1. Ino toe-tsain̈y tsara nanan̈an’ny mpanompon’i Jehovah taloha tan̈y?

 ANAO ma tia Jehovah mare? Hay be fa anao tia izy! Aviô tsy anao zaraiky karaha zen̈y. Rango taloha tan̈y, maro olo karaha zen̈y koa. (Sal. 104:33, 34) Irô nahafoe raha baka hahavita hanompo Jehovah. Karaha zen̈y irô Nazirita, tamin’ny Israely taloha tan̈y. Azôvy ma irô io? Baka iô, ino ma raha ianarantsika baka amindrô io?

2. a) Azôvy ma Nazirita zen̈y? (Nomery 6:1, 2) b) Ino ma nahavy Israelita sasany nifidy nan̈ano voady han̈ano Nazirita?

² “Nazirita” zen̈y baka amy volan̈a hebreo. Dikan’izio, “voatokana.” Izio hivolan̈ana irô Israelita nafana fô ke nahafoe raha, baka hahavitan̈a manompo Jehovah amy fomba miavaka. Lalàn̈an’i Mosesy nan̈ambela irô lelahy na man̈angy israelita aby io, han̈ano voady manokan̈a amy Jehovah. Ke irô afaka nan̈ano Nazirita, tan̈atin’ny fotoan̈a araiky nifidindrô. a (Vakia Nomery 6:1, 2.) Izikoa fa nisy Israelita nan̈ano voady hanjary Nazirita, izy tsy maintsy nan̈araka lalàn̈a nitakin̈a tamy Nazirita. Mety nahavy Israelita nan̈ano raha zen̈y, noho izy tia Jehovah mare, ndreky tihankasitraka irô raha maro tsara jiaby nataon’i Jehovah taminany.​—Deot. 6:5; 16:17.

3. Ino mampiran̈a Nazirita aby io amy vahoakan’i Jehovah amin’ny andra iziôty?

³ Lalàn̈an’i Mosesy izikoa fa nisoloan̈a “lalàn̈an’i Kristy”, efa tsisy eky fan̈anaovan̈a Nazirita. (Gal. 6:2; Rom. 10:4) Fa kanefa, karaha irô Nazirita aby in̈y, vahoakan’i Jehovah amy ziôty koa mbala mifen̈y mare hanompo izy, amy fôndrô jiaby, amy vatan̈andrô jiaby, amy sain̈indrô jiaby, aviô amin’ny angôvondrô jiaby. (Marka 12:30) Man̈ano voady an-tsitrapô fa hanompo  Jehovah atsika, lera atsika manokan-ten̈a aminany. Baka hahavitantsika miain̈y mifan̈araka amy voady nataontsika io, atsika tsy maintsy vôn̈ono han̈ano sitrapôn’i Jehovah, ndreky mahafoe raha baka hanompoan̈a izy. Alô atsika handiniky karakôry nataondrô Nazirita aby io niain̈y nifan̈araka tamy voady nataondrô, amy zen̈y atsika hahita leson han̈ampy atsika hiain̈y mifan̈araka amy nintsika. b​—Mat. 16:24.

MIVON̈OSA HAHAFOE RAHA

4. Eraka raha koran̈in’ny Nomery 6:3, 4, ino ma raha fataonolo kanefa tsy nataondrô Nazirita aby io?

⁴ Vakia Nomery 6:3, 4. Nazirita aby io fady nigiaka toaka, ndreky tsy nihina zay raha baka amy rezain, nata voeny. Olo niaraka niain̈y tamindrô ndraiky ravoravo nihina raha zen̈y isanandra, sady tsy nirahin̈y fady izio. Sady izio koa karaha hanin̈y jiaby fo, ke tsisy raha naharatsy izy. Ndray Baiboly mivolan̈a fa divain io ‘mamparavoravo fôn’olombelon̈o’, aviô izio kadô baka amy Zan̈ahary. (Sal. 104:14, 15) Fa nata izio namparavoravo olo maro tamy zen̈y, irô Nazirita aby io vôn̈ono fo tsy hihinan̈a irô io. c

5. Nifidy han̈ino ma Madián ndreky Marcela, aviô nan̈ino?

⁵ Karaha irô Nazirita aby in̈y, mila mahafoe raha koa atsika, baka hahavitan̈a mampitombo fanompoan̈a Jehovah. Karaha zen̈y nataon’i Madián ndreky Marcela fivadiany. d Fiain̈anandrô taloha ten̈a fiain̈anan’olo mpan̈arivo, fôtony Madián nanan̈a asa tsara karama, aviô irô nipetraka tamy tran̈o maventy be. Kanefa, irô tihampitombo mare fanompoan̈andrô. Ke baka hahavitandrô manakatra tanjon̈ondrô zen̈y, irô nanapa-kevitry han̈ova fiain̈anandrô. Karaha ty ho irô: “Zahay nanomboko nitsitsy vola, ke zahay nifindra tamy tran̈o helihely. Baka iô koa, nalafonay tomabilinay.” Irô fivadiany io tsy voatery nan̈ano zen̈y. Fa kanefa, nan̈ano zen̈y irô, fôtony irô tihampitombo fanompoandrô Jehovah. Ke irô ravoravo ndreky nahatsiaro sambatra, tamy fanapahan-kevitry nataondrô io.

6. Nan̈ino ma Kristianin̈y iziôty man̈ano sôron̈o maro hanompoan̈a Jehovah? (Zahava koa sary.)

⁶ Kristianin̈y iziôty koa ravoravo mahafoe raha maro, baka irô hanan̈a fotoan̈a bebe  han̈anaovan̈a fanompoan̈a Jehovah. (1 Kor. 9:3-6) Jehovah tsy man̈iraka atsika han̈ano sôron̈o karaha zen̈y, aviô tsisy maharatsy raha aby nialandrô aby io. Karaha sasany mety niala asa ten̈a tiandrô, niala tran̈o, aviô niala biby nitarimindrô. Maro koa nanapa-kevitry hiambin̈y elaela vo hanambady ndreky hanan-janaka. Sasany ndraiky nifidy hifindra amy tany mbala ilàn̈a mpitory maro, na nan̈itatra faritany, ndray irô tsy maintsy niala fianakavian̈a ndreky kamaradindrô. Maro amintsika tihan̈ano sôron̈o aby zen̈y, fôtony atsika tihan̈amia Jehovah ny farany tsara. Matokisa fa ten̈a valera amy Jehovah sôron̈o ataonao, na be na hely, baka hahavitan̈a manompo izy.​—Heb. 6:10.

MIVON̈OSA HIAVAKA AMIN’OLO MARO

7. Ino raha nety nampasarotro fan̈atantirahan’ny Nazirita araiky voady nataony? (Nomery 6:5) (Zahava koa sary.)

⁷ Vakia Nomery 6:5. Irô Nazirita aby io nan̈ano voady tsy hanapaka fan̈evandrô foeky. Zen̈y fomba nan̈aboahandrô tamy Jehovah fa irô von̈ono han̈eky raha jiaby nan̈irahan’i Jehovah irô. Izikoa Israelita araiky nahadin̈y ela nan̈ano Nazirita, nanjary lavabe fan̈evanany, ke mora hitan’olo maro raha zen̈y. Izikoa olo man̈aja izy ndreky nandrisiky izy hankefa voadinany io, moramora amy Nazirita io hiavaka amin’olo maro. Fa ny raha mampalahelo, nisy fotoan̈a tamy tantaran’i Israely, irô Nazirita aby io tsy tian’olo foeky ndreky tsy nijerindrô. Karaha ataon’ny tamy faha mpaminan̈y Amosa, nisy Israelita nivadi-pinoan̈a ‘tsy vôly nan̈amia irô Nazirita aby io divain higiahan̈a’, amy zen̈y irô hivadiky amy voady nataondrô tsy hihina divain foeky in̈y. (Amosa 2:12) Ten̈a nila nisy korazy Nazirita araiky, baka hahavita tsy hivadiky tamy voady nataony, ndreky hahavita hiavaka tamin’olo maro.

8. Ino raha nankahery anao tamy tantaran’i Benjamin in̈y?

⁸ Atsika ndray mora men̈atra, atsika hanan̈a korazy hiavaka amin’olo fo, fôtony Jehovah man̈ampy. Diniha baka ohatran’i Benjamin, tsaiky lelahy 12 taon̈o, Vavolombelon̈on’i Jehovah a Norvezy an̈y. Nohon’ny ady misy an Ukraine an̈y io, lekolindrô nan̈ano raha, han̈aboahan̈a fa irô manohan̈a irô olo an Ukraine an̈y. Tsaiky jiaby niarahin̈y nan̈ano lamba misy sain̈im-pirenenan’ny Ukraine, aviô nirahin̈y nan̈ano hiram-pirenena. Benjamin tsy tihan̈araka raha nataondrô io, ke izy nitsangana lavidavitry tary fo. Hitan’ny mpampianatrandrô izy, ke nironton̈iny karaha ty: “Anao tsy maintsy avy miaraka aminay! Anao fo iambesan’olo jiaby io.” Nisikiny korazy Benjamin nan̈aton̈o mpampianatra io, nivolan̈a karaha ty taminany:  “Zaho tsy han̈ano raha ataonarô io, fôtony zaho tsy man̈ano raha momba pôlitiky foeky. Aviô maro aminay Vavolombelon̈on’i Jehovah gadrain̈a, fôtony irô tsy mandeha lagera.” Niken’ny mpampianatra io raha nivolan̈in’i Benjamin, aviô mpampianatra io nivolan̈a taminany fa izy mahazo tsy man̈ano amy raha ataondrô io. Fa irô tsaiky lekoly araiky taminany aby io baka tiô sôfy nan̈ontany izy nan̈ino izy tsy nan̈ano raha nataondrô io. Niasaloha mare Benjamin, ndraiky izy tafitomoan̈y aby. Fa izy baka tiô nasaky nivolan̈a tamindrô tsaiky aby io, raha nivolan̈iny tamy mpampianatrandrô in̈y. Tafaran’izin̈y Benjamin nivolan̈a tamy babany ndreky reniny fa, baka tamy Jehovah nahavitany niaro finoan̈anany.

9. Akôry mety han̈anaovantsika raha mamparavoravo Jehovah?

⁹ Atsika io baka man̈araka raha volan̈in’i Jehovah, ke mety ho hitanolo maro fa atsika tsy mira irô. Atsika koa fa am-piasan̈a na a lekoly an̈y, mila misy korazy atsika mivolan̈a amin’olo fa atsika io Vavolombelon̈on’i Jehovah. Fa jerin’olo amy donia ty ndreky raha ataondrô koa mahairatsy fo, ke mety ho sarotro amintsika hiain̈y mifan̈araka amy fitsipikin’ny Baiboly, ndreky hitory vaovao tsara amin’olo. (2 Tim. 1:8; 3:13) Fa kanefa aza adin̈a foeky fa ‘mamparavoravo fôn’i Jehovah’ atsika izikoa man̈aboaka fa atsika tsy karaha irô olo tsy manompo izy.​—Ohab. 27:11; Mal. 3:18.

ATAOVA VOANALOHANY AMY FIAIN̈ANANAO FO JEHOVAH

10. Nan̈ino ma nety sarotro tamindrô Nazirita aby io nan̈araka raha koran̈in’ny Nomery 6:6, 7?

¹⁰ Vakia Nomery 6:6, 7. Nazirita aby io tsy nahazo nan̈aton̈o faty foeky. Fa anao mety hieritreritry fa tsy ten̈a problemo be zen̈y. Fa kanefa tamin’ny andran’ny Baiboly, ten̈a tsy nora tamy Nazirita araiky nan̈araka volan̈an’i Jehovah zen̈y, intsaka eky izikoa havany marikitry olo naty io. Fombandrô tamy zen̈y baka, olo nila nikarakara mare havany naty. (Jaona 19:39, 40; Asa. 9:36-40) Fa izikoa olo araiky efa nivoady han̈ano Nazirita, izy tsy nahazo nibidabida faty foeky. Lera nisy havany naty, Nazirita io nila fatatra finoan̈a mare baka hahavita hitana voady nataony. Ke matoa irô olo tsy nivadiky aby io nahavita niaritry raha maro sarotro nandalovandrô, dikan’izen̈y Jehovah tsy maintsy nan̈ampy irô.

11. Krisitianin̈y araiky koa fa tôjy prôblemo amy fianakavian̈a, mila tapa-kevitry han̈ino izy? (Zahava koa sary.)

¹¹ Ten̈a raha maventy amintsika Kristianin̈y voady nataontsika tamin’atsika nanokan-ten̈a  tamy Jehovah. Misy vokany amy fanapahan-kevitrintsika ndreky raha ataontsika koa izio lera atsika fa mifandray amy fianakavian̈antsika. Ataontsika tsara andraikitrintsika an̈atin’ny fianakavian̈antsika, fa atsika ndraiky tsy man̈araka sitrapôn’ny fianakavian̈antsika izikoa irô mandrova atsika tsy han̈ano raha han̈irahan’ i Jehovah atsika. (Mat. 10:35-37; 1 Tim. 5:8) Ndraikindraiky atsika mety ho halan’ny havantsika foeky, fôtony atsika manapa-kevitry han̈ano raha mamparavoravo Jehovah.

12. Alexandru koa fa tôjy raha sarotro tan̈atin’ny tokantran̈onany, ino raha nataony, fa ino ndraiky raha tsy nataony?

¹² Diniha hely baka irô fivadiany ty: Alexandru ndreky Dorina. Irô koa fa nianatra Baiboly tan̈atin’ny taon̈o araiky, Dorina vôly. Fa izy koa fa tsy nianatra in̈y, nirahiny hijanon̈o koa vadiny. Alexandru tsy nasiaka taminany foeky fa nivolan̈a moramora taminany fa izy tsy vôly hianatra Baiboly. Neloko Dorina koa fa naharen̈y zen̈y, nataony hevitry tsy hianaran’ny vadiny Baiboly. Fa Alexandru nifen̈y fo nandiniky ino nahavy vadiny nan̈ano karaha zen̈y, fa izy fo tsy nora taminany. Ndray tiô raha zen̈y, Jehovah fo nataon’i Alexandru voanalohany tamy fiain̈ananany. Aviô mbala tiany mare fo vadiny ndreky najainy fo. Farany amy zay, toetry tsaran’i Alexandru io nahavy vadiny io nanjary nimpody nianatra Baiboly ndraiky koa. Ke tafara tatỳ amy zay, vadiny io nan̈ano batisa.​—Zahava amy jw.org video Alexandru ndreky Dorina Văcar: “Fitiavan̈a io Maharidraha Ndreky Tsara Fan̈ahy”, amy video mifampitohy “Man̈ova Olo Fahamarin̈ana.”

13. Akôry an̈aboahantsika fa atsika tia Jehovah ndreky tia fianakavian̈antsika?

¹³ Baka amy Jehovah nampisy fianakavian̈a io, ke tiany ho sambatra fianakavian̈antsika. (Efes. 3:14, 15) Fa izikoa atsika tiho sambatra ankitin̈y, atsika mila man̈araka raha an̈irahan’i Jehovah atsika. Matokisa fa ravoravo Jehovah mahita anao mifen̈y mare manompo izy, sady mikarakara fianakavian̈anao ndreky tia irô, aviô man̈aja irô.​—Rom. 12:10.

AMPIRISIHA OLO HANAN̈A TOE-TSAIN̈INDRÔ NAZIRITA ABY IO

14. Amin-jôvy ma atsika tôkony hifen̈y mare han̈ano volan̈a mankahery?

¹⁴ Amin’ny andra iziôty, olo jiaby mifidy hanompo Jehovah, mila vôn̈ono hahatindry raha maro, fôtony tia Izy. Fa tsy mora man̈ano zen̈y ndraikindraiky. Ke akôry ataontsika hifan̈ampy, baka hanan̈a toe-tsain̈y ambaka zen̈y? Mila mankahery namantsika atsika, amy volan̈a aboakanatsika amindrô. (Joba 16:5) Amy fiangonan̈anarô ma misy olo mifen̈y  man̈atsotra fiain̈ana, baka hahavita hampitombo fanompoan̈a Jehovah? Azôvy tanora aminarô ao mba hainao, mifen̈y hanan̈a korazy hiavaka amin’olo a lekoly an̈y, ndray tsy mora aminany man̈ano zen̈y? Misy mpianatra Baiboly na rahalahy ndreky ranabavy mifen̈y fo tsy hivadiky amy Jehovah ao, ndray manohitry izy iry havany? Iririan̈a atsika jiaby ho tapa-kevitry han̈ano erakan’ny vitantsika, hankahery irô namantsika aby io, ke hivolan̈a amindrô fa ten̈a ravoravo atsika mahita irô manan̈a korazy ndreky nohon’ny raha ataondrô amy fanompoan̈a Jehovah.​—Filem. 4, 5, 7.

15. Akôry ataon’olo sasany manohan̈a irô man̈ano fanompoan̈a manontolo andra?

¹⁵ Ndraikindraiky, atsika mety mahavita man̈ampy irô rahalahy ndreky ranabavintsika man̈ano fanompoan̈a manontolo andra. (Ohab. 19:17; Heb. 13:16) Karaha zen̈y fan̈irian̈an’ny ranabavy efa matoe araiky, mipetraka a Sri Lanka an̈y. Nanonga volan’ny retiretinany, ke izy mba tihan̈ampy ranabavy tanora aroe, mpisava lalan̈a hanohy fanompoan̈andrô, ndray nisy krizy ara-toe-karen̈a. Ke izy nanapa-kevitry han̈amia vola isaka fanjava, han̈ampian̈a irô amy kredi lanindrô amy telefony. Ten̈a tsara toe-tsain̈in’ny ranabavy zen̈y!

16. Ino raha ianarantsika baka tamy fandaharan̈a momba Nazirita taloha tan̈y?

¹⁶ Ten̈a maro raha mety ianarantsika baka amindrô Nazirita nanolo-ten̈a an-tsitrapô taloha tan̈y io. Fa voady nataondrô Nazirita aby io koa mampianatra atsika raha matomboko momba Jehovah, Babantsika an-dan̈itry an̈y. Hainy atsika io tihan̈ano raha mamparavoravo izy, ndreky vôn̈ono han̈ano sôron̈o, mifan̈araka amy voady nataontsika tamin’ny atsika nanokan-ten̈a. Ten̈a misy kôntiny aminany atsika, ke ambelany atsika hifidy fomba han̈aboahantsika aminany fitiavantsika izy. (Ohab. 23:15, 16; Marka 10:28-30; 1 Jaona 4:19) Fandaharan̈a momba Nazarita io man̈aboaka fa Jehovah mahita ndreky mankasitraka mare sôron̈o ataontsika baka hanompoan̈a izy. Ke irarian̈a atsika ho tapa-kevitry hanompo Jehovah fo, ke han̈amia izy ny farany tsara baka amintsika.