii wããre maa de cõõren go ne jare. (2 Tim. 1:8; 3:13) Naa mo hay wee de kaŋge ti naa ga naa “joŋ tum diŋ fẽn maa fruy ɓil Jeofa” de maaga naa maŋ ga naa mo hay sar de jar maaga bay wo goŋge ɓe wa mono.—Jõõ. 27:11; Mal. 3:18.

HAY TUM ƁO’ JEOFA GO PEEL NEN NAW ƁON ƁUY

10. Ti baŋ maa hõn ga hooge sug ti jag liŋgi maa ɓil Keege jar Israyel wo 6:​6, 7 hay diŋ re maa de gayri see jar Nasiriyad wo là?

¹⁰ Jaŋ Keege jar Israyel wo 6:​6, 7. Jar Nasiriyad hay bay wo de kããge maa ya’ge see húuli wa. Maapo, nday ɗig ga sen mokay bay diŋ hãge see ti joŋre kwũy wa. Ti wur maa ɓaan mono, jee maaga diŋ Nasiriyad ko jag liŋgi sen mokay diŋ re maa de gayri debaŋ, de maaga jee ɓe maa mbaŋ húu we no. Jag liŋgi maa ti ɓaŋ húuli ti wur sen hay diŋ ga ndo de hay ti jeŋ húuli jee ɓon maŋ. (Jaŋ 19:​39, 40; Joŋre 9:​36-40) Jee maa de hã see ɓe Nasiriyad bay maa hoo sug ti jag liŋgi sen wa so. Koh á mo hay ba diŋ re maa ɓi feele ɓaara ti wur húuli maa cege debaŋ, jar Nasiriyad hay wo go ɓo’ nen hãge ɓil ɓaara maa kwũyn de  hoo sug ti hãge see ɓaara no. Sen go tinoo tu ga Jeofa hay hãã ẽgre ne jar ɓe maa goŋge ɓe de hã sen wo, maa ɗiigi go ne re maaga hay wo daɗ rage mo ti.

11. Kretiyẽ joŋ go de bawge jag jiili ɓe maa joŋ mayse ti ɓaŋ re maa ɓi feele wo là? (Ko foton lay.)

¹¹ Naa kretiyẽ naa ko hãge see naa ti joŋre ne Jeofa bay diŋ fẽn foo wa. Day se kay naa maa maŋ ɗiggi ti ɓaŋ re maa ti feele naa wo. Naa joŋ joŋre debaŋ maa bag jag fẽẽre maaga jar maa ɓi feele naa wo de sãy ɓaara ti mo go, amaa, naa ɓo’ fẽẽre maaga jar maa ti feele naa wo de sãy ɓaara ti go peel maaga Jeofa caa põõ ɓaara ti boŋ ga. (Mat. 10:​35-37; 1 Tim. 5:8) Day maapo, se joŋ ga naa mo maŋ diŋ ɗiggi maaga bay de cõõre jag jar maa liŋ ni naan wo wa, amaa, diŋ maaga co jag Jeofa.

12. De maaga Alexandru hay nen re maa ɓi feele mono, á joŋ mayse là, day se joŋ mayse ga là?

¹² Naa ko saɓlaŋ Alexandru wo de wãy ɓe Dorina ɗa. Blam maaga á had wo Bible go nen kiŋgi boŋ mokay, Dorina maŋ ɗiggi ga se had Bible ga so, lan se hay da pa ga Alexandru mo men go lay. Amaa, se wãã ne hẽn desãy, lan go pah tu ga se men had Bible ga. De sen mokay, ɓil Dorina hay bay go feh wa, day, se hay gus ga se doole war ɓe maaga á mo men hadge no. Alexandru wãã ga se hay gus ga se ko ɗiggi ɓe ga wer may ga á ɗig ne la, amaa á hay bay see se gus wa. Day maa po de maaga Dorina mbiɗ foo ɓe, lan fer wããre ne hẽn de baywoore mokay, se hay de sãy men had Bible go ti. Amaa, Alexandru dur mbe maa ɓo’ Jeofa go peel fẽẽren ɓuy, ɓo’ nen dage ɓe maa kwũyn go see Jeofa, de hoo sug ti ɓe, lan ngaɓ dage ɓe ne wãy ɓe lay. Ɓo’ge ti ɓen so diŋ ga saɓlaŋ ɓe maa de wooren jor glog wãy ɓe maa ferge had Bible tigriŋ, lan se joŋ batem go pa.—Ko videyo maaga wãã ga Alexandru et Dorina Văcar : “L’amour est patient et bon.” ɓil jw.org.

13. Naa joŋ joŋge maa ɓo’ nen dage naan go see Jeofa, lan see jar maa ɓi feele naa wo là?

¹³ Joŋ ɓi feele wo diŋ Jeofa, day se da ga naa mo hay ti desãy lay. (Efe. 3:​14, 15) Hayga naa da we ga naa mo hay ti desãy no, ni naa mo dur maa joŋ fẽẽren doo maaga ɓil Jeofa da nono. Hay wee go de kaŋge ti ɓay ga durgi ɓay maaga nday dur maa joŋ joŋre ne Jeofa de maaga nday de ko de el jar maa ɓi feele ɓay wo, lan nday joŋ ra de dage, de hooge sug lay de cõõre jag Jeofa.—Rom. 12:10.

JOR WEE GLOG KÃÃRA MAA JOŊGE DOO JAR NASIRIYAD WO NO LAY

14. Naa hay dur maa naa nen dage naa go nen wããre naa debaŋ diŋ ne wose wo là?

¹⁴ Jar maaga maŋ wo wara ga saara goŋ Jeofa mo hay wo hã see ɓaara go ti joŋre ne hẽn diŋ de dage ɓaara. Day maapo, se bay gus wa.  Naa joŋ joŋge maa kay kããra maa naa nen hãge see naan go ti joŋre maa ni Jeofan là? Diŋ de jorge glog kããra de wããre maa jag naa wo. (Job 16:5) Ndo yaŋ de ko jar ti tayge ɓo maaga men wo fẽẽre ɓaara wo go wer joŋre maa ni Jeofan yaw? Ndo yaŋ de ko maa jõõre noga tigliiri po wo ga dur wo ga saara mo hay sara de jar lan ti lakol, koh de maaga á bay mbe gus do ɓaara maa joŋge wa mono? Naa wãã ti jar maaga wo de tĩĩ had wããre Baa defay de sedeewa Jeofa wo, ga yiŋ wo de bon do jar maa liŋ ni ɓaara wo wer wããre Baa na ga hãyla? Dur go de ẽgre ɓo ɓuy maa coɓ nen ɓaara, maa wããge ne hara ga naa hoo sug ti ɓaara ti coɓge ɓaara ti joŋre maa ni Jeofa no—Flm. 4, 5, 7.

15. Jar maa po joŋ wo joŋge maa kay jar maaga hã wo see ɓaara go sag sag ti joŋre ne Baa maa tum là?

¹⁵ Day maapo, naa joŋ mbe de kããge maa kay kretiyẽ maaga wo go tum de hã see ɓaara sag sag ti joŋre maa ni Baa mono. (Jõõ. 19:17; Heb. 13:16) Sen diŋ fẽn maaga mãygemanbe po go de garge wo Sri Laŋka hay da ga se joŋ ne mono. De maaga á ko ga à ya’ suŋgu few sen ciŋ ni mo kay, se raw ga se hã kayge ne mãyregemaare naa piyoniyẽ po wo ɓog maaga á mo ya’ wo wer joŋre siigi wããre Baa ɓaaran ciŋ ni, koh de maaga ngeel hay de gayri see ɓaara mono. Á ngaɓ suŋgu po go ta’ maaga se hãn ne hara tum nen few maa laa kredi ɓaara. Mokay see ɓay bay diŋ ɗiggi maa de woore wa!

16. Naa had mayse ti ɓo’ge faage Nasiriyad maa ɓaan là?

¹⁶ Naa mbe de kããge maa had fẽẽre ngaɓa see jar Nasiriyad maa ɓaan wo debaŋ! Day, hãge see ɓaaran had fẽẽre po wo ne naa ti Jeofa, Pan naa maa ciŋ no. Á de koge ga naa de sãy maaga naa mo co jag see, lan ga naa de sãy bag jag hãge see naan go ti joŋre ne hẽne. Á hoo sug ti naa de men wosela ɓuy naa nen dage ɓe go see ɓe de ɗiggi ɓe. (Jõõ. 23:​15, 16; Mark 10:​28-30; 1 Jaŋ 4:19) De maaga Jeofa ɓo’ faage Nasiriyad se ngaɓ ga á de ko nen ti ɓe, lan se co jag ɓe de maaga naa hã see naa go ti joŋre maa ɓen mono. Da ga naa mo hay go de baa wer tum maa joŋ joŋre ne Jeofa go de jiili naa ɓuy.