1. Gini wene sino agu aboro nairiso Yekova nayuguhe vurũ agu agarã yo ninaasusa?

 YA MO mo nabi gamo pagume na Yekova na nyanyakipaha? Zanga kapa, mo nabihe abi na nyanyakipaha! Na mo ni saro te. Natona kina bakuru kusayo, badungu aboro aima du na kina gu bangisa bipai du mo na ni re. (Tam. 104:33, 34) Badungu aboro ima mbupa kura gayo apai tipa ka iriso Yekova. Gure nga gupai agu aboro Nazara naadu rogo gu ringara Yisaraere naadu mbata amangihe. Ada nangia yo na ginipai rengbe ani ka wirikaha ti gayo kpiapai?

2. (a) Ada nangia aNazara? (Pa Geda Aboro 6:1, 2) (b) Tipagine kura aYisaraere asia kadu ni aNazara ti ni?

² Gu fugo nga “Nazara” i adihe ti gu pa-Ebere du rogoyo nga, “Gu kparakpara ni.” ANazara angia agu aYisaraere nafu tiyo zaaza tipa ka mbupa gayo apai tipa ka mangasunge fu Yekova ngba kparakpara gene. Ga Moize aNdiko anaambu gene fu kumba watadu dee tipa ni mangi kparakpara mokido fu Yekova ni sia ni gupai nga ka raka ni Nazara tipa bete regbo. a (Oni gedi Pa Geda Aboro 6:1, 2.) Ho Yisaraere anaamanga mokido ni kadu ni boro Nazara, si anaaida ni mangipai kuti agu arugute nga gu kura aYisaraere anaamanganga pai kuti ni ya. Ono tipagine tie Yisaraere anaasia ka manga mokido ti ni ka da ni Nazara? Si nawira gupai nga, gupai nanaasa ni ni idi kadu ni boro Nazara angia gani dudunguro nyemuse tipa Yekova na tambuahe tipa Gako dungu wene agamahe.​—Pa Rug. 6:5; 16:17.

3. Waigu du ga Mbori aboro areme wakina aNazara?

³ Gu mbakadapai nga ga Nazara adigi ho i adi ga Moize Ndiko ni kusayo na ki moi “ga Kristo rugute” kubaha. (Gara. 6:2; Rom. 10:4) Ono tie, wakina aNazara, ga Yekova aboro areme nandu kindi  kumbatayo kaa yugo bakere nyemu ka mangasunge fu Yekova na kpotoyo yo dunduko, mbisimo yo dũ, gayo berã dũ, na gayo ome dũ. (Mk. 12:30) Ani nadu na nyemu ka manga kidohe ka manga gipai re ho ani akpara gaani raka ni fu Yekova. Tipa ka raka ringbisihe kuti gu mokido re, ani du wa ka ani du na nyemu ka raka ringbisihe kuti gupai Yekova akpinyemuhe na ki mbupa kura gaani apai tipa ka mangasunge fuko. Wa ani nikaa wisigopai tipa wai aboro Nazara araki ringbisihe kuti gayo kidohe, ani ima rengba ka wirika nyanyakipa apai nibipa wai rengbe ani ka raka kuti gaani kidohe a. b (Mt. 16:24) Ani wisigingo bete akpiapai.

MO DU NA NYEMU KA MBUPA KURA APAI

4. Ringbisihe kuti Pa Geda Aboro 6:3, 4, gini ahe aNazara ambupaha?

⁴ Oni gedi Pa Geda Aboro 6:3, 4. Si anaaidanga aNazara naambira buda na kini ri ahe wa zamba bakakue gbiati ugu rindi kakue te. Dedede, agu aboro naadu pati yo anaari ngbatunga agi ariahe re ari, mbiko gbegberẽpai ho naadu ti agi ariahe re te. Baibiri nasakapai tipa ‘ime bakakue nangiisa kpoto boro yo’ ya si nga gamahe be Mbori. (Tam. 104:14, 15) Wa si avura du vurũ nga agi ahe re aima rengba ka fu ngbarago fu boro rogo gani raka yo, aNazara aima du na nyemu ka nehe. c

5. Gini apai aMadián na Marcela asia ka mbupaha, na tipagine?

⁵ Wakina aboro Nazara, ani nambupa kura apai a tipa ka iriso Yekova ni bakerehe gbe. Oni bingo gu kpiapai nga ga Madián na Marcela. d Agi arogotise ni aKristano re anaaraka wene raka. Madián aamanga wene sunge nga gu nambu gene fuyo i naaraka rogo bawene kporo. Ono tie, i aaida ka manga dungu apai tingba gayo sunge fu Yekova. Tipa ka da ti gu sasa re, i adiberã ka manga bete aˈariapai. I aya, “Ani atona mangasunge na marã ni bete ru. Ani aga ku rogo tooni bambu na ki bagi gaani tarambiri.” Anga ndiko du naadu tipa aMadián na Marcela mangi agi aˈariapai re te​—ono i asia ka manga agi aˈariapai re mbiko pa manga yo ho wo ambu gene fuyo i kiisi gayo sunge tungusapai. I ima du na rengbabepai na i na ngbarago mbiko gayo adiaberã.

6. Tipagine aKristano areme ambupa kura gayo apai ti ni? (Oni bi sura a.)

⁶ AKristano areme nagbia ngbarago ti mbu yo pa kura gayo apai tipa wa ka i du na bakere  regbo ka mangasunge fu Yekova. (1 Kor. 9:3-6) Anga ndiko du ngaha be Yekova tipa ani mangi agi apai re te; na anga agu ahe ani ambupaha nga gbegberẽ ahe te. Ni kpiapai, gu kura aboro nambupa manga gu sunge marã ngbatiyo na zavura ka zanga du na kporo beyo. Dungu aboro ima diaberã ka nye zanga manga rogatise tipa gbanga regbo, watadu ka zanga vunga agude nibasa tingbafuo rogatise. Gu kura aboro ima diaberã tipa ka mangasunge rogo gu ba du na bakere zingo abatungusipai rogoho, si ki vura du vurũ nga i nika raka tuturũ ti agu aboro i nakpinyemu yo gbe. Badungu rani na nyemu ka manga gi futise re mbiko ani naida ka fu guhe fu Yekova ngba gbe. Mo du na gu kido nga Yekova nabi ai gu futise mo namangihe tipa ka sia ka mangasunge fuko na nyanyakipaha ka si vura du vurũ nga si tooni watadu ni kikiihe.​—Eb. 6:10.

MO DU NA NYEMU KADU KIA

7. Gini kpakarapai boro Nazara arengbe ka gbia tini na ni wa ni aaida ka kakuti gani kidohe? (Pa Geda Aboro 6:5) (Oni bi sura a.)

⁷ Oni gedi Pa Geda Aboro 6:5. ANazara amangi kidohe ka zanga kpe mange riyo. Gure nga gu gene i aayugoho ngbaha nga i nikaa ra nigoyo dunduko fu Yekova. Ka si anidu nga Yisaraere angia Nazara tipa gbanga regbo, ri ni aima rengba ka sona ni bagbangaha na si aima du taata fu aboro i bihe. Ka si anidu nga kura aboro anidu na irisa fu ni na kini ngarasi ni ni banda gani kidohe, si aima rengba kadu taata gbe fu boro Nazara nidu kia. Si nipa gberãrago nga, aregbo adu kinaho rogo gu pangbanga yo nga ga aYisaraere aboro anaayugonga irisa fu aNazara watadu ka songoda yo ya. Ti regbo gu nebi nangia Amosa, agu aYisaraere nangia abasamungu kuti ndikidi pambori anaafu “imekakue fu aNazara i mbiri he,” si nawiraha wa, i aamangaha wo tipa ka sayo i kuo gu gayo kidohe naadu tipa ne buda. (Amosa 2:12) Ti gu kura aregbo, si anaaida Nazara kakuti gani kidohe na ni kidu kia dagba kura aboro.

8. Waigu ga Benjamin kpiapai nangarasi ro?

⁸ Na ga Yekova undo, ani ima rengba a ka yugo wingbaduse na kidu kia ti kura aboro ka si vura du vurũ nga zee namanga rani amanga. Oni bingo gu kpiapai nga ga Benjamin, nga Dezire Yekova du garãko nga bawe rogo gu ringara nga Norway. Mbiko gu vura namanga Ukraine yo, gako sukuru amangi mbakadapai tipa ka yugo gayo songodahe fu agu aboro du Ukraine yo. I asana agude i bibia na ki vo gu roko arangi he adu wa gu bendeere nga ga Ukraine. Tipa Benjamin ne rimiso tiko ku rogo gi mangaapai nafu iriso fu ringara re, ko aru tuturũ ti gu ba si adu nga i nika manga gipai re rogoho. Ono tie, gako nayugupai abi ko na ki yambu ko na fugori kuari nga: “Mo ye awere fuo rani ani mangi gipai re. Ani dunduko nasungudo kina ro!” Benjamin  ayugu wingbaduse ki ndu fuo gu nayugupai re na ki pe gupai furi nga: “Mi asongodanga kura birĩ-zogarago te, na mi akodanga tire na agu aboro nakura ka yugo gayo gberãrago tipa kura birĩ-zogarago a te. Ono dungu aDezire Yekova du bambukiso yo mbiko i aká ka ndu ka sovura.” Ga Benjamin nayugupai aidi gako sakarogopai yo na ri ki pe gupai fuko nga ko ima rengba ka zanga kodatiko na yo. Ono tie, gako agude riko atona ka sana ko tipa ndu gupai ko aakodanga tiko ti ni na yo ya. Gunde aima zio Benjamin na ko ki mbedi ka tona kpee; ono wa si avura du wo, ko ayugu wingbaduse na ki pe kina gu bangisapai ko apehe fu gako nayugupai fu gako riko dunduko. Tingbafuo gure, Benjamin ape gupai fu avunguko nga Yekova aima undo ko ko songodipai kubara gako aida yo.

9. Ngba gini gene rengbe ani ka fu ngbarago ku kpoto Yekova yo?

⁹ Mbiko gupai nga ani nasia ka giasangba Yekova, gu kura aboro nabihe abi nga ani kia tiyo. Ani naida na wingbaduse tipa ka yugo tirani nga ani nga aDezire Yekova basunge yo na sukuru yo. Na wa agu asino na mangaapai nga ga gi zegino re agbera nikerehe kina kumbatayo, si nawiraha wa si nika du adu furani ni kere kpakarakpakaraha tipa ani raki kuti agu abangua arengo nga ga Baibiri na ka tungusa wene pangbanga fu kura aboro. (2 Tim. 1:8; 3:13) Ono tie, oni naatingida gupai ti aregbo dunduko nga, ani nafu “ngbarago fu kpoto [Yekova] yo” ho ani ayugo wingbaduse ni na kidu kia ti agu aboro airisongo Yekova ya.​—Snz. 27:11; Mara. 3:18.

MO MOI YEKOVA NI BAMBATA BORO ROGO GAMO RAKA YO

10. Waigu rengbehe kadu nga pekafuo gu ndiko du rogo Pa Geda Aboro 6:6, 7 angia asada fu aNazara?

¹⁰ Oni gedi Pa Geda Aboro 6:6, 7. ANazara anaambeda nga na kangba te. Isoke, mo naberã gupai nga gipai re aangianga gu bakerepai boro ambupaha te. Ono ti agu aregbo i aake Baibiri ti ni, gipai re aima rengba kadu ni kere kpakarakpakaraha fu boro Nazara ho mbembedi gume ni anikpi ni. Asino kpara boro ti agu aregbo re akoda du mbembedi na kangba. (Yo. 19:39, 40; Amo. 9:36-40) Ono tie, boro Nazara aarengbanga ka manga ngbatunga agu asino kpara boro re te. Zavura ho si anaaida ni aNazara mangipai kuti agu apai nga ga aborokporo ti regbo kpio boro, i anaayugo nyanyaki idapase ni ká yo kuti gayo kidohe. Ni rengo, Yekova aima nyakasa gi ruru aboro re tipa i hi gu ngbatunga kere akpakarapai re.

11. Ginipai si aida Kristano diberã ka mangaha ho ni amangapai ni kuti agu apai nga ga aborokporo? (Oni bi sura a.)

 ¹¹ Wa ngia ani aKristano, ani nabi gu gaani mokido ani amangihe fu Yekova na nyanyakipaha. Gipai re nadu na maapai kurii gaani adiaberã na mangaapai nibipa agu apai nga ga aborokporo. Ani namangasunge nyanyaki ka ngerafuo agu azingo nga ga gaani aborokporo, ono ani amaanga gu nyemupai nga ga gaani aborokporo mbatayo fu gupai Yekova aida ani mangihe te. (Mt. 10:35-37; 1 Tim. 5:8) Ti kura aregbo, si ima rengba ka ida ani mangi agu adiaberã agumerani nikaa dunga na ngbarago na ni ya ono si kini fu ngbarago fu Yekova.

12. Wa Alexandru aamangapai kuti kpakarapai rogo gako ramukporo, ginipai ko amangihe na ginipai ko aamanganga ha ya?

¹² Oni bingo gu kpiapai nga ga Alexandru na diako nga Dorina. Tingbafuo agi arogotise re wiriki Baibiri tipa garã sa, Dorina adiberã ka mbuhe, na ri aaida Alexandru mbuhe a. Ono tie, ko ape gupai furi ngba zezeredi gene na rogo tatamana yo nga ko nikaa ndu kumbatayo kindi kaa wirika Baibiri. Dorina aadunga na ngbarago te na ri kini idi ka sa ko ngba ome ko mbu wirikaha. Alexandru ape gupai nga ko aasadi ka rugatiko na ndu gupai ri adu ti ni na gi bipai re, ono si aadunga taata fuko te. Ti kura aregbo, ho Dorina anaabisira ko ni na kini karagapai fuko ni gbegberẽhe, ko abihe nga si aida ko mbu wirika Baibiri. Wa si avura du wo, Alexandru aandu kindi kumbatayo kaa maa Yekova ni bambata boro rogo gako raka yo, na ti kina gu bangisa regbo re, ko kini yugu bakere nyemuse na irisa fu diako. Mbiko gako wene kpiapai, ri adiberã ka tona wirika Baibiri berewe, na kusa, ri azi bapatiza.​—Oni bi gu vidio du rogo jw.org nga, Alexandru and Dorina Văcar: “Love Is Patient and Kind” rogo agu avidio ni naakura nga, “Truth Transforms Lives.”

13. Waigu rengbe ani ka yugo nyemuse fu Yekova na fu gaani aborokporo?

¹³ Yekova du namangi gu mbakadapai nga ga aborokporo na ko naida ani du na ngbarago wangia ani aborokporo. (Ef. 3:14, 15) Ka ani aaida kadu nzunzu na ngbarago, si naida ani mangipai kuti ga Yekova gene. Mo du na gu kido nga Yekova nabi agu apai mo nambupaha tipa ka irisoko na nyanyakipaha, wa mo angerafuo gamo aborokporo kini mangipai na yo rogo nyemuse na irisa.​—Rom. 12:10.

ONI NGARASI AKUARONI TIPA I DU WA ANAZARA

14. Ada gbe si aida ani diberã ka ngarasa yo na gaani afugo?

¹⁴ Agu aboro dunduko nasia ka iriso Yekova areme, si naida i du na nyemu ka mbupa kura gayo apai mbiko gayo nyemuse fuko. Ti kura  aregbo, si taata ka manga gipai re te. Waigu rengbe ani ka undo akuarani i mbupa kurapai tipa Yekova? Ni gumba ani agu afugo nga ga ngarasaro. (Eyo. 16:5) Ya mo kura aboro ho rogo gamo dungurati nga aguyo naˈasada ka sa gayo raka taata tipa ka manga bakere apai ti ngba ga Yekova sunge? Ya mo mo iningo pa gu paranga aboro nga aguyo nayugo wingbaduse tipa kadu kia ti kura agude sukuru yo, si ki vura du vurũ nga si ima kpakara ka mangaha wo? Ya mo abawiriki Baibiri ho gbiati akuarani aidipase nga aguyo nasota ka nye ni ruruyo mbiko gu sogote nga ga aborokporo? Mo diberã tipa ka manga agu apai dunduko rengbe mo ka mangaha ka ngarasa yo na ki pepa wai fuyo ani nakpinyemu yo mbiko gayo wingbaduse gbiati gupai i amangaha fu Yekova.​—Frm. 4, 5, 7.

15. Waigu gu kura aboro nasongodi agu aboro namangasunge Kindo ti aregbo dũ?

¹⁵ Ti kura aregbo, ani ima rengba ka fu undo rogo mangimangipai yo fu agu akuarani aKristano du tingba sunge Kindo ti a regbo dũ. (Snz. 19:17; Eb. 13:16) Gere nangia gu wene nyemupai nga gu naadu ti gu sosono wirina du niruru ri naraka Sri Lanka yo. I akiisi gu marã ri aagbia ru nga gu marã boro azio ru ho ni ada ni ti gu garã boro ninaambu sunge ti ni na ri kini kpinyemu ka undo anazakigene ue tipa i naandu kindi kumbatayo na gayo sunge tungusapai akpakarapai nga ga zingo marã ki vura du vurũ. Ri adiberã tipa kaa fu bete marã na adiwi dunduko fuyo tipa i anaangbe marã ku vuru gayo aterefuni yo. Nga gu wene toro gi wirina re ayuguhe!

16. Ginipai rengbe ani ka wirikaha ti gu mbakadapai nangia ga aNazara bakuru kusayo?

¹⁶ Ni rengo, ani ima rengba ka wirika dungu apai ti gu wene kpiapai aNazara amoihe! Ono tie, gi mbakadapai re nayugo gu kurapai ayugo tipa gu barani du ngbangbaturũ yo nga Yekova. Ko na gu kido nga ani ima kpinyemu ka sa ngbarago tiko na ani na nyemu ka mbupa kura gaani apai tipa ka raka ringbisihe kuti gu gaani mokido nga ga kparatise. Ko yugu irisa furani nifu ko momu furani ani sia ka yugo gaani nyemuse fuko. (Snz. 23:15, 16; Mk. 10:28-30; 1 Yo. 4:19) Gu mbakadapai nangia ga aNazara nayugo gupai nga Yekova nabi agu apai abi ani ambupaha tipa ka mangasunge fuko na ko nabihe na nyanyakipaha. Ani dinga berã adia tie kaa ndu kumbatayo kindi kaa iriso Yekova, na kini fu guhe fuko ngba gbe ringbisihe kuti omerani.