1. Eaha ta te mau tavini a Iehova i faaite i te roaraa o te tau?

 PAPU maitai, mea faufaa no oe to oe auhoaraa e o Iehova. Mai tahito mai â, e rave rahi mai ia oe tei haafaufaa i to ratou auhoaraa e o Iehova. (Sal. 104:33, 34) Mea rahi atoa tei rave i te mau haapaeraa no te haamori ia ˈna, mai te mau Nazira i te tau o Iseraela. O vai ratou e eaha te haapii mai i to ratou hiˈoraa?

2. (1) O vai te mau Nazira? (Numera 6:1, 2) (2) No te aha te hoê Iseraela i maiti ai i te tavini ei Nazira?

² No roto te taˈo “Nazira” i te taˈo Hebera “tei pûpûhia” e “tei faataa-ê-hia” te auraa. E taˈo teie tei faaohipahia no te ati Iseraela itoito tei rave i te haapaeraa taa ê no te tavini ia Iehova. Ia au i te Ture a Mose, e nehenehe te hoê tane aore ra te hoê vahine e euhe ia Iehova e ora mai te hoê Nazira no te hoê taime noa. a (A taio i te Numera 6:1, 2.) Na roto i teie euhe e titauhia ia haapao ratou i te tahi mau faaueraa ta te toea ati Iseraela e ore e titauhia ia haapao. No te aha râ te hoê Iseraela e maiti ai i te tavini ei Nazira? No to ˈna ïa here ia Iehova e to ˈna mauruuru no ta ˈna mau maitai.—Deut. 6:5; 16:17.

3. Eaha te tuatiraa i rotopu i to Iehova nunaa i teie mahana e te mau Nazira?

 ³ Ua faaorehia te taviniraa Nazira i te taime a monohia ˈi te Ture a Mose e “te ture a te Mesia.” (Gal. 6:2; Roma 10:4) Tera râ, mai te mau Nazira, te tamau nei te nunaa o Iehova i te tavini ia ˈna ma to ratou aau, ora, manaˈo e puai atoa. (Mar. 12:30) Ua euhe tatou i te reira i to tatou pûpûraa ia tatou ia Iehova. I roto i teie euhe, e ô atoa mai te auraroraa i to Iehova hinaaro e te raveraa i te mau haapaeraa. A hiˈopoa ˈi mea nafea te mau Nazira i te tapearaa i ta ratou euhe, e haapii tatou e nafea ia ora ia au i ta tatou i euhe ia Iehova. b (Mat. 16:24) Teie te tahi hiˈoraa.

A RAVE I TE MAU HAAPAERAA

4. Ia au i te Numera 6:3, 4, eaha te mau haapaeraa ta te Nazira i rave?

⁴ A taio i te Numera 6:3, 4. I titauhia na ia haapae te Nazira i te ava e te maa vine. E ere teie mau mea i te mea ino. E inu hoi te tahi mau Iseraela i te ava e e amu i te maa vine. Te parau ra te Bibilia e ô no ǒ mai ia Iehova te uaina o te “faaoaoa i te aau o te taata.” (Sal. 104:14, 15) Tera râ, ua ineine te Nazira i te haapae i te reira. c

5. Eaha te mau haapaeraa ta Madián raua Marcela i faaoti e rave, e no te aha?

⁵ E rave atoa tatou mai te Nazira i te haapaeraa no te tavini atu â ia Iehova. Teie te hiˈoraa o Madián raua Marcela. d E oraraa fanaˈo to teie na hoa faaipoipo Kerisetiano. E ohipa au⁠fau-maitai-hia ta Madián e e nohoraa nehenehe to raua. Ua hinaaro râ raua e tavini atu â ia Iehova. Rave aˈera raua i te tahi mau tauiraa. Te faatia ra raua: “Ua faaiti na mua mâua i te mau haamâuˈaraa. Ua rave mâua i te hoê nohoraa nainai aˈe e ua hoo i to mâua pereoo.” Aita i titauhia ia rave raua i teie mau haapaeraa. Na raua iho i faaoti, no to raua hinaaro e tavini atu â e ua oaoa roa raua i teie faaotiraa.

6. No te aha te mau Kerisetiano e rave ai i te mau haapaeraa? (A hiˈo atoa i te hohoˈa.)

 ⁶ E oaoa te mau Kerisetiano i te rave i te mau haapaeraa no te tavini atu â ia Iehova. (Kor. 1, 9:3-6) Aita o ˈna e titau ra ia rave tatou i teie mau haapaeraa. Ei hiˈoraa, ua vaiiho vetahi i te ohipa, te fare ta ratou e au, tae noa ˈtu i ta ratou animara. E ere teie mau mea i te mea ino. Ua faaoti vetahi i te faaea taa noa e i te ore e fanau i te tamarii. Ua maiti atoa te tahi atu i te tavini i te vahi e hinaaro-rahi-hia te tauturu, noa ˈtu e titauhia ia ora i te hoê fenua atea i to ratou utuafare. Mea rahi o tatou o te rave nei i teie mau haapaeraa no te horoa i te mea maitai roa ˈ ˈe na Iehova. Ia papu ia tatou e te haafaufaa rahi nei Iehova i ta tatou mau haapaeraa, mea rahi aore ra mea iti, no te tavini atu â ia ˈna.—Heb. 6:10.

A FAAITE E MEA TAA Ê OUTOU

7. No te aha e mea fifi paha no te Nazira ia tapea i ta ˈna euhe? (Numera 6:5) (A hiˈo atoa i te hohoˈa.) 

⁷ A taio i te Numera 6:5. Ua euhe te Nazira i te ore e tâpû i to ˈna rouru. E tapao te reira o to ˈna auraro ia Iehova. Mea maoro anaˈe to ˈna taviniraa ei Nazira, e roa to ˈna rouru e e ite te taata i te reira. Ia faatura vetahi ia ˈna, mea ohie ïa no ˈna ia tapea i ta ˈna euhe. I te tahi râ mau taime, aita te mau Nazira i turuhia e i auhia. I te tau o te peropheta Amosa, ua faainu te mau Iseraela apotata “i te uaina i te mau Nazira,” ia ore ratou e tapea i ta ratou euhe. (Am. 2:12) Ua titauhia ïa te itoito rahi no te tapea i ta ratou euhe e no te faaite mea taa ê ratou ia vetahi ê.

8. E nafea te hiˈoraa o Benjamin e faaitoito ai ia oe?

⁸ Maoti ta Iehova tauturu, e itoito atoa tatou i te ore e haa mai ia vetahi ê, noa ˈtu mea mamahu tatou. Teie te hiˈoraa o Benjamin, hoê Ite no Iehova 10 matahiti no Norevetia. Ua faatupuhia te tahi oroa i te fare haapiiraa no te turu i tei ati i Ukraine. Ua anihia te mau tamarii ia himene ma te ahu mai ia au i te ǔ o te reva no Ukraine. Ua faaatea ê Benjamin ia ˈna no te ore e apiti atu. Ite maira râ te orometua ia ˈna e tuô ihora: “Haere mai. Te tiai noa ra matou ia oe!” Tapiri atura Benjamin i te orometua e parau atura: “Eita vau e amui atu. Eita vau e apiti i te mau oroa poritita. E rave rahi Ite no Iehova  i te fare tapearaa no te mea aita ratou i hinaaro e haere i te tamaˈi.” Ua farii te orometua i ta Benjamin faataaraa e vaiiho atura ia ˈna. Tera râ, ua ui noa mai to ˈna mau hoa haapiiraa no te aha oia e ore ai e apiti ia ratou. Ua taiâ roa Benjamin e fatata o ˈna i te taˈi. Noa ˈtu râ, ua faahiti oia i ta ˈna i parau i te orometua. I muri iho, faatia ˈtura o ˈna i to ˈna mau metua e ua tauturu Iehova ia ˈna ia paturu i to ˈna faaroo.

9. E nafea tatou e faaoaoa ˈi i to Iehova aau?

⁹ No te mea ua maiti tatou e faaroo ia Iehova, e ite mai vetahi ê e mea taa ê tatou. E hinaarohia te itoito no te faaite e Ite no Iehova tatou i te ohipa anei aore ra i te fare haapiiraa. E a ino noa ˈtu ai te mau peu a teie nei ao, mea fifi atu â paha ïa no tatou ia ora ia au i te mau faaueraa tumu Bibilia e ia faaite i te parau apî oaoa ia vetahi ê. (Tim. 2, 1:8; 3:13) Eiaha râ ia moˈehia e “faaoaoa” tatou “i to [Iehova] aau” ia faaite tatou ma te itoito e mea taa ê tatou i te feia aita e tavini ra ia ˈna.—Mas. 27:11; Mal. 3:18.

O IEHOVA NA MUA I ROTO I TO OUTOU ORARAA

10. No te aha e mea fifi paha no te Nazira ia pee i te faaueraa i roto i te Numera 6:6, 7?

¹⁰ A taio i te Numera 6:6, 7. Eita te mau Nazira e tapiri atu i te hoê tino pohe. Ia hiˈohia, e ere teie i te haapaeraa rahi. Tera râ i tahito ra, e ere mea ohie teie titauraa no ratou ia pohe te tahi fetii piri. E peu matauhia hoi i te hunaraa ia tia ˈtu i pihai iho i te tino o tei pohe. (Ioa. 19:39, 40; Ohi. 9:36-40) No ta ˈna râ euhe, eita ta te Nazira e nehenehe e na reira. I te mau taime oto rahi o te fetii, e faaite te Nazira i te faaroo puai ma te tapea i ta ˈna euhe. Papu roa, maoti Iehova ua itoitohia teie mau tavini taiva ore ia faaoromai i teie mau tupuraa fifi.

11. Eaha ta te hoê Kerisetiano e faaoti e rave no nia i to ˈna utuafare? (A hiˈo atoa i te hohoˈa.)

¹¹ Ei Kerisetiano, e haapao iho â tatou i ta tatou euhe ia Iehova i roto atoa i ta tatou mau faaotiraa e haaraa no nia i to tatou utuafare. Mea haapao maitai tatou i ta tatou hopoia utuafare, eita roa ˈtu râ tatou e tuu i te hiaai  o te mau mero o to tatou utuafare i nia aˈe i ta Iehova e titau mai ra. (Mat. 10:​35-37; Tim. 1, 5:8) I te tahi taime, e rave tatou i te faaotiraa o te faaoaoa ia Iehova noa ˈtu eita te fetii e mauruuru.

12. A faaruru ai oia i te tahi fifi utuafare, eaha ta Alexandru i rave e i ore i rave?

¹² A hiˈo na ia Alexandru e ta ˈna vahine faaipoipo o Dorina. I muri aˈe hoê matahiti haapiiraa i te Bibilia, faaoti ihora Dorina e faaea i te haapii e ua hinaaro ia faaea atoa Alexandru. Ma te mǎrû râ, ua parau ta ˈna tane e eita o ˈna e faaea. Aita Dorina i mauruuru e faahepo ihora ia ˈna ia vaiiho i ta ˈna haapiiraa. Ua tamata Alexandru i te taa i te huru aau o Dorina, e ere râ mea ohie. I te tahi taime, ia faaino e ia iria mai Dorina, ua manaˈo oia e faaea i ta ˈna haapiiraa. Aita râ, ua faaitoito oia i te tuu ia Iehova na mua, a faaite noa ˈi i te here e te faatura rahi i ta ˈna vahine. Ei faahopearaa o to ˈna hiˈoraa maitai, ua haapii faahou Dorina i te Bibilia e ua bapetizohia ˈtura.—I nia i te jw.org, a mataitai i te video Alexandru e Dorina Vacar: E faaoromai e e hamani maitai te here.

13. E nafea ia faaite i to tatou here no Iehova e to tatou utuafare?

¹³ Na Iehova i haamau i te oraraa utuafare, e te hinaaro ra o ˈna ia oaoa to tatou utuafare. (Eph. 3:14, 15) Ia oaoa mau â tatou, mea faufaa ïa ia rave i ta Iehova e ani mai ra. Papu maitai, te haafaufaa ra Iehova i ta oe mau tutavaraa e haapaeraa no te haamori ia ˈna, a aupuru ai oe i to oe utuafare ma te here e te faatura.—Roma 12:10.

A FAAITOITO TE TAHI I TE TAHI IA HAA MAI TE NAZIRA

14. O vai ma te hinaaro i te faaitoitoraa?

¹⁴ Ia ineine te taata atoa tei faaoti e haamori ia Iehova i te rave i te mau haapaeraa no to ratou here ia ˈna. E ere mea ohie i te tahi taime. E nehenehe râ tatou e faaitoito te tahi i te tahi ia na reira na roto i ta tatou mau parau. (Ioba 16:5) Te vai ra anei i roto i ta oe amuiraa tei rave i te haapaeraa no te tavini atu â ia Iehova? Ua matau anei oe i te mau taurearea o te faaite ra ma te itoito e mea taa ê ratou i te fare haapiiraa? Te vai ra anei te mau piahi Bibilia e te mau taeae e tuahine o te tutava ra i te vai taiva ore noa ˈtu te patoiraa  utuafare? A rave i te taime no te faaitoito ia ratou e no te faaite i to oe mauruuru no to ratou feruriraa haapae e to ratou itoito.—Philem. 4, 5, 7.

15. Mea nafea vetahi i te tururaa i tei rave i te taviniraa taime taatoa?

¹⁵ I te tahi taime, e nehenehe tatou e tauturu i te mau Kerisetiano i roto i te taviniraa taime taatoa. (Mas. 19:17; Heb. 13:16) Ta te hoê ïa tuahine ruhiruhia no Sri Lanka i rave. Ua maraa rii ta ˈna moni ruau e ua hinaaro o ˈna e tauturu e piti tuahine apî ia tamau i ta raua taviniraa pionie noa ˈtu te fifi i te pae moni. Faaoti ihora o ˈna e horoa i te hoê tino moni i te mau avaˈe atoa no te aufau i ta raua haamâuˈaraa vini. Mea faahiahia mau te huru feruriraa ta teie tuahine i faaite!

16. Eaha te haapii mai i te taviniraa Nazira?

¹⁶ Mea rahi atu â ta tatou e haapii mai i te hiˈoraa maitai o te mau Nazira. E haapii atoa mai te euhe a te Nazira i te tahi mea no nia i to tatou Metua i te raˈi Iehova. Ua papu ia ˈna e te hinaaro mau ra tatou e faaoaoa ia ˈna e e rave i te haapaeraa no te tapea i ta tatou euhe. Auê ïa tatou i te oaoa e te horoa mai ra Iehova i te ravea ia maiti tatou i te faaite i to tatou here ia ˈna! (Mas. 23:​15, 16; Mar. 10:28-30; Ioa. 1, 4:19) Te faaite ra te taviniraa Nazira e te ite ra Iehova i te mau haapaeraa atoa ta tatou e rave nei no te tavini ia ˈna. E faaoti papu anaˈe ïa i te tavini noa ia Iehova ma te pûpû i te mea maitai roa ˈ ˈe na ˈna.