1. Johova alambem man komna mol wonjup pi wom, nal mambnem ka ende tanim?

 NIM JOHOVA bol senon bar kawei pisen mo? Pilkane esmen nim kapisen! Nim mongse embe napisen, Got konganem ga komna puli monjup embe pinjip eri. (Sng. 104:​33, 34) Ga puli enjep enjep ngo Johova konganem enjip. Komna Israil kunum, ga Nasarait kongan embe enjip. Nasarait e ga namal, ala kenem enjep bol nawal duwom enamen?

2. (a) Nasarait e ga namal? (Namba 6:​1, 2) (b) Nalernge Israil ga pende Narasait moramen panijip?

² Yu “Nasarait” panimen e, Ibru yu a sinjip, mem embe “Enjep Enjep Johova ngo konganem kunum kunum enamen panijip.” Yu e, tanind pilkane esmen, enjep kumbol ngo Johova konganem kawei kunum kunum enjip. Mosis Lo ende pam erkelnge ye mo amb ende Johova bol yu dongal ne, kunum pende tuwalto Nasarait mal molo, olom konganem enamen pane nine enjip. a (Namba 6:​1, 2 gere.) Yu dongal embe nijip  erkelnge, Israil ga porpor mambnem pende karkar najip mal, enjep ere ere enjip. Nalmem pange Israil ga pende yu dongal ne Nasarait moramen panijip? Enjep Johova kankawei kanjip, ala wal kaka puli ngom bar sangiyo ne Nasarait moramen panijip.—Lo 6:5; 16:17.

3. Got alambem man pi meim, nalmal Nasarait ga bol ding mal meim?

³ Mosis Lo porninge, “Krais lo min wom kunum” Nasarait mol kongan ere ere enjip pornim. (Gal. 6:2; Rom 10:4) Ba, Nasarait ga enjip mal, Johova alambem man pi meim, anjngo Johova konganem enamen ne kapisim mem tane, kumbol, bunuman, na dongal pel ngo esim. (Mak 12:30) Kenem kenem ngo Johova bol yu dongal ne nol paimen kunum, olom konganem enamen ne kapismen mem tane penem kesmen. Yu dongal nimen mal karkar wei enamen nepinjin dal, kunum kunum kenem kenem ngo Johova konganem enamen. Nasarait ga yu dongal ne mambnem enjip mal kenem mane omukro kanamen pakerondo, kenem yu dongal nimen karkar kawei enamen. b (Mat. 16:24)

NENEM-NGO GOT KONGANEM ENDEL

4. Namba 6:​3, 4, yu paim, pende olom olom-ngo Nasarait kongan enda bar, nawal ende min wo erkanal ne enda?

⁴ Namba 6:​3, 4 gere. Nasarait monjup ga nol bia, wain, greip mongom, na greip mongom anjto mokjup nanonam pane mapil monjup. Israil alamb monjup kunum puli wal embe mal no kapijip nalerim, alla napam. Baibel dom “wain wal kawei ende Got ngom alamb non, kumbol a kapinjip.” (Sng. 104:​14, 15) Ba, Nasarait ga non kapisam wal enjep enjep kapile si kenjip. c

5. Madian na Masela nawal pende kapinjil wakro sikenjil, nalerange embe enjil?

⁵ Nasarait ga enjip mal, kenem kapismen wal pende wakro sikele, Johova konganem kumbol ngo enamen eri. Madian na Masela enjil mal omukro kandpe. d Andam ambiyem tal e, nomolpa enjil bar kawei monjil. Madián kongan kawei ende ere ku puli singe gar kawei ende sembar panjil, ba Johova konganem puli enambel ne kapinjil, embe pile wal pende erkun enambel pam. “Enjel embe nijil, kil pulnombolo wal puli top naronjil,” ala  “se gar kerei ende sembar pupa karjel ku bonjil.” Madian na Masela embe enjil kol apis—kelnge, Baibel yu kunum puli neori kenjil. Mambnem embe enjil bar kawei pilmonjil.

6. Nalende Kristen yipe meim, enjep kapisim wal sikele Johova konganem esim? (Piksa pra kane.)

⁶ Kristen yipe meim, enjep enjep kapisim wal sikele kunum puli kele, Johova konganem ere kapil moramen nepisim (1 Kor. 9:​3-6) Johova kenem embe eiya nadom, ala wal pende wakro sikesmen wal alla paim panadom eri. Ga pende embe esim, kongan ka ende esim sikesim, gar wakrom mo tukong ka ende astom sikesim eri. Ala ga pende komjil kanan moramen, mo bol sinjin dal, ngal nakangramen nepisim. Ga pende kanka kanim ga sikele, se kolbar wei pu pablisa tambem enem bar Baibel yu neori kesim. Kenem puli, kenem kenem kapismen wal wakromon nalenem, kumbol pal ngo Johova konganem enamen nepismen. Pilkane endel kenem kenem kapismen wal wakro, Johova konganem puli mo apal esmen olom kawei pisem.—Hib. 6:10.

KAPILE JEL MAL MOROL

7. Nasarait ende yu dongal nepakil karkar enda bar, nawal min wo erkanal ne enda? (Namba 6:5) (Piksa pra kane.)

⁷ Namba 6:5 gere. Nasarait ga peng nabaramen panijip, embe enjip bar Johova bol yu dongal nijip tanijip. Israil ende Narasait molo peng nabarnge olwal kes mom bar, olom Nasarait meim ne alamb pilkane enjip. Ga pende pilkane ere, yu ka ne olom dongal ngonambe Nasarait ka ende jel mal mora. Ba wandil wei, kunum pende ne ende yu dongal ne pakle Nasarait mom bar, Israil ga yu ka ne enjep pakenarojup. Propet Amos kunum Israil ga apostet monjup, “Nasarait ga nol wain anjngo” ngo, er kerambe Got kin yu dongal nepakjip tokeram ne enjip. (Amos 2:12) Nasarait ga kumbol dongal pande yu dongal ne Johova ngojup, karkar ere, jel mal moram pam.

8. Ngal Benjamen yu bolom paim, nim nalmal er dongal enem?

⁸ Johova kenem pra pakerondo, kumbol dongal pande kisal goramen kunum akilgi ne jel mal moramen. Kongar-10-mom ngal Benjamen Witnis ende kulu Nowei meim, olom bol wal min wom mal omukro kandpe. Olom sukul gar ngal makero Yukeren pleng kala konkongol kele, opnganmal-pambar golang kele pakeronam ne enjip. Benjamen kantri kangem ambil min kele wal embe enjip bar, tuwal napunal nepile se kolbar pu mom. Ba, tisa ende olom kane wi kerma to embe nim: “Nim pra tuwal wo, kin porpor nim kui  esmen!” Benjamen kumbol dongal pange tisa mombar mand pu embe nim: “Na polotik wal esim bar tuwal pu pakenarorond erind. Johova Witnis ga puli to sip karpos kesim nalenem, opnganmal paim bar tuwal napum eri.” Tisa yu nim pilau ne nim tuwal nawondol panim. Ba olom sukul ding ga nalmem pange tuwal nawom ki si kanam ne enjip. Benjamen kisal golo ke ninda mand erim; ba olom ombol ere tisa nengom mal, yu ding mal ne enjep ngom. Bulto, Benjamen wo dam mam nengo embe nim, Johova na pakerongo pilgi ambilgi nind.

9. Nal wusngam kenem erkelpe Johova kapisa?

⁹ Kenem Johova yu dom karkar esmen jel mal molpo, alamb pilkane esim. Sukul gar, mo kongan dumam kenem kumbol dongal pamdal, erkelpe, Johova Witnis ende meimen ne alamb pilkane enam. Yipe mala mambnem wose keswei punom kunum, Baibel yu kawei neori kele, Baibel lo karkar ka enamen pesil panda. (2 Tim. 1:8; 3:13) Kunum kunum kenem kumbol dongal pande, jel mal molo alamb mambnem esim mal karkar nanamen, “erkelpe [Johova] kapisa.”—Prov. 27:11; Mal. 3:18.

NOMOLPA ENEN BAR JOHOVA SI NGIMBA KEREL

10. Namba 6:​6, 7 yu paim, Nasarait moram bar nawal min wo er kanal ne enda?

¹⁰ Namba 6:​6, 7 gere. Nasarait monjup ga, alamb gonjup bar mand napupo enjip, nim e wal kerma napaim nepisel. Komna Baibel bonjup kunum ende Nasarait mom, maiyam ding gonjup kunum e, ombun kerma wei mal ende pam. Enjep mambnem ende pam onngo gar punjup bar, gom alamb pambar mand molmol enjip. (Jon 19:​39, 40; Apo. 9:​36-40) Ba, Nasarait ende Got kin yu dongal ne kamoral panim, mambnem embe karkar enda kun napam. Ala maiyam ding ga onngo gar moram, Nasarait ende yu dongal ne Got ngom karkar ere, pilgi dongal pam tane akda wei mora pam. Johova lotu erngojup ga embe mal, olom dongal ngongo ombun wom, kauwo akilgi nijip.

11. Kristen ende mora pemili yu ne wal enam bar, nalenal ne bunuman kerma panda? (Piksa pra kane.)

¹¹ Kristen ende moramen Johova bol yu dongal ne nol panjin yu, karkar kawei enamen. E pemili aijen bol yu ne wal pende enamen bar pra. Baibel dom mal kenem kongan ombol ere pemili aijen kantawol enamen ne  esmen, ba pemili kantawol esmen kongan si ngimba nakeramen, wal kerma wei Johova konganem si ngimba keramen. (Mat. 10:​35-37; 1 Tim. 5:8). Kunum pende ne kenem wal erkelpe Johova kapisa ne esmen bar, maiyam ding ga kanapisam.

12. Pemili a ombun ende pam kunum Alexandru nawal pende erim, ala nawal pende narim?

¹² Alexandru ambiyem Dorina bol wal pende min wom mal omukro kandpe? Enjel Baibel yu duwom enjel kongar ding ende wopungo, Dorina yu duwom erim sikele ala adam sikera eri nepim. Ba, adam mambnem ka karkar ere ambiyem nengo, na yu duwom anjngo enal panim. Dorina kanapile yu duwom erim to koltungnal ne erim. Alexandru embe nim, nalmem pange olom embe erim omukro kanal ne erind ba, amin napam. Kunum pende ne Dorina, olom bol yu kes ne mambnem ombolombol erim erkelnge, Baibel yu duwom erim si kerel nepim. Ba Alexandru anjngo Johova si ngimba kele, ala ding kunum ambiyem bol mambnem ka tanim eri. Embe erim erkelnge ambiyem ala pulnombol Baibel yu duwom ere, bulto nol pam.—Jw.org a pu vidio ende kangem, Alexandru and Dorina Văcar: “Love Is Patient and Kind” in the series “Truth Transforms Lives,” pane paim kanjel.

13. Johova na pemili aijen kanka kanmen, nalmal taninamen?

¹³ Pemili meimen Johova mem, embe pile kapile moramen nepisem. (Efe. 3:​14, 15) Kenem weieri kapil moramen nepinjin dal, Johova kapisem wusngam karkar enamen. Pilkane endel nenem-ngo Johova konganem ere, pemili aiyem kakane enjep pilngo tawol enal ne enen bar, Johova kapisem.—Rom 12:10.

YU NE DONGAL NGOI NASARAIT-MAL MORAM

14. Namal kenem ombol wei ere, yu ne dongal ngonamen ne enamen?

¹⁴ Yipe kunum Johova lotu erngom alamb porpor, enjep kapisim wal pende wakro Johova kanka kanam. Kunum pende embe enamen amin napaim. Kenem ende ende nalmal pakeropo mambnem embe enam? Yu ka ne enjep dongal ngonamen. (Jop 16:5) Ga pende nim kongrikeisen a nomolpa esim bar wal ipal kanno, Johova konganem puli enamen nepisim mo? Sukul pum ngal ombun pende min wonom bar akilgi ne jel mal moram ne esim, ngal pende pilkane enen mo? Baibel yu duwom esim ga na, pilgi ding angjen ambajen man, pemili opyem esim bar ombol er akilgi ne, Johova bol kamoram ne esim pilkane enen mo? Pilkane erin dal, endel panda wal  porpor ere ga embe mal yu ne dongal ngo, Johova bol ka moram ne esim bar kapis pane ngondol.—File. 4, 5, 7.

15. Ga pende Johova konganem kunum kunum-esim ga, nalmal pakerom?

¹⁵ Kunum pende ne, Kristen Johova konganem kunum kunum-esim ga, kongan pende ere pakeronamen. (Prov. 19:17; Hib. 13:16) Ambajen tuwa ende kulu Siri Lanka meim, kumbol ngo mambnem embe erim. Olom ye kongan er wanim bar ku sise erim pende ngo min kenjip kunum, painia ambel gal tal ende ku ombun pam, ba pakerono Baibel yu neori anjngo kerambel nepim. Embe pile, olom oll dingding ne ku pende ngono ambel tal e, telepon konganem enjil bar ngonambel nepim. E, mambnem kawei ende tanim!

16. Komna Israil kunum, Nasarait ga kongan enjip bar kenem nawal duwom esmen?

¹⁶ Komna Nasarait ga enjep enjep ngo, kapile kongan enjip bar kenem wal puli duwom esmen! Kongan embe enjip bar, kenem Danjen min epen meim Johova bol wal pende duwom esmen eri. Olom pilkane enem kenem nol panamen ne enjin kunum yu dongal ne, wal pende wakro olom konganem esmen bar kapisem. Olom kenem kanka kane kol apis kere, wal pende ere olom kanka kanmen mem taninamen ne enem. (Prov. 23:​15, 16; Mak 10:​28-30; 1 Jon 4:19) Nasarait ga enjip mal, kenem kapismen wal sikele Johova kapisem, mal esmen pilkane ere kapisem. Embe pile, kenem kumbol na bunuman dongal pande, Johova konganem esmen, kumbol pel ngo er punamen.