1. ¿Xi ti cosa maʼ xadxí huayuni ca xpinni Jehová?

 ¿ÑEE risaca para lii naca Jehová xhamíguluʼ la? ¡Risaca pue! Ne cadi lii si runi sentirluʼ zacá. Maʼ xadxí huayuni sentir stale binni ni (Sal. 104:​33, 34). Stale de laacaʼ huayúnicaʼ sacrificiu pur Jehová, casi ca nazareu ni guyuu ndaaniʼ guidxi Israel dxiqué. Yanna, ¿tu laacabe ne xi rusiidiʼ ejemplu stícabe laanu yaʼ?

2. a) ¿Tuu nga ca nazareu? (Números 6:​1, 2). b) ¿Xi bicaa caadxi israelita gácacaʼ nazareu?

² Zeeda diidxaʼ nazareu de ti diidxaʼ hebreu ni riníʼ «tuuxa ni maʼ gulícabe para guni xiixa». Cumu biʼniʼ ca israelita riʼ sacrificiu para gusisácacaʼ Jehová la? biaʼsi peʼ ca diidxaʼ riʼ para laacaʼ. Bidii Ley stiʼ Moisés que lugar guni ti hombre o ti gunaa ti voto Jehová para guni prometer zabani casi nazareu ti tiempu (biindaʼ Números 6:​1, 2). a Ora tuuxa guni voto riʼ, naquiiñeʼ guni caadxi cosa ni qué runi xcaadxi israelita. ¿Xi rucaa tuuxa gaca nazareu yaʼ? Zándaca rúnibe ni purtiʼ guizáʼ nadxiibe Jehová ne dxandíʼ peʼ racaláʼdxibe gudiibe xquixe peʼ laa pur guiráʼ ca ndaayaʼ ni maʼ bidii laabe (Deut. 6:5; 16:17).

3. ¿Xiñee zanda guininu nácanu casi ca nazareu?

³ Ora guyuu «ley stiʼ Cristu» lugar stiʼ Ley stiʼ Moisés, maʼ qué ñanda ñaca ca xpinni Dios nazareu (Gál. 6:2; Rom. 10:4). Cásica ca nazareu, laanu laaca racaláʼdxinu gúninu ni ná Jehová de guidubi ladxidoʼno, xhiálmanu, xquendabiaaninu ne guiráʼ stipa stinu (Mar. 12:30).  Nga peʼ nga ni runi prometernu Jehová ora rúninu ti voto ra rábinu laa cudiʼnu laa xquendanabáninu. Para guni cumplirnu voto ca, caquiiñeʼ gúninu ni riuulaʼdxiʼ Jehová ne gúninu sacrificiu pur laa. Nagasi zadúʼyanu ximodo biʼniʼ cumplir ca nazareu voto sticaʼ ne ximodo zanda gacané ejemplu stícabe laanu guni cumplirnu voto ni maʼ bíʼninu (Mat. 16:24). b

CHUʼNU DISPUESTU GÚNINU SACRIFICIU

4. Casi riete lu Números 6:​3, 4, ¿xi sacrificiu naquiiñeʼ guni ca nazareu?

⁴ (Biindaʼ Números 6:​3, 4). Qué zanda gueʼ ca nazareu alcohol o nisadxuʼniʼ ne laaca qué zanda gocaʼ uva nin pasa. Restu binni la? zanda gó ne gueʼ ca ni purtiʼ cadi malu ca ni. Lu Biblia riete naca vinu ca ti regalu stiʼ Dios ne «rusiecheʼ ni ladxidóʼ binni» (Sal. 104:​14, 15). Neca zacá de guidubi ladxidóʼ ca nazareu rusaana de guecaʼ ne gocaʼ ca ni bizéʼtenu riʼ. c

5. ¿Xi sacrificiu biʼniʼ Madián ne Marcela, ne xiñee?

⁵ Cásica ca nazareu, laaca rúninu sacrificiu para gúninu jma lu xhiiñaʼ Jehová. Guidúʼyanu ejemplu stiʼ Madián ne Marcela. d De Colombia guendaxheelaʼ riʼ ne nabánicabe galán. Galán biʼniʼ ganar Madián, ngue runi gulézacabe ndaaniʼ ti yoo guizáʼ sicarú. Ne cumu racaláʼdxicabe gúnicabe jma lu xhiiñaʼ Jehová la? gudixhe íquecabe guchaacabe modo nabánicabe. Laacabe bizeetecabe: «Maʼ qué ñúnidu stale gastu, biyúbidu ti yoohuiiniʼ para cuézadu ndaaniʼ ne bitoʼdo carru stidu». Guirutiʼ qué ñuni obligar Madián ne Marcela gúnicaʼ sacrificiu riʼ; bíʼnicabe ni purtiʼ racaláʼdxicabe guni predicacabe jma. Guizáʼ nayecheʼ núcabe pur decisión ni gucuaacabe.

6. ¿Xiñee runi ca xpinni Cristu sacrificiu ca dxi riʼ? (Biiyaʼ imagen ca).

⁶ Laanu ca xpinni Cristu riuuláʼdxinu gúninu sacrificiu para gúninu jma lu xhiiñaʼ Jehová (1 Cor. 9:​3-6). Qué rinabaʼ diʼ Jehová laanu gúninu ca sacrificiu riʼ, ne nánnanu cadi malu diʼ ca cosa ni rusaana de gúninu. Nuu hermanu  rusaanacaʼ lídxicaʼ o ti dxiiñaʼ ra riguíxecabe laacaʼ galán. Nuu hermanu maʼ gudixhe ique guiaana solteru ti tiempu o cadi gapa xiiñiʼ nacubi bichaganáʼ. Xcaadxi maʼ gudixhe ique chigacané ra jma caquiiñeʼ tu guni predicar, neca nánnacaʼ naquiiñeʼ chuʼcaʼ zitu de familia sticaʼ ne xhamígucaʼ. Racaláʼdxinu gúninu ca sacrificiu riʼ purtiʼ nápanu gana gudiʼnu Jehová ni jma galán de laanu. Pa naroʼbaʼ o pa nahuiiniʼ sacrificiu ni gúninu pur Jehová, chuʼnu seguru rusisácabe ni (Heb. 6:10).

GÁPANU VALOR PARA GÁCANU GADXÉ DE XCAADXI

7. ¿Xiñee zándaca gaca nagana para ti nazareu guni cumplir voto ni biʼniʼ? (Números 6:5; biiyaʼ imagen ca).

⁷ (Biindaʼ Números 6:5). Qué zanda ugá ca nazareu que guicha íquecaʼ pur voto ni maʼ bíʼnicaʼ. Zacá rusihuínnicabe runi respetárcabe autoridad ni napa Jehová. Pa maʼ xadxí de naca ti israelita nazareu, guizáʼ zagaa guidxa íquebe dede zuuyadxí binni laabe. Pa runi respetar ca ni nuu gaxha de laabe voto ni bíʼnibe que, qué zaca nagana para laabe guni cumplirbe ni. Peru ndaaniʼ guidxi Israel guyuu ti tiempu ra que nusisácacabe ne qué ñuni respetárcabe ca nazareu. Casi tiempu bibani profeta Amós, ca israelita apóstata que rudiicaʼ laacabe vinu para gucheenécabe voto ni maʼ bíʼnicabe Dios (Amós 2:12). Guyuu biaje guca nagana para ca nazareu guluiʼcaʼ maʼ gadxe laacaʼ de xcaadxi ne gupa xidé gúcacabe nadxibalú para bíʼnicabe ni.

8. ¿Xii nga ni jma guyuuláʼdxiluʼ de ni bizaaca Benjamin?

⁸ Zanda gudii Jehová laanu valor para gácanu gadxé peʼ de xcaadxi neca nácanu binni natuí. Guidúʼyanu ni bizaaca Benjamin, ti hermanuhuiiniʼ de chii iza de guidxi Noruega. Ra scuela ra riebe guca ti eventu para guni apoyárcabe ca binni ni cayacaná lu guerra ni cayaca Ucrania. Naquiiñeʼ guʼndaʼ ca xcuidihuiiniʼ ti canción ne gácucaʼ lari casi ca color ni napa bandera stiʼ Ucrania. Para cadi guni participar Benjamin lu eventu riʼ la? bizuhuaabe zitu de laacaʼ. Peru biiyaʼ ti maestra laabe ne bicaa ridxi laabe: «¡Gudá raríʼ! ¡Chixhe, cabézadu lii!». Né stale valor bidxíñabe ne gúdxibe maestra que: «Neutral naa. Qué runeʼ participar lu ca eventu políticu. Ne stale testigu stiʼ Jehová nuucaʼ ndaaniʼ cárcel purtiʼ qué riecaʼ lu guerra». Bicaadiaga ne biene maestra que laabe. Peru ca compañeru stibe gunabadiidxacaʼ laabe  xiñee cadi cayundanebe laacaʼ. Guizáʼ guyuu Benjamin nervioso dede gupa gana ñuunaʼ. Neca zaqué gúcabe nadxibalú ne gúdxibe laacaʼ ni maca gúdxibe maestra que. Despué gúdxibe bixhózebe ne jñaabe Jehová ngue gucané laabe guiniʼbe ni runi crebe.

9. ¿Ximodo zanda gusiéchenu ladxidóʼ Jehová?

⁹ Ora ruzúʼbanu stiidxaʼ Jehová, ruuyaʼ binni maʼ gadxe laanu de xcaadxi. Naquiiñeʼ gácanu nadxibalú para guininu nácanu testigu stiʼ Jehová ra dxiiñaʼ o ra scuela. Cumu jma maʼ feu ziyaca xpiaa binni ra zidiʼdiʼ dxi la? jma maʼ nagana ziyaca para laanu chinándanu ca principiu ni zeeda lu Biblia ne guni predicarnu ca noticia galán stiʼ Reinu (2 Tim. 1:8; 3:13). Peru cadi guiaandaʼ laanu rusiéchenu ladxidóʼ Jehová ora rácanu nadxibalú ne rusihuínninu maʼ gadxé laanu de ca binni ni qué runi ni nabe (Prov. 27:11; Mal. 3:18).

GÚNINU NI NÁ JEHOVÁ PRIMÉ LU XQUENDANABÁNINU

10. ¿Xiñee guca nagana para ca nazareu chinándacaʼ mandatu ni zeeda lu Números 6:​6, 7?

¹⁰ (Biindaʼ Números 6:​6, 7). Ca nazareu que la? qué zanda guidxíñacaʼ ti guetu. Ruluíʼ si cadi nagana ndiʼ. Peru zándaca gaca ni nagana para ti nazareu pa familia stibe guetu ca. ¿Xiñee yaʼ? Purtiʼ pur ca costumbre guyuu dxiqué naquiiñeʼ chúʼcabe gaxha de ti binni ni guti (Juan 19:​39, 40; Hech. 9:​36-40). Ngue runi qué zanda chinanda ca nazareu stale de ca costumbre riʼ. Bisihuínnicabe naguidxi fe stícabe ra biʼniʼ cumplírcabe voto ni bíʼnicabe neca cadíʼdicabe lu guendanagana. Peru qué ñuucabe stúbicabe; zanda chuʼnu seguru siempre bidii Jehová laacabe stipa ni caquiiñecabe.

11. ¿Xi ti cosa naquiiñeʼ quixhe íquenu gúninu? (Biiyaʼ imagen ca).

¹¹ Para laanu ca xpinni Cristu nabé risaca voto ni bíninu para bidiʼnu laanu Jehová. Ne rihuinni zacá ni pur ca decisión ni ricaanu ne pur modo runi tendernu familia stinu. Rúninu guiráʼ ni nuu lu nanu para gudiʼnu ni caquiiñeʼ familia stinu, peru nánnanu ni jma risaca para laanu nga gúninu ni ná Jehová primé lu xquendanabáninu (Mat. 10:​35-37; 1 Tim. 5:8). Nuu biaje zándaca ziuudindené familia stinu laanu, peru qué zusaana de gúninu ni riuulaʼdxiʼ Jehová.

12. ¿Xi biʼniʼ ne xi qué ñuni Alexandru ora bidxaagalú ti guendanagana ndaaniʼ familia stiʼ?

 ¹² Guidúʼyanu ni bizaaca Alexandru ne Dorina, xheelabe. Despué de ti iza de cayuundacabe Biblia, gudixhe ique Dorina gusaana de guni estudiar Biblia ne ngueca gucaláʼdxibe ñuni Alexandru. Peru né stale paciencia bisiene Alexandru laabe racaláʼdxiruʼ guni estudiar. Qué lica ñuulaʼdxiʼ Dorina ni gúdxibe laa que ne gucalaʼdxiʼ ñuni obligar laabe nusaana de ñuundabe Biblia. Guca nagana para Alexandru guiene xiñee caníʼ ique xheelaʼ zaqué ne gucalaʼdxiʼ nusaana de ñuundaʼ Biblia. Purtiʼ riníʼ Dorina mal de laabe ne runi cosa para guchiichi laabe. Neca zacá gudixhe íquebe gúnibe ni ná Jehová primé lu xquendanabánibe ne biʼniʼ tratarbe xheelabe né stale cariñu ne respetu. Cumu qué nireebe gana la? ra gudiʼdiʼ tiempu bibiguetaʼ biʼniʼ estudiar xheelabe Biblia ne guyuunisa. (Biiyaʼ videu ni láʼ Alexandru ne Dorina Văcar: «Ti binni ni napa amor la? napa paciencia ne nachaʼhuiʼ», ni zeeda lu jw.org, lu sección «Ruchaa ni dxandíʼ xquendanabani binni»).

13. ¿Ximodo zanda gusihuínninu nadxiinu Jehová ne familia stinu?

¹³ Jehová nga gudixhe chuʼ ca familia ca ne racaláʼdxibe guibánicaʼ nayecheʼ (Efes. 3:​14, 15). Pa dxandíʼ peʼ racaláʼdxinu guibáninu nayecheʼ la? caquiiñeʼ gúninu ca cosa ca modo racalaʼdxiʼ Jehová gaca ca ni. Ruuyabe ne rusisácabe guiráʼ sacrificiu ni rúninu para gúninu ni nabe ne laaca ruuyabe stipa ni rúninu para gápanu familia stinu né stale guendarannaxhii ne respetu (Rom. 12:10).

CÚʼSAANU GANA LAANU PARA GÁCANU CASI CA NAZAREU

14. ¿Tuu nga ca ni jma caquiiñeʼ cuʼnu gana?

¹⁴ Pa racaláʼdxinu gúninu ni ná Jehová naquiiñeʼ chuʼnu dispuestu gúninu sacrificiu pur guendarannaxhii. Peru nuu biaje raca ni nagana. ¿Ximodo zanda cúʼsaanu gana laanu para gúninu sacrificiu pur Jehová yaʼ? Zanda gúninu ni pur ca diidxaʼ ni gábinu xcaadxi (Job 16:5). ¿Ñee nuu tuuxa ndaaniʼ congregación stiluʼ ni racalaʼdxiʼ guibaniné huaxiéʼ cosa para guni jma lu xhiiñaʼ Jehová la? ¿Ñee runibiaʼluʼ tuuxa jovenhuiiniʼ ni canazá scuela ni napa valor ne cusihuinni maʼ gadxé laa de ca compañeru stiʼ neca cayaca ni nagana para laa la? ¿Runibiaʼluʼ ti hermanu o tuuxa ni deruʼ cuzulú cayuundaʼ Biblia ni cucaalú familia stiʼ laa pur nuu gaxha de Jehová la? Galán gúninu cuʼnu gana laacabe ne gábinu laacabe  rusisácanu valor ni rusihuínicabe ne ca sacrificiu ni rúnicabe pur Jehová (Filem. 4, 5, 7).

15. ¿Xi huayuni caadxi hermanu para gacanecaʼ ca hermanu ni nuu lu serviciu de tiempu completu?

¹⁵ Nuu biaje zanda gacanenu ca hermanu ni cayuni xhiiñaʼ Jehová lu serviciu de tiempu completu (Prov. 19:17; Heb. 13:16). Nga peʼ nga ni gudixhe ique ti hermana ni maʼ huaniisi ni nabeza ndaaniʼ guidxi Sri Lanka. Cumu bidxiibacabe lu pensión stibe la? gudixhe íquebe gacanebe chupa hermana joven para cadi gusaana de gácacaʼ precursora pur huaxiéʼ bueltu nápacaʼ. Ngue runi guiráʼ beeu ribeechube ti ndaa bueltu para gacanebe laacaʼ né ca gastu sticaʼ. ¡Pabiáʼ galán ni runi hermana riʼ!

16. ¿Xi rusiidiʼ ejemplu stiʼ ca nazareu laanu?

¹⁶ ¡Guizáʼ stale cosa maʼ bizíʼdinu de ca nazareu! Peru laaca maʼ bizíʼdinu ti cosa de Jehová, Bixhózenu ni nuu guibáʼ. Nánnabe racaláʼdxinu gusiéchenu laabe de guidubi ladxidoʼno ne gúninu sacrificiu para guni cumplirnu voto ni bíninu dxi bidiʼnu laabe xquendanabáninu. Laaca rusisácabe laanu ra rudiibe lugar gusihuínninu pabiáʼ nadxiinu laabe (Prov. 23:​15, 16; Mar. 10:​28-30; 1 Juan 4:19). Rusiidiʼ ejemplu stiʼ ca nazareu laanu ruuyaʼ Jehová ca sacrificiu ni rúninu para gúninu ni ná ne nabé rusisácabe ca ni. Nga runi, cadi gusaana de gusisácanu Jehová, ne de guidubi ladxidoʼno gudiʼnu laa ca cosa jma galán ni nápanu.