1. Pine nemen matre loi e tro sa trongëne la itre hna amekötine hnei Iehova? Qaja jë la ketre ceitun.

 PANE mekune jë laka, patre hë easë nyipine la hna xulu. Tro së lai a xou, wanga heji së jë hnei ketre öni ka ses, me itre neköi öni, tune la inyonya, maine tro pena apoizinë së hnene la ketre feja. Maine jë, tro fe së lai a mala e hnine la ketre hnaop ka jui. Tro së lai a madrin e ce easë memine la ketre atr ka atre hnyawa la götrane cili, nge ka troa thupë së! Ceitune hi la fen celë, memine la hna xulu cili. Tru catre la itre ewekë ka troa angazone la imelekeu së me Iehova. Ngo ce Iehova me easë, Atre eatrongë së. Nyidrëti a xatua së troa neëne la itre jol, me xometrongë së kowe la mele ka pë pun.

2. Tune kaa la aqane eatrongë së hnei Iehova enehila?

² Tune kaa la aqane eatrongë së hnei Iehova enehila? Jëne la Tusi Hmitrötr. Nge jëne fe la itre atr hnei Nyidrëti hna acil. Nyidrëti a huliwane “la hlue ka nyipici me ka inamacan” matre hamëne la “xen” ka troa xatua së troa axecië mekun hnyawa. (Mat. 24:45) Nyidrëti fe a huliwane la itre xaa trejin ka macaj. Itretre thupë sirkoskripsio me itre qatre thup a ithuecatre koi së me hamë ixatua, ngöne la easa cile kowe la itre jol. Easa madrine troa kapa la ixatua qaathei angatr ngöne la itre ijine jol! Ame la easa kapa la ixatua i angatr, ke easë hi lai a acatrene la imelekeu së me Iehova, me lapa ngöne la gojenyi ne mel.

3. Nemene la hne së hna troa ce wang ngöne la tane mekune celë?

³ Ngo ame itre xaa ijin, jole koi së troa trongëne la itre hna amekötine qaathei Iehova, nge hna hamën hnene la itre trejin trahmany ka tha pexeje kö. Pine nemen? Pine laka, itre hna amekötine lai ka sewe së troa kuca la sipu aja së. Maine pena tro sa mekune ka hape, tha ka meköti kö lai hna amekötin, nge tha qaathei Iehova kö. Ngo, loi e xecie koi së laka,  Iehova la ka eatrongëne la nöje i Nyidrë, nge hetre eloine la troa drengethenge la hnei Nyidrëti hna amekötin. Maine aja së troa acatrene la mekune cili, tro sa ce wange ngöne la tane mekune celë, (1) la aqane eatrongëne Iehova la nöje i Nyidrëti ekö, (2) la aqane eatrongë së enehila, me (3) itre eloine la tro sa drengethenge la hnei Nyidrëti hna amekötin.

AQANE EATRONGËNE IEHOVA LA ANGETRE ISARAELA

4-5. Iehova a amamane tune kaa ka hape, Nyidrëti a eatrongëne la angetre Isaraela jëne Mose? (Wange ju la icetrön.)

⁴ Hnei Iehova hna acili Mose, matre troa amelene la angetre Isaraela qa Aigupito. Nge hnei Nyidrëti hna hamëne koi angatr la itre hatrene ka amamane ka hape, Nyidrëti a eatrongë angatr, jëne Mose. Ame e lai, angatr a öhne la iaw ka cile meköt, nge e jidr, la eë ka cile meköt. (Eso. 13:21) Hnei Mose memine la nöje hna xötrethenge la iaw maine eë ka cile meköt, uti hë traqa angatr qëmekene la Hnagejë Ka Palulu. Ngo pine laka, kola weje huzu angatr hnene la angetre Aigupito, matre angatr a mekun ka hape, tro hë angatr a mec. Ame koi angatr ka tria la mekuna i Mose, ene la troa trosai angatr kowe la Hnagejë Ka Palulu. Ngo ame pe, nyipici Mose hi. Aja i Iehova tro Mose a xometrongëne la angetre Isaraela kowe la götrane cili. (Eso. 14:2) Nyine haine la aqane amele angatre hnei Iehova.​—Eso. 14:26-28.

⁵ Ame ngöne la 40 lao macatre, hnei Mose memine la nöj hna xötrethenge la iaw ka cile meköt ngöne la hnapapa. a Hnei Iehova hna acile la iaw hune la itate i Mose, matre mama hnyawa kowe la nöj. (Eso. 33:7, 9, 10) Iehova a ithanata me hamëne la itre hna amekötine koi Mose jëne la iaw, nge Mose pë hë a tro fë itre ej kowe la nöj. (Sal. 99:7) Kola mama hnyawa kowe la angetre Isaraela laka, Iehova a eatrongë angatr, jëne Mose.

6. Tune kaa la aqane ujë la angetre Isaraela kowe la atr hnei Iehova hna acil? (Numera 14:2, 10, 11)

⁶ Ngazo pe, xele kö la angetre Isaraela troa kapa ka hape, Iehova a ithanata jëne Mose. (E jë la Numera 14:2, 10, 11.) Ketre, anyimua xele angatr ma kapa la hnëqa i Mose laka, hna acili angeic hnei Iehova troa iuji angatr. Celë hi matre, tha hna aijijë angatre kö troa hane lö kowe la Nöj Hna Thingehnaean.​—Num. 14:30.

7. Drei la itre ka drengethenge la itre hnei Iehova hna acil? (Numera 14:24) (Wange ju fe la iatr.)

⁷ Ame pe, hetre itre xaa atre Isaraela ka drengethenge la atr hnei Iehova hna acil. Öni Iehova göi Kaleba ka hape: “Loi la hluenge Kaleba . . . hna cengöne denge thenge ni.” (E jë la Numera 14:24.) Hnei Akötresie hna amanathithi Kaleba, me nue angeic troa iën la götrane hnei angeic hna troa lapan e Kanana. (Ios. 14:12-14) Hnene fe la angetre Isaraela ka lö kowe la Nöj Hna Thingehnaean hna drengethenge Iehova. Ame la kola acili Iosua thupei Mose, troa iujine la nöj, hnene la angetre Isaraela hna “qoue angeice . . . ngöne la nöjei drai asë ne mele angeic.” (Ios. 4:14) Celë hi matre, hnei Iehova hna amanathithi angatr, me aijijë angatr troa hane lö kowe la Nöj Hna Thingehnaean.​—Ios. 21:43, 44.

8. Qejepengöne jë la aqane eatrongëne Iehova la nöje i Nyidrë ngöne la hneijine la itre joxu. (Wange ju fe la iatr.)

⁸ Itre macatre thupen, hnei Iehova hna acil la itretre amekötin, matre eatrongëne la nöj. Nge ame hë la kola acil la hnanyijoxu, hnei Nyidrë hna upe la itre perofeta. Hnene  la itre xaa joxu hna dreng la itre eamo ne la itre perofeta. Ka tui Dravita joxu, hnei nyidrë hna kapa la ihaji qaathei Nathana perofeta. (2 Sam. 12:7, 13; 1 A. l. ite jo. 17:3, 4) Hnei Iehosafata joxu hna drei Iaziela perofeta, me ithuecatr kowe la nöje Iudra troa ‘lapaune kowe la itre perofeta i Akötresie.’ (2 A. l. ite jo. 20:14, 15, 20) Ame ngöne la itre ijine jol, hnei Hezekia joxu hna thele ixatua thei Isaia perofeta. (Is. 37:1-6) Ame la itre joxu a thele ixatua thei Iehova, kola madrin me mele tingeting la nöj. (2 A. l. ite jo. 20:29, 30; 32:22) Maine ju, tro hi angatr a öhne laka, Iehova a iujine la nöj jëne la itre perofeta. Ngazo pe, alanyimu kö la itre joxu me angetre Isaraela, ka xele ma wang la itre perofeta.​—Iere. 35:12-15.

AQANE EATRONGËNE IEHOVA LA ITRE PANE KERESIANO

9. Drei la hnei Iehova hna acil troa eatrongëne la itre pane keresiano? (Wange ju fe la iatr.)

⁹ Ame ngöne la Penetekos macatre 33, hnei Iehova hna acil la ekalesia ne la itre keresiano. Tune kaa la aqane eatrongëne Nyidrë la itre pane keresiano? Hnei Nyidrë hna acili Iesu, he ne la ekalesia. (Efe. 5:23) Ngo tha hnei Iesu kö hna hamëne mekötine la itre eamo kowe la itretre dreng, angatr isa ala cas. Hnei nyidrëti hna up la itre aposetolo me itre qatre thup troa thupëne la ekalesia. (Itre hu. 15:1, 2) Ketre, kola acil la itre qatre thup ngöne la itre xaa ekalesia.​—1 Thes. 5:12; Tito 1:5.

10. (a) Nemene la aqane ujë ne la itre pane keresiano kowe la hna amekötine hna hamën? (Itre Huliwa 15:30, 31) (b) Hnauëne laka, itre hlue Iehova ekö, a xele ma wang la itre atr hnei Iehova hna acil? (Wange ju la hna eköhagen “ Hnauën La Angatr a Catre Fë Mekun?”)

¹⁰ Nemene la aqane ujë ne la itre pane keresiano kowe lai hna amekötin? Alanyimu la itre ka madrin troa trongëne la hna amekötine cili. Eje hi, ‘madrine catr angatr kowe la ithuecatre hna hamën.’ (E jë la Itre Huliwa 15:30, 31.) Iehova a eatrongëne tune kaa la nöje i Nyidrë enehila?

AQANE EATRONGË SË ENEHILA HNEI IEHOVA

11. Nemene la ka amamane ka hape, hnei Iehova hna eatrongëne la nöje i Nyidrë, jëne Charles Taze Russell me itre sine huliwa i nyidrë?

¹¹ Enehila mina fe, Iehova a eatrongëne la nöje i Nyidrë. Nyidrëti a eatrongë së jëne  la Tusi Hmitrötr, me jëne Iesu, he ne la ekalesia. Mama kö koi së laka, Iehova a huliwan la itre atr hna acil enehila? Öö. Pane mekune jë la ka traqa ngöne lo pune la itre macatre 1800. Hnei Charles Taze Russell me itre sine huliwa i nyidrë hna trotrohnine laka, ka nyipiewekë la macatre 1914, ke kolo ijine acile la Baselaia i Akötresie. (Dan. 4:25, 26) Hnei angatr hna trotrohnine lai, thupene la angatr a ithel me inine la itre hna perofetan. Hnei Iehova kö hna xatua angatr? Öö, eje hi. Ame lo 1914, hna traqa la itre ewekë e celë fen ka anyipicine laka, cile hë la Baselaia i Akötresie. Hna traqa la Pane Isi Katru, thupene lai, itre mec ka ixötrekeu, me itre sa me itre jiin. (Luka 21:10, 11) Eje hi, Iehova a eatrongëne la nöje i Nyidrë jëne la itre atr cili, itre ka catr inine la Tusi Hmitrötr.

12-13. Nemene la itre ewekë hna eköth ngöne lo Hnaaluene Isi Katru, ka acatrene la huliwa ne cainöj?

¹² Pane mekune jë së la itre ewekë ka traqa ngöne lo lai Hnaaluene Isi Katru. Thupene hë la hna trotrohnine la tusi Hna Amaman 17:8, hnene la itre trejin ka elemeken la huliwa ne cainöj hna wangatrehmekun laka, tha tro kö a nyipune la isi cili hnei Amagedro. Ngo, ketre ijine tingetinge pe, ka troa acatrene la huliwa ne cainöj. Celë hi matre, hnene la itre trejin hna eköth lo Gileada, ketre uma ne ini ne la Société Watchtower. Maine ju, tha ijije kö troa eköthe la huliwa cili, ke kola catrehnine la isi. Ame la kepin matre acile jë la uma ne ini cili, ke göne matre troa hnëkëne la itre mesinare, kola qaja la itre keresiano ka troa cainöj me inine la maca ka loi, ngöne la itre götrane la fen. Ngacama kolo palahi a catrehnine la isi, ngo hna tro la itre mesinare ngöne la itre götran hna upi angatre kow. Ketre, hnene fe la hlue ka nyipici me ka inamacan hna acile lo Ini Thatraqane La Huliwa i Akötresie, b matre troa xatuane la itre trejin ne la ekalesia troa maca troa cainöj me inine la itre atr. Itre ini lai, ka troa hnëkëne la itre hlue i Akötresie kowe la ketre huliwa ka tru.

¹³ Kola mama hnyawa enehila ka hape, Iehova kö la ka iujine la nöje i Nyidrë ngöne la ijine cili. Qaane lo Hnaaluene Isi  Katru, kola tingeting la itre nöj, nge celë hi ka aijijëne la itre hlue i Akötresie troa catre cainöj. Eje hi, kola kökötre lolo la huliwa ne cainöj e cailo fen.

14. Hnauëne laka, easa mejiun kowe la itre hna amekötin hna hamën hnene la organizasio i Iehova me itre qatre thup? (Hna Amaman 2:1) (Wange ju fe la iatr.)

¹⁴ Enehila mina fe, Lapa Ne Xomi Meköt a trongëne la itre hna amekötin hnei Keriso. Ame la aja i angatr, ke tro la itre hna amekötin hnei angatr hna hamën, a trothenge palahi la aja i Akötresie. Tro pë hë la itre qatre thup me itretre thupë sirkoskripsio a hamën la itre hna amekötine cili, kowe la itre ekalesia. c Ame la itre trejin hna iën, nge ka qatre thup, ke angatr “ngöne la ime maca i [Keriso].” (E jë la Hna Amaman 2:1.) Nyipici laka, tha ka pexeje kö la itre qatre thup, tro fe angatre lai a hane tria. Hnei Mose me Iosua memine la itre aposetolo hna hane tria fe ekö. (Num. 20:12; Ios. 9:14, 15; Rom. 3:23) Ame pe, Keriso palahi a eatrongëne la hlue ka nyipici me itre qatre thup, nge tro palahi nyidrëti a kuca tun “uti hë la troa nyipune la fene celë.” (Mat. 28:20) Haawe, nyipiewekë tro sa mejiune kowe la itre hna amekötin hna hamën hnene la itre trejin ka elemekene la organizasio.

TROA MANATHITH LA ATR XÖTRETHENGE LA ITRE HNA AMEKÖTIN

15-16. Nemene la hna ini së hnene la itre trejin ka xötrethenge la itre ithuecatre i Iehova?

¹⁵ Tro sa kapa la itre manathith enehila, e tro sa trongëne la itre hna amekötine hnei Iehova. Tui Andy me Robyn, hnei nyidro hna ahmaloeëne la mele i nyidro, thenge la ithuecatr hna hamën hnene la hlue ka nyipici me ka inamacan. (Heb. 13:5) Celë hi ka aijijë nyidro troa hane saen troa xupi Uma Ne Baselaia. Öni Robyn: “Nyio a lapa ngöne la itre hnahag ka co, nge ame itre xaa ijin, pëkö kecen. Ka pi foto catre ni, ngazo pe, hnenge hna salemën asë la itre xaa nyine xomi fotong. Tha aqane treije kö ni la ijine cili. Ngo tui Sara, föi Aberahama, hnenge hna catr goeëne qëmekeng, ngo tha hutrö kö.” (Heb. 11:15) Nemene la itre manathith hnei Andy me Robyn hna kapa, qa ngöne la aqane mele cili? Öni Robyn: “E cili, nyio a öhne laka, kola tru la madrine i nyio la nyio a hamën asë koi Iehova. Ketre, ame la nyio a huliwa kowe la organizasio i  Iehova, ke kola mama koi nyio la mele elany ngöne la fen ka hnyipixe.” Celë fe hi mekuna i Andy, öni angeic: “Madrine catre nyio troa nue la mele i nyio kowe la Baselaia.”

¹⁶ Nemene la itre xaa manathith hne së hna troa kapa, e tro sa xötrethenge la itre hna amekötine hnei Iehova? Thupene la hna ini ngöne lycée, hnei Marcia hna kapa la ithuecatr hna hamën koi angeic, ene la troa huliwa i Iehova drai ka pexej. (Mat. 6:33; Rom. 12:11) Öni angeic: “Hna mekun troa hamë ni la ketre bourse troa ini ngöne université koi 4 lao macatre. Ngo pine laka, eni a ajan troa huliwa catr koi Iehova, hnenge hna iëne troa inine la ketre métier, ka troa aijijë ni troa huliwa i Iehova ngöne la drai ka pexej. Ketre mekune lai ka lolo catr hnenge hna xom. Ame enehila, ketre pionie lapa ha ni. Pine laka, ka lolo hi la huliwang, matre eni fe a hane ixatua ngöne la Bethela, me kuca la itre xaa huliwa ju kö koi Iehova.”

17. Nemene la itre xaa manathith hne së hna kapa, e tro sa trongëne la itre eamo i Iehova? (Isaia 48:17, 18)

¹⁷ Kola thupë së hnene la itre eamo qaathei Iehova, matre tha tro kö sa kei kowe la aja mo me itre xaa ewekë, ka troa upi së troa ena la itre wathebo i Nyidrë. Ketre, hetre eloine mina fe koi së laka, ka lolo la mekuthetheu së, nge tha easë kö a hnehengazo menu. (1 Tim. 6:9, 10) Celë hi ka aijijë së troa nyihlue i Iehova palahi cememine la hni ka pexej, nge ka hamë madrin koi së me tingeting.​—E jë la Isaia 48:17, 18.

18. Pine nemene matre xecie koi epun troa xötrethenge e nöjei drai la itre hna amekötine hnei Iehova?

¹⁸ Xeci hnyawa koi së laka, tro palahi Iehova a huliwane la itre trejin hna acil troa eatrongë së ngöne la ijine akötr atraqatr, uti hë la 1 000 lao macatre ne Musi Iesu. (Sal. 45:16) Hapeu, tro kö sa drengethenge la itre hna amekötine hnei Iehova, ngacama jole troa nue la itre aja së? Tro lai a hmaloi koi së, e tro sa canga kapa la itre hna amekötine cili enehila. Haawe, catre jë trongëne e nöjei drai la itre hna amekötin hna hamëne hnene la itre trejin hna acil, nyine troa thupë së. (Is. 32:1, 2; Heb. 13:17) Eje hi, loi e tro sa xötrethenge Iehova hnyawa, Atre eatrongë së me mejiune koi Nyidrë, ke tro kö Nyidrëti a xatua së troa neëne la itre jol me eatrongë së kowe la mele ka pë pun.