1. Ano nga maopay nga disposisyon an ginpakita han mga magsiringba ni Jehova ha bug-os nga kasaysayan?

 GINPAPABILHAN mo ba an imo relasyon kan Jehova? Syempre! Ngan diri ka nag-uusahan. Tikang ha kadaan nga mga panahon, damu nga tawo an inabat han pariho han imo inaabat. (Sal. 104:​33, 34) Damu an naghimo hin mga sakripisyo basi makagsingba kan Jehova. Ito an ginbuhat han mga Nazareo ha kadaan nga Israel. Hin-o hira, ngan ano an aton mahibabaroan tikang ha ira ehemplo?

2. (a) Hin-o an mga Nazareo? (Numeros 6:​1, 2) (b) Kay ano nga ginpili han pipira nga Israelita nga magin Nazareo?

² An pulong nga “Nazareo” nagtikang ha Hebreo nga pulong nga nangangahulogan “Ginpili,” “Iginlain,” o “Dedikado.” Ini nga pulong husto nga naghuhulagway ha madasigon nga mga Israelita nga naghimo hin pipira nga personal nga mga sakripisyo basi makag-alagad kan Jehova ha espesyal nga paagi. Gintugotan han Mosaiko nga Balaud an usa nga lalaki o babaye nga maghimo hin espesyal nga saad kan Jehova pinaagi ha pagpili nga magkinabuhi sugad nga Nazareo hin pipira ka panahon. a (Basaha an Numeros 6:​1, 2.) Ito nga saad nag-uupod hin mga surundon nga diri kinahanglan himoon han iba nga mga Israelita. Salit kay ano nga ginpipili han usa nga Israelita nga magin Nazareo? Posible nga napagios hiya han iya hilarom nga gugma para kan Jehova ngan sinsero nga pagpasalamat han Iya hura nga bendisyon.—Deut. 6:5; 16:17.

3. Paonan-o an katawohan han Dios yana pariho ha mga Nazareo?

 ³ An kahikayan han pagin Nazareo natapos han ginsaliwnan an Mosaiko nga Balaud han “balaud han Kristo.” (Gal. 6:2; Roma 10:4) Pero pariho han mga Nazareo, an katawohan ni Jehova yana padayon nga nagpapakita hin daku nga hingyap nga mag-alagad ha iya ha ira bug-os nga kasingkasing, kalag, hunahuna, ngan kusog. (Mar. 12:30) Kinaburut-on nga naghihimo kita hin saad kon igindidedikar naton an aton kalugaringon kan Jehova. Basi magkinabuhi uyon hito nga saad, kinahanglan buhaton naton an kaburut-on ni Jehova ngan maghimo hin mga sakripisyo. Samtang gin-uusisa naton kon paonan-o nagkinabuhi an mga Nazareo uyon ha ira saad, mahibabaro kita hin importante nga mga leksyon kon paonan-o magkikinabuhi uyon ha aton saad. b (Mat. 16:24) Hisgotan ta an pipira nga ehemplo.

MAGIN ANDAM HA PAGSAKRIPISYO

4. Sumala ha Numeros 6:​3, 4, ano nga sakripisyo an ginhimo han mga Nazareo?

⁴ Basaha an Numeros 6:​3, 4. Kinahanglan likyan han mga Nazareo an ngatanan nga makahurubog nga irimnon ngan mga produkto han ubas, sugad han ubas ngan pasas. An mga tawo ha ira palibot posible nga pirme nag-i-enjoy hito nga mga pagkaon, ngan tama man ito kay waray sayop hini nga mga butang. Iginhuhulagway han Biblia an “bino nga nakakapalipay ha kasingkasing han tawo,” sugad nga regalo tikang ha Dios. (Sal. 104:​14, 15) Pero kinaburut-on nga ginsakripisyo han mga Nazareo an ira katungod nga i-enjoy ito nga mga butang. c

5. Ano nga mga sakripisyo an ginbuhat nira Madián ngan Marcela, ngan kay ano?

⁵ Pariho ha mga Nazareo, naghihimo liwat kita hin mga sakripisyo basi mas damu pa an aton mabuhat para kan Jehova. Pansina an ehemplo nira Madián ngan Marcela. d Ini nga Kristiano nga mag-asawa may-ada komportable nga kinabuhi. Hi Madián may maopay nga trabaho ngan naukoy hira ha mahusay nga apartment. Pero karuyag nira nga mas damu pa an ira mahimo ha ira pag-alagad kan Jehova. Para makab-ot nira ito nga tumong, nagdesisyon hira nga maghimo hin mga pagbag-o. “Gin-ibanan namon an amon mga kagarastohan,” hira nagsiring. “Binalhin kami ha mas guti nga apartment ngan ginbaligya an amon awto.” Diri kinahanglan nira Madián ngan Marcela maghimo hini nga mga sakripisyo—pero ginpili nira ito tungod kay  karuyag nira mapahaluag an ira ministeryo. Nagin kontento hira ngan malipayon ha ira mga desisyon.

6. Kay ano nga an mga Kristiano yana naghihimo hin mga sakripisyo? (Kitaa liwat an piktyur.)

⁶ An mga Kristiano yana nalilipay ha paghimo hin mga sakripisyo basi mas damu pa an ira panahon ha teokratiko nga mga buruhaton. (1 Cor. 9:​3-6) Diri kita gin-oobligar ni Jehova nga maghimo hini nga mga sakripisyo ngan diri man liwat maraot an mga butang nga aton ginbayaan. Pananglitan, ginpili han pipira nga diri magkaada kalugaringon nga balay, hayop, o trabaho nga ira gud karuyag. Damu an nagdesisyon nga diri la anay mag-asawa o magkaada mga anak. Ginpili han iba nga mag-alagad ha lugar nga mas daku an panginahanglan, bisan kon nangangahulogan ito nga magigin hirayo hira ha ira mga hinigugma. Damu ha aton an kinaburut-on nga naghimo hito nga mga sakripisyo kay karuyag naton ihatag kan Jehova an aton pinakamaopay. Sarig nga gin-aapresyar gud ni Jehova an bisan ano nga sakripisyo nga imo ginpili, daku man ito o guti, basi makag-alagad ha iya.—Heb. 6:10.

MAGIN ANDAM HA PAGIN NAIIBA

7. Kay ano nga bangin makuri para ha usa nga Nazareo nga tumanon an iya saad? (Numeros 6:5) (Kitaa liwat an piktyur.)

⁷ Basaha an Numeros 6:5. Nagsaad an mga Nazareo nga diri hira magpapaarot. Usa ito nga paagi ha pagpakita han ira bug-os nga pagpasakop kan Jehova. Kon an usa nga Israelita maiha na nga Nazareo, an iya buhok halaba na ngan mapapansin dayon ito han iba. Kon ginrirespeto hiya han iba ngan gin-aaghat nga tumanon an iya saad, magigin mas masayon para ha usa nga Nazareo an pagin naiiba. Pero makasurubo nga may mga panahon ha kasaysayan han Israel nga an mga Nazareo diri gin-aapresyar o ginsusuportaran. Ha panahon ni propeta Amos, “padayon nga gintagan [han apostata nga mga Israelita] an mga Nazareo hin bino nga maiinom,” posible para masulay hira nga talapason an ira saad nga maglikay ha bino. (Amos 2:12) May mga panahon nga an mga Nazareo kinahanglan magin maisugon gud basi tumanon an ira saad ngan magin naiiba.

8. Paonan-o ka nadasig han eksperyensya ni Benjamin?

⁸ Ha bulig ni Jehova, mahimo liwat kita magin maisugon ngan naiiba, bisan kon awdanon kita. Pansina an ehemplo ni Benjamin, usa nga dyes anyos nga Saksi ha Norway. Tungod han girra ha Ukraine, nagkaada event an ira eskwelahan basi ipakita an ira suporta ha mga tawo ha Ukraine. An mga bata ginhangyo nga magkanta samtang sul-ot an mga kolor han bandera han Ukraine. Basi diri hiya makapartisipar hini nga nasyonalistiko nga okasyon, tinindog hiya ha hirayo. Pero may titser nga nakakita ha iya ngan naguliat nga gintawag hiya: “Dapat ka kumadi ngan umapi ha amon yana. Kami ngatanan naghuhulat ha imo!” Hi Benjamin maisugon nga dinaop  ha titser ngan nagsiring: “Neutral ako, ngan diri ako naapi ha mga demonstrasyon ha politika. Ngani, damu nga mga Saksi ni Jehova an aadto ha prisohan kay nadiri hira ha pakiggirra.” Ginkarawat han titser ini nga esplikasyon ngan waray na paapiha hi Benjamin hito nga event. Pero nagpakiana an iya mga klasmeyt kon kay ano nga waray hiya umapi ha ira. Ginkulba gud hi Benjamin nga haros magtangis na hiya; pero maisugon nga gin-utro niya ha bug-os nga klase kon ano an iya ginsiring ha titser. Katapos, ginsumatan ni Benjamin an iya mga kag-anak nga inabat niya nga ginbuligan hiya ni Jehova basi depensahan an iya pagtoo.

9. Ha ano nga paagi mapapalipay naton an kasingkasing ni Jehova?

⁹ Tungod kay ginpipili naton nga magpasakop ha kaburut-on ni Jehova, napapansin han iba nga naiiba kita ha ira. Kinahanglan naton hin kaisog basi sumatan an iba ha trabaho o ha eskwelahan nga kita mga Saksi ni Jehova. Ngan samtang nagtitikaraot an disposisyon ngan paggawi hini nga kalibotan, posible nga mas makurian kita ha pagkinabuhi uyon ha mga prinsipyo ha Biblia ngan ha pagsumat ha iba han maopay nga sumat. (2 Tim. 1:8; 3:13) Pero pirme hinumdumi nga aton ‘ginpapalipay an kasingkasing ni Jehova’ kon maisugon kita nga magin iba hadton diri nag-aalagad ha iya.—Prob. 27:11; Mal. 3:18.

PADAYON NGA UNAHA HI JEHOVA HA IMO KINABUHI

10. Kay ano nga bangin makurian an mga Nazareo ha pagsugot han sugo nga gin-unabi ha Numeros 6:​6, 7?

¹⁰ Basaha an Numeros 6:​6, 7. An mga Nazareo diri puydi dumaop ha patay nga lawas. Posible nga nahuhunahuna mo nga baga hin diri ini daku nga sakripisyo. Pero ha panahon han Biblia, posible makurian an usa nga Nazareo ha pagtuman hini nga sugo kon duok nga paryente an namatay. An mga kustomre ha paglubong ha panahon han Biblia nag-oobligar ha mga tawo nga dumaop ha patay nga lawas. (Juan 19:​39, 40; Buh. 9:​36-40) Tungod han saad han usa nga Nazareo, diri gud niya puydi sundon an sugad nga mga kustomre. Bisan ha mga sitwasyon may kalabotan ha pamilya, ha panahon han duro nga kasubo, an mga Nazareo nagpakita hin marig-on nga pagtoo pinaagi ha pagtuman han ira saad. Sigurado nga ginparig-on ni Jehova ini nga iya debotado nga mga magsiringba basi mailob an magkuri nga sitwasyon nga kinahanglan nira atubangon.

11. Ano an dapat magin determinasyon han usa nga Kristiano kon naghihimo hin mga desisyon may kalabotan ha pamilya? (Kitaa liwat an piktyur.)

¹¹ Sugad nga mga Kristiano, ginsiseryoso naton an aton saad han nagdedikar kita kan Jehova. Nakakaapekto ini ha aton mga desisyon  ngan ginbubuhat may kalabotan ha pamilya. Seryoso gud kita ha pagtuman han aton Kasuratanhon nga mga responsabilidad ha pamilya, pero diri gud naton uunahon an mga karuyag han aton mga kapamilya kay han igin-oobligar ha aton ni Jehova. (Mat. 10:​35-37; 1 Tim. 5:8) Usahay, bangin kinahanglan naton maghimo hin mga desisyon nga diri nakakapalipay ha aton mga paryente tungod kay karuyag naton mapalipay hi Jehova.

12. Samtang naatubang hi Alexandru hin makuri nga sitwasyon ha pamilya, ano an iya ginbuhat ngan ano an waray niya buhata?

¹² Pansina an eksperyensya ni Alexandru ngan han iya asawa nga hi Dorina. Katapos mag-aram hini nga mag-asawa han Biblia ha sulod hin usa ka tuig, hi Dorina nagdesisyon nga umundang, ngan karuyag niya nga umundang liwat hi Alexandru. Pero kalmado ngan mataktika nga ginsidngan hiya ni Alexandru nga magpapadayon hiya. Waray malipay hi Dorina ngan ginpwersa niya ha Alexandru nga umundang ha pag-aram. Hi Alexandru nagsiring nga nangalimbasog hiya nga intindihon an reaksyon ni Dorina, pero diri ito masayon para ha iya. May mga panahon nga kon ginpapakaraot hiya ni Dorina ngan nabaton ha iya hin nakakasakit, inaabat niya nga karuyag na niya umundang ha pag-Bible study. Pero padayon la gihap nga gin-una ni Alexandru hi Jehova, ngan nagpakita liwat hiya hin daku nga gugma ngan respeto ha iya asawa. Ha urhi, an iya maopay nga ehemplo nagpagios kan Dorina nga ipadayon an iya pag-Bible study, ngan paglabay han panahon nagpabawtismo hiya.—Kitaa ha jw.org an video nga Alexandru Ngan Dorina Văcar: “An Gugma Pasensyoso Ngan Buotan” ha serye nga “Ginbag-o han Kamatuoran an Ira Kinabuhi.”

13. Paonan-o naton ipapakita an aton gugma kan Jehova ngan ha aton pamilya?

¹³ Hi Jehova an naghimo han kahikayan han pamilya, ngan karuyag niya nga magkaada kita hin malipayon nga pamilya. (Efe. 3:​14, 15) Kon karuyag naton nga magin malipayon gud kita, kinahanglan buhaton naton an iginpapabuhat ha aton ni Jehova. Hinumdumi nga gin-aapresyar gud ni Jehova an imo mga sakripisyo ha pagsingba ha iya samtang gin-aataman mo an imo pamilya ngan ginhihigugma hira ngan ginrirespeto.—Roma 12:10.

DASIGA AN USA KAG USA NGA MAGIN PARIHO HAN MGA NAZAREO

14. Hin-o an labi na nga dapat naton paningkamotan nga dasigon?

¹⁴ An ngatanan nga nagdidesisyon nga singbahon hi Jehova yana kinahanglan magin andam ha paghimo hin mga sakripisyo nga ginpapagios han gugma. Usahay, diri ito masayon. Paonan-o naton mabubuligan an usa kag usa nga magsakripisyo para kan Jehova? Pinaagi han nakakadasig  nga mga pulong. (Job 16:5) May mga kakongregasyon ba kamo nga naniningkamot nga pasimplihon an ira kinabuhi basi mas daku an ira mabuhat para kan Jehova? May kilala ba kamo nga mga batan-on nga nangangalimbasog nga magin iba ha eskwelahan bisan pa kon makuri ito para ha ira? May mga Bible study ba ngan mga igkasi-tumuroo nga bangin nakukurian ha pagpabilin nga matinumanon tungod han pagkontra han pamilya? Salingabuton naton an tagsa nga higayon nga maparig-on an sugad nga hinigugma nga mga igkasi-tumuroo, nga gin-aapresyar an ira mga sakripisyo ngan kaisog.—Filem. 4, 5, 7.

15. Paonan-o ginsuportahan han iba adton bug-os-panahon nga nag-aalagad?

¹⁵ Usahay, bangin makahatag kita hin praktikal nga bulig ha mga igkasi-Kristiano nga bug-os-panahon nga nag-aalagad. (Prob. 19:17; Heb. 13:16) Ini an sinsero nga hingyap han usa nga matinumanon nga edaran nga sister ha Sri Lanka. Gindugangan an iya pensyon salit karuyag niya nga buligan an duha nga batan-on nga payunir nga sister basi makapadayon ha ira ministeryo bisan pa han kakurian ha ekonomiya. Salit nagdesisyon hiya nga maamot hin espisipiko nga kantidad kada bulan para ha ira bill ha telepono. Maopay gud nga disposisyon an iginpakita hini nga sister!

16. Ano an aton mahibabaroan ha kahikayan han pagin Nazareo?

¹⁶ Sigurado nga damu an aton mahibabaroan ha maopay nga ehemplo nga iginpakita han mga Nazareo! Pero ini nga kahikayan may iginpapakita liwat mahitungod ha aton langitnon nga Amay, hi Jehova. Maaram hiya nga may-ada kita sinsero nga hingyap nga lipayon hiya ngan andam gud kita maghimo hin mga sakripisyo basi matuman an aton saad ha iya han nagdedikar kita. Ginpapasidunggan kita niya pinaagi ha paghatag ha aton hin higayon nga maipahayag ha iya an aton gugma. (Prob. 23:​15, 16; Mar. 10:​28-30; 1 Juan 4:19) An kahikayan ha pagin Nazareo nagpapakita nga napapansin ngan ginpapabilhan ni Jehova an mga sakripisyo nga aton ginhihimo ha pag-alagad ha iya. Hinaot magin determinado kita nga padayon nga mag-alagad kan Jehova, nga kinaburut-on nga ginhahatag ha iya an aton pinakamaopay.