1. Okhuma khalai, etthu xeeni anamunceene anipaka aya?

 NIIREKE munnimphenta vanceene Yehova? Moohaanyiherya nyuwo munnimphenta! Nave khamunimphenta mekhinyu paahi. Okhuma khalai, atthu anceene anniimananiha omphenta Yehova, ntoko nyuwo muniira anyu. (Esal. 104:33, 34) Anamunceene khareere wiimananiha opaka ele aniwerya aya, wiira amurumeele Yehova. Nave eyo ti etthu yaapanke aya atthu a okathi wa aisarayeli, anisuweliwa okhala maNaziri. Tani yaari maNaziri, nave ntakiheryo naya ninniixuttiha exeeni?

2. a) Tani yaari maNaziri? (Moothakoni 6:1, 2) b) Xeeni mwisarayeli iivahererya awe okhala muNaziri?

² Nuulumo noowi “muNaziri”, nikumihiwe nttaava na eHeeberi nintaphulela “Oothanliwa”, “Oowiivalanya” aahiiso “Oowiivahererya”. Nuulumu nla, nnaahimya otepexa wene aisarayeli yaawo yaaluttuweliwa ni yaapaka ele aniwerya aya, wiira amurumeele Yehova mwa enamuna ya vameekhaaya. Nlamulo na Moise, naanimweemererya mulopwana wala muthiyana, ompakela Yehova yoothanla ya vameekhaaya, wiivahereryaka vootthuna vawe okhala muNaziri mwa okathi vakhaani. a (Mmusome Moothakoni 6:1, 2.) Yoothanla eyo aahiiso yooleiherya vootthuna wawe, yaahela muhina otthara malakiheryo yaawo aisarayeli akina yaahaasuwela aya aahiiso yahaaweha aya. Xeeni mwisarayeli aathanla awe okhala muNaziri? Etthu yaamwiiriha, woonasa wene waari mwaha wa niphento nuulupale aarina awe wa Yehova ni oxukhurela mwaha wa mareeliho aaphwanya awe. — Otum. 6:5; 16:17.

3. Olelo-va, arumeyi a Muluku anlikana sai ni maNaziri?

³ Nuumala Nlamulo na Moise orantteliwa ni “nlamulo na Kristu”,  khuuvo mwisarayeli aareerela wiivahererya wiira okhale muNaziri. (aGal. 6:2; aRom. 10:4) Ntoko maNaziri, arumeyi a Yehova a olelo-va, anniimananiha opaka ele aniwerya aya wiira amurumeeleke Yehova ni murima aya wootheene, okumi aya wootheene, muupuwelo aya wootheene ni ikuru saya sootheene. (Mar. 12:30) Ninnithanla vootthuna wahu omurumeela Yehova, okathi yoole nniivahererya ahu wa yena. Okhala moovarihana ni yoothanla ahu, onihela muhina wiimananiha opaka ele Yehova oniphavela awe ni omurumeela. Vaavo nnuupuwelela ahu moota maNaziri yaakhala aya moovarihana ni yoothanla aya, nnoowerya wiixutta itthu sinrowa onikhaliherya okhala moovarihana ni yoothanla sahu. b (Math. 16:24) Nrowe nthokorerye matakiheryo vakhaani.

MWIIMANANIHEKE

4. Moovarihana ni Moothakoni 6:3, 4, itthu xeeni maNaziri yiimananiha aya wiisiinaneliha?

⁴ Mmusome Moothakoni 6:3, 4. MaNaziri, yaahaana wiisiinaneliha khula etiipu ya eviinyu ni mihokorokho saapakaniwa eviinyu, ntoko ewuuva, ekhale ekithi aahiiso yoowuuma. Atthu yaattamanne aya, yaanihakalala khula nihiku vaavo yaalya aya mihokorokho iyo, maana khahiyo saari sootthekeya. Biibiliya onihimya wiira ‘eviinyu ennitteeliha mirima’ sa apinaatamu, maana yoovaha enikhuma wa Muluku. (Esal. 104:14, 15) Nnaamwi mihokorokho iyo saakhaliherya atthu okhala ootteeliwa murima mookumini mwaya, maNaziri yaahaana wiisiinaneliha. c

5. Wiimananiha xeeni Madián ni Marcela apanke aya ni mwaha wa xeeni?

⁵ Moolikanasa ni maNaziri, hiyo nihaana wiimananiha vanceene wiira nincererye miteko nninvarela ahu Yehova. Nrowe nthokorerye ntakiheryo na Madián ni Marcela. d Anamathelana ala makristau, yaahikhalana okumi woohakalaliha ni woovareleleya. Madián aahikhalana muteko wooloka, wamphwanyiha musurukhu munceene ni waaweemererya okhalana empa yootepexa oreera. Masi awo yaaphavela wuncererya muteko yanvarela aya Yehova. Wiira aphwanye yoolakela aya ele, awo yaahaana opaka marukunuxo. Awo anihimya so: “Hiyo naahivukula itthu naathuma ahu saaniiriha  orumeela musurukhu munceene. Naahithaamela empa yaamukhaani nave naahitumiha ekaaro ahu”. Madián ni Marcela khivaakhweelale opaka marukunuxo awo, masi awo yaahithanla opaka eyo, okhala wiira yaaphavela wuncererya muteko yanvarela aya Yehova. Vano, annixukhurela ni annihakalala mwaha wa yoothanla apanke aya.

6. Wiimananiha xeeni arumeyi a Yehova olelo-va anipaka aya? (Nwehe eteseenyo.)

⁶ Arumeyi a Yehova a olelo-va, annihakalala vaavo aniimananiha aya wiivaha okathi wiira anvarele muteko Yehova. (1 aKor. 9:3-6) Yehova khonnikhanyererya wiira niimananiheke omurumeela. Masi okathi ninleva ahu itthu sikina wiira nimurumeele, yena khonoona okhala vootthekeya. Mwa ntakiheryo, atthu akina annihiya muteko waasivela, empa aya ni mihuwo saya. Nave akina annithanla okhala ahithenle aahiiso ahitheliwe mwa okathi munceene, nave yathela vale annithanla ohaayara anamwane. Nave-tho atthu akina, annithanla orumeela mapuro oothowa anamalaleerya, nnaamwi eyo evekelaka okhala ottaiwene wa amusi aya aahiiso apatthani anaaphenta aya vanceene. Anamunceene a hiyo annithanla opaka itthu iya, maana aniphavela onvaha Yehova ele aniwerya aya. Mukupaliki wiira Yehova khonrowa oliyala wiimananiha wanyu, okhale vakhaani aahiiso vanceene ni yoothanla anyu ya omurumeela yena. — aHeeb. 6:10.

MUKHALEKE OOVIRIKANA NI ATTHU AHINIMURUMEELA YEHOVA

7. Mixankiho xeeni saaphwannye maNazari saakhanle oowiiriha ohiya yoothanla aya? (Moothakoni 6:5) (Nwehe eteseenyo.)

⁷ Mmusome Moothakoni 6:5. Ale yaari maNaziri khiyaametthiwa ikharari. Mwa enamuna eyo, yaanooniherya wiira yaanimwiiwelela Yehova moomalela. Mwisarayeli aakhumme khalai orumeela ntoko muNaziri, vaaniweryaneya osuweliwa ni atthu akina, maana ikharari sawe saakhala soowaatta ni soorakama. Nave vaari vookhweya muNaziri osuweliwa ni atthu akina, akhala wiira ale yaattamanne aya yaanaattittimiha ni yaanaalipiha wiira ahihiye yoothanla aya. Masi mooriipiha murima, waahikhala okathi maNaziri yahaattittimihiwa aya ni yahaakhaliheriwa aya. Okathi wa profeta Amosi, aisarayeli akina yaari anamavirikanya, ‘yaanaakhanyererya maNaziri awo owurya eviinyu’. Yaanipaka eyo, wiira yaahiihe yoothanla aya ya ohiwurya eviinyu. (Am. 2:12) Okathi owo, maNaziri yaapirisari olipa murima vanceene wiira ahihiye yoothanla aya ni okhala oovirikana ni atthu akina.

8. Yoowiiraneya ya Benjamin, enoolipihani sai?

⁸ Nikhaliheriwaka ni Yehova, olipa wahu murima onoonikhaliherya okhala oovirikana ni atthu akina, hata okhala wene niri ene atthu oowoova. Nrowe nthokorerye ntakiheryo na Benjamin, yoowo ori Namoona a Yehova ni ovirinhe iyaakha 10 ori ene oNoruega. Eskola  aasoma awe, yaahipakiwa mareheryo wiira yakhaliheriwe atthu yaaphwanyiwe ekhotto wUcrânia. Anamwane yaahivekeliwa wiira yiipeke isipo, awanre ene ikuwo saarina ekoore ya epantera ya elapo ele. Benjamin aahimananiha osyaka itthu iyo, okhalaka mapuro oorakamela yaapakiwa aya mareheryo awo. Nto prusoore mmosa, aahinweha ni aahimwiitthana ohimyaka so: “Murwe mukhale vamosa ni hiyo niinano-va. Nnimoolipelelani!” Moolipa murima, Benjamin aahimwaattamela prusoore ole, onamuleela so: “Miyo nkiniirela mpantta myaha sinivarihana ni owana-wana wa anapoliitika. Masi Anamoona a Yehova anceene, aatthukweliwa mukhatteya mwaha wookhootta okhaliherya ikhotto”. Nto prusoore ole, aahiwiriyana etthu aahimmye awe ni aahinvekela muswammaha. Anaskola akina, yaahipacerya omukoha exeeni yaamwiiriha ohitakaahana naawo. Benjamin aahinanariwa vanceene onahala vakhaani wunla, masi moolipa murima aahaaleela etthu emosa-ru anaskola ale, aamuhimenrye awe prusoore ole. Nuumala-vo, Benjamin aahaatthokiherya anamuyari awe, moota aakhaliheriwa awe ni Yehova wiira aakiherye waamini wawe.

9. Mwa enamuna xeeni nikhanle ahu ootteeliha murima wa Yehova?

⁹ Mwaha woowi noothanla omwiiwelela Yehova, ninnooniwa okhala oovirikana ni atthu akina. Nihaana okhala oolipa murima, wiira naaleele atthu akina okhale omutekoni aahiiso oskola, wiira na Anamoona a Yehova. Mwaha wa makhalelo a olumwenku ola ni atthu akina okhala ootepa otakhala, itthu iyo pooti oniirihaka woova okhala moovarihana ni malakiheryo a mbiibiliyani, ni waaleela atthu akina ihapari sooreera. (2 Tim. 1:8; 3:13) Muhiliyale wiira khula okathi ‘ninnitteeliha murima’ wa Yehova, vaavo ninkhala ahu oolipa murima ni nihinihiya ahu okhala oovirikana ni atthu ahinimurumeela. — Mir. 27:11; Mal. 3:18.

MMUHELEKE YEHOVA NIPURO NOOPACERYA MWEEKUMINI MWANYU

10. Yoolema xeeni eri Moothakoni 6:6, 7, yaaxankiha vanceene maNaziri?

¹⁰ Mmusome Moothakoni 6:6, 7. MaNaziri khiyaamwattamela mutthu ookhwa. Woonasa wene hiyo pooti wuupuwelaka wiira eyo yaari etthu yookhweya. Masi okathi wa Biibiliya, maNaziri vaanaavila wiiwelela nlamulo nno, akhala wiira akhweliwe mmusi yaaphenta aya vanceene. Waattamela murutthu, yaari yoolema ya okathi ole, okhala wiira yaahaana olokiherya. (Yoh. 19:39, 40; Mit. 9:36-40) Nto ale yaari maNaziri, vaanaaxankiha vanceene wiiwelela yoolema eyo. Hata okathi yoole woowereya yaakhweliwa aya mmusi aya, maNaziri  yaanooniherya waamini waya ahihiyaka yoothanla aya. Masi Yehova aanaalipiha ni waakhaliherya arumeyi awo oororomeleya, wiira ahihiye ovilela mixankiho saaphwanya.

11. Exeeni arumeyi a Yehova anithanla aya opaka, okathi sinikhumelela aya myaha sinivarihana ni amusi? (Nwehe eteseenyo.)

¹¹ Ntoko makristau, nihaana ovarexexa wiivahererya wahu wa Yehova. Masi ikwaha sikina pooti onixankihaka ovarexexa yoothanla ahu eyo, otepexa wene okathi sinikhumelela aya myaha sinivarihana ni amusi. Nihaana okhalana ephoole sa moota ninkhapelela ahu emusi, ntoko Yehova onnivekela awe. Masi nihikhala-khale nihelaka soophavela sa amusi nipuro noopacerya, ovikana iye Yehova onnivekela awe. (Math. 10:35-37; 1 Tim. 5:8) Ikwaha sikina, onihela muhina opaka soothanla sinninvuwiha Yehova, hata sihaasivelaka amusi.

12. Okathi Alexandru ahiiwanana awe ni mwaarawe, exeeni apanke awe ni exeeni ahaapanke awe?

¹² Nrowe nthokorerye yoowiiraneya ya Alexandru ni mwaarawe, oniitthaniwa Dorina. Nuumala oviriha mwaakha ntero anamathelana ale amusomaka Biibiliya, Dorina aahithanla ohiya omusoma, nave aaphavela wiira iyawe opake etthu emosa-ru. Masi moomaaleleya, owo aahimutthokiherya mwaarawe wiira yena khaarowa ohiya omusoma Biibiliya. Dorina khiyaamusivenle eyo, nto aahimukhanyererya iyawe wiira ohiye. Alexandru onihimya wiira, aaniimananiha wiira osuwele etthu yaamwiiriha mwaarawe okhalana moonelo ole, masi hata vari siiso, khahiyo vaari vookhweya ovilela muxankiho owo. Ikwaha sikina, okathi Dorina aamukhanyererya awe ni aamwaakhula awe mwa enamuna yoowereya, owo aanuupuwela ohiya omusoma Biibiliya. Masi Alexandru khaahiyale ovilela ni omuhela Yehova nipuro noopacerya mookumini mwawe. Nave khula okathi, aanimphenta ni omuttittimiha mwaarawe. Mweettelo ole wooloka, waahimwiiriha mwaarawe otthikela omusoma Biibiliya ni muhoolo mwaya aahithanla opatisiwa. Nwehe eviidiyu eri va jw.org eni: Alexandru ni Dorina Vacar: “Ole Oniphenta, Toopixa Murima ni Tooreera Murima”, eri mpantta oni: Ekeekhai Ennirukunuxa Mirima sa Atthu.

13. Ninrowa wooniherya sai wiira ninnimphenta Yehova vamosa ni emusi ahu?

¹³ Yehova tokumihenrye imusi, nto oniphavela wiira ootheene ahu nihakalaleke ni emusi ahu. (aEef. 3:14, 15) Naaphavelaka wooniherya omphenta Yehova ni okhalana ohakalala weekeekhai, nihaana opakaka itthu ntoko Yehova oniphavela awe. Mukupaliki wiira Yehova onnivaha efaita wiimananiha wanyu ni yoothanla anyu ya omurumeela, vaavo munikhapelela anyu ni othokorerya mwa niphento ni nttittimiho emusi anyu. — aRom. 12:10.

 MULIPIHANEKE MUKINA NI MUKWAAWE NTOKO MANAZIRI

14. Tani ninreerela ahu waalipiha ni moolumo ahu?

¹⁴ Ootheene ale anithanla omurumeela Yehova olelo-va, ahaana wiimananiha vanceene wiira ahihiye omphenta. Masi ikwaha sikina khahiyo ti vookhweya. Ninrowa waakhaliherya sai atthu akina wiira ahihiye wiimananiha omphenta Yehova? Nnoowerya opaka eyo, naalipihaka ni moolumo ahu. (Yoob. 16:5) Muloko anyu, niireke aakhala aniimananiha okhweiherya okumi aya wiira yincererye muteko aninvarela aya Yehova? Niireke munnaasuwela amiravo, aniimananiha vanceene okhala oovirikana ni anaskola akina, hata vahikhweyaka opaka eyo? Niireke aakhala anaskola a Biibiliya aniimananiha olipiha waamini waya ni ahinihiya okhala oororomeleya, hata alupatthiwaka ni amusi aya? Nihaana orumeela okathi ahu wiira naalipihe ni waamaaliha atthu awo, animurumeela Yehova vamosa ni hiyo, mwaha wa yoothanla aya ni olipa waya murima. — Fil. 4, 5, 7.

15. Ninrowa waakhaliherya sai anna ni arokora anivara muteko wa Muluku wa okathi wootheene?

¹⁵ Ikwaha sikina, hiyo pooti waakhaliherya anna ale anivara muteko wa Muluku wa okathi wootheene, naavahaka itthu nirina ahu. (Mir. 19:17; aHeeb. 13:16) Eyo ti etthu aaphavela awe murokora mmosa oororomeleya ni oowuuluvala onikhala oSri Lanka. Owo aahincereriwa musurukhu aakhela awe omutekoni wawe. Nto aaniphavela waakhaliherya arokora anli, yaawo yaarumeela ntoko mapioneera, wiira ahihiye muteko aya nnaamwi yaathoiwa musurukhu. Owo aahilakela khula mweeri owinviyarelaka musurukhu arokora ale wiira athumeke itthu saathowa. Moohaanyiherya, ola mukhalelo wooloka murokora ole oonihenrye awe!

16. Ntakiheryo na maNaziri ninniixuttiha exeeni?

¹⁶ Veekeekhai, ninniixutta itthu sinceene ni ntakiheryo nooloka na maNaziri, yaawo yiivahererya vootthuna waya! Yoothanla ya maNaziri enniniixuttiha etthu yootepa oreera voohimya sa Tiithi ahu a wiirimu, Yehova. Owo onnikupali wiira ninniphavela omuhakalaliha, nave niri oolikana ene opaka ele eniwerya ahu, wiira nimalelihe yooleiherya ahu ya omurumeela. Owo onninttittimiha oneemereryaka wiira nimphenteke moohikhanyereriwa. (Mir. 23:15, 16; Mar. 10:28-30; 1 Yoh. 4:19) Mareheryo a maNaziri, anooniherya wiira Yehova onniweha ni onnivaha efaita wiimananiha onipaka ahu wiira nimurumeele. Nto khula okathi, nikhaleke oolikana ene wiira nihihiye omurumeela Yehova, niimananihaka opaka ele eniwerya ahu.