STÙDIO 7
CÀNTICO 51 Scoliemo servir sol a Geovà!
Cossa che podemo imparar dei nasirei?
“Tuti i giorni che lu el sarà nasireo, sarà giorni dedicadi par Geovà.” — NÙM. 6:8.
COSSA CHE NDAREMO IMPARAR?
Noantri ndaremo veder come el esémpio dei nasirei pol giutarne a esser coraiosi e a cambiar quel che ne ocore nela vita par servir a Geovà del tuto.
1. Cossa che arquanti servi de Geovà del passà i ga fato?
SICURO che la to amicìssia con Geovà la ze tanto importante par ti. Anca tanti servi de Geovà del passà i ghe dea valor ala so amicìssia con lu. (Sal. 104:33, 34) E arquanti de lori fin i ga cambià arquante robe nela vita par servirlo de pi. I nasirei i ga fato pròpio cossita. Ma chi zeli e cossa che podemo imparar de lori?
2. (a) Chi che i era i nasirei? (Nùmeri 6:1, 2) (b) Parché che un israelita el volea esser un nasireo?
2 In ebraico, la parola “nasireo” la vol dir “scoliesto” o “dedicà par far un laoro spessial”. Alora, un nasireo el fea tanto nel laoro a Geovà. La Lege de Moisè la disea che un omo o una dona i podea far una promessa spessial a Geovà de viver come nasireo par un tempo. a (Ledi Nùmeri 6:1, 2. b) Se un israelita el fesse questa promessa, lu el gavaria de far arquante robe che i altri israeliti no i ghe ocorea mia far. Alora, parché che un israelita el volaria far la promessa de esser nasireo? Parché el volea mostrar che el gavea un grando amor par Geovà e che el ghe dea valor a tute le benedission che el gavea. — Deu. 6:5; 16:17.
3. Parché che podemo imparar tanto col esémpio dei nasirei?
3 Dopo che Gesù l’è vegnesto ala Tera, i servi de Dio no ghe ocorea pi obedir ala Lege de Moisè. (Gàl. 6:2; Rom. 10:4) Alora, nissun podea pi esser nasireo. Anca cossita, podemo imparar tanto col so esémpio. Parché? Parché tuti noantri volemo servir a Geovà de tuto el nostro ‘cuor, mente e forsa’. (Mar. 12:30) Quando se ghemo dedicà a Dio, anca noantri ghemo fato la promessa de obedirghe e far tuto quel che podemo par servirlo. Adesso, ndaremo veder come che i nasirei i era boni de far quel che i gavea prometesto a Geovà e come che podemo far compagno a lori. c — Mat. 16:24.
SFÒRSATE PAR FAR DE PI PAR GEOVÀ
4. De acordo con Nùmeri 6:3, 4, cossa che i nasirei no i podea mia far?
4 Tuti i israeliti i podea bever bebide de àlcol e magnar ua. No l’è mia sbalià far queste robe, e la Bìblia la dise che el vin l’è un presente de Dio e che el “assa contento el cuor del omo”. (Sal. 104:14, 15) Ma i nasirei no i podea mia bever bebide de àlcol gnanca magnar ua. (Ledi Nùmeri 6:3, 4. d) Anca se fusse robe bone de far, i nasirei i scoliea no farle mia par un tempo. e
Sito disposto a far come i nasirei e cambiar arquante robe nela vita par far de pi par Geovà? (Varda i paràgrafi 4 a 6.)
5. Cossa che Madián e Marcela i ga cambià nela so vita, e parché?
5 Compagno ai nasirei, noantri volemo far de pi par Geovà. Varda el esémpio de Madián e Marcela. f Lori i gavea una bela vita, un bon laoro e una casa tanto granda. Ma Madián e Marcela i ga dessidio sparagnar soldi, i ga vendesto el auto e i ga cambià de casa. Parché? Parché i volea far de pi par Geovà. L’è vera che lori no ghe tochea mia cambiar queste robe nela so vita, ma i volea contentar a Geovà. Ancoi, lori i ze tanto felici cola dessision che i ga fato.
6. Parché che tanti fradei i càmbia arquante robe nela so vita? (Varda anca la ilustrassion.)
6 Arquanti fradei i ga cambià de laoro e de casa e fin i ga dato via la so bestioleta par gaver de pi tempo par servir a Geovà. Altri i ga dessidio spetar un poco par maridarse o par gaver un fiol. E tanti fradei e sorele i ga dessidio ndar predicar ndove ghen’è pi bisogno, anca se ghe toca star distante dela fameia e dei amighi. Geovà no’l gavea dito che ghe tochea far queste robe o che quel che i fea prima l’era sbalià. Alora, parché che i ga fato questa dessision? Parché i volea dar el so meio a Geovà. (1 Cor. 9:3-6) Se te ghè fato cossita anca ti, sìpia sicuro che Geovà el ghe dà tanto valor a quel che te fè par lu. — Ebr. 6:10.
GÀPIA CORAIO DE ESSER DIFARENTE DEI ALTRI
7. De acordo con Nùmeri 6:5, parché che dele volte no l’era mia fàcile esser un nasireo? (Varda anca la ilustrassion.)
7 Ledi Nùmeri 6:5. g Par mostrar che el gavea grando rispeto par Geovà, un nasireo no’l podea mia taiarse i cavei. Alora, dopo un tempo, i so cavei i restaria longhi e i altri i vederia che lu l’era un nasireo. Saria bel se i israeliti intorno lo incoraiesse a seitar a far quel che el gavea prometesto a Geovà. Ma, arquante volte, lori no i rispetea gnanca i giutea i nasirei. Par esémpio, nela època del profeta Amòs, i israeliti che i era contra la adorassion a Geovà i proea darghe vin ai nasirei par farli desobedir ala Lege. (Amòs 2:12) Sicuro che i nasirei ghe ocorea gaver coraio par esser difarenti dei altri e far quel che i gavea prometesto a Geovà.
Un nasireo che l’era leal ala promessa che el gavea fato el mostrea coraio de esser difarente dele altre persone (Varda el paràgrafo 7.)
8. Cossa che te ghè imparà col esémpio de Benjamin?
8 Compagno ai nasirei, anca noantri podemo mostrar coraio e esser difarenti dei altri. Geovà el ndarà giutarne a far quel che l’è giusto anca se semo invergognadi. Varda el esémpio de Benjamin, che l’è un toseto de 10 ani dela Noruega. La so scola la volea mostrar che la era dela banda dela Ucrània nela guera. Alora, i tosatei i gavea de cantar una mùsica e doperar le robe coi colori dela bandera dela Ucrània. Come Benjamin no’l volea mia far queste robe, lu el se ga tirà distante de tuti. Ma una maestra lo ga visto e la ga osà: “Sito drio far che lì? Vien qua che semo drio spetarte.” Alora, Benjamin l’è ndato fin la maestra e el ghe ga dito: “Mi no mi meto mia nela polìtica e nele guere. Seto che tante Testimònie de Geovà le ze meteste in preson parché no le ga volesto mia ndar ala guera?” Cossita, la maestra la ghe ga dito che no ghe tochea star insieme ai altri. Ma quando i altri toseti i ga tacà a farghe domande, lu el ga scominsià a restar tanto ansioso che ghe vegnea de piander. Anca cossita, lu el ga parlà a tuti quei tosatei quel che el gavea spiegà ala maestra. Dopo, Benjamin el ga dito a so pare e so mare che Geovà lo ga giutà tanto.
9. Cossa che ghemo de far par assar Geovà contento?
9 Come servimo a Geovà, noantri semo tanto difarenti dele persone in volta. Alora, ne ocore coraio par parlar che semo Testimònie de Geovà a quei del laoro o dela scola. E come el mondo l’è drio deventar cada volta pedo, l’è tanto fadiga far quel che l’è giusto e parlar ai altri sora la Bìblia. (2 Tim. 1:8; 3:13) Ma ghemo de ricordarse che Geovà el resta tanto contento con noantri quando ghemo el coraio de esser difarenti de quei che no i lo serve. — Pro. 27:11; Mal. 3:18.
FÀ DEL TO LAORO A GEOVÀ LA ROBA PI IMPORTANTE DELA TO VITA
10. Parché che l’era fadiga par i nasirei far quel che dise in Nùmeri 6:6, 7?
10 Ledi Nùmeri 6:6, 7. h I nasirei no i podea mia rivar darente una persona che la era morta. Fursi pensemo che no l’era mia fadiga obedir a questa lege. Ma, in quela època, le persone sempre le restea darente el corpo de quel che l’era morto. (Gio. 19:39, 40; Ati 9:36-40) Alora, proa pensa come che un nasireo el se sentia quando una persona dela so fameia la era morta. Cossita, quando un nasireo el obedia a questa lege anca se fusse fadiga, lu el mostrea che el gavea una forte fede. Sicuro che Geovà el ghe dea forsa par dàrghene fora con quei bruti colpi.
11. Anca se tuti volemo tender ben dela nostra fameia, cossa che mai ndaremo far? (Varda anca la ilustrassion.)
11 Tuti noantri savemo che la nostra dedicassion a Geovà la ze tanto importante. Par quela che, in tute le dessision che femo nela vita, noantri se sforsemo de far quel che Geovà el vol. Par esémpio, anca se femo tuto quel che podemo par tender ben dela nostra fameia, ela mai la sarà pi importante che Geovà. (Mat. 10:35-37; 1 Tim. 5:8) Alora, pol esser che, par obedir a Geovà, dele volte ndaremo fin far qualcossa che la nostra fameia no la ghe piase mia.
Servir a Geovà l’è la roba pi importante nela to vita, anca quando l’è fadiga? (Varda el paràgrafo 11.) i
12. Cossa che Alexandru el ga fato, e cossa che no’l ga fato?
12 Varda el esémpio de Alexandru e dela so dona Dorina. Lori i ga scominsià a studiar la Bìblia tuti i due insieme. Ma dopo un ano, Dorina la ga dessidio fermarse el stùdio e la ga volesto che anca Alexandru el se fermesse. Alora, lu el ghe ga dito cole bone che el seitaria a studiar la Bìblia. Dorina no ghe ga mia piasesto dela risposta e la ga seità a dirghe che lu gavea de fermarse. Alexandru el ga dito che el proea capir parché che la era drio far quele robe, ma che no l’era mia bon. Dele volte, quando Dorina la ghe disea su, Alexandru fin el pensea de no far pi el so stùdio. Anca cossita, lu el ga seità a mostrarghe rispeto e amor ala so dona e a far de Geovà la roba pi importante dela so vita. Come lu l’è stà un bon esémpio, Dorina la ga dessidio tornar a studiar la Bìblia e la se ga batesada. — Varda el vìdeo nel jw.org Alexandru e Dorina Vacar: “El amor l’è passiente e bon” nela parte “La verità la càmbia la vita”.
13. Come che podemo mostrar che amemo a Geovà e ala nostra fameia?
13 Geovà el ga creà la fameia e el vol che tute le sìpia felice. (Efe. 3:14, 15) Ma se volemo esser pròpio felici, ghemo de obedir a Geovà e far tuto come lu el vol. Alora, sìpia sicuro che Geovà el resta tanto contento quando te proi far el to meio par servirlo e par tratar la to fameia con amor e rispeto. — Rom. 12:10.
INCORAIA I ALTRI A ESSER COME I NASIREI
14. A chi che podemo incoraiar?
14 Tuti quei che i ama a Geovà e i vol servirlo i ga de cambiar qualcossa nela vita una ora o l’altra. Ma pol esser che no sìpia mia fàcile. Alora, come che te pol giutar i fradei che i ze drio sforsarse par far de pi par Geovà? Te ghè de incoraiarli par meso de quel che te parli. (Giò 16:5) Varda arquanti fradei che podemo sforsarse de incoraiar. Pol esser che nela to congregassion ghen’è fradei che i ga dessidio viver con manco soldi o manco robe par far de pi par Geovà. O fursi ghen’è gióveni che i ze drio mostrar coraio de esser difarenti dei altri nela scola. Te pol anca incoraiar i studianti dela Bìblia che i ze drio sforsarse par servir a Geovà, anca se la so fameia la ghe vien contra. Cossita, sfòrsate de incoraiarli e mostrarghe che te resti tanto contento de veder el so coraio e el so sforso par adorar a Geovà. — Filém. 4, 5, 7.
15. Come che podemo giutar i fradei che i ze drio far de pi par Geovà?
15 Noantri podemo giutar i nostri fradei che i ze drio far de pi par Geovà in quel che ghe ocore. (Pro. 19:17; Ebr. 13:16) Varda el bel esémpio de una sorela pi vècia che la ze de star nel Sri Lanka. Come ela la ga scominsià a ciapar de pi soldi nela so aposentadoria, ela la ga volesto giutar due pioniere gióvenete che l’era drio mancarghe soldi. Ela la ga dessidio pagarghe le conte del selular tuti i mesi. Ela la ga fato una bela roba, mia vera?
16. Cossa che la promessa dei nasirei la ne insegna sora Geovà?
16 Sicuro che noantri ghemo imparà tanto col esémpio dei nasirei. Ma podemo imparar anca sora Geovà. Lu el sa che noantri volemo tanto assarlo contento e che volemo far quel che ghemo prometesto a lu. Geovà el ne assa mostrar che lo amemo, e questo l’è un bel presente che lu el ne ga dato. (Pro. 23:15, 16; Mar. 10:28-30; 1 Gio. 4:19) La promessa che i nasirei i fea anca la mostra che Geovà el dà tanto valor a tuto quel che femo par lu. Alora, volemo sforsarse de seitar a servir a Geovà e a darghe el nostro meio.
COSSA CHE TE GHÈ IMPARÀ?
-
De che maniere i nasirei i mostrea che i gavea coraio e i era pronti par far de pi par Geovà?
-
Come che podemo incoraiar i altri a esser come i nasirei e far de pi par Geovà?
-
Cossa che la promessa dei nasirei la ne insegna sora Geovà?
CÀNTICO 124 Sempre leai
a Anca se Geovà el gàpia scoliesto arquanti nasirei, quasi tuti i nasirei i fea questa promessa de volentiera. — Varda el quadro “ Geovà el ga scoliesto arquanti nasirei”.
b (Nùmeri 6:1, 2) Geovà el ga dito ancora a Moisè: 2 “Te ghè de dir ai israeliti: ‘Se un omo o una dona i fà una promessa spessial par viver come nasireo par Geovà,
c Dele volte, le nostre publicassion le dise che quei che i dopera la so vita par laorar par Geovà i ze come i nasirei. Ma, in questo stùdio, noantri ndaremo veder come che tuti i servi de Geovà i pol esser come i nasirei.
d (Nùmeri 6:3, 4) no’l ga de bever gnente de vin o qualcossa che ghen sìpie àlcol. No’l ga de bever aseo de vin gnanca aseo che l’è fato de àlcol. No’l ga de bever gnente fato de ua, gnanca magnar ua, sia dela vigna o seca. 4 Par tuti i giorni che lu l’è nasireo, no’l ga de magnar gnente dela vigna, sia le ue verde o le scorse.
e Noantri credemo che no ghen’era mia altre lege o comandamenti che i nasirei ghe tochea obedir par causa dela so promessa.
f Varda el artìcolo “Nós decidimos simplificar a vida” nel jw.org, nela sèrie “Stòrie de vita de Testimònie de Geovà”.
g (Nùmeri 6:5) “‘Lu no’l ga de taiarse i cavei dela so testa par tuti i giorni che l’è nasireo. Lu el ga de restar santo, sensa taiarse i cavei, fin che se finisse i giorni che lu l’è dedicà a Geovà, el ga de assar cresser i so cavei.
h (Nùmeri 6:6, 7) Lu no’l ga de rivar darente de una persona morta fin che se finisse i giorni che el sarà dedicadi par Geovà. 7 Ancora che el so pare, so mare, so fradel o so sorela i more, lu no’l ga de deventar impuro, parché el ga nela so testa el segnal de che l’è dedicà al so Dio.
i ILUSTRASSION: Un nasireo l’è nel coerto dela casa e el vede che altre persone le porta via una persona dela so fameia che la ze morta. Par causa dela promessa che el ga fato, lu no’l pol mia esser insieme a lori.
