1. Нәјә ҝөрә Јеһованын бизә бәләдчилик етмәсинә еһтијаҹымыз вар? Нүмунә чәкин.

 ТӘСӘВВҮР един ки, мешәдә азмысыныз. Бура чох тәһлүкәлидир. Әтрафда вәһши һејванлар, хәстәлик дашыјан һәшәратлар, зәһәрли биткиләр, дашлы-гајалы јерләр вар. Амма әҝәр јанынызда буралары јахшы таныјан бәләдчи олса, үрәјиниз раһат олар. Чүнки о, тәһлүкәләрин һарада олдуғуну јахшы билир вә сизә онлардан јан кечмәјә көмәк едә биләр. Јашадығымыз бу дүнјаны да һәмин мешәјә бәнзәтмәк олар. Бурада руһани сағламлығымыза зәрәр јетирәҹәк чохлу тәһлүкәләр вар. Амма нә јахшы ки, камил бәләдчимиз Јеһова бизимләдир. О бизи бу тәһлүкәләрдән јан кечирәрәк мәнзилбашына — әбәди һәјата доғру апарыр.

2. Јеһова бизә неҹә јол ҝөстәрир?

² Јеһова бизә дүзҝүн јолу һансы үсулларла ҝөстәрир? Ән башлыҹасы, Кәламы олан Мүгәддәс Китаб васитәсилә. Бундан әлавә, О, јер үзүндәки хидмәтчиләри васитәсилә дә бизә бәләдчилик едир. Мәсәлән, «садиг вә ағыллы нөкәр» бизә руһани гида верир, бунун да сајәсиндә биз дүзҝүн гәрарлар верә билирик (Мәт. 24:45). Һәмчинин Јеһова диҝәр баҹарыглы гардашлар васитәсилә бизә бәләдчилик едир. Мәсәлән, рајон нәзарәтчиләринин вә јығынҹагдакы ағсаггалларын дәстәји, вердикләри ҝөстәришләр бизә чәтинликләрә таб ҝәтирмәјә көмәк едир. Шүкүрләр олсун ки, сона аз галан бу чәтин дөврдә Јеһова бизә ҝөзәл бәләдчилик едир. Бунун сајәсиндә Онунла достлуғумузу горујуруг вә һәјата апаран јолдан сапмырыг.

3. Бу мәгаләдә нә һагда данышаҹағыг?

³ Амма бәзән Јеһованын гејри-камил инсанлар васитәсилә вердији ҝөстәришләрә табе олмаг чәтин олур. Бәлкә дә верилән ҝөстәриш үрәјимизҹә дејил, јахуд да бизә мәнтигли ҝәлмир. Фикирләширик ки, Јеһова белә бир ҝөстәриш вермәз. Бу ҹүр мәгамларда  бир шејә әмин олмалыјыг: халгына Јеһова рәһбәрлик едир вә Онун ҝөстәрдији јолла ҝетмәк бизим хејримизәдир. Бәс буна әминлијимизи неҹә артыра биләрик? Бунун үчүн ҝәлин үч мәгамы арашдыраг: 1) Јеһова кечмишдә халгына неҹә јол ҝөстәрирди? 2) О бу ҝүн бизә неҹә јол ҝөстәрир? 3) Онун ҝөстәрдији јолла ҝетмәк бизә неҹә фајда ҝәтирир?

ЈЕҺОВА ИСРАИЛ ХАЛГЫНА НЕҸӘ ЈОЛ ҜӨСТӘРИРДИ?

4, 5. Јеһова Исраил халгына Муса васитәсилә рәһбәрлик етдијини неҹә ҝөстәрмишди? (Шәклә бахын.)

⁴ Јеһова Исраил халгыны Мисирдән чыхармаг үчүн Муса пејғәмбәри тәјин етмишди. О, халгын буна әмин олмасы үчүн сүбут да вермишди. Мәсәлән, Аллаһ онлара ҝүндүзләр булуд сүтуну, ҝеҹәләр исә алов сүтуну илә јол ҝөстәрирди (Чых. 13:21). Сүтун һара ҝедирдисә, Муса да онун архасынҹа ҝедирди. Беләҹә о вә халг ҝәлиб Гырмызы дәнизә чатды. Амма Мисир ордусу онлары тутмаг үчүн архаларынҹа дүшмүшдү. Буна ҝөрә дә халг тәләдә олдуғуну дүшүнүб бәрк горхду. Чүнки бир тәрәфләриндә дәниз вар иди, о бири тәрәфләриндә исә Мисир ордусу. Исраиллиләрин фикринҹә, Муса онлары бура ҝәтирмәклә сәһв етмишди. Амма бу, һеч дә белә дејилди. Јеһова Муса пејғәмбәр васитәсилә халгы биләрәкдән ора ҝәтирмишди (Чых. 14:2). Аллаһ онлары мөҹүзәви шәкилдә хилас етди (Чых. 14:26—28).

⁵ Муса пејғәмбәр сәһрада Аллаһын халгына бәләдчилик етмәк үчүн нөвбәти 40 ил әрзиндә дә булуд сүтунунун ҝөстәрдији јолла ҝетди a. Сүтун бир мүддәт Мусанын чадырынын үзәриндә дајанды. Бүтүн исраиллиләр ону ҝөрә билирди (Чых. 33:7, 9, 10). Јеһова сүтундан Муса илә данышырды, о да Аллаһын бујругларыны халга чатдырырды (Зәб. 99:7). Исраиллиләр ачыг-ашкар ҝөрә биләрдиләр ки, Јеһова онлара Муса васитәсилә бәләдчилик едир.

6. Исраиллиләр Јеһованын рәһбәрлијинә неҹә јанашмышдылар? (Сајлар 14:2, 10, 11).

⁶ Амма әфсуслар олсун ки, хејли исраилли бу ајдын факты данды. (Сајлар 14:2, 10, 11 ајәләрини охујун.) Онлар Јеһованын Мусаја вердији сәлаһијјәти дәфәләрлә рәдд етдиләр. Нәтиҹәдә, Јеһова һәмин нәслин Вәд едилмиш дијара дахил олмасына изин вермәди (Сај. 14:30).

7. Кимләр Јеһованын ҝөстәрдији јолла ҝедирди? (Сајлар 14:24). (Һәмчинин шәклә бахын.)

⁷ Амма исраиллиләрин арасындан Јеһованын бујругларына ујғун даврананлар да вар иди. Мәсәлән, Јеһова демишди: «[Калиб] ҹан-дилдән Мәнә итаәт едир». (Сајлар 14:24 ајәсини охујун.) Јеһова Калибә мүкафат верди, һәтта она Вәд едилмиш дијарда истәдији әразидә мәскунлашмаға изин верди (Јуш. 14:12—14). Сәһрада өлән исраиллиләрдән төрәјәнләр дә Јеһованын ҝөстәрдији јолла ҝедирди. Јушә Мусанын јеринә исраиллиләрин башчысы тәјин олунанда онлар Јушәјә «бүтүн өмрү боју еһтирам бәсләдиләр» (Јуш. 4:14). Нәтиҹәдә, Јеһова исраиллиләри мүкафатландырды, онлар Вәд едилмиш дијара дахил олдулар (Јуш. 21:43, 44).

8. Јеһова падшаһларын дөврүндә халгына неҹә истигамәт верирди? (Һәмчинин шәклә бахын.)

⁸ Илләр сонра Јеһова халгына рәһбәрлик етмәк үчүн һакимләр тәјин етди. Бундан сонра исә падшаһларын дөврүндә халга дүз јолу ҝөстәрмәк үчүн пејғәмбәрләр ҝөндәрди. Јеһоваја садиг олан падшаһлар пејғәмбәрләрин мәсләһәтинә гулаг  асырды. Мәсәлән, Натан пејғәмбәр Давуд падшаһа сәһвини ҝөстәрәндә Давуд буну тәвазөкарлыгла гәбул етмишди (2 Ишм. 12:7, 13; 1 Салн. 17:3, 4). Јәһушафат падшаһ Јаһәзил пејғәмбәрин дедији кими давранмышды вә халгы тәшвиг едиб демишди: «[Аллаһын] пејғәмбәрләринә инанын» (2 Салн. 20:14, 15, 20). Һизгијјә падшаһ чәтинликдә оланда көмәк үчүн Әшија пејғәмбәрә үз тутмушду (Әшј. 37:1—6). Падшаһлар һәр дәфә Јеһованын ҝөстәрдији јолла ҝедәндә хејир тапырдылар, халг да тәһлүкәсизликдә олурду (2 Салн. 20:29, 30; 32:22). Јеһованын Өз халгына пејғәмбәрләр васитәсилә бәләдчилик етдијини һеч кәс дана билмәзди. Буна бахмајараг падшаһларын әксәријјәти, еләҹә дә халг Јеһованын пејғәмбәрләрини гәбул етмәдиләр (Әрм. 35:12—15).

ЈЕҺОВА БИРИНҸИ ӘСРДӘКИ МӘСИҺИЛӘРӘ НЕҸӘ ЈОЛ ҜӨСТӘРИРДИ?

9. Јеһова биринҹи әсрдәки мәсиһиләрә кимләрин васитәсилә рәһбәрлик едирди? (Һәмчинин шәклә бахын.)

⁹ Ерамызын биринҹи әсриндә Јеһова мәсиһи јығынҹағы тәсис етди. Бәс О һәмин мәсиһиләрә неҹә рәһбәрлик едирди? Бунун үчүн Јеһова Иса Мәсиһи јығынҹағын башы тәјин етди (Ефес. 5:23). Амма Иса һәр шаҝирди илә бир-бир данышыб нә етмәли олдуғуну демирди. О, Јерусәлимдәки һәвариләр вә ағсаггаллар васитәсилә ҝөстәришләр верирди (Һәв. 15:1, 2). Һәмчинин һәр јығынҹаға ағсаггаллар тәјин олунмушду (1 Салон. 5:12; Тит. 1:5).

10. а) Биринҹи әсрдәки әксәр мәсиһиләр алдыглары ҝөстәришә неҹә мүнасибәт ҝөстәрмишди? (Һәвариләрин ишләри 15:30, 31). б) Нәјә ҝөрә бәзиләри Јеһованын тәјин етдији кәсләрин ҝөстәришләрини рәдд етмишди? (« Нәјә ҝөрә бәзиләри ајдын фактлары дандылар?» адлы чәрчивәјә бахын.)

¹⁰ Бәс һәмин мәсиһиләр алдыглары ҝөстәришләрә неҹә јанашырдылар? Әксәријјәт онлара ҹан-дилдән әмәл едирди. Һәтта баҹы-гардашлар мәктубдакы руһландырыҹы сөзләри ешидәндә севинмишдиләр. (Һәвариләрин ишләри 15:30, 31 ајәләрини охујун.) Ҝәлин ҝөрәк Јеһова халгына бу ҝүн неҹә јол ҝөстәрир.

ЈЕҺОВА БУ ҜҮН БИЗӘ НЕҸӘ ЈОЛ ҜӨСТӘРИР?

11. Јеһованын бизим дөврүмүздә рәһбәрлик едән кәсләрә истигамәт вердијини ҝөстәрән нүмунә чәкин.

¹¹ Јеһова бу ҝүн дә халгына рәһбәрлик  едир. О буну Кәламы вә јығынҹағын башы олан Мәсиһ васитәсилә едир. Бәс Јеһованын бу ҝүн халгына инсанлар васитәсилә дә рәһбәрлик етдијини ҝөстәрән сүбутлар вар? Әлбәттә. Мәсәлән, ҝәлин 1870-ҹи илләрдә баш верән һадисәләри јадымыза салаг. Чарлз Тејз Рассел вә онун мәсләкдашлары баша дүшдүләр ки, 1914-ҹү ил мүһүм ил олаҹаг, чүнки Аллаһын Падшаһлығынын гурулмасы илә бағлы пејғәмбәрлик јеринә јетәҹәк (Дән. 4:25, 26). Онлар Мүгәддәс Китаб пејғәмбәрликләрини арашдырараг бу гәнаәтә ҝәлмишдиләр. Онларын тәдгигатларына Јеһова истигамәт верирди? Сөзсүз! 1914-ҹү илдә дүнјада баш верән һадисәләр сүбут етди ки, Аллаһын Падшаһлығы һакимијјәтә башлајыб. Һәмин ил Биринҹи Дүнја мүһарибәси, ардынҹа да хәстәликләр, зәлзәләләр вә гытлыглар олду (Лука 21:10, 11). Доғрудан да Јеһова бу сәмими-гәлбли инсанлар васитәсилә халгына рәһбәрлик едирди.

12, 13. Икинҹи Дүнја мүһарибәси заманы ҝөрүлән һансы тәдбирләр тәблиғ вә тәлим ишини сүрәтләндирди?

¹² Инди исә ҝәлин ҝөрәк Икинҹи Дүнја мүһарибәси заманы нә баш вермишди. Баш идарәдә олан мәсул гардашлар Вәһј 17:8 ајәсини арашдырандан сонра баша дүшдүләр ки, бу мүһарибә Армаҝеддонла нәтиҹәләнмәјәҹәк. Әксинә, бир мүддәт нисби сүлһ олаҹаг вә Јеһованын Шаһидләринин даһа чох инсана тәблиғ етмәк имканы јаранаҹаг. Буна ҝөрә дә һәмин дөвр үчүн нә гәдәр мәнтигсиз ҝөрүнсә дә, Ҝөзәтчи Гүлләсинин Мүгәддәс Китаб Мәктәби Ҝилад тәсис олунду. Бу мәктәбдә хүсуси тәјинатлы мүждәчиләр бүтүн дүнјада тәблиғ едиб шаҝирд һазырламаг үчүн тәлим алырдылар. Онлары һәтта мүһарибә дөврүндә дә мүхтәлиф әразиләрә ҝөндәрирдиләр. Бунунла јанашы, садиг нөкәр Теократик хидмәт курслары b да тәшкил етди. Беләҹә, јығынҹагда олан һәр бир кәс алдығы тәлим сајәсиндә тәблиғчи вә мүәллим кими пүхтәләширди. Бүтүн бунлар Аллаһын халгыны гаршыда олан ишә һазырлајырды.

¹³ Ҝеријә баханда ајдын ҝөрүрүк ки, һәмин чәтин дөврдә Јеһова хидмәтчиләринә јол ҝөстәрирди. Икинҹи Дүнја мүһарибәсиндән бәри Јеһованын халгы бир чох өлкәдә Онун сөзүнү сәрбәст шәкилдә мүждәләјир. Беләҹә, тәблиғ иши ҝетдикҹә шахәләнир вә даһа чох инсанын Јеһованы танымаг имканы олур.

14. Јеһованын тәшкилатындан вә тәјин олунмуш ағсаггаллардан ҝәлән ҝөстәришләрә нәјә ҝөрә етибар едә биләрик? (Вәһј 2:1). (Һәмчинин шәклә бахын.)

 ¹⁴ Бу ҝүн дә Рәһбәрлик Шурасынын үзвләри Мәсиһдән рәһбәрлик алмаға ҹан атыр. Онлар истәјирләр ки, гәрарлары Јеһова вә Исанын гәрарларыны әкс етдирсин. Рәһбәрлик Шурасы ҝөстәришләрини рајон нәзарәтчиләри вә ағсаггаллар васитәсилә јығынҹаглара чатдырыр c. Мәсһ олунмуш ағсаггаллар, ҝениш мәнада исә бүтүн ағсаггаллар Мәсиһин «сағ әлиндә»дирләр. (Вәһј 2:1 ајәсини охујун.) Дүздүр, онлар гејри-камилдирләр вә сәһвләр едирләр. Амма белә бахсаг, бәзән Муса пејғәмбәр, Јушә, һәтта һәвариләр дә сәһвләр едирди (Сај. 20:12; Јуш. 9:14, 15; Ром. 3:23). Бунунла белә, Иса Мәсиһ садиг вә ағыллы нөкәрә, еләҹә дә тәјин олунмуш ағсаггаллара истигамәт верир вә буну та «бу дөврүн јекунуна кими» едәҹәк (Мәт. 28:20). Одур ки, Мәсиһин рәһбәрлик едән гардашлар васитәсилә вердији ҝөстәришләрә шәкк-шүбһәсиз етибар едә биләрик.

ЈЕҺОВАНЫН ҜӨСТӘРДИЈИ ЈОЛЛА ҜЕТМӘК ХЕЈРИМИЗӘДИР

15, 16. Јеһованын ҝөстәрдији јолла ҝедәнләрин нүмунәсиндән нә өјрәнирсиниз?

¹⁵ Јеһованын ҝөстәрдији јола ҝетмәјин артыг индидән бөјүк хејрини ҝөрүрүк. Мәсәлән, Енди вә Робин садиг вә ағыллы нөкәрин мәсләһәтинә гулаг асыб садә һәјат сүрүрдүләр (Ибр. 13:5). Бунун сајәсиндә онлар Јеһованын тәшкилатынын тикинти лајиһәләриндә көнүллү кими иштирак едә билмишдиләр. Робин баҹы дејир: «Бәзән јашадығымыз јер чох дарысгал олурду, һәтта мәтбәхимиз олмурду. Бундан әлавә, мән фотографлығы чох севирдим, амма нә гәдәр аваданлығымы сатмалы олмушдум. Онлары ҝөз јашлары ичиндә сатмышдым. Амма Ибраһим пејғәмбәрин арвады Сара кими мән дә гәрар вермишдим ки, ирәлијә бахым, архаја бојланмајым» (Ибр. 11:15). Бу әр-арвад вердикләри гәрарын һансы хејрини ҝөрдү? Робин баҹы сөзүнә әлавә едир: «Гәлбимиздә бөјүк хошбәхтлик вар, чүнки билирик ки, һәр шејимизи Јеһоваја вермишик. Јеһовадан алдығымыз тәјинатлары иҹра едәндә биз јени дүнјада һәјатын неҹә олаҹағыны тәсәввүр едә билирик». Енди гардаш да бу сөзләрә шәрикдир. О бөлүшүр: «Бүтүн вахтымызы вә ҝүҹүмүзү Јеһованын ишинә сәрф етдијимиз  үчүн үрәјимиздә бөјүк мәмнунлуг вар».

¹⁶ Јеһованын ҝөстәрдији јолла ҝетмәјин башга һансы фајдасы вар? Марсија орта мәктәби гуртарандан сонра алдығы мәсләһәтә ујғун давраныб өнҹүл кими хидмәт етмәк гәрарына ҝәлмишди (Мәт. 6:33; Ром. 12:11). О дејир: «Мән университетдә 4 ил пулсуз тәһсил ала биләрдим. Амма Јеһованын јолунда даһа чох иш ҝөрмәк истәјирдим. Буна ҝөрә дә гәрар вердим ки, бир пешәјә јијәләним вә һәм өзүмү доландыра билим, һәм дә өнҹүллүк едим. Бу, вердијим ән дүзҝүн гәрар иди. Инди мән өнҹүләм, үстәлик, иш ҹәдвәлим јол вердији үчүн Бејтелдә көмәк едирәм вә башга шәрәфли ишләрдә иштирак едирәм».

17. Јеһованын ҝөстәрдији јолла ҝетмәјин даһа һансы хејри вар? (Әшија 48:17, 18).

¹⁷ Бәзән тәшкилат бизи маддијјатдан вә Аллаһын ганунуну позмаға сөвг едән ишләрдән горумаг үчүн мүәјјән нәсиһәтләр верир. Бу саһәләрлә бағлы верилән ҝөстәришләрә әмәл етмәк бизә хејир ҝәтирир. Мәсәлән, виҹданымыз тәмиз олур, өзүмүзү лазымсыз стресдән горујуруг (1 Тим. 6:9, 10). Нәтиҹәдә, Јеһоваја үрәкдән ибадәт едә билирик. Һеч нә бизә бунун гәдәр севинҹ вә гәлб раһатлығы верә билмәз. (Әшија 48:17, 18 ајәләрини охујун.)

18. Нәјә ҝөрә сиз Јеһованын ҝөстәрдији јолла ҝетмәјә гәтијјәтлисиниз?

¹⁸ Шүбһәсиз ки, Јеһова бөјүк мүсибәт заманы вә Мәсиһин миниллик һакимијјәти дөврүндә дә бизә инсанлар васитәсилә ҝөстәришләр вермәјә давам едәҹәк (Зәб. 45:16). Бәс биз лазым ҝәлсә, өз фикримизи гыраға гојуб бизә дејилдији кими давранаҹағыг? Әҝәр индидән алдығымыз рәһбәрлијә ујғун давранырыгса, ҝәләҹәкдә дә Јеһованын ҝөстәрдији јолла ҝетмәк даһа асан олаҹаг. Она ҝөрә дә ҝәлин һәмишә Јеһованын вердији ҝөстәришләрә әмәл едәк. Бура бизә рәһбәрлик етмәк үчүн тәјин едилән гардашларын вердији мәсләһәтләр дә дахилдир (Әшј. 32:1, 2; Ибр. 13:17). Биз Бәләдчимиз Јеһоваја там етибар едә биләрик. О бизи тәһлүкәләрдән јан кечирәрәк мәнзилбашына — әбәди һәјата доғру апарыр.