1. Pouki nou bizwen djid Jéhova?

 IMAJINÉ ou pèd an gwan bwa-a. Tout oliwon’w sé danjé tèl kon bèt féwòs, sèpan, plan ki ka ba’w gwatèl èk mizi gwo kaskou. Ès ou pa té kay byen kontan pou jwenn épi on moun ki byen konnèt plas-la, ki té sa djidé’w hòd danjé, èk édé’w wivé dèstinasyon’w? Absoliman! Jòdi jou, latè-a menm kon gwan bwa sala. I plen épi an chay danjé ki sa donmajé wilasyon nou épi Jéhova. Mé nou ni on moun ki sa djidé nou hòd sé danjé sala! Èk moun sala sé Jéhova. I sé pli mèyè djid-la èk i sa édé nou wivé dèstinasyon nou. Èk kisa ki dèstinasyon nou? Dèstinasyon nou, sé lavi étonnèl an latè nèf-la.

2. Koumannyè Jéhova ka djidé nou jòdi jou?

² Koumannyè Jéhova ka djidé nou jòdi jou? Pwèmyéman, i ka sèvi pawòl li ki an Bib-la pou djidé nou. Dézyenmman, i ka sèvi lézonm i chwazi pou djidé nou. Pou ègzanp, lè i vini pou moun Jéhova chwazi, Bib-la di i ka sèvi “Sèvant-lan ki ni lèspwi épi ki obéyisan-an” (ében nou sa di, èslav fidèl-la) pou ban nou diwèksyon ki sa édé nou fè bon disizyon. (Maf. 24:45) Jéhova ka osi sèvi lòt nonm ki kapab pou djidé nou. Pou ègzanp, sé ansyen-an pou sékyout-la èk sé ansyen-an an sé kongwigasyon-an, ka ban nou ankouwajman èk enstwiksyon pou édé nou aji épi tan ki difisil. Nou byen kontan Jéhova ka djidé nou tèlman byen an tan difisil sala avan bout-la wivé! Paski, sa ka édé nou wèsté jan Jéhova. Konsa, nou sa enjwi lavi apwézan èk pou tout tan.

3. Kisa nou kay diskité an atik sala?

³ Kanmenm, délè i pé difisil pou nou swiv djid Jéhova sitou lè nou sav sé nonm-lan i ka sèvi-a pou ban nou djid pa pawfé. Mé pouki? Pitèt yo ba on diwèksyon nou pa dakò épi. Èben pitèt sa yo ka di nou pa ka fè sans pou nou. Alò, nou pé katjilé: ‘Awa, sé pa Jéhova ki ba yo diwèksyon sala.’ Lè nou ka santi kon sa, sé pou nou fòtifyé konfyans nou ki sé Jéhova ki ka djidé pèp li. Épi lè nou swiv djid li, nou kay twapé an pil bennédiksyon. Pou édé fòtifyé konfyans nou, annou konsidiwé twa (3) bagay an atik sala. Yonn (1), mannyè Jéhova té djidé pèp li an tan pasé. Dé (2), mannyè Jéhova ka djidé nou jòdi jou. Èk twa (3), bennéfis-la nou kay twapé lè nou swiv djid Jéhova.

KI MANNYÈ JÉHOVA TÉ DJIDÉ NASYON IZWAYÈL?

4-5. Ki mannyè Jéhova moutwé i té ka sèvi Moziz pou djidé jan Izwayèl? (Gadé pòtwé-a.)

⁴ Jéhova té apwenté Moziz pou tiwé jan Izwayèl an péyi Éjip. Èk i té bay sé jan Izwayèl-la pwèv yo té sa wè pou moutwé yo, sété li menm ki té ka sèvi Moziz pou djidé yo. Pou ègzanp, i té ka sèvi on pilotwi nwaj pou djidé yo an lajounen-an èk on pilotwi difé pou djidé yo an lannwit-la. (Ègz. 13:21) Épi Moziz té swiv sé pilotwi sala, èk i mennen’y épi sé jan Izwayèl-la bò Lanmè Wouj-la. Mé lè yo wè Féro èk lawmé’y ka kouwi dèyè yo, èk Lanmè Wouj-la douvan yo, yo té kwè la pa té ni pyès koté pou yo chapé èk Moziz té mennen yo la pou yo mò. Alò, yo té kwè Moziz té fè on gwo lèwè pou mennen yo bò Lanmè Wouj-la. Mé ès sa té vwé? Mé non. Sa pa té pyès lèwè, paski sété Jéhova ki té sèvi Moziz pou mennen pèp li la. (Ègz. 14:2) Èk Jéhova délivwé yo adan on mannyè ki fè yo wèsté épi bouch yo gwan ouvè!​—Ègz. 14:26-28.

⁵ Apwé sa, pou kawant (40) lanné, Moziz kontiné swiv pilotwi nwaj-la Jéhova té ka sèvi pou djidé pèp li an savann sèk-la. a Épi pou on tan, Jéhova fè pilotwi nwaj sala wèsté anho tant Moziz koté tout sé jan Izwayèl-la té sa wè’y. (Ègz. 33:7, 9, 10) Èk Jéhova té ka palé ba Moziz hòd pilotwi sala. Épi lè i té fini palé ba Moziz, Moziz té ka di sé moun-lan tout sa Jéhova té di’y. (Sam 99:7) Konsa, sé jan Izwayèl-la té sa wè a klè, Jéhova té ka sèvi Moziz pou djidé yo.

6. Kisa ki ka moutwé jan Izwayèl pa té ka aksèpté djid Jéhova? (Limowo 14:2, 10, 11)

⁶ Malèwèzman, an chay an sé jan Izwayèl-la pa té ka aksèpté ki Jéhova té ka sèvi Moziz pou wépwézanté’y. (Li Limowo 14:2, 10, 11.) Èk jou apwé jou, yo wifizé aksèpté Jéhova té ka sèvi Moziz pou djidé yo. Annékòz di sa, Jéhova pa té pèwmité sé sa ki té wébélé kont li-a pou antwé an tè pwonmèt-la. Konsa, jennéwasyon sala pèd bennédiksyon Jéhova.​—Lim. 14:30.

7. Ba yonndé ègzanp di moun ki té swiv djid Jéhova. (Limowo 14:24) (Gadé pòtwé-a osi.)

⁷ Bon. Sé pa tout jan Izwayèl ki té wifizé swiv djid Jéhova. La té ni adan di yo ki té ka swiv djid li. Pou ègzanp, Jéhova di: ‘Kélèb kontiné swiv mwen épi tout tjè’y.’ (Li Limowo 14:24.) Konsa, Bondyé wékonpansé Kélèb, èk i jis kité’y chwazi koté-a i té vlé wèsté an tè pwonmèt-la. (Jòch. 14:12-14) Bon. La té ni on lòt jennéwasyon di jan Izwayèl ki té swiv djid Jéhova. Anfen, lè Jéhova apwenté Jòchwa pou pwan plas Moziz pou’y djidé yo, yo té ni gwan wèspé pou Jòchwa diwan tout lavi’y. (Jòch. 4:14) Èk an wézilta di sa, yo té ka swiv djid Jéhova èk Jéhova benni yo èk ba yo tè pwonmèt-la.​—Jòch. 21:43, 44.

8. Ki mannyè Jéhova té djidé pèp li apwé lanmò Jòchwa? (Gadé pòtwé-a osi.)

⁸ Apwé lanmò Jòchwa, Jéhova apwenté jij pou djidé pèp li. Apwé sa, diwan tan-an sé wa-a té ka kondwi, Jéhova apwenté pwòfèt pou djidé pèp li. Sé wa-a ki té fidèl té swiv konsèy sé pwòfèt-la. Pou ègzanp, Wa David aksèpté kowijman hòd pwòfèt Nafann. (2 Sm 12:7, 13; 1 Kw. 17:3, 4) Wa Jéhòchafat swiv djid pwòfèt Jéhazayèl épi i ankouwajé Jouda pou ‘mété lafwa yo an pwòfèt Bondyé.’ (2 Kw. 20:14, 15, 20) Lè Wa Hèzèkaya té ni tèt cho, i mandé pwòfèt Izaya pou èd. (Izay. 37:1-6) Épi chak fwa sé wa sala té swiv djid Jéhova, Jéhova té ka benni yo èk pwotéjé pèp li. (2 Kw. 20:29, 30; 32:22) Alò i té sipozé a klè pou yo tout, sé Jéhova ki té ka sèvi sé pwòfèt li-a pou djidé pèp li. Mé an chay an sé wa-a èk sé jan Izwayèl-la pa té kouté sé pwòfèt-la.​—Jér. 35:12-15.

KI MANNYÈ JÉHOVA TÉ DJIDÉ SÉ KWITYEN-AN AN PWÈMYÉ SYÈK-LA?

9. An pwenmyé syèk-la, ki moun Jéhova té sèvi pou djidé sé kwityen-an? (Gadé pòtwé-a osi.)

⁹ An pwenmyé syèk-la, Jéhova établi kongwigasyon Kwityen-an. Mé ki mannyè i té djidé sé Kwityen sala? Èben, i té bay Jézi ‘lotowité anho kongwigasyon-an’. (Èfés. 5:23) Mé Jézi pa té ni pou alé palé bay chak sé disip li-a pou di yo sa pou fè. I té ka sèvi sé zapòt-la èk sé ansyen-an an Jérouzalèm pou djidé yo. (Twav. 15:1, 2) Osi, sé zapòt-la èk sé ansyen-an an Jérouzalèm apwenté lòt ansyen pou djidé sé kongwigasyon-an.​—1 Tèsa. 5:12; Titòs 1:5.

10. (a) Ès sé Kwityen-an an pwenmyé syèk-la té aksèpté djid sé zapòt-la èk sé ansyen-an? (Twav. 15:30, 31) (b) An tan pasé, pouki adan moun pa té ka kwè Jéhova té ka sèvi lézonm pou djidé pèp li? (Osi, gadé enfòmasyon-an anba sijé-a: “ Pouki Adan Moun Pa Ka Kwè Jéhova Ka Sèvi Lézonm Pou Djidé Pèp Li?.”)

¹⁰ Ès sé Kwityen-an an pwenmyé syèk-la té aksèpté djid sé zapòt-la èk sé ansyen-an? Absoliman! Paski an pil di yo té byen kontan lè yo wésouvwé sé diwèksyon-an hòd yo èk yo té byen kontan pou apliké sé diwèksyon-an. Anfen, Twavay 15:31 di nou: “Yo té kontan an chay pou mannyè sé zapòt-la té ankouwajé yo.” (Li Twav. 15:30, 31.) Mé, nou pé mandé kò nou, ‘Jòdi jou ki mannyè Jéhova ka djidé pèp li?’

KI MANNYÈ JÉHOVA KA DJIDÉ NOU JÒDI JOU?

11. Bay on ègzanp ki ka moutwé Jéhova ka osi sèvi lézonm pou djidé pèp li an tan nou.

¹¹ Jéhova ka kontiné djidé pèp li jòdi jou. I ka sèvi Pawòl li èk gason’y ki ni lotowité anho kongwigasyon-an pou fè sa. Kèstyon-an sé sa: Ès nou ka wè Bondyé ka osi sèvi lézonm i chwazi pou djidé nou? Mé wi! Pou ègzanp konsidiwé sa ki té fèt apwé lanné yon mil ywit san swasant dis (1870). A lè sala, Charles Taze Russell èk sé konpany li-a koumansé konpwann ki, lanné mil nèf san katòz (1914) kay on lanné ki té kay byen enpòtan. Sa sé lanné Wéyòm Bondyé-a té kay établi. (Dann. 4:25, 26) Yo vini sav sa paski yo té ka fè wichach an Bib-la èk yo té ni konfyans-lan ki pwofèsi ki an Bib-la té kay vini vwé. Bon. Ès Jéhova té ka djidé yo an wichach-la yo té ka fè an Bib-la? Absoliman! I té a klè Bondyé té ka djidé yo, paski tout sa Jézi di ki té kay fèt lè’y koumansé kondwi an wéyòm li, koumansé fèt an latè-a an lanné mil nèf san katòz (1914). Pou ègzanp, Pwèmyé Gwo Ladjè-a koumansé an menm lanné sala. Apwé sa, la té ni mové twanblanntè, lafen èk tout sòt diféwan kalté maladi menm kon Bib-la té di. (Louk 21:10, 11) Alò, nou sa vwéman wè, Jéhova té ka sèvi sé nonm sala, ki té ka étidyé Bib-la, pou djidé pèp li.

12-13. Diwan Dézyenm Gwo Ladjè-a, kisa sé fwè-a ki té ka pwan douvan fè pou agwandi twavay pwèchman-an?

¹² Konsidiwé osi, sa ki té fèt diwan Dézyenm Gwo Ladjè-a. Sé fwè-a ki té an pwensipal ofis-la étidyé sa ki té ékwi an Wévélasyon 17:8. Yo vini konpwann ki Anmagèdonn pa té kay koumansé diwan Dézyenm Gwo Ladjè-a. Anfen, yo vini konpwann, apwé ladjè-a, la té kay ni on tan lapé épi Tèmwen Jéhova té kay pwéché bay pli moun toujou. Konsa, sé fwè-a ki té ka pwan douvan koumansé Watchtower Bible College of Gilead b pou entwennen misyonnè pou pwéché èk enstwi moun an diféwan plas oliwon latè-a. Èk an zyé lézonm, i té ka gadé akonmsi sa pa té ka fè pyès sans paski ladjè-a p’òkò té fini. Wannman, ògannizasyon-an voyé sé misyonnè-a diféwan plas owon latè-a pou pwéché. Bon. Mi on lòt bagay èslav fidèl-la fè. Yo koumansé on lékòl spésyal c an tout kongwigasyon pou édé sé pwoklanmatè-a pou pwéché èk enstwi pli byen. Épi sa té kay pwépawé pèp Jéhova pou twavay-la ki té kay fèt an tan pou vini.

¹³ Jòdi-a, nou ka wè a klè, Jéhova té ka djidé sé pèp li-a an tan difisil sala. Alò, dépi Dézyenm Gwo Ladjè-a, pèp Jéhova ja pwéché libman an plizyè diféwan péyi épi an pil moun ja vini konnèt Jéhova. Wi, jik jòdi pèp Jéhova ka kontiné pwéché oliwon latè-a.

14. Pouki nou sa mété konfyans nou an diwèksyon-an ògannizasyon Jéhova èk sé ansyen-an ka bay? (Wévélasyon 2:1) (Gadé pòtwé-a osi.)

¹⁴ Jòdi-a, manm Pwensipal Konmité-a ka kontiné gadé pou djid Jézi. Yo vlé bay diwèksyon ki ka wiflèkté lidé Jéhova èk Jézi. Èk yo ka sèvi sé ansyen pou sékyout-la èk sé ansyen-an an kongwigasyon-an pou bay sé kongwigasyon-an diwèksyon. d Jézi ka tjenbé sé ansyen-an ki annonté-a an lanmen dwèt li. (Li Wévélasyon 2:1.) Kanmenm, sé ansyen-an pa pawfé. Konsa, délè yo ka fè lèwè menm kon Moziz, Jòchwa èk té zapòt-la té fè. Mé Jéhova ka kontiné sèvi yo. (Lim. 20:12; Jòch. 9:14, 15; Ronm 3:23) Konsa, nou ka wè a klè ki Jézi ka sèvi èslav fidèl-la épi sé ansyen-an, èk i kay kontiné sèvi yo “pou jis an bout latè-a.” (Maf. 28:20) Alò, nou ni bon wézon pou mété konfyans nou an djid-la Jézi ka bay sé moun-lan i chwazi-a pou pwan douvan.

NOU KA TWAPÉ BENNÉFIS LÈ NOU SWIV DJID JÉHOVA

15-16. Kisa nou apwann an èspéyans Andy èk Robyn? Èk an èspéyans Marcia?

¹⁵ Lè nou kontiné swiv djid Jéhova nou ka twapé bennéfis apwézan. Pou ègzanp, Andy èk Robyn swiv ankouwajman pou tjenn lavi yo senp. (Mafyou 6:22.) Kisa ki té wézilta-a? Yo té sa volonté pou édé bati Sal Wéyòm, èk osi twavay asou diféwan pwojé. Robyn di: “Délè, adan sé kay-la koté nou té ka wèsté-a té tèlman piti, nou pa té menm ni lè pou on tjwizin. Épi pa sa tousèl. Mwen sé on moun ki enmen tiwé pòtwé, épi mwen té ni an chay ikipman. Épi mwen té ni pou vann tout. Èk sa fè mwen pléwé. Mé menm kon madanm Abrahanm, Sara, mwen té ditèminé pou gadé douvan èk pa gadé dèyè.” (Hib. 11:15) Kèstyon-an sé: Ès Andy èk Robyn té twapé bennéfis? Mi sa Robyn di: “Nou tèlman kontan paski nou sav nou ka ba Jéhova tout sa nou ni. Lè mwen èk mawi mwen fè twavay-la Jéhova ban nou pou fè sa ka ban nou an ti lidé mannyè lavi kay yé an latè nèf-la.” Andy osi dakò, épi i di: “Nou ni lakontanman, paski nou ka ba Jéhova tout tan nou èk tout fòs nou.”

¹⁶ Ki lòt mannyè nou sa twapé bennéfis lè nou swiv djid Jéhova? Annou gadé ègzanp Marcia. Apwé i fini lékòl, i té vlé swiv ankouwajman-an pou vini on piyonnè. (Maf. 6:33; Ronm 12:11) Marcia di: “Mwen té sa alé gwo lékòl pou kat (4) lanné san mwen péyé dé sou. Mé, mwen té vlé fè pli bay Jéhova. Konsa, pito mwen aksèpté ofè-a, mwen chwazi pou apwann on léta ki sa édé mwen fè on ti lajan pou mwen sa piyonnè. Sa sété pli mèyè disizyon-an mwen janmen fè. Mwen kontan mwen sé on piyonnè. Épi paski mwen té sa désidé ki kantité twavay mwen kay twavay, mwen ni tan pou mwen sa édé an Bèfèl, épi pou fè an pil lòt bagay pou Jéhova.”

17. Ki lòt bennéfis nou kay twapé lè nou kontiné swiv djid Jéhova? (Izaya 48:17, 18)

¹⁷ Ògannizasyon Jéhova ka ban nou konsèy ki ka pwotéjé nou. Pou ègzanp, yo ka vèti nou pou pa vivi dèyè lajan, épi pou nou pa fè bagay ki ka annékòz nou pou kasé lwa Jéhova. Alò, sa sé on bennédiksyon pou nou, lè nou swiv djid Jéhova; paski nou kay ni on konsyans ki nèt, èk sa kay édé nou évité an chay tèt cho. (1 Tim. 6:9, 10) A wézilta di sa, nou kay sa sèvi Jéhova épi tout tjè nou, èk sa kay ban nou an pil lajwa èk lapé.​—Li Izaya 48:17, 18.

18. Pouki ou ditèminé pou kontiné swiv djid Jéhova?

¹⁸ Nou pa ni pyès dout, Jéhova kay kontiné sèvi lézonm i chwazi pou djidé nou diwan gwan twibilasyon-an èk diwan mil lanné-a Jézi kay kondwi-a. (Sam 45:16) Konsa, sé pou nou chonjé, i kay pli ézé pou nou swiv djid Jéhova a lè sa-a si nou ja ka fè sa apwézan. Fwè èk sè, annou toujou swiv diwèksyon Jéhova ki sòti hòd Pawòl li, èk sé moun-lan i chwazi. (Izay. 32:1, 2; Hib. 13:17) Kon nou té ja di, latè sala menm kon on gwo bwa ki plen danjé, èk Jéhova sé pli mèyè djid-la. Konsa, nou ni wézon pou konfyé Jéhova. Épi nou ka swiv li èk tout tjè nou, paski nou sav i kay djidé nou hòd népòt bagay ki sa donmajé wilasyon nou épi’y. Èk i kay djidé nou pou dèstinasyon nou​—lavi étonnèl an latè nèf-la.