1. Yooz di egzampl eena di paragraaf fi shoa wai wi need Jehoava fi bee wi Gaid?

 JOS imajin dat yu geh laas way baka bush, ahn dehn ga lata tingz weh ku hert yu. Wehpaat yu deh ga animalz weh yu frayd fa, plaants ahn chreez weh ku paizn yu, insek weh ku bait yu ahn mek yu sik, ahn sohn big hoal weh yu ku jrap eena. Bot, how hapi yu wuda feel fi noa dat dehn ga sombadi weh noa di ayrya weh ku help yu fain yu way owt? Wel, dis werl tudeh da laik dat. Ih ful op a lata daynja weh ku dischrai wi rilayshanship wid Jehoava. Bot wee ga wahn perfek Gaid, Jehoava. Wi lovin Gaad tek wi owta daynja ahn gaid wi tuwaadz wi goal fi injai laif fareva.

2. How Jehoava gaid wi?

² Di mayn way how Jehoava gaid wi da chroo di Baibl. Hihn aalso yooz hyoomanz fi gi wi dairekshan. Fi egzampl, hihn yooz “di faytful ahn waiz slayv” fi gi wi spirichwal food weh help wi fi mek gud disizhanz. (Mach. 24:45) Ahn hihn yooz serkit oavaseeyaz an eldaz fi teech wi an inkorij wi. Wi soh hapi dat Jehoava tek gud kayr a wi ahn gaid wi, espeshali joorin dehnya haad taimz eena di laas dayz! Dis reeli help wi fi kantinyu bee Jehoava fren soh dat wi ku injai laif now ahn fareva.

3. Weh wi wahn taak bowt eena dis aatikl?

³ Eevn doa wi need Jehoava fi gaid wi, ih noh aalwayz eezi fi fala fi hihn gaidans, espeshali wen ih di yooz peepl weh noh perfek. Dis ku bee bikaaz wi noh laik weh dehn di tel wi. Er wi mait feel laik weh dehn di seh noh mek sens, soh ih noh di kohn fahn Jehoava. Bot wen dat hapm, wi waahn chros dat Jehoava di gaid ih peepl tudeh. Ahn wi waahn memba dat wen wi obay hihn, tingz wahn aalwayz ton owt gud fi wi. Dis aatikl wahn taak bowt chree tingz  weh ku help wi: wen wi foakos pahn (1) how Jehoava gaid ih peepl eena di paas, (2) how Jehoava gaid ih peepl tudeh, ahn (3) how wi benifit wen wi mek Jehoava gaid wi.

JEHOAVA MI GAID DI IZRELAITS

4-5. How Jehoava shoa di Izrelaits dat hihn mi-di yooz Moaziz fi gaid dehn? (Koment pahn di picha.)

⁴ Moaziz da-mi di wan weh Jehoava mi chooz fi leed ih peepl owta Eejip. Ahn Jehoava mi proov tu di Izrelaits dat hihn mi-di gaid dehn chroo Moaziz. Fi egzampl, joorin di day Hihn mi gaid dehn wid wahn klowd, ahn joorin di nait Hihn mi gaid dehn wid faiya fi gi dehn lait. (Eks. 13:21) Moaziz mi fala dis klowd weh mi kehr dehn da di Red See. Bot di peepl mi geh fraitn bikaaz di Eejipshan aami mi-di chays afta dehn, ahn dehn neva ga no way els fi goh. Dehn mi feel laik Moaziz mi rang fi kehr dehn deh. Bot Jehoava neva mek no mistayk. Hihn mi gi Moaziz spesifik inschrokshanz fi kehr di Izrelaits da di Red See. (Eks. 14:2) Hihn mi yooz ih powa fi sayv dehn eena wahn amayzin way.—Eks. 14:​26-28.

⁵ Moaziz mi kantinyu fi chros dat Jehoava mi-di yooz dis klowd fi gaid ih peepl. Fi 40 yaaz hihn mi fala dis klowd fi gaid dehn chroo di wildanes. a Fi wahn taim, Jehoava mi eevn put dis klowd oava Moaziz tent, wehpaat aal di peepl ku seeʼt. (Eks. 33:​7, 9, 10) Jehoava mi taak tu Moaziz chroo di klowd, ahn Moaziz mi tel di peepl weh Jehoava seh. (Ps. 99:7) Soh di Izrelaits mi ga moa dan inof proof dat Jehoava mi-di yooz Moaziz fi gaid dehn.

6. How di Izrelaits mi rispan wen Jehoava mi-di gaid dehn? (Numbers 14:​2, 10, 11)

⁶ Eevn doa Jehoava mi proov tu di peepl dat hihn mi-di yooz Moaziz fi gaid dehn, dehn mi rifyooz fi aksep dis. (Reed Numbers 14:​2, 10, 11.) b Dehn mi kantinyu fi du dis oava ahn oava. Ahn bikaaz a dis, Jehoava neva mek dehn gaan eena di Pramis Lan.—Num. 14:30.

7. Yooz di egzamplz eena di paragraaf fi shoa how som a di Izrelaits mi fala Jehoava gaidans. (Numbers 14:24) (Koment pahn di picha.)

⁷ Bot som a di Izrelaits mi fala Jehoava gaidans. Fi egzampl, Jehoava mi seh: “Kayleb . . . mi obay mi wid ih hoal haat.” (Reed Numbers 14:24.) c Soh hihn mi bles Kayleb, ahn hihn mi mek ih pik wehpaat ih mi waahn liv eena di lan a Kaynan. (Jash. 14:​12-14) Eevn doa som a di Izrelaits mi ded eena di wildanes, fi dehn disendant mi set wahn gud egzampl. Wen Jehoava mi gi Jashwa di asainment fi leed dehn, dehn “mi ga lata rispek” fi Jashwa fi az lang az ih mi liv. (Jash. 4:14) Soh Jehoava mi bles dehn ahn gi dehn di lan weh hihn mi pramis dehn.—Jash. 21:​43, 44.

8. How Jehoava mi gaid ih peepl wen di king dehn mi-di rool oava di nayshan a Izrel? (Koment pahn di picha.)

 ⁸ Yaaz layta, Jehoava mi apoint sohn joj fi gaid ih peepl. Laytaraan, wen kingz mi-di rool oava di nayshan, hihn mi yooz lata difrent prafit fi kantinyu gaid ih peepl. Di king dehn weh mi faytful tu Jehoava lisn tu di advais fahn dehnya prafit. Wen King Dayvid mi need kongsl ahn dairekshan, hihn mi lisn tu di prafit Naytan. (2 Sam. 12:​7, 13; 1 Chron. 17:​3, 4) King Jehoshafat mi fala di advais fahn di prafit Jahazaiyel, an ih mi inkorij di peepl fi “ga fayt eena [Gaad] prafit dehn.” (2 Chron. 20:​14, 15, 20) Wen dehn mi eena daynja, King Hezikaiya mi ton tu di prafit Aizaiya fi help. (Isa. 37:​1-6) Evri taim di king dehn mi lisn tu Jehoava, hihn mi bles dehn ahn protek ih peepl. (2 Chron. 20:​29, 30; 32:22) Soh ih mi klyaa fi si dat Jehoava mi-di yooz di prafit dehn fi gaid ih peepl. Bot, moas a di king dehn ahn di peepl neva lisn tu di prafit dehn hoo Jehoava mi chooz.—Jer. 35:​12-15.

JEHOAVA MI GAID IH PEEPL EENA DI FERS SENCHRI

9. Hoo Jehoava mi yooz fi gaid ih peepl eena di fers senchri? (Koment pahn di picha.)

⁹ Wen Jehoava mi faam di kangrigayshan eena di fers senchri, hihn mi apoint Jeezas az di hed a di kangrigayshan fi gaid dehn. (Ifee. 5:23) Bot Jeezas neva taak tu eech a di disaiplz fi gi dehn dairekshan. Insted, hihn mi yooz di apaslz an eldaz da Jeroosalem fi tek di leed. (Aks 15:​1, 2) An ada bradaz mi geh apointid az eldaz fi gaid di kangrigayshan.—1 Tes. 5:12; Tai. 1:5.

10. (a) How di fers-senchri Kristyanz mi feel bowt di dairekshan dehn mi geh fahn Jehoava, ahn weh dehn mi du? (Aks 15:​30, 31) (b) Wai som a dehn mi rijek di peepl hoo Jehoava mi-di yooz fi gaid dehn? (Si di baks weh naym “ Sohn Reezn Wai Som Rifyooz fi Bileev.”)

¹⁰ Wahn lata di bradaz ahn sistaz eena di fers senchri mi hapi fi geh dairekshan fahn di apaslz an eldaz, ahn dehn mi wilin fi fala it. Di skripcha seh: “Evribadi mi ful op a jai ahn dehn mi feel inkorij” afta dehn mi geh dairekshan fahn di wanz hoo mi-di tek di leed. (Reed Aks 15:​30, 31.)  Bot, how Jehoava di gaid ih peepl eena fi wee taim?

JEHOAVA GAID WI TUDEH

11. Yooz wahn egzampl weh proov dat Jehoava di gaid dehn wan weh di tek di leed eena fi wee taim.

¹¹ Tudeh, Jehoava kantinyu fi gaid ih peepl. Hihn du dis chroo di Baibl ahn chroo ih Son, di hed a di kangrigayshan. Bot yoo si proof dat Jehoava di kantinyu yooz hyoomanz fi leed ih peepl? Yes. Fi egzampl, jos tink bowt weh mi hapm eena di yaaz afta 1870. Brada Charles Taze Russell an ih kloas fren dehn mi staat tu riyalaiz dat 1914 mi wahn bee wahn impoatant yaa. Dehn mi-di geh fi andastan dat dis da di yaa Gaad Kingdom mi wahn staat rool fahn hevn. (Dan. 4:​25, 26) Dehn mi fain dis owt bikaaz dehn mi du deep stodi a Baibl prafesi. Ih mi klayr fi si dat Jehoava mi-di help dehn andastan dis bikaaz a weh mi hapm eena di werl eena 1914. Joorin da taim, Werl Waar I mi staat, ahn dizeez, ertkwayk, ahn food shaatij mi deh aal oava. (Look 21:​10, 11) Dis mi proov dat Gaad Kingdom mi staat rool eena da yaa ahn dat Jehoava mi-di yooz dehnya man fi gaid ih peepl.

12-13. Weh Jehoava aaganaizayshan mi-di du joorin Werl Waar II fi mek di preechin werk groa?

¹² Tink bowt weh mi hapm joorin Werl Waar II. Di bradaz da werl hedkwaataz mi stodi Revilayshan 17:​8, ahn dehn mi andastan dat di waar neva mi wahn kehr dehn tu Armagedon. Insted, dehn mi si dat ih mi wahn leed dehn tu wahn taim a pees wen dehn kuda mi preech tu moa peepl. Rong da taim, Jehoava aaganaizayshan staat Gilyad Skool fi chrayn mishineriz how fi preech ahn teech, eevn doa ih neva luk laik ih mek sens fi staat du dat. Dehn mi eevn sen owt mishineriz rong di werl joorin di waar. Pahn tap a dat, di faytful slayv mi staat chrayn aal poblishaz rong di werl chroo wahn speshal chraynin weh naym Course in Theocratic Ministry d soh dehn kuda mi preech ahn teech beta. Chroo dehnya chraynin, Jehoava mi-di  pripyaa ih peepl fi weh dehn mi wahn need fi du eena di preechin werk.

¹³ Wen wi luk bak pahn di disizhanz weh dehn bradaz mi mek, wi ku si dat Jehoava mi-di gaid ih peepl joorin dehndeh haad taimz. Sins Werl Waar II, Jehoava peepl ga di freedom fi preech eena lata difrent konchri. Sayka dis, wi si how dis werk di groa aal oava di werl ahn moa ahn moa peepl di laan bowt Jehoava.

14. Wai wee ku chros di dairekshan weh di kohn fahn Jehoava aaganaizayshan ahn fahn di eldaz weh di tek di leed? (Revilayshan 2:1) (Koment pahn di picha.)

¹⁴ Tudeh, di bradaz hoo mek op di Govanin Badi dipen pahn Jeezas fi gaid dehn. Dehn du dis soh dat di inschrokshan ahn dairekshan weh dehn gi di bradaz ahn sistaz noh kohn fahn dehn, bot insted, fahn Jehoava ahn Jeezas. Ahn dehn yooz serkit oavaseeyaz an eldaz fi gi dairekshan tu di kangrigayshan dehn. e Di Baibl tel wi dat dehnya anointid eldaz deh eena Jeezas “rait han.” (Reed Revilayshan 2:1.) Dehnya eldaz noh perfek ahn dehn mek mistayk, jos laik Moaziz, Jashwa, ahn di apasl dehn. (Num. 20:12; Jash. 9:​14, 15; Roam. 3:23) Bot wi ku stil si dat Jeezas di yooz ahn gaid di faytful slayv ahn dehnya eldaz. Hihn wahn kantinyu du dis “evri day til di en a dis sistem a tingz.” (Mach. 28:20) Sins di dairekshan weh wi geh fahn dehnya apointid man reeli di kohn fahn Jeezas, wi ku chros it.

WI BENIFIT WEN WI KANTINYU MEK JEHOAVA GAID WI

15-16. Weh wi ku laan fahn wi bradaz ahn sistaz hoo fala Jehoava gaidans?

¹⁵ Wen wi mek Jehoava gaid wi, wi injai lata blesinz now. Dis da weh mi hapm wen Andy ahn Robyn mi disaid fi fala di advais fi kip dehn laif simpl. (Si di stodi noat pahn Machyu 6:22 eena di Study Bible.) Dis mi oapm di way fi mek Jehoava yooz dehn fi help bil Kingdom Haal an ada bildin fi di aaganaizayshan. Robyn seh: “Sohntaim di plays dehn weh wi mi liv mi soh smaal dat ih neva eevn ga wahn kichin. An Ah mi krai wen Ah mi need fi sel mi kamara dehn an ada tingz weh Ah yoostu yooz fi tek pichaz. Ah yoostu reeli injai di yooz dehndeh tingz fi tek pichaz joorin mi free taim. Bot Ah mi waahn fala Saara egzampl ahn noh foakos pahn weh Ah mi giv op. Insted, Ah foakos pahn how  dis mi mek Ah ku du moa fi Jehoava.” (Heeb. 11:15) How Andy ahn Robyn mi benifit fahn dehn disizhan? Robyn seh: “Wi reeli hapi bikaaz wi noa dat wi di gi Jehoava wi bes. Ahn wen wi du di werk weh Jehoava gi wi fi du, wi geh fi imajin weh ih wuda bee laik wen Jehoava peepl di werk tugeda eena Paradais.” Andy agree wid dat; hihn seh: “Wee soh hapi bikaaz wi yooz aala wi taim an enerji di werk fi Jehoava.”

¹⁶ How els wi benifit wen wi kantinyu alow Jehoava fi gaid wi? Afta Marcia mi finish hai skoal, shee mi fala di advais shee mi geh fi staat painyaa. (Mach. 6:33; Roam. 12:11) Shee seh: “Ah kuda mi goh da yooniversiti fi foa moa yaaz an Ah neva mi wahn haftu pay notn. Bot Ah mi waahn du moa fi Jehoava. Soh insted, Ah mi laan wahn chrayd soh dat Ah kuda mi mek inof moni ahn painyaa saym taim. Dis da-mi wan a di bes disizhanz Ah mek eena mi laif. Now, Ah reeli hapi di painyaa, ahn bikaaz Ah ku disaid humoch Ah wahn werk, Ah geh fi help owt paat-taim da Betel, an Ah geh fi du ada tingz fi Jehoava.”

17. Weh ada blesinz wi geh wen wi mek Jehoava gaid wi? (Isaiah 48:​17, 18)

¹⁷ Aalso, wi geh kongsl chroo Jehoava aaganaizayshan weh kip wi sayf. Fi egzampl, wi geh di rimainda fi noh lov moni ahn fi stay weh fahn eniting weh ku damij wi rilayshanship wid Jehoava. Wen wi fala kongsl laik dehnya ahn mek Jehoava gaid wi, ih protek wi, help wi ga wahn kleen kanshans, an ih sayv wi fahn lata prablemz. (1 Tim. 6:​9, 10) Dis wahn help wi fi serv Jehoava wid aala wi haat. Ahn wi wahn ga wahn peesful ahn hapi laif.—Reed Isaiah 48:​17, 18.

18. Wai yoo mek op yu main fi kantinyu mek Jehoava gaid yu?

¹⁸ Jehoava wahn kantinyu yooz hyoomanz weh hihn apoint fi gaid wi eevn chroo di grayt chribyulayshan ahn joorin di taim wen Jeezas wahn rool fi wahn towzn yaaz. (Ps. 45:16) Wee wahn kantinyu fala dairekshan eevn if da noh sohnting wi reeli waahn du? Ih wahn bee eeziya fi mek wi du dis if wi praktis it fahn now. Soh mek wi kantinyu mek Jehoava gaid wi an obay di man dehn hoo hihn apoint fi wach oava wi. (Isa. 32:​1, 2; Heeb. 13:17) Az wi du dat, wee ku chros Jehoava, di wan weh di gaid wi, bikaaz wee noa hihn wahn protek wi fahn daynja ahn help wi stay kloas tu hihn soh dat wee ku injai laif now ahn fareva.