ARTÍCULO NI GUISUIDYNO 7
CANCIÓN 51 Estamos dedicados a Dios
Xí rasuidyno de ejemplo xtuny nazareos
«Laʼga nacbu nazareo, nacbu santo par Jehová» (NÚM. 6:8).
TEMA
¿Ximod labúu gacné ejemplo xtuny Nazareos lóono gapno balory né tzoʼno puext gonyno sacrificios por Jehová?
1. ¿Xí láani rony xpiin Jehová?
¿RASAC par looy mod radzaklo Jehová la? ¡Sigory scú! Né diti looysi rasaclo modcu. Por xidalgoluʼ íz, xidal millón de buñ ma gosac xomod rasaclo (Sal. 104:33, 34). Xidalyibu ma bunyibu sacrificios por Jehová, xomod nazareos ni bibany gudx Israel ló dzú ni see. Per, ¿chú gocyibu né xí rasuidyni lóono mod bunyibu?
2. a) ¿Chú layibu ngú góc nazareos? (Números 6:1, 2). b) ¿Xí láani bichiin tipnés israelitas par ñacyibu nazareos?
2 Diitz nazareo sieedni de diitz hebreo ni radudy diitz ni noʼ «dedicado» par toibsi cós. Guirá israelitas reʼ ni diti bisian Jehová, bunyibu xidal sacrificios par bunyibu xchiin Jehová de toib mod ni rasac, por ngú diitz reʼ rabexatzay láani. Ley ni cuaʼ Moisés bidudyni lagary que toib buñguieeu o toib buñgonaʼ ñonyibu toib voto ni rasac a Jehová ro bidudyibu xtiitzyibu guibanyibu xomod nazareo por toib tiemp (bíil Números 6:1, 2). a Órni toib israelita buny voto cu, non nasobbu tipnés mandary ni stipnés israelitas diti non ñony. ¿Xí láani bichiin toibtica buñ par ñac nazareo? Galnadxiʼ ni gopbu Jehová né guirá galnasác ni bidudy Jehová láabu (Deut. 6:5; 16:17).
3. ¿Ximod nacno xomod nazareos?
3 Órni «xiley Cristo» goyoʼni xalagary Ley ni cuaʼ Moisés, xpiin Dios ma diti labúu ñacyibu nazareos (Gál. 6:2; Rom. 10:4). Per xomodca nazareos, láaca nainy lóono gonyno xchiin Jehová né guidopy xcalnabanyno, guidopynacno, xpensaryno né xfuersno (Mar. 12:30). Né ngú ni radudyno xtiitzno Jehová órni rac dedicarno. Par gony cumplirno né voto cu, non gony cumplirno ni ná Jehová né gonyno sacrificios. Nigoreʼ guisuidyno ximod buny cumplir nazareos né voto ni bunyibu né ximod labúu gacné ejemplo xtunyibu par gony cumplirno ni ma gonino (Mat. 16:24). b
TZOʼNO PUEXT GONYNO SACRIFICIOS
4. Mod ná Números 6:3, 4, ¿xí sacrificio non ñony nazareos?
4 (Bíil Números 6:3, 4). Nazareos diti labúu ñeʼyibu alcohol nili labúu ñooyibu balach nili balach ni ma bibich. Stipnés buñ labúu ñoo guirá ndeʼ, portín diti malni. Né la Biblia ná que vino nacni xcalrrascad Dios né ronyni «que guibaladx xcalnabany buñgudxlio» (Sal. 104:14, 15). Ná scú, nazareos né guidopy xcalnabanyibu goleʼyibu guirá ndeʼ tiplad. c
Xomodca nazareos, ¿noʼno puext par gonyno sacrificios la? (Bibiʼ párrafos 4 a 6).
5. ¿Xí sacrificios buny Madián né Marcela, né xigony?
5 Xomodca nazareos, lóono láaca ronyno sacrificios par tzodieʼno ló xchiin Jehová. Guibiʼno ejemplo xtuny Madián né Marcela. d Galtzeʼel reʼ de Colombia natzatzdiguieʼ bibanyibu. Madián bunybu gan xiroʼgolu bidxiich, por ngú golésyibu lainy toib yoʼ móz. Per, goniiny ñonyibu más ló xchiin Jehová, por ngú goloʼyibu guicyibu natzaʼyibu mod nabanyibu. Layibu náyibu: «Ma diti tampa bunydo gaxt, goylésdo lainy toib yoʼ más mitien né bitoʼdo xcamiondo». Diti noʼ chú buny lafuers Madián né Marcela par ñonyibu guirá sacrificios reʼ, bunyibu láani par ñapyibu más tiemp par naniʼyibu xtiitz Dios. Nigolú rabaladxyibu por ni bunyibu ndeʼ.
6. ¿Xigony lóono ni nacno cristianos ronyno sacrificios ló naareʼ?
6 Lóono ni nacno cristianos rioladxno gonyno sacrificios par labúu gonyno más xchiin Jehová (1 Cor. 9:3-6). Jehová diti rony lafuers lóono par gonyno guirá sacrificios reʼ, né cós ni rasianno diti malni. Por ejemplo, tipnés herman rasianyibu lidxyibu, toib dxiin galán o dada ma diti rapyibu nimalien. Tipnés herman ragoʼyibu guicyibu diti gonyibu galtzeʼel nimaca o diti tzoʼ xiinyibu órni suusipa bunyibu galtzeʼel. Stipnés riee ro caquiin más herman par guiniʼ xtiitz Dios, ná rasianyibu xfamilyibu né ximigyibu. Xidal de lóono noʼno puext gonyno guirá sacrificios reʼ, portín raniiny guidudyno Jehová ni más rasac ni napno. Labúu gapno confianz que guirá sacrificios ni ronyno rasacni par Jehová, ná xiroʼni o mitienni (Heb. 6:10).
GAPNO BALORY PAR DITI GACNO XOMOD STIPNÉS BUÑ
7. ¿Xigony góc nagan par nazareo ñony cumplirbu ni ma goniʼbu? (Números 6:5; láaca bibiʼ dibuj).
7 (Bíil Números 6:5). Por voto ni bunyibu, nazareos diti labúu bigaa guitzguicyibu. Modcu bislooyibu que gopyibu respet galmandary ni nap Jehová. Pal toib israelita ma sané xiroʼ tiemp xomod nazareo nagaʼgolu guitzguicbu né buñ nabiʼ láabu. Per pal buñ ni nagoo láabu ñacné, diti nasac naganbu ñony cumplirbu né voto xtunybu. Per nabanni, goyoʼ tiemp ló xtzú israelitas ro buñ diti gopyibu respet nili gosac par layibu nazareos. Por ejemplo, ló xtzú profeta Amós, israelitas apóstatas bidudyibu «vino par ñeʼ nazareos», sigory par diti ñony cumpliryibu né voto ni bunyibu (Amós 2:12). Goyoʼ ór góc naganni par layibu diti ñacbu xomod stipnés buñ né biquiinni balory.
Nazareos non ñapyibu balory par diti ñacyibu xomod stipnés. (Bibiʼ párrafo 7).
8. ¿Xí láani bioladxlo de experiencia xtuny Benjamin?
8 Né xcalrracné Jehová, lóono láaca labúu gapno balory par diti gacno xomod stipnés buñ, ná pal wal radzuibybienno né ratoyno. Guibiʼno ni gosaclóo Benjamin, toib Testigo de 10 íz ni rabés gudx Noruega. Lainy yolayscuel ro goyeebu, góc toib lanii ro buny apoyaryibu Ucrania ni cadudy ló guerr. Guirá mbiox non ñony cantaryibu toib canción né ñocyibu lairy ni nac xcolor bandera xtuny gudx Ucrania. Par diti ñoʼ Benjamín ló laniicu, bunybu pensary que más galán ñaʼanbu sit. Per toibtica mextra bibiʼ né bicarudx láabu: «¡Godaʼ reʼ né lóodo! ¡Naguelsi, cabésdo looy!». Gopbu balory né bibigaxbu ronoʼ xomextrabu né goniʼbu: «Naʼ diti rioʼya ló lanii xtuny partid. Né xidal testigos xtuny Jehová noʼyibu press por ni diti rieeyibu guerr». Xomextrabu diti bikíil láabu más. Per xcompañerbu gonabdiitz láabu xigony diti cayony cantarbu. Benjamin bidzuiby né goniiny nibdxaʼbu. Ná scú, gopbu balory né gochbu xcompañerbu ni gochbu xomextrabu. Después, gochbu bixiosbu né xinaʼbu que Jehová gocné láabu par buny defenderbu fe xtunybu.
9. ¿Ximod labúu coʼ nakitno xcalnabany Jehová?
9 Órni rasobno Jehová, buñ ni nagoo lóono radudyibu cuent que diti nacno xomod stipnés. Raquiinni balory par guinino que nacno testigos xtuny Jehová ló dxiin o lainy yolayscuel. Né pensary mal né cós mal ni rony buñ sacxiroʼrani más, por ngú sasac naganno guibanyno mod ná la Biblia né gaibyno diitz sacró de Gobierno xtuny Dios a stipnés buñ (2 Tim. 1:8; 3:13). Per, non guisetnaladxno que órni rapno balory par diti gacno xomod buñ ni diti rony ni ná Jehová, ragoʼ nakitno xcalnabanybu (Prov. 27:11; Mal. 3:18).
COʼNO JEHOVÁ PRIMER LAGARY
10. ¿Xigony góc nagan par nazareos nasobyibu mandary ni sieed ló Números 6:6, 7?
10 (Bíil Números 6:6, 7). Nazareos diti labúu bibigaxyibu ronoʼ gueʼet. Ralooyni ndeʼ diti gocni toib sacrificio xiroʼ. Per, par toib nazareo labúu ñac naganni, pal toibtica xfamilbu ñaity. ¿Xigony? Portín, par nasobyibu costumbre né mod bigach gueʼet dzúcu, non ñoʼyibu gax de gueʼetcu (Juan 19:39, 40; Hech. 9:36-40). Por ngú, nazareos diti labúu bisobyibu xidal costumbres reʼ. Órni buny cumpliryibu né voto ni bunyibu ná góc naganni né bioʼobni layibu, bislooyibu que gopyibu toib fe dxich. Per diti goyoʼyibu toibyibu, nandxichno que Jehová guirá ór bidudy fuers ni biquiinyibu.
11. ¿Xí láani non coʼno guicno órni tzoʼ galnagan lainy xfamilno? (Láaca bibiʼ dibuj).
11 Lóono ni nacno cristianos nainy gony cumplirno né guidopy xcalnabanyno dedicación ni ma bunyno Jehová. Ndeʼ riendxichni ló guirá ni ragoʼno guicno gonyno né mod rony reglarno galnagan ni racalóno lainy xfamilno. Ronyno rutirigaʼlni lóono par gony cumplirno né responsabilidad ni napno lainy xfamilno, per ragoʼno Jehová primer lagary diti xfamilno (Mat. 10:35-37; 1 Tim. 5:8). Sioʼ ór ro saquiin gonyno tipnés sacrificios par tzoʼ nakit Jehová né lóono, ná diti tzoʼno sacró né xfamilno.
¿Noʼno puext coʼno Jehová primer lagary, dada órni cacalóno galnagandaʼ la? (Bibiʼ párrafo 11). e
12. Órni goyoʼ galnagan lainy xfamil Alexandru, ¿xí láani bunybu, né xí láani diti bunybu?
12 Guibiʼno ni gosaclóo Alexandru né tzeelbu, Dorina. Órni ma sanéyibu tobiz de goloʼ casuidyibu la Biblia, Dorina ma diti goniiny nasuidy né goniiny láabu que Alexandru ñony scúca. Per Alexandru gochbu tzeelbu né diitz nadaʼa que nárabu guisuidybu. Per tzeelbu diti bioladx láani né goniiny ñony lafuersbu Alexandru par ma diti nasuidy ni ná la Biblia. Ná láabu biyopybu mod ñembu tzeelbu, góc naganni. Goyoʼ ór, órni Dorina goniʼ mal né bunynaa láabu, bunybu pensary que más galán ma diti nasuidybu la Biblia. Ná scú, goloʼbu Jehová primer né godabiobu tzeelbu né galrronladx né respet. Conforma godudy íz, mod bunybu né mod gócbu bichiinni Dorina par nasuidy la Biblia stoib né nacacuent galnigolú. (Bibiʼ video ni laa, Alexandru né Dorina Văcar: «Galnadxiʼ nacni paseins né natzaayni», de sección «Ni rasuidy la Biblia ratzaʼ mod nabany buñ», ló jw.org).
13. ¿Ximod labúu guislooyno que nadxiʼno Jehová né xfamilno?
13 Jehová bisaʼ famil, né nainy láabu que famil tzoʼ nakit (Efes. 3:14, 15). Pal nainy tzoʼ nakitno raquiin gonyno mod racladx Jehová. Láabu rabiʼbu guirá sacrificios ni ronyno par gonyno xchiimbu né ganno xfamilno, gandxiʼno né gapno respet layibu né guirá ngú rasacni par láabu (Rom. 12:10).
GONY ANIMARNO SAʼNO PAR GACNO XOMOD NAZAREOS
14. ¿Chú layibu non gony animarno más?
14 Guiráno ni raniiny gonyno xchiin Jehová nigoreʼ, non tzoʼno puext gonyno sacrificios por galnadxiʼ. Rioʼ ór rac naganni. ¿Ximod labúu gony animarno saʼno par gonyno sacrificios por Jehová? Labúu gonyno láani né xtiitzno (Job 16:5). ¿Noʼ toibtica herman lainy congregación xtunylo ni cayopy mod guibany más senciy par gapbu más tiemp gonybu xchiin Jehová la? ¿Rimbulo toib mbioxhlas ni riee scuel ni caslooy né balory que diti toibsi midid nacbu que xcompañerbu ná naganni la? ¿Rasetnaladxlo toib herman o toib buñ ni casuidy la Biblia ni xfamil cacaló láabu por ni cayonybu ni ná Jehová la? Órni labúuni nimaca gony animarno né gaibyno layibu balaati rasac par lóono balory ni raslooyibu né ni ronyibu rutirigaʼlni layibu par gonyibu ni ná Jehová (Filem. 4, 5, 7).
15. ¿Xí láani ma buny tipnés herman par gacnébu stipnés herman ni nodieʼ ló xchiin Jehová?
15 Rioʼ ór labúu gacnéno herman ni nodieʼ ló xchiin Jehová (Prov. 19:17; Heb. 13:16). Ngú ni buny toib herman golien ni rabés gudx Sri Lanka. Biaʼpy ló bidxiich ni radudy gobierno láabu, né goloʼbu guicbu gacnébu chop precursoras mbioxhlas ni cacaló galnagan xtol bidxiich par ñacrayibu precursoras. Por ngú guirá beʼo goleʼbu tlaʼ bidxiich par gocnébu chop hermanas reʼ naguiix facturas xtuny teléfono. ¡Sacró mod buñ hermana reʼ!
16. ¿Xí rasuidyno de ejemplo xtuny nazareos?
16 ¡Ma bisuidyno xidal cós sacróyen de Nazareos! Per láaca noʼ ni rasuidyno de Bixiosno ni noʼ guibá, Jehová. Nanbu que né guidopy xcalnabanyno nainy gonyno ni nábu né que noʼno puext gonyno sacrificios par gony cumplirno né dedicación ni ma bunyno. Láaca radudybu oportunida lóono par guislooyno balaati nadxiʼno láabu (Prov. 23:15, 16; Mar. 10:28-30; 1 Juan 4:19). Ejemplo xtuny nazareos raslooyni lóono que Jehová rabiʼ guirá sacrificios ni ronyno par gonyno xchiimbu né que nigolú rasacni par láabu. Por ngú, gonyrano xchiimbu né guidudyno ni más rasac ni napno né guidopy xcalnabanyno.
¿XÍ LÁANI NACAPYLO?
-
¿Ximod bislooy nazareos que goyoʼyibu puext ñonyibu sacrificios né que gopyibu balory?
-
¿Ximod labúu gony animarno saʼno par gacno xomod nazareos?
-
¿Xí rasuidyno de Jehová por voto ni buny nazareos?
CANCIÓN 124 Siempre fieles y leales
a Ná Jehovápa golú tipnés israelitas par ñac nazareos, casi guiráyibu stipláacayibu bunyibu voto xtunyibu (bibiʼ cuadriyen ni laa « Nazareos ni golú Jehová»).
b Rioʼ ór ló publicaciones xtunyno radzakni nazareos né xpiin Dios ni nodieʼ ló xchiimbu. Per ló artículo reʼ sanino de guirá xpiin Jehová ni labúu gac xomod nazareos.
c Ralooyni voto ni buny nazareos diti godiñani ñonyibu toib tarié o toib dxiin ni láasiyibu labúu ñonyibu.
d Bibiʼ artículo ni laa «Elegimos una vida sencilla», ni rarecaa ló sección «Experiencias ni nap testigos xtuny Jehová», ló jw.org.
e MOD RAREXA DIBUJ NÉ RETRAT: Por voto ni bunybu, toib nazareo diti labúu goyeebu bicachbu xfamilbu, por ngú sagaʼbu guic yoʼ cabiʼbu ximod sané buñ gueʼetcu par guigach.
