1. Engkai maka perlu kita petunjuk Jahwe? Ban perumpamanna.

 BAYANGKEN kam sangana papak bas tengah kerangen. Melala bahaya i sekelilingndu bagi binatang buas, serangga si maba penakit, sinuan-sinuan si lit racunna, ras taneh si erbatu-batu. Tapi, banci kam tenang perban lit pemandu si erpengalamen. Tehna i ja lit bahaya janah banci sampatina kam gelah la kena bahaya e. Doni enda bali bagi kerangen e. I japa pe melala kel bahaya si ngancam kesehaten rohanita. Tapi, lit ras kita Pemandu si sempurna eme Jahwe. SampatiNa kita gelah ndauh arah bahaya e janah arak-arakNa kita seh ku tujunta eme kegeluhen si rasa lalap bas doni si mbaru.

2. Uga Jahwe mere petunjuk man banta?

² Uga Jahwe mere petunjuk man banta? Si utamana eme arah KataNa, Pustaka. Tapi gunakenNa ka jelma jadi wakilNa. Contohna, igunakenNa “budak si setia ras pentar” bas nikapken pangan rohani si nampati kita erban keputusen si pentar. (Mat. 24:45) Igunaken Jahwe ka dilaki-dilaki si banci iandalken, bagi pertua keliling ras pertua-pertua. Bereken kalak e petunjuk janah pegegehina kita gelah banci silewati masa-masa si sulit. Ngata bujur kel kita perban bereken Jahwe petunjuk si iperluken bas wari-wari pendungi si susah enda. Si e nampati kita gelah banci rembak ras Jahwe janah terus erdalan bas dalan kegeluhen.

3. Kai kari sibahas bas artikel enda?

³ Amin pe bage, mon-mon mesera siakap ngikutken petunjuk Jahwe, terlebih sanga petunjuk e ibereken arah kalak si la sempurna. Engkai? Banci saja la siakap cocok ntah pe kurang jile siakap petunjuk e. Emaka, banci saja  sisimpulken petunjuk e labo arah Jahwe. Bas situasi si bage, perlu kel kita tek maka Jahwe me si ngarak-ngarak umatNa, janah adi siikutken petunjukNa, pasti kita ipasu-pasu. Gelah reh tekna kita man petunjuk Jahwe, bas artikel enda sibahas kari (1) uga Jahwe mereken petunjuk man umatNa bas jaman Pustaka, (2) uga ia mereken petunjuk man banta gundari, janah (3) kai manpaatna adi terus siikutken petunjuk Jahwe.

UGA JAHWE MEREKEN PETUNJUK MAN BANGSA ISRAEL?

4-5. Uga Jahwe mbuktiken maka igunakenNa Musa mere petunjuk man kalak Israel? (Nen gambar sampul.)

⁴ Ipilih Jahwe Musa guna minpin kalak Israel ndarat arah Mesir. IbereNa man kalak Israel bukti si jelas maka iarak-arakNa kalak e arah Musa. Contohna, ibanNa tiang embun sanga ciger ras tiang api sanga berngi. (Kel. 13:21) Perban ikutken Musa tiang e, babaina kalak Israel ku Laut Merah. Mbiar kalak Israel perban akap kalak e enggo terjebak kalak e antara Laut Merah ras pasuken Mesir si ngayaki kalak e. Ikataken kalak e maka si e terjadi perban kesalahen Musa. Padahal, sengaja Jahwe mabai umatNa ku je erkelangken Musa. (Kel. 14:2) Bas ingan e, iselamatken Jahwe kalak e alu cara si luar biasa.—Kel. 14:​26-28.

⁵ Lit 40 tahun kenca si e, terus ikutken Musa tiang embun si ipake Dibata guna ngarak-ngarak umatNa bas taneh mesawang. a Bas sada paksa, iban Jahwe tiang e i datas kemah Musa janah kerina kalak Israel banci ngidahsa. (Kel. 33:​7, 9, 10) Arah tiang e me Jahwe ngerana man Musa, jenari ipeseh Musa petunjuk Jahwe man kalak Israel. (Ms. 99:7) Melala bukti si ncidahken maka igunaken Jahwe Musa guna ngarak-ngarak umatNa.

6. Uga tanggapen kalak Israel nandangi petunjuk si ibere Jahwe? (Bilangen 14:​2, 10, 11)

⁶ Sayang kel, buen kalak Israel nulak bukti si jelas maka Musa igunaken Jahwe jadi wakilNa. (Baca Bilangen 14:​2, 10, 11.) Mulih-ulih la iakui kalak e Musa jadi wakil Jahwe. Akibatna, keturunen kalak Israel si nggeluh paksa si e la banci masuk ku Negri Perjanjin.—Bil. 14:30.

7. Ise saja si ngikutken petunjuk Jahwe? (Bilangen 14:24) (Nen ka gambar.)

⁷ Tapi lit piga-piga kalak Israel si nggit ngikutken petunjuk Jahwe. Contohna, nina Jahwe, “Kalep . . . patuhina perentahKu alu bulat ukur.” (Baca Bilangen 14:24.) Upahi Dibata Kalep janah ipediatNa Kalep milih ingan tading bas taneh Kanaan. (Jos. 14:​12-14) Keturunen berikutna arah kalak Israel pe lit ka si jadi usihen bas ngikutken petunjuk Jahwe. Sanga Josua ilantik jadi peminpin kalak Israel nggantiken Musa, “ergai kalak e kel ia segedang geluhna.” (Jos. 4:14) Emaka, pasu-pasu Jahwe kalak e janah babaNa kalak e ku negri si ijanjikenNa.—Jos. 21:​43, 44.

8. Jelasken uga Jahwe ngarak-ngarak umatNa bas jaman raja-raja. (Nen ka gambar.)

⁸ Ertahun-tahun kenca si e, ilantik Jahwe me hakim-hakim guna ngarak-ngarak umatNa. Kenca si e, bas jaman raja-raja, ilantik Jahwe nabi-nabi guna ngarak-ngarak umatNa. Raja-raja si setia nggit megiken nasehat arah nabi-nabi e. Contohna, Raja Daud alu meteruk ukur alokenna  persinget arah Nabi Natan. (2 Sam. 12:​7, 13; 1 Kro. 17:​3, 4) Ikutken Raja Josapat petunjuk Nabi Jahasiel janah iahkenna kalak Juda gelah ‘erkiniteken man nabi-nabi Jahwe.’ (2 Kro. 20:​14, 15, 20) Sanga terjadi masalah, idahi Raja Hiskia Nabi Jesaya. (Jes. 37:​1-6) Tiap ikutken raja-raja petunjuk arah Jahwe, bangsa e ipasu-pasu ras ilindungi. (2 Kro. 20:​29, 30; 32:22) Arusna jelas nge man kerina kalak maka igunaken Jahwe nabi-nabiNa guna ngarak-ngarak umatNa. Tapi, buen raja-raja ras rakyatna la nggit megiken nabi-nabi Jahwe.—Jer. 35:​12-15.

UGA JAHWE NGARAK-NGARAK KALAK KRISTEN BAS ABAD PERTAMA?

9. Ise si igunaken Jahwe ngarak-ngarak kalak Kristen bas abad pertama? (Nen ka gambar.)

⁹ Bas abad pertama Masehi, ibentuk Jahwe runggun Kristen. Uga Ia ngarak-ngarak kalak Kristen sanga si e? IlantikNa Jesus jadi kepala runggun. (Ep. 5:23) Tapi labo Jesus si langsung mereken petunjuk man tiap murid-muridna, igunakenna rasul-rasul ras pertua-pertua i Jerusalem. (Perb. 15:​1, 2) Selain si e, lit ka pertua-pertua si ilantik guna ngarak-ngarak turang senina si lit bas runggun.—1 Tes. 5:12; Tit. 1:5.

10. (a) Uga tanggapen teremen kalak Kristen bas abad pertama nandangi petunjuk si ibereken? (Perbahanen Rasul-Rasul 15:​30, 31) (b) Engkai maka lit kalak bas jaman Pustaka si la nggit ngakui kalak si jadi wakil Jahwe? (Nen kotak “ Engkai maka Lit Kalak si Nulak Bukti si Jelas?”)

¹⁰ Uga tanggapen kalak Kristen bas abad pertama? Teremen arah kalak e nggit ngikutken petunjuk si ibereken. “Meriah kel ukur kalak e” janah terpegegehi perban petunjuk e. (Baca Perbahanen Rasul-Rasul 15:​30, 31.) Tapi, uga Jahwe ngarak-ngarak umatNa gundari?

UGA JAHWE NGARAK-NGARAK UMATNA GUNDARI?

11. Ban contoh si mbuktiken maka igunaken Jahwe kalak si jadi peminpin bas jamanta.

¹¹ Terus iarak-arak Jahwe umatNa gundari. Si e ilakokenNa arah Pustaka bage pe arah AnakNa, kepala runggun. Banci nge siidah buktina maka terus igunaken Dibata manusia jadi wakilNa? Banci. Contohna bas akhir tahun 1800-en,  Charles Taze Russell ras teman-temanna mulai ngangkai maka tahun 1914 eme tahun si penting si lit hubungenna ras Kerajan Dibata. (Dan. 4:​25, 26) Bage kesimpulen kalak e perban pelajari kalak e nubuat Pustaka janah tek kalak e maka nubuat e pasti terjadi. Iarak-arak Dibata nge kalak e erban kesimpulen e? Ue. Kejadin-kejadin si terjadi bas tahun 1914 mbuktiken maka Kerajan Dibata enggo mulai merentah. Terjadi Perang Doni I, janah lit wabah penakit, gempa bumi, ras kurang pangan. (Luk. 21:​10, 11) Jelas me, igunaken Jahwe kalak Kristen si tutus e guna nampati umatNa meteh kebenaren.

12-13. Pengaturen kai saja si iban guna erban pendahin erberita reh ulina sedekah Perang Doni II?

¹² Perdiateken ka kai si terjadi sedekah Perang Doni II. Turang senina si ertanggung jawap bas kantor pusat mpelajari Ketangkasen 17:8 janah angkai kalak e maka perang si sangana terjadi labo mbenaken Harmagedon. Tapi, kenca perang e lit masa dame, janah si e jadi kesempaten man umat Dibata erban pendahin erberita reh ulina. Emaka amin pe waktuna tempa-tempa la cocok, iban organisasi Jahwe me Perguruan Tinggi (Sekolah) Alkitab Gilead Menara Pengawal. Tujunna ngelatih utusen injil erberita ras ngajar bas negri-negri si lit i sebelang doni. Utusen injil e iutus amin pe terjadi denga perang. Selain si e, budak si setia ras pentar erban Kursus Pelayanen Teokratis b guna ngelatih kerina kalak bas runggun gelah banci reh ulina bas erberita ras ngajar. Alu bage, umat Dibata enggo isikapken guna mpebelang dahin erberita.

¹³ Banci siidah alu jelas maka iarak-arak Jahwe umatNa sedekah masa-masa si sulit e. Mulai Perang Doni II, umat Jahwe bas melala negri enggo bebas erberita janah mejile kel hasilna.

14. Engkai maka banci kita tek man petunjuk arah organisasi Jahwe bage pe arah pertua-pertua si ilantik? (Ketangkasen 2:1) (Nen ka gambar.)

 ¹⁴ Gundari, anggota Badan Pinpinen terus ndarami petunjuk arah Kristus. Ate kalak e petunjuk si iberekenna sesuai ras perukuren Dibata ras Kristus. Igunaken kalak e pertua keliling ras pertua-pertua mere petunjuk man runggun-runggun. c Pertua-pertua si ipilih ku surga ras kerina pertua si debanna si lit bas runggun lit bas ‘tan kanan’ Kristus. (Baca Ketangkasen 2:1.) Memang, pertua-pertua e la sempurna janah banna kesalahen bali bagi Musa, Josua, ras rasul-rasul bas jaman si mbarenda. (Bil. 20:12; Jos. 9:​14, 15; Rom. 3:23) Tapi, siteh maka Kristus me si mereken petunjuk man budak si setia bage pe pertua si ilantik, janah terus pagi lakokenna si e “seh ku kedungen jaman enda.” (Mat. 28:20) Emaka, banci kita tek kel man petunjuk si ibereken Kristus arah kalak si ilantik guna minpin kita.

MANPAATNA ADI TERUS SIIKUTKEN PETUNJUK JAHWE

15-16. Kai si banci ipelajarindu arah pengalamen kalak si ngikutken petunjuk Jahwe?

¹⁵ Adi terus siikutken petunjuk Jahwe, banci sigejapken pasu-pasuNa. Contohna, sekalak perbulangen ras ndehara si gelarna Andy ras Rose d ngikutken nasehat guna nggeluh sederhana. (Mat. 6:22) Dungna, banci kalak e jadi sukarelawan ndahiken proyek pembangunen bas organisasi. Nina Rose, “Tading kami bas ingan-ingan si kitik, janah rusur la lit dapurna. Arus ka kudayaken mbue kamera ras perlengkapenna, padahal e hobiku. Naktak iluhku sanga kudayaken barang-barangku e. Tapi, bagi diberu Abraham, Sara, ertekad aku ngenen ku lebe, labo ku pudi.” (Heb. 11:15) Pasu-pasu kai si gejapken kalak e? Nina Rose, “Puas kel kap kami perban teh kami maka enggo bereken kami kerina man Jahwe. Sanga ndahiken tugas-tugas bas organisasi, banci bayangken kami uga pagi kegeluhen bas doni si mbaru.” Andy pe bage kang gejapkenna. Nina, “Meriah ukur kami perban enggo bereken kami kerina waktu ras gegeh kami guna ndukung Kerajan Dibata.”

¹⁶ Kai deba nari manpaatna adi siikutken petunjuk Jahwe? Cuba perdiateken pengalamen Marcia. Kenca lulus SMA,  merhat kel ia ngikutken nasehat guna ngelayani Jahwe sepenuh waktu. (Mat. 6:33; Rom. 12:11) Nina, “Kudat tawaren beasiswa empat tahun dekahna bas sada universitas. Tapi merhat aku ndatken cita-cita rohani. Emaka, kupelajari keterampilen si banci ndukung pelayanenku. E me salah sada keputusen si mehulina si pernah kuban. Gundari, meriah kuakap ngelayani jadi perintis biasa. Selain si e, jadwalku erdahin banci isesuaiken gelah banci aku ngelayani jadi komuter bas Betel bage pe ngelakoken tugas-tugas istimewa si debanna.”

17. Kai deba nari manpaatna adi terus siikutken petunjuk Jahwe? (Jesaya 48:​17, 18)

¹⁷ Mon-mon, arak-arak Jahwe kita alu mereken nasehat si banci ngelindungi kita. Contohna, inasehati kita gelah ula mata duiten ntah pe ngelakoken kai si erban kita ngelanggar undang-undang Dibata. Kai nge manpaatna adi siikutken nasehat e? Banci bersih pusuh peratenta janah la mbue masalahta. (1 Tim. 6:​9, 10) Hasilna, banci kita ngelayani Jahwe alu bulat ukur janah erban kita ermeriah ukur, dame, ras puas.—Baca Jesaya 48:​17, 18.

18. Engkai kam ertekad guna terus ngikutken petunjuk arah Jahwe?

¹⁸ Sedekah kiniseran si mbelin janah seh ngasa Pemerentahen Seribu Tahun, pasti terus igunaken Jahwe manusia jadi wakil-wakilNa mereken petunjuk man umatNa. (Ms. 45:16) Nggit nge kita terus ngikutken petunjuk amin pe la bagi ukurta? Banci reh nukahna siakap ngelakokensa adi siikutken petunjuk Jahwe gundari nari. Mbera-mbera lalap siikutken petunjuk Jahwe, termasuk arah dilaki-dilaki si ilantik guna njaga kita. (Jes. 32:​1, 2; Heb. 13:17) Mbelin kel alasenta tek man Pemanduta, Jahwe, si lalap nampati kita gelah la kena bahaya secara rohani janah terus erdalan seh ku tujunta eme nggeluh rasa lalap bas doni si mbaru.