1. Akoz nou devret swiv gidans Zeova? Donn en legzanp.

 METON ou’n perdi dan en lafore. Dan sa lafore i annan en kantite danze. I annan bann zannimo feros, zensek ki kapab donn ou maladi, plant anpwazonnen ek bann landrwa kot i annan en kantite ros. Ou ti pou vreman rekonesan si i annan en dimoun avek ou pour gid ou, ki konn byen sa landrwa, ki konnen kote ki danzere e ki kapab ed ou evit sa bann danze. Sa lemonn ki nou pe viv ladan i parey sa lafore. I annan en kantite danze ki kapab gat nou lanmitye avek Zeova. Me nou annan en Gid ki parfe e sa i Zeova. I gid nou lwen avek sa bann danze ver nou destinasyon setadir ver lavi eternel dan sa nouvo lemonn.

2. Ki mannyer Zeova i gid nou?

² Ki mannyer Zeova i gid nou? Premyerman atraver son Parol Labib. Me i osi servi bann imen pour gid nou. Par egzanp i servi “sa lesklav fidel e pridan” pour donn nou manze spirityel ki ed nou fer bann desizyon ki saz. (Mat. 24:45) Zeova i osi servi lezot zonm kalifye pour gid nou. Par egzanp bann sirveyan rezyonal ek bann ansyen dan kongregasyon i donn nou lankourazman ek bann lenstriksyon ki kapab ed nou fer fas avek bann moman difisil. Nou vreman rekonesan ki Zeova pe donn nou sa bon gidans dan sa bann dernyen zour. Sa gidans ki Zeova i donn nou i ed nou pour nou kontinyen ganny son laprouvasyon pour ki nou kapab viv ere depi la konmela e pour touzour.

3. Ki nou pou vwar dan sa lartik?

³ Parfwa i kapab difisil pour swiv gidans Zeova sirtou ler i ganny donnen par bann zonm enparfe. Akoz? I kapab ki sa konsey ki zot pe donn nou i pa sa ki nou anvi tande. Oubyen i kapab ki nou santi ki sa konsey ki zot pe donn nou pa fer  sans e i pa kapab ki i sorti kot Zeova. Dan bann moman koumsa nou bezwen annan konfyans ki Zeova i sa enn ki pe diriz son pep e ler nou swiv son gidans, sa pou toultan bon pour nou. Sa lartik pou ed nou annan plis konfyans ki Zeova ki pe gid nou. Nou pou vwar (1) ki mannyer Zeova ti gid son pep dan letan Labib, (2) ki mannyer i pe gid nou ozordi e (3) ki byenfe nou gannyen ler nou kontinyen swiv son gidans.

LAFASON KI ZEOVA TI GID PEP IZRAEL

4-5. Ki mannyer Zeova ti montre ki i ti pe servi Moiz pour gid bann Izraelit? (Vwar portre lo kouvertir.)

⁴ Zeova ti swazir Moiz pour diriz pep Izrael ler zot ti pe kit Lezip. I ti donn bann Izraelit laprev ki Li ki ti pe gid zot atraver Moiz. Par egzanp, i ti servi en kolonn nyaz lizour e en kolonn dife aswar pour gid zot. (Egz. 13:21) Moiz ti swiv sa kolonn ki ti diriz zot ziska Lanmer Rouz. Me bann Ezipsyen ti tay deryer bann Izraelit. Alor bann Izraelit ti vreman per parski zot ti krwar ki bann Ezipsyen ti pou touy zot. Zot ti krwar ki Moiz ti’n fer en fot pour anmenn zot kot Lanmer Rouz. Me i pa ti en fot. Zeova ki ti’n gid Moiz pour anmenn son pep ziska Lanmer Rouz. (Egz. 14:2) Apre sa, Bondye ti sov zot dan en fason ekstraordiner.—Egz. 14:26-28.

⁵ Pandan 40 an, Moiz ti kontinyen annan konfyans ki Zeova ti pe servi sa kolonn nyaz pour gid pep Bondye dan dezer. a Pour en pe letan, Zeova ti met sa kolonn nyaz par lao latant Moiz kot tou bann Izraelit ti kapab vwar. (Egz. 33:7, 9, 10) Zeova ti koz avek Moiz atraver sa kolonn nyaz e apre Moiz ti dir pep Izrael sa ki Zeova ti’n dir. (Ps. 99:7) Bann Izraelit ti annan ase levidans ki Zeova ti pe servi Moiz pour gid zot.

6. Ki mannyer bann Izraelit ti reazir anver gidans Zeova? (Nonm 14:2, 10, 11)

⁶ Malerezman laplipar Izraelit pa ti aksepte ki Zeova ti’n swazir Moiz konman Son reprezantan. (Lir Nonm 14:2, 10, 11.) Plizyer fwa zot ti refize pour aksepte ki Zeova ti pe servi Moiz pour gid zot. Sa ti fer ki Zeova pa ti permet sa zenerasyon Izraelit pour antre dan Later Promiz.—Nom. 14:30.

7. Lekel ki ti swiv gidans Zeova? Donn legzanp. (Nonm 14:24) (Vwar portre.)

⁷ I ti annan serten Izraelit ki ti swiv gidans Zeova. Par egzanp, Zeova ti dir: “Kaleb . . . i’n toultan obei mwan avek tou son leker.” (Lir Nonm 14:24.) Bondye ti rekonpans Kaleb e i ti menm permet li pour swazir kote ki i anvi reste dan Later Promiz. (Zoz. 14:12-14) Bann Izraelit ki ti ganny drwa antre dan Later Promiz ti osi swiv gidans Zeova. Ler Zozye ti ganny apwente konman sa enn ki pou diriz bann Izraelit apre Moiz, zot ti “annan bokou respe pour Zozye.” (Zoz. 4:14) Sa ti fer ki Zeova ti beni zot e donn zot sa pei ki i ti’n promet zot.—Zoz. 21:43, 44.

8. Ki mannyer Zeova ti gid son pep dan letan bann lerwa? Eksplike. (Vwar portre.)

⁸ Plizyer lannen pli tar, Zeova ti swazir bann ziz pour gid son pep. Pli tar, dan letan bann lerwa, Zeova ti apwent bann profet pour gid son pep. Bann lerwa ki ti fidel ti swiv konsey bann profet. Par egzanp, Lerwa David ti demontre limilite e i ti aksepte konsey profet Natan. (2 Sam. 12:7, 13; 1 Kron. 17:3, 4) Lerwa Zeosafat ti swiv gidans profet Zaazyel e i  ti ankouraz pep Zida pour ‘annan lafwa dan bann profet’ Bondye. (2 Kron. 20:14, 15, 20) Ler Lerwa Ezekya ti enkyet, i ti rod led avek profet Izai. (Iza. 37:1-6) Sak fwa ki bann lerwa ti swiv gidans Zeova, Zeova ti beni zot e protez son pep. (2 Kron. 20:29, 30; 32:22) Tou dimoun ti’n devret konpran ki Zeova ti pe servi son bann profet pour gid son pep. Me laplipar lerwa ek bann Izraelit pa ti ekout bann profet Zeova.—Zer. 35:12-15.

LAFASON KI ZEOVA TI GID BANN KRETYEN DAN PREMYE SYEK

9. Lekel ki Zeova ti servi pour gid bann Kretyen dan premye syek? (Vwar portre.)

⁹ Dan premye syek, Zeova ti form kongregasyon Kretyen. Ki mannyer Zeova ti gid bann Kretyen sa letan? I ti apwent Zezi konman sef kongregasyon. (Efe. 5:23) Me Zezi pa ti koz avek sak disip pour dir zot ki pour fer. I ti servi bann zapot ek bann ansyen ki ti Zerizalenm pour diriz zot. (Akt 15:1, 2) I ti osi annan bann ansyen ki ti ganny apwente pour diriz kongregasyon.—1 Tesa. 5:12; Tit 1:5.

10. (a) Ki mannyer laplipar bann Kretyen dan premye syek ti reazir anver gidans Zeova? (Akt 15:30, 31) (b) Akoz serten pa ti swiv gidans bann ki Zeova ti’n apwente pour gid zot? (Vwar sa bwat “ Akoz serten ti rezet levidans kler?”)

¹⁰ Eski bann Kretyen dan premye syek ti aksepte gidans ki zot ti gannyen? Laplipar parmi zot ti kontan pour swiv bann lenstriksyon ki zot ti gannyen. Anfet, “zot ti byen kontan” sa lankourazman ki zot ti gannyen. (Lir Akt 15:30, 31.) Me ki mannyer Zeova pe gid son pep dan nou letan?

LAFASON KI ZEOVA I GID NOU OZORDI

11. Ki mannyer Zeova in gid bann ki pe diriz son pep dan nou letan? Donn en legzanp.

¹¹ Zeova pe kontinyen diriz son pep ozordi. I fer sa atraver son Parol ek son Garson, ki sef kongregasyon. Eski nou annan levidans ki Bondye pe osi kontinyen servi bann imen pour gid son pep dan nou letan? Wi. Annou vwar par egzanp sa ki ti arive apre lannen 1870. Charles Taze Russell ek son bann koleg ti konmans konpran ki lannen 1914 ti pou en lannen enportan pour Rwayonm Bondye. (Dan. 4:25, 26) Zot ti konpran sa parski zot ti’n  fer resers dan Labib e zot ti annan konfyans ki bann profesi Labib pou vin vre. Eski Zeova ti pe gid zot dan zot bann resers? I kler ki Zeova ki ti pe gid zot parski sa ki ti arive an 1914 ti montre ki Rwayonm Bondye ti’n konmans dirize. Premye Lager Mondyal ti konmanse e i ti annan bann lepidemi, tranblemandter ek mankman manze. (Lik 21:10, 11) I kler ki Zeova ki ti pe servi sa bann zonm senser pour gid son pep.

12-13. Ki bann frer ki ti pe diriz lorganizasyon Zeova pandan Dezyenm Lager Mondyal ti fer pour ed bann frer ek ser pour fer plis dan predikasyon?

¹² Annou vwar ki ti arive pandan Dezyenm Lager Mondyal. Apre ki bann frer kot Biro prensipal Temwen Zeova ti’n etidye Revelasyon 17:8, zot ti konpran ki sa lager pa ti pou anmenn ver Armagedon me ziska en letan kot i ti pou annan lape, kot bann Temwen Zeova ti pou kapab anons sa bon nouvel avek plis dimoun. Alor menm si i pa ti paret fer sans sa letan, lorganizasyon Temwen Zeova ti organiz Lekol Gilead pour form bann misyonner pour fer predikasyon partou lo later. Menm si i ti annan lager, bann misyonner ti ganny anvoye dan diferan landrwa. An plis ki sa, sa lesklav fidel ti konmans laklas pour Minister Teokratik b pour form tou dimoun dan bann kongregasyon pour vin bann pli bon proklanmater ek ansenyan Labib. Dan sa bann fason, pep Bondye ti pe ganny prepare pour sa travay predikasyon ki ti bezwen ganny fer.

¹³ Ozordi, nou kapab vwar klerman ki Zeova ti pe gid son pep pandan sa letan difisil. Depi Dezyenm Lager Mondyal, pep Zeova dan plizyer pei i lib pour anons sa bon nouvel dan lape. Anfet depi sa letan, en kantite dimoun in aprann konn Zeova e son bann serviter pe anons sa bon nouvel partou lo later.

14. Akoz nou kapab annan konfyans dan gidans ki nou gannyen sorti kot lorganizasyon Zeova e kot bann ansyen? (Revelasyon 2:1) (Vwar portre.)

¹⁴ Ozordi, bann manm Konsey Direkter pe kontinyen rod gidans Kris. Zot anvi ki bann lenstriksyon ki zot donn bann frer ek ser i reflekte pwennvi Zeova. Zot osi servi bann sirveyan rezyonal ek ansyen pour diriz bann kongregasyon. c Bann ansyen ki form parti bann Kretyen swazir e dan en serten sans tou ansyen dan kongregasyon, i ‘dan lanmen drwat’ Kris. (Lir Revelasyon 2:1.) Byensir bann ansyen i enparfe e zot fer fot. Moiz ek Zozye ti fer fot parfwa. (Nom. 20:12; Zoz. 9:14, 15; Rom. 3:23) Kantmenm sa, Zezi pe kontinyen gid sa lesklav fidel e pridan ek bann ansyen e i pou kontinyen fer sa “tou le zour ziska lafen sa lemonn.” (Mat. 28:20) Alor nou annan tou rezon pour annan konfyans dan gidans ki Zezi pe donn nou atraver bann ki’n ganny swazir pour dirize.

NOU GANNY BANN BYENFE LER NOU KONTINYEN SWIV GIDANS ZEOVA

15-16. Ki ou aprann avek leksperyans bann ki’n swiv gidans Zeova?

¹⁵ Ler nou kontinyen swiv gidans Zeova, nou ganny bann byenfe depi la konmela. Par egzanp, Andy ek Robyn ti swiv sa konsey pour senplifye zot lavi. (Vwar not letid dan nwtsty dan Matye 6:22.) Sa i fer ki zot ti kapab volonter pour travay lo bann proze konstriksyon ki pour lorganizasyon Temwen Zeova. Robyn i dir: “Nou’n reste dan bann pti landrwa kot souvan ti napa en lakwizin. Mon ti bezwen vann en kantite lekipman ki mon servi pour tir portre. Mon ti plere ler mon ti fer sa parski mon ti kontan tir portre. Me parey Sara, madanm Abraam, mon ti deside pour pa sagren konsernan bann keksoz ki mon’n kit deryer me pou zwaye konsernan bann keksoz ki mon kapab fer pour Zeova.” (Ebr. 11:15) Ki byenfe sa koup ti gannyen apre ki zot ti’n fer sa bann desizyon? Robyn i dir: “Nou vreman kontan parski nou konnen ki nou pe donn Zeova tou sa ki nou annan. Ler nou travay lo bann proze pour lorganizasyon Zeova, nou ganny en apersi lo ki mannyer lavi pou ete dan nouvo lemonn.” Andy i dakor avek sa ki son madanm i dir e i osi dir: “Nou zwaye parski nou donn tou nou letan ek lenerzi pour siport sa travay Rwayonm.”

¹⁶ Ki lezot byenfe nou gannyen ler nou kontinyen swiv gidans Zeova? Par egzanp, annou vwar leksperyans Marcia. Apre ki Marcia ti’n fini lekol segonder, i ti  vreman anvi swiv sa konsey ki i ti’n gannyen pour pran servis pionye. (Mat. 6:33; Rom. 12:11) I dir: “Mon ti ganny en labours pour al liniversite pour kat-r-an. Me mon ti anvi fer plis pour Zeova. Alor mon ti swazir pour al en lekol kot mon kapab aprann en metye ki pou ed mwan ganny ase larzan pour siport mon lekor anmezir mon fer pionye. Sa i enn bann pli bon desizyon ki mon’n fer. Aprezan, mon en pionye e mon vreman zwaye. Vi ki mon ler travay i fleksib, mon kapab ede dan Betel e fer lezot keksoz pour Zeova.”

17. Ki lezot byenfe nou gannyen ler nou kontinyen swiv gidans Zeova? (Izai 48:17, 18)

¹⁷ Parfwa nou ganny konsey sorti kot lorganizasyon Zeova ki averti nou konsernan kontan larzan e konsernan fer bann keksoz ki kapab fer nou dezobei lalwa Bondye. Si nou swiv gidans Zeova dan sa bann domenn, nou pou ganny bann byenfe. Nou pou annan en konsyans kler e nou pou evit en kantite problenm. (1 Tim. 6:9, 10) Sa pou fer ki nou pou kapab servi Zeova avek tou nou leker e i napa nanryen ankor ki kapab fer nou pli zwaye e anpe ki sa.—Lir Izai 48:17, 18.

18. Akoz ou determinen pour kontinyen swiv gidans Zeova?

¹⁸ Nou kapab asire ki Zeova pou kontinyen servi bann imen pour donn gidans son pep pandan gran ladetres e pandan Renny Mil an Kris. (Ps. 45:16) Eski nou pou kontinyen swiv gidans Zeova menm ler nou ti pou pli kontan fer en lot keksoz? I pou pli fasil pour nou fer sa si nou swiv gidans Zeova la konmela. Alor annou toultan swiv gidans Zeova ki enkli gidans ki nou gannyen avek bann zonm ki Zeova in apwente pour vey lo nou. (Iza. 32:1, 2; Ebr. 13:17) Anmezir nou fer sa, nou annan bon rezon pour annan konfyans dan nou Gid, Zeova parski Zeova pe diriz nou lwen avek okenn keksoz ki kapab gat nou lanmitye avek li e i pe gid nou ver lavi eternel dan nouvo lemonn.