1. Gamba ecokureberaho ekiri kwereka enshonga tushemerire kukuratira omuhabuzi witu Yehova.

 REKA tugire ngu waburira omu ihamba. Oyehinguririzibwe n’ebintu byingi ebiri kubasa kukuretera akabi nk’enyamishwa, otukoko oturi kutera endwara, ebinyasi ebiri kubabana, n’ebibare. Mazima kikakushemeza, obwine omuntu w’okukuhabura ori kumanya akabi akari omuri eryo hamba n’oku ori kubasa kukerinda! Eyi nsi na yo eri nk’eryo hamba. Eyijwiremu ebintu byingi ebiri kubasa kuturetera akabi na munonga omu buryo bw’omwika. Konka twine omuhabuzi ohikirire ari we Yehova. Natuhabura atwiha omu kabi, atuhisa ahantu habonire ni okugamba aha magara agatahwaho g’omu nsi ensya.

2. Ni bata oku Yehova ari kutuhabura?

² Ni bata oku Yehova ari kutuhabura? Ecokubanza, nakoresa Ekigambo ceye Bibuli. Konka nambwenu nakoresa abantu omu kutuhabura. Ecokureberaho: Nakoresa ‘omwambari w’omwesigwa’ kandi w’omunyabwenge kugira ngu atuhe ebyokurya by’omwika ebiri kutukwasa kukora ensharamu ndungi. (Mat 24:45) Nambwenu nakoresa abashija abari kubasa omu kutuhabura. Omuri abo bashija, harimu abareberezi abari kutayayira ebibina n’abazehe b’ebibina abari kutukwasa kandi bakatuha obuhabuzi oburi kutukwasa kuraba omu bizibu bigumire. Mazima nikitushemeza munonga kuba turi kubasa kutunga obuhabuzi nk’obwo omuri obu bwire bw’aha muheru! Nibutuma Yehova yagumizamu kutwikiriza kandi butuma twaguma omu muhanda gw’amagara.

3. Ni enki eki twaza kushwijuma omuri eki kicweka?

³ Konka obumwe, nikibasa kutugumira kukuratiza obuhabuzi bwa Yehova na munonga twabuhebwa n’abantu abatahikirire. Ahabw’enki? Obumwe obuhabuzi obu batuha nibubasa kuba butari kutushemeza. Ninga shi nitubasa kureba obwo buhabuzi nk’obutahikire tutecereza ku butaruga ahari Yehova. Omu bwire nk’obwe nituba turi kwetenga kwesiga ku Yehova ari kwebembera abahereza beye kandi ku okukuratiza obuhabuzi bweye biri kuturetera  emigisha myingi. Kugira ngu tukizeho kwesiga Yehova, omuri eki kicweka twaza kushwijuma (1) oku Yehova yabire ari kwebembera abahereza beye omu bwire bwa Bibuli, (2) oku ari kutwebembera omuri obu bwire, n’ (3) oku turi kugasirwa twakuratiza obuhabuzi bweye.

OKU YEHOVA YABIRE NAHABURA IHANGA RYA ISIRAYELI

4-5. Ni bata oku Yehova yayerekire ku yabire ari kukoresa Musa omu kwebembera Abisirayeli? (Reba ekishushani c’aha kishembeso.)

⁴ Yehova akatorana Musa kugira ngu ayihe Abisirayeli omuri Egiputa. Kandi akaha Abisirayeli ebihamya ebiri kurebeka ebyabire biri kubereka ku yabire ari kubebembera akoresize Musa. Ecokureberaho: Nyomushana akaba nabebembera akoresize enkingi y’ekicu, rero nyekiro akoresa enkingi y’omuriro. (Kur 13:21) Musa akakuratira eyo nkingi eyatumire we n’Abisirayeli bahika aha nyanja eri kutukura. Abantu bakahika bari kutina munonga ahabw’okutecereza ku babire baza kuraba omu nyanja kandi bakuratirwe n’Abanyegiputa. Bakatecereza ku Musa yakozire enshobe ari kubarabya omu muhanda oguri kuraba omu nyanja eri kutukura. Konka eyo ekaba etari enshobe. Yehova akakikora akigenderire akoresize Musa. (Kur 14:2) Bwanyima Ruhanga akakora ecokutangaza yabarokora.—Kur 14:26-28.

⁵ N’omu myaka 40 eyakuratireho, Musa akagumizamu kwebembera abahereza ba Ruhanga akoresize enkingi y’ekicu yabahisa omu butayo. a Obwire bukahika Yehova yata enkingi ah’iguru y’ihema rya Musa, ahu Abisirayeli bona babire bari kubasa kuyireba. (Kur 33:7, 9, 10) Yehova akaba nagambira omu nkingi y’ekicu agambana na Musa, rero Musa na we aza kugambira Abisirayeli ebi Yehova yagamba. (Zab 99:7) Abisirayeli bakerebera ebihamya ebyabire biri kwereka ku Yehova yabire ari kukoresa Musa omu kubebembera.

6. Ni bata oku Abisirayeli bayerekire ku bari kukuratiza obuhabuzi bwa Yehova? (Kubara 14:2, 10, 11)

⁶ Ekiri kushasha, ni oku Abisirayeli bingi bayangire eco kihamya ekiri kurebeka ecabire kiri kwereka ku Yehova yabire ari kukoresa Musa omu kubebembera. (Shoma omu Kubara 14:2, 10, 11.) Emirundi myingi, bakaba nibanga kuha Musa ekitinisa ahabw’obuhabuzi obu yabire ari kubaha. Eco kikatuma Abisirayeli bona batayikirizibwa kuhika omu ihanga eryaraganisibwe.—Kub 14:30.

7. Gamba ebyokureberaho by’abantu abakuratize obuhabuzi bwa Yehova. (Kubara 14:24) (Nambwenu reba ekishushani.)

⁷ Konka bamwe omu Bisirayeli bakaba nibakuratiza obuhabuzi bwa Yehova. Ecokureberaho: Yehova akagamba ati: ‘Kalebu . . . akagumizamu kunkuratira n’omutima gweye gona.’ (Shoma omu Kubara 14:24.) Ruhanga akaha Kalebu omugisha kandi yanamwikiririza kutwara ihanga rya Kanani. (Yos 14:12-14) Nambwenu Abisirayeli abakuratireho bakaba ecokureberaho kirungi aha bikwatirine n’okukuratiza obuhabuzi bwa Yehova. Obu Yoshuwa yasimbwire Musa omu kwebembera, Abisirayeli ‘bakagumizamu kumuha ekitinisa omu biro byeye byona.’ (Yos 4:14) Eco kikatuma Yehova yabaha emigisha bayegarurira eryo hanga eri Yehova yabire abaraganisize.—Yos 21:43, 44.

8. Shoborora oku Yehova yayebembire abahereza beye omu bwire bw’abagabe. (Nambwenu reba ekishushani.)

⁸ Omu myaka eyakuratireho, Yehova akataho abaramuzi ngu bebembere abahereza beye. Bwanyima, omu bwire bw’abagabe, Yehova akakoresa Abahanuzi omu kwebembera abahereza beye. Abagabe b’abesigwa, bakaba niborobera obuhabuzi obu babire nibahebwa n’abahanuzi. Ecokureberaho: Omugabe Dawudi akecureza yayikiriza obuhabuzi obu yahibwe n’omuhanuzi Natani. (2 Sam 12:7, 13; 1 Bus  17:3, 4) Omugabe Yehoshafati akagendera aha buhabuzi bw’omuhanuzi Yahaziyeli obwabire buri kushaba abaturage b’omuri Buyudaya ‘kwesiga abahanuzi ba Ruhanga.’ (2 Bus 20:14, 15, 20) Obu omuhanuzi Hezekiya yabire ari omu bizibu, akaza kureba omuhanuzi Isaya. (Isa 37:1-6) Burijo abagabe ku babire nibakuratiza obuhabuzi bwa Yehova, bakaba nibatunga emigisha kandi kituma ihanga ryabo ryarindwa. (2 Bus 20:29, 30; 32:22) Abantu bona bakaba niberebera ku Yehova yabire ari kukoresa abahanuzi omu kwebembera abahereza beye. Konka, hariho abagabe bingi, n’abaturage bingi abayangire korobera obuhabuzi bw’abahanuzi ba Yehova.—Yer 35:12-15.

OKU YEHOVA YABIRE ARI KUHABURA ABAKRISTO B’OMU KINYIGANA C’OKUBANZA

9. Ni baha abu Yehova yabire ari kukoresa omu kwebembera abahereza beye b’omu kinyigana c’okubanza? (Nambwenu reba ekishushani.)

⁹ Omu kinyigana c’okubanza mbere ya Yesu, Yehova akataho ekibina c’Abakristo. Ni bata oku yabire nayebembera abo Bakristo? Akatorana Yesu ngu abe omwebembezi w’ekibina. (Efe 5:23) Konka Yesu tiwe owabire ari kwebembera buri mwegi, amisho aha gandi. Akaba nakoresa entumwa n’abakuru b’omuri Yerusalemu omu kwebembera. (Byak 15:1, 2) Nambwenu, abazehe ababire batirweho bakaba nibebembera ebibina.—1 Tes 5:12; Tit 1:5.

10. (a) Ni bata oku abingi omu Bakristo b’omukinyigana c’okubanza babire nibakira obuhabuzi obu babire nibatunga? (Ebyakozirwe 15:30, 31) (b) Ahabw’enki omu bwire bwa Bibuli abamwe bayangire kwikiriza obuhabuzi bw’abu Yehova yabire ari kukoresa omu kubebembera? (Reba akashanduku akari kugira ngu “ Enshonga zimwe ezatumire bayanga kwikiriza ebihamya.”)

¹⁰ Mbwenu shi Abakristo b’omu kinyigana c’okubanza bakabyakira bata? Abingi omuri bo bakaba nibesimira kukuratiza obuhabuzi obu babire bari kuhebwa. Mazima, ‘bakaba nibashemererwa ahabw’okuhumurizibwa oku babire bari kutunga.’ (Shoma omu Byakozirwe 15:30, 31.) Mbwenu shi, ni bata oku Yehova ari kuhabura abahereza beye omuri obu bwire?

OKU YEHOVA ARI KUHABURA ABAHEREZA BEYE OMURI OBU BWIRE

11. Gamba ecokureberaho ekiri kwereka oku Yehova yabire ari kuhabura ababire bari kwebembera omu bwire bwa kare.

¹¹ Yehova nagumizamu kwebembera abahereza beye omuri obu bwire. Nakikora akoresize Ekigambo ceye n’omwana weye, we mwebembezi w’ekibina. Mbehi tituri kwerebera ebihamya  ebiri kwereka ku Yehova ari kugumizamu kukoresa abantu omu kutwebembera? Yego mazima. Reba ecokureberaho c’ebirungi ebyahikirweho omu myaka ya za 1800. Charles Taze Russell na bagenzi beye, bakatandika kutangaza ku omwaka gwa 1914 gwabire gurabe akamanyiso akari kwereka ku Obukama bwa Ruhanga bwabire butandikire kutegeka. (Dan 4:25, 26) Kugira ngu bakore eyo nsharamu, bakagendera aha buhanuzi bw’omuri Bibuli. Mbehi Yehova akaba nayebembera oko kucondoza k’omuri Bibuli? Akaba nakikora mazima. Omu mwaka gwa 1914 omu nsi hakabamu ebintu ebyayerekire ku Obukama bwa Ruhanga bwabire butandikire kutegeka. Hakabaho Orutaro I rw’ensi yona, habaho ebyorezo by’endwara, emisisa n’enjara. (Luk 21:10, 11) Mazima Yehova akakoresa abo bashija b’Abakristo omu kukwasa abahereza beye omuri obwo bwire.

12-13. Ni bata oku entebekanisa y’omurimo g’okuburira yagenzire eri kukizaho kweyongera omu bwire bw’orutaro II rw’ensi yona?

¹² Reba n’ebyabireho omu bwire bw’orutaro II rw’ensi yona. Benetata b’ahari ofisi nkuru ku bamazire kushwijuma ebiri kugambwa omu Kushururwa 17:8, bakashorocerwa ku orutaro rwa kabiri rw’ensi yona rwabire rutari Haramagedoni, ahobwe ku bwabire buri obwire obwabire bwaza kutuma habaho obusinge kikatuma batunga oburyo bwingi bw’okuburira. Obwe rero n’obu obwo bwire bwabire buri kurebeka nk’obwire obutabonire, ekitongore ca Yehova kikatandikisa Ishomero rya Giliyadi kugira ngu rimanyize abamishonari kuburira n’okwegesa omu bicweka byingi by’omu nsi. Abamishonari bakoherezibwa omu tucweka twingi n’obu habire hari kubaho orutaro. Nambwenu Omwambari w’omwesigwa kandi w’omunyabwenge, akatandikisa Ishomero ry’omurimo b rya Kitewokarasi aryabire riri kukwasa ab’omu kibina bona kuba ababurizi n’abegesa barungi. Omuri obwo buryo abahereza ba Ruhanga bakaba bari kutegurirwa omurimo ogwabire gwaza kukurataho.

¹³ Twagaruza amisho enyuma nitubasa kwerebera ku Yehova ari we owabire ari kuhabura abahereza beye omuri obwo bwire obugumire. Omuri obwo bwire bw’Orutaro II rw’ensi yona, abahereza ba Yehova b’omu mahanga mingi bakesimira obwire bw’obusinge n’obugabe obu batungire obwatumire bakora omurimo  g’okuburira. Mazima ogo murimo gukakizaho kukorwa.

14. Ahabw’enki tushemerire kwesiga obuhabuzi obu turi kuhembwa n’ekitongore ca Yehova n’obu turi kuhembwa n’abazehe abu yatireho? (Okushururwa 2:1) (Nambwenu reba ekishushani.)

¹⁴ Omuri obu bwire, abagizire Akakiko k’Abarisa nibagumizamu kukuratiza obuhabuzi bwa Kristo. Nibaba bari kwenda kugambira benetata na banyanyazi obuhabuzi obu batunga burugire omu iguru. Nibabugambira abareberezi abari kutayayira ebibina n’abazehe kugira ngu babigambire ebibina. c Abazehe abatirweho bari ‘omu mikono ya Kristo.’ (Shoma omu Kushururwa 2:1.) Ni amazima abo bazehe tibahikirire kandi nibabasa kukora enshobe. Obumwe Musa na Yoshuwa, bakaba nibashobya kandi ni ko oku cabire kiri n’aha ntumwa. (Kub 20:12; Yos 9:14, 15; Rom 3:23) Na hati, Kristo nagumizamu kuhabura omwambari w’omwesigwa n’abazehe abatirweho kandi nayija kugumizamu kukikora asyo ‘okuhisya obu egi ensi erihwaho.’ (Mat 28:20) Obwe rero twine enshonga nyingi ezishemerire kutuma twayesiga obuhabuzi obu turi kuhebwa n’abo bantu abatirweho kugira ngu batwebembere.

NITUGASIRWA TWAGUMIZAMU KUKURATIZA OBUHABUZI BWA YEHOVA

15-16. Ni enki eki ori kwegera aha bakuratize obuhabuzi bwa Yehova?

¹⁵ Twagumizamu kukuratiza obuhabuzi obu Yehova ari kutuha nitutunga emigisha nangwa n’omuri obu bwire. Ecokureberaho: Andy na Robyn bakakuratiza obuhabuzi bw’okorobya embera. (Mat 6:22.) Eco kikatuma baba abayambi abari kuyamba omu by’obwombeki bw’ekitongore kitu. Robyn akagamba ati: “Tukaba nitutura omu tuju tuce, obumwe oshanga tutine n’ekikoni. Kandi nkaguza ebikoreso ebi nabire ndi kukoresa omu murimo g’okukwata ebishushani, n’ebindi bikoreso ebi nabire ndi kukunda. Ebyo bikanshasha. Konka nk’oku byabire biri aha mukazi wa Aburahamu ari we Sara, nkaba maririre kureba eby’omu misho ahu kureba eby’enyima.” (Heb 11:15) Mbwenu shi ogo mushija n’omukazi bakegera ki aha byababireho? Robyn akagamba ati: “Tukamarwa ahabw’okumanya ku twahire Yehova ebintu byona ebi twabire twine. Obu twabire turi kwekwatanisa omu mirimo eyi twabire nituhebwa omu kitongore, kikaba nikituma twayehuriza oku amagara garije kuba gari omu nsi ensya.” Andy na we akakikiriza ari kugamba ati: “Mazima tukatunga okumarwa  ahabw’okushagika Obukama bwa Ruhanga omu bwijwire.”

¹⁶ Ni bata oku turi kugasirwa twagumizamu kukuratiza obuhabuzi bwa Yehova? Ecokureberaho: Marcia ku yaherize kwega amashomero makuru akaba ari kwenda kukuratiza obuhabuzi obu yahirwe bw’okuba omupayoniya. (Mat 6:33; Rom 12:11) Akagamba ati: “Nkaba nahibwe oburyo bwo kwegera busha emyaka ena omuri yunivasiti. Konka nkaba ninyenda kuhika aha ntego z’eby’omwika. Obwe rero omu mwanya g’okuzayo nkasharamu kwega emyoga eyabire erije kutuma natunga otusente tw’okukwasa kukora omurimo g’obupayoniya. Mazima eyo niyo nsharamu ndungi eyi nakozire. Hati ndi omupayoniya w’obwire bwona kandi ahabw’okuba nyine omurimo ogu ndi kukora obwire buce, kikatuma nabasa kuyaba ahari beteli kandi catuma nabona n’ebindi bintu byingi ebi Yehova ari kunkorera.”

17. Ni eha ndijo migisha eyi turi kutunga ku turi kukuratiza obuhabuzi bwa Yehova? (Isaya 48:17, 18)

¹⁷ Obumwe nitukira kuhebwa obuhabuzi oburi kutukwasa kwerinda kukunda obutungi n’okwerinda ebindi bintu byona ebiri kubasa kutuma twashisha ebiragiro bya Ruhanga. Aha bikwatirine n’ebyo nitugasirwa twakuratiza obuhabuzi obu Yehova ari kutuha. Nikituma twagira omuntuwomunda otari kutucwera orubanja kandi kiturinda n’ebindi bizibu byingi. (1 Tim 6:9, 10) Eco nikituma twakorera Yehova omu bwijwire n’omutima gwitu gona, ebyo bituretera obusinge, okushemererwa n’okumarwa.—Shoma omuri Isaya 48:17, 18.

18. Ahabw’enki wamaririra kugumizamu kukuratiza obuhabuzi bwa Yehova?

¹⁸ Hatariho okubanganisa Yehova nayija kugumizamu kukoresa abantu omu kutwebembera n’omu kutuha obuhabuzi omu bwire bw’okubonabona kwingi n’omu bwire bw’obutegeki bw’emyaka rukumi. (Zab 45:16) Mbehi nitwija kugumizamu kukuratiza obwo buhabuzi n’obu bwakuba butari kubugana n’ebi turi kwenda? Emirundi myingi nibyija kurugirira aha ku turi kukwata obuhabuzi obu Yehova ari kutuha omuri obu bwire. Obwe rero, nimureke tugumizemu kukuratiza obuhabuzi obu Yehova ari kutuha birabire aha bantu abu yatireho ngu batwebembere. (Isa 32:1, 2; Heb 13:17) Ku turakikore tusyo, nitwija kwesiga Omuhabuzi witu mukuru Yehova omu bwijwire, we ori kuturinda ekintu cona ekiri kubasa kushisha obunywani bwitu na we, kandi nayija kutuha magara agatahwaho omu nsi esya.