NKHANI YAKUSAMBIRA 7
SUMU 51 Ndise Ŵakujipeleka kwa Chiuta!
Ivyo Tingasambirako ku Ŵanaziri
“Ni mutuŵa kwa Yehova mazuŵa ghose gha Unaziri wake.”—MAŴA. 6:8.
FUNDO YIKURU
Umo chiyelezgero cha Ŵanaziri chingatovwilira kuti titeŵeterenge Yehova na mzimu wakujipata kweniso mwachikanga.
1. Kasi ni mzimu wuli uwemi uwo ŵateŵeti ŵa Yehova ŵawulongora kwamba kale?
KASI mukumutemwa chomene Yehova? Tikukayika yayi kuti mukumutemwa! Nakuti muli mwekha yayi. Kwamba waka mu nyengo yakale, ŵanthu ŵanandi ŵalongora kuti ŵakumutemwa chomene Yehova. (Sal. 104:33, 34) Ŵanandi ŵajinora vinthu vinyake kuti ŵateŵetere Yehova. Ivi ndivyo Ŵanaziri ŵa mu nyengo ya Ŵaisrayeli ŵakachita. Kasi Ŵanaziri ŵakaŵa anjani, ndipo tingasambirako vichi ku chiyelezgero chawo?
2. (a) Kasi Ŵanaziri ŵakaŵa anjani? (Maŵazgo 6:1, 2) (b) Chifukwa wuli Ŵaisrayeli ŵanyake ŵakasankha kuŵa Ŵanaziri?
2 Lizgu lakuti “Munaziri” lili kufuma ku lizgu la Chihebere ilo likung’anamura ‘Wakusoleka,’ “Wakupatulika,” panji “Wakupelekeka.” Lizgu ili likalongosoranga vya Muisrayeli wamwamphu uyo wajinora vinthu vinyake mwakuti wateŵetere Yehova munthowa yapadera. Dango la Mozesi likazomerezganga mwanalume panji mwanakazi kupanga chilapo chapadera kwa Yehova pakusankha kuŵa Munaziri kwakanyengo. a (Ŵazgani Maŵazgo 6:1, 2.) Para Muisrayeli wapanga chilapo chakuŵa Munaziri, wakeneranga kulondezga ulongozgi uwo Ŵaisrayeli ŵanyake wose ŵakalondezganga yayi. Ipo chifukwa wuli pera Muisrayeli wakasankhanga kuŵa Munaziri? Wakwenera kuti wakachitanga nthena chifukwa cha kumutemwa chomene Yehova, kweniso wakakhumbanga kuwonga kufumira pasi pa mtima vitumbiko ivyo wasanga.—Doto. 6:5; 16:17.
3. Kasi ŵateŵeti ŵa Chiuta mazuŵa ghano ŵakuyana wuli na Ŵanaziri?
3 Ndondomeko yakuŵa Munaziri yikamara “dango la Khristu” lati lanjira m’malo mwa Dango la Mozesi. (Gal. 6:2; Rom. 10:4) Ndipouli, nga umo vikaŵira na Ŵanaziri, ŵanthu ŵa Yehova mazuŵa ghano ŵakulutilira kulongora kuti mbakukhumbisiska kumuteŵetera na mtima wawo wose, umoyo, maghanoghano, na nkhongono zawo zose. (Mrk. 12:30) Nase tikuchita chilapo kwa Yehova para tajipeleka kumuteŵetera. Kuti tichite mwakukolerana na chilapo ichi, tikwenera kuchita khumbo la Yehova na kujinora vinthu vinyake mwakuti timuteŵetere. Apo tikusanda umo Ŵanaziri ŵakachitiranga vinthu mwakuyana na chilapo chawo, tingasambirako vinthu vyakuzirwa vyakukhwaskana na umo nase tingachitira mwakuyana na chilapo chithu. b (Mat. 16:24) Tiyeni tiwone viyelezgero vinyake.
ŴANI ŴAKUKHUMBISISKA KUJINORA VINTHU VINYAKE
4. Kuyana na Maŵazgo 6:3, 4, kasi Ŵanaziri ŵakalongora wuli mzimu wakujinora?
4 Ŵazgani Maŵazgo 6:3, 4. Ŵanaziri ŵakazomerezgekanga yayi kumwa moŵa na chilichose chakufuma ku mpheska, nga ni mpheska zakomira panji ziŵisi. Ŵazengezgani panji ŵabwezi ŵawo, nyengo zose ŵakaryanga vyakurya vyanthena ivi, ndipo chikaŵa chakwenelera kuchita nthena chifukwa pakaŵavya uheni uliwose. Baibolo likuyowoya kuti “vinyo . . . likukondweska mtima wa munthu,” ndipo ntchawanangwa chakufuma kwa Chiuta. (Sal. 104:14, 15) Kweni Ŵanaziri ŵakajinora vinthu vyose ivi. c
Kasi ndimwe ŵakukhumbisiska kujinora vinthu vinyake nga umo Ŵanaziri ŵakachitira? (Wonani ndime 4-6)
5. Kasi Madián na Marcela ŵakasankha kujinora vichi, ndipo chifukwa wuli?
5 Nga Ŵanaziri, nase tikujinora vinthu vinyake kuti titeŵetere Yehova mwakukwana. Wonani chiyelezgero cha Madián na Marcela. d Mbumba iyi yikakhalanga umoyo wa wofuwofu. Madián wakaŵa pa ntchito ya pachanya ndipo iyo na muwoli wake ŵakakhalanga mu nyumba yakudura. Ndipouli, ŵakakhumbanga kuchita vinandi pakuteŵetera Yehova. Kuti ŵafiske chilato ichi, ŵakawona kuti ŵasinthe vinthu vinyake. Iwo ŵakati: “Tikachepeska bajeti yithu. Tikasamira mu nyumba yichoko, ndipo tikaguliska galimoto yithu.” Madián na Marcela ŵakakhumbikwiranga kuti ŵasinthe vinthu vyose ivi yayi, kweni ŵakachita nthena kuti ŵasazgireko uteŵeti wawo. Sono mbakukhorwa, ndipo mbakukondwa chifukwa cha ivyo ŵakasankha.
6. Chifukwa wuli Ŵakhristu mazuŵa ghano ŵakujinora vinthu vinyake? (Wonaniso chithuzi.)
6 Mazuŵa ghano, ŵanthu ŵa Yehova ŵanandi mbakukhumbisiska kujinora vinthu vinyake mwakuti ŵachite vinandi pakuteŵetera Yehova, ndipo ŵakuŵa na chimwemwe. (1 Kor. 9:3-6) Yehova wakuchita kutituma yayi kuti tijinore vinthu vinyake, ndipo vinthu ivi ni viheni yayi pavyekha. Mwachiyelezgero, ŵanji ŵakusankha kuleka nyumba, viŵeto, panji ntchito iyo ŵakayitemwanga. Ŵanyake ŵasankha kuleka dankha kunjira mu nthengwa, panji kuŵa na ŵana. Ŵanyakeso ŵasankha kukateŵetera ku malo uko kukukhumbikwira wovwiri, nanga vingaŵa kuti ŵaŵenge kutali na ŵabwezi panji ŵamumbumba yawo. Taŵanandi ŵa ise tikujinora vinthu vinyake chifukwa tikukhumba kumupa viwemi chomene Yehova. Manyani kuti Yehova wakuzirwiska chomene kujipata kulikose, kwali nkhukuru panji nkhuchoko, uko mungachita mwakuti mumuteŵetere.—Heb. 6:10.
ŴANI ŴAKUKHUMBISISKA KUŴA ŴAKUPAMBANAKO NA ŴANYAKE
7. Chifukwa wuli chikwenera kuti chikaŵa chakusuzga kuti Munaziri wasungilire chilapo chake? (Maŵazgo 6:5) (Wonaniso chithuzi.)
7 Ŵazgani Maŵazgo 6:5. Ŵanaziri ŵakalapa kuti ŵametenge yayi sisi lawo. Iyi yikaŵa nthowa yimoza yakulongolera kuti ŵakupulikira Yehova na mtima wose. Para Muisrayeli waŵa Munaziri kwa nyengo yitali, sisi lake likaŵanga litali ndipo ŵanji chikaŵanga chipusu kumumanya. Chikaŵanga chipusu kwa Munaziri kufiska chilapo chake usange ŵanthu ŵakumuchindika na kumukhozga. Kweni chachitima ntchakuti nyengo zinyake Ŵanaziri ŵakachindikikanga yayi panji kukhozgeka. Mu nyengo ya ntchimi Amosi, Ŵaisrayeli ŵakugaluka ‘ŵakalutilira kuŵapa vinyo Ŵanaziri kuti ŵamwe,’ na chilato chakuti ŵaleke kufiska chilapo chawo. (Am. 2:12) Nakuti nyengo zinyake Ŵanaziri ŵakakhumbikwiranga kulongora chikanga kuti ŵasungilire chilapo chawo na kulutilira kuŵa ŵakupambanako na ŵanji.
Munaziri uyo wakasungiliranga chilapo chake wakaŵa wakunozgeka kuŵa wakupambanako na ŵanyake (Wonani ndime 7)
8. Kasi ntchivichi icho chikumukhozgani pa ivyo vikachitikira muwukirano munyake Benjamin?
8 Na wovwiri wa Yehova, nase tingalongora chikanga na kuŵa ŵakupambana na ŵanji, nanga vingaŵa kuti mwakawiro tili ŵasoni. Wonani chiyelezgero cha Benjamin, Kaboni wa Yehova wa vyaka 10 wa ku Norway. Chifukwa cha nkhondo ya ku Ukraine, sukulu yawo yikanozga vyakuchitika vyakulongora kuti ŵakukhozgera ŵanthu ŵa ku Ukraine. Ŵana ŵa sukulu ŵakapempheka kwimba sumu uku ŵavwara vyakuvwara vya mtundu wa ndembera ya ku Ukraine. Kuti wagege kwimbako, Benjamin wakasankha kwima chapataliko na apo vinthu ivi vikachitikiranga. Ndipouli, msambizgi wakamuwona, ndipo wakachemerezga kuti: “Zakuno ku ŵanyako. Tikukulindilira!” Mwachikanga, Benjamin wakafika pafupi na msambizgi, na kuyowoya kuti: “Ine nkhunjilirapo yayi pa vya ndyali, ndipo nkhuchitako yayi viwoneskero. Nakuti Ŵakaboni ŵa Yehova ŵanandi ŵali mu jele chifukwa ŵakukana kuluta ku nkhondo.” Msambizgi wakamupulikiska Benjamin, ndipo wakati wangimbangako yayi. Ndipouli, ŵana ŵa sukulu ŵanyake ŵakamufumba Benjamin chifukwa icho wakalekera kwimbako. Benjamin wakawopa chomene, ndipo wakakhala pachoko kulira; kweni mwachikanga wakawerezgaposo ivyo wakayowoya kwa msambizgi ku kilasi lose. Pamanyuma, Benjamin wakaphalira ŵapapi ŵake kuti Yehova ndiyo wakamovwira kuti wavikilire chipulikano chake.
9. Kasi ni nthowa wuli iyo tingakondweskera mtima wa Yehova?
9 Chifukwa chakuti tikusankha kupulikira Yehova, tikuŵa ŵakupambana na ŵanthu wose. Tikukhumbikwira chikanga kuti tijiphare ku sukulu panji ku ŵanyithu ŵa ku ntchito kuti ndise Ŵakaboni ŵa Yehova. Apo nkharo za mu charu ichi zikuhenipirahenipira, chiŵenge chakusuzga chomene kuti nyengo zose tilondezgenge fundo za mu Baibolo kweniso kuphalirako ŵanji makani ghawemi. (2 Tim. 1:8; 3:13) Ntheura nyengo zose tikumbukenge kuti, ‘tikukondweska mtima wa Yehova’ para tikulongora chikanga na kuŵa ŵakupambana na ŵanthu awo ŵakuteŵetera Yehova yayi.—Zinth. 27:11; Mal. 3:18.
LUTILIRANI KUŴIKA YEHOVA PAKWAMBA MU UMOYO WINU
10. Chifukwa wuli chikaŵa chipusu yayi ku Ŵanaziri kulondezga dango ilo likuyowoyeka pa Maŵazgo 6:6, 7?
10 Ŵazgani Maŵazgo 6:6, 7. Ŵanaziri ŵakazomerezgekanga yayi kwiza pafupi na chitanda. Nyengo zinyake mungawona kuti kuchita nthena nkhujipata yayi. Kweni mu nyengo yakale, ichi chikaŵa chinthu chakusuzga chomene kwa Munaziri para wafwa ni mubali wake. Mitheto ya pa nyifwa mu nyengo iyo, yikakhumbanga kuti ŵanthu ŵakhalenge pafupi na chitanda. (Yoh. 19:39, 40; Mil. 9:36-40) Ndipouli, Munaziri wakatondekanga kulondezga mitheto iyi. Nanga mphakuchita vinthu na ŵamumbumba yawo pa nyengo iyo ŵaferwa, Ŵanaziri ŵakalongoranga chipulikano chakukhora pa kusungilira chilapo chawo. Tikukayika yayi kuti Yehova wakaŵakhozga ŵateŵeti ŵakujipeleka aŵa kuti ŵalimbane na masuzgo ghawo.
11. Kasi Mkhristu wakwenera kuŵikapo mtima kuchita vichi para wakupanga vyakusankha vyakukhwaskana na mbumba? (Wonaniso chithuzi.)
11 Pakuŵa Ŵakhristu, chilapo chithu cha kujipeleka kwa Yehova tikuchiwona mwakupepuka yayi. Ivi vikukhwaska umo tikusankhira vinthu kweniso umo tikuchitira vinthu pa nkhani za mu mbumba. Tikuŵikapo mtima kupwelelera mbumba yithu, kweni tikudangizga vyakukhumba vya mbumba yithu yayi kuluska ivyo Yehova wakukhumba. (Mat. 10:35-37; 1 Tim. 5:8) Nyengo zinyake, tingakhumbikwira kusankha vyakuchita ivyo ŵachibali ŵithu ŵangakondwa navyo yayi na chilato chakuti tikondweske Yehova.
Kasi ndimwe ŵakukhumbisiska kuŵika Yehova pa malo ghakwamba nanga mphanyengo yakusuzga chomene? (Wonani ndime 11) e
12. Apo vinthu vikaŵa makora yayi mu mbumba yake, kasi Alexandru wakachita vichi, ndipo ni vithu wuli ivyo wakachita yayi?
12 Wonani chiyelezgero cha Alexandru na muwoli wake, Dorina. Mbumba iyi yikati yasambira Baibolo kwa chaka, Dorina wakaleka, ndipo wakakhumbanga kuti mfumu wake Alexandru nayoso waleke. Ndipouli, Alexandru wakamuphalira mwalusungu kweniso mwaluso kuti walutilirenge kusambira. Dorina wakakondwa navyo yayi ndipo wakayezga kumuchichizga mfumu wake kuti waleke kusambira. Alexandru wakuti wakayezgayezga kupulikiska chifukwa icho muwoli wake wakajipulikiranga nthena, nangauli chikaŵa chipusu yayi. Nyengo zinyake wakawonanga nga wangaleka kusambira Baibolo, para muwoli wake Dorina wakumususka na kumuzgora mwaukali. Ndipouli, Alexandru wakalutilira kuŵika Yehova pakwamba kweniso pa nyengo yimozamoza wakalutilira kumulongora ntchindi na chitemwa muwoli wake. Paumaliro, chiyelezgero chake chiwemi chikamovwira mwanakazi wake kuti wambireso kusambira Baibolo, ndipo pamanyuma wakabatizika.—Wonani pa jw.org vidiyo yakuti, Alexandru na Dorina Văcar: “Chitemwa Chikuzikira Ndipo Ntchalusungu,” pa chigaŵa chakuti “Unenesko Ukusintha Umoyo wa Ŵanthu.”
13. Kasi tingalongora wuli kuti tikumutemwa Yehova kweniso mbumba yithu?
13 Yehova ndiyo wakambiska mbumba, ndipo wakukhumba kuti ziŵenge zakukondwa. (Efe. 3:14, 15) Para tikukhumba kuŵa ŵakukondwa zanadi, tichitenge ivyo Yehova wakukhumba. Manyani kuti Yehova wakuzirwiska chomene ivyo mukujinora kuti mumuteŵetere uku mukupwelelera mbumba yinu kweniso kuchita nayo vinthu mwantchindi ndiposo mwachitemwa.—Rom. 12:10.
MUCHISKANENGE KUTI MUŴE NA MZIMU WA NGA ŴANAZIRI
14. Kasi mbanjani awo chomene tikwenera kufwilirapo kuŵakhozga na mazgu ghithu?
14 Wose awo ŵasankha kuteŵetera Yehova mazuŵa ghano, ŵakwenera kuŵa ŵakunozgeka kujinora vinthu vinyake chifukwa chakuti ŵakumutemwa. Kweni nyengo zinyake ntchipusu yayi kuchita nthena. Kasi tingawovwirana wuli kuti tiŵe na mzimu wakujipata uwu? Tikwenera kukhozgana kwizira mu ivyo tikuyowoya. (Yobu 16:5) Kasi ŵalipo ŵanyake mu mpingo winu awo ŵakuyezgayezga kusintha vinthu vinyake na chilato chakuti ŵachite vinandi pakuteŵetera Yehova? Kasi mukumanyapo ŵawukirano ŵanyake awo ŵakuyezgayezga kuti ŵaŵe ŵakupambana na ŵanyawo ku sukulu nangauli ntchakusuzga kuchita nthena? Kasi ŵalipo awo ŵakusambira sono Baibolo kweniso ŵasopi ŵanyithu awo ŵakusuzgikira kuti ŵaŵe ŵakugomezgeka chifukwa chakuti ŵamumbumba yawo ŵakuŵasuska? Tiyeni tigwiliskire ntchito m’pata uliwose kuti tiŵakhozge ŵasopi ŵanyithu aŵa na kuŵawonga chifukwa cha mzimu wawo wakujipata kweniso chikanga icho ŵakulongora.—Filim. 4, 5, 7.
15. Kasi ŵanyake ŵawovwira wuli awo ŵakuchita uteŵeti wanyengozose?
15 Nyengo zinyake tingaŵawovwira Ŵakhristu ŵanyithu awo ŵali mu uteŵeti wanyengozose. (Zinth. 19:17; Heb. 13:16) Ivi ndivyo wakachita mudumbu munyake muchekuru uyo wakukhala ku Sri Lanka. Wakapokera ndalama zinandi za penshoni ndipo wakakhumbanga kovwira ŵadumbu ŵaŵiri ŵachiwukirano awo ŵakachitanga upayiniya, kuti ŵalutilire kuchita uteŵeti nangauli ŵakasangananga na masuzgo gha vya chuma. Mudumbu uyu wakawona kuti wapaturepo ndalama yinyake na kuŵalipilira mabilu gha foni mwezi uliwose. Mudumbu uyu wakalongora mzimu wakujipata chomene!
16. Kasi tingasambirako vichi ku Ŵanaziri?
16 Tingasambirako vinandi ku chiyelezgero chiwemi cha Ŵanaziri. Ndipouli, ndondomeko iyi yikuvumburaso chinthu chinyake chakukhwaskana na Dada withu wakuchanya, Yehova. Iyo wakumanya kuti tikukhumba kumukondweska ndipo tili ŵakukhumbisiska kujinora vinyake kuti tichitenge vinthu mwakuyana na chilapo chithu. Wakulongoraso kuti wakutichindika pakutipa mwaŵi wakuti tilongore tekha kuti tikumutemwa chomene. (Zinth. 23:15, 16; Mrk. 10:28-30; 1 Yoh. 4:19) Ndondomeko ya kuŵa Munaziri yikulongoraso kuti Yehova wakuwona kweniso kuzirwiska chomene kujipata kwithu mwakuti timuteŵetere. Ipo mphanyi tose talutilira kuŵikapo mtima kumuteŵetera Yehova na mtima wose na kumupa viwemi chomene.
KASI MUNGAZGORA WULI?
-
Kasi Ŵanaziri ŵakalongora wuli chikanga kweniso mtima wakujipata?
-
Kasi tingachiskana wuli kuti nase mazuŵa ghano tilongorenge mzimu wakujipata wa nga Ŵanaziri?
-
Kasi ndondomeko ya kuŵa Munaziri yikuvumbura kuti Yehova wakuŵawona wuli ŵateŵeti ŵake?
SUMU 124 Mugomezgeke Nyengo Zose
a Nangauli Ŵanaziri ŵachoko waka ndiwo ŵakasankhika na Yehova, kweni ŵanandi ŵakaŵa Ŵaisrayeli awo ŵakwenera kuti ŵakajipeleka waka.—Wonani bokosi lakuti “ Ŵanaziri Awo Ŵakasankhika na Yehova.”
b Nyengo zinyake, mabuku ghithu ghakuyaniska Ŵanaziri na awo ŵakuchita uteŵeti wanyengozose. Ndipouli, mu mutu uwu tiwonenge umo ŵateŵeti wose ŵakujipeleka ŵa Yehova ŵangalongolera mzimu uwo Ŵanaziri ŵakaŵa nawo.
c Mwakudumura, vikulongora kuti Ŵanaziri ŵakaŵavya milimo yinyake yakusazgikira, na chilato chakuti ŵafiske makora chilapo chawo.
d Wonani pa jw.org nkhani ya mutu wakuti “Tikasankha Kuchepeskako Vyakuchita pa Umoyo Withu” pa chigaŵa chakuti “Ivyo Vikuchitikira Ŵakaboni ŵa Yehova.”
e MAZGU GHAKULONGOSORA CHITHUZI: Munaziri wali pachanya pa nyumba wakuwonelera mwambo wa nyifwa ya mubali wake. Wakutondeka kuchitako mitheto ya pa nyifwa chifukwa cha chilapo chake.
