1. Bay roun èkzanp ki ka montré poukisa nou divèt swiv dirèksyon Jéova ka bay nou.

 IMAJINÉ to pédi annan danbwa-a. I gen danjé toupatou : bèt danbwa, zensèk ki pouvé bay to maladi, radyé ki danjéré, trou... To té ké byen kontan gen roun moun ki byen konnèt danbwa-a é ki pouvé idé to évité tout danjé-ya. Monn-an jòdla kou sa danbwa-a. I plen ké bagaj ki danjéré é ki pouvé gaté nou lanmityé ké Jéova. Mé nou gen roun moun ki parfè, ki la ké nou é ki pouvé montré nou chimen-an : Jéova. I ka idé nou évité danjé-ya toupannan i ka gidé nou koté nou lé alé-a : lavi pou tout-tan annan monn nouvo-a.

2. Kouman Jéova ka gidé nou ?

² Kouman Jéova ka gidé nou ? Prémyé bagaj i ka sèrvi, a so Paròl, Labib-a. Mé i ka sèrvi moun osi pou gidé nou. Parèkzanp, i ka sèrvi « èsklav fidèl ké avizé-a » pou bay nou manjé èspirityèl-a ki ka idé nou pran bon désizyon (Mat. 24:45). Jéova ka sèrvi ròt mouché ki vayan osi. Parèkzanp, rèsponsab sirkonskripsyon-yan ké ansyen-yan annan asanblé-ya ka ankourajé nou é ka bay nou konsèy ki pouvé idé nou sipòrté moman ki rèd-ya. A pa ti kontan nou kontan Jéova ka byen gidé nou annan sa dèrnyé jou-ya ki difisil menm ! Sa ka idé nou gardé nou lanmityé ké li épi rété asou chimen lavi-a.

3. Kisa nou ké wè annan sa artik-a ?

³ Mé détan, sa pouvé rèd di swiv dirèksyon Jéova ka bay nou, èspésyalman lò i ka sèrvi moun ki pa parfè pou gidé nou. Poukisa ? Paské détan, yé pouvé doumandé nou fè bagaj ki pa k’alé ké sa nou lé. Ouben, nou pouvé pansé ki roun konsèy yé ka bay nou pa gen sans é ki sa pa pouvé vini di Jéova. Annan sa sitiasyon-yan, a pou nou sir ki a byen Jéova ki ka dirijé so pèp é ki swiv dirèksyon  i ka bay nou bon pou nou. Pou idé nou ankò plis sir di sa, annan sa artik-a nou ké wè : 1) kouman Jéova gidé so pèp tan-lontan, 2) kouman i ka gidé nou jòdla, épi 3) ki bénédiksyon nou ka jwenn lò nou ka swiv dirèksyon i ka bay nou.

KOUMAN JÉOVA GIDÉ NASYON ISRAYÈL-A

4-5. Kouman Jéova montré ki i té ka sèrvi Moyiz pou gidé Israyèl ? (gadé zimaj-a anlè prémyé paj-a).

⁴ Jéova té chwazi Moyiz pou fè Israyélit-ya soti Éjip. É i té ka byen montré yé ki a Moyiz i té ka sèrvi pou gidé yé. Parèkzanp, pannan lajournen-an, Israyélit-ya té ka wè roun kolonn niyaj, épi lannwit, yé té ka wè roun kolonn difé (Ex. 13:21). Moyiz swiv sa kolonn-an é li ké Israyélit-ya rivé douvan lanmè rouj-a. Lò yé wè ki lanmè rouj-a té ka baré yé chimen, é ki dèyè, Éjipsyen-yan té ka ratrapé yé, yé pran pè. Yé koumansé krè ki Moyiz té tronpé so kò lò i té fè yé vini douvan lanmè rouj-a. Mé a pa tronpé i té tronpé so kò, a byen la Jéova té lé fè so pèp vini (Ex. 14:2). É apré sa, i délivré yé di roun fason ki té fò menm (Ex. 14:26-28).

⁵ Apré sa, pannan 40 lannen, Moyiz kontinyé swiv kolonn-an pou i té gidé pèp-a annan dézèr-a a. Pannan roun tan, Jéova mété kolonn-an laro tant Moyiz, roun koté tout Israyélit-ya té pouvé wè l’ (Ex. 33:7, 9, 10). Dipi annan kolonn-an, Jéova té ka di Moyiz sa pèp-a té divèt fè, é Moyiz té k’alé répété pèp-a sa (Ps. 99:7). Donk, Israyélit-ya té ka wè ké yé dé koko wéy ki Jéova té ka sèrvi Moyiz pou gidé yé.

6. Kouman Israyélit-ya réyaji lò Jéova té ka gidé yé ? (Nombres 14:2, 10, 11).

⁶ Malérèzman, près tout Israyélit-ya réfizé wè prèv-ya ki té ka montré ki Jéova té chwazi Moyiz pou palé ké yé (li Nombres 14:2, 10, 11). Plizyèr fwa, yé pa asèpté rékonnèt ki Jéova té ka sèrvi Moyiz pou gidé yé. A pou sa, Jéova pa lésé sa ran Israyélit-ya antré annan Péyi i té promèt yé-a (Nomb. 14:30).

7. Bay èkzanp moun ki swiv dirèksyon Jéova té ka bay yé (Nombres 14:24 ; gadé zimaj-a osi).

⁷ Mé, sèrten Israyélit asèpté swiv dirèksyon Jéova té ka bay yé. Parèkzanp, Jéova di : « Kalèb [...] kontinyé obéyi mo ké tout so tchò » (li Nombres 14:24). Bondjé rékonpansé Kalèb, é i jis lésé l’ chwazi ki koté i té lé rété annan péyi Kanaan-an (Jos. 14:12-14). É Israyélit-ya Jéova lésé antré annan Péyi i té promèt bay yé-a, yé menm osi, yé swiv dirèksyon Jéova bay yé. Tout tan Joziyé gidé pèp-a apré lanmò Moyiz, Labib ka di ki Israyélit-ya « rèspèkté Joziyé pannan tout so lavi » (Jos. 4:14). Donk Jéova béni yé, i fè yé antré annan Péyi i té promèt bay yé-a (Jos. 21:43, 44).

8. Èspliké kouman Jéova gidé so pèp pannan lépòk rwa-ya (gadé zimaj-a osi).

⁸ Plizyèr lannen apré sa, Jéova sèrvi jij pou gidé so pèp. Épi pannan lépòk rwa-ya, i sèrvi profèt-ya. Sèrten rwa swiv yé konsèy. Parèkzanp, lò Jéova fè profèt Natan korijé rwa David, i asèpté sa korèksyon-an ké imilité (2 Sam. 12:7, 13 ; 1 Chron. 17:3, 4). Rwa Jozafat swiv dirèksyon profèt Jaazyèl, é i ankourajé pèp Jida-a ‘gen lafwa annan  profèt [Bondjé]-ya’ (2 Chron. 20:14, 15, 20). Lò sitiasyon-an té rèd, rwa Ézékyas doumandé profèt Izayi idé l’ (Is. 37:1-6). Chak fwa roun rwa té ka chaché dirèksyon Jéova-a, Jéova té ka béni l’ é nasyon-an té ka viv an sékirité (2 Chron. 20:29, 30 ; 32:22). Yé tout té divèt konprann ki Jéova té ka sèrvi profèt-ya pou gidé so pèp. Pourtan, près tout rwa-ya ké Israyélit-ya réfizé kouté yé (Jér. 35:12-15).

KOUMAN JÉOVA GIDÉ KRÉTYEN-YAN ANNAN 1^é SYÈK-A

9. Kimoun Jéova sèrvi pou gidé krétyen-yan annan 1^é syèk-a ? (gadé zimaj-a osi).

⁹ Annan 1^é syèk di nou lépòk, Jéova fè prémyé asanblé krétyen-an. Kouman i gidé prémyé krétyen-yan ? I chwazi Jézi pou i sa Chèf asanblé-a (Éph. 5:23). Mé, Jézi pa gidé chak disip li menm. I chwazi apot-ya ké plizyèr ansyen osi ki té Jérizalèm pou gidé asanblé-a (Actes 15:1, 2). Anplis di sa, annan chak asanblé yé té ka chwazi dé frè pou yé divini ansyen (1 Thess. 5:12 ; Tite 1:5).

10. a) Kouman près tout krétyen-yan annan 1^é syèk-a té ka wè dirèksyon Jéova té ka bay yé ? (Actes 15:30, 31). b) Tan-lontan, poukisa sèrten pa asèpté sa-ya ki té ka réprézanté Jéova ? (gadé karé «  Poukisa roun ran pa lé rékonnèt ki Jéova ka sèrvi moun pou gidé so pèp ? »).

¹⁰ Kouman krétyen-yan annan 1^é syèk-a réyaji ? Près yé tout pran plézi swiv sa frè-ya té ka di yé fè. Anfèt ‘yé tchò té kontan pas yé té ka rousouvwè ankourajman’ (li Actes 15:30, 31). Mé kouman Jéova ka gidé so pèp jòdla ?

KOUMAN JÉOVA KA GIDÉ NOU JÒDLA

11. Bay roun èkzanp ki ka montré kouman, jòdla, Jéova ka gidé mouché-ya ki ka dirijé so travay.

¹¹ Jòdla osi, Jéova ka kontinyé gidé so pèp. I ka sèrvi so Paròl ké so Pitit, Chèf asanblé-a, pou fè l’. Mé ès nou ka wè prèv ki Jéova ka kontinyé sèrvi moun pou réprézanté l’ ? Wi. Parèkzanp, sonjé sa ki rivé apré 1870. Charles Taze Russell ké sa-ya ki té ka travay ké li, vin konprann ki 1914 té ké sa roun lannen enpòrtan pou rwayonm Bondjé-a (Dan. 4:25, 26). Yé rivé konprann sa paské yé étidyé  plizyèr profési ki annan Labib. Ès Jéova té ka gidé réchèrch yé té ka fè ? Asiré pa pitèt ! An 1914, plizyèr bagaj ki rivé annan monn-an byen montré ki rwayonm Bondjé-a té koumansé dirijé. Prémyé Lagèr mondyal-a pété, é dèyè sa, i té gen maladi, tranblémandétèr ké lafamin (Luc 21:10, 11). Asiré, Jéova té ka sèrvi sa krétyen-yan ki té sensèr pou gidé sa-ya ki té ka adoré l’.

12-13. Kisa frè-ya ki té ka dirijé travay prédikasyon-an pannan Dézyèm Lagèr mondyal-a fè pou bay prédikasyon-an plis balan ?

¹² Sonjé sa ki pasé pannan Dézyèm Lagèr mondyal-a osi. Lò frè-ya ki té ka dirijé prédikasyon-an étidyé Révélation 17:8, yé vin konprann ki sa lagèr-a pa té ké mennen Armagédon, mé ki sa té ké pèrmèt yé fè plis bagaj annan prédikasyon-an. A pou sa sa frè-ya ki té annan syèj mondyal-a fè Galaad, l’Université biblique de la Société Watchtower, menm si, ké sa lagèr-a ki té fin pété, roun projè konsa té rèd pou fè. A sa lépòk-a, sa lékòl-a té ka fòrmé dé misyonèr, sa lé di dé krétyen yé té ké voyé préché épi ansényé bon nouvèl-a annan plizyèr koté asou latè-a. Sèrten misyonèr alé koté yé té voyé yé alòr ki lagèr té ka roulé toujou ! Anplis di sa, pou idé frè ké sò-ya annan asanblé-ya divini pi vayan annan prédikasyon-an, èsklav fidèl ké avizé-a fè le Cours pour le ministère théocratique b. Sa nouvo bagaj-ya préparé sèrvitèr Bondjé-ya pou bi papa travay prédikasyon-an yé té ké gen pou fè.

¹³ Jòdla, nou ka byen wè ki Jéova gidé so pèp pannan sa lépòk-a ki té rèd. Dipi Dézyèm Lagèr mondyal-a, pèp Bondjé-a lib pou préché. Annan plizyèr péyi, roun patché moun anprann konnèt Jéova, é so sèrvitèr-ya ka préché asou tout latè-a.

14. Poukisa nou pouvé fè òrganizasyon Jéova-a ké ansyen-yan lèspri sen-an mété konfyans lò yé ka dirijé nou ? (Révélation 2:1 ; gadé zimaj-a osi).

 ¹⁴ Jòdla osi, frè-ya ki annan Kolèj santral-a lé Jézi gidé yé. Yé lé ki sa yé ka di frè ké sò-ya fè, a sa Jéova ké Jézi ka pansé osi. Épi yé ka sèrvi rèsponsab sirkonskripsyon-yan ké ansyen-yan pou dirijé asanblé-ya c. Frè-ya ki wen é ki ansyen, ké tout ròt ansyen-yan annan asanblé-ya osi, yé annan « lanmen drèt » Kris (li Révélation 2:1). A vré, kou ansyen-yan pa parfè, détan yé ka tronpé yé kò. Moyiz ké Joziyé épi apot-ya osi tronpé yé kò détan (Nomb. 20:12 ; Jos. 9:14, 15; Rom. 3:23). Mé Kris ka byen gidé èsklav fidèl ké avizé-a ké ansyen-yan lèspri sen-an mété, é i ké kontinyé fè l’ « touléjou jistan lafen monn-an rivé » (Mat. 28:20). Donk, nou pouvé fè frè-ya ki ka dirijé travay prédikasyon-an konfyans pas a yé Jéova ka sèrvi pou dirijé nou.

NOU KA TRAPÉ BÉNÉDIKSYON LÒ NOU KA KONTINYÉ SWIV DIRÈKSYON JÉOVA KA BAY NOU

15-16. Kisa to ka anprann ké èkzanp sèrten krétyen ki swiv dirèksyon Jéova-a ?

¹⁵ Lò nou ka swiv dirèksyon Jéova ka bay nou, nou ka jwenn bénédiksyon dipi aprézan. Annou pran èkzanp Robyn ké Andy ki chanjé plizyèr bagaj annan yé lavi pou swiv konsèy èsklav fidèl ké avizé-a bay (gadé dézyèm nòt pou étidyé asou Matthieu 6:22). Sa pèrmèt yé partisipé annan konstriksyon batiman nou ka sèrvi pou adoré Jéova. Robyn ka di : « Détan, nou ka rété annan toupiti koté, é souvan i pa gen lakwizin. Menm si mo kontan fè foto, mo té blijé vandé roun parti di mo matéryèl pou fè foto. Mo kriyé. Mé kou Sara, madanm Abraam, mo té byen désidé gadé douvan, pa dèyè » (Héb. 11:15). Ki bénédiksyon Robyn ké Andy trapé paské yé chwazi sa lavi-a ? Robyn ka di : « Kou nou savé ki nou ka bay Jéova tousa nou gen, nou tchò kontan toubonnman. Épi lò nou ka partisipé annan projè òrganizasyon-an, sa ka bay nou roun lidé di sa nou ké fè annan monn nouvo-a. » Andy ka di osi : « Nou byen kontan pas nou ka fè tousa nou pouvé pou Rwayonm-an ».

¹⁶ Ki ròt bénédiksyon nou ka jwenn lò nou ka swiv dirèksyon Jéova ka bay nou ? Apré lisé-a, Marcia té lé swiv konsèy di divini pyonyé (Mat. 6:33 ; Rom. 12:11). I ka di : « Yé propozé mo di bay mo soumaké pannan kat lannen pou mo  alé linivèrsité. Mé kou mo té lé fè plis pou Jéova, mo chwazi fè roun fòrmasyon pou anprann roun travay ki té ké pèrmèt mo ganyen asé soumaké pou gen sa mo bézwen toupannan mo té ké sèrvi Jéova a plen tan. A té roun bon désizyon menm ! Jòdla mo pyonyé pèrmanan, é kou mo travay ka pèrmèt mo gen asé tan, mo pouvé travay pou Bétèl-a épi fè ròt bèl bagaj pou Jéova. »

17. Ki ròt bénédiksyon nou ka jwenn pas nou ka swiv dirèksyon Jéova ka bay nou ? (Isaïe 48:17, 18).

¹⁷ Détan, nou ka rousouvwè konsèy ki ka protéjé nou pou nou pa tonbé annan trap kontan soumaké ouben kont tout ròt bagaj ki pouvé fè nou dézobéyi lalwa Bondjé. La ankò, swiv dirèksyon Jéova-a bon pou nou : nou gen roun bon konsyans, é nou ka évité enkyété nou kò pou sèrten bagaj (1 Tim. 6:9, 10). Konsa, nou pouvé kontinyé adoré Jéova ké tout nou tchò é i pa gen ròt bagaj ki ka bay nou plis lajwa ké lapè pasé sa (li Isaïe 48:17, 18).

18. Poukisa to byen désidé toujou swiv dirèksyon Jéova ka bay to ?

¹⁸ Jéova ké kontinyé sèrvi moun pou réprézanté l’ épi pou gidé nou pannan gran tribilasyon-an épi pannan mil lannen Jézi ké dirijé, asiré pa pitèt (Ps. 45:16). Ès nou ké kontinyé swiv dirèksyon i ka bay nou menm si nou divèt mété sa nou kontan asou koté ? Sa ké pi fasil pou nou fè l’ si nou ka swiv dirèksyon Jéova-a dipi aprézan. A pou sa, annou toujou swiv sa i ka di nou fè, parèkzanp lò a moun i chwazi pou véyé asou nou ki ka bay nou sa dirèksyon-an (Is. 32:1, 2 ; Héb. 13:17). Wi, annou swiv sa dirèksyon-an, épi annou sir ki toupannan i ka idé nou évité danjé-ya, Sa-la ki ka gidé nou-a, Jéova, ka mennen nou koté nou lé alé-a : lavi pou tout-tan annan monn nouvo-a.