1. Mangted iti ilustrasion a mangipakita no apay a masapul a surotentayo ni Jehova kas Giyatayo.

 IMADYINEM a napukawka iti kabakiran. Napeggad sadiay ta adda dagiti narungsot nga animal, makayakar iti sakit nga insekto, makasabidong a mulmula, ken rangkis. Anian a yamanmo no adda eksperiensiado a giya a tumulong kenka a mangliklik kadagita a peggad! Daytoy a lubong ket kas iti dayta a kabakiran. Nagadu ti peggad a posible a mangdadael iti pannakigayyemtayo ken Jehova. Imbag laengen ta adda perpekto a Giyatayo—ni Jehova. Tultulongannatayo nga umadayo kadagiti peggad tapno makadanontayo iti destinasiontayo—ti biag nga agnanayon iti baro a lubong.

2. Kasanonatayo nga iturturong ni Jehova?

² Kasanonatayo nga iturturong ni Jehova? Kangrunaanna, babaen ti naisurat a Saona, ti Biblia. Ngem mangus-usar met kadagiti tattao a mangigiya kadatayo. Kas pagarigan, us-usarenna “ti matalek ken masirib nga adipen” tapno mangipaay iti naespirituan a taraon a makatulong kadatayo a mangaramid kadagiti nainsiriban a desision. (Mat. 24:45) Us-usaren met ni Jehova ti dadduma a makabael a lallaki a mangigiya kadatayo. Kas pagarigan, mangipapaay dagiti manangaywan iti sirkito ken dagiti panglakayen iti pammaregta ken instruksion a makatulong kadatayo kadagiti narigat a tiempo. Agyamyamantayo ta nagsayaat ti panangigiya kadatayo ni Jehova kadagitoy delikado a maudi nga al-aldaw! Makatulong dayta tapno agtalinaedtayo a gagayyemna ken makapagbiagtayo a naragsak iti agnanayon.

3. Ania ti usigentayo iti daytoy nga artikulo?

³ Ngem baka marigatantayo no dadduma a mangsurot iti panangigiya ni Jehova nangruna no dagiti imperpekto a tattao ti mangyallatiw iti dayta. Apay? Baka ditay magustuan ti balakadda kadatayo. Wenno nalabit mariknatayo a saan a nainsiriban ti  instruksion a maawattayo ken ipapantayo a saan a naggapu ken Jehova dayta. Kadagita a tiempo, nangnangruna a masapul nga agtalektayo a ni Jehova ti mangidaldalan iti ilina. Kanayon a pagsayaatantayo no surotentayo ti panangiwanwanna. Tapno mapabileg ti panagtalektayo, ilawlawag daytoy nga artikulo (1) no kasano nga inturong ni Jehova ti ilina idi tiempo ti Biblia, (2) no kasano nga iturturongnatayo ita, ken (3) no kasano a pagsayaatantayo no kanayon a surotentayo ti panangigiyana.

NO KASANO NGA INTURONG NI JEHOVA TI NASION TI ISRAEL

4-5. Kasano nga impakita ni Jehova a ni Moises ti us-usarenna idi a mangigiya iti Israel? (Kitaen ti ladawan iti akkub.)

⁴ Dinutokan ni Jehova ni Moises a mangidaulo kadagiti Israelita a pumanaw iti Egipto. Inikkanna met dagiti Israelita iti nalawag nga ebidensia nga iturturongna ida babaen ken Moises. Kas pagarigan, nangipaay ni Jehova iti sinan-adigi nga ulep iti aldaw ken sinan-adigi nga apuy iti rabii. (Ex. 13:21) Sinurot ni Moises dayta a sinan-adigi nga ulep a nangiturong kenkuana ken kadagiti Israelita iti Nalabaga a Baybay. Kasta unay ti buteng dagiti tattao idi impagarupda a napupokdan iti nagbaetan ti baybay ken kadagiti kumamkamat nga armada ti Egipto. Impapanda a kamali ti panangipan kadakuada ni Moises iti Nalabaga a Baybay. Ngem saan a kamali dayta. Talaga a kayat ni Jehova nga iturong ti ilina sadiay babaen ken Moises. (Ex. 14:2) Kalpasanna, insalakan ida ti Dios iti makapaamanga unay a pamay-an.—Ex. 14:​26-28.

⁵ Iti 40 a tawen, intultuloy ni Moises a sinurot ti sinan-adigi nga ulep a mangiturong iti ili ti Dios iti let-ang. a Adda idi tiempo nga inkabil ni Jehova ti sinan-adigi nga ulep iti ngato ti tolda ni Moises, isu a makita dayta ti amin nga Israelita. (Ex. 33:​7, 9, 10) Manipud iti dayta a sinan-adigi nga ulep, nakisarita ni Jehova ken Moises, sa impakaammo met ni Moises kadagiti tattao dagiti instruksion ti Dios. (Sal. 99:7) Adda nalawag idi nga ebidensia dagiti Israelita a ni Moises ti us-usaren ni Jehova a mangigiya kadakuada.

6. Ania ti reaksion dagiti Israelita iti panangiturong ni Jehova? (Numeros 14:​2, 10, 11)

⁶ Nakalkaldaang ta kaaduan nga Israelita linaksidda ti nalawag nga ebidensia a ni Moises ti us-usaren ni Jehova kas pannakangiwatna. (Basaen ti Numeros 14:​2, 10, 11.) Maulit-ulit a dida binigbig ti akem ni Moises. Kas resultana, dayta a henerasion dagiti Israelita ket saan a napalubosan a sumrek iti Naikari a Daga.—Num. 14:30.

7. Mangted kadagiti pagarigan dagidiay nangsurot iti panangigiya ni Jehova. (Numeros 14:24) (Kitaen met ti ladawan.)

⁷ Nupay kasta, adda dagiti Israelita a talaga a nangsurot iti panangigiya ni Jehova. Kas pagarigan, imbaga ni Jehova: “Ni Caleb . . . naimpusuan nga agtultulnog kaniak.” (Basaen ti Numeros 14:24.) Ginunggonaan ti Dios ni Caleb, ken isu pay ketdi ti pinagpilina no sadino iti daga ti Canaan ti kayatna a pagnaedan. (Jos. 14:​12-14) Ti simmaruno a henerasion dagiti Israelita ket nasayaat met nga ulidan iti panangsurot iti panangigiya ni Jehova. Idi a ni Josue ti nadutokanen a lider dagiti Israelita a kasukat ni Moises, “nagdakkel ti panagraemda kenkuana bayat a sibibiag.” (Jos. 4:14) Kas resultana, binendisionan ida ni Jehova babaen ti panangipanna kadakuada iti daga nga inkarina.—Jos. 21:​43, 44.

8. Ilawlawag no kasano nga inturong ni Jehova ti ilina idi tiempo dagiti ar-ari. (Kitaen met ti ladawan.)

⁸ Adu a tawen kalpasanna, nangdutok ni Jehova kadagiti uk-ukom a mangiturong iti ilina. Kalpasanna, bayat ti tiempo dagiti ar-ari, nangdutok ni Jehova kadagiti propeta a mangigiya  iti ilina. Impangag dagiti matalek nga ar-ari ti balakad dagiti propeta. Kas pagarigan, sipapakumbaba nga inawat ni Ari David ti panangkorehir ni propeta Natan. (2 Sam. 12:​7, 13; 1 Cron. 17:​3, 4) Sinurot ni Ari Jehosafat ti panangiwanwan ni propeta Jahaziel ken pinaregtana ti ili ti Juda nga ‘agtalekda kadagiti propeta’ ti Dios. (2 Cron. 20:​14, 15, 20) Idi nariribukan ni Ari Ezekias, nagpatulong ken propeta Isaias. (Isa. 37:​1-6) Kada suroten idi dagiti ar-ari ti panangidalan ni Jehova, nabendisionanda ken naprotektaran ti nasionda. (2 Cron. 20:​29, 30; 32:22) Nalawag koma idin iti amin nga us-usaren ni Jehova dagiti propetana a mangiturong iti ilina. Ngem kaaduan kadagiti ar-ari ken dagiti umili dida impangag dagiti propeta ni Jehova.—Jer. 35:​12-15.

NO KASANO NGA INTURONG NI JEHOVA DAGITI NAGKAUNA A KRISTIANO

9. Siasino dagiti inusar ni Jehova a mangiturong kadagiti Kristiano idi umuna a siglo? (Kitaen met ti ladawan.)

⁹ Idi umuna a siglo C.E., binuangay ni Jehova ti kongregasion Kristiano. Kasano nga inturongna dagiti nagkauna a Kristiano? Dinutokanna ni Jesus kas ulo ti kongregasion. (Efe. 5:23) Ngem saan a personal nga inturong ni Jesus ti tunggal adalanna. Inusarna dagiti apostol ken lallakay idiay Jerusalem a mangidaulo. (Ara. 15:​1, 2) Nadutokan met dagiti panglakayen a mangigiya kadagiti kongregasion.—1 Tes. 5:12; Tito 1:5.

10. (a) Ania ti reaksion ti kaaduan a Kristiano idi umuna a siglo kadagiti instruksion a naawatda? (Aramid 15:​30, 31) (b) Apay a saan a binigbig ti dadduma idi tiempo ti Biblia dagiti inusar ni Jehova a mangidalan kadakuada? (Kitaen ti kahon nga “ Apay a Saan a Binigbig ti Dadduma ti Nalawag nga Ebidensia?”)

¹⁰ Ania ti reaksion dagiti Kristiano idi umuna a siglo? Naragsakan ti kaaduan a nangsurot kadagiti instruksion a naawatda. Kinapudnona, “naragsakanda idi nabasada ti makaparegta a sasao.” (Basaen ti Aramid 15:​30, 31.) Ngem kasano nga iturturong ni Jehova ti ilina ita?

NO KASANO NGA ITURTURONGNATAYO NI JEHOVA ITA

11. Mangted iti pagarigan a mangipakita nga iturturong ni Jehova dagiti mangidadaulo ita.

¹¹ Agtultuloy nga iturturong ni Jehova ti ilina agingga ita. Ar-aramidenna dayta babaen ti Saona ken ti Anakna, ti ulo ti kongregasion. Adda kadi ebidensia nga agtultuloy nga us-usaren ti Dios dagiti tattao a mangiturong iti ilina? Wen. Kas pagarigan, kitaentayo ti napasamak kalpasan  ti tawen 1870. Naawatan ni Charles Taze Russell ken dagiti kakaduana a nagpateg ti tawen 1914 para iti pannakaipasdek ti Pagarian ti Dios. (Dan. 4:​25, 26) Nakagtengda iti kasta a konklusion ta inadalda dagiti padto ti Biblia. Inwanwan kadi ni Jehova ti panagsukimatda iti Biblia? Nalawag a kasta. Dagiti napasamak iti lubong idi 1914 paneknekanna a nangrugin nga agturay ti Pagarian ti Dios. Nangrugi ti Gubat Sangalubongan I, kasta met dagiti makapapatay a sakit, ginggined, ken bisin. (Luc. 21:​10, 11) Talaga nga inusar ni Jehova dagidiay a napasnek a Kristiano a lallaki a tumulong iti ilina.

12-13. Ania dagiti naaramid nga urnos bayat ti Gubat Sangalubongan II tapno ad-adu pay a tattao ti makasabaan ken maisuro?

¹² Kitaentayo met ti napasamak bayat ti Gubat Sangalubongan II. Inadal dagiti responsable a kakabsat iti sangalubongan a hedkuarter ti Apocalipsis 17:8. Naawatanda a ti Gubat Sangalubongan II ket saan nga agturong iti Armagedon. Imbes ketdi, addanto tiempo ti talna kalpasan ti gubat isu nga addanto tiempo dagiti Saksi ni Jehova a mangasaba iti ad-adu pay a tattao. Isu nga uray no kasla saan a praktikal nga aramiden dayta idi, impasdek ti organisasion ni Jehova ti Watchtower Bible College (School) of Gilead a mangsanay kadagiti misionero a mangasaba ken mangisuro iti intero a lubong. Naibaon dagiti misionero uray madama ti gubat. Inyurnos met ti matalek nga adipen ti Course in Theocratic Ministry b tapno masanay ti amin a kakabsat iti kongregasion tapno agbalin a nasaysayaat ti panangasaba ken panangisuroda. Dagitoy a pamay-an ti nangisagana iti ili ti Dios para iti ad-adu pay a trabaho.

¹³ No panunotentayo dagita, kombinsidotayo nga inturong ni Jehova ti ilina bayat dayta a narigat a tiempo. Manipud idi Gubat Sangalubongan II, siwayawaya ti ili ni Jehova a nangasaba iti adu a pagilian. Talaga a rimmang-ay ti trabaho.

14. Apay a mapagtalkantayo dagiti instruksion manipud iti organisasion ni Jehova ken kadagiti naapointaran a panglakayen? (Apocalipsis 2:1) (Kitaen met ti ladawan.)

 ¹⁴ Ita, dagiti miembro ti Bagi a Manarawidwid ket agtultuloy nga agpapaiwanwan ken Kristo. Kayatda a dagiti instruksion nga ipapaayda kadagiti kakabsat iyanninawda ti panangmatmat da Jehova ken Jesus iti bambanag. Ken us-usarenda dagiti manangaywan iti sirkito ken panglakayen a mangipaay iti instruksion kadagiti kongregasion. c Dagiti panglakayen a dinutokan ti espiritu ket adda iti “kannawan nga ima [ni Kristo].” (Basaen ti Apocalipsis 2:1.) Siempre, imperpekto ken makaaramid iti kamali dagitoy a panglakayen. Nagkamali met idi da Moises ken Josue ken uray dagiti apostol. (Num. 20:12; Jos. 9:​14, 15; Roma 3:23) Ngem nalawag a makitatayo nga iwanwanwan ni Kristo ti matalek nga adipenna ken dagiti naapointaran a panglakayen. Ken itultuloyna nga aramiden dayta “iti amin nga al-aldaw agingga iti panungpalan daytoy a sistema ti bambanag.” (Mat. 28:20) Naan-anay ngarud a makapagtalektayo iti panangiwanwanna babaen kadagita a naapointaran a mangidaulo kadatayo.

PAGSAYAATANTAYO NO ITULTULOYTAYO A SUROTEN TI PANANGIWANWAN NI JEHOVA

15-16. Ania ti nasursurom iti kapadasan dagiti nangsurot iti panangiwanwan ni Jehova?

¹⁵ No itultuloytayo a suroten ti panangiwanwan ni Jehova, mabendisionantayo uray itan. Kas pagarigan, impangag da Andy ken Robyn ti pammaregta nga itultuloyda a pasimplien ti biagda. (Kitaen ti study note ti Mateo 6:22.) Kas resultana, nakapagboluntarioda kadagiti proyekto a panagibangon kadagiti pasilidad ti organisasion. Imbaga ni Robyn: “Adda dagiti nakail-ilet a nagyananmi nga awan pay ketdi ti kosinana. Adu ti inlakok a gamitko iti panagretrato uray no magusgustuak dayta. Urayak la nakasangit idi. Ngem kayatko a tuladen ni Sara nga asawa ni Abraham a saan a nasayangan kadagiti insakripisiona no di ket nagpokus iti masanguanan.” (Heb. 11:15) Ania ti nasursuro daytoy nga agassawa iti kapadasanda? Imbaga ni Robyn: “Maragragsakankami unay ta ammomi a mait-itedmi ti aminmi para ken Jehova. No agbolboluntariokami kadagiti proyekto ti organisasion, kasla matantannawaganmin ti biagminto idiay baro a lubong.” Umanamong iti dayta ni Andy. Imbagana: “Maragragsakankami ta us-usarenmi ti amin a tiempo ken pigsami para iti trabaho ti Pagarian.”

¹⁶ Ania ti dadduma pay a pagsayaatan no itultuloytayo a suroten ti panangiwanwan ni Jehova? Kalpasan a naggraduar iti hayskul ni Marcia, impapusona ti balakad nga agregular payunir. (Mat. 6:33; Roma 12:11) Imbagana: “Adda nai-offer kaniak a libre a panageskuela iti uppat a tawen iti maysa nga unibersidad. Ngem kayatko  nga ad-adu ti maaramidak para ken Jehova. Isu a nangalaak lattan iti vocational course tapno makasursuroak iti trabaho a mangsuporta iti panagpayunirko. Maysa dayta kadagiti kasayaatan a desisionko. Maragragsakanak itan kas regular pioneer. Ken gapu ta iggemko ti orasko, mabalinko ti ag-commuter volunteer iti Bethel ken maen-enjoy-ko ti dadduma pay nga espesial a pribilehio.”

17. Ania ti dadduma pay a pagsayaatanna no itultuloytayo a suroten ti panangiturong ni Jehova? (Isaias 48:​17, 18)

¹⁷ No dadduma, makaawattayo iti balakad manipud iti organisasion a mangsalaknib kadatayo. Kas pagarigan, pakpakdaarannatayo kadagiti banag a kas iti panangayat iti kuarta ken kadagiti aramid a mangituggod kadatayo a mangsukir kadagiti linteg ti Dios. Uray kadagita a banag, pagsayaatantayo ti panangiturong ni Jehova. Agtalinaed a nadalus ti konsiensiatayo ken maliklikantayo ti adu a problema. (1 Tim. 6:​9, 10) Iti kasta, naimpusuan a makapagdaydayawtayo ken Jehova, ken mariknatayo ti kasta unay a ragsak, talna, ken pannakapnek.—Basaen ti Isaias 48:​17, 18.

18. Apay a determinadoka nga agtultuloy a mangsurot iti panangiturong ni Jehova?

¹⁸ Sigurado nga adda dagiti tattao nga agtultuloy nga usaren ni Jehova a mangiturong kadatayo bayat ti dakkel a rigat ken ti Sangaribu a Tawen a Turay. (Sal. 45:16) Itultuloytayto kadi a suroten ti panangiwanwanda uray no sabali ti kayattayo nga aramiden? Nalaklakatayto nga aramiden dayta no sursurotentayo itan ti panangiturong ni Jehova. Kanayon koma ngarud a surotentayo ti panangiwanwan ni Jehova ken dagiti lallaki a naapointaran a mangaywan kadatayo. (Isa. 32:​1, 2; Heb. 13:17) Bayat nga ar-aramidentayo dayta, naan-anay a makapagtalektayo iti Giyatayo a ni Jehova a tumultulong kadatayo nga umadayo kadagiti peggad tapno makadanontayo iti destinasiontayo—ti biag nga agnanayon iti baro a lubong.