1. Ana ni chindu chapi chaŵele ali mkuchiyamichila mnope ŵakutumichila ŵa Yehofa kutandila kalakala?

 ANA akusayamichila mnope ligongo lyakuŵa paunasi ni Yehofa? Yeleyi yili yangakayikasya? Sonitu nganaŵa jika ŵakusatenda yeleyi. Kutandila kalakala, ŵandu ŵajinji aŵele ali mkuyamichila ligongo lyakuŵa paunasi ni Yehofa. (Sal. 104:​33, 34) Mwamti ŵajinji mwa jemanjaji aŵele ali mkulijima yindu yine kuti amtumichileje Yehofa. Yeleyi ni yaŵatendaga Ayisalayeli ŵane ŵaŵamanyikaga kuti Anasili. Ana jemanjaji ŵaliji ŵani, soni mpaka tulijiganye chichi kwajemanjaji?

2. (a) Ana Anasili ŵaliji ŵandu ŵamtuli? (Numeli 6:​1, 2) (b) Ligongo chichi Ayisalayeli ŵane ŵatendaga chilanga chakuŵa Mnasili?

² Liloŵe lyakuti “Mnasili” lyatyochele ku liloŵe lya Chihebeli lyalikusagopolela mundu jwasagulidwe kapena jwalipeleche kuti atende utumiki winewakwe. Anasili ŵaŵaga Ayisalayeli ŵaŵalipelekaga mnope mwakulijima yindu yine kuti amtumichileje Yehofa. Chilamusi cha Mose chamkundaga jwamlume kapena jwamkongwe kutenda chilanga kwa Yehofa chakusagula kuŵa Mnasili kwakandaŵi. a (Aŵalanje Numeli 6:​1, 2.) Mundaŵi ja Ayisalayeli, mundu jwatesile chilanga chakuŵa Mnasili jwasosekwaga kutenda yindu yine yele Ayisalayeli ŵane nganatendaga. Ligongo chichi Ayisalayeli ŵane ŵatendaga chilanga chakuŵa Mnasili? Jemanjaji ŵatendaga yeleyi ligongo lyakuti ŵamnonyelaga mnope Yehofa soni ŵayamichilaga yindu yambone yaŵatendelaga jwalakwe.—Det. 6:5; 16:17.

3. Ana ŵakutumichila ŵa Yehofa masiku agano akusalandana chamtuli ni Anasili?

³ Kutandila pandaŵi jele Chilamusi cha Mose chajinjilidwe mmalo ni “Chilamusi cha Klistu,” ŵakutumichila ŵa Mlungu ngakusasosekwasoni kutenda chilanga chakuŵa Anasili. (Agal. 6:2; Alo. 10:4) Mpela muyaŵelele ni Anasili, ŵakutumichila ŵa Yehofa masiku agano  akusapitilisya kumtumichila jwalakwe ni mtima wawo wosope soni ni machili gawo gosope. (Maliko 12:30) Masiku agano tukusatenda chilanga chakumtumichila Yehofa patulipeleche kwa Yehofa. Myoyo kuti tukombole kutenda yindu mwakamulana ni chilangachi, tukusasosekwa kutenda yindu yakusasaka Yehofa soni kulijima yindu yine kuti tukombole kumtumichila jwalakwe. Pachitukambilaneje yaŵatendaga Anasili kuti akwanilisyeje chilanga chawo, chitulijiganye yindu yine yampaka yitukamuchisye kuti tukwanilisyeje yilanga yetu. b (Mat. 16:24) Kwende tulole yine mwa yindu yeleyi.

TUŴEJE ŴAKOSEKA KULIJIMA YINDU YINE

4. Mwakamulana ni Numeli 6:​3, 4, ana ni yindu yapi yaŵalijimaga Anasili?

⁴ Aŵalanje Numeli 6:​3, 4. Anasili ŵasosekwaga kuŵambala kumwa finyo kapena ukana wamtundu wuliwose. Nambotu ŵandu ŵaŵatamaga nawo ŵasangalalaga ni yakumwayi, mwamti paliji pali pangali lilamusi lililyose lyalyalekasyaga kutenda yeleyo. Nambosoni Baibulo jikusasala kuti “finyo jwakusasangalasya mtima wa mundu” juli mtuka wakutyochela kwa Mlungu. (Sal. 104:​14, 15) Nambotu atamose kuti yaliji myoyo, Anasili ŵatendaga yakomboleka kuti alijimeje yindu yeleyi. c

5. Ana ni yindu yapi yaŵalijimile M’bale Madián ni ŵamkwakwe? Ligongo chichi jemanjaji ŵasagwile kutenda yeleyi?

⁵ Mpela muyaŵelele ni Anasili, m’wejisoni masiku agano tukusalijimaga yindu yine kuti tutendeje yejinji pakumtumichila Yehofa. Aganichisye yaŵatesile M’bale Madián ni ŵamkwakwe lina lyakwe Marcela. d Yindu yajendelaga chenene jemanjaji. Yaliji myoyo ligongo lyakuti m’baleju jwakamulaga masengo gapenani gaŵapochelaga mbiya syejinji, mwamti ŵatamaga m’nyumba jakudula. Nambope, jemanjaji ŵasakaga kutenda yejinji pakumtumichila Yehofa. Nambo kuti akombole kutenda yeleyi ŵasosekwaga kuchenga yindu yine paumi wawo. Jemanjaji ŵatite, “Twalinganyisye yakuti tukajonangaga mbiya syejinji, mwamti twasamile mkanyumba kamwana soni twasumisye galimoto jetu.” Pangali mundu juŵakanganichisye jemanjaji kuti atende yeleyi. Ŵasagwile kutenda yeleyi nichakulinga chakuti akomboleje kutenda yejinji pakumtumichila Yehofa. Mwamti ŵasangalalaga mnope ni yaŵasagwileyi.

6. Ligongo chichi ŵakutumichila ŵa Yehofa masiku agano akusalijima yindu yine? (Alole chiwulili.)

⁶ Masiku agano ŵakutumichila ŵa Yehofa akusalijimaga yindu yine kuti akomboleje kutenda yejinji pakumtumichila jwalakwe. (1 Akoli. 9:​3-6) Nambotu Yehofa jwangatukanganichisyaga kuti tulijimeje yindu yine. Nambosoni yindu  yatukusalijigamagayo ngaŵa kuti yikusaŵa yakusakala pajika. Mwachisyasyo, ŵane akusaleka masengo gaŵaganonyelaga, nyumba jawo, kapena yindu yine. Nambosoni ŵane akusasagula kutama ngalombela kwakandaŵi kapena ngakola ŵanache kwakandaŵi panyuma pakulombana. Ŵane akusajawula kukutumichila kudela kwakukusosechela ŵakulalichila ŵajinji atamose kuti yeleyi yikusiyatendekasya kuti atameje mwakutalikangana ni ŵachinasi ŵawo. Ŵajinji mwa m’weji tukusalijimaga yine mwa yindu yeleyi ligongo lyakuti tukusasaka kutenda yejinji pakumtumichila Yehofa. Myoyo kwende ndaŵi syosope tukakayichilaga yakuti Yehofa akusayamichilaga mnope patukulijima chinga yindu yejinji kapena yamnono ni chakulinga chakuti tumtumichileje jwalakwejo.—Aheb. 6:10.

TUŴEJE ŴAKOSEKA KUTENDA YINDU MWAKULEKANGANA NI ŴANE

7. Ana Mnasili jwasimanaga ni yakusawusya yamtuli pajwalingagalingaga kukwanilisya chilanga chakwe? (Numeli 6:5) (Alole chiwulili.)

⁷ Aŵalanje Numeli 6:5. Anasili ŵatendaga chilanga chakuti akasengaga wumbo syawo. Yeleyi yalosyaga kuti ali ŵakulipeleka mnope kwa Yehofa. Pakujigalila ulewu wa ndaŵi jaŵele mundu ali Mnasili, wumbo syawo syakulaga mwamti ŵaŵaga ŵakulekangana ni ŵandu ŵane. Yeleyi yaŵaga yangasawusya naga ŵandu ŵaŵatamaga nawo ŵakamulanaga ni yasagwileyo. Nambo chakutesya chanasa chaliji chakuti Ayisalayeli ŵane nganiŵayamichilaga kapena kwakamuchisya Anasili kuti akwanilisye chilanga chawo. Mwamti mundaŵi ja jwakulochesya Amosi, Ayisalayeli ŵane ŵaŵalesile kumtumichila Yehofa ŵapaga Anasili finyo kuti amwe yayatendekasyaga “kuti akase chilanga chawo.” (Amo. 2:12) Mwamti ndaŵi sine, Mnasili jwasosekwaga kutenda yindu mwakulimba mtima kuti akombole kutenda yindu mwakamulana ni chilanga chiŵatesile, nambosoni kuti awonecheje mwakulekangana ni ŵane.

8. Ana yajwasimene nayo Benjamin yalimbikasisye chamtuli wawojo?

⁸ Yehofa mpaka atukamuchisyesoni m’weji kuti tukomboleje kutenda yindu mwakulimba mtima kuti tuŵeje ŵakulekangana ni ŵane. Yeleyi mpaka yikomboleche atamose yili mkuti mwachipago tuli ŵasooni. Aganichisye yayamtendechele mnyamata jwa Mboni jwa yaka 10 jwakusatama ku Norway lina lyakwe Benjamin. Ligongo lya ngondo ja ku Ukraine, pasukulu jaŵalijiganyaga m’nyamataju ŵalinganyisye yakutenda yindu yakulosya kuti akuchikamuchisya chilambocho. Ŵanache ŵa pasukulupo, ŵasalile kuti ajimbe nyimbo kwineku ali awete yakuwala yakola mtundu wakwimila chilambo cha Ukraine. Myoyo, Benjamin jwatesile yakuti atame pamalo pakutalikangana ni malo gagatendechelaga yeleyi. Atichala ŵakwe paŵam’weni ŵamŵilasile kuti, “M’yiche akuno tutendele yimpepe mwambowu, tukumjembecheya mmwejo!” Nambo mwakulimba mtima, Benjamin ŵapite kwa atichala ŵakwewo ni  kwasalila kuti, “Jwangajinjililaga nawo yandale soni jwangatendaga nawo yiwoneselo. Mwamti ŵa Mboni sya Yehofa ŵajinji ali mundende ligongo lyakuti ŵakanile kuja kuputa nawo ngondo.” Atichala ŵakwewo ŵampikanichisye mnyamataju mwamti nganamkanganichisya kuti atende nawo mwambowo. Nambo achimjakwe ŵa mkalasi ŵatandite kumwusya ligongo lyakwe nganatenda nawo mwambowo. Yeleyi yamtendekasisye woga mnope Benjamin mwamti jwasigele panandi kulila. Nambope, mwakulimba mtima jwalakwe jwasalile achimjakwe ŵa mkalasiwo yajwasalile atichala ŵakwe ŵala. Kaneko Benjamin ali ayiche kumangwakwe, ŵasalile achinangolo ŵakwe kuti Yehofa ŵamkamuchisye kuti akombole kuŵichila kunyuma yakusakulupilila.

9. Ana mpaka tumsangalasye Yehofa m’litala lyapi?

⁹ Ligongo lyakuti twasagwile kumpikanila Yehofa, tukusatendaga yindu mwakulekangana ni mwakusatendela ŵandu kuchilamboku. Tukusasosekwa kulimba mtima kuti tukombole kwamanyisya achimjetu ŵakumasengo kapena ŵa kusukulu kuti tuli ŵa Mboni sya Yehofa. Nambosoni chilambochi pachikusakalilasakalilape, mpaka tuyiwoneje kuŵa yakusawusya kutenda yindu mwakamulana ni yajikusasala Baibulo nambosoni kwalalichila ŵane ngani syambone. (2 Tim. 1:8; 3:13) Myoyo, kwende ndaŵi syosope tukumbuchileje kuti ‘tukusasangalasya mtima’ wa Yehofa patukulosya kulimba mtima kuti tuŵeje ŵakulekangana ni ŵandu ŵangakusamtumichila jwalakwe.—Mis. 27:11; Mala. 3:18.

AŴICHEJE PAMALO GANDANDA YINDU YAKWAYANA NI KUMTUMICHILA YEHOFA

10. Ana kupikanila lilamusi lya pa Numeli 6:​6, 7 kwalingaga chamtuli chikulupi cha Anasili?

¹⁰ Aŵalanje Numeli 6:​6, 7. Anasili nganasosekwaga kutama chiŵandika mtembo wa mundu jwawile. Komboleka kuti Anasili ŵayiwonaga kuŵa yakusawusya kupikanila lilamusili mnopemnope pawile jwachinasi jwawo. Yaliji myoyo ligongo lyakuti pandaŵi jelejo ŵandu ŵakuyaga mwambo wa pamalilo wakuti atameje mwakuchiŵandichila chilu cha mundu jwawile. (Yoh. 19:​39, 40; Mase. 9:​36-40) Nambope, chilanga chaŵatendaga Anasili chatendekasyaga kuti akatendaga nawo mwambo welewo. Kusala yisyene, Anasili ŵasosekwaga kulosya chikulupi chakulimba kuti atende yindu mwakamulana ni chilanga chawo atamose pawile jwachinasi jwawo. Mwamti Yehofa jwakamuchisyaga ŵakutumichila ŵakwe ŵakulupichikaŵa kumalana ni yakusawusya yaŵasimanaga nayo.

11. Ana tukusasosekwa kukumbuchilaga chichi patukutenda yindu ni ŵachinasi ŵetu? (Alole chiwulili.)

¹¹ M’weji tukusakuwona kulipeleka kwetu kwa Yehofa kuŵa chindu chakusosekwa mnope. Yeleyi yikusakwaya yindu yatukusasagula kutenda  soni mwatukusatendela yindu ni ŵachinasi ŵetu. Yisyene kuti tukusasosekwa kulipeleka mnope pakugasamalila maŵasa getu soni ŵachinasi ŵetu. Nambope tukusamanyilila kuti kutenda yindu yakusasaka Yehofa ni kwakuli kwakusosekwa mnope. (Mat. 10:​35-37; 1 Tim. 5:8) Mwamti ndaŵi sine, yeleyi mpaka yitutendekasye kuti tukaŵa pamtendele ni ŵachinasi ŵetu pakusaka kumsangalasya Yehofa.

12. Ana M’bale Alexandru pajwalimbanaga ni yakusawusya ya mwiŵasa mwakwe jwatendaga yindu yapi, soni jwaŵambalaga kutenda chichi?

¹² Aganichisye yayamtendechele M’bale Alexandru ni ŵamkwakwe lina lyakwe Dorina. Panyuma pakulijiganya Baibulo kwandaŵi jelewu, Dorina jwaganisisye yakuleka kulijiganya. Mwamti jwalakwe jwasakagasoni kuti ŵamkwakwe aleche kulijiganya. Nambope, mwakuwusimana mtima soni mwakalamuka, jwamlumeju ŵasalile ŵamkwakwewo kuti ngaleka kulijiganya. Nambo yeleyi yamsakalisye jwamkongwejo, mwamti jwakamulichisye masengo machili pakusaka kumlekasya jwamlumejo kulijiganya. Jwamlumeju jwalingaga kupikanichisya ligongo lyakwe ŵamkwakwewo ŵatendaga yeleyo. Nambope yaŵaga yakusawusya kwa jwalakwe. Mwamti ndaŵi sine ŵamkwakweŵa paŵamnyosyaga soni kumjanga mwamwano, yamtendekasyaga jwamlumeju kusaka kuleka kulijiganya Baibulo. Nambope, jwalakwe jwapitilisye kumŵika Yehofa pamalo gandanda kwineku ali mkwachimbichisya soni kwanonyela mnope ŵamkwakwewo. Pambesi pakwe, chisyasyo chakwe chambone chakamuchisye ŵamkwakwe ŵala kutandilasoni kulijiganya Baibulo. Mwamti mwapanandipanandi jwamkongwejo jwatandilesoni kuganonyela Maloŵe ga Mlungu.—Alole pa jw.org fidiyo jakuti Alexandru ni Dorina Văcar: “Chinonyelo Chili Chakuwusimana Mtima,” pambali jakuti “Kumanyilila Yisyesyene Kukusakamuchisya Ŵandu Kuchenga.”

13. Ana mpaka tulosye chamtuli kuti tukusamnonyela Yehofa soni ŵandu ŵamwiŵasa mwetu?

¹³ Yehofa ni juŵatandikasisye ulombela, mwamti akusasakasoni kuti m’weji tukoleje maŵasa gakusangalala. (Aef. 3:​14, 15) Myoyo, naga tukusaka kuŵa ŵakusangalala yisyesyene tukusosekwa kutendaga yindu yakusasaka Yehofa. Tukakayichilaga yakuti Yehofa akusayamichila mnope kulingalinga kwetu patukulijima yindu yine nichakulinga chakuti tumtumichileje jwalakwe kwineku tuli mkupitilisya kwanonyela soni kwachimbichisya ŵandu ŵamwiŵasa mwetu.—Alo. 12:10.

TULIMBISYANEJE JWINE NI MJAKWE KUTI TUTENDEJE YINDU MPELA ANASILI

14. Ana ni ŵandu ŵapi ŵatukusasosekwa kulingalinga kwalimbikasya?

¹⁴ Ŵandu wosope ŵakusasagula kumtumichila Yehofa masiku agano akusasosekwa kulijimaga yindu yine ligongo lyakumnonyela jwalakwe. Nambo ndaŵi sine kutenda yeleyi kukusaŵaga kwakusawusya. Ana mpaka tutende yamtuli kuti  tulimbisyaneje jwine ni mjakwe mpela muŵatendelaga Anasili? Mpaka tutende yeleyi mwakuŵecheta maloŵe gakulimbikasya. (Yob. 16:5) Ana mu mpingo wakusasongana mwana abale ni alongo ŵakulingalinga kulijima yindu yejinji ni chakulinga chakuti amtumichileje Mlungu? Ana pana ŵanache ŵakwamanyilila ŵali kusukulu ŵakwete mbili jakuti akusatendaga yindu mwakulimba mtima pakusaka kuŵa ŵakulekangana ni achimjawo ŵa kusukuluko, atamose kuti kutenda yeleyo kukusaŵaga kwakusawusya kwa jemanjajo? Nambi uli pakwamba ya ŵakulupilila achimjawo soni ŵakulijiganya Baibulo ŵakulingalinga kuŵa ŵakulupichika atamose kuti ŵane akwasisya? Kwende ndaŵi syosope tulinjelinjeje kuŵechetaga maloŵe gakwalimbikasya jemanjaji ligongo lya yindu yakulijima soni kuŵa kwawo ŵakulimba mtima.—Fil. 4, 5, 7.

15. Ana ŵane atesile yamtuli pakwakamuchisya ŵandu ŵakutenda utumiki wandaŵi syosope?

¹⁵ Ndaŵi sine, tukusalingalinga kwakamuchisya Aklistu achimjetu ŵakutenda utumiki wandaŵi syosope. (Mis. 19:17; Aheb. 13:16) Yeleyi ni yajwatendaga mlongo jwine jwakulupichika jwachikulile jwakusatama ku Sri Lanka. Jwalakwe jwalinganyisye yakamulichisya masengo mbiya syakwe syakonjechesya syaŵapochelaga pa peshoni jakwe kuti ŵakamuchisyeje alongo ŵaŵatendaga upayiniya. Jwalakwe jwatendaga yeleyi atamose kuti chipanje chasawusyaga mchilambo chawo. Mlongoju jwalinganyisye yakuti ŵapeje apayiniyawo mbiya syakulipilila mabilu gakwimbila foni mwesi uliwose. Kusala yisyene chelechi chili chisyasyo chambone mnope.

16. Ana tukulijiganya chichi kutyochela kwa Anasili?

¹⁶ Kusala yisyene mpaka tulijiganye yejinji kutyochela pa kulijima kuŵalosyaga Anasili. Nambosoni dongosolo jeleji jikusalosya yindu yine yakwamba Atati ŵetu ŵakwinani Yehofa. Jwalakwe akusakulupilila kuti tuli ŵakusachilila kumsangalasya soni kulijima yindu yine nichakulinga chakuti tumtumichileje. Mwamti akusalosya kutuŵalanjila mwakutupa upile wakulosya yatukusati pakumnonyela jwalakwe. (Mis. 23:​15, 16; Maliko 10:​28-30; 1 Yoh. 4:19) Ngani ja Anasili jikulosya kuti Yehofa akusayiwona soni kuyamichila yatukusatenda pakulijima nichakulinga chakuti tumtumichileje. Myoyo, kwende tuŵeje ŵakusimichisya kupitilisya kumtumichila Yehofa mwakusachilila soni mwampaka tukombolele.