MWAHA ONTHOKORORIWA 7
ETXIPO 51 Nihiivahererya wa Yehova!
Etthu ninxutteraahu ni Manaziri
“Khweli ehuhu yothene ya natiri awe, owo ti Munaziri a Yahvéh.” — NAM. 6:8.
ELE NINKELA AHU OXUTTERA
Ninrowa woona moota ntakihero na Manaziri ninkelaaya onixuttiha okhala atthu oolipa murima ni okhala oolikaneene onvaha amakeya Yehova.
1. Itthu heeni arumeyi a Yehova akhalayi yaapankaaya?
NYUWO munnavaha mwiitti onthamwene anyu ni Yehova? Moohihovela aani! Mene khaiyene meekhiinyuru. Khalayi yaakhala atthu yiisoonela ntoko nyuwo muniisoonelaanyu. (Nsal. 104:33, 34) Atthu antxipale yaapaka etthu weera emukokhorele Yehova. Nave ti yeeyo Manaziri a wIsraeli akhalayi yaapankaaya. Manaziri yaari taani ni hiyo ninxuttera eheeni ni ntakihero naya?
2. (a) Manaziri yaari taani? (Namalepela 6:1, 2) (b) Mwaha wa heeni ana a Israeli akina yaathanliyaaya ompaka natiri a Manaziri?
2 Masu ooweera “Munaziri” mwa nuulumo na eKereku entaphulela “ethanlinwe” “emwalanyihinwe” naari “yiivaherenre.” Manaziri yaari ana a Israeli oowiilipihera nave yaawo yaapaka etthu weera emukokhorele Yehova mwa mukhalelo wooreera. Nlamulo na Mose naahima weera mulopwana naari muthiyana, emmaneleke natiri woothanleya Yehova ethanlaka okhala Munaziri mwa ehuhu vakhaani. a (Mmusome Namalepela 6:1, 2.) Vaavo ana a Israeli yampakaaya natiri ola a Munaziri, awo yannatthuneya otthara itthu ikina seiyo ana a Israeli yahaattharaaya. Vanonto, mwaha wa heeni ana a Israeli yaatthuneyaaya othanla ompaka natiri owo? Onooneya weera, mwaha wa nsivelo naya ni Yehova, ni oxukurela waya mareeliho ootheene a Yehova. — Ola. 6:5; 16:17.
3. Moota heeni atthu a Muluku olelo va enooniheraaya mikhalelo imoha-moharu sa Manaziri?
3 Vaavo ‘nlamulo na Kristu’ ntxentxalaaya nlamulo na Mose, atthu a Muluku khiwaatthuneya tho okhala Manaziri. (Agal. 6:2; Arom. 10:4) Mene, hiihaale ntoko Manaziri, olelo va atthu a Yehova ennavirelela woonihera ntthuno nootthuna omukokhorela ni murima wootheene, ni munepa wootheene, ni muupuwelo wootheene ni ikuru sootheene. (Mar. 12:30) Vaavo hiyo nniivahereraahu wa Yehova, hiyo ninnammana natiri ni murima ahu wootheene. Weera nikhale moovarihana nnatiri owo, nintthuneya opaka yootthuna ya Yehova ni ovirelela omukokhorela. Ninrowa woona moota Manaziri yaakwaniheraaya anatiri aya ni moota ntakihero naya ninnikhaviheraaya omukwanihera natiri nimmanenlaahu Yehova. b (Math. 16:24) Arowe noone matakihero makina.
MWAAPAKEKE AMAKEYA
4. Moovarihana ni Namalepela 6:3, 4, amakeya heeni Manaziri yaaraaya oolikaneene weera yaapake?
4 Mmusome Namalepela 6:3, 4. Manaziri khiyaatthuneya owura eviinyu yoohapala naari otxa ewuva. Ana a Israeli akina yaamurowaka owura eviinyu yoohapala ni otxa ewuva ni soowiima sikina mwaha wooweera khiyaarinono mwiikho itthu sene seiya. Biblya onnahima weera ‘eviinyu ennamuhakalaliha mutthu mmurimani mwawe’ nave ti yoovaha ya Yehova. (Nsal. 104:14, 15) Nnaamweera vareene hiiho, Manaziri yaari oolikaneene weera ehiwure eviinyu. c
Nyuwo muri oolikaneene weera mwaapake amakeya ntoko hiihaale Manaziri yaapankaaya? (Nwehe iparagrafu 4-6)
5. Amakeya heeni Madián ni Marcela yaathanliyaaya waapaka, ni mwaha wa heeni?
5 Hiihaale ntoko Manaziri, hiyo tho ninnaapaka amakeya weera nimpakele itthu sintxipale Yehova. Nwehe ntakihero na Madián ni Marcela. d Ntheli nna naakhalano ekumi yooreera, Madián annavara muteko ni awosa yannakhala nipuro nootepa oreera. Menento awo yannatthuna vantxipale onvarela muteko Yehova, nto weera ekwanihere yooluluwanyaaya awo yannatthuneya opaka matxentxo makina. Awo ennahima eriki: “Hiyo wannatthuneya ovukula itthu naaraahuno, mene naahithamela empa ekhaani ni naattumiha ekaaro ahu.” Madián ni Marcela awo khiyaatthuneya ompaka makeya owo, mene awo yaahipaka eyo mwaha wooweera yaatthuna opaka itthu sintxipale mmutekoni mwa Yehova. Nto awo eri oohakalala vantxipale mwaha wa soothanla epankaaya.
6. Mwaha wa heeni hiyo nnaapakaahu amakeya? (Nwehe efootu.)
6 Olelo va, arumeyi a Yehova onnaasivela ompaka makeya weera ekhaleke ni etempu yintxipale weera emukokhorele Yehova. (1 Akor. 9:3-6) Yehova khonnikhanyerera hiyo waapaka amakeya awo, nave itthu ikina asinna enlevaaya khaiyene ti soonanara. Mwa ntakihero, asinna akina ennaleva muteko onaasivela, naari empa naari mwaamunama mukina awo emmusivelaaya. Akina yaathanla ohithela naari ohitheliwa mwa ehuhu vakhaani, ni akina yaathanla oweherera etempu vakhaani weera ekhaleno anamwane noomala othelana. Akina yaathanla okhavihera mittetthe soothowa anamalaleera, nnaamweera eyo eweerihaka okhala ottai ni emusi aya ni asinthamwene aya. Antxipale a hiyo ninnapaka eyo mwaha wooweera nintthuna opaka ele ninweraahu mmutekoni mwa Yehova. Muroromeleke weera Yehova onnavaha mwiitti vantxipale amakeya ootheene nyuwo munaapakaanyu weera mpake sintxipale mmutekoni mwawe, ekhale vakhaani naari mantxipale. — Aheb. 6:10.
MUKHALE OOLIKANEENE WEERA NVIRIKANE NI ATTHU AKINA
7. Mwaha wa heeni waaraaya wooxupa wa Munaziri omukwanihera natiri awe? (Namalepela 6:5) (Nwehe efootu.)
7 Mmusome Namalepela 6:5. Manaziri khiyaatthuneya omettha mayihi. Owo waari mukhalelo mmoha yeeraaya yoonihereke weera yannamwiiwelela moomalela Yehova. Wakhala weera mwIsraeli aarowa okhala Munaziri mwa etempu vakhaani, mayihi awe yaarowa okhala oorakama ni khiwaarowa okhala wooxupa akina omusuwela. Wakhala weera atthu akina yannaattittimiha Manaziri ni waalipiha weera evireleleke ni natiri aya, waamukhala wookhweya wa awo okhala oovirikana ni akina. Mene mooriipiha murima, yaahikhala etempu wIsraeli Manaziri yahaattittimihiwaaya naari khiyaakhela nikhavihero na ana a Israeli akina. Etempu ya mprofeti Amosi, a Israeli yaawo yaari anamavaanyiha ‘yannaavaha eviinyu Manaziri’ apaale, awo yaatthuna oweeriha ohiiwelela nlamulo na ohiwura eviinyu. (Am. 2:12) Manaziri yaatthuneya okhala oolipa murima weera ewere omukwanihera natiri aya ni okhala oovirikana ni akina.
Munaziri mmoha yoowo aari oororomeleya wa natiri awe aari oolikaneene okhala oovirikana ni atthu akina (Nwehe eparagrafu 7)
8. Moota heeni yooweereya ya Benjamim yoolipinhaayani nyuwo?
8 Nikhaviheriwaka ni Yehova, hiyo tho nnoowera okhala oolipa murima ni okhala oovirikana ni atthu akina nnaamweera nreene atthu oolosowa. Nwehe ntakihero na Benjamin yowo orino iyaakha 10 ni okhala oNoruega. Mwaha wa ekhotto wUcrânia, exikola aasomaawe yaahipaka mareherero weera yoonihere weera yannakhavihera. Anaxikola yannatthuneya weepa etxipo ni owara ikuwo sa ikoore sa ebandeira ya wUcrânia. Weera aheerele eparte mareherero ale, Benjamin aahirakamela mapuro awo yaapakiwaayavo mareherero ale, mene prusoore mmoha aamoona ni aamukhuwelela ariki: “Nweeke nno, mwaha wooweera ootheene hiyo nnoowehererani nyeenyu!” Benjamin aahiwaattamela aprusoore ni aahaaleela moolipa murima weera: “Miyo nkineerela eparte nyaha sa ipoliitika, mweekhaikhai, Anamoona a Yehova antxipale yaatthukeliwa mukateya mwaha wookhootta orowa owana ekhotto.” Aprusoore ale yaahiiwexexa etthu owo aahimmaawe ni aahimuleela owo weera khaatthuneya weerela eparte mareherero ale. Mene makoleegaawe yaapatxera omukohexexa mwaha wa heeni owo aheerelaawe eparte. Mene Benjamin aahinyoonyiwa vantxipale mpaka ohalela winla, nnaamweera vareene hiiho, owo aahaaleela anaxikola ootheene masu ale aalenlaawe aprusoore. Avinyaka, Benjamin aahaaleela asitiithi awe weera aahoona weera aakhaviheriwa ni Yehova waakiha nroromelo nawe.
9. Moota heeni ninrowaahu ohakalaliha murima wa Yehova?
9 Atthu ennasuwela weera hiyo naatthu oovirikana ni atthu akina mwaha wooweera ninnamwiiwelela Yehova. Hiyo onnatthuneya olipa murima weera naaleele atthu akina omutekoni naari oxikola weera hiyo Anamoona a Yehova. Vaavo mikhalelo sa elapo ela sinxupaaya, onnakhala wooxupa okhala moovarihana ni malamulo a mBiblyani ni waaleela mitthenka sooreera atthu akina. (2 Tim. 1:8; 3:13) Ikwaha sootheene musuweleke weera ‘murima wa Yehova onnahakalala’ vaavo nniilipiheraahu weera nikhale oovirikana ni yaale ehimmukokhorela Yehova. — Mir. 27:11; Mal. 3:18.
NVIRELELE OMUHELA YEHOVA NIPURO NOOPATXERA MWEEKUMINI MWANYU
10. Mwaha wa heeni waaraaya wooxupa wa Manaziri otthara miruku siri va Namalepela 6:6, 7?
10 Mmusome Namalepela 6:6, 7. Manaziri khiyaatthuneya omwaattamela mutthu ookhwa. Mene pooti wuupuwelaka weera awo khiyaari maxupo matokweene, nto awo yaari maxupo matokweene wa Munaziri vaavo mmusi awe aakhwaawe. Etempu ele vaavo mutthu aakhwaawe, atthu yaakhovelela okhala vakhiviru va mutthu owo. (Yoh. 19:39, 40; Mit 9:36-40) Nto Munaziri khiwaatthuneya otthara sookhovelela iye. Nnaamweera aaviriha maxupo ala, Munaziri aavirelela okhala moovarihana ni natiri awe, nto eyo yannoonihera weera aakhalano nroromelo noolipa. Moohihovela, Yehova annaavaha ikuru Manaziri weera evirihe itthu iye sootepa oxupa.
11. Eheeni hiyo nintthuneyaahu opaka vaavo nimpakaahu soothanla sa veemusini? (Nwehe efootu.)
11 Hiyo ninnavaha mwiitti vantxipale wiivaherera wahu wa Yehova. Eyo ennavoleela soothanla sahu sa veemusini, nave ninniilipihera weera nikosoope itthu sootthuneya sa veemusini, mene khaninhela nipuro noopatxera itthu sa veemusini ohiya sa Yehova. (Math. 10:35-37; 1 Tim. 5:8) Ikwaha ikina hiyo onnatthuneya opaka soothanla sihinaasivela amusi ahu mene simmusivela Yehova.
Nyuwo muri oolikaneene ohela nipuro noopatxera yootthuna ya Yehova nnaamweera itthu sixumpeene? (Nwehe eparagrafu 11) e
12. Vaavo aavirihaawe maxupo a veemusini, etthu heeni Alexandru aapankaawe ni eheeni ahaapankaawe?
12 Moone ntakihero na Alexandru ni mwaarawe Dorina. Awo yaapatxera omusoma Biblya, mene mwa eyaakha emoha, Dorina aaheemexera. Nave owo aatthuna weera Alexandru eemexere. Moomaaleleya ni mwa nsivelo, owo aamuleela weera khaarowa weemexera. Nto Dorina khiyaamusivenle ni aaheerera oweeriha aiyawe weera yeemexere. Alexandru onhima weera anneerera wiiwexexa etthu heeni yaaweeriha opaka etthu ele, nto khiwaakhweñye. Ikwaha ikina vaavo Dorina uulumaawe moonyoonyiwa ni moohireerela, owo annatthuna ohiya omusoma Biblya. Nnaamweera vareene hiiho, Alexandru aavirelela omuhela Yehova nipuro noopatxera, emaara emoha-moharu, waattittimiha ni owoonihera nsivelo amwaarawe. Mwaha wa ntakihero nooreera na Alexandru, Dorina aalakela otthikela omusoma Biblya ni muhoolo mwaya, aaBatiziwa. Moone va jw.org eviidiyu Alexandru ni Dorina Văcar: “Ole oniphenta, Toopixa Murima ni Tooreera Murima” va eparte “A Verdade Transforma Vidas.”
13. Moota heeni hiyo nneeraahu nimoonihere nsivelo Yehova ni emusi ahu?
13 Yehova mpattuxa a emusi ni owo ontthuna weera imusi sikhaleke soohakalala. (Aef. 3:14, 15) Hiyo naatthunaka okhala oohakalala mweekhaikhai, onnatthuneya opaka itthu mwa moonelo wa Yehova. Muroromeleke weera Yehova onnahakalala ni itthu nyuwo mumpakaanyu weera mmukokhorele, vaavo nyuwo munkosoopaanyu emusi anyu ni othokorora mwa nttittimiho. — Arom. 12:10.
NWOOPEREREKE ATTHU AKINA WEERA YAATAKIHEKE MANAZIRI
14. Taani hiyo nintthuneyaahu waalipiha ni masu ahu?
14 Atthu ootheene enthanla onvarela Yehova olelo va, onnatthuneya wiilipihera opaka ele enweraaya mwa nsivelo. Mene khonkhweya opaka eyo. Vanonto, nnaakhavihere hayi atthu akina ompakela itthu Yehova? Hiyo pooti waalipiha moorweela mwa masu ahu. (Yobi 16:5) Neereke asinna a muloko anyu enniilipihera okhweihera ekumi aya weera envarele Yehova? Neereke nyuwo munnaasuwela amiravo enoonihera olipa murima weera evirikane ni atthu akina oxikola nnaamweera eyo ereene yooxupa? Munnamusuwela munna naari namasoma a Biblya oniilipihera okhala oororomeleya nnaamweera atthara-tthariwaka ni emusi? Mukhale oolikaneene weera mpake ele munweraanyu weera mwaalipihe atthu awo, mwaaleele asinna awo moota nyuwo munaatikhinaanyu mwaha wa olipa waya murima ni wiilipihera waya weera epake ele enweraaya weera envarele Yehova. — Film. 4, 5, 7.
15. Moota heeni atthu akina enaakhaviheraaya ale envara muteko wa ehuhu yootheene?
15 Ikwaha ikina hiyo pooti waakhavihera asinna envara muteko wa ehuhu yootheene. (Mir. 19:17; Aheb. 13:16) Tiyeeyo murokora mmoha oowunnuwela onkhala oSri Lanka aapankaawe. Owo aahaatxeereriwa musurukhu aakhelaawe omutekoni wawe ni annatthuna waakhavihera asirokora eeli mapioneira yaawo yaarino maxupo a ophwanya yootxa weera evirelele ovara muteko. Nto owo aalakela miyeeri soothesene oliva ikontha sa telefooni. Tthiri ola mukhalelo wootepa oreera murokora ola oonihenraawe!
16. Eheeni hiyo ninxutteraahu ni Manaziri?
16 Moohihovela, hiyo nooxuttera vantxipale ni ntakihero na Manaziri! Mene, natiri a Manaziri, annanxuttiha-tho etthu ekina woohima sa Tiithi ahu, Yehova. Owo oosuwela weera hiyo nintthuna omuhakalaliha ni weera nri oolikaneene waapaka amakeya weera nikwanihere wiivaherera wahu. Owo onnanttittimiha mwaha woonivaha eparakha yoomoonihera nsivelo. (Mir. 23:15, 16; Mar. 10:28-30; 1 Yoh. 4:19) Natiri a Manaziri, annoonihera weera Yehova onnawoona amakeya nnaapakaahu, nave onnansivela mwaha wa itthu soothesene nnampakelaahu. Tivawonto, onnatthuneya opaka ele ninweraahu weera nivirelele onvarela Yehova, ni okhala oolikaneene weera nipake ele ninweraahu.
MWAAKELA WAAKHULA HAYI?
-
Mwa mukhalelo heeni Manaziri yaaraaya oolipa murima ni oolikaneene waapaka amakeya?
-
Hiyo ninrowa owooperera hayi atthu akina waatakiha Manaziri ni waapaka amakeya wa Yehova?
-
Natiri a Manaziri annixuttiha eheeni woohima sa Yehova?
ETXIPO 124 Niroromeleyeke Okathi Wotheene
a Nnaamweera Manaziri makina yaathanlinwe ni Yehova, ana a Israeli antxipale yaari Manaziri, yaahithanla okhavihera mootaphuwa. Nwehe ekwaadru “ Manaziri oothanliwa ni Yehova.”
b Ikwaha ikina, irevista sahu sinnaalikanxera Manaziri ni ale envara muteko wa ehuhu yootheene. Mene mwa yoosoma ene yeela, nnoorowa othokorora moota ootheene hiyo niivaherenre wa Yehova ninrowaahu waatakiha Manaziri.
c Onnooneya weera Manaziri khiyaakhanleno yookhanyereriwa ekina ntoko yoothanleliwa, moovarihana ni natiri aya.
d Nwehe va jw.org mwaha “Nós decidimos simplificar a vida” va eparte “Relatos da Vida de Testemunhas de Jeová”.
e OTAPHULELA WA EFOOTU YA: Munaziri mmoha areene vasulu va empa, awehaka murutthu wa mmusi awe oosiveleya. Nto mwaha wa natiri awe wa Yehova, owo khontthuneya okhavihera muteko owo.
